Wednesday, 13 February 2008

تاج وتمن8/1


يا تاجاتك يا بس بس!!!!!!!!!!
بس بس( الروح ) مضبطاني بالتاجات اعلى تضبيط
الاسبوع اللي فات اتحفتني بتاج وكتبت لي ان لي تاج عندها...رحت ادور ع التاج عندها مالقيتش غير سؤال واحد
اتاري التاج عبارة عن سؤال واحد فقط لا غير
طلع تمن تاج بس
بوست ايدي شعر ودقن وقلت اصغر تاج في الحياة
بس بس قررت ان فرحتي لا تدوم وبالتالي اتحفتني بتاج سمين من العيار التقيل من بتوع زمان دول
وبالتالي بقيت مديون لها بتاج وتمن
نبدأ بالتمن الأول:
هل تقبل ان تتزوج امراه مطلقه ؟؟
انا عن نفسي اقبل....ولكن هل المجتمع يقبل؟
الأهل هيكون ايه موقفهم ايه؟
اغلب الظن انهم مش بس هيرفضوا...هم هيحاربوا الفكرة دي بكل ما اوتوا من قوة
بكل الترغيب والترهيب....هيستخدموا سلاح الابوة والامومة وكمان سلاح التهديد والوعيد
احنا مش عايشين لوحدنا...حوالينا ناس..وناس بيحبونا...ماينفعش علشان نسعد نفسنا..نتعس ناس كل ذنبهم انهم بيحبونا وشايفين ان دة غلط ومصيبة
انا عن نفسي مش فارق معايا على الاطلاق حكاية مطلقة او ارملة انما فارق معايا تماما اهلي وناسي اللي اكيد فكرة زي دي ممكن تصيبهم بدمار شامل
اللي يقدر يتغلب على الصعوبات العائلية دي....يبقى مبروك عليه
**************************
نخش بقى على التاج الدسم....اللي فات دة كان زي الشوربة اللي قبل الاكل....نخش ع البهاريز
هل توافق على حزف خانة الديانة من البطاقة الشخصية ؟
خانة الديانة دي مضايقة الناس ليه؟
مالها خانة الديانة؟
انا عمر ما حد شاف ديانتي في بطاقتي...دي حتى مكتوبة في ضهر البطاقة مش في وشها
الخانة دي مطلوبة بشدة لعمليات ادارية واجرائية بحتة ولا شيء غير ذلك ولا اعتقد ان لها اية استخدامات اخرى..وبالتالي انا ضد الغاءها على طول الخط
مش ناقصين نصب والنبي...كفاية
رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟
انا شخصيا بقرف منهم
بصراحة..بقرف قوي بالذات من المثليين الذكور
انا بشوف انها مرض نفسي اكتر منها حرية شخصية
لو المريض المثلي معترف انه مريض يبقى لازم نساعده انه يتعالج.....لو هو مصمم ان دي حرية شخصية اوك ماشي
بس يكف اذاه بقى عن الناس ويعيش في حياته بمبدأ
اذا بليتم فاستتروا
اوافق على الاعتراف بيهم علشان يكونوا معروفين في المجتمع بدل ماهم مندسين وسطنا وعارقين منهم قلة ومش عارفين اغلبهم وبالتالي في حالة الاعتراف بيهم هيبقى سهل انهم يتعرفوا
انا ماليش اي اصدقاء مثليين على الاطلاق.....ماقابلتش حد منهم قبل كدة وجها لوجه
هل تعتقد بوجود إضطهاد للمسيحين فى مصر ؟
اضطهاد بمعناه الحرفي....مش للدرجة دي
انما في حاجة غلط.....في وظايف كدة ماشفناش فيها حد مسيحي
سيبك من رئاسة الجمهورية ورئاسة الوزراء والكلام دة لاننا ماشفناش فيها حد مسلم برضة.........قصدي طبعا مسلم غير اللي موجودين فيها دلوقتي..بمعنى انها حكر على افراد معينين بصرف النظر عن دياناتهم
قصدي انها احتكااااااااااااااااااااااار وغير مسموح لاي حد بالقتراب او التصوير...اي حد بصرف النظر عن ديانته
انما هتلاقي الشرطة او الجيش ا و اي جهة سيادية اخرى عددهم بيكون قليل جدا بيصل لحد الندرة....انما هتلاقي ان الاخوة المسيحيين بيسيطروا على قطاع الطب والصيدلة بشكل كبير جدا وملحوظ
على فكرة:
انا مابحبش التقسيمة دي على الاطلاق ولست من هواة التصنيف الديني ولكن اجابتي دي نتيجة للسؤال ليس الا
من هو الشخص الذى تختارة لرئاسة مصر ؟
اي حد نفسه ينضف مصر
اي حد
اي حد
اي حد
بس يكون ناوي يبني دولة اسمها مصر على نضافة...ومش هقول يبنيها من اول وجديد لان مصر عمرها على مدار تاريخها محدش بناها اصلا..واللي فكر نفسه انه بيبني بلد اكتشف انه بيبنيها على اسس هشة
إذا قت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟هل توافق على مشاركة كل من : الإخوان المسلمين - الأقباط فى الحكم ؟
اي حد ان شاء الله يكون بوذي....هندوسي......سيخي حتى
الاهم من كل دة
انه يكون بيحب البلد دي....مش بس بيحبها
بيعشقــــــــــــــــــــــــــــــهـــــــــــــــــــــــــــا
مصر عايزة ناس بيحبوها اكتر من نفسهم...مش مهم اسمهم ايه
احمد او محمد او جورج او كوهين...المهم انه يكون جنب اسمه:
مصري
فى رأيك الشخصى .. ما هى أفضل مدونة على بلوجر قمت بزيارتها ؟
اي مدونة احس انها بتتكلم عن موضوع يخصني
انا مش بقيم مدونات...انا بقيم موضوعات
اذا تزوجت وأنجبت ولدين وبنتين .. أى الأسماء تحب أن تسمى ؟
سيف الاسلام ونور الدين بالنسبة للأولاد
فريدة و سارة بالنسبة للبنات
هل تعتقد أن توريث الحكم فى مصر . . سيتم فعلا أم لا ؟
لا اعتقد على الاطلاق
مصر لسة فيها ناس....لسة بتنبض
لسة لم تمت
مصر مش زي سوريا
مش هيحصـــــــــــــــــــــــــــــل
هتمرر التاج لمين
قصدك التاج وتمن 1/8
امرره لأي حد بيحب يقرا للعبد لله الفقير
اي حد فكر يرد عليا
اي حد بيقدر اني زرت في مدونته وقرر يرد لي الزيارة
وفي النهاية
اللي بيحبنا مايضربش نار

28 comments:

  1. اجبات حلوة لكن سريعة قوي

    وتلقائية جميلة


    تحياتي

    ReplyDelete
  2. مش ممكن مكنتش اعرف انك لسه مجاوبتوش
    بس اجاباتك حلوة يا احمد
    و دبلوماسية قوى
    تحياتى

    ReplyDelete
  3. كش ملك وكش رئيس كمان

    إجابة الثمن تاج واقعية جدا
    وباقي الإجابات برضة جميلة وعقلانية

    ReplyDelete
  4. اجابات جميلة ودمها خفيف موت اكيد زى صاحبها وربنا يخليلك اولادك بس نسيت تضيف للقايمة جمال وعلاء عشان تكمل وعامة كل سنة وانت طيب هابى فالانتين واسمحلى استغل مدونتك ف مساحة اعلانية عيد حب سعيد لكل المحبين ولك انت يامن علمتنى الحب فالحب فى صورتة المجسدة هو انت الحب والحياة والامل فعندما يغلبنى الشوق اليك واتطلع لصورك استعرض بطولاتك استجمع نفسى لانطق باسمك زمالك زمالك زمالك ربنا يخليك ليا عشان جيبتلنا المعلم

    ReplyDelete
  5. اجابات جميله ومتزنه
    وبكده
    ممكن
    اضمك للتشكيل الوزارى
    بتاعى
    لو كونت حكومه بجد وجدانى
    تحياتى
    بس قولى
    هو تمن التاج ده هديه على التاج الاساسى ؟
    برضه اجابتك معتدله فى التمن

    ReplyDelete
  6. اجابات حلوه بس اسئله احلى
    ياريت دى لو تتكتب وتبقى زى استفتاءات كدا
    تعدى على كل مواطن مصرى

    وبعدين تتعرض على اللى فوق

    ممكن تكون سبب فى شوية تغيير فى البلد

    بوست جميل اوى

    ReplyDelete
  7. اجاباتك وردودك على التاج وتمن تاج حلوين بجد ..وحاسة انهم نابعين منك ...يعنى اللى كان فى قلبك وقتها كان على لسانك وبالتالى على مدونتك


    تحياتى لبراعتك فى الاجابة


    :)

    ReplyDelete
  8. تاج وثمن هو أنت رايح تشترى جبنة حضرتك
    هههههههههههههههههه
    ماشى ماشى عقابا ليك كل كام يوم من ده هتلاقينى مظبطالك شوية تاجات حلوين كده

    ويارب أفرح بيك قريب أنت واللى بالى بالك ونفرح بأولادك اللى أنت أخترت ليهم أسماء حلوة قوى

    تحياتى لك

    ReplyDelete
  9. الله على الاسئلة والاجمل الاجابات بجد تحفة

    ReplyDelete
  10. اجبات فى الجون يا باشا الناس بتوع السياسه والخارجعيه تعرفهم وهم صغنونين

    ReplyDelete
  11. صاحب المضيفة:
    الله يخليك الف شكر
    ماحنا في عصر السرعة بقى...انت عارف
    تحياتي

    ReplyDelete
  12. rania:
    التاج دة يا رانيا لف على كل مدوناتك يا مصر
    لسة واصلني حالا
    الله يخليكي...بس مش دبلوماسية والله..دي الحقيقة
    تحياتي واحتراماتي

    ReplyDelete
  13. عصفور المدينة:
    الله يخليك يا باشمهندس
    شكرا لك
    تحياتي واحتراماتي

    ReplyDelete
  14. شيكابالا:
    انا لو ليا اولاد اسمهم علاء وجمال...هوأدهم
    كفاية علينا اتنين مش معقول هيبقوا اربعة
    معقول 2 جمال و2 علاء في مصر؟
    دة كتير قوي
    ربنا يخليلك زمالكك
    عارة الزملكاوية دول بيفكروني بأيه:
    باللي بيقع في غرام جلاده
    اه والله
    ناس بتعشق مصدر احباطاتهم ونكدهم
    ظاهرة غريبة تستحق الدراسة
    ابقي فكريني احجز لك عند دكتور صاحبي..انتي عارفاه مش كدة؟
    هههههههه
    تحيااااااني

    ReplyDelete
  15. فرنسا هانم:
    اه بس بس مقدمة العرض دة
    جاوب على التاج واحصل على تمن تاج مجانا
    فرصة لا تعوض
    الف شكر ليكي...بس ياريت تديني وزارة الاعلام..اصل انا غاوي تليفزيون ودش وحاجات كدة
    تحياااااتي

    ReplyDelete
  16. دا تانى بلوج الاقى فيه نفس التاج

    بس مجاوب بقوة

    ReplyDelete
  17. اجاباتك جميلة
    انا دخلت مدونتك قبل كده
    بس معرفتش اعلق فين..فى البوست اللى قبل ده
    الحكاية على فكرة مش رد زيارة
    :)
    تحياتى ليك

    ReplyDelete
  18. يا جامد يا جامد
    حلوة الاجابة دي مع اني بزور المدونة لاول مرة

    بس بجد الاجابات قصيرة لكن شاملة المعني احب انا اوي النوع دا من الناس
    لاء وايه كلها بصراحة وتلقائية
    اتمني لك مزيد من التوفيق

    ReplyDelete
  19. حبة حاجات:
    بصي يا ايمان
    الاسئلة حلوة...والاجابات حلوة
    بس مين يقرا ومين يسمع
    شكرا ليكي
    تحياتي

    ReplyDelete
  20. oceaneyes:
    الف الف شكر
    انا بجد باحس ان المدونة بتاعت البني ادم هي مرايته...هي المراية ممكن تكدب؟
    لو الانسان وهو في مدونته اللي في قلبه مش هو اللي على لسانه يبقى كان لازم يقفلها من زماااان
    تحياتي واحتراماتي

    ReplyDelete
  21. bosbos:
    ازيك يا بس بس
    عاملة ايه؟
    قعدت ادور على بقية اسئلة اللي المفترض انه تاج..اكتشفت انه سؤال واحد
    مش عارف ايه اللي خلاني اسميه تمن وليه مش ربع او مش خمس؟
    هي جت كدة بقى
    عموما تاجاتك تيجان فوق رؤسنا جميعا يا فندم
    انا عارف ان زعلك وحش
    تحياااااتي

    ReplyDelete
  22. gannah:
    الف شكر ع الكلام الجميل دة
    نورتي المدونة
    تحيااااتي

    ReplyDelete
  23. صوت من مصر:
    يا باشا دة من ذوقك
    منورني دايما
    ياريت اشوفك باستمرار ان شاء الله
    تحيااااتي

    ReplyDelete
  24. barbie girl:
    تاني بلوج بس؟
    قولي عاشر مرة او المرة العشرين
    التاج دة لف على كل بيت في مصر
    نورتي مدونتي المتواضعة
    تحياااتي

    ReplyDelete
  25. summar:
    البوست بتاع الراحل الرائع مجدي مهنا كنت مانع الكومنتات...حسيت ان الصمت هيكون ابلغ من 100 كلمة
    نورتي المدونة واتمنى الا تكون اخر زيارة
    تحياااتي

    ReplyDelete
  26. shirry:
    ماهو دة يا شيري شعاري دائما
    سرعة مع اتقان
    مع اعتذاري للحلاقين..انا اقتبست شعارهم الخالد
    منورة المدونة وهستنى تعليقاتك على كل المواضيع ان شاء الله
    تحياتي

    ReplyDelete
  27. مدونة لذيذة

    اول زيارة ليا و ان شاء الله مش الأخيرة

    تحياتي

    ReplyDelete
  28. اجابات حلوة وفي الجون

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails