Sunday, 17 February 2008

ومن الفساد ما قتل


الكاتب الكبير فهمي هويدي في كتابه الرائع
"عن الفساد وسنينه"
ذكر حادثة حصلت في مصر غالبا في 2001 ونشرتها جريدة الوفد
هنقل الحادثة بالنص كما ذكرها الكاتب الكبير الاستاذ فهمي هويدي في كتابه
"شهدت منطقة مصر الجديدة ومدينة نصر حادثا بشعا دفع فيه شاب حياته ثمنا لمرور موكب احد المسئولين.
فقد كان طارق الجوهري البالغ من العمر 24 عاما والذي يعمل مديرا للانتاج الفني في طريقه الى عمله وقد سلك فيه احد الطرق الشهيرة بالمنطقة - شارع صلاح سالم- وتصادف انذا مرور احد المسئولين الذي ضم سيارتي جيب شيروكي وسيارة مرسيدس سوداء.
لم ينتبه الشاب الى اقتراب الموكب منه الذي انطلقت سياراته بسرعة جنونية فما كان من احدى سيارتي الجيب الا ان احتكت بسيارة الشاب بسرعة لابعادها عن الطريق.الامر الذي ادى الى قذف السيارة جانبا وارتطامها بشجرة على رصيف الشارع.ادت شدة الارتطام الى شطر السيارة نصفين,في الوقت الذي واصل فيه الموكب سيره بنفس السرعة,دون ان يعبأ قائد سيارة الحراسة بما حدث.
توقف سائق سيارة اجرة شاهد الواقعة لانقاذ الشاب طارق.وكل مافعله ضابط المرور المكلف بالمنطقة انه سحب منه رخصة القيادة,لأن وقوفه تسبب في تعطيل تدفق السير!!!ولم يكترث السائق الشهم بتصرف الضابط,وقام باخراج الشاب من السيارة بصعوبة بالغة
اتصل الشاب الذي كان لا يزال على قيد الحياة عبر هاتفه النقال بأحد اصدقائه وابلغه بما جرى فجاء صديقه على الفور واستدعى سيارة للاسعاف قامت بنقله الى مستشفى هليوبوليس في حي مصر الجديدة
عرض الشاب طارق على الطبيب المختص,وشكا من شعوره بضيق في التنفس,فأمر الطبيب باجراء مسح اشعاعي لصدره ومعدته,وفي اثناء نقله الى قسم العناية المركزة الموجود في طابق اخر بالمستشفى,تعطل المصعد.وظل متوقفا مدة 15 دقيقة كاملة,حتى تم رفعه يدويا
تدهورت الحالة الصحية للشاب من جراء التراخي في اسعافه,وبمجرد دخوله الى غرفة العناية المركزة,لفظ انفاسه الاخيرة,وصعدت روحه الى بارئها
تم تحرير محضر صباح اليوم التالي الذي اعتبر ما جرى نتيجة لوقوع حادث سير عادي,وصرحت النيابة بدفن الجثة مالم تكن هناك شبهة جنائية.
واسدل الستار على القصة حين تم دفن طارق الجوهري...انتهى الخبر"
************************************************************
ذهووووووووووول
قعدت متنح كام دقيقة....وقريت القصة دي تاني....وتنحت بعدها تاني
هو في كدة؟
احنا فين؟ وليه اصلا؟ الشاب دة مات ليه؟اتقتل ليه؟
عربيتين حراسة ومرسيدس سوداء يعني وزير نص ونص...مابالك بقى لو وزير سيادي كان كام واحد مات في الليلة دي
طب الراجل والله يرحمه مخدش باله انه في مصر وافتكر نفسه في بلد محترم المسئولين فيه بيمشوا في الشوارع عادي كدة مع البني ادمين..هو غلط..بدل ما تنصحوه انه يحترم نفسه ويوسع السكة لأسياده تقوموا تخبطوه بالعربية؟
اللذيذ بقى ان طقم الحراسة تعامل مع الموقف كما لو انهم كانوا بيهشوا ناموسة..مش طوحوا بني ادم وعربيته ورموهم ع الرصيف
كله كوم بقى..وضابط المرور اللي زعل قوي ان سواق التاكسي معطل المرور ونزل ينقذ الراجل اللي بيموت دة فراح ساحب منه رخصته....دة بقى كوم لوحده...يا نهار اسود....دة ضابط؟ ضاااااااااااااااااااااااااااابط
مش لاقي كلام اقوله والله
الاسانسير بقى مايعطلش الا والراجل دة بيمووت....يا سبحان الله..بس اغلب الظن ان دة محصلش صدفة على اساس ان الاسانسير دة العادي بتاعه انه يبقى عطلان والاستثناء انه يكون شغال
اما النيابة بقى.....تصريح بدفن الجثة.....عادي حادثة يا جماعة محصلش حاجة...حادثة
طارق الجوهري دة ذنبه في رقبة مين؟
ضابط الحراسة...ولا رئيس طقم الحراسة....ولا المسئول اللي بيحرسوه...ولا اللي عين المسئول اللي بيحرسوه...ولا ضابط المرور اللي مصمم ياخد رخصة سواق التاكسي....ولا الطبيب اللي شافه ومعرفش يسعفه...ولا مدير المستشفى اللي سايب الاسانسير عنده عطلان...ولا وكيل النيابة اللي صرح بدفن الجثة....ولا التربي اللي دفن الجثة
اذا عرفت الاجابة...اتصل على الرقم المجاني لمكافحة الفساد....دة اذا عرفت الاجابة
انا في رأيي المتواضع ان طارق الجوهري هو اللي غلطااان..ايه اللي خلاه يروح صلاح سالم في الوقت دة؟ من خرج من داره اتقل مقداره
الكتاب الرائع "عن الفساد وسنينه" صادر عن دار الشروق...ومليان مما لذ وطاب من عينة الحادثة دي
كتاب رائع انصح بقراءته....بس مع مضادات للأكتئاب

38 comments:

  1. وهاهنا أقوام يترددون قبل أن يقتلوا الصرصار والنملة يقولون دعه يعيش طالما لم يؤذنا

    أي موقف سيقفون يوم القيامة وهم أمثال الذر يدوسهم الناس في يوم كان مقداره خمسين ألف سنة وهم يرونه بعيدا وليس ببعيد

    ReplyDelete
  2. La 7awl wala qowata ella bEllah...ya gama3a...ya ret ay 7ad ye2ra blog dah ye2ra elfat7a 3ala ro7 el3'alban elly mat fetis .
    Wallahy ya Ahmad el7ekya dih 3agiba awi awi ! leldaraga dih ensan malosh taman...rabena yessabbar ahloh begad...bas 3alshan nekon sora7a ma3a ba3d we be3'ad elnazar 3an a7das elwaq3a dih...Howa elwalad dah kan maktob loh elmot ya3ny mahma ye7sal kol el3atala elly 7assalet ma3naha enn elmot kan 7atmy we mafish mafarr men eradet rabena sob7ano...

    Ya gama3a nasi7a....eb2a leffo we ro7o eltari2 elda2ery, at least mafish nas mohema bet3ady men henak, bas take care men sowa2in ellory we elnoss na2l we elmasatil we elshabab elly wa7'ed 3arbyet mamy yefassa7 biha as7abo..we kaman take care men elkam no2ra we 7ofra elly feltari2, we elly loh nasib f 7aga akid 7ayshofha....we lakam menny salam we ta7ya..we 3ala ra2y gedety ...Rabene yestor tari2ak.
    o7'tokm Sahrana.

    ReplyDelete
  3. طيب ده واحد بس اللي اتقتل
    شوف الفساد اللي بيقتل وطن بحاله
    شوف الفساد اللي خلي تلت مرضي الكبد في العالم كله مصريين

    الفساد اللي بيدعم قارون ومخليه يدمر قطاع اقتصادي مهم زي قطاع المقاولات

    نحن في بلد أصبح الفساد فيه هو العمله الرسميه بينما الشرف والامانه فلقد ولي عهدهما

    حكايات الفساد لا تنتهي ولن تنتهي طالما نحن نمتلك هذا الكم المثير للدهشه من السلبيه

    تحياتي

    ReplyDelete
  4. لا الة الا اللة وما تدرى نفس باى ارض تموت هو دة عمرة ولكل اجل كتابالمشكلة واللةف التحكم الامنى ف كل شىء الدولة البوليسية نظام فاشل مليون ف المية يمكن يكون المسئول ملوش زنب لكن الحراسات دايما بيعملو حاجات غريبة يمكن هيا اللى بتخلق جو مش حلوبين المسئولين والشعب ويمكن اللى كان بيمشى وسط الناس ولابيهمةرغم انة كان مستهدف هو الزعيم جمال عبد الناصر رحمة اللة لانالاخ ممدوح سالم مكانش شخصية بارزة ايامها فالدولةالبوليسية اسسها نظام السادات ودعمها نظام مبارك ازن

    ReplyDelete
  5. يحرق دينهم كلهم يا عم

    ReplyDelete
  6. والله هيتحسبو على كل البلد اللى موتوا شبابها وهم عايشين
    فما بالك باللى مات فعلا

    حسبى الله ونعم الوكيل

    ReplyDelete
  7. ماهو مفيش في ايدينا حاجه غير اننا نقول الله يرحمه

    وحسبي الله ونعم الوكيل فيهم كلهم

    اسلوبك في كتابه الموضع جميله اوي بجد

    ربنا يوفقك

    وزة

    ReplyDelete
  8. اكيد الحادثه دى قبل اغنيه مشربتش من نيلها ؟؟
    اكيد
    لان الراجل ده لو مشغل الاغنيه فى الكاسيت كان افتكر انه فىمصر
    وانه بيشرب من تيلها
    اول مره اعلق هنا وان شاء الله لو كله نكد كده هتبقى اخر مره هههههههههههههههه

    ReplyDelete
  9. انا عرفت الحل
    ممكن اجاوب
    السلام عليكم
    اسمى فرنسا هانم
    وعايزه اشترك معاكم فى المسابقه
    الحل
    هو الشجره يا فندم
    فعلا الشجره هى اللى غلطانه
    اجى استلم الجايزه امتى يافندم
    ----------
    حسبى الله ونعم الوكيل

    ReplyDelete
  10. عصفور المدينة:
    ازيك يا باشمهندس
    هم تقريبا مابيفكروش في يوم القيامة من الاساس
    واعتقد ان شعارهم في الحياة
    احييني النهاردة وموتني بكرة
    تحياااااتي

    ReplyDelete
  11. sahrana:
    اعتقد ان اللي اولى بقراءة الفاتحة عليه هي مصر يا سهرانة
    طبعا لكل اجل كتاب...ودة قدره
    بس لو طبقنا المبدأ دة يا سهرانة يبقى محدش هيتحاكم انه قتل حد على اساس ان دة قدره
    ربنا ما قالش اننا نقتل بعضنا ونعامل بعض بكل الاحتقار دة
    ولا ايه؟
    ربنا يرحمه ويرحمنا جميعا
    تحياتي

    ReplyDelete
  12. وجعتلي قلبي يا راجل
    ربنا يرحمه ويحاسب اللي كانو السبب
    ربنا يجازيهم من مثل عملهم
    ربنا يأخذهم أخذ عزيز مقتدر

    لا حول ولا قوة الا بالله

    ReplyDelete
  13. al shared:
    بس الراجل دة اتقتل بطريقة فجة ومستفزة جدا
    انما احنا بنموت بالموت البطيء ودة ارحم شوية لان الالم متوزع
    بالنسبة للسلبية انا لا اسمح اننا يتقال علينا شعب سلبي
    نحن شعب من الاموات
    تحياتي

    ReplyDelete
  14. شيكابالا:
    على فكرة جمال عبد الناصر هو اله الدولة البوليسية عند قدماء المصريين
    اللي احنا حاسيين بيه دلوقتي من توغل بوليسي في كل شيء هو التطور الطبيعي للنظام البوليسي
    بدأ بزوار الفجر وصلاح نصر وانتهى بامن الدولة
    التطور الطبيعي
    تحياتي

    ReplyDelete
  15. elkamhawi:
    استغفر الله العظيم
    اللهم اني استغفرك واتوب اليك يارب

    ReplyDelete
  16. لاء
    لاء
    حرام بجد انا مش قادره اصدق بيسحب رخصه سواق التاكسى
    اللهم انتقم

    ReplyDelete
  17. غلوا السكر غلوا الزيت
    خلاص بعنا عفش البيت

    ReplyDelete
  18. حسبنا الله ونعم الوكيل

    حاجة والله تحزن

    ربنا يعينا على كشف الغمة دي

    ReplyDelete
  19. يبقى انت اكيد اكيد فى مصر
    دى حاجه بسييطه قوووووى
    طيب حادث الطائرة المصريه اللى اتهم فيها البطوطى انه انتحر
    وحادث العبااره السلام 98 برضه السبب ان القبطان عايز ينتحر اكيد برضه دة كان عايز ينتحر وهو اللى عمل كدة فى نفسه
    يستاهل اللى يحصله هايخشوا النار كلهم
    حسبى الله و نعم الوكيل

    ReplyDelete
  20. بندقة:
    طب اللي مات ارتاح فعلا يا بندقة
    ما بالك بقى باللي مدفون بالحياة
    تحياتي

    ReplyDelete
  21. انين الحزن:
    مفيش في ايدينا غير اننا نقول ربنا يرحمنا كلنا و يزيح عننا
    الف شكر ليكي
    تحياتي

    ReplyDelete
  22. بطوط حبوب:
    لا مش كله نكد كدة
    بحب اشكل...ساعات بيبقى لوني حزايني وساعات بيبقى لوني فرايحي
    تحياتي

    ReplyDelete
  23. فرنسا هانم:
    تصدقي ان معاكي حق فعلا
    الشجرة
    بس دي مش اي شجرة...دي شجرة في طريق صلاح سالم...يعني اهم من اهم واحد فيكي يا مصر
    شجرة عندها سيادة وحصانة
    تحياتي

    ReplyDelete
  24. تحياتي

    تعرضت لمثل هذا الموقف من فترة علي كورنيش النيل منطقة المعادي...لكن الحقيقة كان هناك ضابط مهذب بموتوسيكل
    يسبق الركب...جاء بمحاذتي و طلب مني ان
    الزم اليمين حتي مرور الركب.

    ما اريد ان اقوله لحضرتك ان التصرف الذي قام به قائد السيارة الجيب هو تصرف فردي...هو مسؤول عنه...وان افلت
    من المسؤلية الان...فصدقني سيأتي يوم لا يستطيع ان يغمض جفنه من تأنيب الضمير.

    الامر الاخر هو حادث طريق المطار و الشاب القطري الذي تم تهريبه خارج مصر
    هذا هو الفساد و امه و ابيه...اي عائلة الفساد الاكبر.

    تحياتي و تقديري...

    ReplyDelete
  25. وما خفى كان أعظم
    والبقية تأتي
    :(

    ReplyDelete
  26. يبقى انت اكيد
    اكيد اكيد يعنى فى مصر



    على فكرة انا بزورك كتير وكل ما ازورك اقعد اتفرج على الصور وانسى اسيب تعليق
    لحسن تفتركنى خيخة ومش برد زياراتك ليا
    تحياتى يا احمد

    سلام
    اختك خيخة
    اه على فكرة شكرا انك موضح حكاية افحت دى لانى بلاقيها كتير اوى فى مدونات تانية وماكنتش فاهماها
    هاروح افحت حااااااالا
    سلام

    ReplyDelete
  27. (واسدل الستار على القصة حين تم دفن طارق الجوهري...انتهى الخبر)

    جانبك الصواب يا أستاذ أحمد...

    بل فتحت القضية..
    ولن تغلق قبل أن يقتص الله-عزوجل- لأخينا طارق-رحمه الله-
    ممن تهاون في دمه...

    فزوال الدنيا..أهون عند الله من دم امرئ مسلم..يشهد أن لا إله إلا الله وأن محمدا رسول الله..

    ألا لعنة الله على الظالمين

    ReplyDelete
  28. soooo:
    ادعي ربنا انها تكون ساعة اجابة
    بالتوفيق ان شاء الله
    تحياتي

    ReplyDelete
  29. همسات دافئة:
    اعتقد انك لو تعرفي الشرطة المصرية كويس ممكن تصدقي
    البوليس في بلدك ممكن يعمل اي حاجة
    مش بعيد يكون سحب رخصة طارق الجوهري اصلا
    تحياتي واحتراماتي

    ReplyDelete
  30. صوت من مصر:
    هو انتم كنتم لسة مابعتوش عفش البيت لحد دلوقتي
    انا اعرف ناس باعت البيت نفسه من زماااااااان
    تحياتي واحتراماتي

    ReplyDelete
  31. النجمة الصامدة:
    اهم حاجة ان الناس تفضل صامدة ايتها النجمة الصامدة
    تحياتي واحتراماتي

    ReplyDelete
  32. رفقة عمر:
    عارفة مشكلة طارق دة الله يرحمه ايه؟
    انه فكر يلعب مع الاسد
    محدش يلعب مع الاسد
    سلومة الاقرع مايعرفش اخوه
    تحياتي واحتراماتي

    ReplyDelete
  33. الربان:
    على فكرة حضرتك محظووووظ جدا جدا
    لاني اعتقد انك صادفت ال 1% استثناء اللي في رجال الشرطة من خلال الضابط اللي بموتسيكل دة
    على فكرة احنا لو هنقعد نتكلم على الفساد ممكن نعدد وقائع من دلوقتي لحد شهرين او تلاتة قدام
    الحادثة دي واللي حضرتك ذكرته مجرد نقطة في بحر كبيييييير
    ربنا يستر ع البلد دي
    تحياتي واحتراماتي

    ReplyDelete
  34. ياسر حسين:
    ما خفي كان اعظم واعظم واعظم يا فنان
    بس يارب مايكونش فيه بقية
    تحياااااتي

    ReplyDelete
  35. ....
    ....

    ...........

    .......



    مافيش تعليق اقدر اقوله


    ...

    حسبنا الله

    ReplyDelete
  36. بنت خيخة واي كلام:
    انتي عارفة انا حاطط الصور دي ليه؟
    لاني بعتبر مدونتي دي مملكتي...بعتبرها تأريخ لحياتي
    بحس ان لازم اي ذكريات تبقى فيها
    معلش...انا عارف انها مزعجة وبتعمل قلق للي بيقرا بس هحاول اصغر حجمها شوية
    شكرا للفحت
    عايزك تفحتي باستمرار لحد ما تطلعي زيت
    تحياتي واحتراماتي

    ReplyDelete
  37. ض/خالد:
    اقوللك ايه بس يا دكتور
    صبرنا كتير قوي ومن الواضح ان احنا لسة هنصبر اكتر واكتر
    تحياتي

    ReplyDelete
  38. oceaneyes:
    ساعات كتير بيبقى لا تعليق هو ابلغ تعليق
    تحياتي واحتراماتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails