Wednesday, 26 December 2007

ثوابت خنقاني


لو انت راجل تليفزيونجي (غاوي تليفزيون) او جورنانجي (غاوي و متابع للجرايد) وكمان ليك شوية صغيرين في السياسة على شوية بسيطة كدة في الرياضة....هتكتشف ببساطة ان اعلامنا المصري عايش على شوية ثوابت في الكلام والحوار لا تتغير من يوم ما وعيت ع الدنيا.
حفظناها عن ظهر قلب
وان في كلمات وحوارات في الاعلام لازم تكون متبوعة ببعض الالفاظ بعدها علشان تعدي وتمر من الرقابة والمساءلة القانونية او الجماهيرية او النقدية.
وعلشان نوضح الصورة اسمح لي اني اقول شوية امثلة بسيطة علشان تعرف ان احنا عايشين في زمن القوالب الجامدة والخوف الاعلامي الشديد:
ومهما السنين بتعدي وهامش الحرية بيتسع شوية ويضيق شوية الا والقوالب الجامدة دي موجودة ولا يمكن المساس بها على الاطلاق
ماتلاقيش اي حوار بيتكلم عن القوات المسلحة وينقدها.....اتحداك انك تكون شاهدت منظر زي كدة او حتى قريت حوار لحد بينتقد القوات المسلحة
وكأن القوات المسلحة وقياداتها دي منزهة عن الخطأ.....دة حتى طلعت السادات ماغلطش فيها على الاطلاق ولا جاب سيرتها بسوء ومع ذلك لبس تهمة اهانة للقوات المسلحة
نفسي اعرف ايه الحكمة من عدم انتقاد القوات المسلحة وكأن انتقاد اي شيء بيقلل من هيبته...وهل نقد اي فرد او مؤسسة بيعني اهانتها او التقليل من شأنها؟
واذا كانت الاجابة لا....يبقى ليه الجيش والقضاء منزهين عن النقد ؟
بلاش دي
ليه كل ماحد يتكلم عن القضاء المصري لازم يشيد بنزاهته وطهارته وكفاءته....ولازم تلاقي عبارة ان القضاء المصري مشهود له بالنزاهة على مستوى العالم
طيب قضاء مين اللي مش مشهود له بالنزاهة؟!!!!!!!
هم القضاة دول مش ناس مننا....فيهم الجيد وفيهم السيء......فيهم ناس نفسها أمارة بالطيب والتقوى والعدل وكمان ممكن تلاقي فيهم ناس نفسها أمارة بالسوء؟
وبعدين تلاقي حد طالع بينتقد حكم قضائي مش على مزاجه او هواه وبيقول اللي هو عايزه واللي نفسه فيه وبعدها لازم يختم كلامه بأحترامه للقضاء ونزاهته وقدسيته.......................!!!!!!!
اما بقى الشرطة.....فحدث ولا حرج
نفسي حد يتكلم عن الشرطة بدون ما يشكرها على مجهودها الكبير والرهيب في حفظ الأمن والأمان للوطن والمواطن
على الرغم ان دي شغلتهم اساسا
وهي وظيفة اي شرطة في اي مكان في الدنيا ايه غير كدة؟
يعني بنفس المنطق لازم اشكر كل طبيب علشان بيعالج مرضاه...ولازم احيي كل صيدلي صرف دواء لمواطن مريض.....وكمان البقالين...لابد من شكرهم الوفير على توفيرهم للجبنة والزيتون في محلات البقالة بتاعتهم
وبعدين فين الامن والامان دة اللي بنشكر الشرطة علشان وفرتهم؟!!!!!!
نفسي الاقي حد اعرفه اتسرقت منه حاجة والشرطة رجعتها له تاني؟
حد سمع عن حد اتسرق منه تليفونه او سيارته او حتى شقته..وراح عمل محضر وبعدها بكام يوم رجعت له مسروقاته؟
وبعدين من ضمن القوالب الصماء في الاعلام ان لازم كل مانتكلم عن تعذيب الشرطة للمواطنين نتبعها بكلمة قلة
قلة من ضباط الشرطة
بس نفسي حد يقول لي القلة دي كام واحد بالضبط؟
قالب كمان تلاقيه متلازم في اعلامنا وهي عند الحديث عن رئيس الجمهورية وتوجيهاته...لازم رئيس الجمهورية هنا يشار اليه بكلمة (القيادة السياسية)....تحس ان كلمة رئيس الجمهورية هنا عورة ماينفعش تتقال
على الرغم ان رئيس الجمهورية هو القيادة السياسية وان القيادة السياسية هي رئيس الجمهورية
فتلاقي المسئول من دول (اللي هو اصلا مش مسئول عن اي حاجة) تلاقيه بيقول....والقيادة السياسية مهتمة بالموضوع الفلاني
طب ماتقول يا عم ان رئيس الجمهورية هو اللي مهتم...ولا هي فزلكة وخلاص
طب سيبك من السياسة يمكن معذورين برضة ويمكن التعليمات اللي بتتوارثها الاجيال مؤثرة عليهم شوية.....
الرياضة كمان فيها ثوابت اعلامية ما ينفعش معلق او مقدم برامج رياضية محترم يحيد عنها والا يبقى نهاره اسود من قرن الخروب
اهمها طبعا التوازن بين الاهلي والزمالك في كل شيء واي شيء....ماينفعش يشيد بنادي من غير ما يشيد بالتاني.....لا يمكن ابدا ينتقد نادي منهم من غير ما يمسي كدة على النادي التاني بنقداية صغيرة بدون اي سبب
ماينفعش يقول اسم الاهلي قبل الزمالك او اسم الزمالك قبل الاهلي والا جمهور النادي التاني يزعل......قمة التفاهة والله.
لو اي معلق رياضي مالتزمش في برنامجه او في تعليقه على الماتش بالموضوعات دي هيبقى ليلته مش معدية
من يوم مااتفرجت على كورة والحكاية دي بتحصل....كرهونا في الكورة ربنا يسامحهم.
اما بقى في المجال الفني....فدول بقى ملك تاني خالص...
عايشين في دولة جوة الدولة
تسمع حوار لأي فنان او فنانة تخاف ع الناس دي من الحسد من كتر حبهم لبعض....وتلاقيه او تلاقيها عمال يشرح باستفاضة رهيبة عن مقدار الحب اللي كان اللوكيشن غرقان فيه وان فلان دة انسان جميل...(بالمناسبة انا مش عارف ليه اضافة كلمة جميل لوصف اي حد في الوسط الفني) تحس انها عدوى عندهم
ويا سلام لما تسمع فنانة بتوصف تصوير اخر مشهد من مشاهد فيلمها وقد ايه التأثر والدموع المصاحبة لنهاية تصوير الفيلم او المسلسل.
كلام محفوظ عن ظهر قلب...انا ساعات بأردد اجابة السؤال قبل ما يسأل من كتر ماانا سمعت اجابات السؤال دة قبل كدة

اما بقى عن الشو اللي بيتعمل لما ممثل بيموت فدي حاجة مكررة لدرجة الملل.....الناس دول يا جماعة اصبح عندهم قدرة رهيبة على التمثيل حتى جوة حياتهم الخاصة

افتكروا معايا جنازة احمد زكي واللي بعض الممثلين والممثلات عملوه عند وفاته....انا نفسي حسيت ان التمثيل انتهى في مصر خلاص وان الناس دي مش هتعرف ترجع تمثل تاني من كتر الحزن والكأبة اللي هم فيه

اسبوع ليس اكثر ولقيت اللي كانوا مموتين نفسهم دول...مموتين نفسهم برضة بس من الرقص في الحفلات الخاصة واعياد الميلاد

وهلم جر......نصيحة

لو فنان توفى الى رحمة الله ولقيت زميلة له بتبكي بحرقة اوعى تتأثر وانتظرها في اقرب عيد ميلاد او حفلة وشاهد ابداعاتها

كل اللي فات دة كان بعض بعض وليس كل الثوابت والقوالب الجامدة اللي اتعودنا عليها سواء في السياسة او في الرياضة او في الفن , ولم تعد تلفت نظر الكثيرين من تكرارها؟

ياترى هييجي يوم ونتخلص من قوالب الاعلام دي

نفسي اعلام بلدنا يحترمنا

اشك




33 comments:

  1. إذا كانت البلد اصلا مابتحترمناش عايز اعلامها يحترمنا؟؟
    دى بلد تحسسك كدة انك تقييييييييييل على قلبها مع انها بلدك اصلا وبلد جدود جدودك وبلد عيالك .. ده انت اللى فاكر كدة لكن الحقيقة من وجهة نظرهم انها بلد ابوهم هما وبس واحنا مجرد ناس اسمنا الشعب .. كل وظيفيتنا فى الحياة اننا نتحكم ونصقف ونتفرج ونروح السنيمات ونكع فى فلوس وأسعار كل حاجة تغلى علينا ويطلع عنينا فى المواصلات ومنلاقيش شغل .. وهما ياخدوا مناصب جديدة وجوايز فى المهرجانات ويجيبوا فى عربيات جديدة وفيلات جديدة وتعليم برا على اعلى مستوى لعيالهم .. صحيح بمناسبة عيالهم اكيد طبعا لازم عيالهم يطلعوا زيهم .. ابن السياسي يبقى سياسي وابن الفنان فنان ده شئ مفروغ منه طبعا

    مبروك عليهم بلدهم بجد .. لان البلد دى بتاعتهم هما مش بتاعتنا

    ReplyDelete
  2. السلام عليكم ورحمة اللة وبركاتة اسمحلى اقولك مش فهمة حاجة من تعليقك عليا اخر مرة بس مش مهم حقيقى بوست جاااااااااااااااااامد كالعادةوان دل فيدل على كاتب واعى وعين منقبة بكسر القاف حقيقى ملاحظة قوية اتفق معها على طول الخط ولعل منبعها التسييس الاعلامى والزى يعد مهندسة فى مصر صفوت الشريف الزى نجح ف تضليل المجتمع لفترة لكن خلاص بانت الحقيقة واتكشفت اللعبة والحقيقة هما بداو بالسياسة واتعودو على كدة فن ورياضة وكلوووووووووووو

    ReplyDelete
  3. ثوابت خنقاك وخنقانا معاك
    هيا فعلا حاجة تخنق وبطريقة مش طبيعية
    وبعدين البلد كلها كده هاتيجى على الأعلام
    أنا عن نفسى فيه حاجة ملزمانى غير الحاجات اللى أنت قلتها كلها فى شغلى بالظبط والكلام اللى بيتكتب فى الجرايد وبيجى فى التليفزون
    والحاجة دى أنى شغالة بعقد وطبعا هو مش شغل ده ذل من الأخر واللى يغيظ فى كل الحوارات فى التليفزيون والأحاديث فى الجرايد تلاقيهم يقولوا العاملين بالعقود مساويين للمعينين فى كل شىء والحكاية دى أتكررت يجى ميت مرة من ساعة ما أنا أشتغلت وطبعا كل ده كذب
    وشوية يقول لك جارى تثبيت كل العاملين بالعقود وبرضة كله كدب يعنى كل الحاجات اللى بتحصل كدب فى كدب

    وقيس بقى على ده كل حاجة بتتقال اعرف أن عكسها هو اللى حاصل فى كل حاجة فى حياتنا

    تحياتى لك

    ReplyDelete
  4. الله يطمنك يا أحمد أصل انا منقطع بقالي مدة كدة بتاع 19 سنة عن التليفزيون المصري فانت بتطمني إن انا متابع من بعيد يعني وانهم محافظين على مستواهم

    هذه تدوينت المختارة اليوم

    ReplyDelete
  5. هيا يعنى جت على الاعلام
    اذا كانت الحكومه نفسها مبتحترمناش
    يبقى مين هيحترمنا

    اولى انت ايه عدل فى البلد دى يدل على احترام اهلها
    لا معامله ولا نضافه ولا مراعاه لاى حاجه

    بس المهم كام دخل جيب مين
    وابنى اسمه ميجيش فى القضيه الفلانيه ..انت مش عارف ده ابن مين
    والبزرميط فى ازدياد

    يلاااااااااااا
    حسبنا الله ونعم الوكيل

    ReplyDelete
  6. بالنسبة للكلام في السياسة فبالفعل هناك محظورات واضحة جدًا في الحوار كما اشرت إليها
    والكلام في الكورة أنا معاك جدًا بس بصراحة ماليش فيها
    أما الفن لأني متابع له وعايش جواه فمصطلح الفنان الجميل بات يتناقل في الوسط كلقب الفنان القدير
    بس الأنكت لما تطلع لنا ممثلة قدمت مشاهد جنسية في فيلم ما وتكثر من مقولة الحمدلله ... وربنا وفقني .. والنجاح من عند ربنا .. وكل العبارات التي تعطيك إيحاء أنها تحدثك بعد آداء ركعتين شكر لله على مشاهدها الساخنة الناجحة في الفيلم
    قمة التناقد
    وعجبي

    خالص تحياتي

    ReplyDelete
  7. انا مش متابعهم من زمااااااااااااان

    لكن كلامك فعلا مفيد وواقعي

    مدونة جميلة ورايقة

    وشرفتني فعلا بزيارتك

    دمت بكل الود

    ReplyDelete
  8. عبقال عندك من ساعه ما اشتريت الدش
    وانا مش عارفه الزرار بتاع القنوات المصريه منين
    ومن ساعه لما اشتريت الكمبيوتر
    مش عارفه سعر الجرنال دلوقتى كام
    لكن
    اذا كانت الثوابت دى لسه عايشه
    يبقى انا لسه بتفرج وبقراء

    ReplyDelete
  9. نسبت تضيف جمله هامه بتكرر كتيير الفتره الماضيه و كأنها حقيقه ثابته لا تقبل المناقشه
    أن الزمالك عنده أفضل لاعيبه في مصر
    :)
    تحياتي

    ReplyDelete
  10. هما كدة ..ومش هايتغيروا ..الخوف عندهم واصل لاقصى درجاته ..

    لو قالوا نقد ..لازم يختموه فى الاّخر بصورة احسن من كدة ..صورة ما تجبش وجع الراس بمعنى اصح

    ولو على المتناقضات اللى عندنا فهى كتيرة اوى ...لو فضلت تعدد فيها من هنا للسنة الجاية مش هاتخلص

    ....

    وهما كدة كدة مش فارقة معاهم حاجة ...اصل مين اللى بيدفع تمن كل حاجة فى الاّخر يعنى غير الشعب الغلبان

    ؟!!!!


    ربنا يكون فى عونا


    .........


    المدونة هنا حلوة اوى بصراحة وموضوعتها تشد جامد ..بس نتيجة لضيق الوقت (امتحانات بقا ) فإن شاء الله هاقرأها كلها فى اقرب فرصة ممكنة ..

    زاكيد زيارتى هاتتعدد ان شاء الله


    تحياتى


    :)

    ReplyDelete
  11. ههههههههههههههه

    هي دي يا باشا

    ابتسم الاعلام المصري بخير

    ReplyDelete
  12. انا مش عارف ارد عليك اقولك ايه
    انت واخد الكلام من علي لساني
    انا مش هنقدك ..عارف ليه
    مش عشان ثوابت المدونين والله :D
    بس علشان فعلا الموضوع كله صح

    ReplyDelete
  13. انسانة:
    هم مش قالوا البيت بيتك؟!!!!
    كفاية علينا البيت وكفاية عليهم بقية البلد
    دة حتى دي مستخسرينها
    دة البيت كمان مش بيتنا
    تحياتي ليكي

    ReplyDelete
  14. شيكابالا:
    دة بعض ما عندنا يا ست شيكابالا
    ومش مهم تفهمي الكومنت اللي فات..مش لازم البني ادم يفهم كل حاجة وقت ماهو عايز
    ممكن جدا الايام هي اللي تفهمك ....
    الف شكر ليكي يا فندم على المديح والاطراء دول اللي انا مااستهلهمش
    على فكرة:
    مش صفوت الشريف السبب...السبب في عساكر يوليو اللي سيسوا الاعلام والجرايد وجعلوا من مؤسساتنا الاعلامية ابواق لانقلابهم العسكري...صفوت الشريف مجرد امتداد لسياسات ما بعد انقلاب يوليو
    على فكرة كمان:
    الزي..مش بتتكتب كدة...بتتكتب الذي
    الانسان بيعيش يتعلم برضة
    تحياتي واحتراماتي

    ReplyDelete
  15. bosbos:
    التليفزيون والجرايد ممكن يصوروا للناس ان العقد اهم بكتير وعائده مجزي جدا لو قارناه بالوظيفة الدائمة
    طول ما الاوامر بتصدر يبقى اي حاجة ممكن تتقال
    لو الاوامر صدرت لهم انهم يقنعوا الناس ان الشمس بتشرق من الغرب..هيحصل
    بس برضة الناس مش هتقتنع لان محدش بيصدقهم اساسا
    تحياتي واحتراماتي

    ReplyDelete
  16. عصفور المدينة:
    الف شكر يا باشمهندس على اختيارتك لتدوينتي المتواضعة...دة شرف كبير ليا
    بالنسبة للاعلام...لو غبت 100 سنة مش بس 19 هترجع تلاقيهم زي ماهم ويمكن كمان اسوأ
    طول ما الاعلام حكومي وما بيعبرش عن الناس بقدر ما بيعبر عن الحكومة..طول ما بينحدر
    هو القنوات الخاصة ناجحة من شوية؟
    تحياتي واحتراماتي

    ReplyDelete
  17. معاك حق والله .. لاحظت هذه الاكلاشيهات كثيراً
    وهي في رايي نتجية للنفاق الاجتماعي والقهر والشموليه التي عاشها المصري من ازمنة سحيقة متوارثه الى ان جاء ناصر فكان القشة التي قسمت ظهر البعير ودون خوض في سلبيات او ايجابيات ناصر فلا احد ينكر ان له اليد الطولى في كبت الحريات ونحت المصطلحات من نكسه الثورة الشعبيه ,., وقوى الشعب ... ثم على نفس الوتيرة اقصد نفس التاثر لا نفس الشاكله ثورة التصحيح للسادات ودعم الخبز انتهاء بما ذكرته انت في البوست الرائع.....


    انها غياب الحرية التي تقتل الابداع و التي تجعل المرء خائفا يتلفت في كل شيء حتى وهو يتنفس...

    خالص تحياتي

    ReplyDelete
  18. السلام عليكم ميرسى كتير على نصايحك الجامدة دى يا دكتور بس ياريت بلاش كل اخطاءنا نعلقها على يوليو دة يبقى تجنى على ناس كل همهم التطهير اسفة هكرر زيارتى للمدونة لمواضعيها الشيقة جدا واستحملنى لحد مااتعلم الكتابة تحياتى واحتراماتى

    ReplyDelete
  19. shyma:
    اصل الاصل في الموضوع دة يا شيماء ان يبقى الاعلام بتاع الشعب مش بتاع حد معين...بس دة طبعا المفروض مش الواقع
    انما بما نه تم الاستيلاء عليه بوضع اليد..فلازم تبقى دي النتيجة
    وعلى رأيك:
    حسبنا الله ونعم الوكيل
    تحياتي واحتراماتي

    ReplyDelete
  20. ياسر حسين:
    الموضوع دة بيفكرني بالحرامي اللي بيقرا الفاتحة قبل مايسرق
    او يقول توكلت على الله وهو بيفتح الخزنة
    بس يبقى بقى سؤال انا والله مش عارف اجابته:
    هم الناس دي لما بيقولوا كدة بيتكلموا جد؟..يعني فعلا بيشكروا ربنا ولا هم عارفين البلاوي السودة اللي بيعملوها بس بيقولوا كدة منظر يعني؟
    تحياتي واحتراماتي

    ReplyDelete
  21. صاحب المضيفة:
    ارجو اعتبار مدونتي المتواضعة دي بمثابة مضيفة تانية ليك
    ياريت تشرفني بالزيارة باستمرار
    تحياتي

    ReplyDelete
  22. فرنسا هانم:
    اصل المصيبة يا فرنسا هانم ان ساعات العدوى بتتنقل للقنوات المصرية الخاصة
    مانتي عارفة برضة ان كله بينفد على بعضه
    وعد غنمك يا جحا
    ساعات تلاقي دريم جالها دور نفاق صغير...مايضرش برضة انك تلاقي المحور عندها شوية مجاملة كدة ع الماشي
    الامر ما يسلمش برضة
    تأكدي ان الثوابت دي موجودة ومش هتروح في القريب العاجل
    تحياتي واحتراماتي

    ReplyDelete
  23. micheal:
    طب بتفكرني ليه يا مايكل وانا كنت بسكر علشان انسى
    ونسيت كمان ان المدرب المصري مشهود له بالكفاءة
    وان الفرق كلها لما بنلاعبها بتكون خايفة ومذعورة من قوة الفريق المصري
    وان حازم هو امام الموهوبين
    وان جماهير الاسماعيلي كلها جماهير محترمة بس هم بس منهم لله قلة منحرفة هي اللي بتشوه سمعة الجمهور العظيم دة...
    اقول ايه ولا ايه
    سيبني يابني كاتم في قلبي وساكت
    كل سنة وانت طيب

    ReplyDelete
  24. انت لسة واخد بالك دلوقتى من موضوع القوالب الثابتة فى الاعلام ده ؟


    بس احقاقا للحق انا احتكيت بناس قليلين جدا مش كده و مالهموش فى النفاق و نتمنى انهم يكتروا لان الاعلام ده مرآة المجتمع

    ReplyDelete
  25. oceaneyes:
    يعني خلاص مفيش فايدة؟
    هنفضل كدة في التخلف دة؟
    الف الف شكر على كلامك على مدونتي المتواضعة
    انا ي انتظار متابعاتك للمدونة باستمرار..وربنا يوفقك في الامتحانات
    اهلا في اي وقت
    تحياتي واحتراماتي

    ReplyDelete
  26. amr ahmed:
    ابتسم ايه بس؟
    دة انا بعيط
    دي حاجة تفرس وتنقط وتوديك للمورستان في اسرع وقت ممكن
    ع الخانكة بالسريـــــــــــــع
    تحياتي واحتراماتي

    ReplyDelete
  27. zika:
    ياباشا...دة شرف كبير ليا
    عموما تقول ايه بس....توارد خواطر
    او ممكن نقول كلنا في الهم سواء
    همنا واحد...وللاسف ادمغتنا اتشكلت بمعرفة اعلام متخلف...ممكن نكون ربنا اكرمنا وقدرنا نفهم ونتحرر من القوالب الجامدة بتاعتهم..ما بالك بقى بسكان الريف وضعاف الثقافة اللي بيتأثروا بأعلام زي دة
    تحياتي واحتراماتي

    ReplyDelete
  28. ____0000000000______0000000000_____
    __000________000__000________000___
    _000___________0000___________000__
    000_____________00_____________000_
    000________Happy New Year______000_
    000_____________FOR____________000_
    _000____________ALL___________000__
    __000________________________000___
    ___000___Ahmed Al-Sabbagh___000____
    _____000__________________000______
    _______000______________000________
    _________000__________000__________
    ____________000____000_____________
    ______________00__00_______________
    ________________00_________________
    ________________ 0 ________________

    ReplyDelete
  29. osama:
    انا متفق معاك تماما وبشوف ان اساس كل هذا البلاء الغارقة فيه مصر هو جمال عبد الناصر صاحب انقلاب يوليو
    شخص امتلك ارادة التغيير وامتلك امكانية التغيير ولكنه احتل مصر واحتل كرسي الحكم
    وكل من بعده هو امتداد لنفس الحكم مع اختلاف التفاصيل
    تحياتي

    ReplyDelete
  30. شيكابالا:
    راجعي نفسك كدة كويس ...وراجعي الفرق مابين قائد انقلاب موريتانيا العسكري في 2005 وقائد انقلاب مصر العسكري 1952 وانتي هتعرفي انا اقصد ايه؟
    تحياتي ليكي

    ReplyDelete
  31. عاليا حليم:
    والله واخد بالي ىمن زمان قوي بس ما تكلمتش غير بعد ما فاض بي بصراحة
    طبعا في ناس مالهمش في النفاق بس للاسف بيخضعوا للخطوط الحمراء اللي قنواتهم التليفزيونية او صحفهم اللي بيشتغلوا فيها حطاها ليهم وبالتالي بتبقى المحصلة واحدة
    قوالب وثوابت جامدة
    تحياتي

    ReplyDelete
  32. ahmed al sabbagh:
    happy new year for you
    كنت اتمنى تشاركنا بالتعليق ع الموضوع
    تحياتي واحتراماتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails