Wednesday, 30 May 2007

ليه الاحراج دة بقى

شوفتوا الاعلان دة في التليفزيون قبل كدة؟


مش مهم تكون شفته او ماشوفتوش
المهم ان الاعلان دة بييجي عادي في التليفزيون
الاعلان دة مافيهوش منظر واحد مخل بالاداب العامة ومافيهووش لفظ واحد خارج
مفيهوش حتى بنت او اي انثى بتظهر فيه
بس لو انت قاعد بتتفرج على اعلان زي دة في التليفزيون وجنبك والدك او والدتك
مش هتحس بالخجل؟
ايه هيكون شعورك واختك البنت قاعدة بتتفرج معاك ع التليفزيون لا بيك ولا عليك واذ بالاعلان دة بيطل فجأة عليكم؟
بلاش كدة ولا كدة
تعمل ايه لو قاعدين بتتفرجوا ع التليفزيون وجاء ابن اختك الصغير اللي في ابتدائي وسألك
هو اعلان ايه دة يا خالو؟
رد بقى يا خالو
!!!!!!!!!!!!!

Monday, 28 May 2007

مصرية لكل خليجي


مبروك لمصر
مبروك لحكومة مصر
مبروك لرجال مصر
لنساء مصر ولأطفال مصر كمان
الحكومة المصرية قررت تصدير 120 الف خادمة مصرية للسعودية
مبروك يا جماعة
هنصدر بناتنا
وهياكلوا بقلاوة وهيكسبوا وهتبقى العيشة فل الفل وعال العال
لا وكمان ايه
احنا بنقدم خدمة سوبر للأخوة العرب....بنقول لهم والله مانتوا تاعبين نفسكم
تيجوا مصر ليه وتتعبوا نفسكم ليه وتصرفوا فلوس وبتاع
احنا هنبعت لكم بناتنا لحد عندكم
بس ابقوا خدوا بالكم منهن
بس في مشكلة
العلاقات بيننا وبين الفلبين وسريلانكا هتتأثر جامد بعد ما هيبقى في صراع الخدامات بيننا وبينهم
على فكرة
الكلام اللي فات طبعا هزل وتريقة
انما الجد بقى
لما أم تبيع واحد من عيالها يبقى اسمها ايه؟
مابالك بقى
لما بلد تبيع 120 الف بنت من بناتها......يبقى دة اسمه ايه؟
يااااااااااااااا خساااااااااااااااااااااااااااارة ع النخوة
تغور لقمة العيش اذا كانت هتيجي بالطريقة دي



Thursday, 24 May 2007

الزعيم الوطني


ديكتاتورية
بيروقراطية
فساد
تخلف علمي ورياضي وسياسي
حكم حزب واحد
حكم فرد واحد
قول من هنا لبكرة الصبح على امراض مصر وامراض نظام الحكم في مصر....وممكن كمان نعمل ندوات ونقعد نشتم ونلعن ونسب ونطالب بالحرية والديمقراطية وتداول السلطة وكل حاجة جميلة ممكن تتقال
لكن حد قعد كدة مع نفسه وقال احنا ازاي وصلنا كدة؟ازاي بقى حالنا كدة؟
مين اللي عمل فينا كدة؟
عدد كبير من اللي بيطرح عليهم السؤال دة ممكن تكون اجابته....وهو فيه غيره؟
قاعد 25 سنة في الحكم....اكيد هو السبب طبعا
انا في الحقيقة ليا رأي تاني خاااالص
هو ممكن يكون سبب بس في رأيي المتواضع مش هو السبب.......مش هو اللي وصلنا لكدة
الرجل مااستلمش مصر واحة من الديمقراطية والحرية وحقوق الانسان وخلاها بالشكل اللي هي عليه دلوقتي....ماننكرش طبعا انه زود الطين بلة...وخلى الحالة بدل ماهي سيئة اصبحت مستعصية
انما مين اللي خلى الحالة سيئة..مين اللي اذى مصر ووصلها لكدة من البداية
في رأيي....مفيش غيره
هو الزعيم
مفجر الثورة...اخلص الرجال...واعظم الرجال
جمال عبد الناصر
وقبل ماحد ناصري ينتقدني ويبتدي يهاجمني ويتهمني بالعمالة والصهيونية والكلام دة....احب اطمنه اننا هتكلم كلام موضوعي عن الرجل وبالحقائق التاريخية
جمال عبد الناصر من مواليد عام 1918 لأسرة متوسطة الحال ان لم تكن فقيرة...فوالده عبد الناصر حسين كان وكيل لمكتب بريد باكوس بالأسكندرية...يعني موظف على قد حاله
ودة مش عيب طبعا لأن الرجل علم ابنه وكبره ووصله لأنه ضابط جيش الا ان طبيعة تكوين ونشأة جمال عبد الناصر ساهمت بشكل كبير في عداءه المعلن لكل ماهو غني ورغبته الرهيبة لتحديد ملكية اي بني ادم على ارض مصر بحيث مايكونش في البلد دي حد غني على الاطلاق...وهو بالتالي بيخالف قوانين الكون اللي بتصنف الناس لطبقات
تخرج جمال من الكلية الحربية عام 1938 وتعرف على عبد الحكيم عامر اللي كان بيليه في الدفعة
تم تكوين ونشأة تنظيم الضباط الاحرار على خلفية نكبة فلسطين وهزيمة الجيوش العربية فيها مما ادى لتولد شعور جارف بالرغبة في تغيير الحكومات العربية الفاسدة اللي كانت سبب اساسي في النكبة العربية
تعاهد الضباط الاحرار على القيام بحركة عسكرية للقضاء على الفساد والملكية والاستعمار وتكوين دولة ديمقراطية وتأسيس جيش قوي
وبالفعل نجحت الحركة وحصل اللي حصل
ماتيجي بقى نحلل اللي حصل:
ثورة يوليو دي قامت على اسس ستة 3 منها بناء و3 منها قضاء
نبدأ ب ال 3 القضاء:
القضاء على الاستعمار واعوانه
فعلا.....والدليل ان امريكا بتحتل مصر حاليا ان لم يكن عسكريا فسياسيا وفكريا واجتماعيا وثقافيا وبتحتل العراق ودي جزء لا يتجزأ من العرب بتحتلهم عسكريا
اما بقى اعوانه.....فدي بقى لااااااااااااااا تعليق
فعلا مفيش اعوان للاستعمار دلوقتي خاااااااااااااااااااااالص
القضاء على الاقطاع
يا سلاااااااااااااام.....مفيش اقطاع في مصر خالص...ولا احتكار للثروة ولا للسلطة ولا حد بيمتلك اكتر من 10 فدادين ولا حاجة خالص
اقطاع؟!!!!!!هو احنا عندنا اقطاع؟
القضاء على الاحتكار وسيطرة رأس المال
طبعا دي بقى مش موجودة خااااااااالص......لا حد محتكر الحديد ولا اي حاجة ولا حد محتكر المحاليل والاجهزة الطبية للمستشفيات ولا حد خالص كان محتكر العبارات للحجاج والمعتمرين بين مصر والسعودية خاااالص
قلتوا لي بقى
عندنا كام رجل اعمال في الحكومة؟
اما بقى ال3 البناء:
اقامة عدالة اجتماعية
اظن دي بقى اتحققت......هو في عدالة اكتر من كدة؟
المتفوق هو اللي بيتعين...مفيش كوسة ولا واسطة ولا محسوبية....الدخل متوزع بالتساوي ع الناس
هو في احلى من كدة؟
اقامة جيش وطني قوي
طبعاااااااااااااااااااااااااااااااااااااااااااا
اي نعم احنا دخلنا كدة في كام حرب ماكنش ليها اي سبب زي حرب اليمن وحرب 67 وكمان حرب 56 خلصت سياسيا وحرب 73 انتهت سياسيا برضة
اقامة حياة ديمقراطية سليمة
يا سلااااااااااااااااااااااااااااام
هو في حياة ديمقراطية اسلم من كدة؟
دةاحنا من ساعة 23 يوليو 1952 لحد النهاردة واحنا بنعيش ازهى عصور الديمقراطية
بداية من الغاء الاحزاب وتكوين كيان الاتحاد الاشتراكي اللي كانوا بيغنوا وبيردوا على بعض لحد مارجعوا الاحزاب وتطورت الحياة الديمقراطية السليمة لحد ماوصلت للي احنا فيه دلوقتي
********************************************
من استعراضنا كدة لاهداف ثورة يوليو اللي بسم الله ماشاء الله ولا هدف اتحقق منها....ياترى مين اللي وكسنا الوكسة السودة دي
مين اللي كان في ايده يحقق الديمقراطية والعدالة ويسيب السلطة للمدنيين ويؤسس دولة عصرية الناس فيها بتحترم بعضها..ومعملش كدة
مين اللي رمى الراجل اللي ضحى برقبته علشان الثورة تنجح ولو كانت فشلت كان راح ورا الشمس واللي هوا اللواء نجيب رماه ورا الشمس
مين اللي عجبته السلطة واغراه سحر الكرسي ومارضيش يتزحزح لحد مامات بعد ماورطنا في نكسة لسه بنعاني من اثارها لحد دلوقتي
مين اللي ركب العسكر فوق الشعب دة ومش عارفين ننزلهم لحد دلوقتي؟
مين اللي ورث الحكم للنائب بتاعه واللي ورثه بالتالي للنائب بتاعه واللي مش عارفين هيورثه لمين؟
مين اللي ابتدع استفتاءات ال 99.9% المهزلة واللي خدتها عنه جميع الدول العربية الديكتاتورية وبقت من النوادر اللي بيتندروا بيها في العالم كله؟
مين اللي استبدل ملك ب 12 ملك؟
مين اللي بهدلنا البهدلة دي يا جدعان؟
وفي الاخر تقولوا
الزعيم الوطني؟
اومال الزعيم اللي مش وطني ممكن يعمل ايه في مصر اكتر من كدة ايه؟

Wednesday, 23 May 2007

هي دي الحياة

لوأن عُمر الإنسان انقسم لثلاث مراحل متساوية

و

لو افترضنا ان السعادة في الحياة لها 3 مقومات

المال

الصحة

الوقت

المرحلة الأولى من الحياة

(مرحلة الطفولة والشباب المبكر)

الإنسان يمتلك الوقت والصحة ولا يمتلك المال***************************************************************
المرحلة الثانية

(مرحلة الرجولة)

الإنسان يمتلك المال والصحة ولا يمتلك الوقت للإستمتاع بما كسبه

**************************************************************

في المرحلة الأخيرة من الحياة

(مرحلة الكهولة والشيخوخة)

الإنسان يمتلك المال والوقت ولا يمتلك الصحة لكي يستمتع بما اكتسبه من عمله طوال حياته
*********************************************************
محدش بياخد كل حاجة

و

سبحان الله

Sunday, 20 May 2007

ناقل الكُفر ليس بكافر

خلينا نتفق الاول على مبدأ انا مقتنع بيه تماما
من حق اي حد انه يؤمن بالدين اللي هو عايزه وحاسس انه دة الصح
ولكن من غير قلة ادب وتجريح في الديانات الاخرى واهانة اصحابها
طبعا الواحد نفسه ان العالم كله يتحول للاسلام وبيبقى سعيد جدا وفخور لما حد ربنا بيهديه ويدخل دين الاسلام
بس برضة مابعتبرش ان اي حد يرتد عن الاسلام انها صفعة في وجه الاسلام والمسلمين
ابدا....اسلامك لا هيرفع الاسلام لانه اصلا عالي.......وردتك عن الاسلام مش هتنزل من الاسلام لانه هيفضل برضة طول عمره عالي
ونخش في الموضوع
ناقل الكُفر ليس بكافر
الكلام دة صحيح؟
فعلا...ممكن نعتبر ناقل الكُفر ليس بكافر؟
الجملة دي سيطرت على تفكيري فجأة وانا على موقع "يوتيوب"المشهور
YOUTUBE
كنت بتفرج على الكليبات المختلفة وكتبت كلمة بحث علشان اشوف الكليبات اللي مُضافة على الموقع من ناس مصريين
وانا بقلب في الموقع وبتفرج لفت نظري كليب غريب جدا.....كلمة عربي بتدل على الدين الاسلامي وصورة الكليب لفتاة بترقص...استغربت جدا وقررت اتفرج ع الكليب دة
وقد كان
شخص ما حاطط فيلم لبنت بترقص بشكل مثير ومن الواضح ان البنت عربية او على حسب ماهو عايز يوصل لنا مصمم الكليب دة انها مسلمة
والصوت اللي طالع من الكليب صوت واحد بيقرأ القرأن اكريم على صوت العود...بيغني القرأن الكريم بعود
والاية انا طبعا مش عارفها اي اية بالضبط بس هي اية قرانية بتتكلم عن المؤمنات
طبعا الرسالة من واضع ومصمم الكليب وصلت
السخرية من الدين الاسلامي
وبيقولنا
اهم بنات المسلمين اهم
الشخص اللي صمم الكليب دة واخد شعار حاطه في الكليب لأحدى الحجرات المسيحية المتطرفة على البالتوك واللي متخصصة في الهجوم على الدين الاسلامي واسمها
IF GOD WITH US WHO CAN BE AGAINST US
اظن كدة وضحت الصورة
مسيحي متطرف بيهين الدين الاسلامي والقرأن الكريم والمسلمات
انما السؤال اللي خبط في النافوخ مرة واحدة هو:
لو انا نشرت الكليب دة في المدونة عندي...هل اكون مشترك مع الشخص دة في الكُفر
لو انا نشرته علشان الناس تشوف ان المتطرفين مش بس مسلمين وان في مسيحيين كمان اخطر واشد تطرفا على الاقل مفيش مسلم بيشتم ويسب سيدنا عيسى عليه السلام
في الاخر ماقدرتش احط الكلام دة عندي في المدونة
مقدرتش
حسيت بالغثيان لدرجة اني والله مااقدرتش اكمل الكليب القذر دة للاخر
بس فضل في دماغي اسئلة كتير قلقاني:
ليه البني ادم دة بيعمل كدة؟ايه اللي هو استفاده....هل هو كدة ريح عقله المريض؟
قبل كدة وفي موضوع سابق قلت ان ممكن تكون كافر...بس خليك كافر مؤدب...خليك كافر من غير ماتقل ادبك على دين انت مش بتؤمن بيه
ثانيا:
هل المفروض ننشر كليب زي دة علشان نقول للدنيا كلها...اهم المتطرفين اهم....التطرف مش مرادف لكلمة اسلام على الاطلاق
ولا الاحسن اننا ماننشرش القذارة دي على الملأ
ويبقى السؤال:
ناقل الكفر فعلا....ليس بكافر؟

Thursday, 17 May 2007

فعلا....وحشية وهمجية كلابية


دة مقطع من رسالة بعتتها الممثلة الفرنسية المعتزلة بريجيت باردو للرئيس مبارك بتشكو ليه سوء معاملة الكلاب في مصر
ودة مقطع كمان...خد عندك
يا جماعة....مدام بريجيت بتتكلم على الكلاب...الكلااااااااااااب
يا بخت الكلاب
تخيلوا المدام زعلانة جدا ومنهارة وباعتة للرئيس رسالة غاضبة جدا علشان الاساليب الوحشية (خدوا بالكم من الوحشية دي)اللي الكلاب في مصر بتتعامل بيها
ماتعرفش سيادتها ان الكلاب في مصر بتتعامل احسن بكتيــــــــــــــــــــــــــر من فئات كتيرة جدا من الشعب المصري
على الاقل ماسمعناش ان في كلب مش لاقي يتعشى..بس في بني ادمين لا بتتغدى ولا بتتعشى في المحروسة
ماسمعناش برضة قبل كدة ان في كلبة بتعاني من العنوسة ولا كلب نفسه يتجوز ومش عارف...انما شوفوا بقى نسبة العنوسة في مصر وصلت قد ايه...ولا كام شاب مش عارف يتجوز اساسا
كمان مش عارفة او محدش قال لها ان مفيش 1500 كلب ماتوا غرقا انما دي حصلت للبني ادمين لما 1500 بني ادم ماتوا غرقا في عبارة السلام
مش واخدة بالها برضة مدام باردو ان مفيش كلاب بتدخل مواد مسرطنة لمجتمع الكلاب اللي بتنتمي اليه انما في مصر ممكن تلاقي بني ادمين بيسرطنوا اهلهم علشان العمولات والسفريات والذي منه
طيب حد قال للنجمة الشهيرة ان في كلب ممكن يغتصب كلبة...بتحصل كتير قوي مع البني ادمين في مصر
طيب حد قال للنجمة العظيمة ان في كلبات تم هتك عرضهن علشان كانوا ماشيات في مظاهرات كلابية.....حصلت مع البني ادمين في مصر وكتيـــــــــــــــر جدا كمان
يا مدام باردو....في مصر هنا ناس اولى بكتير انك تبعتي علشانهم جوابات....واذا كان ع الكلاب ياستي احب اطمنك واخدين حقهم هنا تالت ومتلت....دة مفيش في مصر هنا اكتر من الخرابات والمناطق العشوائية
طبعا لازم الريس مايعبرهاش لأن احوال الكلاب هنا احســــــــن وافضل بكتير من احوال البني ادمين
عجبتني قوي حكاية تواطؤ السلطات في موت الكلاب.....موتتني من الضحك والله
بالمناسبة
محدش يعرف عنوان مدونة مدام بريجيت باردو علشان نبعت لها ونطمنها على الكلاب في مصر....الست قلبها واكلها عليهم جدا
فعلا
شر البلية ما يضحك

Wednesday, 16 May 2007

تاج جديد سعيد

تاج جديد من زميلي الصيدلي الشاب شادي فايد نظارتي السوداء
راجل فيه الخير بجد
اول ما التاج وصل ليه باصى على طول
على الرغم ان التاج طويل وعايز مخمخة جامدة جدا...الا انه ممتع بصراحة
ولذلك نخش في الموضوع على طول
&&&&&&&&&&&&&&&&&&&&&&&
احب شخص لقلبك في الدنيا؟
والدتي طبعا
ربنا يديها الصحة ويخليها لي

---------------------------------
انسان مستعد تضحي بحياتك-ركز في كلمة حياتك-علشانه؟
بص هو الكلام مفيش اسهل منه يعني ممكن اقول لك والدتي ووالدي وكدة
بس هل ساعة التنفيذ ممكن يحصل كدة؟
مش عارف والله
ماجربتش ويارب ماجربش ابدا
دي على فكرة مش انانية دي واقعية وصراحة شديدة جدا
---------------------------------
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
محدش خالص
اصل انا مش غاوي قتل بصراحة
ولو بكره حد قوي كدة...هتجنبه تماما مش هتعامل معاه بدل ما اقتله واروح فيه في مصيبة
-------------------------------------
ما هو:اسم أجمل كتاب كتبه بشر قرأته ومحتفظ به حتى الان؟
انا مش غاوي كتب قوي..غاوي جرايد و مجلات
وبعتبر الجريدة ممكن تكون اقوى و اقيم من كتب كتير بما فيها من مقالات ورأي وموضوعات مختلفة
بس ممكن نقول
خريف الغضب لمحمد حسنين هيكل
اي مجموعة قصصية لنجيب محفوظ

---------------------------------------
اهم جهاز منزلى انت متعلق بيه او بتستخدمه كتير؟
الكومبيوتر والموبايل
-------------------------------------
مكان تحس بالراحة عندما تدخله؟
اوضة نومي
-----------------------------------
شىء تحس بالراحة النفسية عندما تنظر اليه؟
الصيدلية بتاعتي لما تكون فيها زباين بيشتروا
-----------------------------------
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
اي مكان كنت بروحه وانا صغير ومابقتش اروحه دلوقتي
المدارس اللي كنت فيها في ابتدائي واعدادي وثانوي
الكلية والجامعة بشكل عام
جدة اللي قعدت فيها سنة على الرغم ان كان فيها ايام كتير مش لطيفة بس ساعات كتير بحن للأيام الحلوة اللي كانت فيها
--------------------------------------
اجمل مدينة زرتها داخل مصر؟
اسكندرية والساحل الشمالي
--------------------------------------
اجمل مكان طبيعي رأيته في مصر؟
مارينا
---------------------------------------
شخصية كرتونية بتحبها؟
بابار
مش عارف عارفينه ولا لأ
بس هي شخصية فيل كان دمه خفيف جدا...كانت بتتعرض في التليفزيون وانا صغير وكنت بحبه قوي
----------------------------------------
نوع هاتفك المحمول؟
NOKIA N91
-----------------------------------------
سرعة بروسيسور جهازك؟
ايه بقى الاسئلة المحرجة دي
انا ماليش في الكلام دة خاااالص
معرفش الحاجات دي في الكومبيوتر
انا كل اللي بعمله اني بشتغل ع الكومبيوتر بس...انما لو لاقدر الله حصل فيه حاجة..هحط ايدي على خدي واقعد جنبه
------------------------------------------
حجم ذاكرة-هارد-جهازك؟
اذا كان كدة معلش
دي انا عارفها كويس
80 GIGABYTE

------------------------------------------
المساحة التي تشغلها المواد الاسلامية على جهازك؟
بكل امانة وعلشان احنا اتفقنا مانكدبش
قليلة
ودة لاني مابحبش اتفرج على حاجة على شاشة الكومبيوتر
يادوبك حاطط قرأن وقصص الانبياء بصوت دكتور طارق سويدان

---------------------------------------------
نفس المساحة السالف ذكرها فى قلبك
-الاجابة لنفسك عشان الرياء يا اخواننا -؟
مقدرش اقوللك
ممكن تجيب لي اسلاموميتر علشان اقيس كويس
بس اكيد اكتر بكتيييييير جدا من مساحتها ع الهارد ديسك

--------------------------------------------
أهم هدف انت واضعه لحياتك الآن؟
اني انجح في شغلي جدا
احس اني فعلا كان لازم ارجع من السعودية علشان انجح هنا
مش عايز اندم اني عملت كدة

-------------------------------------------
مواصفات فتاة الأحلام بالنسبة لك؟
بنت نـــــــــــــــــــــــاس
من عيلة محترمة...مش محترمة يعني غنية....لا انما تحس انها بنت اصول
بحب انا العائلات اللي بتناسب بعضها يكونوا على درجة عالية من التقارب في كل حاجة
وطبعا تكون شكلها كويس و شيك ومتدينة وبتعرف تتعامل مع الناس ولو اتحطت في موقف تعرف تسد فيه كويس
مش مهم تكون محجبة بقدر ما لازم يكون لبسها محترم

-------------------------------------------
صف ما يأتى:
شعورك لما بتسمع كلمة مصر
مين اللي بيقولها وبيقولها في اي مناسبة
يعني لو عربي او اجنبي مثلا بيشتمها تلاقيني بغلي...لو مصري هو اللي بيشتم تلاقيني متضايق بس مش بغلي على اساس انه اكيد بيشتمها حبا فيها
بتختلف بحسب لو عربي او اجنبي بيمدحها تلاقيني برقص من السعادة والفخر...لو مصري هو اللي بيمدحها فدة بيبقى شىء عادي بحب ساعتها اعرف الشخص دة قصده مصر بتاعتنا ولا مصر اللي يعرفها

***************
شعورك لما بتسمع كلام عن اليهود
بقول برافو عليهم....بيحبوا بلدهم بطريقتهم
ياريتنا نعرف نعمل لمصر زي مابيعملوا لاسرائيل
*********************
شعورك لما بتشوف ضابط شرطة
بيبقى نفسي اسأله
انت منفوخ كدة ليه؟

*********************
شعورك لما بتشوف الكناس العجوز في الطريق؟
بعرف ليه شوارعنا مش نضيفة
--------------------------------------------
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
بسأل نفسي ياترى الشاب دة بيبص لي ازاي؟
هل بيعتبرني من الكفار ولا شايفني ممكن اكون مسلم زيه

--------------------------------------------
احساس يراودك فى اشارة مرور مغلقة بسبب مسئول كبير؟
بقول لنفسي
طيب لو في واحد بيموت في عربية اسعاف مش عارفة تعدي علشان سعادته او فخامته
ذنب اللي بيموت دة....في رقبة مين؟

-------------------------------------------------
-----------------------
نمرر بقى التاج الظريف دة لميــــــــــــن؟
انا عارف ان ممكن يكون ناس منهم اتبعت لهم التاج دة قبل كدة
لو دة ماحصلش ...اديني كسبت فيهم ثواب
وكله بثوابه

Monday, 14 May 2007

خلطبيطة

من كتر الناس المحترمة اللي بتورد ع السجن يوميا
الواحد حاسس ان السجن بعد كدة مش هيبقى عقوبة خالص
حد يطول يبقى اصدقاءه وجيرانه في العنبر ناس زي ايمن نور كدة وخيرت الشاطر والناس الافاضل دي
دة الواحد ساعتها هينبسط انبساااااط
ويحس بقى انه مهم وقاعد مع ناس محترمة فعلا
صحيح يا جدعان
ماكدبش اللي قال
السجن للجدعان
*******************************************************
"ياللهول
معقول الكلام دة؟
مسيحيين عايزين يبنوا كنيسة علشان يصلوا فيها؟
ازاي الكلام دة؟انا اكيد بحلم
لا لا لا مش معقول
غلطانين طبعا والغلط راكبهم من كبيرهم لصغيرهم
بقى عايزين يبنوا كنيسة؟
"عيب فعلا
تخيلوا دة تفكير ناس مسلمين في القرن 21 وكأن الكنيسة اللي هيبنيها الناس دي في بلدهم هي اللي هتكون السبب في انهيار الدين والاخلاق في القرية دي
واقطع دراعي ان ماكان عدد كبير جدا من اللي اتقبض عليهم في احداث الفتنة في العياط مابيصليش اساسا
انما ياللعار
مش عارف مين السبب؟....مش عارف بجد
***********************************************************************
المصري اليوم نشرت ان سواق ميكروباص قطعوا له صوابعه وضربوه على دماغه وطلقوا مراته منه علشان مارضيش يجيب لضابط كمين المرور كارت اعادة شحن للموبايل بتاع سيادته
بصراحة السواق يستاهل كل اللي يجراله...جنس نمرود صحيح
بقى تستغل طيبة حضرة الضابط اللي مارضيش يتقل عليك ويقوللك اشتري لي موبايل وتواضع وقال كفاية كارت شحن بس
وكمان ماترضاش تجيب له...اما انك سواق قليل الادب صحيح
فعلا
شعب مابيجيش الا بالعين الحمرا
***********************************************************

شوية نصاحة معتبرة ضاربة اليومين دول في المصريين...عجيبة غريبة
زمان كانت التجارة شطارة..بس دة كان زمااااان ايام المصري القديم
انما دلوقتي بقى ايام المصري الجديد تلاقي التجارة غلاسة...التجارة سرقة...التجارة فهلوة
تلاقي عربية اخرها 60 الف جنيه مثلا وهو مصمم يبيعها لك ب 80 الف...اما بقى لو كان هيشتريها منك فدي ماتجيبش اكتر من 30 الف
معدش في وسط...معدش فيه حاجة اسمها انا اكسب وغيري يستفيد والعملية تمشي..انما بقى في انا استفيد واكسب وعمليتي اللي تمشي
انا بس
وقيس بقى على البيع والعمليات التجارية من سيارات لعقارات لصيدليات....لكل حاجة
الا بالمناسبة
هي دي لها علاقة بالمناخ السياسي في البلد؟ ولا الدناءة اللي احنا فيها دي حاجة فوق البيعة
in addition
يعني؟
*************************************************************

نفسي اعرف حاجة شاغلة بالي من زمان
مش انا بس....شاغلة كل الشباب والرجال تقريبا
المتدينين منهم و الغير
الملتزمين والمنحلين
سألنا بعض كتيـــــــر
محدش جاوب حد
البنــــــــــــــــــــــــــــات عايزة ايه؟
دة مش اسم فيلم دة بجد والله
كل يوم اللبس بيقصر عن اليوم اللي قبله.....كل يوم الاخلاق بتضيع والتنازلات حبة حبة بتزيد
كل يوم بنشوف في الشارع والتليفزيون حاجات مكنش من كام سنة ينفع نشوفها عيانا بيانا كدة
وكل دة وللأمانة
ماتزال البنات رغم كل المظاهر والتصرفات
بترفع شعار
الاخلااااااااااااااق
يبقى
اكيد احنا اللي فاهمنهم غلط
حقكن علينا
**********************************************************************

فكرتني حكاية التدوين دة بالملحنين في افلام زمان
كان الملحن ييجي عليه ايام كدة ماسك العود ومزاجه متعكر وعمال يدندن ومفيش حاجة عايزة تطلع من الدندنة دي
وتلاقيه رمى العود بتاعه وقال مفيش حاجة عايزة تطلع
مفيش ابداع
انا انتهيت
المدونون نفس الفكرة
في ناس تلاقي عندها اسهال تدويني...بيكتبوا بمعدل 3 بوستات في اليوم
وفي ناس تخش مدوناتهم تلاقي اخر بوست ليهم من مارس اللي فات
دي برضة حاجة راجعة للألهام والكلام دة؟
انا على حد معلوماتي ان المدونات دي افكار بتتنقل من الدماغ الى الكومبيوتر من خلال الكيبووورد
وعدم وجود تدوينات يبقى في خلل من ثلاثة:
يا اما مفيش حاجة في الدماغ....محدش بيفكر خالص....ودي مشكلة لأن الانسان بطبيعته كائن مفكر
يا اما مفيش كومبيوتر....ودة من ايه دة؟
يا اما مفيش كي بوووورد..ودي مش غالية بتتباع في كل حتة
ياريت المدونات تزيد والافكار تزيد والمعلومات تزيد
كل ماعدد المدونين بيزيد كل ما تحس ان في امل وان لسة الاغاني ممكنة
****************************************************************
كلام فارغ انا عارف
بس اهووو
كلام

Wednesday, 9 May 2007

وشوش

وشوش بنشوفها كل يوم تقريبا.....بس الحقيقة هي مش مجرد وشوش هي كمان عقول بنتعامل معاها باستمرار وبتؤثر في الرأي العام بنسب متفاوتة
منهم وشوش بتستغل المساحة المتاحة ليها على الشاشة علشان تبث سمومها والتوجيهات اللي جاية ليها على الشاشة...ومنهم طبعا اللي ضميره لسة حي بس الظروف مش مساعداه....ومنهم اللي ضميره حي والظروف مساعداه انه يتكلم بس هو حاطط لنفسه خطوط حمرا مايتخطيهاش علشان مش عايز مشاكل
الناس دي مش كلها وجوه تليفزيونية...ممكن تلاقيهم كمان كُتاب او اذاعيين
هحاول في البوست دة اتكلم عن بعض الشخصيات دي اللي بتطل علينا يوميا او اسبوعيا وبتأثر في عدد كبير من الناس اكبر مما تتخيلوا
انا بعتبر الناس دي هي اللي بتوجه الرأي العام المصري

**********************
منى الشاذلي
قبول...لباقة...ثقافة واسعة ومدهشة.....شياكة واناقة بمنتهى الاحترام والذوق
يعيبها بشدة نقطة الخط الاحمر اللي طاه للمناقشات بتاعتها...ماسمعناش لمنى الشاذلي اي نقد للحاكم ولا لأي فرد انما الملاحظ من اسلوبها في البرنامج بتاعها انها بتنتقد اوضاع عامة سيئة في المجتمع دون اشارة للمسئول ايا كان عن هذه الاوضاع خاصة لو كان هذا الشخص المسئول وزير وانت طالع
انما ممكن يكون دة بسبب سياسة قناة دريم...المملوكة لرجل الاعمال احمد بهجت وانها واضعة حرية ولكن ببعض الحدود..ولو ان الكلام دة برضة مردود عليه ان دريم بيعرض عليها برضة برنامج لحقيقة لوائل الابراشي وهو يمتلك هامش حرية اعلى بكتير من المتواجد في العاشرة مساءا وربما دة بسبب ان العاشرة مساءا برنامج اكثر جماهيرية من الحقيقة
بيؤخذ برضة على منى الشاذلي انها بتتلخبط كتير وبشكل لافت للنظر...مرة في الاسماء ومرة في الاحداث وساعات كتير تحس انها بتفاجىء بالحلقة او مضمونها او موضوع معين على الرغم من ان البرامج دي المفروض انها بتكون مرتبة بشكل كويس جدا
بس طبعا دة رأي لا يبخس المذيعة المتألقة الناجحة حقها وانما رغبة في التطوير

معتز الدمرداش & مي الشربيني
بيقدموا مع بعض برنامج 90 دقيقة على شاشة المحور
رأيي الشخصي ان الثنائي دة مختلف.... او بمعنى اخر غير متفاهم.... مفيش هارموني بين الاتنين
معتز بيتميز بخفة دم بتتحول احيانا لأستظراف اما مي في واخدة الموضوع بشكل جد جدا مبالغ فيه مما يفقد البرنامج الكثير من الانسجام في تقديمه
برنامج 90 دقيقة برنامج بيحاول يكون ليه مكان بارز وسط المنافسة الرهيبة بين الفضائيات...فجر اكتر من قضية من اهمها بنات الليل وهالة سرحان..ولو انه لسة مااكتسبش ثقة المشاهدين لحد دلوقتي وتحس انه لسة ماكونش الجمهور بتاعه

عمرو اديب
على الرغم من انه من عائلة ثرية سواء قديما او حاليا الا اه دايما بينحاز للفقراء والغلابة والمهضوم حقهم في البلد دة
اسلوبه الظريف والتلقائي وخفة دمه بتنجيه كتير من المشاكل
اللي ممكن تتسبب فيها صراحته وثقل هجومه على ناس كبيرة في البلد
يعتبر اعلى برنامج من النوعية دي من الرامج من حيث هامش الحرية والنقد المتاح ولكن دة بيرجع لأنه بيبث عبر قناة مشفرة وهي فضائية الاوربيت (وان كانت الوصلة ماخلتش حاجة مشفرة خالص)..ودة اللي زود من شعبية البرنامج بشكل رهيب.
بيعيب على عمرو اديب عداءه المعلن واللي مابينكروش للأخوان المسلمين ودة بيخليه مش على درجة عالية من الحياد وهو بيناقش القضاية المتعلقة بالأخوان
بيعيب عليه كمان اعتماده في بعض الحلقات على احمد موسى الصحفي بالاهرام واللي بيعتبر مندوب الاهرام في وزارة الداخلية
بيعيب كمان على البرنامج الناجح دة كمية الاعلانات المبالغ فيها جدا ولكن هي دي ضريبة النجاح

أحمد شوبير
لما يبقى حد مقتنع مليون في المية انه اذكى بكتير من كل الناس على الرغم ان دي مش حقيقة على الاطلاق
الشخص المستذكي او اللي بيستغبى الناس....هو دة الكابتن شوبير اللي بيقدم برنامج يومي رياضي على قناة دريم1 بالاضافة الى برنامج كروي اسبوعي على دريم2 ودة اللي خلى ناس كتير تسميها قناة شوبير
الكابتن شوبير بيستغل ظهوره اليومي على الشاشة حتى في الاجازات في تصفية الحسابات سواء الشخصية من ناس بيهاجموه وينتقدوه او السياسية من ناس بيعارضوا الحزب الوطني اللي بينتمي اليه المذيع الفاضل
ويحسسك وهو بيتكلم انه يعني منتهى الحيادية والانصاف وانه لا يستخدم اي اداة في متناوله لتسوية الحسابات مع خصومه معتمدا طبعا في كدة على ان الناس يا اما غبية جدا يا اما هو اذكى من اللزوم
الكابتن شوبير يحب قوي في برنامجه يستعرض علاقاته بالمحافظين والسادة الوزراء ومفيش مانع ابدا من عمل شوية دعاية انتخابية لزوم مجلس الشعب اللي هو عضو فيه

تامر أمين & منى الشرقاوي
الثنائي دة بيقدم برنامج البيت بيتك اللي الحكومة نفسها الناس تخليه البرنامج الاول والاخير في المشاهدة بأي طريقة..ومعاهم حق بصراحة مش هيلاقوا احسن من الثنائي الهايل دة اللي يناسب الدعاية الحكومية جدا
الغريب فعلا-سبحان الله-ان كل ما الحكومة تحاول تجيب ناس يحسنوا صورتها بيحصل العكس تماما
تامر امين ممكن ان نختصر الكلام عنه بكلمتين بس
الواسطة والمحسوبية
ممكن كمان ان احنا نوصف اداءه بكلمة واحدة بس
الاستظراف
اما منى الشرقاوي...فلا تعليق..هي جاية علشان تكمل الصورة انه لازم البرنامج يقدمه مذيع ومذيعة وبما ان المذيع هيكون تامر امين يبقى المذيعة اللي تناسب الظروف دي اكيد مش هتكون افضل من منى الشرقاوي
مش هقول ايه اللي بيعيب البرنامج لأن مفيش ميزة للبرنامج من اساسه

المصري اليوم
اكيد الناس اللي غاوية قراية جرايد عارفة كويس قوي ايه هي المصري اليوم وعارفين كمان كويس جدا قيمة االصحيفة دي وقدرتها على احداث حركة في حالة الركود اللي بتمر بيها الحياة السياسية في مصر

فجرت قضايا كتير جدا على جميع المستويات....اتهموها مرة انها عميلة لأمن الدولة وناس تانيين قالوا لا دي صحيفة الاخوان المسلمين...ناس تانية قالت دي صحيفة الاقباط في مصر
انما دة كله راجع لأن الناس لسة مش متعودة على الصحافة الحرة المستقلة...لازم الصحيفة من وجهة نظرهم تكون متحدثة بأسم حد معين
مايعرفوش ان في حاجة اسمها الليبرالية اللي بتمثلها صحيفة المصري اليوم
**********************************************************
مش دول بس اللي بيشكلوا الرأي العام بس اقدر اقول انهم نماذج مهمة في حياتنا مختلفين فكريا وتوجهيا وسياسيا وناس في الشرق وناس في الغرب
محدش يقدر ينكر دور الناس دول في حياة الشعب المصري في القرن الواحد والعشرين سواء سلبا او ايجابا

Sunday, 6 May 2007

تاج


التاج دة وصلني من محمد العناني (مدونة جهاد المصري)......والحقيقة التاج دة لف على كل المدونات تقريبا كل ماادخل مدونة الاقي التاج دة واقول يعني محدش ناوي يعبرني ويباصي التاج دة ليا
ماشي يا بني أدمين
عموما محمد العناني الله يكرمه عبرني اخيرا وراح مديني حتة كدة دبل كيك ع الطاير واخيرا اداني الميكروفون علشان اتكلم
الف شكر ليك يابو حميد
نخش بقى ع التاج الجملي دة:
هل كنت طالب شاطر في المدرسة؟
بكل تواضع وبدون غرور اقدر اقولك ..أه انا كنت شاطر
من صغري وانا شاطر واللي حواليا بيقولوا كدة بس بصراحة ماكنتش الفت يعني مكنتش الواد الوهمي اللي بياخد ترتيب ع
المدرسة او المحافظة والحاجات الهلامية دي
انما تقدر تقول اني دايما كنت باطلع الاول او التاني ع الفصل وكنت دايما في فصول المتفوقين مع اني ماكنتش موووس مذاكرة ولا حاجة
كنت بحب انام بدري جدا والاقي العيال صحابي بيقعدوا يذاكروا بالليل لحد الفجر وانا ماليش فب الكلام دة خالص
بس الشوية اللي بقعد فيها ع الكتاب كنت بأنجز الحمد لله علشان كدة كانوا بيفتكروني خبيث وبتلايم عليهم وانا ابعد مااكون عن كدة والله
ايه اكتر مادة حبيتها واكتر مادة كرهتها في المدرسة والجامعة؟
في المدرسة:
كنت بحب الكيميا جدا الحقيقة...وانا سامع ناس دلوقتي بتقول يــــــــــــــع ايه القرف دة
بس هي دي الحقيقة كنت غاوي كيميا ودة اللي خلاني ادخل صيدلة علشان بحب الكيميا
وقبل طبعا ا ادخل علمي ايام اعدادي بقى وكدة كنت بحب التاريخ...مادة مسلية (طبعا من التسلية....مش من السُل)بس ماتمتحنش فيها تذاكرها علشان تتسلى بس
اما اللي كنت باكرهه فهي الأحياء....وكنت مسميها الأموات
ودة لأني مابعرفش ارسم...ضعيف جدا في الرسم وخطي وحش وطبعا الاحياء بتعتمد كليا وجزئيا على الرسم فكان بيروح مني درجات كتير اونطة
في الجامعة
كنت بحب قوي مواد كتير اللي هي ليها علاقة بالواقع..مرتبطة بالحياة العملية زي الفارماكولوجي ومادة السموم وكمان مادة اسمها الكيمياء الطبية والصيدلية
(معلش اساميهم مجعلصة شوية بس هم اسمهم كدة)
وكنت بكره مادة العقاقير دي كُره العمى...لأنها كلها اسامي نباتات طبية معقدة جدا وكلها شغل عطارة مش صيدلة بتتكلم عن الحلبة والكركديه والينسون واساميهم ايه ومكوناتهم الطبية ايه وكلام معقد جدا
وعشان اعقدكم معايا هديكوا مثال لطيف جدا
عارفين لعرقسوس....العرقسوس العادي دة
اسمه العلمي
glycerhizae glabra
بس خلاص
عرفتوا بقى كنت باكرهها ليه
كنت عايز تطلع ايه وانت صغير؟
وانا صغير خالص بتاع ابتدائي كدة كان طموحي بسيط خاااااااااااالص....كنت عايز اطلع
رئيس جمهورية
اه والله وكنت بشوف ان دي حاجة عادية جدا وطموح مشروع يعني...ليه لا؟
انا حر عايز اطلع كدة...حد شريكي؟
بس دة طبعا كان زمااااااااان قوي لحد يفتكر اني طمعان في حاجة لاسمح الله ولا حاجة
بعد كدة لما كبرت بشوية كنت عايز اطلع ضابط علشان بحب البدل الميري بتاعتهم
لما كبرت بقى ودخلت اعدادي وثانوي كنت عايز اطلع صيدلي
وقد كان والحمد لله
اما بقى همرر التاج الجميل دة لمين؟
نظرا لأني شفت التاج دة في معظم المدونات تقريبا فأنا مش عارف امرره لمين بس عندي فكرة وهي ان اي حد يدخل المدونة دي ويقرا التاج دة ومايكونش حد مرره ليه قبل كدة ياريت يعتبرني انا مررت ليه التاج دة
واديني كسبت في ثواب
مش عارف هتودوا جمايلي دي كلها فين

Friday, 4 May 2007

الثلاثة يحبونها




الثلاثة
كانوا ماليين الدنيا
الثلاثة
كانوا اعضاء بمجلس الشعب
الثلاثة
كان لسانهم طويل في الحق
الثلاثة
لبسوا قضايا معتبرة
الثلاثة
دلوقتي مشرفين في السجن
الثلاثة
نايمين ع البورش
الثلاثة
حاولوا يغيروا وضع موجود
الثلاثة
ممكن قوي يكون مالهمش علاقة شخصية ببعض
الثلاثة
بيجمعهم حاجة واحدة مشتركة
محاربة الفساد
الثلاثة
يحبونها

مصر

Tuesday, 1 May 2007

بيلعبوا بالنار

موضوع تحويل الانسان من ديانته لديانة تانية هو الحديث او الموضة اللي منتشرة في برامج الفضائيات اليومين دول...ماهو طبعا القضايا اللي بتتناقش في الفضائيات دي موضة زي موضة اللبس والشعر كدة بالضبط
حد ينسى موضة اطفال الشوارع وبعدها جت موضة اكياس الدم وبينهم كانت جت موضة القطارات وشوية وبتطلع موضة زي موضة حوادث الطرق.....الخ
المهم ان الموضات دي في بلدنا العزيزة بتيجي بسبب والحمد لله بتنتهي من غير اي سبب خالــــــــــــــــص.
نيجي بقى لموضة الأيام دي والخاص بحكم المحكمة بعدم الزام وزارة الداخلية بتغيير بيانات المسيحيين اللي اسلموا وعايزين يرجعوا مسيحيين تاني..........يعني هم كانوا مسيحيين وبعدين أسلموا فغيروا لهم بياناتهم الشخصية واعتبروهم مسلمين....الناس دي بقى قررت ترجع مسيحية تاني....عايزين بقى يغيروا لهم بياناتهم تاني ويعملوهم مسيحيين تاني
بداية
:
تعالوا نتجرد من انتمائاتنا الدينية (طبعا في الموضوع دة بس)ونبص للموضوع من فوق بنظرة طائر محلق ونبدأ الموضوع دة من الأول:
شخص مسيحي مثلا قرر انه يدخل في دين الإسلام (احنا طبعا هنفترض انه قرر لانه قرأ كتب عن الدين الاسلامي فأقتنع بيه...مش علشان قصة حب ولا اي اهداف اخرى) او شخص مسلم قرأ عن الدين المسيحي او حد اقنعه بيه فقرر انه يرتد عن الاسلام ويدين بالمسيحية (انا هنا برضة بتكلم عن ان الشخص دة اقتنع...مش علشان قصة حب ولا كلام من دة)....هل المسيحي اللي دخل الاسلام دة هيرفع الاسلام وهل المسلم اللي اعتنق المسيحية هيزود المسيحية وهينقص من قدر الاسلام؟!!!!!!!طبعا لا
انما المسألة كلها ادمغة...هو دماغه كدة...تفكيره كدة...انا هنا مابتكلمش عن حكم الاسلام من المرتد لاننا طبعا في مصر لانطبق احكام الشريعة الاسلامية كلها فبالتالي مش معقول هنيجي على دي نطبقها
يبقى احنا في البداية بنتكلم عن واحد قرر انه يغير دينه لأسباب هو شايفها وجيهة واسباب دينية ومالهاش علاقة بالامور الدنيوية خالص
انا بشوف ان من حق اي واحد انه يعمل كدة في اطار من الاحترام وعدم تجريح لاصحاب الديان الاخرى
انما بقى:
وهنا بنييجي لمربط القصيد
:
ابقى راجل مسلم وبحب فتاة مسيحية فأقرر اننا اتنصر علشان اتجوزها او ابقى بنت مسيحية مثلا وبحب جارنا المسلم فأقرر اننا ادخل الاسلام علشان نتجوز وتكتمل قصة الحب ونخش انا وهو التاريخ...ونغير بياناتنا ونغير اسامينا وندمر بالمرة اهالينا ونهرب ونعمل فتنة طائفية والدنيا تتقلب وكل دة علشان العصفورين بيحبوا بعض ونفسهم يعيشوا في تبات ونبات
وفجأة
يختلف الحبييبين لسبب او لأخر وينفصلوا فيتحول الدين اللي انا اتحولت ليه علشان حبيب القلب لدين مش مُقنع واني كنت مُخدر او مُغيب عن الوعي وعايز ارجع لديني لاصلي تاني؟!!!!!!
لا بقى معلش.....سوري...هنا بقى اقف عندك انت وهي...الديانات مش لعبة علشان اتنقل بينها...دي مش شركات بفاضل بينها وعايز اتوظف في واحدة منها فبشوف مين الأحسن؟لا دة ديـــــــــــــــــــن وعقيدة وماينفعش ابدا اني العب بالاوراق لشان اتجوز واحدة ولا علشان انا مسيحي ومش عارق اطلق مراتي يبقى اسلم احسن ولا علشان انا مسلم وجارتنا المسيحية عاجباني ولازم اتجوزها يبقى ارتد واتنصر علشان نتجوز.....هنا بقى دي انا بسميها جرااااااايم
مش كفاية ان الداخلية ماتغيرش البيانات دي لازم الاشخاص دي تتحاكم بتهمة العبث بالديانات السماوية
انا بأويد حكم المحكمة دة لأنه راعى ابعاد كتيرة قوي وانه لا يمكن العبث بالاديان السماوية على الاطلاق
من حقك انك تغير دينك لكن مش من حقك ابدا انك تتعامل مع دينك كما لو كنت بتغير عربيتك او الشقة اللي انت ساكن فيها مش عاجباك يبقى ننقل لشقة تانية ونسيبها بعد فترة وهكذا
الدين دين....بعيدا عن حسابات العاطفة والجواز والطلاق
احترموا دياناتكم....حتى لو مش متدينين بس يكفي انك تكون بتعبر بشكل جيد عن الديانة اللي انت بتنتمي ليها
انما اللعب بالدين هو اللعب بالنار....وطبعا كلنا عارفين مصير اللي بيلعب بالنار

fb comments

wibiya widget

LinkWithin

Related Posts with Thumbnails