Tuesday, 15 January 2008

يا اهلا بالتاجات

اول تاج في 2008.....استعنا على الشقا بالله
وطبعا بما ان التاج من بس بس صاحبة ومديرة مدونة الروح يبقى التاج امر
ونخش في الموضوع:
لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟
كنت هقول دة شعب ماعندوش كرامة ولا عزة نفس..ممكن يبيع ابوه علشان القرش...المصري لو قلت له اقلع ملط وامش في الشارع وهديك الف ريال او درهم مش هيقول لا
وان كان الامر لا يخلو من شوية ناس محترمة في الشعب دة ولكن قلة نادرة...دة حتى المهن اللي المفروض صاحبها بيتمتع بقدر من العلم والثقافة زي الاطباء والصيادلة والمهندسين اللي بييجوا عندنا بلادنا معدوش بيختلفوا عن النجارين والعمال..كلهم بيجمعهم عبادة المال وشعارهم لا كرامة لنا امام الريال والدينار

ملحوظة:
انا طبعا باتكلم بلسان الخليجي..مش بلساني..يعني انا بانقل وجهة نظر الاغلبية العظمى من سكان الخليج العربي تجاه المصري..وان كان المصري هو سبب كدة بالطبع

لوكنت أوروبي أو غير مسلم هتبقي إيه نظرتك للعرب والمسلمين؟
شعوب همجية متخلفة..لا تفكر الا في شهواتها وبس...ناس بتلبس حاجات غريبة وبتحط حاجة اغرب فوق دماغها ولما بينزلوا اوروبا عندنا بتلاقيهم في الكباريهات وموائد القمار واحضان العاهرات
شعوب بتتحكم بالجيوش والديكتاتوريات ولا يصلح معها اي ديمقراطية ولا حقوق للانسان
ناس لا تجيد لا الاستماع ولا الحديث...كل حواراتهم عبارة عن معارك حربية....
دول بتمتلك بحيرات من النفط اكتر من ثلاثة ارباع عائدها بيروح لجيوب الحكام والربع الباقي بيتصرف على بذخ واسراف لا مبرر له
باختصار
هي اغنى دول العالم وافقر شعوب الدنيا
لوقالولك إنت بقيت رئيس جمهورية هتعمل إيه؟
هقبض على كل اللي واكلينها والعة وارميهم في السجن
وادعو كل وطني حر وقلم شريف لمؤتمر موسع لاتخاذ خطوات ووضع خطة زمنية محددة لجعل مصر وطن بحقق وحقيقي وبما تحمله الكلمة من معنى
هيبقى هدفي ان مصر تتحول ليابان الشرق الاوسط...وهي قادرة على كدة
لوسمح لك برؤية الرسول عليه الصلاة والسلام وإنك تقوله كلمة واحدة ؟
هاقول له عليه الصلاة والسلام....هم المسلمين هيفضلوا كدة ليوم الدين...ولا ممكن تاني نرجع نحكم العالم؟
لو كنا في عصر ازدهار الأندلس كنت تتخيل نفسك إزاي؟
كنت اتوقع اني اخد طيارة احضر ماتش ريال مدريد وبرشلونة اللي اكيد اساميهم ماكنتش هتبقى بالشكل دة...واتعشى في مايوركا...واخد طيارتي وارجع
ماحنا دولة اسلامية واحدة بقى
ملحوظة:
ماكناش هنستعين بمانويل جوزيه لتدريب النادي الاهلي..على اعتبار انه ساعتها ماكانش هيبقى خبير اجنبي..كان هيبقى مواطن اندلسي عربي

لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟
على الرغم ان السؤال دة مالوش علاقة بماقبله باعتبار ان التاج كان ماشي سياسة بس هجاوب
في حالة الحب والرغبة في الحياة..مفيش حاجة تخلي البني ادم ممكن يتخلى عن حبيبه
ايه اللي يضمن للطرف السليم انه لما يتجوز او تتجوز مايخلفش طفل معاق..او عااق...وايه اللي يضمن انه هيخلف او هتخلف اساسا
انا اعتبر دة نصيب زي بالضبط الرزق في الفلوس....والله اعلم
لو طلعت القمر هتكتب عليه ايه؟
هكتب عليه
انا مصري وابويا مصري
بس المرة دي من غير صورة جمال وباباه...زي اللي في الكليب الشهير
لو مررت التاج لحد وماجاوبش هتعمل ايه؟
هدور في مدونته او مدونتها يمكن جاوب عليه قبل كدة
بس لو ماكانش جاوب عليه قبل كدة وكمان ماجاوبوش
مش هعمل اي حاجة...عادي يعني كل بني ادم حر
تمرر التاج لمين؟
لأي حد بيحب يدخل المدونة دي وبيقرا لبني ادم اسمه
احمد سمير

22 comments:

  1. إجابات ملتهبة جدا ليه كدة مع إنك بدأت بالترحيب بالتاج

    إجابة سؤال الخطبة جميلة ماشاء الله والباقي جميل برضه
    :)

    ReplyDelete
  2. شكراااااااااا على الأستجابة السريعة
    مع أنى كنت عارفة وحاسة أن أجاباتك هتكون مختلفة جدا وهتكون ملتهبة زى ما عصفور المدينة قال

    كل تاج وأنت بخير

    تحياتى لك

    ReplyDelete
  3. اجاباتك جامده أوي وصريحه وجميله :)
    أنا كانت اجاباتي على حد قول الناس يعني في التاج ده دبلوماسيه

    ReplyDelete
  4. اجابات شديدة وقوية

    ربنا يعينك ويوفقك

    سلامات

    ReplyDelete
  5. ايه يا احمد ده
    كله ضرب ضرب
    ميش شتيمه
    اجاباتك حادة اوى بس جميله وواقعيه للاسف وده سر الوجع الى فيها
    تحياتى

    ReplyDelete
  6. شيكابالا16 January 2008 at 23:26

    حقيقى يا دكتور حاولت اقاوم انى معلقش على اجاباتك على اساس يا بخت من زار وخفف لكن اجاباتك كانت مبهرة وقوية ومؤثرة ف نفس الوقت وحقيقى كل الاجابات الجامدة دى متطلعش غير من شخص عظيم زيك بس والنيى عاوز اعرف ميعاد المؤتمر وكمان نوع الطيارة الخاصة اللى هتقل حضرتك عاوزين نوع اجمد من اللى راكبها بوش دة الملك العربى المظفر المبارك احمد سمير

    ReplyDelete
  7. عجبنى التاج دا
    وعجبنى اكتر ردك عليه

    ReplyDelete
  8. عصفور المدينة:
    معلش يا باشمهندس
    اصل الاسئلة استفزتني اني اطلع اللي جوايا
    فعلا احنا منظرنا كمصريين سيء جدا قدام العرب على الرغم من بشاعتهم
    اما كلنا قدام الاوروبيين فدي بقى لا تعليق
    تحياتي واحتراماتي

    ReplyDelete
  9. bosbos:
    لا شكر على واجب يا بس بس
    انتي عارفة ان التاج علينا حق
    بس انتي بس ما تبخليش علينا كل حين واخر بتاج قوي كدة زي دة
    تحياتي واحتراماتي واعتذاراتي كماان

    ReplyDelete
  10. rehab mustafa:
    وليه الدبلوماسية يا رحاب
    الواحد وهو في مدونته لازم يتحرر من الدبلوماسية
    المدونة معمولة علشان الرأي الصريح يبقى ليه الدبلوماسية
    تحياتي واحتراماتي

    ReplyDelete
  11. صاحب المضيفة:
    الف الف شكر
    دة من ذوقك
    منورني دايما
    تحياتي واحتراماتي

    ReplyDelete
  12. لماضة:
    للاسف فعلا هو دة الواقع المرير اللي مش منتظر انه يتغير في القريب العاجل او الغابر
    تحياتي واحتراماتي

    ReplyDelete
  13. حبة حاجات ايمان:
    الف الف شكر
    بالتوفيق ليكي ان شاء الله
    تحياتي

    ReplyDelete
  14. السلام عليكم ورحمة الله وبركاته
    بوست دماغ واجابات موزونة ومتكلفة
    عجبتنى جدا ردودك
    عارف ليه؟؟
    لإنها جريئة وواضحة وصريحة وأصابت كبد الحقيقة دون تكلف أو دبلوماسية

    لاسف الشديد احنا بنعانى من الدبلوماسية فى الردود بالنسبة لأسئلة التاجات
    بس انت كسرت القاعدة

    أنا فعلا حسيت انى وقتى لم يضع هباء أثناء قرائتى لهذا البوست الدسم

    خالص مودتى
    و دمت بكل خير
    اسامة سامى

    ReplyDelete
  15. لأ أنا كده اتفهمت غلط ::D
    أنا جاوبت فعلاً بصراحه والله بس كنت بجيب احتمالات كتير للاجابات علشان أنا أصلاً مش بحب الاسئله اللي بتقول افرض ولو دي خاااااالص
    علشان كده رديت بكذا احتمال والناس اعتبروني دبلوماسيه بس ماكنش قصدي الدبلوماسيه دي خالص :)

    ReplyDelete
  16. شيكابالا:
    كان المفروض فعلا تعملي بالمثل بتاع يا بخت من ار وخفف
    بس ملحوقة ممكن البوست الجاي
    ويا فندم الف شكر ع الكلام الجامد قوي دة..انا عمال اتنفخ اتنفخ من كتر الغرور لحد ما هافرقع
    اكيد مش هقوللك على نوع الطيارة ولا على ميعادها على اساس اني طالبة معايا اروح لوحدي بصراحة
    اصل انتي عارفه ان انا راجل برشلوناوي قديم وانتي مشجعة مدريدية
    تحياتي

    ReplyDelete
  17. najwan:
    الف شكر يا نجوان
    اعتبري اي بامرر لكي التاج وياريت اشوف اجاباتك عليه قريبا ان شاء الله
    تحياتي واحتراماتي

    ReplyDelete
  18. كلام لوجيك:
    الف الف شكر على الكلام الجامد دة
    للاسف هو دة الواقع بكل مساوءه ومأسيه..الواحد زهق من الدبلوماسية
    انت فينك من زمان بقالك كتير ما بتشرفنيش بتعليقاتك القيمة
    تحياتي واحتراماتي

    ReplyDelete
  19. dema3` bardo ya a7mad basha :D

    ReplyDelete
  20. اجابات جميله وفيها خفه دم لذيذه
    تحياتي

    ReplyDelete
  21. ايه يا احمد الاجابات دى ؟!!!!


    لا بجد عجبتنى اوى ..وضحكتنى برده ..وبينى وبينك عندك حق فى كتير قولته

    keep on it :)



    تحياتى

    :)

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails