Monday, 28 January 2008

انا كمان عايز اتصل بيهم


بتنتهي مباراة مصر من هنا...وبتبدأ السعادة والفرح الشديد والانتشاء واقعد اقلب في المحطات المختلفة علشان اتابع الاستوديوهات التحليلية واعادة الاهداف واللقطات المهمة مع خلفية موسيقية لاغاني وطنية سواء حديثة او قديمة
وتستمر حالة السعادة دة لحد ما يجروا الاتصال اياه بالبعثة في غانا ويفرحنا رئيس البعثة ويبلغنا ان السيد علاء مبارك اتصل بيه وابلغه سعادته الشديدة وتهانيه وتمنياته القلبية للاعبين
فورا...وبلا سابق انذار تتحول حالة السعادة لحالة من التساؤل وتقعد كدة شوية علامات استفهام تتراقص قدام عيني وتلعب في دماغي التعبانة كام سؤال كدة مالوش اي معنى...بس تقول ايه بقى...ماهي دماغ تعبانة ليس عليها حرج
ليه الاستاذ علاء بيتصل ببعثة المنتخب؟ وبأي صفة؟
هل بصفة انه مواطن مصري بيحب منتخب بلاده؟ طب مانا كمان مواطن مصري وبموووت في منتخب بلادي بس ما بتصلش ببعثة المنتخب لا في غانا ولا حتى في القاهرة
طب ازاي بيعرف يتصل بيهم؟ معاه نمرة رئيس البعثة؟ طب نمرة رئيس البعثة دي بيجيبوها منين؟ انا عايز نمرة رئيس البعثة
طب هو بيشغل منصب رسمي علشان كدة بيتصل بيهم؟
محدش بلغنا بحاجة زي كدة
طب ليه الاستاذ جمال مش بيتصل بيهم ويطمئن عليهم؟ هو مش مصري هو كمان وبيحب منتخب بلاده؟
طب ايه سر السعادة اللي بتكون على وش رئيس البعثة او مدرب المنتخب وهو بيبلغنا خبر ان الاستاذ علاء كلمه في التليفون؟
طب هل لو انا اللي كلمتهم بالتليفون كان هيبلغ الشعب المصري الفرحان بالخبر السعيد دة؟
وليه لما بيبلغوا اللعيبة بالخبر السعيد دة بيقولوا ان الحماس دب في الاعبين وان عنيهم دمعت من التأثر والحاجات دي
هو فيه ايه؟
دستوريا...وانا اسف على ذكري كلمة ابيحة زي كدة...انا والاستاذ علاء مواطنان مصريان لنا نفس الحقوق وعلينا نفس الواجبات...بس الفرق بيننا ان الاستاذ علاء بيعرف يتصل ببعثة المنتخب وانا بكتفي اني افرح ان الاستاذ علاء اتصل ببعثة المنتخب
الحكاية دي فكرتني بمشهد من فيلم قديم كان عادل امام طالع كومبارس وبيطلع ينضرب في الافلام وكان يوسف شعبان طالع في دور بطل الفيلم
دور عادل امام كان بينحصر في انه ينضرب بس..وكل شوية يعيدوا المشهد بتاع الضرب لحد ما الراجل اتهرى وفاض بيه
فقال للمخرج..انا عايز ابوس......
المخرج رد عليه وقال له لا انت هتنضرب بس
فرد عليه عادل امام....اشمعنى الاستاذ يوسف شعبان بيبوس
المخرج قال له كلمة حكمة والله..قال له
الاستاذ يوسف شعبان يبوس.....انما انت تنضرب بس

بس خلاص

21 comments:

  1. شيكابالا28 January 2008 at 01:33

    السلام عليكم ورحمة اللة حقيقى انا مبسوطة انى اكون اول تعليق ع الموضوع ويمكن يكون اخر تعليق تشوفة قبل ماتروح ورا الشمس هههههههههههههههههههه بس حبيت ابدا البداية دى عشان اعرفك كم الديمقراطية اللى بنتمتع بيها حاليا واحب اقولك انت كل يوم بتاكد انك كاتب ساخر متمكن جدا حسستنى كدة انى بقرا لاحمد رجب فنص كلمة بوست هايل بجد واحب اقولك ان الاستاز علاء ممكن بس تكون علاقاتة اوسع منك حبتين فجاب نمرة رئيس البعثة هحاول اشوف حد يجيبلنا الرقم لان اللعيبة ف انتظار تليفونك اللى هيديهم دفعة معنوية محصلتش ولايهمك بس قولى اية رايك ف جون ابو تريكة الاخير؟
    فرحتنا كلها واحدة يا عم احمد الرئيس والبواب الوزير والفراش وانا وانتوالمقامات محفوظة يا باشا

    ReplyDelete
  2. اما بجاحه صحيح انت عاوز تربط حمارتك جنب حمارةابن العمده

    ReplyDelete
  3. والله بجد صح يا احمد
    زي ما قالك محمد عبد الغفار
    يخرب عقلك

    ReplyDelete
  4. بجد بجد مش هرد عليك خاااااااااالص
    بس استنى عليا أنت قلت عايز أيه نمرة رئيس البعثة بسيطة خالص هشوفها ليك امال أيه أحنا يسعدنا أن أحمد باشا سمير يتصل برئيس البعثة ويجى الراجل على التليفزيون يقول لنا يا جماعة فيه واحد أسمه أحمد سمير أتصل تعرفوه ههههههه

    نقطة تانية لشيكابالا
    طيب لية يعنى تديلة تنبيه بأنه هيتخطف مش تخليها سر بينا كده يعنى ههههههه
    كده هو هيعمل أحتياطاته ومش هنعرف نخطفة
    أقول لك أنا هخطفكم أنتوا الأتنين هعمل ليكوا أيه بقى


    تحياتى ليك قبل عملية الخطف

    ReplyDelete
  5. ههههههههههههههههههههه


    سؤالك بجد سؤال فى المضمون يعنى ..بس اتطمن انت دماغك مش مش عليها حرج ولا كدة ..انت دماغك فكرت فى حاجة ممكن اوى ما تجيش على بال اى حد تانى

    اما عن الاجابة المنطقية والصحيحة اللى المفروض تتقال ..فبجد بجد الله اعلم ..علمى علمك ..بس ياريت لو عرفت الاجابة تبقى تدينى خبر بيها


    وبجد بوست حلو

    ومبروك على النتيجة بتاعت المباراة ..ربنا يكرمهم بس ويكملوا للاّخر



    تحياتى


    :)

    ReplyDelete
  6. هههههههههههههههههه

    لا بجد جامده
    صحيح دستوريا احنا كلنا مواطنين انما مباركيا هو مواطن واحنا.... تيييييت

    الرقابه تمنع

    ههههههههههههههه
    معلش مهو صحيح الى اختشو ماتو بقى

    اقعد بس على جمب يا عم احمد وخلينا نعرف نشوف المتش مش كل شويه هتوقفلينا قدام الشاشه وتسال على نمرة رئيس البعثه

    قال رئيس البعثه قال
    طيب متتصل بعلاء وتاخدها منه

    :)))))))))

    سلاماااااااااات

    ReplyDelete

  7. علاء مبارك مواطن

    هاهاهاهاهاه

    دا هوا مصر ... و مصر هوا


    عموما هوا كده لازم أي انجاز ينسب لسعادة الناس اللي في القصور حتي لو أنجاز رياضي (اللي في أي بلد محترم متقدم أساسا لا يسمي أنجاز ... أنما الانجاز لما يوصلوا بمركبة فضاء للمريخ أو يكملوا دستة أقمار صناعية للتجسس علي العلم أو جعلوا متوسط دخل الفرد 35 الف دولار في السنة ... أو ... أو (

    ReplyDelete
  8. مبدأ "ما أريكم إلا ما أرى"

    مع فارق التشبيه طبعا

    -------------------------------

    كان واحد قالي جملة لسة معلمة في دماغي لحد دلوقتي

    "فاستخف قومه قأطاعوه"

    كان شعب مصر على فكرة

    ReplyDelete
  9. بجد هو ده الاستاذ علاء بتاع الفيزيا ولا ايه
    وسؤال محيرنى بقاله حوالى سنتين بحالهم هو دخل الجيش وكان عسكرى ولا دخل وعمل مشروع هناك مثلا كان بيبيع سجاير فرت للغلابه الدفعه
    هههههههههههههه لازم نضحك ومش محتاجين اى طبطبه من حد على راى الست انغام

    ReplyDelete
  10. بجد
    مكنتش متصورة ده
    كان اخر حاجة اتوقعها
    لا لا لا متبررش موقفك
    خلاص
    كلمة الحق بتتقال الاول
    ولا كلمة زيادة

    اتضح انك شخصية منفسنة وحاقدة
    وبتبص لفوق اوي

    بس خلاص

    ReplyDelete
  11. شيكابالا:
    معلش بقى انا محدش يقدر يرميني ورا الشمس لا مؤاخذة
    ودة مش علشان حاجة انما علشان مفيش شمس اصلا الايام دي
    بالنسبة لحكاية كاتب ساخر دي....دة انا غلباااااااااان
    على فكرة
    استاذ بتتكتب زي مانا كاتبها كدة مش استاز زي ما سيادتك كاتباها
    ههههه
    اي خدعة

    ReplyDelete
  12. لا انا نفسي اشتري حمارة زي ابن العمدة

    ReplyDelete
  13. محمد مفيد:
    مش بقوللك
    انا لسعت خلاص
    تحياتي

    ReplyDelete
  14. bosbos:
    طبعا طبعا شرف كبير ليهم اني اتصل بيهم
    هم يطولوا
    ويالا بقى علشان نبدأ الخطف من اوله علشان ربنا يكرمنا

    ReplyDelete
  15. oceaneyes:
    اعمل ايه بس؟
    جننوني
    كل شوية واحد يطلع مبتسم جدا ويقول الاستاذ علاء اتصل بينا
    هتجنن يا جدعان
    الف شكر ليكي ع المجاملة القيمة دي
    تحياتي

    ReplyDelete
  16. shaymaa:
    لا لا لا...انا ماسمحش بكدة ابدا
    احنا اللي مواطنين وهو اللي تيييييت
    بس طبعا تيييت دي غير تيييت بتاعتك
    تييييت بتاعتي يعني الباشا..الملك..السلطان..واكيد بتاعتك برضة تقصدي بيها كدة
    مش كدة ولا ايه؟
    عموما علاء موبايله مابيجمعش...الظاهر مادفعش الفاتورة
    تحياتي

    ReplyDelete
  17. قليل من التفكير:
    لا تختزل الوطن في شخص واحد يا اخي
    بل
    اختزله في 4 اشخاص
    انت عارفهم طبعا
    تحياتي

    ReplyDelete
  18. kimexlilo:
    مع التشبيه الكبير والرهيب طبعا في المكان والزمان والاشخاص نفسهم
    تحياتي

    ReplyDelete
  19. صوت من مصر:
    دخل الجيش؟!!!!!
    نصيحة بجد بقى
    يرجى مراجعة اقرب طبيب نفسي للكشف عن قواك العقلية
    عيب كدة
    دة انت من مصر
    تحياتي واحتراماتي

    ReplyDelete
  20. mesh2adra:
    لا انا معنتش ببص خالص
    انا اتعميت خلااااااص
    لا ارى لا اسمع لا اتكلم
    تحياتي واحتراماتي

    ReplyDelete
  21. ايه ياعم ما انت كنت ماشي كويس
    ايه اللي دخلك في استاذ علاء وجمال وباقي العائلة المباركة
    انت مش قلت بنفسك
    استاذ يوسف شعبان يبوس انت تنضرب بس
    صلى ع النبي بقا كده واشرب شاي بالنعناع


    محمد سمير

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails