Wednesday, 27 February 2008

مش انا اكتشفت اني نصاب؟


مش انا طلعت نصاب؟
اه بجد
قريت في الجورنال ان انا نصاب
لا ومش اي نصاب
دة انا نصاب جامد قوي....ومتخصص نصب ع البنات...لا وايه كمان...ومتخصص نصب ع الانترنت
والحمد لله انها جت لحد كدة
كنت ممكن اطلع اني بقلب البنات ومش بعيد كمان اطلع اني بستدرجهم واسرق فلوسهم واغتصبهم كماااان
عايزين تعرفوا الحكاية؟
اقول لكم من البدايـــــــــــــــــــــــــــــــــــــــــة
انا متعود كل يوم ثلاثاء اني اشتري جورنال اسمه وشوشة
وشوشة دة جورنال فني اجتماعي خفيف لطيف بحب اقرأه من باب التسلية والخروج من موود الشغل والصحف السياسية
قاعد في امان الله في عربيتي وبأتصفح الجورنال بسرعة وبأوصل لصفحة 18 واذا بي اجد المفاجأة الكبرى
صورتي في الجورنال
في البداية لعدة ثواني جالي حالة لخبطة لدرجة اني شبهت ع الصورة ومعرفتش نفسي...لحد ما مخي جمع تاني واتأكدت ان هو انا
بعد ما فوقت شوية من صدمة وجود صورتي في جريدة فنية على الرغم اني مش فنان ولا لاعب كرة ولا نجم من نجوم المجتمع....قلت اشوف الناس دي حاطة صورتي ليه من الاساس
وهنا كانت الطامة الكبرى

احنا شباب نصاب

خدوا بالكوا يا بنات من شباب اليومين دول

اكتشفت ان انا احد اربعة نماذج لشباب اليومين دول النصاب اللي كاتب الموضوع مشكورا قرر انه يحذر اخواته البنات مننا
وتحت صورتي اللي احتلت الحجم الاكبر بلا فخر لقيت 3 صور ل 3 شباب نصاب زيي كدة بس معرفش حد منهم على الاطلاق
قلت اقرا الموضوع...يمكن يكون في سوء تفاهم ولا حاجة......لقيت ان كاتب الموضوع واسمه محمد حمدي وبالمناسبة انا معرفهوش اصلا بيحذر البنات من شباب اليومين دول النصابين اللي بيصنفهم ل 4 تصنيفات طبقا طبعا لخبرته العريضة وحكمته البالغة الى
النصاب الرومانسي اللي بيسبل بقى وكدة وبيعاني من مشاكل عائلية او عاطفية وكل حواراته رومانسية ودموع
النصاب الروش طحن: اللي بيروح سيتي ستارز باستمرار وبيصيف في مارينا وان كل كلامه عن العربيات وعن البنات وان كل مصطلحاته اجنبية
النصاب المتدين: اللي بيوقع البنات بالدين وقال الله وقال الرسول
النصاب الخبرة:ودة بقى الشاب العملي اللي محدد اهدافه بدقة وبيكلم بنات كتير ومضبط جدول مواعيده
سيبكوا انتوا بقى من كل الهجص دة .....انا مالي بالكلام دة؟
صورتي انا تتحط على موضوع زي كدة ليه؟ومين محمد حمدي دة اصلا؟ومين الناس اللي صورهم معايا في الموضوع دة؟
يا ترى السيد حمدي دة بقى مصنفني في اي نوع من انواع النصب دة....وهو يعرفني منين اصلا؟
وهل من حق اي حد انه ياخد صورة شخصية لاي حد ويألف موضوع عنه
هل يجوز اني اطلع في جورنال واقول احترسوا يا جماعة في واحد حرامي اسمه محمد حمدي...على الرغم اني ماعرفش حد بالاسم دة اساسا
واضح ان الاخ محمد حمدي استفزته الصور اللي في المدونة استفزاز طبقي او فكري او اي نوع من الغيرة وقرر ينتقم بطريقته....بس للاسف هي طريقة اقل ما يقال عنها انها رخيصة وحقيرة
على الرغم واشهد الله ان الغرض من المدونة دي هو فكر بحت....ولا اقصد بالصور دي اي شيء من اللي اتصوره بعقله المريض وفكره الشاذ
الصور دي موجودة في المدونة باعتبار ان المدونة بالنسبة لي هي ارشيف للافكار وارشيف لك لحياتي ليس اكثر ولا اقل
انا ماكتبتش الموضوع دة بغرض التسلية..وربنا يعلم قد ايه انا متضايق...وقد ايه انا عاجز عن فعل شيء يشفي غليلي من شخص اقل ما يقال عنه انه بني ادم عديم الامانة والاخلاق
عايز بعد ماتقروا الموضوع دة تفكروا لو الموقف السخيف دة حصل فيك او فيكي....هيكون موقفك ايه؟
انا فعلا زعلان وغضبان وحزيـــــــــــــــــــــــــــــــــــــــــــــــــــــــــــــــــــــــــــــن
تحديث:
بعض الاصدقاء الاعزاء اكدوا لي ان محمد حمدي المذكور في الموضوع دة شخص اخر غير مدون اسمه محمد حمدي صاحب مدونة دماغي
نعتذر على هذا اللبس الغير مقصود الناتج عن تشابه الاسماء
تحديث2:
اتصل بي الصحفي محمد حمدي اللي كتب الموضوع في جريدة وشوشة واعتذر لي بشدة وقال ان دة ناتج عن سوء تفاهم وانه كلف واحد صاحبه انه يجيب له بعض الصور من ع الفيس بوك واختار بعض الصور ومنها صورتي على اعتبار اني موافق على نشرها على اساس ان ال3 اشخاص اللي صورهم موجودة مع صورتي في الموضوع دة هم من اصحاب صاحبه دة
وبلغني اعتذاره مع وعد بتصحيح الموضوع دة بموضوع تاني اكثر ايجابية في وقت لاحق

73 comments:

  1. ما فهمتش يا أحمد برضه هو انت اتصنفت تحت أي نوع
    :D

    طبعا حاجة تنرفز عادي الكسل في الصحافة معروف في اقتناص أي صورة ليس لها علاقة بالخبر أصلا متهيأ لي انت ممكن ترفع قضية تعويض ..مش باهزر

    ReplyDelete
  2. This comment has been removed by the author.

    ReplyDelete
  3. يا خبر ابيض يا احمد
    ر بجد موقف وحش جدا

    انا بردو كنت هقول زي الباشمهندس عصفور
    انا اعتقد ان من حقك ترفع قضية على الصحفي لأنه استغل صورتك استغلال سيء وبدون اذن

    هي حاجة فعلا رخمة
    بس بردو احمد ربنا ان الجرنان مش مشهور اوي
    :D
    -----

    معلش التعليق اللي فوق كان فيه غلطة نحوية

    ReplyDelete
  4. احمد بس اهدى بس
    هو اكيد الموضوع مستفز ومقرف وأنا لما جبت الجرنان امبارح اتنرفزت جدا واتضايقت من اللى حصل ده
    بس أكيد هيكون فيه حل
    وزى ما التعليقات اللى قبلى قالت أنك لازم تاخد حقك لأن كده فعلا تهريج وحرام جدا ده
    ربنا يسهل وكلنا معاك وربنا معاك قبلنا كلنا وهيظهر الحق

    ReplyDelete
  5. السلام عليكم ..
    بص يا احمد للأسف الصحافة بقت وسط أغلبيته قذرة وعبيطة ..
    اللي ممكن تعمله دلوقتي , أنك تبعتله إنذار على يد محضر انه ينشر إعتذار بحجم المقال اللي نشره ده وموجه ليك شخصياً , وفي حالة لو معملش كده يبقى معرض نفسه للمسائلة القضائية .. ده لو انت عايز تبقى طيب معاه , وممكن تخلي أي محامي غلس يرفع قضية تشهير أو سب وقذف على طول على الجريدة نفسها وسيبه يعيش معاها وياخد هو التعويض اللي هيجيبه ..
    متضايقش نفسك ..

    ReplyDelete
  6. السلام عليكم ورحمة الله وبركاته

    والله حاجه تقرف وتزعل فعلا ، بس الحمد لله ان الجرنال مش مشهور

    اعتقد انه ماكانش يقصد انت كشخص ، بس هو الاستسهال والكسل ، عاوز صور للموضوع بتاعه قام داخل النت وجايب كام صوره واعتقد انه دخل الفيس بوك تحديدا

    لو عاوز تاخد حقك وتشفي غليلك فيهم ممكن تعمل زي ما كلهم قالو ارفع قضيه وشحطتهم في المحاكم وهاتنا هانشهد معاك وماتخافش مش هاناخد منك فلوس
    :-)



    واديك يا سيدي بقيت نصاب عالمي وماعادش حد هايعرف يكلمك

    تعيش وتاخد غيرها
    :-)

    ReplyDelete
  7. أخويا أحمد سمير
    بالأصالة عن نفسي و بالنيابة عن شعب مملكة بلوجسبوت الديموقراطية الشعبية العظمى - دا لو سمحتم طبعا يا جماعة - باقولك ان اللي حصل من الجريدة المغمورة الصفراء دي اسلوب غير محترم لتغطية موضوع صحفي .. انا تخيلت في البداية انهم خادوا كلام منك و انهم حرفوا فيه كتير فزعلت لكن انهم ياخدوا صورة من غير ما تعرف ويحطوها على ريبورتاج حقير زي ده .. فدا شيء لا يسكت عليه وينبغي انك تتخذ اجراء قانوني للتعويض المادي و المعنوي عما حدث دا حقك القانوني
    لكن انا أرى من زاوية اخرى للموضوع ان صورتك دخلت حيز آخر لما يشار اليها فبي موضوع زي ده فدا بيعكس مقدار الجاذبية و الرومانسية اللي في ملامح وجهك يا احمد يا سمير اللي ممكن تكون كافية عند اي حد انه يكون محطم قلوب العذارى يا ابو حميد
    ههههههههه

    خالص تحياتي
    احمد

    ReplyDelete
  8. أنا شخصيا لو حصل الموضوع ده معايا هأرفع قضية تشهير فورا وأطالب كمان باعتذار رسمي وتعويض 100 ألف جنية ع الأقل ...متسكتش على حقك وأرفع عليهم قضية فورا
    خالص تحياتي

    ReplyDelete
  9. ابو حميد

    الفرق بين الحرامي والنصاب .. ان الحرامي شخصية مبهدلة وغير حليق باين عليه الإجرام غالبا واخد مطوة في وشه او رقبته
    أما النصاب فهو شخص شيك وسيم يرتدي نضارة شمسية انيقة ويبدو ان التحرير الفني للمقال وجد فيك هذه الصفات الجميلة التي تصلح كنموذج للنصاب

    محتمل ان يكون محمد حمدي هو صديقنا المدون محمد حمدي صاحب مدونة دماغي
    http://demaghy.blogspot.com/
    حيث أن له كتابات متعددة في الدستور وكلمتنا
    انا باقول احتمال انه يكون هو

    نيجي للجد
    ليست تلك هي المرة الاولي لأن يستغل صورة أحد المدونين في موضوع ليس له به علاقة من قبل
    حدث هذا مع رشا صاحبة مدونة أي حاجة في موضوع عن التحرش الجنسي في صوت الامة ووضعت صورة التقطت لها على سلم النقابة في احد المظاهرات وهي تبكي
    على انها احدى التي تم التحرش بها جنسيا وتبكي بعد التحرش
    إقرأ هنا
    http://ay7aga.manalaa.net/node/23#comment
    وهنا
    http://malek-x.net/node/327

    أعتقد انه لم يتم الاعتذار لها رسميا بالرغم من وعد رئيس التحرير وائل الابراشي بذلك

    ولكني افضل الاتصال بالجريدة اولا مطالبا نشر اعتذار ونشوف النتيجة هاتكون ايه وبناء عليه يتم تحديد الخطوة التالية

    ReplyDelete
  10. لو انا منك مسيبش حقى واللة واطلع عين الصحفى دة وكلة بالقانون


    شكرا وعلى راحتى

    ReplyDelete
  11. This comment has been removed by the author.

    ReplyDelete
  12. من حقك تزعل طبعا

    ومن حقنا كلنا نزعل ونتوقع يحصل لاي حد فينا الموقف ده خصوصا ان عدد غير قليل من الصحفيين المحسوبين زورا على كشوف الصحافة يكتبون موضوعاتهم بهذه الطريقة وينقلون بمنتهي البجاحة مايكتبه الغير وينسبوه لانفسهم

    انا من راي عصفور المدينة

    لازم ترفع عليه قضية

    ReplyDelete
  13. ولو إني أول مرة أسمع عن الصحيفة وشامم ريحة مش لطيفة .. لكن اللي حصل ده بيحصل عادة وكتير من الصحفيين بيحتاجوا صور، يلطشوا أي حاجة والسلام
    ومين عارف اللي كتب الكلام ده لقى صورتك فين :-)

    النقطة التانية هي إنه طالما الجريدة نفسها صغيرة مش شايف داعي لحكاية المحضر أو الاتجاه القانوني .. لأنها أساسا مش مستحملة :-)
    وانت ممكن تستفيد من الموقف بوضع موبايلك جنب الصورة خصوصا في موضوع طري زي ده :)

    الموضوع جايز ينرفزك أوي .. ولكن عليك التعامل مع جهلاء الصحافة للأسف، وأتمنى ما يكونش أخ محمد حمدي اللي عملها، علشان هتبقى وحشة في حقه، كلمة ظريفة منك في التليفون وتدي له كلمتين عتاب وأفتكر الموضوع هيصفى

    بالمناسبة يا ريت يا ريت أي واحد ما يحطش أي بيانات شخصية على النت عموما، لسهولة لطشها من أي مكان
    ولا تليفون ولا صورة ولا عنوان بيت ولا أي حاجة
    وده الدرس اللي ممكن نستفيده من حلقتنا النهاردة :-)

    ReplyDelete
  14. بعد ما قرأت الكلام ..

    رأيي أن ديه قلة أدب

    يكتب الكلام العبيط ده هوا حر بس ..يجيب صورة من علي النت ويحططها دا يبقي أستخفاف بالناس

    ربنا يكون في عونك ان شاء الله

    موقع البتاع ديه اهه
    http://www.washwasha.org

    كل واحد المفروض يبعت ايميل يطالبهم بأعتذار

    ReplyDelete
  15. طبعا الموضوع مستفز بدرجه كبيره وانا بقولك يا احمد اياك تسيب حقك
    لان دى ناس شهرة بيك

    اما عن محمد حمدى فأنا طبعا اتأكدت منه شخصيا انه مش هو صاحب الموضوع
    واظن انه تشابه اسماء مع شخص اخر

    يا احمد الموضوع بجد متسكتش عليه
    واياك تسيب حد يستغلك بالشكل ده
    واظن ان فى ناس هنا كتير بيوافقونى الرأى ده

    تحياتى لك أخى

    ReplyDelete
  16. يا جماعة بلاش نقول أسماء حد ونظلم حد معانا
    اللى كتب الموضوع مش هو محمد حمدى المدون
    ده تشابه اسماء بس
    ياريت بلاش نقول حاجة من غير ما نتأكد

    ReplyDelete
  17. هو فعلا موقف سخيف
    أفتكر إنك ممكن ترفع على الجريده دي قضيه

    طبعا لك حق تزعل

    تحياااااااتي

    ReplyDelete
  18. ياريت تشوف البوست دة عشان تعرف الحقيقه

    وشكرا للتنويه بتاعك ان الكاتب فى وشوشه غير المدون محمد حمدى

    http://demaghy.blogspot.com/2008/02/blog-post_27.html

    تحياتى

    ReplyDelete
  19. لو لك صاحب محامى ارفع عليهم قضيه

    وده على فكره اقل عقاب عشان تشترى هذا الورق المتسخ

    ReplyDelete
  20. حصل خير يا باشا ما تزعلش نفسك ..دول ناس حقودة ومستغلة وما بتصدق

    واعتقد كلنا عارفين ان الصحافة ف مصر قرأنا عليها الفاتحة من زماااااااااان اوى يعنى


    وبجد مافيش فائدة من اتخاذ اى اجراء قانونى ضدهم ..مع انى بنصح بكدة ..بس اى اجراء ضدهم داخل مصر هايبقى زى قلته


    وده رأيى



    تحياتى



    واتمنى تكون اعصابك هديت


    :)

    ReplyDelete
  21. الف الف مبرووووووووووووووووك تصدق انى فرحتلك جدا مبروك يا احمد اتشهرت يا بوحميد وصورك نورت لجرايد لا واية وقعت واقف الجرنان مليانبوسى سمير وروبى وهيفا انت محظوظ باين عليك يا بختك وبعدين حد يطول يبقى نصاب؟ داحتى النصاب اخف دم ف المجرمين واشيكهم كمان وبعدين احنا نصبر شوية لما نسمع راى الاخ الكاتب الفصيح ممكن تكون علقت البت بتاعتة او فضلتك علية مما ادى ان حالتة النفسية ساءت وبقى بيخرف واكيد كل اللى يعرفوك عارفين ان الكلام دة بعيد عن الواقع وحد مريض بيعبر عن حقدة ولا يهمك يا فندم ويا ريت تعمل بس minipollعشان من حق الناس تحدد انت اى نوع فيهم؟ وتعيش وتاخد غيرها يا ؟ دكتور

    ReplyDelete
  22. Dear Ahmad,

    Two Solutions :

    1. Etlob men ra2is ta7rir elgarida e3tezar RASMY f elgarida we ya ret f awell saf7a , we dah as soon as possible.

    2. Law dah ma7aslhsh, bala3' elshorta we elqanon ma3ak, 3alshan dah esmoh TASHIR.

    3. We law lik 7ad mohem f garida tanya aw TV aw 7aga keda like 90 deqiqa aw el3ashera Masa2, momken te2ol 3ala elmawdo3 dah , we keda momken elgarida te7'af gedan we isa tedilak e3tezar rasmy.
    we Rebana m3ak

    O7'tak Sahrana

    ReplyDelete
  23. طبعا عندك حق انك تضايق
    بس هو الواضح انه استخدم الصور كموديل مش انه بيذر البنات من اصحاب الصور
    يعنى لانه اكيد مكتبش اسماء و لا نوه انك صاحب المدونة الفلانية و كده

    معلش يا احمد و لا يهمك
    معتقدش ان حد غيرك هياخد باله من انك صاحب الصورة غيرك

    الموضوع ده فكرني بفيلم اجنبي كان فيه مصور عاوز يعمل معرض فني و بعدين صور حبيبته كموديل و هي في اوضاع كده يعني هي رفضت و كانت خايفة قوي

    المهم يوم افتتاح المعرض كانت خايفة تروح و ازاي هتقابل الناس و هي صورها موجوده ف المعرض

    المهم راحت و وقفت جنب الصور و سألت بعض الناس عن رايهم في الصور قالوا تحفة و مثيرة و معرفوش انها صاحبة الصور

    و لا يهمك يا ابو حميد
    عقبال كده ما نشوف صورك ف الصفحة الفنية او الرياضية ، على حسب ميولك بقى

    تحياتي
    كريم عزمي

    ReplyDelete
  24. والله يا احمد بجد شئ سخيف ورخيص جدا
    والصحافه دي معروفه
    في جريده اسمها الطريق سرقت بوست من عندي ونزل بالحرف وكتبوا عليه اسم صحفي من عندهم
    بس للاسف كنت خارج مصر ومعرفتش اوصل لحاجه لما نزلت
    انا رأئي تتصل بالجريده وتعمل معاهم مشكله

    ReplyDelete
  25. هههههههههههههههههههههههه
    ههههههههههههههههههههههه

    معلش يابو حميد والله ما قادر امسك نفسي من الضحك
    هههههههههه
    والله ماعارف اقولك ايه
    -------
    حبه جد بقى
    انت تروح توكل محامي وترفعو قضيه على الجرنان الاصفر ده وتطالب بتعويض مادي وأدبي
    الادبي انهم ينزلو خبر بنفس الحجم انك صاحب الصورة وانك ماتعرفش الحوارات دي خالص ولا تعرف حد اسمه فلان الفلاني اللي كتب الخبر
    والتعويض المادي قدره نفس قيمة الصفحه دي لو كانت اتاخدت مساحه اعلانيه

    القضيه مضمونه وحقك مضمون
    دوس ياعم



    ملحوظه
    ماتنساش اخوك في كارت موبينيل بتلتمية جنيه




    سلاموووووووووووز

    ReplyDelete
  26. بقول لك إيه يا أبو حميد
    ماينفعش كده خالص
    أتصل بالجريدة و أعرف منهم السبب في نشر صورتك و أتخذ كل الإجراآت القانونية
    و كلنا معاك
    KING TOOOT

    ReplyDelete
  27. اطلع من دول
    بتدارى على ايه
    شلك برده كان باين
    دنجوان وسارق قلوب العزار يا وحش
    ههههههههههههههه

    بس كويس انهم ماحطوش شريط اسود على عينك ولا الحاجات دى


    بس كلام بجد بعيد عن الهزار ده

    ماتسيبش حقك
    وصعد الموضوع .. مش لازق قضية وحاجات كده علشان الجرنان مش يتشهر

    بس يتفضح المحرر ده وتروح الجريدة وتشوف البنى آدم الى عمل الموضوع ده وتعلمه الادب

    واي خناقة ... بجد لو محتاج مساعدة مافيش مشكلة

    ReplyDelete
  28. لا حول ولا قوة الا بالله امال لو كانت بنت الى حاطه صورتها ع المدونة بقا كانو عملو فيها ايه مادام عملو كده فيك وربنا عالم مخها تعبان هو ممكن تكون عجبته صورتك بالنضاره وحس انها معبره عن الشاب الرومانسى او الروش هههههههه وكان عايزة صورة واقعيه ربنا يهدى المهم متسبش حقكك

    ReplyDelete
  29. عصفور المدينة:
    تقريبا انا ميكس من كل هذه الانواع الخطيرة من النصابين
    وانا اقترح ان يكون اسمي من هنا ورايح
    MR X
    تحياتي

    ReplyDelete
  30. الام وامال:
    اي نعم هو الجورنال مش مشهور قوي...بس بيتقري ع الاقل
    وسواء كان مشهور او لا فالموقف فعلا محرج وسخيف
    ولا يهمك المدونة كلها تحت امرك
    تحياتي

    ReplyDelete
  31. BOSBOS:
    انا بجد مش عارف اقول لك ايه غير الف الف شكر على وقفتك معايا
    فعلا
    الصداقة كنز لا يفنى
    تحياتي

    ReplyDelete
  32. HEDOO2:
    للاسف انا مش عندي وقت لكل الاجراءات دي على الرغم من اهميتها وصحتها فعلا
    بس من الواضح فعلا ان الصحافة وصلت لمرحلة مزرية فعلا
    اول مرة افهم يعني ايه صحافة صفراء فعلا
    تحياتي

    ReplyDelete
  33. خمسة فضفضة:
    اكيد هو مش يقصدني شخصيا يا دكتورة بس الصورة بتاعتي وبالتالي انا المقصود باعتباري صاحب الصورة
    الوقت هو اللي محجمني اني اعمل كدة فعلا
    تحياتي

    ReplyDelete
  34. موجة:
    ماهو انا برضة اول ما لمحت صورتي تصورت انهم واخدين كلام من المدونة او بيتكلموا ن المدونة
    اتاري الموضوع طلع اكبر بكتييييييييير
    انا بقيت
    WANTED
    ومعظم منظمات البنات وجمعية المرأة المتوحشة بتطالب بالثأر مني
    تحياتي

    ReplyDelete
  35. ياسر حسين:
    ماهو على مااخد ال100 الف جنيه منهم يا فنان
    هصرف 100 الف جنيه زيهم ع المحامي
    ومش بعيد الاقي صورتي كل يوم في صفحة حوادث وقضايا بقضايا مختلفة
    انت عارف الصحافة عندنا نزيهة بشككككككككككككككل
    تحياتي

    ReplyDelete
  36. حضرتك عارفه ان الموضوع يضايق بس معلش غصب عنى ضحكت بجد الموضوع مضحك جدا
    الله يكون فى عونك
    معلش اكيد مدونه ملفته للنظر واكيد صورتك لفتت نظر اللى اخدها
    معلش بجد
    واسفه انى ضحكت سامحنى بجد

    ReplyDelete
  37. دى حاجة سخيفه قوى قوى ولا يهمك بس لازم ينزلو تكذيب المره الجايه انا كنت عند عزاب الروح فى المدونه وقريت الموضوع استفزيت قوى

    تحياتى

    ReplyDelete
  38. ahmed shokeir:
    مش عارف يا استاذ احمد دة مدح ولا ذم؟
    يعني المفروض لما اجي اتصور اتصور مبهدل علشان ابفى بني ادم طبيعي
    هههههه
    انا طبعا بهزر..انا عارف وجهة نظرك
    عموما هو ماطلعش محمد حمدي المدون
    طلع محمد حمدي واحد تاني...وعموما وعلى رأي محمد حمدي..مش اي محمد حمدي يبقى محمد حمدي
    واضح ان الصحافة المصرية في حالة مزرية
    تحياتي

    ReplyDelete
  39. arsenalwy:
    والله المشكلة مشكلة وقت وفراغ
    انا لو امتلك رفاهية وقت الفراغ...انا كنت اتسليت ع المجلة دي والصحفي
    بس من حسن حظهم وسوء حظي اني معنديش وقت ومش فاضي ليهم
    تحياتي

    ReplyDelete
  40. bella:
    وانا اعتقد ان لسة عدد كبير مننا هيحصل فيه حاجات من النوع دة
    على فكرة المدونات بقت مادة خصبة جدا لنقل الاخبار وملأ الصفحات في معظم الجرايد
    وطول ما في كسل واستسهال واستهبال وصحف صفرا وبيضا وحمرا يبقى اكيد هتحصل الحاجات دي كتير
    تحياتي

    ReplyDelete
  41. alfirjany:
    لا والله يا استاذ فرجاني...صورتي كانت في مكان محترم
    اكيد هو جابها من مكان من اتنين
    يا اما من المدونة عندي...يا اما من البروفيل بتاعي ع الفيس بوك
    غير كدة مااعتقدش اني ممكن الاقي صورتي
    ناس كتير فعلا نصحوني باستغلال الموقف باعتباري بقيت احد محطمي قلوب العذارى
    هو عموما ماطلعش الاخ محمد حمدي المدون...الراجل طلع براءة
    نسيت تنبه ع المشاهدين انهم يشربوا اللبن قبل ما يناموا
    تحياتي واحتراماتي

    ReplyDelete
  42. قليل من التفكير:
    الاستسهال والاستهبال حيث انهما شعاري المرحلة
    عموما الف شكر على العنوان اللي انت كتبته
    استفدت منه فعلا وبعت ميل للناس دي
    تحياتي واحتراماتي

    ReplyDelete
  43. شيماء الجيزي:
    الف شكر ليكي يا شيماء
    انا عارف انك قمتي بجهد في الموضوع دة تشكري عليه
    باكرر شكري
    وان شاء الله نردها لك بس اكيد تكون في ظروف احسن من كدة بكتير
    تحياتي واحتراماتي

    ReplyDelete
  44. تعيش وتاخد غيرها ماعلهش بقي ماتشيلش جواك
    انا عن نفسي لما بلاقي صورة في اي مدونة باخدها بإعتبارها علي المشاع زمان الناس قالت عليا حرمياية
    لكن الصراحة مش باخد صور شخصية

    ReplyDelete
  45. من حقك ترفع دعوى سب وقذف للاسف فى صحفيين
    بيبقو مش لاقيين حاجة يكتبوها
    فيتعرضو لاعراض الخلق
    انا من وجهة نظرى عدم اقامتك دعوى
    قضائية تنازل عن حقك
    تحياتى
    واحب اقلك انه اساء لنفسه وللمجلة اللى سمحتلو بده
    قبل مايسىء ليك انت

    ReplyDelete
  46. يا ساتر
    الي هذه الدرجه بات من السهل تشويه صوره الانسان و سمعته
    مصيحتي بجد لا تسمت عن حقك حتي لا تتكرر مثل هذه التصرفات و أنا أعتقد أن الصحفي ده بيحايلك شويتين علي ما تنسي
    بالمناسبه أنا ضفت كومنت في البوست السابق
    :)
    تحياتي

    ReplyDelete
  47. bosbos:
    طبعا
    تم تحديث الموضوع يا بس بس وكتابة الحقيقة واعطاء كل ذي حق حقه
    تحياتي

    ReplyDelete
  48. salwa:
    الحمد لله على كل حال يا سلوى
    الف شكر على اهتمامك
    تحياتي واحتراماتي

    ReplyDelete
  49. mohamed hamdy:
    اولا الحمد لله انك مش محمد حمدي المقصود لان اعتقد ان اخلاقك لم تكن لتسمح ليك بكدة بالاضافة الى ان مدونتك بتقول انك شخصية محترمة
    ثانيا:
    شكرا للتنويه ع الموضوع في مدونتك
    ثالثا:
    يسعدني تشريفك عندي باستمرار في ظروف احسن من كدة
    تحياتي

    ReplyDelete
  50. محمد عبد الغفار:
    في احيان كتير يا استاذ محمد بيكون الورق المتسخ دة له فايدة
    يعني الامر ما يسلمش من تنظيف زجاج...لفة سندوتش...كدة يعني
    تحياتي

    ReplyDelete
  51. oceaneyes:
    الحمد لله اعصابي احسن بكتير منها لحظة كتابة البوست دة
    فعلا انا قررت بعد الاعتذار الشفهي دة اللي هو عديم القيمة اني اكتفي بكدة خاصة اني مش فاضي اعمل اكتر من كدة
    تحياتي

    ReplyDelete
  52. شيكابالا:
    ااااااااااااااااااااااه
    جالك الموت يا تارك الصلاة
    والتور لما وقع كترت سكاكينه
    طبعا في ناس اشترت ييجي 30 او 40 نسخة علشان توزعها ع الحبايب والخلان والاصحاب
    وحد يطول يجاور بوسي سمير وروبي والحلويات دي كلها؟
    دة حتى بيقولوا في الامثال من جاور السعيد يسعد
    وبعدين على فكرة
    مش من مصلحتك اني اعيش واخد غيرهاااا
    هههههه
    تحياتي

    ReplyDelete
  53. الاحساس بالظلم صعب جداً

    وانا مع استاذنا عصفور في ان من حقك انك ترفع قضيه على الجريدة وممكن لو قدرت تتقفل لان في الحاله دي اختفى مصدقيتها

    وماضاع حق الا كان ورائه مطالب

    اتمنى ان يكون ليك دور ايجابي بالنسبه للي حصل عشان ما يتكررشي مع حد تاني

    وبعدين الحمد لله انها جات في راجل مش في بنات

    اتمنى لك الخير والتوفيق

    وبعدين انت عارف النت والي بيحصل عليه مكنشي لازم تنشر صورتك للعالم كدا والاحتياط واجب انا مش بلومك لا سمح الله ولا بقطمك زي ما بيقولوا

    بس المثل بيقول حرص يا استاذ ولا تخونشي ولا انت مش معايا

    ReplyDelete
  54. شيكابلا2 March 2008 at 12:33

    يا جماعة معلش محدش يضغط على احمد ويقولة ارفع قضية وخد حقك لانة مينفعش لان الصحفى هددة بباقى الوثائق الموجودة عندة وتوعدة انة ينشرها والدليل القاطع على كدة الصورة بتاعت المساواة ف التزويغ عدل البنات بتنط صحيح من فوق السور عشان احمد سمير مستنهيم والصحفى الباحث عن الحقيقة صورهم وعشان مياثرش دة على حياة احمد المهنية والعائلية قرر الصحفى انة يسامحة ومينشرش بقية الوثائق عموما عيب متعملش كدة تانى يا احمد ومش كل مرة تسلم الجرة والحمد للة انها عدت على خير ومتنساش تسلملى على هيفاااااااااااا

    ReplyDelete
  55. احمد
    احب اقولك
    طول ما انت لابس النظارة دى هتفضل من المشتبه فيهم على طول
    هى دى الى خلتهم يشطوا فيك و يعملوا عنك تحريات
    الى ما ثبتت الحقيقة

    مش هتدهالى بقى
    :))

    تحياتى

    ReplyDelete
  56. sahrana:
    انا بقى يا سهرانة كان قدامي 3 حلول:
    الاول اني اعمل مشكلة كبيرة واصعد الموضوع بس اكتشفت اني مش فاضي ووقتي مش هيستحمل
    التاني اني اطنش خالص وكأن الموضوع لم يكن وبالتالي ماكنتش كتبت البوست دة
    التالت ودة اللي اخترته هو اني اقبل الاعتذار والتبرير الخايب اللي حصل
    ودة اللي حصل فعلا
    تحياتي واحتراماتي

    ReplyDelete
  57. kareem azmy:
    ماهو يا عم كريم لو كان حطني كموديل في حاجة كويسة كان هيبقى يادار مادخلك شر
    انما حاططني كموديل للنصب
    انا حسيت اني استيفان روستي بعد الموضوع دة
    انا بقى خايف ان ميولي طبقا للموضوع دة توديني لصفحة الحوادث او صفحة الوفيات
    تحياتي واحتراماتي

    ReplyDelete
  58. محمد مفيد:
    لسة يا محمد في مصر مانعرفش يعني ايه ملكية فكرية
    بالنسبة لنا دة اختراع
    تحياتي

    ReplyDelete
  59. sooooo:
    ماهو مش انت لوحدك اللي ضحكت كدة
    معظ اللي علقوا واللي معلقوش كمان عملوا زيك كدة
    انا نفسي بعد ما فوقت من الصدمة والترويع اللي كانوا عندي قعدت اضحك
    تحياتي واحتراماتي

    ReplyDelete
  60. king toooot:
    الجريدة هي اللي اتصلت بيا
    واي اعتذار بقى في اي بتنجان
    على فكرة
    القضية دي كانت عايزة حد فاضي للناس دي...كان هيعمل معاهم احلى شغل
    تحياتي

    ReplyDelete
  61. يااحمد

    انا جيت متاخر اوي كدا ليه

    المهم سيبك انت ولا تدايق نفسك ولا حاجه هو تلاقيه متغاظ منك علشااااااااان
    انت قمر بصراحه الحق يقال
    ........
    ارفع قضيه

    وزة

    ReplyDelete
  62. دة انا غلبااااااااااااااان
    قلوب عذارى ايه يا عم ودنجوان ايه؟
    مفيش الكلام دة
    الف شكر ليك يا منذر باشا
    شايلينك للتقيلة
    تحيااااتي

    ReplyDelete
  63. honda:
    لا لا
    اعتقد ان صور البنات ع النت بيتعمل بيها حاجات اقوى من كدة بكتييييييييييير
    تحياتي

    ReplyDelete
  64. رفقة عمر:
    هو انتي بس اللي ضحكتي؟
    اذا كان انا شخصيا ساعات الموضوع دة بيقلب معايا بضحك
    مابالك بقى بكم التريقة اللي اصحابي اتريقوها عليا
    سيبك انتي كله كوم واللي خطيبتي عملته فيا كوم تانبي
    مفيش داعي للاسف خااااالص
    feel free
    ولك يوم يا ظالم
    تحياتي

    ReplyDelete
  65. ضد الظلم:
    يا باشا الف الف شكر
    ونردها لك في الافراح ان شاء الله
    تحياتي

    ReplyDelete
  66. المفقوعة مرارتها:
    اولا الف سلامة على مرارة حضرتك
    ثانيا مفيش حاجة تستاهل بجد...خدي بالك انتي بس من طحالك ليحصل مرارتك لا قدر الله
    معنتيش تاخدي صور من المدونات تاني
    ههه
    تحياتي واحتراماتي

    ReplyDelete
  67. مدحت محمد:
    والله يا مدحت هي مش مسألة تنازل عن حق ولا كدة اكتر ماهي مسألة وقت مش لاقيه ومش متوافر علشان اسيب شغلي وحياتي واتفرغ لملاحقة صحفي في مجلة ترفيهية
    تحياتي

    ReplyDelete
  68. micheal:
    اللي يعيش ياما يشوف يا مايكل واعتقد ان اللي بيعيش في مصر بيشوف اكتر
    تحياتي واحتراماتي

    ReplyDelete
  69. قبلة الحياة:
    بصي يا سيدتي الفاضلة
    المدونة بالنسبة ليا هي ملخص للحياة للافكار لدنيتي
    الصور اللي انا حاططها هنا بتجمع احداث خاصة بي كل صورة منها ولها قصة وحكاية
    وبما ان المدونة شخصية فبالتالي فهي تعبر عن شخصية صاحبها
    انا متفهم طبعا وجهة نظرك وهي وجهة نظر قيمة بلا شك
    وممكن تصلح لمدونات البنات اكتر من مدونات الشباب
    تحياتي واحتراماتي

    ReplyDelete
  70. شيكابالا:
    هبفا بس؟
    دة انا هسلم لك على كل زميلاتي اللي كانت صورهم معايا في نفس العدد من الجريدة القيمة دي
    بوسي سمير و روبي
    ممكن اتوسط ليكي علشان تتصوري جنبهم
    تحياااتي

    ReplyDelete
  71. rania:
    انا عارف يا رانيا ان انتي عينيك ع النضارة من زماااااااان قوي
    ومش بعيد تكوني ورا الموضوع دة كله
    تحياااااااتي

    ReplyDelete
  72. انين الحزن:
    لا لا لا يا وزة
    اخجلتي تواضعي بجد
    وشي محمر دلوقتي ومكسوف بجد
    على فكرة
    انا خجول بطبعي
    تحياتي واحتراماتي والف شكر

    ReplyDelete
  73. عزيزي أحمد

    اول مره ليا في مدونتك و اكيد انشاء الله مش حتكون الأخيره

    شدني موضوعك يمكن عشان حد قريب مني برضه اتعرضله بشكل مباشر و اتكتب عنه برضه في جريده وشوشه خبر غير صحيح و كتبه اسمه بالكامل و اتصل بالصحفي و اتكلم معاه ووضحله ان كل اللي كتبه عنه معلومات مغلوطه و للأسف جريده وشوشه فقدت مصداقيتها عندي بعد ماكنت بتابعها عشان عدم تحري الصدق في الأخبار اللي بيجبوها

    و قيس علي كده كتير من جرايدنا

    بس انا مبسوطه انك قدرت توضح للصحفي و سمع ليك

    اسفه علي الموقف ده يااحمد بس كويس انك اخدت حقك و ماسكتش

    تحياتي ليك و بتمنالك السعاده و التوفيق دايما

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails