Sunday, 3 February 2008

انا اعشق هذا الرجل


السنة اللي فاتت كتبت بوست بعنوان
"يوم في معرض الكتاب"
وحكيت عن جولتي في المعرض وسلبياته وايجابياته من وجهة نظري طبعا
السنة دي كنت ناوي اكتب بوست بعنوان
"يومان في معرض الكتاب"
نظرا لأني رحت المعرض السنة دي مرتين مش مرة واحدة
مرة مع خطيبتي ومرة مع احد اصدقائي المثقفين
طبعا كل مرة منهم كان لها طعم مختلف والمرتان كانوا احلى من بعض.(بس طبعا المرة اللي مع خطيبتي كانت احلى بكتيـــــــــــــــر...النت متراقب يا جماعة)....والمعرض السنة دي كان افضل بكتير من السنة اللي فاتت ...اكثر تنظيما...لوحات ارشادية اكتر...كتب اكتر..دور نشر اكتر
لسة الشروق ومدبولي وميريت وجرير هم معرض الكتاب....لسة الاهرام واخبار اليوم ودار المعارف لديهم قدرة غريبة عجيبة على معاقبة الناس على مجرد التفكير في دخول اجنحتهم
الفرق بين جناح الأهرام وجناح دار الشروق مثلا..زي بالضبط الفرق بين القطاعين العام والخاص...زي بالضبط الفرق بين شركة بيع المصنوعات المصرية ومحلات هارودز الشهيرة بلندن
بالنسبة للمؤسسات الصحفية الكبرى زي الاهرام ودار المعارف عندهم يقين تام ان الناس اللي داخلة اجنحتهم دول مجموعة من اللصوص وبالتالي ممنوع منعا باتا الدخول بأي نوع من الحقائب او الكتب ولازم تسيب الشنط اللي معاك برة في الامانات
وما ادراك ما الامانات؟
كشك متناهي الصغر جواه موظف واحد وقدامه حوالي 30 او 40 بني ادم عايزين يسيبوا شنطهم فيه علشان يدخلوا جناح الاهرام اللي طبعا من وجهة نظر المسئولين عنه هو الجنة ونعيمها
ولك ان تتخيل المعادلة الحسابية
كشك متر *مترين ومطلوب وضع كمية مهولة من الشنط بانواعها جواه مع ضرورة كتابة بيانات اي شنطة هتتحط فيه واستخراج فاتورة بالامانات ودة مطلوب من موظف واحد بس انه يعمله
وطبعا اي بني ادم عنده ربع احترام لنفسه وادميته هيلعن ابو الاهرام على اخبار اليوم على دار المعارف على اللي عايز يدخلهم.....وسلم لي بقى ع المؤسسات الصحفية
الغريب والعجيب ان دور النشر الكبرى اللي عايزين ينجحوا وعايزين يبيعوا مفيش عندها المهزلة دي على الاطلاق...ادخل بأي شنط انت عايزها واتصفح كل الكتب اللي انت عايزها..لأن الناس دي عايزة تنجح وعايزة تبيع وعايزة تكسب وقبل كل دة عايزة تنشر ثقافة وفكر قبل اي شيء
ببساطة لأنه مش مال سايب
اما بقى عن الكتب اللي اشتريتها وانطباعاتي الاخرى فده مش مهم لأن كل دة بيتضاءل قدام الحدث الاعظم بالنسبة لي في معرض السنة دي
بلال فضل
انا بعشق الراجل دة
...لحد يوم الجمعة اللي فاتت كنت بعشقه لكتاباته الساخرة ولنقده للأوضاع السيئة المزرية بأسلوب لا يخلو من الفكاهة ولكنها الفكاهة المريرة...حيث ان شر البلية ما يضحك
من يوم الجمعة اكتشفت ان الراجل دة يستحق فعلا حب الناس وان من حبه ربه حبب فيه خلقه فعلا
ايه البشاشة دي...ايه الاحترام دة....ايه الاخلاق والروح العالية والتواضع دة
قابلته في دار ميريت...فوجئت انه اطول كتير مما كنت اعتقد...كل اعتقادي كان ان بلال فضل قصير وتخين...ماكنتش متخيل على الاطلاق انه طويل وعريض
ماصدقتش نفسي...لقيته حواليه عدد كبير من الاشخاص بيطلبوا انهم يتصوروا معاه...وهو بمنتهى الاحترام والبشاشة وسعة الصدر بيلبي طلبهم دة بكل سرور
بلال لم يرفض اي طلب لأي حد...انا اعتقد ان لو حد كان طلب منه في هذه اللحظة نسخة مجانية من كتابه الرائع (قلمين)لم يكن ليبخل بها ابداااااا
بلال كان موجود علشان يوقع على كتابه الجميل "قلمين" لزوار جناح ميريت بالمعرض..ومن سوء حظي اني كنت اشتريت الكتاب قبل المعرض وبالتالي لم احظ بشرف توقيعه على نسختي..انما صديقي العزيز هو من نال الشرف دة
بلال فضل لا يكتفي بمجرد التوقيع انما كالعادة بيكتب دعابة خفيفة على غلاف الكتاب
بلال فضل اتمرمط كتير وهو نفسه اللي بيعترف بكدة ولكنه بني ادم مش ناقص.....الشهرة لم تغيره على الاطلاق.....تحس انه اخوك صاحبك...تحس انك فعلا تعرفه من زمااااان قوي
بلال:
بقدر حبي وتقديري واحترامي واعتزازي وفخري اني قابلتك وكلمتك واتصورت معاك...بقدر كرهي وغضبي الشديد من اللي حرمونا من اطلالتك الجميلة الساحرة علينا في برنامج بحجم "القاهرة اليوم.."يوميا
بس بجد مقابلتي ليك طمنتني ان زي مصر ما فيها ممتاز القط واسامة سرايا ومحمد على ابراهيم....مصر كمان فيها بلال فضل
انا اعشق هذا الرجل.

53 comments:

  1. انا كمان اعشق هذا الرجل يابختك :)

    ReplyDelete
  2. أنا كمان رحت مرتين

    والمرة اللي كنت مع الفريق القومي كانت أحلى بما إن النت متراقب

    فعلا دايما باحس في الأهرام ودار المعارف نفس الإحساس اللي انت وصفته إحساس الاتحاد الاشتراكي وعشان كدة بادخلهم لوحدي وارفع إيدي فوق وانا داخل

    ReplyDelete
  3. ازيك يا احمد
    بجد بلال فضل
    راجل محترم بجد و له اسلوبه المتميز
    تحياتى
    فين النضارة :((

    ReplyDelete
  4. انا مرحتش خالص

    :(

    تحياتي ليك و اتمني لك حظ سعيد
    نورتني
    :)

    ReplyDelete
  5. ولو كان النت مش متراقب كنت هتقول أيه ها ؟؟؟؟؟؟؟؟؟؟؟؟؟
    ماشى ماشى ما تخافش مش هقول لها حاجة هيا هتشوف لوحدها أنا ماليش دعوة شوية وهتلاقيها نزلت تعليق عندك وأنت حر هههههههههههههه

    أنا قلت أخطفكم أنتوا الأتنين ومفيش فايدة هو خلاص ياأما الخطف ياأما الخطف مفيش حل تانى معاكم

    المهم كويس أنك أنبسطت فى معرض الكتاب عقبالى لما أقدر أروحه أنا كمااااااااااان

    تحياتى لك

    ReplyDelete
  6. للاسف مروحتش المعرض يا احمد
    لكن بجد انا كمان بحب كتابات بلال فضل

    ReplyDelete
  7. شيكابالا5 February 2008 at 00:15

    كنت فاكراك تعرف تهرب من الرقابة يا بوحميد ههههههههه وبعدين حد يروح مع خطيبتة معرض الكتاب ؟ دى غلبانة قوى تلاقيك شيلتها كتب لما ورمتلها ايديها مش مهم ماعلينا بالرغم من معرفتى الضئيلة ببلال فضل لانى متعودة اقرا لشوية مغمورين زى هيكل ومحفوظ وعالم كدة راحت عيهم بعد ما ظهر الموهوب عمنا بلال واللى اعتقد انة زعيم ثقافة التيك اواى والافكار الهشة السطحية والغريب انك اهتميت بنقطة غريبة جداانة طوييييييييل ودة واضح انة نتيجة عقدة قديمة عامة انا كمان رحت معرض الكتاب مع خطيبى وكان يوم جميييييييل بجد عشان كنا سوا من غير رقابة ولاحاجة عامة ربنا يسعد اوقاتك

    ReplyDelete
  8. بعض الاجنحة في معرض الكتاب ...
    فاكرة الناس كلها حرامية
    عراف ليه؟؟
    ببساطة شديدة
    لأن (كلٌ يرى الناس بعين حالـــه)
    :(

    ReplyDelete
  9. نسيت...
    الحب في الله:)
    ربنا يجمعك بيه في ظل عرشه...

    انا برضه رحت المعرض مرتين :)

    ReplyDelete
  10. انا مرحتش المعرض
    :((

    بصراحه انا اول مرة اعرف كده عن بلال فضل
    هتخلينى اركز معاه

    سلامى
    :))

    ReplyDelete
  11. ايه
    اييييه
    ايييييييييه
    ايييييييييييييييييه بقى
    الله؟
    يعنى اقرا ولا اتفرج على الصور بتاعتك
    مش عارفة اركز يابنى
    عمالة اقرا سطر فى البوست واتفرج على صورتين تلاتة
    اقرا سطر واتفرج على صورة تانية وكل شوية اتوه معرفش انا كنت فى انهى سطر
    مش كدة
    وبعدين ايه يا واد كمية الصور اللى انت متصورها دى
    الاكادة انك متصور وانت بتضحك
    تكونش مبسوط يا ولا
    مبسوط؟ مش كدة
    ايوة والله باين عليك مبسوط وفرحان كمان
    ده ايه النايبة دى
    المهم
    لو محمد رجب تخن شوية هيبقى شبهك بالملى
    او انت اللى تخس
    ايهما اقرب
    طبعا مش هاقدر اقول حاجة عن بلال فضل اكتر من اللى انت قلته
    لانه فعلا شخص انا عن نفسى بعشق كتاباته
    ولكن للاسف فاتنى انى اشترى كتابه الاخير من المعرض وده هيستلزم منى انى انزل مخصوص دار ميريت واشتريه من هناك
    بس خلاص
    سلام
    اختك خيخة

    ReplyDelete
  12. بلال فضل على المستوى الانساني انسان هايل جدا جدا
    وعلى المستوى الفني والادبي .. ليه منطقه وفلسفته الخاصه

    بس باعيب عليه بعض الاعمال السينيمائيه اللي تقريبا كتبها لفك زنقه او عشان الناس تعرفه

    بس عشان مانعلى ونعلى ونعلى .. لازم نطاطي نطاطي نطاااااااااطي



    سلامووووووووووز

    ReplyDelete
  13. انا رحت المعرض زمان ايام ما كان فى ارض المعارض من سنين
    مش عارفه دلوقتى مكانه فين بما انى من السويس مش من القاهره
    عموما
    انت نسيت تحط اللينك بتاع بلال فضل علشان اللى ميعرفوش ويحب يتعرف على مدونته
    لانى بصراحه محصليش الشرف بمعرفته
    وكلامك عنه شجعنى ان ازوره فى المدونه

    ReplyDelete
  14. honda:
    مش انا وانتي بس اللي بنعشق الراجل دة
    حتى اللي مايعرفوهوش اصلا...بيعشقوا افلامه
    تحيـــــــــــــاتي واحترامــــــــاتي

    ReplyDelete
  15. عصفور المدينة:
    النت معدش له امان يا باشمهندس
    كل كلمة هتتحاسب عليها....مش كل كلمة بس دة كل نفس كمان
    الاهرام ودار المعارف وغيرهما بيعتبروا معرض الكتاب شر لابد منه لا فارقة معاهم لا ربح ولا خسارة ولا يحزنون
    هم جت لهم التعليمات يعملوا جناح عملوه وخلاااص
    تحيااااااتي واحترامااااتي

    ReplyDelete
  16. rania:
    بلال فضل بني ادم رائع فضلا عن كتاباته الرائعة
    شخصية جديرة بكل الاحترام
    وبعدين سلامة النظر يا رانيا هانم ما النضارة قدامك اهه في الصورة بس مش لابسها علشان احنا جوة المعرض..لو لبستها هبقى طه حسين مش احمد سمير
    تحياتي ليكي

    ReplyDelete
  17. mermaid:
    اتاري المعرض كان مضلم السنة دي
    السنة الجاية ان شاء الرحمن لازم تروحيه اكتر من مرة
    تحياتي واحتراماتي

    ReplyDelete
  18. bosbos:
    من خاف سلم يا بس بس
    وفي ناس اديها طارشة ما بتتفاهمش بس بيندرجوا تحت بند
    ضرب الحبيب زي اكل الزبيب
    ان شاء الله السنة اللي جاية تروحي مرتين انتي كمان باذن الله
    تحياتي

    ReplyDelete
  19. محمد مفيد:
    المعرض خسر يا باشا بعدم حضورك
    ملحوقة السنة الجاية بمشيئة الرحمن
    بلال فضل كاتب يستحق كل الاحترام والحب والتقدير
    تحيااااتي

    ReplyDelete
  20. انا رحت المعرض تلات مرات بحالهم بحكم انه قريب مننا

    اى نعم هو احسن بكتير من السنين اللى فاتت
    بس للاسف الاسعار ناااااااار يا حبيبى ناااار

    ربنا ينتقم منهم البعدة

    ReplyDelete
  21. انا بجد عايزة اعيط اوووووووووووووووووووووى

    وكمان عايزة اصوت
    بجد


    كان نفسى اروح المعرض واشوف واختبر كل حاجة حصلت مع كل شخص راح المعرض ...يا بختك بجد انك شوفت شخصية محترمة فعلا زى بلال فضل


    انا بحقد بجد


    :D


    اهق اهق اقه اقه اهق اهق اهق



    عاااااااااااااااااااااااا

    ReplyDelete
  22. انا مروحتش باة خالص المعرض وهموت واروحة حد يوديني والنبي

    ReplyDelete
  23. ايه موضوع معرض الكتاب مرتين ده
    اصلى انا كمان رحته مرتين
    ومش رضيت ادخل لا دار المعارف ولا الاهرام لنفس السبب الى بتقول عليه

    ReplyDelete
  24. بلال فضل رائع و ممتاز
    و انا رحت المعرض و نفس اللي انت قلته انا حسيت بيه

    ReplyDelete
  25. ليك تاج عندى ومش عايزة أعذار وأنت حر بقى

    ReplyDelete
  26. الله يا بختك انا بحب تاليفه اوى

    بس اوصفلنا باه المرة الى كانت مع خطيبتك

    عين بتغمز

    ReplyDelete
  27. شيكابالا:
    في انواع من الرقابة يا انسة مفيهاش رحمة
    عاملة كدة زي رقابة وائل جمعة...مفيهاش فرار
    وبعدين ما سيادتك ست العارفين..اكيد قلت لها
    بلااااااااااااااااااااش
    قالت لي
    هاجي يعني هاجي
    باين عليكي مش من هواة الكتاب الشبان....اكيد انتي ليكي انتماء معين يعز قوي ماهم فوق التمانين
    عموما اكيد اسلوب بلال مش هيناسبك
    تحياتي واحتراماتي و......

    ReplyDelete
  28. ض/خالد:
    صدقت والله يا دكتورنا
    نورت المدونة ومنتظرك دائما ان شاء الله
    تحياااتي

    ReplyDelete
  29. shymaa:
    هو انتي لحد دلوقتي يا شيماء مكنتيش مركزة معاه؟
    حرام عليكي يا شيماء
    ليكي فرصة تانية
    تحياتي واحتراناتي

    ReplyDelete
  30. بنت خيخة واي كلام:
    اتفرجي ع الصور طبعا
    اصل صاحب الصور دي هو اللي كاتب مش العكس
    وبالتالي الصور اهم من الكتابة
    انتي ماسمعتيش عن المقولة الخالدة
    شر البلية ما يضحك
    او المقولة الاكثر خلودا
    ضحك ولكنه كالبكاء
    هو دة بالضبط
    عموما هيحصل في القريب العاجل تنسيق بيني وبين محمد رجب
    يا اما هخس له يا اما هيتخن لي
    علشان هو مزنوق في دوبلير واهي سبوبة برضة
    عموما
    مش محتاجة تروحي ميريت لو هي بعيدة عليكي
    قلمين موجودة في كل المكتبات تقريبا
    تحياتي واحتراماتي

    ReplyDelete
  31. soooo:
    فعلا
    بس شوف انت بقى بعد ا الامور اترستقت معاه
    افلامه عاملة ازاي
    انا اعتقد ان واحد من الناس دة..يشفع له ويغفر له كل الاخطاء اذا جاز تسميتها اخطاء اصلا
    تحياتي واحتراماتي

    ReplyDelete
  32. فرنسا هانم
    عموما السويس مش بعيدة عن القاهرة خالص
    اتمنى تلحقيه السنة اللي جاية ان شاء الله
    معرض الكتاب ما يتفوتش فعلا
    هو في ارض المعارض بمدينة نصر بجوار استاد القاهرة
    بلال للاسف اعتقد انه مالوش مدونة
    ممكن تعرفي تفاصيل عن حياته واعماله من خلال موقع ويكيبديا العربية
    تحياتي واحتراماتي

    ReplyDelete
  33. جيداء:
    يا بختك
    انا دبرت المرتين اللي رحت فيهم دول بالعافية
    بالنسبة لاسعار الكتب يا جيداء فالناشرين فعلا معذورين
    الاقبال على شراء الكتب في مصر ضعيف جدا وبالتالي بيضطروا يرفعوا اسعار الكتاب لتغطية تكاليفه وتحقيق المكاسب علشان يعرفوا يستمروا في طبع الكتب
    تحياتي واحتراماتي

    ReplyDelete
  34. oceaneyes:
    اوعي تكوني كنتي ممنوعة امنيا من زيارة المعرض
    المعرض كان مفتوح لحد امبارح وكان بيرحب بيكي
    عموما ماتزعليش...ملحوقة ان شاء الله روحي السنة اللي جاية
    او معرفتيش تروحي معرض القاهرة الدولي للكتاب روحي معرض برلين للكتاب افضل
    تحياتي واحتراماتي

    ReplyDelete
  35. مشمش:
    ايه يا م مشمش
    خد تاكسي على حسابي وقل له
    معرض الكتاب
    هيوديك على طول
    وابقى شوف خد منك كام وانا هحاسبك
    بس الكلام دة السنة اللي جاية ان شاء الله وعليك خير علشان المعرض خلص خلااااص
    تحياااااتي

    ReplyDelete
  36. desert cat:
    على فكرة ولا حد هيسأل ويحاول يصلح من الاجنحة دي
    والسنة اللي جاية ان شاء الله هتلاقيهم بنفس النظام والاسلوب
    عارفة ليه؟
    علشان محدش بيحاسب حد
    وعلشان الماء السايب يعلم السرقة
    تحياااتي

    ReplyDelete
  37. shams:
    عقبال السنة اللي جاية ان شاء الله
    تحياااتي

    ReplyDelete
  38. bosbos:
    تاجاتك سيف على رقبتي يا هانم
    علم وينفذ

    ReplyDelete
  39. عاليا حليم:
    طب ليه الاحراج دى بقى؟
    وش محمر
    تحياتي

    ReplyDelete
  40. انا رحت المعرض مره واحده وكان فيه مظاهره
    اكيد كان يوم كوبيا
    للأسف انا ماعرفتش بلال فضل وماقريتلوش
    بس بجد شوقتنى
    شكرا لانك قلت كلمة حق لانسان يستاهلها
    -------
    اه على فكره
    لو ليك فى التجمعات والحفلات تبقى تعدى عليا
    وهاتلاقى حاجه تعجبك
    www.pinsywinsy.blogspot.com

    ReplyDelete
  41. وينكي:
    بلال فضل كاتب ساخر معروف جدا بالاضافة الى انه سيناريست شهير جدا
    من اهم افلامه
    صايع بحر وابو علي وواحد من الناس
    تخسري كتير لو ماتابيعتيهوش بعمق
    تحياتي واحتراماتي

    ReplyDelete
  42. للاسف الشديد
    مقدرتش اروح السنة دي
    بجد زعلان جدا

    ReplyDelete
  43. انا معاك ان بلال فضل دلوقتي على مستوى الكتابه الصحفيه بقى نجم من نجوم الكتاب الصحفيين وليه اسلوبه الخاص
    ومعاك برضه في ان بلال فضل السيناريست اللي كتب فيلم زي واحد من الناس وفيلم خارج على القانون .. غير بلال فضل اللي كتب سيد العاطفي

    بس المشكله ان القائمين على الانتاج الفني .. سواءا ادبي او سينيمائي .. بيفضلو سيد العاطفي عن واحد من الناس

    يكونش عشان خاطر سي تامر حسني ومعجبينه؟؟؟


    ملحوظه
    حركة جميله منك انك تعمل بوست عن الراحل مجدي مهنا
    بس كنت فتحت التعليقات عشان نترحم عليه كلنا مع بعض .. ربنا يرحمه



    سلامووووووووووز

    ReplyDelete
  44. السلام عليكم ورحمة الله وبركاته

    ماروحتش المعرض
    بس باعشق كتابات بلال فضل

    ReplyDelete
  45. عدت من جديد يا صديقي
    أنا من خلال اللقاءات اللش شوفتها لبلال فضل مع عمرو أديب و الله دخل قلبي
    تحياتي

    ReplyDelete
  46. غمض عينيك:
    ملحوقة يابو حميد
    الجايات اكتر من الرايحات
    طول العمر بيبلغ الامل
    تحياتي

    ReplyDelete
  47. soooo:
    على فكرة احتمال انه بسبب تامر حسني دة احتمال قوي جدا
    خاصة ان احنا بنعيش زمن تامر حسني...وطبعا كلنا شايفين زمن تامر حسني عامل ازاي
    بالنسبة لقفل التعليقات في موضوع المرحوم مجدي مهنا
    حسيت ان الصمت في الحالة دي ابلغ تعليق من مليون كلمة
    تحياااااتي

    ReplyDelete
  48. خمسة فضفضة:
    المعرض خسر كتير لعدم حضورك يا دكتورة...مش العكس
    تحياتي واحتراماتي

    ReplyDelete
  49. micheal:
    انت كنت فين يا عم مايكل...قلقتني عليك
    خفت تكون حصلت اخواتك بتوع المدونة مغلقة حتى اشعار اخر
    هو انت لحد دلوقتي بلال فضل ماكانش دخل قلبك؟
    معقول؟
    عود احمد يا مايكل

    ReplyDelete
  50. الكومنت ده كنت عايزه احطه في بوست الراحل الرائع مجدي مهني
    قد ايه الراجل ده الناس حبته سبحان الله ربنا يرحمه انا زعلت اوي و فرحت في نفس الوقت لأن احساسي ان ربنا كان بيحبه جدا و حبب فيه خلقه كلهم سبحان الله

    ReplyDelete
  51. أنا بقالي كذا معرض مش باخش جناح الأهرام علشان موضوع الأمانات ده
    وبعدين خد عندك بقى بتاع الأمانات بتاع دار الكتب، أول ما يشوفك: كل سنة وانت طيب كل سنة وانت طيب كل سنة وانت طيب كل سنة وانت طيب كل سنة وانت طيب كل سنة وانت طيب كل سنة وانت طيب كل سنة وانت طيب كل سنة وانت طيب كل سنة وانت طيب كل سنة وانت طيب كل سنة وانت طيب كل سنة وانت طيب

    ReplyDelete
  52. koukawy:
    معلش اني كنت قافل التعليقات في بوست الراحل مجدي مهنا
    بس دة بسبب اني حسيت ان اي كلام لن يضيف جديد ولن يعيد اللي راح
    الله يرحمه
    تحياتي

    ReplyDelete
  53. ميشيل حنا:
    كل سنة وانت طيب كل سنة وانت طيب كل سنة وانت طيب كل سنة وانت طيب
    ههههههه
    نورت المدونة

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails