Wednesday, 9 January 2008

الطبقة المتوسطة

سمعتها كتيرا ولم تلفت نظري....لم انتبه اليها...حسيت انها جملة موضة بتتقال في برامج كتيرة
لقد تآكلت الطبقة االمتوسطة ولم يعد لها وجود
انتبهت للجملة
تآكلت؟؟؟اومال احنا ايه؟
انا لسة الحمد لله لم اتآكل...مازلت موجودا..حيا ارزق...صحابي برضة لم يتآكلوا...كلهم اعضاءهم سليمة
وانا اعتقد ان مجتمعي وناسي واصحابي وقرايبي 99.9% منهم من الطبقة الوسطى اللي بيقولوا انها انتهت وتآكلت
وعلى الرغم ان مفيش تعريف دقيق للطبقة المتوسطة دي بس ممكن نعرفها كدة مع بعضنا بالبلدي الفصيح
المفروض ان الطبقة المتوسطة دي هي طبقة بين طبقتين..(والا ماتبقاش متوسطة)...فهي بين طبقة الاثرياء سواء اثرياء بحق او اثرياء الزمن دة..وبين طبقة الفقراء الكادحين اللي لا يملكوا قوت يومهم
بالنسبة لطبقة الاثرياء...بتوع القطامية هايتس وبورتو السخنة وافراحهم اللي بيتعزم فيها وزراء وكبراء وسفراء وبيحييها عمرو دياب ونانسي عجرم ودينا....فدي طبقة معروفة وسهل انك تعرفهم من ستايل حياتهم
وبالنسبة للفقراء الكادحين اللي لا يجدوا قوت يومهم فدي برضة موجودة في مناطق كتير في البلد دي من فلاحين لعمال لموظفين لعاطلين..وسهل برضة انك تعرفهم من ستايل حياتهم البائسة اليائسة اللي لا فيها لا سفراء ولا فقراء ولا عمرو دياب ولا حتى دينا
اما بقى الاغلبية الكاسحة من الشعب دة فهي الطبقى المتوسطة اللي بيزعموا انها تآكلت وانقرضت
مين اللي قال كدة؟؟
لما يبقى مفيش طبقة متوسطة..اومال 70%من موظفي الدولة يبقوا ايه....الاطباء والمهندسين والمحامين والصيادلة (بصرف النظر عن الحيتان منهم طبعا)والمدرسين...الخ
كل الناس دي لا هي اثرياء من بتوع مارينا ولا كمان فقراء متسولين....كل الناس دي ابويا وابوك وامي وامك اللي بيشتغلوا علشان يجيبوا قرش يعلموا ولادهم بيه كويس ويعيشوهم كويس ويفسحوهم في الاجازات ويشتروا لهم هدوم ويشحنوا لهم موبايلاتهم ويدوهم دروس خصوصية..كل دول طبقة متوسطة
عايشين كويس....مستورين والحمد لله
الطبقة اللي بيقولوا عليها انها انقرضت دي انا في اعتقادي بتمثل 70% على الاقل من ابناء الشعب دة
معقول 70% ينقرضوا ويتآكلوا؟
اي نعم الطبقة الوسطى جواها نفسها شرايح...يعني الشريحة العليا من الطبقة المتوسطة مثلا ممكن تلاقيها بتضم الاطباء والصيادلة وكبار الموظفين والتجار.....الخ
وكمان تلاقي شرايح دنيا بتضم صغار الموظفين وذوي الدخل المحدود وبعض الحرفيين وصغار التجار..
ولكن يبقوا كل دول جميعا من ابناء الطبقة المتوسطة اللي لسة فيها الروح والحمد للهاي نعم الفقر انتشر بشكل كبير..واي نعم طبقى المعدومين زادت والعشوائيات اثرت بشكل كبير في انتشار طبقة فقيرة وعشوائية
الا ان الاحوال المادية ادت الى زيادة الشرائح الدنيا من الطبقة المتوسطة على حساب الشرائح العليا...الا انها لسة موجودة كطبقة كبيرة بتمثل اغلبية المجتمع
انا كل مجتمعي تقريبا من ابناء الطبقة دي..واعتقد ان انت او انتي كمان معظم اللي حواليكم بينتموا لنفس الطبقة
دي الطبقة المتوسطة دي هي الاغلبية الصامتة في البلد دي
الطبقة المتوسطة موجودة
لم تتآكل علشان محدش يقدر ياكلها واحنا على وش الدنيا

47 comments:

  1. هيا فعلا الطبقة المتوسطة موجودة وهيا حوالى 70 % محدش قال حاجة
    بس لما بيتقال أنها تأكلت ده معناه أنه زى ما أنت قلت أن الطبقة المتوسطة فيها فئات يعنى أطباء صيادلة تجار موظفين فى وظايف معينة
    وفيه كمان الحرفين والموظفين اللى فى وظايف مابقتش بتأكل عيش حاف وباقى الناس
    هما قصدهم أن الطبقة دى اللى كانت زمان عايشة كويسة قربت تتاكل وتوصل للطبقة الفقيرة يعنى زى الموظف اللى بيقبض 400 أو 500 جنيه وعنده عيلين ثلاثة ده زمان كان عايش كويس قبل الغلاء والحاجات دى وكان طبقة متوسطة
    لكن دلوقتى أعتقد أنه بقى ضمن الفقراء أو شوية وهيوصل للفقر لان طبعا مرتبه لا بيكفى لا اكل ولا شرب ولا مصاريف مدارس ودروس وخلافة بس الناس هيا اللى مش بتفضح نفسها مش معقول حد هيقول على نفسه أنه مش لاقى يعشى ولاده ولا هيقول أنه مش معاه ثمن الدروس
    وعلشان فيه ناس كتير زى المثال ده طلعت حكاية أن الطبقة المتوسطة هتنقرض
    لكن برضة لسة فيه ناس فى الطبقة المتوسطة عايشين كويس وموجودين ودول لو صنفناهم هيعتبروا أعلى فئة فى الطبقة المتوسطة

    وفى الأخر الطبقة المتوسطة حسب التصنيفات اللى صنفتها موجودة وبنسبة كبيرة
    وفعلا هيا دى الأغلبية الصامتة

    اللى فى الفترة الأخيرة بدأت تتكلم وياريت الكلام يجيب فايدة وقيمة
    وبنتمنى أنهم يطلعوا من سكاتهم ويبقوا الأغلبية المتكلمة اللى صوتها عالى دايما واللى مش لازم تسكت على حقها

    تحياتى لك

    ReplyDelete
  2. وفى النهاية أحنا كلنا طبقة متوسطة وكل الناس اللى أعرفهم أصحابى قرايبى جيرانى طبقة متوسطة
    وبتمنى فعلا أننا ما نوصلش للطبقة الفقيرة

    المفروض ليا جايزة حضرتك أول تعليق
    ههههههههههه

    ReplyDelete
  3. لما من 5 سنين كنت باشتر يعلبة السمنه ب 26 ج والنهارده ب 57
    ك اللحمة ب 20 والنهارده ب 35
    كيس اللبن ب 1 والنهارده ب 2.25
    كيس المكرونه ب 1 والنهارده ب 2
    فاتورة الكهرباء 15 والنهارده 33
    مصاريف المدرسة 1400 والنهارده 2500

    ................

    ودخلي زي ماهو

    تفتكر فاضلي قد ايه لحد ما اتاكل من الطبقة المتوسطة وانزل للي تحتها؟

    ReplyDelete
  4. انا مش معاك فى رايك
    لان الطبقه المتوسطه فعلا بدات تختفى بمعنى انها بدات تقترب الى الطبقه الفقيره
    لان الطبقه المتوسطه معناها الناس اللى قادره تاكل كويس وتتعلم كويس وتتعالج كويس وتلبس كويس وتعيش عيشه كويسه ومرتاحه من غير بذخ ولكن الان الطبقه المتوسطه يبقى كويس لو غطت مصاريف الاكل والتعليم والعلاج التى فى ازياد مستمر مع عدم زياده المرتبات واصبح لاوجود فيها لمساحه اللبس الكويس او العيشه المرتاحه لذلك اقتربت من طبقه الفقراء الذين يغطون مصاريف اكلهم وتعليمهم فقط لذلك تقال هذه الجمله . اما الفقراء فى ازدياد وكذلك العشوئيات وايضا الحراميه. الناس بقت بتسرق عشان تقدر بس تاكل وتتعالج ودا مش مبرر طبعا لسرقتهم ولكن اكيد معدل السرقه والجريمه بيرتفع نتيجه لزياده الفقر
    فلحياه اصبحت غاليه جدااااااااااا
    وربنا يستر على الايام اللى جيه

    اما الاطباء واصيادلة وغيرهم مش بيتقاس هما من ايه طبقه على اساس تخرجهم من كليه ايه ولكن مقدار تغطيتهم لحاجاتهم الاساسيه والكماليه. يوجد طلاب طب ومتخرجين منها يعملون فى الكافيهات و يعنى بيقدروا يغطوا مصاريف اكلهم ولبسهم وتعليمهم بالعافيه
    وبذلك يكونوا ضمن الطبقه الفقيره
    ولكن اول درجات الفقر او الطبقه المتوسطه التى بدات تتاكل
    لان الفقر درجات وصولا للطبقه المنعدمه التى تحت مستوى الفقر

    اسفه...... على الاطاله

    تحياتى

    ReplyDelete
  5. انت معاك حق ان الطبقه المتوسطه موجوده لاننا احنا لسه موجودين

    انما زى ما سها وبوسبوس وضحوا الحال بقى غير الحال وبقينا بنصارع علشان نفضل هه فى الطبقه المتوسطه
    لكنى بؤكدلك لو استمر الحال بالطريقه دى يبقى فعلا كمان كام سنه هتبقى فى مصر طبقتين
    الثراء الفاحش والفقر المدقع
    مفيش فى النص خلاص
    وحسبنا الله ونعم الوكيل

    ReplyDelete
  6. شيكابالا9 January 2008 at 23:39

    حقيقى يا دكتور بفتح الدال انا مش قادرة افهمك الحديث عن تاكل الطبقة المتوسطةمعناة ان معظمهم اندمج ف مصاف الفقراء نظرا لتدهور اقتصادياتهم واعتقد ان دة ف مصلحتك عشان الفقرا والغلابة ميبقوش مع حضرتك ف نفس الطبقة سورى اصلك ف البوست اللى فات كنت متحامل قوى ع الغلابةوقبلهم الفلاحين ماعليناكلنا ولا9 وكمان كلنا ولاد الارض الطيبة دىولا انت مشربتش من نيلها؟ شكلك كنت بتشرب مية معدنية ماعلينا انا اعتقد اختراع فئة جديدة من المجتمع ونسميها فئة الجوعى واخيرا كل سنة وانت طيب عام هجرى سعيد وكل عام وانت اقرب الى اللة

    ReplyDelete
  7. شيكابالا9 January 2008 at 23:49

    سورى نسيت اقولك حاجة الموسيقى الجديدة فيها شىء من التفاؤل تحفة بجد تحياتى و شكرا

    ReplyDelete
  8. هو المقصود بهذا التآكل أن الضغط دفع بهذه الطبقة إلى أسفل ولو في شريحتها بحيث أصبحت تعاني في تخصيل الضروريات ويكون همها الشاغل هو تحسن مستواها أو الرقص على الحبل للحفاظ عليه دون الوصول لمستوى الاحتياج هذا الانشغال المذكور هو الذي يلهي هذه الطبقة عن الاهتمام بالثقافة والحقوق والظلم الاجتماعي ومعاونة الطبقةالفقيرة وهذا الدور كان منوطا بالطبقى المتوسطة فيما سبق والآن هم مشغولون بمقارنة الأسعار والآلة الحاسبة

    ReplyDelete
  9. هو فعلا الطبقة المتوسطة

    مش كبيرة قوي

    وفي نفس الوقت

    مش صغيرة خالص

    ربنا يستر علينا في موجات الغلا المتلاحقة اللي عمالين نغوص فيها اكتر وأكتر

    كان الله لنا

    ReplyDelete
  10. انا اتفق معك نسبيا فى ان الطبقة الوسطى لم تتآكل ولكنها موجوده
    ولكن هذة الطبقة بالفعل تكاد تتآكل من جميع جوانبهافالطبقة المتوسطه كانت تحيا حياه مستقره ماديا ونفسيا ولكن بسبب التضيق والغلوا فى الأسعار والضغوط فى العمل وعدم مراعاة العدالة فى توزيع الثروه فى مصر أنقسمت مصر الى طبقتين طبقة المرفهه والطبقه الفقير أو تحت خط الفقر اما الطبقة الوسطى فمنها من يحيى فى صراع للبقاء على حاله ومنها من انجزب الى اسفل بسبب القيود التى تحيطه من كل جانب وحتى من يستطيع ان يبقى فى هذة الطبقة بعد هذا العناء لايكون فى المستوى المرضى الذى تمناه وهكذا مصر
    الحياه بقى لونها بمبى

    ReplyDelete
  11. الاول ازيك يا ابو حميد عامل ايه

    ثانيا
    لا طبعا الطبقه المتوسطه لم ولن تتأكل لانها كما قلت تمثل الاغلبيه من الشارع المصرى واللى بيقول كده خليه يتمشى فى الشارع ويشوف خليه يقف فى اشاره مرور ويشوف واظن ان اللى معاهم عربيات دول مش كلهم يغنى اثريا ثرى فاحش حرام دى فى ناس معاها لادا دول ايه
    خليه يقف فى اشارهه مرور وهو يعرف الطبقه المتوسطه كام من المجتمع المصرى

    وكمان يا عم اخنا ما ينفعش نتأكل عشان احنا لحمنا مر ولو اتاكلنا ما ينفعش نتبلع عشان بنشرق فى الزور ولو اتبلعنا ما ينفعش نتهضم عشان بنجيب
    مغص

    ههههههههههههههههههههههههههههههههه
    ههههههههههههههههههههههههههههههههه

    تحياتى ليك ياباشا ع البوست
    وتقبل ارق تحياتى وسلاماتى


    شغااااااااااااااااااااااااااااااال

    ReplyDelete
  12. السلام عليكم

    اولا
    انا فاتني بوستات كتير للأسف
    الله يحرقها الامتحانات

    حقولك كام تعليق في السريع

    في بوست ليك عن الثوابت الاعلامية بتستغرب ان مينفعش القوات المسلحة حد ينتقدها
    بالظبط
    مينفعش والمبرر في كده ان دى بتعتبر انماط ثقافية يجب الحفاظ عليها وعلى شكلها ادام الناس
    زى بالظبط ما ممنوع تنتقد كبار السن او الامهات رجال الجيش وغيرهم

    نيجي هنا بقى
    بالنسبة للطبقة المتوسطة
    موافقاك جدا ان هى مازالت موجودةومتقسمة شرائح بس اقرب الي الاختفاء
    شوية كمان وحتلاقي المجتمع انقسم الي فئتين
    يا اما الغني اوى يا اما الفقير اوى
    الاوضاع الاقتصادية والبورصة المصرية والاسعار الغالية كل ده دليل على اللي بقوله
    في النهاية ربنا يسترها

    سلاماتي

    ReplyDelete
  13. هى بصراحة يا احمد فى طريقها للتآكل
    حالنا دلوقتى بقى غير الأول خااااااااااص الأسعار و قلة الشغل حتكلها عن قريب أن شاء الله

    ReplyDelete
  14. النظام يطبق مبدأ يا أبيض يا أسود
    على رأى الحكيم الشعبى : عادل امام
    و لان الطبقة المتوسطة رمادية
    فلن يقبل بوجودها النظام و قرر
    يلغيها
    و يخليها سودا على طبقة الفقراء

    ===============


    ابكى يا زمن
    على المولود
    الاسم مجذوب
    و الوصف مجنون
    و الأصل غرقان وسط
    الهموم
    ابكى يا زمن
    على مولود
    اتولد للموت
    رحلة مع مجذوب
    http://magzob.blogspot.com/

    ReplyDelete
  15. غير لينك المدونه اللى اسمها شغال
    وبقت
    http://7ossamworld.blogspot.com

    وانتظروا الجديد عما قريب بعد فتره الامتحانات
    والسلام ختام

    ReplyDelete
  16. لم تتاكل بالمعني الحرفي و لكن حالها في تردي مستمر و الهوه بينهم و بين الاثرياء في زياده مستمره و اقتربوا من أن يكونوا فقراء
    تحياتي

    ReplyDelete
  17. taba2et miin bs

    houma aslan 3arfeen ye3milou 7aga lama yehtamou tab2at 2l mougtama3

    dy 3alam daye3a 7aye5rebou 2l balad bl tadreeg wallah 2a3elam miin 2ly 7aywa2af 2l 5arab dh kolo low fi ya3ni

    we kelmt mougtama3 we sha3eb we watan we 7ouryia mansiyiin aktar mn 2l tab2a 2l wousta , waktar kelma daye3a bgd hyia kelmet 7o2ou2

    we fakar fiha kouwayes we fi kol 7aga 7atela2y kalamy sa7...

    ReplyDelete
  18. يا احمد
    ازيك
    موضوع الطبقة المتوسطة دى
    فعلااختفت
    او على وشك
    لان معتش فى 3 طبقات فى مصر دلوقت
    دول بقوا ابعة او خمسة كمان
    كل الشعببقى منقسم الى 4 طبقات
    فبصراحة عايزين نغير كل مسميات الطبقات من الاول
    حياتى
    بوست رائع

    ReplyDelete
  19. ليك تاج عندى روح أستلمه

    ReplyDelete
  20. السلام عليكم
    كل سنه وانت طيب
    اولا مش معاك فى وجود الطبقه المتوسطه
    لانى رحت مول سيتى ستارز علشان اجيب قميص ب100جنيه لقيت المبلغ ميجبش غير الزراير
    مستنى انك تشرفنى بزيارتك لمدونتى
    ارق تحية

    ReplyDelete
  21. bosbos:
    هي مش هتبقى طبقة فقيرة ولا حاجة يا بس بس ..هي شرايحها بتنزل
    يعني اللي كان عايش في الشريحة العليا من الطبقة المتوسطة اصبح في شريحة متوسطة واللي كان عايش بشكل متوسط نزل للطبقة الدنيا وان كان الكل مازالوا بيندرجوا في الطبقة المتوسطة
    اصل كلمة فقر يا بس بس كلمة كبيرة ليها مواصفات لمن يحمل لقبها الغير رفيع..ودول موجودين برضة وبكثرة بس اعتقد ان مجتمعاتنا المحيطة معظمها طبقة متوسطة
    سواء انتي اول تعليق او اخر..انتي تستحقي دائما جايزة
    تحياتي
    تحياتي

    ReplyDelete
  22. سهى:
    كلام سليم تماما
    بس بالتاكيد دخلك مش زي ماهو
    اكيد زاد ولو بنسبة بسيطة لا تتناسب زيادة الاسعار بس اكيد زاد على اي حال
    عموما
    مع تطور الحياة بتظهر اساليب كتيرة لزيادة الدخل والموارد لمواجهة اعباء الحياة
    انا عارف ان الدنيا بتصبح اصعب يوم عن يوم..بس برضة مازلت عند رأيي ان لسة الطبقة الوسطى متواجدة ولم تتحول لطبقة فقيرة حتى الان
    تحياتي واحتراماتي

    ReplyDelete
  23. نبضات:
    يعني لسة لم تختفي
    ودة اللي انا بقوله
    يعني لما يطلع حد ويقول ان معدش فيه حد من الطبقة المتوسطة وانه يا غني يا فقير..دة يبقى فعلا مبالغة وتجاوز
    الاطباء والصيادلة في طريقهم انهم يحصلوا اخواتهم خريجو اداب وتجارة وحقوق..والفضل كل الفضل لكليات الصيدلة والطب الخاصة اللي بتفتح واحدة جديدة كل 3 ايام
    مفيش اطالة على الاطلاق
    مرحبا بتعليقاتك في اي وقت
    تحياتي واحتراماتي

    ReplyDelete
  24. shymaa:
    مش عارف...مازلت مش مقتنع
    بس ربنا يخلف ظنكم
    لان لو حصل كدة
    هتبقى مأساة
    بس انا محتار انضم لاي طبقة؟؟؟
    ساعتها هفكر
    تحياتي واحتراماتي

    ReplyDelete
  25. أنا حبيت بس أشاركك الرأى وأؤكد انى لسه ماتاكلتش
    الاعلام بقى يهول الدنيا وبيتكلم وخلاص
    تحياتى لك وكل سنة وانت طيب

    ReplyDelete
  26. والله عندك حق أنا فعلا واللي حواليا لسه ما اتاكلناش .. بس اعتقد الطبقة الدنيا كبرت شوية؟

    ReplyDelete
  27. أحييك, تدوينه على مستوى و موضوع جيد
    و كمان الإستفتاء إللي حاطه موضوع بذكاء

    الطبقة الوسطى كتعريف وظيفي هي قلب المجتمع,هي كل المتعلمين بعد الثانويه على إعتبار إن الثانويه إللي عندنا تمثل أي معيار
    الطبقة الوسطى هي أساس الإنتاج في الخدمات و الصناعات الوسيطه...على إعتبار إن الصناعات الحرفية طبقة دنيا و ده تقييم أختلف معاه

    إللي تآكل هو وظيفة الطبقة الوسطى, لأن الدخل لا يوفي النفقات الأساسيه...الأكل.العلاج.التعليم.السكن.المواصلات

    قامت الثورة لتعديل وضع مجتمع النصف في الميه, بعد55 سنه مازال المجتمع 0.5 في الميه

    ReplyDelete
  28. شيكابالا:
    ابدا انا مش متحامل على الفقرا والغلابة ولا حاجة
    وهتحامل عليهم ليه هم كانوا قتلوا جدي؟!!!
    عموما فئة الجوعى موجودين فعلا...طول مفي حياة هيبقى في فئة المليارديرات والمليونيرات والملليمرات..نسبة الى المليم..وكمان الجوعى
    عموما عام هجري وميلادي وقبطي وكل عام وانتي بخير
    تحياتي

    ReplyDelete
  29. عصفور المدينة:
    هو دة مااعنيه بالضبط يا باشمهندس
    بس بيطلع بقى اللي يقول لك ان خلاص معدش فيه طبقة متوسطة كله اما ثراء فاحش واما فقر مدقع ودة مش حقيقة
    تحياتي واحتراماتي

    ReplyDelete
  30. صاحب المضيفة:
    اسمح لي اختلف معاك
    الطبقة المتوسطة هي الاعلبية
    كبيرة جدا...بتشمل من الاطباء وحتى بعض المزارعين
    البلد دي فيها فلوس والله بس احنا شعب غير اقتصادي
    تحياتي واحتراماتي

    ReplyDelete
  31. ابن الاسكندرية
    نورت المدونة بداية...وشكرا على حضورك الكريم
    احنا كدة مش مختلفين...انما يقول لك اصلها اندثرت ومش موجودة....
    انا معترض بشدة
    تحياتي واحتراماتي

    ReplyDelete
  32. حسام مراد:
    ازيك يا حسام يا شغاااال
    ايه يا عم انت فينك من زمان؟
    ينفع الاختفاء دة يعني؟
    وبعدين غيرت مدونة شغال ليه ياعم؟ انت بطلت شغل ولا ايه؟
    عموما نورتني وفي اي مدونة انت جامد اساسا
    قال نتأكل قال؟ حد يستجري يأكلنا واحنا عادي كدة...مش في دماغنا؟
    معقول الكلام دة؟
    تحياتي واحتراماتي

    ReplyDelete
  33. mesh2adra:
    هتكتشفي يوم ما ان الامتحانات دي متعة يوم ماتلاقي ان الامتحانات الحقيقية بدأت فعلا
    بالنسبة للثوابت الاعلامية انا قصدي ان القوات المسلحة دي فيها بشر..بني ادمين بيصيبوا وبيخطئوا ويجوز نقدهم زيهم زي اي حد
    بالنسبة للطبقة المتوسطة هي بتواجه محنة بس الحمد لله حتى وفتنا هذا مازالت حية ترزق
    تحياتي واحتراماتي

    ReplyDelete
  34. عاليا حليم:
    كلام جميل...بس هل ياترى في مجتمع في الدنيا عبارة عن اثرياء فقط و فقراء فقط
    محصلتش قبل كدة ولا اعتقد انها هتحصل
    دة حتى امريكا مافيهاش الكلام دة
    الطبقة المتوسطة هتفضل موجودة طول ماالبلد دي موجودة
    تحيــــــــــاتي

    ReplyDelete
  35. elmagzoob:
    نورت المدونة واعتقد ان دي اول زيارة لمدونتي المتواضعة
    اي شعب ي الدنيا بيتكون من 3 طبقات ومن غير استك طبعا
    فقراء واغنياء وبينهم طبقة متوسطة
    هي دي تركيبة سكانية طبيعية
    تحياتي ونورتني ودايما

    ReplyDelete
  36. حسام مراد:
    اعتبرني احد افراد عالم حسام
    يا شغاااال
    بالتوفيق في الامتحانات وفي المدونة كمان
    تحياتي

    ReplyDelete
  37. micheal:
    لا نختلف انها بتمر بمحنة وازمة
    بس لسة عايشة
    تحياتي يا مايكل

    ReplyDelete
  38. r.o.r.o.u:
    اعتقد دي اول مرة تشرفيني في المدونة
    عموما يارب ماتكنش اخر مرة
    طبعا السياسات سواء الاقتصادية او الحكومية بتؤثر بشكل كبير ومباشر على الطبقة المتوسطة
    بس برضة نقدر نقول ان الطبقة المتوسطة مازالت متواجدة
    تحياتي واحتراماتي

    ReplyDelete
  39. rania:
    اهم حاجة يا رانيا ان كل الطبقات دي من غير الاستك
    ان شاء الله يكونوا 10 طبقات بس المهم مايكونش في استك
    تحياتي واحتراماتي

    ReplyDelete
  40. bosbos:
    تم التعامل مع البوست يا بس بس
    محدش يقدر يخالف الاوامر العسكرية
    تحياتي

    ReplyDelete
  41. صالح سعيد:
    يعني انت نشنت على سيتي ستارز
    عموما ودة برة الموضوع
    سيتي ستارز فيه محلات مبالغ في اسعارها بشكل بشع بس برضة لو دورت وصبرت على اللف هتلاقي في محلات اسعارها معقولة جدا
    بس عموما يا صالح
    مئة جنيه تجيب ايس كاب من بوما
    تحياتي ومنورني دايما

    ReplyDelete
  42. تائهة في ارض الاحلام:
    متفقين تماما
    طيب ماهو انتي مش تائهة اهوو
    مانتي رسيتي على بر
    هههه
    منورة دايما
    تحياتي واحتراماتي

    ReplyDelete
  43. على الطريق
    كل الطبقات كبرت
    الحرامية كبرت طبقة الاثرياء والحكومة وسياساتها كبرت طبقة الفقراء والجوعى
    والاتنين بيطحنوا الطبقة المتوسطة اللي بينهم
    تحياتي واحتراماتي

    ReplyDelete
  44. aardvark:
    الف شكر على الاطراء والكلام الجميل دة
    اخجلت تواضعنا
    هيبقى ليا كلام معاك على موضوع النص في المية دة
    عموما تعليقك اثرى الموضوع
    منورني دايما

    ReplyDelete
  45. اه انا معاك تمام
    لسه الطبقة الوسطى موجودة وعايشة
    لكن يمكن هو اسلوب الحياه المتوسط هو اللي بقا يتاكل
    القوة الشرائية للاسرة واللي بتمكنها من العيش في حياه مستقرة ومستوى معين هي اللي بتتاكل

    الطبقة الوسطي بتنحدر في الوقت اللي طبقة الاثرياء بتكير اكتر واكتر ومابينهما
    فراااااااااغ


    محمد سمير

    ReplyDelete
  46. انا معاك وموافقاك فى كلامك ..الطبقة المتوسطة مازالت موجودة ..اصلا هى تعتبر الطبقة الغالبة فى المجتمع من حيث عددها وانتشارها

    وصعب انها تختفى ..لانها لو اختفت هانبقى حاجة من اتنين ..

    يا فقراء اووووووووووى ومعدومين ..يا اغنياء اوووووووووووووووى ( ودى انا واثقة انها عمرها ما هاتحصل ) ..بس ما نقدرش نغير من تركيب البشر


    وعموما ربنا يهدى اخوانا البعداء ويرحمونا بقى عشان كدة

    over

    اوى

    اوى

    اوى

    تحياتى


    :)

    ReplyDelete
  47. بص يا سيدي هي الطبقه السطي اسمها بس اتغير اللي هما احنا بقاش اسمنا طبقه وسطي بقي اسمنا طبقه علي قد حالها
    انما الأفقر اسمهم المعدومين و المتأكلين
    هي مختفتش هي بس حصل زي لعبة الكراسي الموسيقيه مش اكتر
    اما بتوع بورتو السخنه ربنا يهنيهم

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails