Wednesday, 28 February 2007

احنا ناقصنا ايه ولا ايه؟

انا مش عارف احنا ناقصنا ايه علشان نتقدم بجد ونبقى لينا وزن وسعر في العالم كله؟ والحقيقة انا مش بسأل احنا ناقصنا ايه؟!!!لأن احنا ناقصنا كتير قوي قوي انما السوأل الأصح هو احنا ناقصنا ايه ولا ايه؟
عارف ان ناقصنا حاجات كتير قوي وممكن يكون معندناش حاجة خالص من عوامل واسباب التقدم والاحترام والنجاح بس هو السؤال اللي بيلح علي بشدة وهو ناقصنا ايه الأول؟
ناقصنا ضمير لازم كلنا نمتلكه علشان نعمل كل حاجة صح وكل واحد يعمل شغله بما يملي عليه ضميره علشان يرضي ربه ووطنه ويرضي كمان نفسه؟
ولا ناقصنا الأول الفلوس اللي لو اتوفرت وخد كل واحد المال المناسب للعمل اللي بيعمله هنلاقيه بيشتغل بضمير علشان في مبدأ الثواب والعقاب وكل واحد مننا عارف ان فيه اجر نظير عمله وتعبه وبالتالي لو كل واحد حصل على الفلوس اللي بتناسب العمل اللي بيعمله هيشتغل كويس وبالتالي هيكون فيه ضمير وبالتالي العمل هيتم انجازه كما يجب ان يكون؟.
ولا ناقصنا الأول الديمقراطية اللي من غيرها لا هتتوافر فلوس ولا هيشتغل حد بضمير لأن البلد من الاساس منهوبة وبالتالي ايه فايدة ان حد يشتغل بضمير طالما فيه حد برضة بيسرق نتاج الشغل والعمل دة؟
ولا الاكثر الحاحا انه يكون موجود هي الوطنية اللي لو كل بني ادم عايش على الارض دي كان بيمتلكها هيشتغل كويس ويحاول يوصل البلد دي لأعلى مكانه لأنه هيكون غيور عليها ولو الوطنية اتوفرت محدش هيكون عنده النظرة الضيقة من الانانية والانفراد بالسلطة وعدم احترام الفكر الآخر وبالتالي كله هيفكر في البلد قبل ما يفكر في نفسه؟
ولا اكتر حاجة بتنقصنا هي التدين اللي لو موجود عند كل الناس في البلد دي سواء كان مسلم او مسيحي عمر ما هيكون في سرقة وفساد ونهب ولا مبالاة وبالتالي لو كان الدين موجود في حياتنا بشكل صحيح وبطريقة صح مش بطريقة ستنا الشجرة هتتحل جميع مشاكلنا في البلد دي؟
ولا بينقصنا اكتر حاجة الاحترام سواء بيننا وبين بعض او بين الحكومة والشعب او بين الحكومة وبعضها ,وبالتالي لو كلنا بنحترم بعض وبنقدر عقلية بعض كويس هنتقدم اسرع واسرع وساعتها كل بني ادم عايش في المجتمع دة هيكون ليه دور حقيقى محترم وبيحترمه الأخرين؟
ولا اكتر حاجة ناقصانا واللي لو توفرت هنحقق اللي محدش حققه وهو النظام وان لو فيه نظام كل حاجة هتكون صح وكل حد هيعرف دوره كويس وهيعرف بدايته ونهايته ومش هنشوف حد سبع صنايع والبخت ضايع وعمرنا ما هنشوف شرطة بتتدخل في السياسة وازهر بيؤيد مرشح للرئاسة وهيكون كل واحد عارف حدوده كويس قوي؟
ولا اللي ناقصنا وهييجي بعدها حاجات تانية كتير قوي هو احترام القانون واللي لو تم صح ومعدش فيه تحايل على القانون هيسود المجتمع دة حالة تانية خالص من الروح والارتياح لان كل واحد ساعتها هيكون عارف حقه كويس قوي؟
ولسه كتير قوي قوي حاجات ناقصانا بس ايه اللي ناقصنا الاول؟ ايه اللي ناقص البلد دي الاول؟ ايه اللي محتاجين نحققه علشان بعد كدة نبص للي بعده واللي بعده؟
ممكن حاجة من اللي انا كاتبها فوق دي تحصل اصلا؟ ولا احنا خلاص بقينا حالة ميئوس منها؟ مفيش فايدة ولا ايه؟
تفتكروا لسه في امل؟
على فكرة احنا كمان ناقصنا حاجة اسمها الأمل

Friday, 23 February 2007

الزقازيق.........نظرة من داخلها

طلبت معايا النهاردة بصراحة اني اتكلم عن الزقازيق
والزقازيق دي بقى مدينة مصرية عاصمة محافظة الشرقية بتبعد عن القاهرة بتاع 90 كم تقريبا.
على الرغم ان الزقازيق مدينة مش جميلة على الاطلاق ولو حد من سكان القاهرة جه قعد يوم او يومين في الزقازيق لسبب او لآخر تلاقيه مش طايق نفسه .انما على الرغم من كدة مش عارف بحس بالفة بيني وبين البلد دي رغم اني بروح القاهرة كتير ومش منغلق على نفسي جوة الزقازيق الا ان زي ما بيقولوا كل واحد بيحن لأصله وممكن تكون كل يوم بتاكل جاتوه بس في بعض الاحيان بتحن لحتة مخلل وهي دي الزقازيق حتة المخلل بتاعتي.
الزقازيق كمدينة مش كبيرة يعني ممكن تلفها كلها بالعربية بتاعتك في نصف ساعة ودة اللي بيحصل على طول ان انت بتنزل تلف بالعربية بتاعتك وتجيب البلد من اولها لاخرها في نصف ساعة لو الشوارع فاضية كمان.
ولكن في الاونه الاخيرة نقدر نقول ان الزقازيق كمدينة طرأ عليها تغييرات كبيرة عن الاول ابتدت تفتح فيها محلات وتوكيلات تجارية واحنا اللي كنا بنعاني طول عمرنا من التهميش اللي الزقازيق فيه فبتلاقي كنتاكي فتح من كام سنة كمان مؤمن وكمان توكيلات ملابس ابتدت تفتح هناك.
بينقص الزقازيق وبشدة وجود فندق محترم 4 او 5 نجوم ودة يمكن بسبب قربها من القاهرة (90)كم وكمان من المنصورة (60)كم ودة اللي بيخلي المستثمرين يخافوا يعملوا مشروع زي دة.
الزقازيق كمان بتعاني من فوضى مرورية غير عادية وحالة تسيب مروري اعتقد انها بتنفرد بيه عن غيرها من مدن مصر في فوضى من امبراطورية السرفيس مالهاش حل بالاضافة طبعا لضيق الشوارع وكمان المطبات والحفر اللي لو قعدت اكتب لحد بكرة بالليل مش هقدر اوصفها الوصف اللي يليق بيها.
الزقازيق بقى بل الشرقية كلها منكوبة بالسادة المحافظين اللي بيحكموها وكأن صدفة ان ولا واحد منهم يسيب اي بصمة تخللي الناس تفتكره بالخير ولا كمان بالشر الحقيقة.
طبعا الزقازيق فيها جامعة كبيرة وهي جامعة الزقازيق وفيها معظم الكليات ولا ينقصها الا كلية طب اسنان وانا مش عارف هم ليه مقفلين دماغهم في موضوع كلية طب الاسنان زي مايكون حالفين ان دة لا يمكن يحصل ابدا.
كمان الزقازيق فيها بقى القومية ودة شارع وتقدر تقول انه معقل الشباب هناك يقعدوا طول الليل يروحوا وييجوا في شارع القومية بلا اي سبب وبلا هدف ويفضلوا على كدة طول الليل لغاية ما يروحوا.
الزقازيق فيها شباب زي العسل وبنات زي الفل واسر محترمة وناس مستواها الاجتماعي كويس بس بينقصها حاجة مهمة وهي ان الحكومة تعرف كدة وتتعامل مع البلد دي وناسها على هذا الاساس وتجيب اللي يطورها ويضبطها بدل ماتجيب ناس نفسهم يقضوا كام سنة محافظين علشان بعد عمر طويل او قصير يتقال عليهم محافظ سابق وخلاص

Wednesday, 21 February 2007

سمعة مصر بتاعتنا ولا بتاعتهم؟


في قضية مهمة مطروحة للمناقشة اليومين دول على الانترنت وفي عدد كبير من الصحف الحزبية والمستقلة الا وهي


هل يجوز اثارة قضايا تمس سمعة مصر في الخارج على شاشات الفضائيات


ودة طبعا تم طرحه على خلفية قضية (هالة سرحان وفتيات الليل) وانا هنا مش هتكلم عن قضية هالة سرحان و اللي قتلت بحثا ولكن هتكلم عن قضية سمعة مصر.


في البداية قبل مانتكلم عن سمعة مصر لازم نسأل اي مصر؟ مصر مين المقصودة؟


مصر بتاعتنا اللي هي الشعب والموظفين والشباب والبنات والمطحونين والغلابة مصر القرى والمراكز والاقاليم مصر والدتي ووالدتك واخواتنا؟


ولا المقصود مصر الحكومة والسلطة والحزب الوطني ولجنة السياسات والداخلية والتعذيب وانتهاك حقوق الانسان والفساد مصر تزوير الانتخابات والناس اللي بتشوف البلد من فوق مش من تحت؟


لازم قبل مانقول سمعة مصر نقول الاول ونحدد مصر مين فيهم؟!!!!

مصر التانية بتاعتهم مش بتاعتنا يبقى مالهاش سمعة من الاساس ومفيش حاجة اسمها سمعة مصر لان كشف كم الفساد والانحرافات دي مش تهديد لسمعة مصر لا دة كشف للفساد واللي ما بيمثلش مصر الحقيقية

لما نقول ان في فساد ورشوة واختلاس وان الانتخابات مزورة وان اقسام الشرطة اتحولت لسلخانات؟ هل دي اهانة لسمعة مصر؟ دي تعرية لنا؟


اذا تعلق الامر بفساد وكشف انحرافات لا يمكن دة يكون تشويه لسمعة مصر زي ما بيحاولوا يفهمونا او يوهمونا انما دة لمصلحة مصر اللي آن الأوان انها تنضف بقى.


انما بقى لو مصر بتاعتنا مصر انا وانت واخواتنا واهلنا الطيبين وييجي حد يحاول يوهم الناس ان مصر كلها دعارة وفجور وانحرافات يبقى لا والف لا لازم كلنا نقف له بالمرصاد ونقول له عندك........انت بتتكلم عن شرف ناس وشرف شعب عظيم.


مين اللي قال ان بنات مصر فتيات ليل او ان الشعب المصري مابيفوقش من الخمر للاسف دة اللي بيوصل للعرب عن طريق برامجنا وافلامنا ومسرحيتنا اللي للاسف بننتجها بنفسنا.


هم دول اللي بيشوهوا سمعة مصر مش اللي بيكشفوا الحقايق والانحرافات والفساد.


يا اجماعة العرب كلهم فاكرين مصر دي وكر لتعاطي المخدرات والدعارة وان بنات مصر معظمهم متجوزين عرفي وان شباب مصر كلهم مدمنين.


هي دي سمعة مصر اللي باظت هي دي سمعة مصر بس مش بتاعتنا مصر بتاعة ليلى علوي ويسرا ونادية الجندي ونبيلة عبيد وايناس الدغيدي هم دول اللي بيبوظوا سمعة مصر هم دول اللي خلوا العرب يطمعوا فينا وفي بناتنا مش حد بيكشف تعذيب لمواطن في قسم شرطة ولا بيكشف اختلاس وفساد موظف كبير.


قبل مانقول سمعة مصر لازم نحدد سمعة مصر احنا يعني سمعة شعب مصر؟!!!! ولا سمعة مصر هم يعني سمعة حكومة مصر وفنانين مصر وكريمة المجتمع بتاع مصر؟!!!!

Tuesday, 20 February 2007

نقابة ال لا صيدلة

غريبة قوي احوال نقابة الصيادلة في مصر الحقيقة انا اول مرة اسمع عن نقابة لا تدافع عن المهنة اللي بتمثلها.
ما هذا الطوفان الرهيب من كليات الصيدلة بالجامعات الخاصة اللي بتنطلق كل يوم وكأن عدد الصيادلة والصيدليات قليلة جدا للدرجة اللي بنفتح فيها كلية صيدلة كل يوم تقريبا.
الموضوع بقى اكتر من مستفز والصيادلة بقوا اكتر من الهم ع القلب ودلوقتي بقى في كل شارع جانبي صيدليتين واكتر ومش عارف والله هم بيبيعوا ايه وبيبيعوا لمين؟
وبدل ماالنقابة تطالب بوقف المهزلة الرهيبة دي لا طبعا دي بتشجعها وبتوافق على فتح كليات جديدة في جامعات معرفش اماكنها كل راجل اعمال معاه قرشين عايز يستثمرهم يفتح جامعة خاصة.........وماله مفيش مشكلة هو حر انما المهزلة ان اي باشا من دول بيفتح كلية صيدلة الاول وبعدين يحط بقى بقية كليات الجامعة بتاعته وطبعا مفيش حد يقول له انت بتعمل ايه ولا ليه كلية صيدلة؟ هي الدنيا ناقصة؟
والنتيجة طبعا ان الحكومة الرشيدة بتفكر دلوقتي تلغي التكليف لخريجي كليات الصيدلة طبعا مفيش اماكن تستوعب التتار اللي بيتخرج كل سنة.
ولكم ان تتخيلوا صيادلة بدون تكليف يعني بدون خبرة يعني ادوية غلط وناس بتموت وصيادلة بتدخل السجن.
حسبي الله ونعم الوكيل
طبعا فتش عن البيزنس ورا كل المهزلة اللي بتحصل واللي لسه هتحصل كمان ومازال العرض مستمر

Sunday, 18 February 2007

نائب السيارات

مش غريبة ابدا ان واحد من نواب البرلمان عن الحزب الوطني يطالب انه تكون سيارات اعضاء مجلس الشعب الموقرين معفاة من الجمارك!!!
مش غريبة ابدا وهتكون غريبة ليه اذا كان السادة النواب اصلا مش نواب من الاساس مالهمش دعوة بالشعب اللي على الورق بس دول نوابه وهو اصلا الشعب هو اللي قعدهم على الكراسي اللي قاعدين عليها؟!!!واساسا الشعب دة اصلا يملك القدرة انه يقول للنائب العظيم دة احنا مش هننتخبك تاني؟!!!طبعا لا لسبب بسيط جدا وهو انه ماانتخابوش اولاني.
وعلشان اللي مش فاهم يفهم والكلام يكون واضح :
الاخ عمرو اديب في برنامجه القاهرة اليوم ذكر ان احد نواب الحزب الوطني طالب مجلس الشعب باصدار تشريع يتيح للسادة نواب الشعب امكانية استيراد سيارات فارهة من الخارج معفاة الجمارك.
وهنا والكلام على لسان عمرو اديب دوت القاعة بالتصفيق الحاد تعبيرا عن رضا نواب المجلس الموقر عن الطلب.
طبعا الاخ العضو الموقر اللي ماتقالش اسمه ومحدش عايز يقول اسمه (طبعا لانه حزب وطني) مبرره في ذللك ان النواب هم واجهة للشعب ولازم يظهروا بمظهر مشرف ونسي سيادته ان الشعب اللي اصلا ماانتخابهوش من الاساس يهمه انه يظهر بمظهر مشرف في المجلس مش في العربية وان الشعب المطحون اللي كل الجرايم دي بترتكب باسمه نفسه يلبس هدوم نضيفة ويشرب كوباية مياه صحية ويركب مواصلة ماتنتهيش بيه للقرافة ونفسه ان الناس تتجوز وتلاقي سكن يلمها ووظيفة شريفة تنجده من البطالة وبلاويها وبعد كل دة ما يتحقق من حق بقى النواب ان شاء الله يركبوا حتى طيارات معفاة من الجمارك مش مجرد عربيات.
وطبعا سارع السادة عتاولة الحزب الوطني زي السيد كمال الشاذلي والسيد زكريا عزمي بأدانة الطلب البشع دة بتاع نائب العربيات وابدوا استنكارهم بشدة للطلب الغريب بتاع النائب اللي على راسه ريشة دة وطبعا مارضيوش يقولوا على اسمه ابدا (خد بالك بقى لو النائب دة مستقل ولا المصيبة لو كان اخوان مسلمين) ماكانش اتقال اسمه بس لا دة كانت هتنزل صورته في الصفحة الاولى في جرايد الحزب الوطني المسماة سابقا باسم الجرايد القومية وتحتها مانشيت جريمة برلمانيه جديدة.
بس عمرو اديب نسي يسأل عتاولة الحزب الوطني عن نوع العربيات اللي بيفضلها سيادتهم وهل ياترى هي معفاة من الجمارك ولا صنع في مصر.
في بلد بيعاني نصها تقريبا من الامية والفقر والجهل ويستشري فيها المرض انتشار النار في الهشيم وييجي نايب عايز يجيب عربية معفاة من الجمارك لمجرد انه نايب في البرلمان وبالتالي يستحق الامتياز العظيم دة
يبقى مستقبل البلد دي مظلم مظلم مظلم
وبقول لكل شاب
طريقك مسدوود مسدووود مسدووووود يا ولدي

Tuesday, 13 February 2007

هلاوس ليلة كلها احباط

حد جرب قبل كدة انه يكون متضايق من غير سبب؟!!!شوية حزن كدة على ذكريات على مواجع بتتقلب على بدايات دور برد.
سكون ليل على اغاني رومانسية وحزينة على برامج تليفزيون بعضها ممل وبعضها مستفز وبعضها التاني منحاز بشكل رخم.
تمسك الريموت تلاقي ان ال 3 برامج اللي بتطحن في بعضها 90 دقيقة والعاشرة مساءا والقاهرة اليوم مفيش واحد فيهم ممكن تتفرج عليه واحد منهم ماسك هالة سرحان بقاله 3 ايام سلخ وتقطيع والتاني قررانه يتبنى وجهة نظرها ويشكك في مصداقية الاول والتالت بقى قرر انه يتجاهل الموضوع برمته ويسبح في تيار لوحده خالص.
والتلاتة بقوا مملين جدا.
تقرر انك تسمع الراديو تلاقيها شغالة اغاني رومانسية وهادية وانت اصلك موودك وحش فالدنيا بتبوظ اصلا معاك.
بتفتكر ان الحياة كانت زمان احلى بكتيير وان كل سنة بتكون اوحش من اللي قبلها وبتكتشف ان انت كنت مغفل وماحسبتش حساباتك صح وان كان افضل ليك لو ماكنتش دخلت الكلية دي ووصلت للي انت فيه دلوقتي.
وتقعد تقلب بقى حياتك واللي حصل معاك وتحس ان انت اساسا بني ادم نحس وكل ماتروح حتة او مكان يبووظ.
وبعدين تكتشف ان انت بتشتغل شغلانة انت اساسا مابتحبهاش بس للاسف ماتعرفش لو سبت الشغلانة دي هتشتغل ايه اصلا لانك انسان مش موهوب اساسا.
فقررت انك تنهي الليلة دي بقى وتنام اكتشفت بعد محاولات مضنية ان انت مش جايلك نوم اصلا وان الارق هيموتك وطول مانت عندك ارق طول ما دماغك عمالة تتضرب في الخلاط وبيطلع كوكتيل احباط على يأس على ندم على سوء حظ.
بتفكر انك تكلم حد من صحابك بتكتشف ان انت معدش ليك صحاب اصلا اللي سافر واتجوز ونسي اهله يبقى هيفتكرك انت.......؟
واللي انت مقاطعه اصلا علشان هو ندل ومايستحقش انك تعرفه.......واللي مابيكلمكش غير لما يكون عايز منك حاجة فانت قررت انك ماتكلموش واللي انت كلمته كتير قوي قبل كدة وهو مابيتصلش خالص فكرامتك نقحت عليك وحلفت مانت متصل بيه الا لما يتصل بيك الاول.
تقول طيب مااكلم الحتة الطرية اللي في حياتي........تكتشف ان انت اصلا معندكش حتة طرية في حياتك لانك كنت واضح ومحترم وانت في الجامعة وكنت مقرر ان مفيش ارتباط الا لما تكزن تقدر تخطب وتتجوز ولما قدرت تعمل كدة فعلا اكتشفت انه ماينفعش لان اللي ربط ربط من زمان يا معلم وكله مضبط اموره من زمااااااااااااااااااااان ولا عزاء للمحترمين.
يكبس عليك النوم وتنام وانت بتدعي ربنا ان بكرة يكون احلى

مولد سيدي الفالانطاين


مفيش اتنين ممكن يختلفوا ان الحب دة حاجة جميلة وشيء مطلوب ومفيش اعتراض عليه بس انا هنا اقصد الحب الصح اللي اتعودنا عليه واللي شوفناه في افلام زمان الحب الطاهر العفيف الشريف اللي كنا بنشوفه في الافلام العربي بتاعة زمان اللي بينتهي ان البطل يتجوز البطلة ودي بتكون النهاية الحتمية لاي قصة حب.

انما اللي بيحصل اليومين دول دة غريب عجيب يا جماعة ومفهوم الحب اللي كنا نعرفه واضح انهم غيروه من غير مايقولوا لنا وظهرت كلمة غريبة اسمها "مرتبط"او"مرتبطة"ودي بقى بتتقال على اي اتنين على علاقة عاطفية خارج نطاق الخطوبة والجواز وبدون علم الاهل.

انا شخصيا راجل بقى بلدي شوية مابعترفش بكلمة مرتبط دي بقى خالص وكان لما حد ييجي يقولي على فلان انه مرتبط بفلانة اقول له على طول اه ه ه ه ماشي معاها يعني.

وطبعا احس ان اللي قدامي دة اشمئز مني فجأة وبص لي من تحت لفوق كدة وقالي عيب يابني دول مرتبطين!!!!!!!!

الغريب بقى اني لو كنت اعرف 10 اشخاص كانوا "مرتبطين"ايام الجامعة بلاقي ان 2 منهم بس اللي موضوعهم اكتمل بالجواز وان الباقي اكتشفوا انهم ضيعوا في الاوهام عمرهم.

وواضح بقى ان شركات التسويق والدعاية في مصر فهمت الفولة وقررت تلعب على موضوع الارتباط دة جامد وطبعا كلكم لاحظتم اننا بنعيش اليومين دول مولد سيدي الفالانتين.

هوجة فالانطاين بتقتحم مصر......مصر احمرت يا جدعااان....ايه كمية القلوب اللي مش طبيعية اللي في المحلات دي؟

امشي في الشارع الاقي قلوب ابص ع الفتارين بتاعة المحلات الاقي قلوب حمرا......اتفرج ع التليفزيون الاقيهم بيتكلموا ع الفالانطاين......اسمع نجوم اف ام الاقيها اتحولت ل فالانطاين اف ام برامج الفالانطاين اغاني الفالانطاين وكله كوم بقى والاعلانات كوم تاني.

مفيش شركة يا جماعة بتعلن عن نفسها اليومين دول الا وعايزة تحط كلمة فالانطاين في جملة مفيدة.

اشتري تليفون هدية لنصك التاني.........روحوا سينما كذا في الفالانطابن.......الحق اتصل بشركة كذا علشان توصللك هديتك في الفالانطاين بسرعة.........محلات كذا بتقدم تخفيضات يوم الفالانطاين........شركة كذا للمحمول بتقوللك اتكلم زي مانت عايز علشان الفالانطاين.

مش ممكن اسهااااااااااااااااااااااااال حب بيجتاح مصر.

موضوع الفالانطاين دة فكرني بفيلم محمد هنيدي "جاءنا البيان التالي"لما راح لراجل مرمي وسط العشوائيات ونص جسمه جوة بلاعة مجاري ودخل عليه بالميكروفون يقول له( هابي نيو يير)حسيت ان احنا الشعب المصري اللي مرمي في المجاري دة وان السادة الاعلاميين جايين علينا واحنا في عز تسليك البلاعة وبيقولوا لنا هابي فالانطاين

وعلى فكرة:

كل فالانطابن وانتوا طيبين

بالمناسبة:

هتقضوا الفالانطاين داي فين السنة دي؟!!!!!!!!!!

Saturday, 10 February 2007

الصلاة النهاردة ممنوعة


الصورة دي المصري اليوم نشرتها النهاردة في عددها الصادر اليوم بتاريخ 10 فبراير 2007
الصورة دي للامن المصري وهو بيمنع المصليين من الوصول للجامع الازهر لتأدية صلاة الجمعة 9 فبراير 2007 وذلك خوفا من اندلاع مظاهرات للتنديد بالاعمال الاسرائيلية حول المسجد الاقصى.
انا مش هعلق على الصورة ولكن هكتفي بالسوأل:
احنا وصلنا للدرجة دي؟ جه اليوم اللي بنمنع الناس فيه من الصلاة؟
معقول؟!!!!!!!!!!!!!!!!!!!!!!!!!

Friday, 9 February 2007

التوك توك


اصعب حاجة ممكن يواجهها اي واحد لما يناقش قضية معينة هي انه يكون محايد في القضية دي بمعنى انه مايكونشي ليه مصلحة في مساندة طرف على حساب طرف تاني.

انك تنظر لقضية ما نظرة طائر محلق يعني من فوق هتلاقي ان كل طرف من الاطراف ليه منطقه وله وجاهته في التفكير.

انا بتكلم عن موضوع التوك توك والتوك توك دة رغم حجمه الصغير دة الا انه قضية انا متوقع انها هتنفجر مرة واحدة على الرغم انه بدأ يكون مثار جدل فعلا.

بالنسبة للتوك توك الناس منقسمة لفريقين فريق بيطال بالغاء التوك توك دة تماما وانه كارثة جديدة بتضاف للكوارث والمصائب اليومية اللي موجودة في الشارع المصري

الفريق التاني بيشوف ان التوك توك دة جه نجدة من السما وانه من افضل اختراعات القرن العشرين.

بالنسبة للفريق الاول اللي بيشوف التوك توك دة مصيبة رأيهم ان التوك توك دة انتشر بشكل كبير جدا وبصورة عشوائية وفي نفس الوقت التوك توك دة مش مرخص ومن غير نمر وبالتالي سهل جدا انه يعمل اي مصيبة وطبعا عمرك ماهتاخد مع اللي سايقه لا حق ولا باطل لانه مش مرخص اساسا وبعدين اللي بيسوق التوك توك دة اطفال في معظم الحالات وبالتالي فرصة الحوادث معاه بتكون كبيرة جدا.

كمان المشرحة مش ناقصة قتلى والشارع المصري بيعاني من فوضى وعشوائية رهيبة مش مطلوب كمان ان احنا نزود البلاوي اللي في الشارع دي كمان بالتوك توك.

وبعدين انتم مش شايفين الزحمة؟ هي الشوارع ناقصة؟ هيمشوا فين دول؟ دة احنا كدة ساعتها مش هنلاقي مكان الناس تمشي فيها على رجلها.

وبعدين انتم مش شايفين سواقين الميكروباص عاملين ايه في البلد؟ كمان هندور على سواقين التوك توك؟

دة رأي قطاع كبير من الناس وغالبا دة رأي الناس اللي عايشين في المدن او اصحاب السيارات بانواعها واللي بيقاسوا كل يوم على الطرق وفي الشوارع.

الفريق التاني بقى هو انصار التوك توك واللي بيشوف ان الغاء التوك توك دة كارثة بكل المقاييس ومعظم الناس دول قرويين او لا يمتلكوا سيارة من الاساس او محدودي الدخل.

الناس دول بيشوفوا ان التوك توك دة حل ازمة كبيرة جدا لهم لانها وسيلة مواصلات رخيصة جدا لو قارناها مع الميكروباص او التاكسي طبعا.

كمان التوك توك دة بيوصل لاماكن محدش يعرف يوصل لها غيره في القرى والشوارع الضيقة.

واذا كان التوك توك دة مش مرخص خلاص يا دار ما دخلك شر.......رخصوووووه

واذا كنتم خايفين يزحم المدن والطرق والشوارع الرئيسية خلاص اعملوا القوانين اللي تحد من حركته في المدن الكبيرة والشوارع الزحمة بدل ماتحرمونا من وسيلة المواصلات السهلة والرخيصة دي.

كمان التوك توك دة بيشتغل عليه شباب وفاتح بيوت ناس ازاي بكل سهولة وبساطة كدة بتطالب بالغاء التوك توك وتسريح الشباب دة؟

يعني يرجعوا يقعدوا ع القهوة ولا يتحولوا لبلطجية ومجرمين ونبقى حرمناهم من رزقهم وقدمنا للمجتمع على طبق من دهب بلطجية وعواطلية؟

وبعدين بدل ما تتشطروا ع التوك توك شوفو الميكروباص والازمة والمافيا اللي بيسببها السواقين بتوعه كمان الغي الكارو والحنطور اللي لسه بتجري في الشوارع المصرية لحد دلوقتي.

دول كانوا وجهتين النظر وزي مانتم شايفين طالما انت مالكش مصلحة بتحتار ايهم اصح؟

التوك توك دة خطر كبير لازم نحمي الناس والشوارع منه بدري بدري ولا نعمة للناس الغلابة كانوا محتاجينها؟

يعني نديها توك توك ولا بلاها توك توك؟

Tuesday, 6 February 2007

المتناقض

معقول يكون في انسان بيحمل كل التناقضات دي جواه؟ كل الخير دة جوة انسان ومعاه كل كمية السلبيات دي؟
ممكن حد يبقى خير ومحب للخير وفي نفس الوقت يكون جوة قلبه بعض الحقد والغرور؟
ممكن حد يكون بيحب يتفرج على ميلودي ومزيكا وسترايك ويكون كمان بيحب نشرة الاخبار في الجزيرة؟
ممكن حد يكون بيحب يسمع عمرو دياب وكمان بيعشق حسن نصر الله.
ممكن بني ادم يكون بيحب مصر حب رهيب وفي نفس الوقت كاره كل حاجة في البلد؟
ممكن حد ينام في يوم من الايام على صوت اسامة منير وحكايات العشاق في انا والنجوم وهواك؟ وتاني يوم ينام على صوت قرأن كريم؟
ممكن حد بيحب يتكلم في السياسة ويعشق يتكلم عن هموم الوطن وفي نفس الوقت ممكن يتكلم على الفيديو كليب الجديد للمطرب الفلاني واللوك الجديد للمطربة العلانية؟
ممكن حد يكون بيحب يقرا الدستور وغاوي قراية جرايد سياسية وجادة وفي نفس الوقت بيحب يقرا عين وما بيفوتش عدد من وشوشة؟
ممكن حد يكون متدين وبيعرف ربنا وبيصلي الفروض بتاعته وفي نفس الوقت عينه زايغة شوية؟
تخيلوا ممكن.........
على الرغم ان معظم الشباب حاجة من اتنين يا جاد على طول الخط يا اما فاضي تماما الا ان البني ادم دة موجود
تفتكروا دة حالة شاذة؟
معقول الشخص دة لوحده؟
يعني مفيش منه اتنين؟
مش عارف............................

Monday, 5 February 2007

قنوات الخليج الغنائية على الدش

في كمية قنوات اغاني على الدش مش طبيعية يا جماعة!!!!!!كمية رهيبة من المحطات الغنائية او المفروض انها نهائية ومن كتر القنوات دي الواحد فعلا مش عارف عددها قد ايه.
والغريب ان معظم قنوات الاغاني دي خليجية و دة بيخليني عمال اضرب كف على كف
المجتمعات الخليجية بتدعي انها محافظة وانها مجتمعات كاملة الاوصاف ودة للاسف الفكرة اللي الناس واخداها على الدول الخليجية انها حامية الاخلاق والاسلام وهي والله العظيم وربنا شاهد تجمعات للفسق والبلاوي السودة اللي الواحد مش ممكن يتخيل انها تكون موجودة في دولة المفروض انها اسلامية.
لما عيشت في السعودية سنتين ورجعت مصر بعد كدة عرفت فعلا ان احنا مجتمع سوي لا هو مجتمع من الملائكة ولا هو مجتمع من الشياطين ولكنه مجتمع فيه الخير وفيه الشر زي اي مكان في الدنيا لكن مصر فيها الخير اكبر بكتير من الشر والفساد عكس ابناء الخليج اللي الفساد مستشري في كل مكان .
في مصر في اماكن للفساد معروفة واللي عايز يعمل حاجة بيروح المكان المناسب لكدة
انما الدول اياها بتلاقي ان الفساد منتشر ومتوغل جوة المجتمع ومن حيث لا تدري.
نرجع لموضوع القنوات الفضائية الغنائية الكتيرة جدا اللي بلعت النايل سات تقريبا ووصلت لاكتر من 40 قناة؟ نفسي اعرف هل فيه ناس بيتفرجوا على القنوات الخليجية زي الغنائية والخليجية والديرة والكلام دة كله؟
ولو مفيش حد بيتفرج عليها طيب فاتحينها ليه؟
ولو في حد بيتفرج عليها اكيد خلايجة وبما انهم من الخليج طيب ليه مش بيحطوا قنواتهم اللطيفة دي على العرب سات بدل مايزحموا لنا القمر بتاعنا بقنوات مابيتفرجش عليها غيرهم........

fb comments

wibiya widget

LinkWithin

Related Posts with Thumbnails