Saturday, 31 March 2007

حاجة تنقط.....تفرس


قلت النهاردة انا هكتب وانا ماشي في الشارع
هتقولوا ازاي.......اقوللكم
وانا قاعد كدة مع نفسي اكتشفت ان انا سريع الاستفزاز قوي....واني لو فضلت اُستفز بنفس المعدل دة انا ممكن يجيلي جلطة في خلال سنتين من دلوقتي.
قعدت برضة كدة و قلت طيب انا ايه اللي بيستفزني في الشارع؟!!!!وهل الحاجات اللي بتنقطني دي تستحق كدة؟ ولا انا اللي محبكها شويتين؟!!!!
قلت افضفض وافك عن نفسي لعل وعسى حد يرد عليا ويقول لي انت غلطااااان....دي حاجات بسيطة او حد تاني ييجي يقول: والله يابني انت معاك حق دي حاجة تنقط
لما تبقى ماشي في الشارع ومعاك والدتك او اختك او مراتك او خطيبتك او حتى مش معاك حد بس في بنات ماشية في الشارع جنبك وتلاقي اتنين شباب او اكتر بيشتموا بعض بالأم وياريت كدة بس دة بألفاظ اقسى انواع القذارة.
ياترى بيكون شعورك ايه؟ على فكرة الشتيمة دي بتختلف تماما لما بتسمعها في مكان مفيهوش بنات او سيدات....بس وجودهم في مكان بيتسمع فيه شتايم بالمستوى دة بتكون محرجة جدا.
لما تنزل تركب عربيتك وانت متأخر كدة او وراك ميعاد مهم جدا وتفاجأ بحد لطيف خفيف كدة قافل بعربيته على عربية سيادتك لا وكمان سيادته شادد فرامل اليد بتاعة عربيته وولا في دماغ جنابه ان في بني أدم من حقه يروح شغله او يقضي مشاويره.
قمة النرفزة بقى بتكون لما يجيلك وعلى وشه ابتسامة صفرا كدة وولا يعبرك وكأن مفيش حاجة حصلت اساسا.
لما تروح اي مول تجاري او مصلحة حكومية او اي مكان في اي شارع في مصر وتركن عربيتك وتفاجأ كدة من حيث لا تدري بشخص عجيب كدة واقف جنب عربيتك وبيقوللك وعلى وشه ابتسامة جميلة: 2 جنيه يا بيه
هو مااكتفاش انه بيطلب فلوس انت شخصيا مش عارف مقابل ايه!!!!!!لا وكمان حدد قيمة الفلوس دي ب 2 جنيه.........منتهى الثقة
لما تلاقي الشارع واقف لأن فيه ميكروباص واقف بينزل ركاب او بيحمل ركاب في نص الشارع بالضبط ووراه ييجي 10 عربيات كلها قالبة الدنيا وتلاقيه منتهى الثقة والثبات وكأنه ماشي بمبدأ "القافلة تسير والكلاب تعوي"......وممكن كمان تتنقط اكتر لما تلاقي امين شرطة او عسكري واقف على بعد امتار منه ولكنه مش شايف او الأصح انه عامل مش شايف.
لما تلاقي كل محل حاطط طوبتين كبار كدة حلوين قدام المحل بتاعه علشان محدش يقف بعربيته قدام المحل....لأن دة من وجهة نظر صاحب المحل تقريبا هيسد ابواب الرزق.....وعلى الرغم من ان في حاجة في مصر اسمها (شرطة المرافق) الا ان واضح انهم مش واخدين بالهم من الموضوع دة على اساس انهم مابيبصوش للهيافات دي
لما تلاقي شلة شباب ماشية مجموعة وعمالين يجعروا في الشارع ويغنوا باصوات اقرب الى الصراخ....انا مش عارف دي طاقات مكبوتة ولا ايه؟
لما تلاقي بنات ماشين في الشارع لابسة من غير هدوم ومنتهى المياعة والخلاعة بس لو حد جة يتكلم معاها يا معلم بتلاقيها تقمصت شخصية خضرة الشريفة وبتحسس الولد اللي جه يكلمها انه بيكلم قديسة على الرغم ان لبسها مايدلش على كدة ابدا.....مش ليك حق تتنقط
وبالمناسبة الموقف دة بيفكرني ببعض ممثلاتنا الجميلات اللي لما حد بيسألهم على ادوار الاغراء اللي بيقدموها....بتلاقي الاجابة الأكلشيه المحفوظة عن ظهر قلب واللي اعتقد ان الصحفي هو اللي بيكتبها لهم بالنيابة عنهم:
"انا برحب بادوار الاغراء الموظفة في السيناريو واللي لها ضرورة درامية بمعنى اني مش معقول هظهر ع البحر الا بالمايوه"
على الرغم ان مش كل اللي بيقعدوا ع البحر بيكونوا لابسين مايوهات بس هم ردهم بيكون كدة......بالذمة مش حاجة تنقط
لما تلاقي الشرطة سايبة البانجو بيتباع في اماكن هم عارفينها كويس ومع ذلك مابيظبطوهاش وتلاقي حملة امنية في ارقى شوارع المدن و1/2 الشباب اللي في الشارع دة ملمومة في البوكس.......حاجة تنقط
لما تلاقي بعض الطرق في مصر اللي المفروض انها سفر وبتربط بين محافظتين وتلاقي اقصى سرعة للسيارات الملاكي 60 كم في الساعة (اجزاء من طريق القاهرة الاسكندرية الزراعي) معقول في القرن ال 21 والتطور الرهيب في السيارات والطرق في العالم كله واحنا لسة بنمشي على 60......مش حاجة تفرس
لما تلاقي الجرايد مرطرطة عند بياع الجرايد مش لاقية حد يشتريها في نفس الوقت اللي تلاقي محلات الفول والطعمية عامرة بالناس ومش ملاحقة ع الطلبات
يبقى في حاجة غلط في الشعب دة
ولسة كتير قوي والله......دة شارعنا المصري ملياااااااااااااااااااااااااااااااااااان مفارقات ومضحكات ومبكيات بس الظاهر ان انا كبس عليا النوم
بس ان شاء الله لينا اجزاء تانية وياريت اللي عنده عوامل ومسببات جلطات زي اللي مكتوبة فوق دي يقولها واهو نحط همنا على هم بعض ويمكن تكونوا شايفين حاجات تفرس وتنقط انا مش واخد بالي منها......فنشجع بعض
رحمتك يارب


Thursday, 29 March 2007

الأشقاء.........تاني

نشرت من يومين هنا الخبر اللي بثته وكالات الأنباء عن اللي حصل للفريق الأوليمبي السعودي لكرة القدم في استراليا وعن الإهانة الكبيرة اللي تعرضوا ليها في المطار والتدقيق اللي حصل لهم في التفتيش واصرار السلطات الأسترالية على ضرورة غسل احذيتهم الرياضية بحجة انها متسخة, وبعد إنتهاء الأجراءات الخاصة بالمطار قامت السلطات الاسترالية بتسكينهم بفندق 3 نجوم بجوار مقبرة.
وابديت طبعا سعادتي باللي عملوه الاستراليون في بعثة السعوديين لأني اعرف السعوديين كويس واعرف انهم يستحقوا اكثر من كدة كمان.
ولا اخفي غضب عدد من اللي قرأوا الموضوع دة من ان الشماتة لا تليق ابدا وانهم عرب ومسلمون وان ماحدث معهم في استراليا ممكن يحصل معاك انت كمان بما انك عربي ومسلم.
ولا انكر برضة ان عدد من قراء الموضوع تعاطف معايا وشاركني مشاعر الفرح في الأشقاء السعوديين.
وكنت قررت اقفل ع الموضوع وكفاية كدة لحد ما حصل حاجتين...ومن عجائب القدر ان الحدثين اللي حصلوا رسخوا جوايا فكرة ان الناس دي عار على الإسلام والمسلمين وان حلال اللي بيحصل ولسة هيحصل فيهم:
طبعا أول حدث هو ان كلب سمو الأمير السعودي اللي مقيم عندنا هو وحاشيته في احد فنادق 6 اكتوبر عضت مواطن مصري غلبان....ليضاف لضحايا الامير وسموه وكلابه...ودول بالمناسبة بالمئات ومرشحين للزيادة بشكل مستمر.
بس دة حدث قُتل بحثا زي ما بيقولوا وواضح ان مفيش فايدة وواضح برضة ان شعار المرحلة (القافلة تسير والكلاب تعوي) بس طبعا المقصود بالكلاب هنا مش كلب الأمير ترك لا سمح الله انما المقصود بالكلاب هو احنا اللي بنعوي وبنطالب الحكومة المصرية بإحترام أدمية مواطنيها الغلابة وإتخاذ اي إجراء مع سموه.......لو خايفين تطردوه من مصر...بلاش.....بس حتى زعقوله قولوا له ما يصحش كدة.
ع العموم دة مش موضوعنا....موضوعنا بقى عن:
مواطنة مصرية تزوجت من سعودي هنا في القاهرة......وسافروا يعيشوا في السعودية وطبقا لوعد العريس مع اهلها كان المفروض يجيب لها شقة........طبعا في المشمش
السعودي.......بعد ما زهق منها رفض الإعتراف اساسا بالزواج وقال انا ماعرفهااااااااااااااااااااااااااااااااااااااااااااااااااااااااااااااااش
تخيلوا......حتى مش انا هطلقها ولا انا مش عايزها ولا حتى مش هاجيب لك شقة....لا دة بيقول انا معرفهاش
المهم ان الزوجة رفعت قضية في المحكمة ولم يكن معها من الإثبات للزواج دة إلا 200 صورة لحفل الزفاف اللي تم في القاهرة....قدمتهم للمحكمة وجابت شهود من الجيران اللي اقروا انها زوجته.
تخيلوا الزوجة واهلها قاعدين فين طوال مدة المحاكمة؟!!!!!!!!
في التوقيف
والتوقيف دة يعني السجن....مقعدين المظلومين واللي ضايع حقهم في السجن وسايبين الجاني حر في بلده....لا وكمان دة عمل لهم خروج نهائي وبلا عودة مستغلا سلطته ككفيل
لا حول ولا قوة إلا بالله العلي العظيم.........قمة الظلم والإفتراء
المظلوم في السجن....والظالم حر طليق وبيطالب بطردهم برة السعودية
عموما سلموا لي على الأشقاء....ووالنبي العالم اللي هرتني كلام ع الأخوة والحاجات دي يبطلوا بقى لأن واضح كدة ان بلاوي السعوديين معانا كتير قوي وما خفي كان أعظم
دة الخبر كما نشرته العربية نت.....اسيبكم معاه علشان تستمتعوا بتصرفات الأشقاء:

بعد إخفائه عقد النكاح ونكرانه للزواجمصرية تقدم 200 صورة للقضاء لتؤكد زواجها من سعودي
المصرية نشوى مع زوجها

الدمام ـ عبدالله فرحه
لم تجد المصرية "نشوى" وسيلة لإثبات أنها على ذمة زوجها السعودي "مشعل"، الذي أخفى عقد النكاح، إلا 200 صورة فوتوغرافية وثلاثة أشرطة فيديو لحفل الزفاف لتقدمها إلى قاضي المحكمة الشرعية الكبرى بالدمام الشيخ عبد الرحمن المليفي.
و تقول الزوجة "لقد أخفى مشعل عقد النكاح وأنكر معرفته بي في بداية حضوره للمحكمة ولكنه تراجع بعد أن عرضنا الصور على قاضي المحكمة الشرعية وعند مواجهته قال أنها صور خطوبة فقط".
وتضيف نشوى :"تزوجنا في مصر بتاريخ 5/7/2002م بحضور والد ووالدة زوجي مشعل وعدد من أقاربها وكل أهلي وأقاربنا بمهر خمسين ألف ريال ومؤخر مئة ألف ريال، وقضينا شهر العسل في القاهرة، وعدنا سويًا إلى المملكة وأسكنني في شقة والدتي بالدمام لمدة 6 شهور، لكنه قام بإخفاء العقد وأنكر الزواج مني فتقدمت للمحكمة الشرعية مطالبة إثبات زواجنا أو الحصول على الطلاق ولكنه يرفض كل ذلك".
أما والدة نشوى، "آمال محمد سيف الدين عاكف"، فتقول "عملت خمسة وثلاثين عامًا في المملكة كممرضة بوزارة الصحة وزوجي يرحمه الله (سامي أحمد عفيفي) عمل لدى هيئة سكة الحديد وعند انتهاء خدماته من السكة طلب منا البحث عن كفيل ووجدنا في حينها مشعل الذي وافق على نقل كفالة زوجي بمهنة سائق خاص وبعد فترة طلب يد ابنتي نشوى ورحبنا به لكن ظهرت مشكلة الحصول على موافقة جهة عمله التي لا تسمح له بالزواج من أجنبية فاقترح علينا السفر إلى القاهرة وإتمام مراسم الزواج وتم الزفاف وسط الأهل والجيران والأقارب وعدنا جميعًا إلى المملكة لكن بعد أن طالبناه بتأمين شقة لابنتي ماطل كثيرًا إلى أن أنكر زواجه منها".
وتضيف "في هذه الأثناء توفي زوجي متأثرًا ومتألمًا فقد أجريت له عملية في القلب بمستشفى الملك خالد بالرياض".
وطلب القاضي عبد الرحمن المليفي، القاضي بالمحكمة الكبرى بالدمام، شهادة جيران الطرفين وحضروا وأفادوا بشهادتهم التي تصب في مصلحة الزوجة نشوى كما طلب شهادة اثنان من الحضور للزفاف في القاهرة مصدقاً من قنصلية المملكة ولكنها تأخرت ولم تصل حتى الآن.
ومن جهتها، حاولت السفارة المصرية في الرياض المساهمة في إقناع الأسرة بالسفر إلى القاهرة والمطالبة عن طريق السفارة السعودية مع إعطاء الأسرة مهلة أسبوعين لمراجعة المحكمة.
لكن الأم ونشوى وشقيقتيها (دالي) و (نيفين) يرفضن المغادرة قبل إثبات الزواج أو الحصول على الطلاق المصدق شرعًا وفضّلن البقاء في سجن إدارة الوافدين خاصة أن الزوج (مشعل) طالب بترحيلهن بعد عمل خروج نهائي، وهذا يعني عدم قدرتهن على الانتظار إلى حين انتهاء القضية وسط اختيار الأم وبناتها البقاء في التوقيف لحين الحصول على الطلاق أو إثبات الزواج

رسالة إلى سبايك

وبعدين يا جماعة في اللي طالق كلابه ع المصريين وعمالة تهبش فيهم دة.
معقولة كدة؟دة كدة المصريين ممكن ينقرضوا....كل شوية (سبايك) وبالمناسبة دة اسم الكلب بتاعه يهبر لنا مواطن جديد.
معقول الكلام دة يا (سبايك) يا أخي...عيب كدة دة احنا حتة غلابة زي بعض
طيب هو مش بيأكلك لحمة إحنا ذنبنا ايه يا أخي؟!!!
وبعدين ما تجرب يا عم تهبر لك حتة لحمة سعودي كدة حتى هتلاقيها لحمة سمينة ومتغذية مش لحم المصريين الغلابة اللي عمال تتسلى عليهم.
نفسي اعرف يا (سبايك) انت ايه اللي عجبك في لحم المصريين؟!!!!طب دة 4/3 الشعب الغلبان دة عنده انيميا وفقر دم وفيروس سي.....أوعى تفتكر يا (سبايك) يا حبيبي ان انا مستخسر فيك اللحمة لا سمح الله .......لا أبدا كل الحكاية ان انا خايف عليك وعلى صحتك ونظامك الغذائي اللي مولانا بيحرص عليها اشد الحرص.
هو اي نعم معدش بيأكلك لحمة زي زمان وسايبك تقلب رزقك بقى وتتسلى على المصريين يوم بعد يوم.....لكن انا ادرى بمصلحتك وباقول لك جرب كدة تهبر لك أي جنسية تانية....طيب دة انت يا أخي قاعد في فندق 5 نجوم وكله اجانب وجنسيات اشكال والوان وناس متربية ع العز بجد, تقوم سايب كل الناس الحلوة دي وتهبش شوية مصريين لا حول لهم ولا قوة؟!!!!بجد مالكش حق
وبعدين في مشكلة كمان يا سبايك انت مش واخد بالك منها وهي ان المصريين من عضاتك يا عم ممكن يجيلهم داء الكلب ويهوهوا بقى ويعملوا دوشة وبالتالي سُموُه ينزعج ومزاجه يتعكر ودة مش في صالحك.
ولا تكونش يا (سبايك) موالس مع أخوانا بتوع زيادة السكان وتنظيم النسل والكلام دة على أساس ان انت تكون أحد وسائل تخفيض أعداد الشعب المصري...ماهو انت لو أكلتلك واحد كل يوم يبقى انت هتقوم لوحدك ب 365 مواطن في السنة هتكون انت سبب في إرسالهم بعثة للآخرة , وممكن كمان العدد دة يزيد شوية لو شديت حالك كدة واخدت لك 2 او 3 مواطنين أبرياء كل يوم.
ولا تكونشي يا عم (سبايك) يا لئيم قابض من مستشفى الكلب على أساس ان أنت تورد لهم زباين كل يوم وتبقى عمولتك محفوظة عضمة كل يوم.
عموما يا عم ماتزعلش انا بهزر معاك بس ابقى حاول تجرب نوع تاني من اللحم نوع كدة يكون سمين ومتربي ع العز وع الغالي....ماهو مش معقول يا عم سبايك الغلابة ياكلوا بعض...........وبعدين ياعم المصريين اللي انت عمال تتسلى عليهم واحد ورا التاني دول هيلاقوها منين ولا منين؟!!! هيلاقوها منك ولا من (السلعوة) ولا من عساكر الأمن المركزي اللي بيهروا لهم بدنهم دول كل ما تيجي فرصة.
تخيل يا (سبايك) اني انا حاسس إني فاهمك غلط.....دة انت طلعت قلبك طيب بشكل يا أخي
إنت لقيت ان فلوس الأمير كتيرة وبيصرفها على حاجات ما تستاهلش قلت ان المصريين أولى فقررت أنه يدفعها على هيئة تعويضات للي انت بتهبرهم يا نمس.
شفت بقى انا فهمتك ازاي......؟
عموما يا (سبايك) اوعى تزعل مني أنا مش حِمل عضة منك يا عم
وعلى رأي المثل:
يانحلة لا تقرصيني........ولا عايز عسل منك

Tuesday, 27 March 2007

كما تدين تُدان

(واجهت بعثة المنتخب الأوليمبي السعودي مواقف غريبة عقب وصولهم لمطار أدليد في أستراليا إستعدادا لمواجهة المنتخب الأسترالي يوم الأربعاء المقبل في تصفيات دورة الألعاب الأوليمبية، إذ تعرضت البعثة لحملة تفتيش واسعة كما قامت سلطات الأمن في المطار بإجبار اللاعبين على غسل أحذيتهم في المطار قبل الدخول بها إلى أستراليا.وذكرت صحيفة الرياض السعودية يوم الاثنين أن لاعبي المنتخب الأوليمبي تعرضوا إلى تأخير كبير في مطار ادليد وذلك لعملية التدقيق المفاجئة التي قامت بها السلطات هناك، وحملة التفتيش الواسعة على جميع حقائب اللاعبين، كما قام جهاز الأمن الخاص بتفتيش حقائب المسافرين على إجبار اللاعبين السعوديين على غسل أحذيتهم الرياضية الخاصة بالتدريبات وذلك بحجة اتساخها مما أثار حفيظة واستياء كافة أعضاء البعثة السعودية.وبعد ذلك، قام الاتحاد الأسترالي لكرة القدم بتسكين البعثة السعودية في فندق ثلاث نجوم يقع مباشرة بجوار مقبرة.يذكر أن المنتخب السعودي الأوليمبي يحتل حاليا صدارة المجموعة الرابعة برصيد ست نقاط جمعها من إنتصارين متتاليين، بينما يأتي منتخب أستراليا في المركز الثاني برصيد نقطتين من تعادلين)
الخبر دة لقيته هلى موقع في الجول الالكتروني من يومين.
مشاعر متناقضة انتابتني بعد قرايتي للخبر دة وكلها مشاعر غريبة جدا يعني حزن وفرح, رغبة في نشر الخبر في كل مكان ورغبة برضة اني أداري الخبر دة من باب إذا بليتم فاستتروا.
نبدأ الأول بمشاعر الفرح وهي بالأحرى مش مشاعر فرح قوي انما مشاعر شماتة , ايوة بقولها بكل صراحة هي مشاعر شماتة.
طبعا ممكن عدد كبير جدا من اللي بيقروا الموضوع دة دلوقتي يقولوا استغفر الله العظيم.....إلا الشماتة يابني...دول برضة مسلمين زينا وعرب كمان وعيب كدة...وممكن كمان اللي حصل لهم في استراليا دة يحصل لأي فريق مصري.......الخ
كل الكلام دة على عيني وراسي انما اللي سافر السعودية او شاء حظه العاثر انه ينزل اي مطار في السعودية هيعرف كويس قوي انا بقول اني شمتان فيهم ليه.
السادة السعوديون العرب المسلمون بيقسموا الناس لطبقتين مالهاش دعوة بالعروبة ولا بالإسلام في شيء.
بيصنفوا الناس لخليجيين مواطني مجلس التعاون الخليجي وغير خليجيين اي دول اخرى وطبعا كلمة دول أخرى دي بقى بيستوي فيها المصري ع الهندي ع التنزاني ع التونسي ع التشادي المسلم منهم على المسيحي على الكافر على الهندوسي.
يعني لو سيادتك مش مواطن خليجي وقررت تروح السعودية اعرف كويس قوي ان انت انسان من الدرجة التانية
لا وكمان انت مش من الدرجة التانية انت مواطن من الدرجة التالتة علشان الأوروبي والأمريكي وكمان الأسترالي أرقى منك بكتيــــــــــر.
طبعا التصنيف دة من بداية ما تنزل من الطائرة على اساس ان في منفذ جوازات للخليجيين ومنفذ جوازات تاني لبقية الجنسيات.
انا افهم ان يكون منفذ جوازات مخصص للسعوديين ومنفذ جوازات لأي جنسية تانية انما يصنفك على اساس انك خليجي او لا.....دي حاجة غريبة جدا.
ممكن بقى تقيس الكلام دة على كل التعاملات جوة البلد دي ومن ضمنها حرية التنقل بين دول مجلس التعاون الخليجي اللي موهومين بيه اللي مقصورة على أبناء البطة البيضة اللي هم طبعا دمهم راقي انما ابناء البطة السودة اللي هم بقية خلق الله فدول من وجهة نظرهم المريضة انهم دمهم ملوث مفيهوش بترول.
طبعا اللي حصل لهم في استراليا خلاني اهلل طربا وفرحا لأن الأستراليين فهموهم كدة ان زي مانتم بتصنفوا الناس احنا كمان عندنا تصنيفنا (اللي هو غلط طبعا بكل المقاييس) انما زي مانت تقدر تصنفني انا كمان ممكن اصنفك ان انت ارهابي.
عادي جدا
وعجبتني جدا حكاية اغسلوا احذيتكم دي......منتهى الذل والإهانة و كويس قوي انهم ما اتفتشوش ذاتيا.
معلش انا عارف ان كلامي دي هيُغضِب عدد كبير من اللي هيقروا الموضوع دة...انما صدقوني اللي شاف غير اللي سمع واللي راح البلد دي اللي المفروض انها عربية اسلامية هيعرف كويس قوي سر السعادة والشماتة اللي انا فيها دي.
طبعا انتابتني برضة مشاعر حزينة على حال المسلمين وعلى اللي بيحصل فيهم في مطارات ودول العالم...ومش هقول حال العرب كمان لأني مش مؤمن بفكرة القومية العربية دي أساسا بس مش دة موضوعنا دلوقتي.
انما اللي بيحصل للمسلمين الأيام دي على أيد الغرب إنما هو حصاد ما زرعناه او ما زرعه حكام المسلمين وأذا اردنا تغيير نظرة دول العالم لينا يبقى لازم من الأول نغير نفسنا
وغير كدة..................مفيش فايدة

Monday, 26 March 2007

ليلة التعديل

لما الضرب والسحل والاهانة دي كلها للمعارضين والمتظاهرين ودة كله والتعديلات الدستورية دي لسة لم تقر, اومال لما بقروا التعديلات البوليسية دي هيعملوا فيهم ايه؟!!!!!!
كرم جبر وعبد الله كمال ملعلعين في التليفزيون.....واحد على دريم والتاني ع النيل للأخبار....طبعا ماهي ليلتهم ولازم يحيوها بيفكروني بالجزارين لما بيكون مشغولين جدا في العيد
هم فعلا كدة....هما الجزارين بس للأسف احنا الضحية.
قعدت اتخيل كدة لو النهاردة الاحد بالليل طلع الرئيس المبارك حسني مبارك وقرر سحب التعديلات الدستورية دي وتأجيل الاستفتاء دة ومراجعة المادتين 88 و 179 انصياعا لرغبة الأغلبية الساحقة للشعب المصري....
اللي همني في الموضوع اني اشوف منظر المطبلاتية والمبرراتية اياهم اللي استماتوا في الدفاع عن المادتين دول هيقولوا ايه لما يتلغوا؟!!!!
انا لا اشك لحظة واحدة انهم برضة مجهزين تبريرات لالغائهم
الشعب المصري دة اعتقد انه الشعب الوحيد في الدنيا اللي يقدر يقنعك بالشيء وفي 5 دقايق يقدر يقنعك بعكسه تماما.
ياسلام بعد 10 او 20 سنة وانت قاعد كدة مع عيالك الصغيرين وبتتفرج على فيلم عربي وجه مشهد ضابط وعساكره جايين يقبضوا على واحد فالراجل بيسألهم السوأل الخالد في السينما المصرية:(معاك إذن من النيابة؟)
طبعا ابنك بحسن نية هيسألك:(يعني ايه كدة يا بابا؟) يعني (ايه إذن من النيابة؟)
سيادتك هترد عليه تقول له ايه:
دة يابنى كان كلام فارغ تضييع وقت وورق ع الفاضي لكن في ناس محترمة كدة جت وشافت ان الكلام دة كلام فارغ وقلة ادب وقررت تلغيه علشان يبقى من حق عمو الضابط يدخل بيتنا دلوقتي ويسحلني ويجرجرني من قفايا ويضربك يابني يا حبيبي بالجزمة علشان هما ادرى مننا بمصلحتنا
بعد التعديلات اياها:
مجموع كلية الشرطة بقى اعلى بكتير من طب وصيدلة واقباااااال غير مسبووق على الالتحاق بكلية الشرطة والاهالي بيقولوا لا يمكن نضيع مستقبل عيالنا وندخلهم طب........الشرطة هي الأماااااااااااااان

Saturday, 24 March 2007

رياضة وأشياء أخرى

كل ما بشوف شوبير في الكورة مع دريم...........افتكر التعديلات الدستورية
ربنا ينتقم منك يا بعيد ويجازيك على اللي عملته في بلدك و ناسك...........ياأناني
طبعا اذا كان رب البيت بالدف ضارب......فشيمة اهل البيت الرقض
لما تلاقي صورة القائد الزعيم متصدرة واجهة جميع الأستادات والملاعب الرياضية في مصر بدون اي سبب (عمري ما شفت كدة في اي بلد محترم او غير محترم.....حتى افريقيا والله العظيم مفيش فيها الكلام دة)
يبقى مش غريب ابدا ان احنا نلاقي رئيس الاسماعيلي حاطط صورته في قلب استاد الاسماعيلية (والله حصلت) ولا نلاقي الاخ شوبير حاطط يافطة ليه ورا الجون في ماتش الأهلي وطنطا (حصلت برضه)
ممكن برضة نلاقي رئيس النادي المصري استقل بالأستاد واعلن انه اشتراه او نلاقي رئيس نادي الترسانة كتب النادي لأبنه بيع وشرا (محصلتش.....بس ممكن تحصل)
اتحاد الكورة المصري دة غريب جدا.....تحس انه مكتوب بأسم اتنين وعاملينه شركة مابينهم سمير زاهر و الدهشوري حرب
واحد يمشي....التاني ييجي....واحد ينحل.....التاني يتعين
يعني هي جت على اتحاد الكورة.....ما البلد كلها ماشية كدة
مرتضى منصور دة بني أدم عجيب......اللي متابعه ومتابع تصريحاته تلاقيه بيلطش في الكل مابيهمهوش بس بيوصل لنقطة معينة ويتحول ل....قطة
أخره في النقد والشتايم هو أحمد نظيف...فوق كدة ماتلاقيش خلاص بيتحول الموضوع لمناشدات وانه واثق من حكمة الرئيس وان الرئيس ما يرضيهوش الكلام دة والحاجات دي
بيفكرني بأثنين من الصحفيين الكبار مصطفى بكري وعادل حمودة.....الاتنين دول سقفهم برضة رئيس الوزراء و فوق كدة ماتلافيش يا معلم
بيضربوا برضة مناشدات ومطالبات وثقة في حكمة القائد والكلام الجامد دة.
سمعت ان رئيس الجمهورية رغم مسئولياته الجسيمة اتصل برئيس اتحاد الكرة سمير بك زاهر وابدى له قلقه على احوال نادي الزمالك.
فيه الخير

Thursday, 22 March 2007

اطلع البلكونة

يا جماعة احنا بجد حارقين دمنا بشكل مش طبيعي وممكن معظمنا يطق وينفجر وبالتالي يموت والنص التاني ممكن يصاب بشلل نصفي او قليله ان ما عاش بقية عمره بعاهة مستديمة.
قاعدين نحرق في دمنا ونقول نقاطع ولا نروح الإستفتاء بتاع الإثنين اللي جاي ومناقشات سخنة وحامية وحاجات تحرق الدم وناس عمالة تتشنج وتقول المقاطعة هي الحل والتاني يرد عليهم ويقول لهم : لا انما المشاركة هي الحل ولازم نوريهم ان احنا لينا رأي وكلام كبير عن التاريخ ولازم نقول كلمة للتاريخ وحاجات كدة كتير.
وتسيب جهاز الكومبيوتر بتاعك وتفتح التليفزيون تلاقي اللوجو الظريف اللي حطينه على قنوات تليفزيون الحكومة (تحديث دستور مصر) وتلاقي الجوقة اياها بتاعة الحزب الوطني عاملين قعدة كدة صغيرة ع القناة الأولى والفضائية وقاعدين يغنوا ويردوا على بعض وتقرر بقى تقلب المحطة وتلاقي الجزيرة بتعرض في نشرتها الإخبارية الغليان اللي في جامعة القاهرة ومظاهرات الطلاب الرافضة لتمويت مصر والمصريين.
تلاقي بعد دة كله إن دماغك غليت وولعت اكتر..........................................................
عايز بقى تخرج من المووود دة؟
اعمل زي ما انا عملت
طلعت البلكوونة
اه بجد بس كدة:
اطلع البلكونة
واتفرج بقى على الشعب اللذيذ ابو دم خفيف اللي مش في دماغه
بنات على سنجة عشرة وصبيان وشباب آخر حلاوة و نعنشة وعربيات احدث موديل طالع منها اصوات كاسيت واكوالايزارات وحاجات جامدة جدا, وناس ماشية بتغني وناس تانية ماشية بتتناقش بصوت عالي وبحرقة دم قلت اكيد دول بقى بيتكلموا عن التعديلات الدستورية اياها, اتاريهم بيتكلموا عن فرصة الزمالك في الفوز على الأهلي في ماتشهم اللي جاي في الدوري.
ومحلات عاملة تخفيضات وناس عمالة تتفرج وتشتري ومحلات اكل مليانة على آخرها.
هيصة وزحمة وناس ولا في دماغها والله لو وقفت 10 اشخاص في الشارع وسألتهم تعرفوا ايه ع التعديلات الدستورية؟
هتلاقي 8 منهم ع الأقل فتح بقه وبرق بعينه كدة وقال لك انت مجنون ولا ايه؟ ايه الكلام الغريب اللي انت بتقوله دة؟!!!
كل ما تقف في بلكونة بيتكم اكتر....كل ما هتنسى الهم والغم والتعديلات والبلاوي دي كلها وهتعيش في موود تاني خالص....موود ناس شايفة ان الحياة حلوة بس نفهمها وشعارهم:
ياعم سيبك......اهي ماشية

نراهن على مين بس؟

مش عارف ايه المخرج من اللي احنا فيه دلوقتي؟ لقد وصلنا لمرحلة رهيبة من اليأس وفقدان الأمل.وصلنا لمرحلة اننا نبصم بالعشرة ان مفيش فايدة
مفييييييييييييييييش فايدة
لو راهننا ع الناس اديكم شايفين الناس في مصر عاملة ازاي؟ موضوع التعديلات الدستورية دي مش في دماغها خالص يا اما علشان هم جهلة ما يعرفوش حاجة عن الموضوع دة اساسا
يا اما علشان هم متعلمين بس للاسف مش فاهمين اصلا يعني ايه تعديلات دستورية من الاساس وكل علاقتهن بالدستور تنحصر في انها جريدة بتطلع كل يوم اربعاء ويا ريت في ناس كتير عارفين المعلومة دي كمان
يا اما الحياة طحناهم وبيشوفوا التعديلات الدستورية دي رفاهية لا يستحقوا مناقشتها فالسياسة من وجهة نظر عدد كبير جدا من ابناء هذا الشعب هي رفاهية ووسيلة للتسلية بيقوم بها الناس المرتاحة في حياتهم مش احنا المطحونين (دة طبعا على حد قولهم)على الرغم من ان لب الحياة واساس توفير لقمة العيش اللي بيجروا وراها دي هي التعديلات الدستورية بس تكلم مين وتفهم مين
وهكذا تحول الشعب المصري لناس مش فاهمة حاجة اساسا ودة الحكومة بتراهن عليهم وعلى حشدهم يوم الاستفتاء ودول للاسف هم الاغلبية في القرى والنجوع والكفور
وناس فاهمة طشاش بس مالهاش دعوة بالسياسة ولا هتروح ولا هتيجي يوم الاثنين 26 مارس وشعارهم في الحياة يا عم سيبني في حالي هو انا ناقصك؟!!!!
وناس فاهمة وعارفة كويس قوي بس بيمثلوا ابرة في كوم قش وتقدر تقول عليهم بتاع الف او الفين او نقول حتى 100 الف بس دول يعملوا ايه وسط 70 مليون مواطن
طيب نراهن على مجلس شعب بيمثل الشرفاء فيه ربعه تقريبا والباقي عايش على مص دم الغلابة ومص دم الوطن ,الناس انتخبتهم مستقلين وراحوا راقعين الناس حتة قفا بعد مانجحوا وراحوا مرميين في احضان الوطني
طبعا دول ما ينفعش نراهن عليهم
طب نراهن على شرطة تخلت عن وظيفتها اللي بنقراها في الكتب وبنشوفها في افلام زمان وقبل كدة شافت ان شعار الشرطة في خدمة الشعب شعار غير لائق وقررت تغييره لان السادة البشوات مش ممكن يمونوا في خدمة رعاع
نراهن طيب على مين؟
على القضاء؟ بس دول خلاص خرجوا برة اللعبة من زمان وهيبقى اشرافهم ع الانتخابات ذكرى جميلة من ذكريات التاريخ الجميل.
نراهن على مين بس علشان التغيير؟
نراهن على امريكا؟ حتى دي شالت ايديها هي كمان وقررت ان الاستقرار بالنسبة لها اهم بكتير من نشر ديمقراطية في شعب من الكسالى مش عايزين يساعدوا نفسهم
مين طيب اللي هيخلصنا من اللي احنا فيه دة؟
مفيش غير اننا نراهن على تصاريف القدر لعله يكون رحيم بنا
يارب
احنا فعلا نستحق الرحمة
فأرحمنا يا ارحم الراحمين

Sunday, 18 March 2007

هلاوس بترولية


وانا قاعد كدة قعدة حلوة ساعة عصاري تخيلت حاجة كدة نقدر نقول عليها هلوسة بس قلت اتخيل كدة واشوف الدنيا دي هيكون شكلها ايه ساعتها:
تخيلت ان البترول خلص من الدول الخليجية والعراق وصحيوا الصبح من النوم يضخوا بترول مالقيوش لتر واحد حتى في الارض........تفتكروا ايه اللي ممكن يحصل ساعتها طبعا بصرف النظر عن النتائج الاقتصادية والدولار والين والكلام الكبير اللي ما بفهموش دة:
اولا:امريكا هتقرر انها تنسحب فورا من العراق دون قيد او شرط وهتقول لهم جتكم نيلة بلد فقري انا عارف ايه اللي كان خبطني في نافوخي واحتليتكم من اساسه.
لا وكمان قبل ماتمشي هتسيب لهم منحة كدة للناس اللي لسة عايشين في العراق كل واحد بتاع 50 دولار كدة يمشي نفسه بيه على ما تفرج.
ثانيا:السعودية بقى هتقول ان لا اكيد الموضوع دة فيه حاجة غلط مش ممكن انتوا قلتوا لنا قبل كدة ان احنا عندنا احتياطي طب راح فين؟!!!!!طيب هنعمل ايه في جيش الموظفين اللي عندنا والعمالة الاسيوية دي هنصرف عليها منين؟
معقول ولادنا هيشتغلوا؟لا مش ممكن دة كابوس؟ معقولة بناتنا هيضطروا ينزلوا من بيوتهن ويشتغلوا زي بقية خلق ربنا .....لا لالا مش معقوووووول
طيب هنطلع عقدنا النفسية على مين؟ممكن نتأمر على مين ؟طيب الدور السعودي في المنطقة بعد ما صدقنا انه ابتدى يبان وابتدينا نسمع اسم السعودية في نشرات الاخبار.......هنعمل ايييييييييييييه؟
ثالثا:العمالة الاسيوية قررت بقى ترحل فورا بس بعد حملة تخريبية وتدميرية واسعة انتقاما من اللي شافوه واللي شافه قبلهم اهلهم في البلد دي من ظلم وافترا وفساد واكل للحقووق
وكل واحد منهم قرر يقتل كفيله قبل ما يمشي وقبل ما يقتله قرر يعذبه عذاب اشد من عذاب الاخرة
رابعا: كل الدول العربية الغير خليجية والاسيوية قررت رفع قضايا على دول الخليج لصرف مستحقات العمالة بتاعتها المتأخرة على الدول دي ومش بس كدة لا دة ابتدوا يحققوا في كل جرايم الاغتصاب والتعذيب اللي ياما حصلت منذ الثورة البترولية في السبعينات ولحد دلوقتي
خامسا: النايل سات قنواته قلت للربع تقريبا بعد ما جميع قنوات الاغاني الخليجية بالاضافة لقنوات الدجل والشعوذة وقراية البخت اللي بيمتلكها خليجيين وكل قنوات روتانا والايه ار تي مافضلش الا قنوات المصريين واللبنانيين بس
سادسا:كل الاجانب المحترفين اللي كانوا بييجوا الخليج علشان السبوبة اللي فيه روحوا فورا وقالوا لهم نشوفكم امس
مش بس كدة دة قبل ما يمشوا لبلادهم قدموا شكاوي للفيفا ضد اندية الخليج اللي مش عارفة تسدد لهم مستحقاتهم وقالوا لهم لما انتوا مابتعرفوش تتنيلوا تلعبوا كورة....كنتم بتجيبونا ليه
سابعا:المواطنون الخليجيين الاشاوس لما البترول خلص بقى قرروا يبيعوا سياراتهم الفارهة ما طبعا مفيش فلوس تغطي البنزين بتاعها فباعوا عربياتهم للاجانب قبل ما يمشوا وطبعا برخص التراب واشتروا كلهم عجل (دراجات) وتكاتك (مفرد تك تك) وياسلام بقى ع الشاب الخليجي وهو ضارب الجلابية وراكب العجلة بتاعته
ثامنا:الكويت بعتت لامريكا استغاثة انها خايفة من العراقيين لواحد منهم يعمل زي صدام زمان كدة امريكا ردت عليهم قالت لهم واحنا مالنا انشا الله تولعوا في بعض انتوا الاتنين احنا مالنا
تاسعا: نشرات الاخبار والجرايد بتحذر من تدفق الاجئين الخليجيين على مصر بحثا عن عمل وانتشار الخليجيين في الشوارع المصرية والحدائق العامة (بعد ما كانوا منتشرين في فنادق الخمس تجوم وكازينوهات شارع الهرم)وقوات الامن المركزي المصرية تتدخل لفض اعتصامهم من الحدائق العامة تمهيدا لترحيلهم كلاجئين الى دول اخرى
عاشرا: فندق موفنبيك يقوم بطرد احد الامراء السعوديين واهله واصدقاؤه بعد ان احتلوا غرف الفندق واجنحته لسنوات طويلة بدون دفع الحساب وتهدد باحالته الى النيابة مالم يقم بدفع المستحقات وهو يرد: اجيب منييييين؟ ايش ياخد الريح من البلاط؟ خدوا كلابي بس سيبوني
تخيلاااااااااااااااااااااااااااااااااااااااااااااااااااااااااات وهلاوس رهيبة تخيلوا معايا انها حصلت فعلا تفتكروا هنضحك ولا نعيط
هنضحك على ناس الفلوس اصابتهم بالعمى والصمم وفقدان الحكمة والقدرة على التفكير ودة هيكون جزاؤهم.....ولا هنعيط على حالنا كعرب ومسلمين كنا بؤساء وزدنا بؤس على بؤسنا.
تخيلوا معايا كمان ايه اللي ممكن يحصل وخلونا نضحك ونعيط مع بعض
المهم ان انا صحيت من احلامي دي على جريدة واول عيني ما وقعت عليها قريت:
الاستغناء عن الالاف العمال المصريين في دول الخليج
خادمة اندونيسية تلجأ لسفارتها هربا من تعذيب الكفيل لها
امير عربي يحطم احد الفنادق في مصر
قلت:
كفااااااااااااااااااااااااااااااااااااااااااااية
يارب عفوك ورضاك

Wednesday, 14 March 2007

الشعب المصري المؤدب المسالم الأليف




الشعب المصري دة امره غريب عجيب انا عمري ما شفت شعب بيتعامل بالطريقة دي,عمري ما شفت شعب كل ما ينضرب على قفاه يقول كماااااااااان.
شعب كل افراده او نقول 90%من افراده بيشتكوا مر الشكوى من الحياه والعيشة واللي بيعشوها ومع ذلك ما بيعملش اي حاجة خالص.
فلاحين عايشين في ادنى ظروف ممكنة عايشين عيشة مش ممكن حد في اي مكان في العالم وبظروف مختلفة ممكن يعيشها.
بؤس وشقاء مش طبيعي ناس عايشين على الكفاف وتحت خط الفقر ومع ذلك تلاقيهم عايشين متعايشين مسالمين لا وكمان دول مستمتعين بحياتهم.

كل ما اروح الريف واشوف ان الناس واغلبية القرى في مصر ماتعرفش حاجة اسمها طرق مرصوفة جوة القرى مجرد الطريق الرئيسي في اي قرية اللي ممكن نقول عليه مجازا انه مرصوف انما لسه الشوارع والطرق اللي جوة ماتعرفش يعني ايه رصف ولكم ان تتخيلوا منظر الطرقات دي لما الدنيا تمطر بتتحول القرية من دول لمستنقعات طينية لا تحتمل.
القرى المصرية في معظمها ماتعرفش حاجة اسمها كوب ماء نظيف ونقي بيعتمدوا على مياه صرف صحي في اغلب الاحيان.
معظم الفلاحين المصريين مصابين بامراض لا حصر لها كوكتيل امراض حادة ومزمنة تقدر تقول ان امراض الكلى والكبد في الريف المصري زي نزلات البرد كدة عند شعوب تانية شىء بالنسبه لهم عادي جدا.
ومع ذلك الناس هنا في الريف المصري عايشين ومتعايشين ومسالمين ومؤيدين لحكومتهم اللي بتزيدهم فقرا ومرضا.
نفسي اعرف بامارة ايه مرشحي الحزب الوطني او المنشقين عنه واللي هم حزب وطني برضه بينجحوا في القرى دي؟!!!!!ازاي؟
لا والغريب والمستفز انهم انتخبوا حسني مبارك في الانتخابات الرئاسية اللي فاتت تخيلوا؟
وكأن الشعب المصري دة غاوي فقر وافقار وامراااض وكأنهم لسان حالهم بيقول اديني كمان وكمان او اطلب اكتر اكيد في اكتر
ونسيب الفلاحين في حالهم وممكن نقول معلش اصل عقلهم برضه على قدهم ونروح للعمال
العمال في مصر احوالهم لا تسر عدو ولا حبيب بيشتغلوا من نار في قطاع عام وخاص ولا عائد على الاطلاق ومع ذلك الناس شاكرة وحامدة وراضية باللي ربنا قسمه لهم وبيبوسوا ايديهم وش وضهر وبيقولوا لنفسهم هو حد لاقي شغل واهو ملاليم احسن من القعدة في البيت
طلاب جامعات متكدسين في جامعات حكومية بلا مرافق ولا امكانيات على الاطلاق وبتخرج اجيال في مختلف التخصصات لا يعلموا اي شيء عن تخصصاتهم اللي المفروض يكونوا بيفهموا فيها وتلاقي خريج الطب ما يعرفش القلب ناحية اليمين ولا الشمال وتلاقي خريج الصيدلة عمره ما وقف قبل كدة في صيدلية اما خريجي التجارة والحقوق والاداب .......الخ فدول بقى ربنا معاهم لانهم هم نفسهم مش عارفين اتخرجوا من ايه؟ وليه اتخرجوا اساسا؟
وكله كوم بقى والتعليم والجامعات الخاصة دي بقى كوم تاني.....دي بقى معمولة للناس المحترمة والشيك علشان ما يتساووش بالهاموووش بتوع الجامعات الحكومية اللي ببلاش دي.....ياي حاجة تقرف فعلا
المفارقة بقى ان الجامعات الخاصة دي فيها امكانيات عالية جدا بس فيها طلبه مش غاويين تعليم اساسا اما الجامعات الحكومية ففيها ناس نفسهم يبقوا حاجة بجد بس يا خسارة مفيش اصلا الامكانيات اللي بتؤهلهم لكدة.
وعمرنا ما سمعنا ان الطلبة متضايقة من واقع تعليمها المؤلم ولا حاجة واهم بيتخرجوا وهم ساكتين وصابرين ومتحمسين لحجز اماكنهم في اقرب كوفي شوب.
اما بقى الموظفين فحدث ولا حرج جيوش جرارة من العاملين بالحكومة والقطاع العام واللي اكتر من 60%منهم فائض اصلا عن حاجة العمل بس تقول ايه بقى......ان فاتك الميري اتمرغ في ترابه
ولسه كتير وكتير من طوائف الشعب المصري الجميل اللي بيعانوا وبيقاسوا الامرين ومع ذلك لا تسمع لهم حس ولا خبر بس هم طالبين حاجة واحدة بس انهم يعيشوا مجرد يعيشوا ويتنفسوا هوا وياكلوا ويناموا.
ولو ان الاكل دة كمان مش مضمون في ظل حالة التسرطن وامراض الكلى والكبد اللي بتهاجم المصريين بس برضة في الموضوع دة هم صابرين ماهو قضاء الله وقدره برضة.
السادة حكام مصر ورجال حكومته وحزبه الوطني:
هنيئا لكم بهذا الشعب العظيم اللي لو لفيتوا العالم كله مش هتلاقوا زيه ابدا ,هو فيه زي المصري اللي ياما انضرب وبينضرب ولسه هينضرب وبيقول كمان والنبي كمان.
وشعاره دايما:
ضرب الحبيب زي اكل الزبيب

Saturday, 10 March 2007

رجلان وانقلابان




النهاردة لفت نظري في" المصري اليوم" موضوع عن موريتانيا واتجاهها نحو الديمقراطية بعد انقلاب 3 اغسطس 2005 بقيادة العقيد علي ولد محمد فال اللي قام بانقلاب عسكري بيحصل عادي جدا في الدول العربية والافريقية واستولى على السلطة في ظل سفر الرئيس ايامها معاوية ولد احمد الطايع لمهمة خارج موريتانيا.
لحد هنا الاحداث عادية جدا راجل عسكري استغل غياب رئيسه في مهمة عمل وقرر انه يستولى على الحكم (حصلت قبل كدة كتير وبتحصل) انما اللي محصلش قبل كدة في الدول اللي نعرفها وحبايبنا وجيراننا ان الرجل طلع انه لم يستولي على الحكم انما اعتبر نفسه وسيلة لنزع الحكم من حكومة غير شرعية وحاكم استبدادي واعتبر نفسه فترة انتقالية يتم خلالها اجراء انتخابات حرة نزيهة (بس دي غير نزيهة بتاعتنا) وتسليم السلطة للي الشعب يختاره ويكون مقتنع بيه حتى لو كان الجن الازرق
الرجل اول ما عمل الانقلاب دة قال الكلام دة وطبعا عدد كبير من الناس والمراقبين والمهتمين قالوا كلهم بيقولوا كدة في الاول وعلى رأي عمرو دياب والكلام الحلو بيتحول.
انما اللي حصل ان الكلام الحلو دة ماتحولش بالعكس دة اتحول لواقع ملموس بتعيشه موريتانيا الايام دي من انتخابات سليمة تماما في ظل مجلس حكم انتقالي محدش منهم رشح نفسه ومالوش اي مصلحة ان فلان يفوز او علان ينجح الا مصلحة بلدهم اللي بيحبوها ونفسهم انها تعلى فوق اي اغراض مصلحية وشريرة.
عدد كبير من المعارضين بيقارنوا بين الموقف دة وموقف القيادة المصرية المتشبث بالسلطة واللي بيرى انه بدونهم الشعب المصري دة ممكن يموت لانه شعب مش عارف مصلحته فين ولو قامت انتخابات نزيهة وسليمة ممكن يجيبوا حد مش مناسب للحكم وبالتالي البلاد تغرق
هم بيقولوا كدة ان تشبثهم بالسلطة انما الغرض منه مصلحة البلاد ليس اكثر ولا اقل وان لا مصالح شخصية على الاطلاق بالعكس دة الحكم دة مرهق جدا ومسئولية جسيمة ولو تواجد البديل فورا هنسلمه السلطة.
انا النهاردة ما بتكلمش ومابعلقش على الموضوع دة انا النهاردة بحب اقارن بين انقلابين في دولتين عربيتين افريقيتين, الانقلابين قام بيه اتنين عسكريين :
الاول هو انقلاب 23 يوليو 1952 في مصر والتاني هو انقلاب 3 اغسطس 2005 في موريتانيا الاول طبعا قام بيه البكباشي جمال عبد الناصر حسين والتاني قام بيه العقيد علي ولد محمد فال.
بس الاول بتاع يوليو 1952 في مصر شاف ان الديمقراطية خطر رهيب على المجتمع المصري وان الشعب المصري دة شعب لا يفهم شيء في اي شيء وماينفعش نعمل انتخابات حرة نزيهة لان الشعب المصري مش عارف مصلحته وممكن يختار حد يبوظ مكاسب الثورة.
وكان في واحد مصري كان بيفكر زي علي ولد محمد فال كدة بس كان اسمه محمد نجيب قال نرجع للجيش ونعمل انتخابات ومن ينجح يحكم ولكن كااان خلاص شهوة السلطة اشتغلت والكرسي بدأ يكون مريح وبالتالي الرجل دة كان مصيره تحديد اقامته واهانته لحد ما مات من القهر ومن الحزن على بلد كان نفسه وبيتمنى لها مستقبل افضل من كدة بكتير.
وشوية شوية الانقلاب اتسمى ثورة وجمال عبد الناصر اصبح اسطورة ومصر كل يوم عن يوم مساحة الديمقراطية عماله تقل وتقل لحد ما استبدلنا الملك ب 12 ملك وانهيارات اقتصادية وهزائم عسكرية واذلال في كل المجالات وحكم عسكري لابس مدني (بص حواليك وشوف كام محافظ ورئيس مدينة ورئيس حي ورئيس شركة كبرى) من ضباط الجيش السابقين.
الانقلاب التاني بقى بتاع 3 اغسطس 205 كان انقلاب علشان خاطر موريتانيا ناس شايفين ان بلدهم تستحق اعلى واعلى ناس ما قللوش من قدرات شعبهم ولم يحجروا على رأيهم وحقهم في اختيار من يحكمهم ماقالوش اصلهم ممكن يجيبوا حد غلط لان مفيش حاجة اسمها حد غلط وحد صح في حاجة اسمها اختيار الشعب واللي الشعب يختاره لازم يحكم حتى لو كان مين
ناس شايفين انهم ضباط جيش مش شايفين نفسهم حكام شايفين ان الديمقراطية هي الامل الاخير لاصلاح احوال بلدهم
شفتوا الفرق بين انقلاب عسكري تم من 54 سنة ولحد دلوقتي بنعاني من ويلاته وانقلاب تاني تم من اقل من سنتين وبدأت موريتانيا تجني ثماره فهنيئا لهم.

لو لم اكن مصريا لوددت ان اكون موريتانيا

Monday, 5 March 2007

واحد مخنوق دماغه بتغلي

حد جرب قبل كدة انه يكون مخنوق ويائس وخايف جدا من بكرة وحاسس ان لا جديد وان اللي بنبات فيه هنصحى فيه ويبقى دة كمان اقصى طموحنا ان بكرة يكون زي النهاردة مش اسوأ منه كمان
عندي احساس بالخنقة واني فعلا مش طايق حاجة عندي احساس كدة ان كل اللي حواليا غلط مش بس في حاجة غلط لا دة التعديل بتاع المقولة الشهيرة (في حاجة غلط)بقى (كل حاجة غلط)تعديل 2007.
كل حاجة في المجتمع بقت فاسدة من حوالينا كل حاجة حتى لو بتتعمل بحسن نية بقى لازم تشم فيها ريحة مش حلوة كل حاجة:
شوارع بتترصف علشان تتحفر تاني طب اترصفت ليه مش عارف؟ طيب اتحفرت تاني ليه؟ مش عارف برضة
عواميد انارة بتتغير اللمبات بتاعتها بلمبات تانية على الرغم ان اللمبات الاولانيه كانت شغالة كويس طيب اتغيرت ليه؟ مش عارف طيب ركبوا الجديدة ليه؟ مش فاهم
ارصفة بتتكسر علشان يتركب ارصفة جديدة طيب القديمة اتشالت ليه؟ مش عارف طيب ايه الميزة في تركيب رصيف جديد؟ مش فاهم
مهن بتتورث عيني عينك كدة غصبا واقتدار على رأي اللمبي وكأن قدر البلد دة ان يبقى التوريث هو شعار المرحلة اللي احنا فيها دي ابن الطبيب لازم يبقى طبيب ابن الصيدلي لازم يكون صيدلي حتى لو انه غير مؤهل لكدة لكن كله يهون في سبيل التوريث وبالتالي شفنا كلنا ان ابناء الفنانين اغلبيتهم طلعوا فنانين وابناء المطربين طلعوا هم كمان مطربين وابناء لاعبي الكرة تخيلوا طلعوا لاعبي كرة هم كمان
تتفرج ع النشرة تلاقي العالم بقى غريب جدا وامريكا بتعمل اللي هي عايزاه تماما وخلاااااااص مفيش مقاومة خالص استسلام تاااااااااااااام ولا عزاء للامة الاسلامية.
ظلم وجبروت في كل حتة في مصر النفوذ وصل لمرحلة بشعة واصبح الناس جميعا بلا قيمة ولا قيمة في هذا البلد الا لاصحاب البدل العسكرية ومش اي بدل عسكرية كمان اصبح الجيش غلبان زينا كدة وتحققت المقولة الخالدة الكارنيه غلب الجنيه
بنات ماشية في الشارع بيتفننوا في فنون الاغراء وكأننا سيبنا كل المميزات اللي في الغرب وماخدناش منه غير لبسه حاجة غريبة جدا وبيقابلهم بنات برضه بس متغطيين من راسهم لاخمص قدميهم زي ما بيقولوا ومش هكون مبالغ لو قلت ان عينهم كمان بتكون في بعض الاحيان متغطية ومش عارف والله بيشوفوا ازاي وهم ماشيين وكأنهم عملوا كل حاجة الدين بيحض عليها ومش فاضل غير موضوع اللبس الغريب دة.
شباب ماشي يسب بعضه في الشارع بابشع الالفاظ على سبيل الهزار واحيانا على سبيل الخناقات وياريتهم بيشتموا بعض دة بيشتموا اهالي بعض مش عارف ليه؟
شتايم الناس لبعضها كلها شتايم جنسية مش عارف ليه ؟ لازم تكون كلها امور متعلقة بالجنس سواء للشخص نفسه او لوالدته وليه برضه مش عارف؟
يفط موالسة رهيبة ولا تحتمل في كل حتة في الشوارع مش عارف هم اللي بيعملوا اليفط دي من نفسهم ولا بتيجي اوامر للناس ان لازم تعملوا يفط مبايعة وتأييد بدون اي سبب لدرجة ان مفيش استاد كورة فيكي يا مصر من غير صورة لرئيس الجمهورية متعلقة في صدر وواجهة الاستاد على الرغم اني عمري ما شفت صورة للرئيس الامريكي في ملعب رجبي مثلا ولا مباريات الدوري الفرنسي مثلا بتذاع ويتوسط الشاشة صورة للرئيس الفرنسي جاك شيراك
مطبات غريبة الشكل في كل مكان وكل شارع ماعدا الشوارع بتاعة علية القوم على الرغم ان في بعض الاحيان بعض علية القوم دول بيحبوا يحطوا مطبات قدام بيتهم مش عارف ليه؟
واصبح كل واحد ممكن يعمل مطب في اي شارع هو عايزه وتكوين المطبات حرية مكفولة للجميع ولتذهب عفشات السيارات للجحيم ويالا خللي العفشجية ياكلوا عيش
انابيب بوتاجاز عمالة تتفجر في وش اصحابها ويطلع المسئول يقول اصل العيب مش في الانابيب العيب في الناس اللي مابتعرفش تستخدم الانابيب دي ودي فكرتني فعلا باللي كان بيقوال ان العيب مش في المواصلات العيب في الركاب اللي ما بتعرفش تركب!!!!
زباله مرمية في كل حتة وناس ازبل من الزبالة شغلتهم في الدنيا انهم يدوروا ويقلبوا في الزبالة دي يمكن يطلعوا بحاجة تنفعهم تخيل ناس شغلتها تبحث في الزبالة عن شيء ما
زحام واختناق مروري في كل حتة وخاصة فترة الظهر بيبقى الشارع وياسلام لو كان شارع رئيسي فعلا الشارع بيتحول للوحة سريالية من عربيات ملاكي وعربيات اجرة وعربيات حنطور وعربيات كارو وعربيات سرفيس واوتوبيسات وميكروباصات وعسكري مرور عمال يزعق في الكل وكل عربية واخدة اتجاه غريب ماتقدرش تستنتج منه ابدا هو ناوي يدخل في اي اتجاه او اي شارع
عمال تسمع كل يوم عن ناس مصابة بامراض خطيرة جدا وغريبة اللي مصاب بالسرطان واللي محتاج زرع كبد ودي طبعا في الصين مش هنا بس مين اللي يقدر على تكاليفها.
وصلت لمرحلة انك كل يوم بتصحى من النوم وتقول يا ترى مستخبيلنا ايه النهاردة؟ اكفينا شر المستخبي يارب
استنطاع رهيب بيضرب بجذوره في اوساط وطوائف الشعب المصري وكل واحد اصبح شعاره اخطف واجري لدرجة ان الواحد بقى بيخاف ينزل يشتري حاجة لانه عارف انه بنسبة 99%هيتنصب عليه في ثمن الحاجة دي
اقول ايه ولا ايه ولا ايه انا دماغي عمالة تغلي وتفور والمواجع عمالة تتقلب عليا وممكن انتم كمان دماغم تغلي زيي كدة لو وانتم قاعدين كدة بالليل استعرضوا اللي حصل طول اليوم هتلاقوا سلبيات سلبيات سلبيات والله العظيم كويس قوي ان احنا لسة عايشين
على فكرة انا مش متشائم والله انا بحب الضحك والفرفشة وغاوي مرح بس دي شوية غليان في النافوخ بتنقح ع الواحد ساعات كدة وطلبت معايا فضفضة بس سرعان ما هقاوم حالة الغليان النافوخي دة وهفتح التليفزيون على ميلودي وهشوف بقى الوجه الآخر للحياة الناس اللي عمالة تحب على روحها في الأغاني دي وساعتها هندمج معاهم وهقول لنفسي:
عيش......عيش يا باشا وسيبني اعيش

لو بتفكر تتقدم للجواز.......اقرأ

موضوعات الزواج اليومين دول موضوعات معقدة جدا يعني نقدر نقول كدة ان مفيش قاعدة ممكن تمشي عليها لما تقرر انك تتقدم لواحدة للجواز
زمان في المجتمعات الصغيرة زي المحافظات المصرية كان الناس كلها عارفين بعض وكنت لو قررت تتقدم لواحدة عجبتك علشان تتجوزها ,قبل ما بتروح تتقدم لها بيكون عندك تقرير مفصل عن تاريخها وتاريخ عيلتها كلها وبتبقى رايح وانت واقف على ارض صلبة,انما دلوقتي فجأة الدنيا اتزحمت بشكل مش طبيعي واصبحت المجتمعات اللي كانت صغيرة اصبحت مش صغيرة على الاطلاق والمدن اتزحمت بناسها الاصليين وناس تانيين وافدين عليها وبالتالي بقى صعب جدا انك تعرف معلومات كاملة عن ناس انت رايح تتقدم لبنتهم.
وهنا ظهرت مشكلة في الزواج الاوهي ان لو انت سيادتك مش مرتبط اصلا بواحدة من زميلاتك في الجامعة وكنت مؤمن بالزواج التقليدي القديم دة فاكره؟!!!!!!!!المهم هتلاقي ان ساعتها الحياة هتكون صعبة وهتواجه احتمالات كتيرة قوي:
اولا :ممكن تكون البنت موافقة عليك شكلا انما موضوعا حضرتك مش بترضي طموحاتها العريضة وممكن تكون شايفاك العريس اللي مش جاهز يعني ممكن سيادتك تكون عايز تشتري شقة ايجار جديد انما هي طموحاتها تمليك وشايفة انه يا تمليك يا اما فلا.
ثانيا:ممكن البنت تكون موافقة عليك شكلا وموضوعا وبنت هايلة وعايزة تعيش وتكون اسرة بس بقى بابا وماما بتوعها هما اللي شايفين ان سيادتك لا ترضي طموحاتهم العريضة فيكون الرفض من ناحيتهم.
ثالثا: ممكن بقى سيادتك تكون موضوعا زي الفل عريس جاهز ماجبتوش ولادة بس حضرتك شكلا مش مهضوم بمعنى ان تضاريس وش و جسم سيادتك مش عاطفية بالمرة وبالتالي انت مش عاجب العروسة علشان انت واد مش امور.
رابعا:ممكن سيادتك بقى تكون واد امور وكل حاجة وامكانياتك كويسة واهلها شايفين انك بترضي طموحاتهم والحمد لله انما بقى معلش اتاري الهانم العروسة مرتبطة في الخباثة من غير اهلها الحلوين ولا جنابك يعرفوا اصلا الموضوع دة وبالتالي هيكون من نصيبك الرفض المتين لاسباب مش حقيقية طبعا هتتقال.
خامسا: ممكن يتوافق عليك من الهانم العروسة واهلها وتكون حظك حلو او انت فاكر ان حظك حلو وتفاجىء يا معلم ان الانسة وافقت عليك علشان انت احسن من مفيش وان ظل رجل ولا ظل حيطة وان عصفور في اليد خير من 10 ع الشجرة وبما ان سيادتك رجل مناسب واتقدمت فهي وافقت انما هي ماتعرفش يعني ايه حب ومعندهاش استعداد انها تحبك اساسا وشعارها في الحياة هو ايام وبنعيشها.
وحالات واحتمالات كتير مالهاش حصر ممكن تصادفك لو انت قررت ان انت تتقدم عمياني كدة وانت بقى وحظك يا معلم.
المشكلة ان الانطباعات الاولى تدوم وان لو بدايتك كانت غلط هتلاقي نفسك بتنفر وتخاف من تكرار التجربة مرة تانية.
افضل حاجة فعلا انك تقرر الا تتزوج لان العمر مش بعزقة ومشاعر الناس مش لعبة وصعب قوي انك تسيب قلبك وعقلك لشوية بنات مدلعة تلعب بيهم.
ارجع يا واد يا عيد......البلهارسيا هتبهدلك

Friday, 2 March 2007

الأمير والمصريون.........اكشن عاشر مرة

حفظ قضية نجل الأمير العربي بعد التصالح مع والد الطفلة
دة كان الخبر للي منشور النهاردة الصبح في الأهرام في صدر صفحتها الأولى
والمقصود بالأمير العربي هو ترك بن عبد العزيز وطبعا المقصود بنجله هو احمد ترك عبد العزيز اما والطفلة فهي طفلة مصرية تصادف حظها العاثر وجودها في فندق موفنبيك معقل الامير واسرته واللي كلاب الامير قررت انها تتسلى عليها فقطعت وشها.....حاجة كدة بسيطة
طبعا الخبر اكشن عاشر مرة .....الامير او زوجته او ابنه او بنته يقطعوا في المصريين وينهشوا لحمهم ويمصوا دمهم وينتهي الموضوع بشوية فلوس يرموها في وش الضحية اللي مارسوا عليها ساديتهم وعنفهم ورغبتهم في الايذاء.
طبعا امبارح انا ماصدقتش نفسي لما قريت ان النائب العام قرر منع ابن الامير دة من السفر واحالة الموضوع لمحاكمة قلت مش ممكن انا بحلم معقول دة هيحصل اخيرا في مصر معقول حد من عيلة الامير دة هتحس انها عايشة في بلد فيها قانون وممكن يطبق عليهم وهياخدوا جزائهم.
وقعدت بقى احلم بالموضوع دة من امبارح للنهاردة واتخيل منظر سمو الامير وهو لابس ازرق في ازرق ومقيد بالكلابشات وواقف في القفص وقلت الله .....باين كدة ان العدل ناوي ياخد مجراه في البلد دي بعد ماكان طول عمره مش لاقي مجراه دة فين.
لحد بقى ما عيني وقعت على الصفحة الاولى في الاهرام النهاردة وقريت الخبر اللي فوق دة.
طبعا الفلوس طلعت والراجل اتراضى وطبعا اللي راضوه هم سكرتارية الامير لان مش ممكن الامير هيتكرم ويتعطف ويكلم عبيد احساناتهم زينا كدة.
مش هقول للرجل والد الطفلة غير كلمه واحدة بس الا وهي حسبي الله ونعم الوكيل فيك بعد ما خيبت املنا وقلنا ان الخلاص من العيلة دي هيكون على ايدك بس انت شد حيلك واتمسك بحقك الا ان سحر المال والنفوذ كان اقوى بكتير من كرامة شعب وسمعة بلد.
اما الامير وعيلته فطبعا دول مش هينفع معاهم اي كلام لأن اللي اتكلموا قبلي في الحوادث السابقة ليهم دول كتير قوي انما هقول لهم ماتجربوا تروحوا المغرب ولا دبي ولا حاجة بيقولوا جو الدول دي حلو قوي وكمان في حرية كدة وانفتاح ومفيش ناس غلسة زينا كدة بتعاكس الكلاب بتوعكم وبتستفزهم وسمعت كمان ان البنات هناك حلوين قوي احلى من هنا بكتيييييييييير
اما بقى الفندق الجميل اللي بيربوا كلاب فيه دة فبحب اقول له واضح انك هتخسر 70 مليون بني ادم وهتكسب عائلة ترك بن عبد العزيز وممكن يكون دة فعلا افيد ليك من الناحية المادية ولكن صعب قوي انك تعيش في مكان كل الناس اللي فيه مش هيفتكروك الا بالفندق بتاع الكلاب.
اعتقد ان الموضوع دة صعب قوي على اي فندق
واخيرا احب اوضح لسيادتكم بصفتي شاء حظي العاثر اني اعيش في المملكة السعودية سنتين من عمري ان الكلام دة لو كان حصل في السعودية وكان في مصري لمس سعودي مجرد لمسه كدة ماكناش قرينا ان القضية اتحفظت كنا قرينا جلد مصري في السعودية او ترحيل مصري من السعودية او تعليق مصري على طيارة راجعة من السعودية........!!
على فكرة مش عارف ليه عيلة الامير ترك بن عبد العزيز دي واحنا كمصريين بتفكرني بقصة الأمريكان والهنود الحمر وتقريبا شوية كدة وهيكون مصيرنا زي مصير الهنود الحمر كدة بالضبط.

fb comments

wibiya widget

LinkWithin

Related Posts with Thumbnails