Saturday, 30 June 2007

اوعى تقف في البلكونة

بتاع 100 مرة نناشد الانجليز ونبوس ايديهم ورجليهم يعلوا سور بلكوناتهم شوية ........ودول ودن من طين وودن من عجين
ييجي 200 مرة نقول لهم...يا جماعة المصريين مابيرتحوش في بلكوناتكم...بيقعوا منها...ودول ابدا مصممين
قعدنا نناشد المصريين المنفيين في لندن اختياريا او اجباريا انهم مايطلعوش البلكونة في لندن في شهر يونيو من كل سنة خــــــــــــــــــــــالص
بس واضح ان فيه منهم ناس مابيسمعوش الكلام...مصممين انهم يطلعوا يقفوا في بلكونة بيتهم على الرغم ان سور البلكونة قصير وممكن ياخدهم ويقع....لا وكمان ايه دول واقفين في البلكونة في شهر يونيو كمان
مش عارفين ان كدة خطر؟
عموما يستاهلوا اللي جرى لهم
عجبت لك يا زمن

Monday, 25 June 2007

مساواة


البوست اللي فات عن النظرة السلبية للفتاة المدخنة وكل التعليقات اللي عليه واللي اتهمت الموضوع انه ذكوري وفيه تحيز لبني جنسي
خدني لموضوع اكبر بيظهر في الفضائيات كل كام شهر على شكل هوجة ومهرجان كبير وهو موضوع
المساواة بين الرجل والمرأة
انا شخصيا اول ما بيتفتح الكلام في الموضوع دة في اي برنامج اكون بتفرج عليه...تلاقيني اقلب المحطة على طول
مش علشان لا سمح الله انا ضد المرأة ولا حاجة...ولا علشان انا ضد مبدأ المساواة
ابدا انا من اشد المؤيدين لحرية المرأة ومساواتها بالرجل في الحقوق والواجبات
انما مولد " ستي مساواة" بتاع كل سنة بطولة ايناس الدغيدي واقبال بركة وغيرهن على حسب التساهيل بيكون دمه تقيل قوي على قلبي لأنهن لا يمثلن المرأة المصرية الحقيقية من وجهة نظري طبعا بالأضافة الى ان كلامهن بيكون مكرر ومعاد ونظري اكتر من الازم
طب تعالوا نحسبها كويس ونفترض ان المرأة اخدت حقوقها كاملة متكاملة وبقت رئيسة ووزيرة وسفيرة وضابط واحتلت مجالس الشعب والشورى ومجلس الوزراء واشتغلت واتعينت وبقت كلمتها هي الاولى في كل شيء
وانا مش ضد كدة على فكرة...انا بشوف ان الانسان الكفء لازم ياخد حقه بصرف النظر هو رجل او امرأة
معدش في نفس دعاة تحرير المرأة اي شىء....اخدوا حقهم تالت ومتلت
طب ما تيجوا احنا بقى يا رجالة ناخد حقنا احنا كمااااااااااان
اولا..مفيش حاجة اسمها شغلانة للست وشغلانة للرجل..في مساواة في كل شيء..وزي ما العمال الرجال بيشتغلوا اي حاجة كمان العاملات السيدات هيشتغلن كل حاجة..ان شا الله يشتغلن في الفاعل
ومفيش حاجة اسمها وظيفة مناسبة للرجل ووظيفة مناسبة للست لأن دة بيتعارض مع مبدأ المساواة اللي انتم عايزينه
ثانيا...مفيش مواعيد شغل خاصة بالنساء ولو الشغل بيخلص الساعة 1 او 2 صباحا او حتى بعد كدة يبقى على الكل....مساواة بقى
ثالثا....مفيش في المواصلات العامة حاجة اسمها سيارات مخصصة للنساء على اساس بقى ان في مساواة ولو مصممين عليها يبقى في كمان سيارات للرجال
رابعا..ليه بقى الراجل ساعة الجواز هو اللي بيجيب شقة ويدفع مهر ويجهز الشقة..هو مش في مساواة..يبقى الشقة والتجهيز وخلافه بالنص
خامسا..من الاساس ليه الشاب هو اللي يتقدم اصلا للزواج...هو مش فيه مساواة..خلاص نعمل قرعة ونشوف مين اللي هيطلب يد التاني
سادسا..بلاش بقى نفقة ومصاريف والحاجات دي..ماهو بقى في مساواة بقى..الغي كل حقوق المرأة دي مالهاش لزمة
وهنقعد نقول سابعا ولحد مالانهاية...اصل الكلام في الموضوع دة لذيذ ومش بيخلص
ايتها النساء في مصر المحروسة
موضوع المساواة دة مش في مصلحتكن خالــــــــص....وانتن قريتوا بنفسكن لو حصلت مساواة كاملة هتبقى الدنيا عاملة ازاي
ايه رأيكن بقى
مساواة......ولا نمشيها زي ماهي كدة؟

Friday, 22 June 2007

نظرة سلبية


عارف كويس قوي ان الموضوع دة هيزعل بنات وسيدات للأسف عددهم اصبح كبير

وعارف كمان ان في عدد من الرجال هيزعلوا برضة بأعتبار ان زوجاتهم او والداتهم بيعملوا كدة
عارف برضة ان عدد من الشباب والبنات ممكن يقولوا عليا اني متخلف ومش مودرن وربما همجي
عارف كل دة بس مضطر اني اقول اللي في نفسي
انا لا احترم على الاطلاق المرأة المدخنة
ايا كانت بقى المرأة دي ايه
سواء بقى كانت بنت او ست كبيرة....بتسقط من نظري فوراااااا
سامع حد بيقول لي اشمعنى كدة....ايه علاقة التدخين بالأخلاق والاحترام؟
مفيش علاقة مباشرة بين التدخين وفساد اخلاق البنت....انما بدون سبب حقيقي اول ما عيني بتلمح فتاة او سيدة بتدخن بأحس على طول بمشاعر سلبية تجاهها
ممكن جدا وبتحصل ان تكون الفتاة او السيدة المدخنة لابسة ملابس في غاية الاحترام ومحجبة كمان انما منظرها وهي ماسكة السيجارة وبتدخنها منظر في منتهى السوء بالنسبة لي على الأقل.
بس على فكرة
مش انا لوحدي اللي بحمل المشاعر السلبية دي تجاه الفتيات والسيدات المدخنات انما عدد كبير جدا ربما يكون اغلبية الشباب لا يحترموا البنت او السيدة المدخنة
على الرغم ان
منظر المرأة المدخنة انتشر بشدة في القاهرة وخاصة في المولات والكافيهات بس مش عارف دة من ايه؟
ايه اسباب تزايد اعداد السيدات المدخنات؟
هل للوسط الفني المعروف انتشار السلوكيات دي فيه علاقة بتزايد اعداد المدخنات؟
ولا دي من مظاهر المساواة بين الرجل والمرأة؟
بس يبقى نصيحة مهمة اقولها لأي فتاة او سيدة بتدخن
نظرتنا كشباب و رجال تجاهكم فعلا لو عرفتوها مش هتكونوا مبسوطين على الأطلاق
معلش انا أسف لو اي مدخنة استفزها الموضوع دة
...بس يبقى كويس برضة لو شرحت لنا وجهة نظرها.....يمكن اكون انا اللي تفكيري متخلف اكتر من اللازم

Sunday, 17 June 2007

حماد وفتحي

حماد وفتحي أخين شقيقين....والدهم توفى وترك لهم تركة عبارة عن مصنع....وكان من وصايا الأب قبل ما يتوفاه الله ان العمال يختاروا واحد من الأخين يدير المصنع
اختار العمال حماد على اساس انه متدين وذمته كويسة وقريب من العمال ومتابع لمشاكلهم وبيحاول يحلها لهم.....انما فتحي طول عمره ذمته واسعة وبعيد عن العمال وعلاقاته حلوة جدا بالموردين والعملاء بتوع المصنع على حساب العمال
فتحي طبعا جن جنونه....السبوبة اللي بيقلبها من المصنع هتضيع عليه وهو عارف ان حماد راجل متدين وذمته نضيفة فبالتالي هيقطع عليه مية ونور
طب يعمل ايه فتحي بيه؟
نشفها ع المصنع تماما وحرض المتعاملين مع المصنع على عدم التعامل مع المصنع طول ما حماد هو اللي بيديره وتسبب في توقف الانتاج وعدم قبض العمال لرواتبهم كل دة علشان يحرج حماد ويثبت انه فاشل في ادارة المصنع
مش كدة وبس لا دة تعمد افتعال المشاكل مع حماد وبعت بلطجية يتدربوا على العنف علشان يستخدمه ضد حماد والعمال اللي بيحبوه
حماد فاض بيه واتخانق مع فتحي خناقة لرب السما دفاعا عن نفسه وعن المصنع وعن العمال كان فيها ضحايا من الجانبين
الغريب بقى ان جيرانهم وقرايبهم وكل اللي يعرفوهم بيقولوا ان الاتنين غلطانين وان دة صراع على السلطة والنفوذ في حين اي حد منصف هيعرف على طول مين اللي غلطان.....مين اللي مارضيش باختيار الناس للي يحكمهم؟
مين اللي تحالف مع الغير ضد اخوه شقيقه؟
مين اللي كان مصمم على انه يثبت ان اخوه فاشل؟
مين اللي كان مصمم على انه يجوع الناس كلها في سبيل تحقيق غرضه؟
مين الغلطان؟
فتحي ولا حماد؟
قصدي.............
فتح ولا حماس؟


ملحوظة:
انا راجل مصري مش فلسطيني....يعني مش فارقة معايا فتح ولا حماس على الاطلاق....وكمان انا رجل ليبرالي...لا انتمي لأي تيار سياسي معين سواء الاخوان المسلمين او غيرهم وان كنت لا انكر اني احترمهم كتيار منظم وله قاعدته الجماهيرية العريضة
فقط هي رؤية بني ادم محايد مالوش مصلحة مع دة ولا دة

Friday, 15 June 2007

تاج جامد جدا


التاج دة من ما علينا
التاج دة احلى حاجة فيه انه جديد لانج
اول مرة بصراحة بشوفه في المدونات
وعلشان الرغي بقى وكدة......نخش في الموضوع على طول
انت مين؟
واحد مصري صامت زي أغلبية المصريين.....نفسه يبطل صمت بقى ويكون له رأي في اللي بيحصل في بلده زي كل مخاليق ربنا
مين اكتر 6 اشخاص بتحبهم؟
هم الحقيقة 6 فعلا ودول الدايرة الضيقة المحيطة بي
والدي ووالدتي واخواتي الاتنين وازواجهم
انت سعيد؟
والله السوأل دة ماينفعش يتسأل بشكل مطلق كدة....لأني بالتأكيد مش سعيد على طول وكمان والحمد لله مش حزين دائما
بس اقدر اقول ان في الغالب اني راضي و الحمد لله
لو اجتمعت انا وحسني مبارك في غرفة واحدة؟
هقول له ان اللي باقي في فترة حكمه مش قد اللي فات...واقول له انه ممكن يتكتب في التاريخ بأحرف من نور لو في الكام سنة اللي فاضلين دول محى اخطاء 26 سنة فاتوا في الحكم
بالتخلص من شلة المنتفعين والقضاء عليهم وتأسيس دستور جديد سوي للبلاد واطلاق حرية تشكيل الاحزاب واصدار الصحف
هقول له كمان
ان الديمقراطية هي الطريق لأصلاح كل مشاكل بلدنا
هقول له كمان انه لو خايف ان الاخوان لو حكموا يرجعوا بمصر للوراء ممكن جدا بدستور جديد الكل يلتزم بيه يضمن تداول سلمي للسلطة ويضمن ضوابط تحفظ مصر من اي تيار سياسي سواء الاخوان او غيرهم
لو معاك مليون ونص جنيه......تعمل بيهم ايه؟
هعمل صيدلية كبيرة واشتري عربية احدث موديل
بتحب مصر؟
جـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــدا
وهو دة اللي هيقضي عليا وعلى اعصابي لما بشوف اللي بيتعمل فيها وفي ولادها
بتحب البنات؟
لو ما بحبش البنات ابقى مش طبيعي
اكيد بحبهم...بس حب عن حب يفرق
تقدر تقول اعجاب
بأعجب بكل بنت جميلة.....بس اول ما بتمشي من قدامي او بتختفي عن نظري بنساها تماما واول ما بتعدي بنت اجمل تعجبني برضة واول ما تمشي برضة انساها تماما
انما على المستوى العقلي تقدر تقول ان البحث عن بنت دماغها حلوة مسألة اصعب من البحث عن مسلم في الفاتيكان
انت مسلم؟
أه.....الحمد لله
ليه؟
في مجتمعاتنا محدش بيختار دينه...كل واحد بيتولد يلاقي نفسه على دين اهله سواء كان مسلم او مسيحي
انما لما بيكبر بيقدر يفكر ويقيم اذا كان مقتنع بدينه ولا لأ
وانا الحمد لله مقتنع اني مسلم تماما
مين اكتر شخصية ما تقدرش تستغنى عنها في حياتك؟وليه؟
والدتي
فعلا هي الشخصية الاولى والمفضلة بالنسبة لي
هي العقل اللي بفكر معاه وهي لقلب اللي بفضفض له لما تكون حاجة مضيقاني
انما ممكن بشكل عام اقول ان اي حد بيساعدني ان حياتي تكون افضل هو شخصية مهمة جدا بالنسبة لي
ايه اكتر موقف محرج اتعرضت ليه في حياتك؟واتصرفت ازاي؟
المواقف المحرجة اللي الواحد بيتعرض ليها كتير جدا....طبعا الحياة لا تخلو من الماقف المحرجة
بس افتكر كويس وانا في اولى اعدادي كنت بتكلم مع واحد صاحبي وعمال اشتم في مدرس الرياضة واذا بي ورايا وسمع كل اللي قلته
طبعا موقف اكتر من محرج.....قعد باصص لي بتاع 5 دقايق كدة وانا بأتمنى الارض تنشق وتبلعني
بس التزمت الصمت التام....وهو كمان عمل نفس الحكاية
ايه الأمنية اللي بتدعي ربنا دايما انه يحققها لك؟
انه يديم عليا نعمة الصحة ويرزقني من فضله واني اوجه الرزق دة للخير ولمنفعة الناس
تمرر التاج دة لمين؟
امرر التاج دة للسادة الأتية مدوناتهم....وعليهم الالتزام التام بالاجابة عليه
والا...........................هم عارفين اللي هيحصل لهم
البتاع
الروح (BOSBOS)
بنت الجنوب
جيداء
رانيا
ريمو
رحاب-هات ودنك
عايشة وخلاص
ميرو
غمض عنيك
NERMEEN
KIMEXLILO
ومش دول بس
ياريت اي حد شرفني بزيارته لمدونتي وعجبه التاج دة.....يعتبرني مررته ليه
تحياتي للكل



Monday, 11 June 2007

قفص مشمش


قاعد في عربيتي ومنتظر واحد صاحبي
جنب العربية فكهاني كبير وزحمة
لفت نظري حاجة مش ممكن تلفت نظر حد وهي طريقة شراء الناس للفاكهة
الناس ليه وهي بتنقي المشمش بتنقيها واحدة واحدة وتاخد اللي تعجبها وتسيب الثمرة اللي مش على مزاجها
طيب ماهو بنفس المنطق دة كان في حد امبارح من نفس القفص اخد الافضل وساب الأردأ....وجه اللي بعده اخد الافضل من الموجود وترك الباقي ......وهكذا دواليك
اللي عايز اقوله
ان مسألة الافضل دة مسألة نسبية والدليل ان القفص كله هيتباع بس بالترتيب ولكن في الاخر كله هيتباع
انا عارف انها فكرة فلسفية شوية بس ممكن نطبقها على حاجات كتيرة جدا في امور الحياة
بمعنى ان كل شيء بأوان وكل حاجة بميعاد وبترتيب قدري ربنا سبحانه وتعالى اللي مرتبه
القصة مش قصة مشمش....القصة فكرة خطرت لي على بالي وحاولت اني اوضحها

Thursday, 7 June 2007

تمييز ايه اللي انت جاي تقول عليه؟



"الحكومة تمارس التمييز ضد الأقباط في الوظائف والتمثيل السياسي.......والشرطة تتجاهل الحوادث ضد المسيحيين"

دي كلمات قالها مايكل منير رئيس منظمة اقباط الولايات المتحدة الأمريكية امام لجنة الحريات بالكونجرس

انا اعتقد انه قال الكلام دة على اساس ان المسلمين المصريين ناس عايشين بقى في بلادهم وواخدين حقهم تالت ومتلت وكمان كلهم واخدين وظايف عشرة على عشرة ومفيش ولا مسلم في مصر بيعاني من بطالة خالص

مفيش مسلم فيكي يا مصر مابيشتغلش كل المسلمين المصريين في مصر لهم وظايفهم اللي بتأكلهم الشهد

وعلى حسب كلام الأستاذ مكرم منير فأن المسيحيين المصريين يا عيني محدش فيهم بيشتغل خالص...كلهم يا حرام بيعانوا من البطالة ان حد يحن عليهم ويشغلهم....ابـــــــــــــــــــدا

تقريبا الاستاذ مايكل منير ماسمعش قبل كدة او محدش قال له عن الشركات اللي 90%من موظفيها من الأقباط وعلى سبيل المثال لا الحصر شركتي امون واكابي للأدوية وشركة موبينيل لخدمات المحمول وشركة غبور للسيارات

بكل أمانة ودي بقى وجهة نظري الشخصية انا مابحبش ابدا الشركات اللي بتنتقي موظفيها على اساس ديني سواء شركات مابتشغلش الا مسلمين او شركات كل موظفيها او 90% منهم على الأقل مسيحيين

ساعتها مش هيبقى بيزينس دة هيبقى تمييز ديني سواء ضد المسلمين من قِبل الشركات المسيحية او تمييز ديني ضد الأقباط من قِبل الشركات الاسلامية المتشددة

اما بقى ان التمييز السياسي ضد الأقباط فدي بقى النكتة الكبرى

دة برضة على اساس ان مفيش مسلم ما بيشاركش في الحياة السياسية وان التدرج الطبيعي في المناصب السياسية ماشي زي الساعة والناس عندها طموح سياسي وبيتحقق

ايه يا استاذ مايكل؟ انت مش من البلد دي ولا ايه؟

هو في حد اصلا سواء مسلم او مسيحي بيشارك في الحياة السياسية في مصر؟

يا استاذ مايكل ما كلنا عارفين الحياة السياسية في مصر ماشية ازاي.....مش ماشية على اساس ديني خالص....ماشية على اساس حاجات مالهاش دعوة بالدين خالص

اما بقى ان الشرطة بتتجاهل الاعتداء على المسيحيين.....فدي بقى نكتة فعلا.

المسيحيين المصريين يا حرام جثثهم في الشوارع والشرطة بتيجي تسأل الناس مين اللي عمل كدة...لو طلع مسلم يقولوا له برافو عليك وياخدوا بعضهم ويمشوا

ايه الكلام دة يا استاذ مايكل؟انت بتتكلم عن مصر؟دة في اي حتة في مصر الكلام دة؟

الأستاذ مايكل قال كلام كتير قوي قدام الكونجرس واطرف ماقاله ان الأخوان المسلمين توغلوا في كل مكان داخل اجهزة الدولة من القضاء للشرطة للصحافة وانه يخاف على الاقباط من نفوذ الاخوان المسلمين في مصر

استاذ مايكل:

هم الأخوان المسلمين مش في السجون برضة ولا ايه؟

هو انت بتتكلم عن مصر؟ اصلي الأمر التبس عليا....بجد والله اتلخبطت

استاذ مايكل:

المصريون كلهم بيعانوا من التمييز في مصر

Sunday, 3 June 2007

P.G.D

في حاجة اسمها ال
P.G.D
البي جي دي بقى دي تقنية جديدة في الطب بتستخدم في عدد من مراكز الاخصاب ومعامل التحاليل الطبية الكبرى
التقنية دي بقى مفيدة جدا وهدفها في منتى النبل وهو الكشف عن الكروموزومات للجنين في بطن امه والكشف المبكر عنها لمعرفة اذا كان الجنين بيعاني من تشوهات او عيوب خلقية.
يعني الهدف من استخدام التقنية دي هو فحص الامراض الوراثية لتجنبها خاصة في العائلات التي تحمل امراض وراثية
لحد هنا دة كلام جميل وكلام معقول ومحدش يقدر يقول حاجة عنها
انما بقى نظرا لأننا في مصر ونظرا لأن الفساد بقى القاعدة والشرف والنظافة والنزاهة بقى هو الاستثناء......شوفوا بقى بعض اطباء النساء وبعض مراكز التحاليل والاخصاب الكبرى استخدمت التقنية دي ازاي؟!!!!!!!!
طبعا لأن التقنية دي بقى بتكشف عن كروموزومات الجنين فبالتالي بتستطيع في وقت مبكر جدا من الحمل معرفة نوع الجنين اذا كان ذكر او انثى.
وهنا بقى المصيبة
بعض الناس-اللي للأسف بيتصنفوا على انهم ناس- لما بيعرفوا ان الجنين انثى بيصروا على ضرورة اجراء اجهاض للجنين
تخيلوا لسه في ناس في القرن الواحد والعشرين بيفكروا بالطريقة دي
طب الناس دول مصيبتهم اخف من المصيبة التانية اللي جاية
نوع تاني بقى من الناس لما بيعرفوا ان الجنين انثى
بيطلبوا من الاطباء انه يخليه لهم ذكر
اه والله زي ما بقول لكم كدة
ود بأنهم يستبعدوا الكروموسوم x ويبقوا على الكروموسوم y وبالتالي بيتحول الجنين لذكر
يا سلاااااااااااااام
يعني بيروحوا كدة لدكتور النساء ويقولوا له:
عايزين بقى ولد....دي مسئوليتك يا دكتور......وعرقك هتاخده.....وحلاوتك محفوظة طبعا
سبحان الله
تقنية بتستخدم علشان يعرفوا الاراض الوراثية ومدى صحة الجنين يقوموا بتفكير شيطاني بحت يحولوا التقنية الهادفة النبيلة دي لمنتهى الشر وتبديل لخلق الله علشان البيه او الهانم عندهم بنات وعايزين ولد او سيادتهم جربوا الصبيان وعايزين بقى بنت امورة
فعلا
الفسااااااد استفحل وبقى في كل مكان حتى في الاجهزة الطبية
على فكرة:
مصر مشهورة قوي بالنوع دة من العمليات وطبقا للمصري اليوم في عددها الصادر يوم الجمعة 1 يونيو 2007 فأن اتحاد المصريين في اوروبا استنكر قيام عدد من مراكز التحاليل الطبية والاخصاب في مصر باستخدام التقنية دي بالشكل دة وبيعتبروا دة عودة الى الجاهلية ووأد للبنات
وقال ان مصر انتشرت فيها العملية دي سواء للمصريين او للعرب
يعني مصر اصبحت بالنسبة للاخوة العرب مكان لممارسة كل ماهو ضد الاخلاق والقانون سواء الانساني او الجنائي
انما العيب مش عليهم
العيب على اللي بيساعدهم في كدة من اصحاب المراكز الطبية اللي المال اعمى عينهم عن الدين والاخلاق

fb comments

wibiya widget

LinkWithin

Related Posts with Thumbnails