Friday, 4 January 2008

يوم في احد شوارع مصر



يوم في احد شوارع مدينة مصرية
بتعمل ايه لما تلاقي عربية راكنة تحت بيتك والكاسيت عالي ومشغل اغنية شعبية بشعة..والغريب ان صاحب العربية الهايصة والمنعنشة والمنتعشة دي مش موجود فيها اساسا
يجوز نزل يشتري حاجة من السوبر ماركت..وكسل انه يمد ايده ويطفي الكاسيت قبل ما ينزل من العربية
ممكن كمان تلاقي ان صاحب السيارة الغنائية دي واقف جنبها..بس هو مزاجه انه يعلي الكاسيت ويقف جنب العربية..هو كدة...بيحب كدة...ربنا خلقه كدة......هتعمل ايه يعني؟!!!!
في اوروبا والدول المتقدمة السلوك اللي زي كدة بيستدعي تدخل الشرطة فورا وغرامة فورية وتعهد بعدم تكرار الفعل دة مرة تانية..وطبعا الشرطة بتيجي بمجرد ابلاغ سيادتك ليهم
السؤال البريء هنا بقى:
ايه هيبقى رد فعل شرطة النجدة في بلدنا مصر المحروسة لو اتصلت بيهم في يوم كدة وقلت لهم انا بأقدم بلاغ عن سيارة راكنة تحت بيتي والكاسيت بتاعها صوته عالي وعامل ضوضاء؟!!!!!!!!!!!!
انا عن نفسي متوقع الرد.....بس بما اني اعلنت مدونتي مدونة نظيفة,اعفوني من كتابته احتراما لاعينكم الكريمة من التلوث اللفظي
************************************************************************************
نفسي اعرف ليه العربيات النقل في مصر مزاجها تاخد الجنب الشمال في اي طريق سريع على الرغم ان من بديهيات قواعد المرور في مصر ان النقل الثقيل يلزم اليمين
من يوم ما وعيت ع الدنيا وانا راكب مع ابويا العربية ويادوب بفك الخط وانا بشوف اليافطة دي على كل الطرق
"النقل الثقيل يلزم اليمين"
لكن لما كبرت شوية لقيت ان مفيش الكلام دة...يمكن دة لأن كل سواق نقل بيفتكر انه مش نقل تقيل وان في اتقل منه وبالتالي الكلام مش موجه له من الاساس؟
عموما
لو عايزين النقل اليمين يلزم اليمين فعلا....يبقى القواعد المرورية لازم تتعدل واليافطة يبقى مكتوب عليها
"النقل الثقيل يلزم اليسار"
ساعتها اؤكد ان كل النقل هتلاقيه واخد يمينه
هي دي الشخصية المصرية
خالف..........................تعرف
************************************************************************************
تم اعلان مدينتي..مدينة خالية من السيارات الراكنة
اه والله
واضح ان منظر اي عربية راكنة بيستفز السادة قادة المرور وبالتالي تم اعلان جميع الشوارع الرئيسية شوارع خالية من السيارات الراكنة حتى لو كان الشارع عرضه كيلو
انا حسيت ان منظر السيارة فتنة...على اعتبار انها مؤنث...وانها لازم تستخبى في الشوارع الجانبية وماينفعش ركن اي عربية في اي شارع رئيسي (الا طبعا سيارات السادة الضباط على راسنا من فوق)..بدون اي سبب منطقي
انا افهم ان الشوارع الضيقة او ذات التكدس المروري يتم تطبيق النظام دة فيها انما اي شارع والسلام...؟
منطق عجيب فعلا
طب اصحاب السيارات يودوا عربياتهم العورة دي فين؟!!!!!ما الشوارع الجانبية اللي هي ضيقة اساسا تكدست بالقليل من السيارات...ومافيش اصلا جراجات يتحط فيها العربيات...طب الحل ايه؟
الحل واحد من اتنين:
يا اما تكون ضابط.....يا اما تبيع عربيتك وتقضيها موتورجل
*************************************************************************************
هي الاتاوة اللي بندفعها لما نيجي نركن العربيات في الشوارع (دة على فرض انك لقيت ركنة اساسا)...واللي بيحصلها واحد ما بيقولش غير جملة واحدة:
كل سنة وانت طيب يا باشا
وساعات بيقعد يقول تعالى...تعالى..تعالى..لما تبقى بترجع بضهرك وقال ايه بيطلعك يعني
الاتاوة دي بقى اللي هي 2 جنيه حاليا (كانت جنيه واحد من كام سنة)..ياترى مصيرها بيروح فين؟؟
يعني اللهم لا حسد..مين اللي بيلهف الايراد :
يا ترى الاخ بتاع كل سنة وانت طيب...ولا مجلس المدينة..ولا حد تالت خالص ولا الموضوع ريحته مش ولا بد ..ولا ايه الحكاية؟
بس على فكرة....شغلانة مربحة جدا
***********************************************************************************
بعد بقى ما التزمت بالتعليمات المرورية القراقوشية وقررت بقى اركن قي الشوارع الجانبية وبعد جهود مضنية من البحث عن مساحة فاضية ارمي فيها العربية واشوف مصالحي بقى...وجدتها
ولسه جاي اركن...لقيت واحد ظريف لطيف كدة طلع لي على غفلة وقال لي...لو سمحت ماتركنش هنا علشان باب المحل......
وجهة نظر برضة....على اساس اني هقفل عتبة الرزق بتاعتهم لما عربيتي تسد باب المحل بتاعهم
وجايز جدا الزباين تبقى ناوية تيجي تشتري منهم بس لما تلاقي عربيتي راكنة قدام باب المحل يغيروا رأيهم...
وممكن برضة يكونوا بيعتبروا عربيتي نحس او نذير شؤم على المحل وما يصحش انها تقف قدام باب المحل....ممكن جدا
المهم...مارضيتش اقاوح معاه علشان ماكنتش في مووود خناق وكان مزاجي عالي شوية ومش طالبة معايا عكننة
قلت اشوف مكان تاني برضة في اي حارة او زقاق جانبي..لعل وعسى
اخيرا وجدتها تاني
بس المرة دي صاحب المحل اللي المفروض اركن العربية قدامه طلع ناصح وحاطط قالب طوب كبيــــــــــــــر قدام المحل بتاعه
واللي جانبه حاطط موتسيكل قدام المحل..واللي جنبهم حاطط كرسي....واللي قبلهم حاطط عجلة...اما بقى الشيك اللي فيهم فحاطط قصاري زرع قدام المحل بحوالي مترين...من باب تجميل البيئة برضة
يبقى لا انا عارف اركن في الشوارع الرئيسية بسبب التعليمات المرورية القراقوشية ولا انا عارف اركن في الشوارع الجانبية بسبب التعليمات التجارية التفاؤلية والتشاؤمية
طب اعمل ايه في عربيتي اليتيمة دي اللي محش راضي يتقبلها..لا لشوارع الرئيسية عايزاها..ولاالجانبية قابلاها...اوأدها وارتاح يعني؟!!!!
***********************************************************************************
ياسلام بقى لو رحت تمون في بنزينة....وانت كدة منهمك او مش واخد بالك او سرحان....تلاقي شخص ماتعرفش طلع لك منين وهج على زجاج عربيتك بمياة وصابون....وش كدة
يعني مش بفوطة مثلا علشان ماتقولوش لا مش عايز....لا دة بصابون على طول
وبكدة سيادتك اتحطيت قدام الامر الواقع..هيكمل هيكمل...المصيبة انه ياريته بينضف الزجاج....دة بيبهدله..وبتفضل اثار صابون على الزجاج..وبدل ما كان زجاج سيارتك مجرد عليه شوية تراب...بقى مليط وملحوس وحالته بالبلاء..والمصيبة انك بتدفع فلوس مقابل بهدلة زجاج سيارتك الكريم
انا بقول نروح بقى البيت ...بلاش بهدلة في الشارع اكتر من كدة
اصل في مصرنا المحروسة
من خرج من داره......اتقل مقداره

41 comments:

  1. هههههههههههه

    الحمد لله ان معنديش عربية هيييييييييه

    بيعها ياعم بلا وجع دماغ .. قال عربية قال .. بلدنا دى مش نافع فيها غير الإسكوترات ياريس

    ReplyDelete
  2. هههههههههه والله ضحكت من طريقة عرضك للموضوع مع أنى مش فى المود من أساسه
    بعد كده خدها مواصلات يا عم وريح نفسك أصل كده كتير قوى
    والحكاية مش طالبة أصلا

    ReplyDelete
  3. شيكابالا4 January 2008 at 20:59

    حقيقى با دكتور ما شاء اللة عليك دائما متمكن من ادواتك لدرجة تجبر اللى امامك على الاقتناع بوجهة نظركم المصون ليك حق تشتكى من الزحمة بس كمان من حق كل واحد بعمل اللى على مزاجة ف عربيتة يعلى الكاسيت يطبل هو حر ومفيهاش حاجة لما يزعجك شويتين وبالنسبة للاخوة اللى بيسترزقو منك ومن غيرك لو بصيت انها صدقة اجبارية اوحاجة بتفكرك بتطهير اموالك يوميا هتحب الناس دول قوى او لو فكرت انك بتنقز واحد من البطالة او من الاجرام هتعمل كدة وانت مبسوط والارزاق على اللة يا دكترة

    ReplyDelete
  4. بوست جامد جدا
    والله عندك حق ياباشا في كل اللي انت قلته
    اصلا سواقه العربية في مصر المحروسة دلوقتي بقت عايزة صبر وطولة بال ونفس طويل
    بقت مهمة مستحيلة بكل ما فيها من سواقة وركن وتفادي ميكروباصات على عربيات نقل على مطبات على كماين

    ربنا يسترها معانا والله

    ReplyDelete
  5. أحمد الحل هو الاعتماد على العجل أو المشي أنا شخصيا مدينتي فعل أصبح الركنة فيها مستحيلة ولذلك لا أستخدم السيارة مطلقا إلا مع الأسرة أما وحدي فلا أستعمل السيارة مطلقا

    وأهديك هذا الفيديو
    Dead Lock

    ReplyDelete
  6. كلام في الصميم جدا

    وانا نفسي من زمان باشوف الكلام ده كل ساعة وكل يوم

    لكن ايه الحل في دولة ماشية بالعكس

    ياترى ايه الحل

    ReplyDelete
  7. هههههههههههه
    بجد موضوع فى الجوووون
    صحيح الواحد بيشوف بلاوى
    لا الى نسيت تذكره بقى وهو علامه من علامات الشوارع المصريه
    الميكروباااااااااص

    بس هنعمل ايه هم يبكى وهم يضحك
    سلامى

    ReplyDelete
  8. أنا بتغاظ أويييييييييييي من موضوع العربيات النقل شمال دي :D
    بجد أنا عمري ما كان عندي عربيه وأصلاً مش عايزه أجيب علشان وجع الدماغ بس طول عمري أعرف ان النقل الثقيل والأتوبيسات يلزم اليمين ومش بشوف كده خااااااااالص
    بس ده العربيات بس :D
    في حاجات كتيييييير لسه :)

    ReplyDelete
  9. طب ايه رأيك في واحد عربيته بتطلع دخان و يشاء الله انه لما يخلص من الزحمة و العربية لسة بتطلع دخان يركن و ينزل يشوفها بتولع من ايه و لجل حظه المتين ركن امام باب قسم مكافحة جرائم النشل

    و بدل ما عسكري الشرطة يشوف معاك اللي حصل او على الأقل يراقبك من بعيد . يزعق فيك و يقولك امشي من امام باب القسم

    تقوله العربية بتولع همشيها ازاي

    يقولك زقها المهم تمشي من هنا

    تقوله ماينفعش

    طب زق معايا

    يقولك مش شغلتي

    تروح انت تنفعل و تقول انتم ما بتفهموش حاجة

    و تزقها و يجي رئيس القسم يروح العسكري قايله كلمتين في ودانه يروح باعت لك ظابط من القسم بيقولك انت بتشتم العساكر ليه و يجي العسكري جنبه و يقوله في وشك ده قال علينا اننا ولاد كلب و انت العربية لسة بتطلع دخان

    و لولا ان الظابط ده عنده مخ و مقدر الحالة النفسية اللي انت فيها يكتفي بإنه يقولك ماتبقاش تشتم عسكري اثناء تأدية عمله و عرض عليك المساعدة

    دي حاجة من الحاجات اللي اخوك ابتلى بيها
    --------------------------
    لو كتبنا عن المرور في مصر هنعمل مجلدات

    ReplyDelete
  10. أمال تعمل أيه لو حصل لك اللي حصل لي واللي لسه بيحصل لي
    أنا مسافر بره مصر وراكن عربيتي في جراج في مصر بادفع له شهريا 50 جنية
    نزلت أجازة لقيت الكلاكس أتسرق
    تصور العربية تتسرق وهي بايته في الجراج
    قلت أركنها في الشارع
    سرقوا عمود الكردان
    حاليا وأنا سايبها بقالها 5 شهور ومسافر مازلت باصرف عليها تصليحات
    ربنا يرحمنا

    ReplyDelete
  11. ياريت نزور يا جماعه مدونه اخوان ستايل بالاستايل الجديدhttp://ikhwanstyle.blogspot.com/

    ReplyDelete
  12. مدونتك بالفعل رائعه للغايه واشكرك على تعليقك لي بالمدونه
    اخوك تامر مبروك
    مدون الحقيقه المصريه

    ReplyDelete
  13. تحددالافتتاح لدار الكتب الخاصه بي يوم الخميس القادم - 10 يناير - الساعة 6 مساءا في مكتبه البلد , ندعو الجميع لكي نقص سوياً شريط افتتاح الموقع ونطلق شراره انطلاقه نحو خدمه كل المثقفين والمهتمين بالقراءة

    العنوان / مكتبه البلد - ميدان التحرير بوسط البلد - 31 ش محمد محمود أمام الجامعة الأمريكيه

    تليفون مكتبه البلد / 27922768

    نتمني منكم أن تشاركونا هذه اللحظات والتي لن تنجح إلا بوجودكم

    ReplyDelete
  14. عشان كده انا مش راضيه اجيب عربيه
    وفى عجله زى الفل محطوطه فى بير السلم الله عليها مالها رضا والحمدلله وممكن اركنها فى ااااى مكان بررراحتى
    وبعدين ماله الاسكوتر بيقولوا هيعملوا له اربع عجلات اهو وهيركبوله انوار خلفيه

    ReplyDelete
  15. سنة جديدة سعيدة على كل الحبايب
    بـــاى

    ReplyDelete
  16. السلام عليكم ورحمة الله وبركاته

    تالت مره آجي هنا وتحصل حاجه وتخليني اخرج من غير تعليق

    حاسه بالمعاناه اللي انت فيها ، لما بانزل مع زوجي بالعربيه في وقت ذروه بتبقي مشكله ومش بنلاقي حته نركن فيها وبيتعصبعليا وبيبقي يووووووووووم

    تصدق المشي احسن

    ReplyDelete
  17. هههههههههههههه
    ضحكتنى بجد
    اصلى فعلا دايما اشوف سيارات النقل الثقيل ماشية على الشمال
    لدرجة لما انت بتقول انها لازم تلزم اليمين شكيت فى نفى وقلت ..لأ دى القاعدة بتقول شمال
    ههههههههههه

    بوست مميز جدا
    وشكلك مقروص جامد وطالع عينك مع السواقة

    تحياتى
    شيماء

    ReplyDelete
  18. انسانة:
    وياريت اللي ماشيين على رجلهم مرتاحين يا ياسمين
    تحياتي

    ReplyDelete
  19. bosbos:
    وانتي فاكرة المواصلات دي هي الحل يعني يابس بس؟
    المواصلات دي بقى موضوع كبير عايز له بوست لوحده
    تحياتي واحتراماتي

    ReplyDelete
  20. شيكابالا:
    الف شكر يا انسة....شيكابالا على المدح اللي في اولالكومنت دة
    لا متمكن من ادواتي ولا يحزنون...سيبك انتي من الكلام الكبير دة
    بالنسبة بقى للاخ اللي بيعلي الكاسيت..طبعا مش من حقه على الاطلاق لا يزعجني ولا يزعج غيري...مش منطق طبعا
    كل واحد يسمع على قده..دي ابسط قواعد الذوق
    اما بقى الاخوة اللي بيسترزقوا...فاعتقد انهم اصبحوا واخدينها حق مكتسب مش مجرد استرزاق...دة انتي ممكن تطلعي للواحد جنيه تلاقيه بص لك كدة من تحت لفوق وبكل بجاحة يقوللك جنيه كمان يا بيه
    يبقى دة بقى مش استرزاق...دة ابتزاز
    عموما
    انا شايف انك محتاجة تقرأي عن الليبرالية شوية...هتنفعك
    تحياتي واحتراماتي

    ReplyDelete
  21. غمض عينيك:
    ابو سمير الجامد
    ازيك يا ريس
    انت فينك من زمان؟
    اشتقت اليك فعلمني ان لا اشتاق
    انا بيتهيألي ان اللي ماشي على رجله اليومين دول..برضة مش عارف يمشي في الشارع
    ربنا يستر
    تحياتي

    ReplyDelete
  22. ههههههههه

    كلامك ظريف جدا يا أخونا أحمد

    ربنا يكرمك

    بصراحة دماغ عالية



    د.حمـــاس

    ReplyDelete
  23. عصفور المدينة:
    بس في مشاوير للاسف لابد من السيارة اضافة الى ان في احيان كتير بيكون الشغل بعيد عن البيت وبالتالي لا بديل عن السيارة
    هي المشكلة مشكلة سلوكيات وتنظيم لو ضبطنا الاتنين دول كل حاجة هتبقى تمام
    تحياتي لك يا باشمهندس

    ReplyDelete
  24. صاحب المضيفة:
    الحل كما سبق وقلته كتير جدا
    قنبلة نووية تجيب عاليها واطيها...وتطلع بقى من جديد بلد جديدة بشعب جديد على نضافة
    مفيش حل غير كدة
    تحياتي

    ReplyDelete
  25. يا ريت يا ابنى الخنقة و الارف يجيكوا على العربيات بس فيه ناس مش لاقية تاكل و لا تركب مواصلات

    تسمحلى بالمساحة الأعلانية دى ؟
    طب يا سيدى متشكرين :))))))

    ---------------------

    صاحب ابوابةhttp://elbawaba.blogspot.com/ يدعوكم لحضور حفل أفتتاح دار النشر الخاصة به، حلم شاب تحقق بأمكانيات بسيطة و تجربة تستحق التشجيع فى أنتظاركم يوم الخميس 10 \ 1 \2008 --31شارع محمد محمود مكتبة البلد امام الجامعة الأمريكية

    ReplyDelete
  26. عزيزي صاحب المدونة
    عزيزتي صاحبة المدونة
    ========================
    نتشرف بدعوتك لافتتاح
    دار الكتب
    هي حلم صاحب البوابة الذي تحقق
    طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
    الافتتاح يوم الخميس 10-1-2008
    في مكتبة البلد 31 شارع محمد محمود امام الجامعة الامريكية
    الساعة السادسة مساءا
    يلا نشارك مصطفى فرحته بتحقيق الحلم

    ReplyDelete
  27. shymaa:
    اصل الفكرة يا شيماء ان الواحد لو فتح في المواضيع دي يبقى هنعمل مدونة مخصوص للشارع المصري
    حسيت ان الموضوع هيبقى طويل قوي قلت كفاية كدة و اكتم في قلبي احسن
    تحياتي واحتراماتي

    ReplyDelete
  28. rehab mustafa:
    طبعا في حاجات كتير جدا لسه
    لسه بلاوي
    الشارع المصري يا رحاب يتعمل عليه مجلدات
    بس المساحة بقى والرغبة في عدم التطويل
    بس طول ما في العمر بقية...والبقية دي فيها صحة...يبقى ان شاء الله هنكتب ونكتب
    تحياتي واحتراماتي

    ReplyDelete
  29. kimexlilo:
    طب احمد ربنا بقى انك قاعد قدام كومبيوترك وبتكتب الكومنت دة
    انت كان زمانك يا ريس مشرف في المزرعة مع الاخوة الاسرى اللي هناك
    انت برضة ربنا وقعك في ضابط ابن حلال وطيب
    حمدا لله على السلامة انت وعربيتك
    تحياتي واحتراماتي

    ReplyDelete
  30. ياسر حسين:
    انت برضة غلطان
    حد يسافر ومايخدش عربيته معاه؟
    ماليش دعوة...شعار الشرطة والحكومة في مصر
    اللي خايف على حاجته..يخلي باله منها وياخدها معاه
    غلطان والغلط راكبك من ساسك لراسك
    تحياتي واحتراماتي

    ReplyDelete
  31. عبد الرحمن مدني:
    كان يشرفني انك بدل ما تستغل مدونتي كمساحة للاعلانات انك تشاركني برأيك

    ReplyDelete
  32. البورسعيدي:
    الف شكر للمجاملة الرقيقة دي
    بس الحقيقة انا مازرتش مدونتك لمجاملتك..انا زرتها وشاركت في موضوعاتها وكان يسعدني انك تشترك معانا في الحوار

    ReplyDelete
  33. صاحب البوابة:
    باذن الله هحاول بكل قوة وان لم يكن لحضور الافتتاح فبأذن الله هتكون زيارة خاصة ان شاء الله
    بالتوفيق

    ReplyDelete
  34. نوسة:
    فكرة عبقرية
    تخيلي بقى والشعب كله راكب سكوترات وماشي
    شباب بقى وبنات وعمال وفلاحين
    بس ما ينفعش للاسف واحد ياخد مراته واتنين من عياله وراه ع الاسكوتر
    بس ممكن نتبنى حملة اسكوتر لكل مواطن
    تحياتي واحتراماتي

    ReplyDelete
  35. نهى منير:
    سنة حلوة وجميلة ان شاء الله
    وكل سنة وانتي بخير

    ReplyDelete
  36. خمسة فضفضة:
    يا دكتورة بلاش حركات الصيادلة دي مع بعضهم وما تبخليش علينا بتعليقاتك القيمة
    على فكرة لو قررتوا تروحوا مشاويركم مشي....مش هتلاقوا حتة تمشوا فيها
    عارفة الاحسن والاحسن ايه
    المنزل ثم المنزل
    تحياتي واحتراماتي

    ReplyDelete
  37. شقاوة شعب:
    انا ان جيتي للحق يا شيماء مقروص من الفوضى بشكل عام
    وطبعا المرور احد اهم اركان الفوضى دي
    تحياتي واحتراماتي

    ReplyDelete
  38. dr.hamas:
    شكرا لك يا دكتور
    بس اكيد انت عارف ان شر البلية ما يضحك
    وان الكوميديا ممكن تتولد من رحم المأساة
    تحياتي

    ReplyDelete
  39. عاليا حليم:
    اولا باحييكي بشدة لسبب
    وهو انك شاركتيني الحوار وبعدين اخدتي المساحة الاعلانية..في كتير بياخدوا المساحة الاعلانية بس
    ثانيا
    دي بعض جوانب فوضى الشارع مش كلها..ولو اتكلمنا وحصرنا كل الفوضى هنقعد نكتب مجلدات
    تحياتي

    ReplyDelete
  40. نقطة مية:
    علم يا فندم
    شكرا

    ReplyDelete
  41. :D:D:D:D


    وانا اللى كنت بفكر اتعلم السواقة على اساس يعنى انى هاجيب عربية


    لالالالالالالالالالالالالالالالالالالا


    شكرا جدا ..ماعنديش استعداد لحرقة الاعصاب دى


    وبعدين عايز نصيحتى


    انا شايفة انك تقضيها موتورجل احسن

    اوفر بكتيييييييييييييييييييير



    :D



    تحياتى


    :)

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails