Friday, 22 February 2008

المساواة في التزويغ.....عدل


يااااااااه
التعليم اتغير قوي عن زمان....مش بس التعليم..دة واضح ان سلوك البنات اختلف اختلاف كلي وجزئي في ال 10 سنين الاخيرة
انا كنت في الثانوية العامة من حوالي 12 سنة وبالتحديد سنة 1996
لحد ماكنت موجود في التعليم ما قبل الجامعي...ماكنش لسة مدارس البنات وصلت للمستوى دة
اي نعم كان في بوادر انحراف في اوساط بنات الثانوي...وبدأنا ايامها نشوف حاجات غريبة ماكناش متعودين عليها
تخبلوا ان البنت ايامنا اللي تحط روج وماكياج وهي لسة في ثانوي كانت بتبقى حاجة عيب جدا.....وكانت سيرتها بتبقى على كل لسان
وكل واحد يقابل التاني ويقول له:
شفت فلانة.....تخيل كانت حاطة ماكياج في الدرس النهاردة؟؟؟؟؟؟
وحاجة بقى ايه......فضيحة بجد
والكلام دة مش في ازمنة سحيقة ولا حاجة..دة لحد 1996 مش بعيد قوي يعني
بس واضح ان التطور الرهيب اللي حصل في كل حاجة في حياتنا بيصاحبه برضة تطور رهيب في الانحطاط الاخلاقي
ومش بقصد بالانحطاط الاخلاقي الهروب من المدرسة...انا عن نفسي كنت بنط من فوق السور انا وكل زمايلي على الرغم من اننا كنا في فصول المتفوقين وكمان اخلاقنا كانت بتعتبر مضرب الامثال
انما الانحطاط الاخلاقي بعينه هو ان ظاهرة النط من فوق السور تنتقل لمدارس البنات....يا خبر ابيض
انا مش متخيل ان بنت تتسلق السور وتقف عليه وبعدين تنط من الناحية التانية على مرأى ومسمع من كل الشباب والرجال اللي في الشارع
انا على حد علمي ان البنات زمان كان عندهم حاجة كدة اسمها خجل وحياء...كسوف يعني بالفلاحي
انما الصورة بتقول ان دة كان زمااااااااااااان
وان الجديد دلوقتي ان النط من فوق السور والتزويغ من المدرسة حق لكل طالب وطالبة وان مفيش فرق في كدة بين ولد وبنت
على اساس بقى ان البنت زي الولد ماهيش كمالة عدد
انما السؤال اللي محيرني بجد ومش لاقي له اجابة
يا ترى زي ما النط من فوق السور والتزويغ من المدرسة انتقل لمدارس البنات...يا ترى في حاجات تانية اتنقلت معاه؟
يعني ايه اخبار السجاير والشتائم والمجلات و الكتب الجنسية؟
هنشوفها قريبا برضة في مدارس البنات؟
ولا هي موجودة فعلا حاليا؟
مش عارف والله
واضح ان الدنيا تطورت خالص
وسلم لي على تطوير التعليم

57 comments:

  1. Dear Ahmad, Esma7 li ad7ak.

    Esma7 li kaman a2olak enn so2alak dah 3'arib gedan ...ezay mesh fahem enn elbanat mesh betgarrab elsagyer....aw bet2ra f elgens .. ?!

    3ala fekra nafs elhormonat elly bey7sal laha development at men's body heya heya 3and elbanat at that age....curiosity f kol 7aga...we 7anro7 be3id leh ...
    Ana kont f fasl motfawqat lamma kont f thanwy we fakra kowayes lamma konna f thanwya 3amma...kan ketab LELET ELDo7'LA beyllef 3ala elbanat wa7da wa7da te2rah we tedih lelganbha mesh ma3ana keda ennena banat mesh metrabya...bets2al 3ala elsagayer ...ah sherbna sagayer 3alshan negarrab 3ala sabil eltagroba faqat we dah kan sahl gedan le2en KOL bet masry fih akid wa7ed at least beyd7'an...

    tazwi3' ...ah tab3an zawa3'na we aktar men marra we 7'ososan lamma el7essa aw elmodares yekon TAFEH...

    Ma3a zalek...da7'lna a7san kolayet we meskna a7san manaseb we mafish wa7da f fasly ellah we ra7et kolaya men kolyet elqema.

    2ellet adab mesh bete2as keda..ennama be7agat tanya ketir...
    Ma3alhesh 7atawel 3alik showya elmarra dih...

    ya3ny mathalan : Law elbent zawa3'et 3alshan te2abel shab aw tetskan7 f elsawar3, aw shoftaha betrkab 3arbyet wa7ed we temshy ma3ah...teb2a 3awza atm re2btha...

    Law 3erft ennaha modmna !!! yeb2a ya dahya do2y...le2en dah momken yegib warah balawy enta akid 3aerfha.

    7'od balak...internet and the wide technology 2alab mawazin elzaman dah..ya3ny ma ana mesh fahma enta mest3'arb men eh belzabt dah el3ial f sen 10 senin beyd7'lo 3ala Playboy we yeshofo fih eh ...yeb2a banat f thanway mesh 7a3mlo keda ??!!.


    we ta3ala we 7ot nafsak makan elbent elmzawa3'a...
    1- Elmodars 7omar we mesh benfham mennoh 7aga..
    2- Elmodars magash aslan
    3- Mafish modarsen elnhrda yed7'o 7essas 3alshan yeddo dros..
    4- Ana keda keda lazzem a7adar elmagmo3a/eldares ba3d eldohr la7san elmodares yest2sdny.

    yeb2a tefdal te3mel eh f elmadrsa...maho mafish 7aga teshg3aha 3ala aslan el7odor !!!wade7 kaman enn dih madrasa 7komy ..ya3ny bayza bayza...

    Ana ma3ak ..ennaha gedida neshof banat betzaw3' men sor elmadrasa......bas howa dah eltatwor eltabi3i lel7aga elsa23a ;)

    salam
    Sahrana

    ReplyDelete
  2. اولا لازم احييك علي الموضوع والصوره
    ولكن اذا كان هذا حال مدارس البنات فكيف بمدارس الشباب
    عليه العوض في كل حاجه

    ReplyDelete
  3. قرأت الموضوع بأسى وطبعا الواقع لا يخفى وسوف أمر هنا عدة مرات لأقرأ التعليقات لنستطلع الأوضاع من الداخل

    ReplyDelete
  4. دي آخرة مطالب الغجر..
    مساواة الرجل بالمرأة..
    انا زوغت كذا مرة قبل كده
    :)
    لكــن عمري ما ظنيت ان واحدة بنت تعمل كده
    ياريت الآباء المنهمكين في الدنيا ..يسألوا عن ولادهم ويعرفوا اخبارهم
    والا هيضيعوا
    قال النبي-ص-
    كفى بالمرء إثما أن يضيع من يعول

    ReplyDelete
  5. دلوقتي بس جمعيات حقوق المرأة تقدر تفتخر بنفسها لمستوي المساواة بين المرأة والرجل اللي وصل حتي للتزويغ من فوق السور

    بس بجد الصورة فكرتني بأيام الثانوي والنط من فوق السور ...

    تحياتي

    ReplyDelete
  6. هههههههههههههه
    الصوره تحفه

    ReplyDelete
  7. هو طبعا مستوى التعليم والأخلاق بقى صفر
    ومش أى صفر والله
    انا بقى بشتغل فى مدرسة أعدادى حضرتك مش ثانوى ولأول مرة بعد ثلاث سنين أشتغل مع بنات
    يا سلام على اللى بشوفه قدامى وأخرها خناقة بين كام طالبة وبالأيد وواحدة وشها متبهدل وكل ده علشان ولاد اه ولاد
    تقريبا فيه كام واحدة منهم بيعرفوا كام ولد والتانيين بيتريقوا عليهم قامت الخناقة والمشكلة انه فيه واحدة كانت واقفة بعيد مالهاش فى حاجة وأضربت ف النص والموضوع كبر والبنات بقى عاملين عصابتين وبيقفوا لبعض على ابواب الفصول والمدرسة يعنى بنات ولسة فى اعدادى وعاملين كده تخيل لما يوصلوا ثانوى هيبقوا ازاى ولا الجامعة ؟؟؟؟

    وبالنسبة للناس اللى بتقول جمعيات حقوق المرأة ياريت ما ندخلش الامور فى بعضها اولا الناس اللى عاملةا لجمعيات دى ما هياش أغلبية الشعب ولا هيا حتى نصه يبقى ما ينفعش نعمم الكلام على كل الستات وانا عن نفسى بريئة من الناس دى لانهم مش زينا ولا يمتوا لنا بصلة
    المفروض نبص لكارثة أحنا بقينا عايشين فيها المجتمع كله بقى ضايع سواء بنات او ولاد وياريت نلاقى حل


    تحياتى لك

    ReplyDelete
  8. اعتقد ان مدارس البنات بقى فيها كده واكتر من كده وكل اللى انت عاوز تقوله قوله

    مش فاهمة دا عيب فى التربية فى البيوت ولا اهمال فى المدارس نفسها

    المهم ان نمط المجتمع بدأ يتغير وخلاص وما اصعب ان الواحد يشوف صورة زى دى


    بس دا لا يمنع ان البنات مقاصيف الرقبة اللى بيعملوا كده لسه قليلين واقل مما تتخيل

    البنات الكويسة اللى بتحافظ على العادات والتقاليد لسه موجودة .. وربنا يحفظهم



    تحياتى

    ReplyDelete
  9. ههههه...الدنيا بتطور بينا

    احب ابشرك واقولك ان السجاير والشتايم ماشية زي الفل بين البنات بس لسة مش بتظهر قدام الولاد غير على استحياء

    اما موضوع الكتب والمجلات الجنسية فمعنديش عنده فكرة..لكن هو لسة في حد بيدور على مجلات بعد ما الكمبيوتر دخل كل بيت و مدرسة!!؟؟

    المستقبل مشرق جدا جدا جدا

    :D

    ReplyDelete
  10. الصورة بتاعتك دي كارثه
    .
    .ربنا يستر علينا كام سنه جايين

    ReplyDelete
  11. بالنسبه لي مش فارقه معايا اذا كان الطلاب المزوغين بنات ولا ولاد و حتي لو دخلت المجلات الجنسيه مدارس البنات فتبقي المصيبه واحده عندما تكون في مدارس البنبن
    تحياتي

    ReplyDelete
  12. اهو انتو كده يا مدونين
    اي والله انتو كده
    - قال يعني انا مزين مش مدون -
    فيها ايه لما كام بنت تزوغ وتنط من عالسور عشان تلحق تشوف البوي فريند بتاعها
    ها .. فيها ايه ؟؟؟؟؟
    وبعدين انا مش فاهم .. عايزنهم يحبسو نفسهم في المدرسه ليه
    مش المدرسين الخصوصين بيدولهم دروس وبيشرحولهم المناهج في حصص خصوصي وفي المدرسه ولا الهوا
    يبقى فيها ايه لما يزوغو؟؟
    وعلى رأي المثل .. زوغي يابت انتي وهي .. الناظر جاي اهو


    مثل ده ولا مش مثل





    سلاموووووووووووووز

    ReplyDelete
  13. This comment has been removed by the author.

    ReplyDelete
  14. كنت بشوف بنات بتزوغ

    لكن من الباب مش من السور

    وكانوا نادرين جدا جدا جدا

    يعني عددهم - عدد من كن يزوغن - في المدرسة المقابلة لنا اظن انه كان اقل من عدد البنات اللي في الصورة

    زي ما انت بتقول عن الماكياج....كانت بتبقى فضيحة وكارثة وعجبة

    من السور جديدة دي اوي

    الصورة تحفة

    وما خفي عن الصورة كان اعظم

    ReplyDelete
  15. هو فعلا موضوع يضايق ومستفز
    بس للاسف دة بقى واقع موجود فى مجتمعنا
    على فكرة الصورة اللى موجوده دى فى اللى اكتر منها وبرضو من فترة
    انا باقيلى سنه واتخرج وكليتى 5 سنين مش 4
    وايام ثانوى كان فى بنات بتنط من على السور
    وكان فى بنات بتوزع مخدرات كمان جوا المدرسه وبراها
    يعنى كان فى مصااااااااااااايب
    بس بالرغم من كل ده كان فى بنات محترمه
    بنات متربيه بجد وعارفين ربنا
    يقدروا يعرفوا ايه الصح وايه الغلط

    الدنيا فيها كل الالوان مش لون واحد
    المهم نشوف انه لون هيقدر يكسب ويمسح الباقى

    ReplyDelete
  16. الايااااام الا جايا هتبقي فله

    ربنا يسترها معانا


    تحياتي ليك

    سلامووووز ....... وزة

    ReplyDelete
  17. هههههههههه
    طب اقولك على سر
    الباب مفتوح
    بس برضه هينطوا
    وسر تانى مش هقدر اقوله بس مدارس البنات بيحصل فيها الى لا يمكن حد يصدقه والمدرسين عارفين
    اما عن السجاير فانت قديم قوى بس بيكون فى الحمامات لسه مخرجش ولا يمكن اصلى سبتها من 3 سنين وانت عارف التطور السريع الى احنا فيه
    حسبى الله ونعم الوكيل

    ReplyDelete
  18. sahrana:
    انا متشكر ليكي جدا على التعليق القيم دة
    بجد والله مش مجاملة على الاطلاق
    تعليقك يعكس شخصية متعاونة واجتماعية وايجابية
    طبعا الهرمونات الذكورية تختلف عن الانثوية الا ان مرحلة المراهقة مرحلة مشتركة للذكور والاناث
    طبعا انا عارف او كنت عارف ان مراهقة الاولاد تختلف تماما عن مراهقة البنات
    مراهقة الولد خطرة وعنيفة سجاير وافلام وخناقات وصياعة....الخ
    انما مراهقة البنات اخرها تحب ابن الجيران او لو كانت جريئة قوي قوي يا دوبك تجرب سيجارة او تتفرج على فيلم نص كم
    انما الظاهر ان اسوار مدارس البنات بتخفي وراها حاجات كتير مش بتبان في الشارع
    انا فعلا مستغرب جدا..يمكن علشان مش مختلط كتير بالسن دة الايام دي
    بس الظاهر انها ايام صعبة جداااااااا
    انا متفهم لاسباب التزويغ من المدرسة..انا شخصيا كنت بزوغ ومن فوق السور وكل حاجة وربنا كرمني ودخلت صيدلة
    القصة مش في التزويغ القصة ان البنت ييجي لها الجرأة انها تنط من فوق السور قدام الناس كدة عادي جدا
    بس واضح ان الغلط من عندي انا...لازم التحم بالشريحة العمرية دي اكتر من كدة
    تحياتي والف الف شكر

    ReplyDelete
  19. محمد مفيد:
    الصورة جميلة فعلا بس احقاقا للحق مش بتاعتي
    لفتت نظري لموضوع جيد انما للامانة مش انا اللي مصورها
    بالنسبة لمدارس البنين واضح انها اصبحت صور مصغرة من سجن ابو زعبل
    وان كنت اعتقد ان ابو زعبل اكثر انضباطا
    تحيااااتي

    ReplyDelete
  20. عصفور المدينة:
    اهلا بيك يا باشمهندس
    منتظر تعليقاتك القيمة
    تحياتي

    ReplyDelete
  21. ض/خالد:
    التزويغ......فين ايام التزويغ
    كانت متعة والله
    ممكن جدا يكون الباب مفتوح...بس سيبك انت..التزويغ دة كان مزاج برضة
    بس واضح ان هواية التزويغ دي انتقلت لمدارس البنات
    تحياتي

    ReplyDelete
  22. هههههههههه
    اشمعن دي اللي مش حيكون فيها مساواة بين الجنسين
    هههههههه
    حقيقي صورة تجنن
    وبوست رائع يا ابو حميد

    خالص تحياتي
    احمد

    ReplyDelete
  23. السلام عليكم ورحمة الله وبركاته

    حلوه الصوره دي ،اكيداللي لقطها كان عارف ان البنات بيعملوا كده كل يوم فاستناهم علشان تطلع الصوره مظبوطه وحلوه كده
    :-)
    صحيح احنا كنا بنزوغ بس من البوابه وآخر السنه كمان لما مش بيبقي فيه اتنين تلاته في الفصل ، وكمان في الثانويه العامه يعني بنمشي علشان نروح نذاكر

    بس المناظر اللي في الصوره دي مناظر تِحَزِِن
    لما بنات وبيعملوا كده قدام الناس ، يبقي اكيد بيعملوا بلاوي من وراهم


    ربنا يسترها معانا

    ReplyDelete
  24. تصدق والله حاجة تحزن الاخلاق والحياء والرقة والانوثة راحت فين البنات ايه اللي جرالها لما هما في المدرسة بيعملوا كده امال لما يدخلوا الجامعة هيعملوا ايه
    بجد بجد مستوى التعليم والتربية اختلف عن الاول خالص افتكر على ايامي مكنش في كده خالص وايامي دي يعني مش بعيدة لدرجة ان الدنيا تتغير كده وتتقلب الموازين والنات تنط من فوق سور المدرسة
    بس فعلا انا بشوف بنات في المترو وانا راكبة عربية السيدات بيتلفظوا كلمات غريبة جدا وهزار مينفعش لبنات بالمرة

    ياريت البنات دول يختاروا اصدقائهم بحكمة لان الصديق السوء ليه عامل كبير
    وياريت نقدر نحافظ على عاداتنا وتقاليدنا مهما تغيرت الظروف حولينا

    تحياتي

    ReplyDelete
  25. سورى يادكتور ولوتعتبر دة تعدى على خصوصياتك الصورة دى صاحبتك اللى بعتهالك؟للزكرى يعنى سؤال برىء واللةاصلها غريبة موت لسة فاكر تدور على التدخين والاباحيات المجتمع انهار من زماننننننننننننننننن ماما دلوقتى بتدخن قدام اولادها وبابا شايل بلوتوثات نارعلى موبايلةوالاخت الكبيرة بتتجوز عرفى خلاص
    غياب القدوة خلى الحبل ع الغارب مش ف البنات بس والولاد كمان لاتعايرنى ولا اعايرك الهم طايلنى وطايلك وابقى بطل تعدى من عند مدارس البنات بعد متخلص شغل الصبح ههههههههه تحياتى واحتراماتى

    ReplyDelete
  26. قليل من التفكير:
    طب كويس انها جت لحد كدة
    مش عارف دعاة المساواة دول هيودونا لغاية فين
    تحياتي واحتراماتي

    ReplyDelete
  27. بطوط حبوب:
    شكلك كدة اتفرجت ع الصورة وماقريتش اي حاجة عن الموضوع
    على اعتبار يعني ان الصورة بتغني عن مليون كلمة
    عموما
    منورني دايما
    تحياتي واحتراماتي

    ReplyDelete
  28. bos bos:
    اعتقد يا بس بس انهم لما يوصلوا ثانوي
    هيكونوا اتسجلوا اداب
    بس انتي عارفة يا بس بس
    مراهقة الصبيان بتبقى مقبولة قوي عن مراهقة البنات لان مراهقات البنات قد ينتج عنها كوارث
    تحياتي

    ReplyDelete
  29. حدوتة:
    انحراف البنت بيكون مشكلة فعلا لاهلها
    ربنا يحفظ بناتنا جميعا ان شاء الله
    تحياتي واحتراماتي

    ReplyDelete
  30. marvel
    ربنا يطمنك
    يعني السجاير انتشرت طبعا الشيشة حدث ولا حرج
    عموما فعلا على رايك الكومبيوترات والموبايل هيتكفلوا بالباقي
    تحياتي واحتراماتي

    ReplyDelete
  31. السلام عليكم ورحمة الله وبركاته

    كنز المرأه حياؤها

    وأحق من يُستحى منه هو الله تعالى

    ربنا يسترها معانا بأي وجه هنقابله

    -*-*-

    لن نعيب .زماننا ونلومه على افعالنا

    وكما قال الامام الشافعي رضى الله عنه

    نعيب زماننا و العيب فينا
    و ما لزماننا عيب سوانا

    و نهجو ذا الزمان بغير ذنب
    و لو نطق الزمان لنا هجانا

    ربنا يحسن ختامنا ويهدينا جميعا

    ReplyDelete
  32. بغض النظر عن انهــ"ن" بيزوغن

    و بغض النظر عن الانحطاط الاخلاقي و التعليمي
    و كل الكلام الجميل ده

    انا بس عندي سؤال : اخدين الكرسي معاهم ليه؟

    تحياتي لك

    ReplyDelete
  33. بصراحه
    حاجه تحرق الدم

    الانحدار الاخلاقى والانحراف والكفته الى احنا عايشين فيها دى مش عارفالها اخر ولا حل
    بنشوف بلاوى ومش مصدقين وربنا يستر

    ReplyDelete
  34. التطور تعدى النط من على السور وبقى الواحد بيسمع دلوقت عن معاكسات البنات للشباب فى الموبايل والاهم اننا سمعت عن الموضوع ده مش من بنات ثانوى لا ده من بنات فى اعدادى جيرانا والمكياج دلوقت بقى فى متناوع المرحلة الابتدائية والاعدادية
    الحياء ده بقى من التاريخ الله يرحمنا برحمته

    ReplyDelete
  35. :D:D:D

    احب اقولك ان الحاجات التانية دى بقت موجودة خلاص !!

    هههههههههههه

    يا عم روق ...روق بجد وما تفكرش كتير فى الحاجات دى علشان ما تتعبش بس

    ماعدش فى دلوقتى حاجة اسمها بنت قطة مغمضة

    الكلام ده كان زمااااااااااااااان اوى

    من ايام جدى وجدك


    صح فى اقلية من البنات اللى بجد محترمين وبجد فيهم الحياء ..او زى ما انت قولت ..كسوف بالفلاحى

    بس دى خيبة ..مش حاجة تفرح

    وعموما ربنا يهديهم جميعا

    هى جت على البنات يعنى


    ؟؟؟؟

    ReplyDelete
  36. الناس قالوا كل حاجه أنا ممكن أقولها
    من اول الانحلال اللي منتشر في المجتمع كله
    لحد يا عم روق وكبر دماغك


    بس الصوره بجد جامده موت

    تحياتي يا زعيم

    ReplyDelete
  37. ياباشا الكلام ده موجود من زمان من ايام التسعينيات بس واضح ان انت مكنتش واخد بالك او عشان كنت في نفس المستوي التعليمي مكنتش شايف اللي حواليك

    تزويغ سجاير مجلات كل اللي انت عايزة تلاقيه هناك و...اكتر
    والله واكتر

    الفكره ان الموضوع بان امتر شوية...بقا عادي الي حد كبير...كله مبر دماغة وكله بقى عايش الحياه ودمتم وطالما في بوسي سمير ودانا ونجلا يبقى خلاص كله هيبقى تمام

    محمد سمير

    ReplyDelete
  38. ادم المصري
    اعتقد ان القادم مذهل اكتر
    تحياتي

    ReplyDelete
  39. micheal:
    لا يا مايكل
    ايه يا راجل اللي انت بتقوله دة؟
    بقى ماتفرقش عندك؟
    اي النعم البنات زي البنين كلهن طيبين
    بس مش في كدة يا مايكل
    تحياتي

    ReplyDelete
  40. soooo:
    دة مثل موديل 2008 دة ولا ايه؟
    بس يارب يكونوا رايحين يقابلوا البوي قريند مش رايحين حتت تانية
    عموما اعتقد انك لو نزلت اي مول من مولات مدينة نصر اي يوم الصبح
    هتعرف البنات دول رايحين على فين
    تحياتي

    ReplyDelete
  41. الصارم الحاسم:
    اللي يعيش يا ما يشوف
    واللي يعيش في مصر هيشوف اكتر
    تحياتي

    ReplyDelete
  42. di el2amar:
    اكيد طبعا كل الانواع موجودة
    الكويس موجود والوحش كمان موجود
    بس اللي يغيظ ويقلق الواحد ان الوحش في ازدياد وان الكويس بقى قلة
    تحياتي

    ReplyDelete
  43. انين الحزن:
    بصي يا وزة
    هو لسه في ايام فلة اكتر من الفل والورد والياسمين اللي احنا فيه دة؟
    ربنا يستر

    ReplyDelete
  44. همسات دافئة:
    انتي محسساني انك بتتكلمي عن سجن النساء بالقناطر
    ايه دة فيه ايه؟
    هو في كدة؟؟؟؟؟؟
    ربنا يستر على بناتنا
    تحياتي

    ReplyDelete
  45. موجة:
    الف شكر ليك يا احمد
    الصورة الحقيقة مش من تصويري
    انما عجبتني واوحت لي بفكرة البوست
    منورني دايما

    ReplyDelete
  46. خمسة فضفضة:
    ازيك يا دكتورة
    اعتقد ان اللي لقطها فنان تصوير
    فعلا صورة حلوة
    بس اعتقد يا دكتورة ان اللي في الصورة دي مش مزوغين علشان يذاكروا خاااااااااااااااالص
    تحياتي

    ReplyDelete
  47. ايامنا الحلوة
    اعتقد ان الجروب اللي في الصورة دي هتلاقيهم بعد كام سنة في كافيتريات الجامعات
    معايير الاخلاق اختلت خالص
    واعتقد ان لفظ البنت المؤدبة بقى بيطلق لمعايير تانية خالص غير زمان
    تحياتي

    ReplyDelete
  48. شيكابالا:
    لا مش هي اللي بعتتها لي
    دي هي اساسا اللي في الصورة.....
    جميلة قوي الاسرة اللي انتي اتكلمتي عنها دي
    ياريت لو تعرفيهم تعرفيني عليهم
    تحيااااااتي

    ReplyDelete
  49. قبلة الحياة:
    اعتقد ان الحياء اصبح عملة نادرة اليومين دول بس برضة لا ننكر انه موجود اكيد
    تحياتي

    ReplyDelete
  50. fadfadet nour:
    علشان محدش يعرف ينط بعدهم
    تحيااااتي

    ReplyDelete
  51. shayma:
    ولسة ياما هنشوف يا شيماء
    انتي عارفة
    اللي يعيش ياما يشوف
    تحياااااتي

    ReplyDelete
  52. hend....hanady:
    طب تصدقي بالله
    هاقولك حاجة جديدة
    انا اعرف ان في بنات بيعاكسوا الولاد بالعربيات وبيركبوهم العربيات كمان
    القيامة قربت تقوم يا جدعاااااااااااااااااااان
    تحياتي

    ReplyDelete
  53. oceaneyes:
    طب انا عايز حتة مكسوفة كدة تكون وصاية ومتنقية
    الاقيها ولا دي بقت من المستحيلات كدة؟
    تحيااااااااااااااتي

    ReplyDelete
  54. al shared:
    شفت يا عم الشارد....يعني انت فضلت شارد كدة لحد الناس ما قالت كل اللي انت عايز تقوله
    ابقى علق بدري بقى في الموضوع اللي جاي ان شاء الله
    تحياتي

    ReplyDelete
  55. غمض عينيك:
    يابو سمير انت محسسني اني كنت عايش في الغيبوبة
    الظاهر اني فاتني كتير جدااااااااا
    تحياتي

    ReplyDelete
  56. طب قوللي أنت حتفرق ايه
    أنا مازلت مصر علي رأيي
    تحياتي

    ReplyDelete
  57. hay moi zina ami de dn mysti marley
    roi dn marley mourir
    look mè blog for
    king of kings dn marley & rastafari zion
    http://dnmystimarley.blogspot.com
    appile 026241871
    moroc casablanca

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails