Thursday, 20 December 2007

نفسنة حريمي



دخلت معاها في جدل عقيم لم يسفر عن شيء
ايهمااكثر متانة وصدق وقوة؟
صداقة الصبيان لبعضهم؟
ولا صداقة البنات لبعضهن؟
انا عن نفسي مؤمن تماما ان الرجال مع بعضهم رجالة.....صداقتهم متينة لا تتأثر بالتفاهات والهيافات..لا تهزها عوامل الغيرة والنفسنة
مفيش راجل بيغير من واحد صاحبه...مفيش ولد بيحس بالحسرة ان صاحبه وانتيمه خطب او اتجوز قبله.....!!!!!
مسمعناش عن ولد افسد علاقة واحد صاحبه بخطيبته علشان غيران منه ولا زعلان انه سبقه في الجواز
ماسمعناش كتير عن ولد فضح واحد صاحبه ولا صوره في اوضاع غير لائقة؟
مش كتير برضة الشاب اللي بيخطف خطيبة واحد صاحبه على الرغم ان النسبة دي في البنات مش قليلة
طبعا في حالات استثناء وحالات شاذة بس بتفضل برضة النفسنة الحريمي سمة مميزة بين بنات حواء
بصت لي شذرا وقالت لي:
ايه الكلام العجيب اللي انت بتقوله دة
دة الاخلاص في البنات
دي الصداقة يعني بنات
دة البنت لصاحبتها يعني سرها
اولاد يعني عنف يعني غدر يعني صراع ومنافسة
انما
بنات اصحاب يعني رومانسية يعني هدوء يعني حب
ماوصلناش لحل وسط
سيبتها وكل منا مقتنع باللي في دماغه
ومشيت ولسان حالي بيقول
ان كيدهن عظيم

37 comments:

  1. Nice blog. I will keep reading. Please take the time to visit my blog & HAPPY A NEW YEAR

    ReplyDelete
  2. كل سنة و انتا طيب الاول
    انا شايف ان النفسنة الرجالي غلبت اليومين دول على النفسنة البناتي
    و فيه شيء غريب
    ساعات كتير جدا بالالقي صداقة البنت و الولد او خلينا نقول زمالتهم في كلية او شغل بتبقى اقوى من زمالة ولد و ولد او بنت و بنت
    خالص تحياتي

    ReplyDelete
  3. This comment has been removed by the author.

    ReplyDelete
  4. تصدق بالله .. انا كتير جدا بقول يا بخت اهل المريخ انهم من المريخ بسبب الصداقة لان بلاحظ فعلا ان صداقة الولاد مع بعضهم احلى وأدوم وأقوى وبجد جدعنة فوق الوصف

    البنت او ساكنة كوكب الزهرة من طبيعتها انها بتغير .. الغيرة جزء لا يتجزأ من اى مرأة حتى لو كانت قديسة .. ده انت حتى لو قريت فى السيرة حتلاقى مواقف غيرة من زوجات الرسول اللى هما أمهات المؤمنين .. فاكرة واقعة كنت سمعت عنها ان زوجة من زوجات سيدنا محمد عليه الصلاة والسلام كانت غيرانة وحصل موقف كدة مش فاكراه بالتفصيل .. المهم ان رد فعل سيدنا محمد انه ابتسم وقال فيما معناه : غارت أمكم ! ... وده إن دل على شئ فهو بيدل على ان " الغيرة " حاجة عاملة زى الطبع فى المرأة كدة

    طبعا هو كشعور بيبقى موجود بس بتختلف ترجمته للواقع من واحدة للتانية وإزاى حتتصرف مع الشعور ده .. فى واحدة بتسوي بلاوي نتيجة غيرتها وكوارث كمان ، حسد وتمنى زوال النعمة من الغير والذى منه.. وفى واحدة تانية ممكن تقوم بالليل مثلا وتتوضى وتصلى وتدعى ربنا يرزقها زى مارزق غيرها .. ويبارك فى اللى رزقه لغيرها

    حاجة كمان عايزة اضيفها قبل ما بنات حوا يبدأوا يحدفونى بالطوب ههههههههه .. ان الإحساس بالغيرة ده فعلا عيب فى النساء بس احب اوضح انه مش على كل حاجة وعمال على بطال بتغير بس هى كتير بتحس بيه بالإضافة الى انه مش بإيديها يعنى فعلا كتير جدا تلاقى الإحساس ده بتحس بيه غصب عنها ، شعور معين بيهاجمها وبتحس بالغيرة .. وبردو فعلا الصداقة او قلة شعور الغيرة عند الرجال ده ميزة فيهم بس الميزة دى هما مالهومش فضل فيها .. بمعنى ان محدش خلق نفسه واختار يكون ولد ولا بنت .. كل واحد فينا كبر لاقى نفسه بنت او ولد وإكتسب بالتالى الصفات العامة والخطوط العريضة لكل جنس هو بينتمى له

    يعنى من الآخر كله بإيد ربنا والحمد لله على كل حال

    وياريت اللى عايز يعرف اكتر عن شخصية المرأة والرجل يقرا كتاب الرجال من المريخ والنساء من الزهرة


    وكل سنة وحضرتك طيب
    :D

    ReplyDelete
  5. انا بصراحة مع صداقة الولاد
    بس الولد اللى يصادق بنت لشخصها مش لاهداف فى دماغه
    بيبقى امين عليها ولو شاف حد بيأذيها بيعمل اى حاجه علشان حمايتها بيخاف على زعلها وبيحترمها
    انما البنت لمجرد انها شافت صحبتها احسن منها سواء فى الوضع الاجتماعى او حتى اتفه حاجه لو لبست لبس اشيك منها بتلاقى النار بدأت تاكل فيها حتى لو كانت فعلا بتحبها وبتخاف عليها بس الحاجات دى بتكون لا اراداية غصب عنها
    تحياتى

    ReplyDelete
  6. ابصم لك بالعشرة و انا بنت اهو ان صداقة و علاقات الفتيات ما بينهم و بين بعضهن من اسوا ما يكون

    انا كرهت الصداقة و الزمالة و كل ما يربط البشر ببعضهم بسبب طرق الفتيات الملتوية و معاملاتهم مهما بلغت درجة تدينهم او تربيتهم

    و لو كنت اضمن انه فى رجل يرضى يكون له صديقة بنت يعاملها كانسان له عقل لكنت اتخذت اصدقاءا ذكورا لكن دول مش مضمونين الا اذا كنت راجل مثلهم

    ReplyDelete
  7. طب أنا أضيف إيه بعد شهادة ياسمين إنسانة من أهلهن

    حاضيف حاجة جميلة مقولة تقال

    إذا اجتمع الرجال فغالب حديثهم في المعاش
    وإذا اجتمع النساء فغالب حديثهن عن الرجال

    شوف انت بقى إيه اللي أمتن

    ميزة الأخوة الرجالي برضه إنها بتتعمق بمواقف أكثر زي السفر مثلا والمواقف الفظيعة

    كل عام وأنت بخير

    ReplyDelete
  8. ههههههههههههه
    شوف مش انا منهم
    بس بجد ان كيدهن عظيم
    فعلا زى مقالت
    desert cat
    حاجه عجيبه فعلا
    واقع يستحق الدراسه
    :)))

    ReplyDelete
  9. ههههههههههههههه
    اولا سلامو عليكم
    ثانيا كل سنه وانتم طيبين
    ثالثا انا جربت صداقة البنات فعلا كلها هدوء وكل اللي انتي قولته في الفقرة الثانية
    البنات لما تتصاحب بيخلو حياة بعض احلي
    بيطلعوا أجمل ما في بعض
    بيكونوا سند وعون لبعض
    بيكونوا أمان
    بيكونوا سند وظهر دي تجربتي مع صحبات وإخوات وقرايب كتير
    بجد ما قابلتش صديقة وحشة قبل كدا يمكن دا رزق طيب ليا في العلاقات
    بس أكيد الواقع في حاجات وحشة كتير
    واظن الموضوع مش حكاية الولاد أخلص لبعض من البنات لبعض ولا العكس
    اد ما الموضوع وجود حسن الاختيار والتوفيق والبركة من ربنا
    ياسلام لما يؤلف الله بين قلوب عبادة
    يرزقهم الالفة يعني

    ReplyDelete
  10. بص يا أحمد ما بنفعش نعمم كلامك
    كل حاجة فيها الحلو والوحش
    والصداقة سواء بين بنات وبعضهم أو ولاد وبعضهم فيها برضة الحلو والوحش
    يعنى فيه صداقات لبنات بتنجح وبتستمر طول العمر وفيه صداقات لولاد برضة بتنجح وبتستمر وفيه العكس سواء لبنات أو ولاد
    وأنا عن تجربة أقول لك أن فيه بنات صداقتهم لبعض بتستمر طول العمر انا عن نفسى الحمد لله عندى صداقات كتير من أيام المدرسة والجامعة والشغل من الأخر ما بقدرش أعيش من غير صداقات وزى ما أنت عارف أنى بنت طبعا والحمد لله صداقاتى عايشة لحد دلقوتى وإن شاء الله تفضل عايشة لحد أخر يوم فى عمرى
    العيب مش فى كون الواحد ولد أو بنت العيب فى طريقة التربية والحاجات الغلط اللى بتتربى جوانا
    أحنا لو أتربينا من صغرنا على حاجات بنكبر عليها
    يعنى لو واحد أو واحدة طلع وأتربى فى عيلة كل أفرادها بيغيروا من كل الناس وبيحسدوهم وكل الصفات المكملة للصفات دى أكيد هيكتسب الصفات دى

    الموضوع كبير ولسة عندى كلام هبقى أعدى تانى وأكمل

    تحياتى لك

    ReplyDelete
  11. كل سنه وانت طيب أولاً
    ثانياً أنا رأيي ان الموضوع ده نسبي أوي بس النسبه في البنات أكتر أو البنات مش بيعرفوا يداروا النفسنه دي مش عارفه
    بس حقيقي أنا مع موضوع نفسنة البنات أكتر
    يمكن علشان أنا متحامله شويه على البنات ويمكن سبب التحامل عليهم ده اني شوفت منهم كتير ومن غيرتهم دي

    عموماً التعميم غلط بس الموضوع بيكون نسب مختلفه بس مش أكتر

    ReplyDelete
  12. سؤال ومحتاجة أجابه صريحة
    هما البنات اللى موجدين حوالينا مش دول برضة فى يوم من الأيام هيكونوا أمهات
    بمعنى تانى أمهاتنا كلنا مش كانوا بنات بس لو جيت تكلم واحد أو واحدة عن أمه هيقول لك لأ الا أمى أمى مفيش زيها أمى مثال لكذا وكذا وكذا
    يبقى العيب فى مين أنا بجد نفسى أعرف
    ليه دايما الواحدة لما بتكون بنت الكل بيبص لها بصة غريبة وبيطلع فيها صفات كتير قوى سواء البنت دى أخته أو مراته أو خطيبتة أو زميلته فى العمل لية بيطلع فيها كل حاجة وحشة ولية كل الناس عند أمهاتهم بيقفوا
    أعتقد دى نظرية محتاجة لتفسير ويمكن أنا طلعت شوية من الموضوع او يمكن يكون كلامى مكمل للموضوع
    وده مش رأيى لوحدى ده واقع كلنا بنشوفه
    بس برضة زى ما قلت كل قاعدة وليها شواذ يعنى سواء بنات أو ولاد دول فيه الحلو وفيهم الوحش وكل واحد هو اللى بيختار أصدقائه

    بص أنا عندى صديقات كتير زى ما قلت قبل كده من أيام المدرسة والجامعة وصدقنى معظمهم أتجوزوا وعندهم أطفال وعمرى ما زعلت ولا غيرت من واحدة منهم بالعكس أنا بكون سعيدة جدا ليهم وبتكون فرحتى فوق الوصف
    ولسة صداقتنا مستمرة حتى بعد ما أتجوزوا وبقى عندهم أطفال

    يعنى زى ما قلت لك الحكاية نسبية

    مش كل الناس زى بعض

    بتمنى ما أكونش طولت عليك

    تحياتى لك

    ReplyDelete
  13. egyptian ghost:
    نورت مدونتي المتواضعة
    ياريت تشرفنا باستمرار
    انتظر مني زيارة قريبا ان شاء الله
    تحياتي

    ReplyDelete
  14. موجة:
    والله يعني مش عارف اقول ايه
    بس برضة بتبقى الكلاكيع البناتية مسيطرة عليهن في مواضيع الخطوبة والزواج والجمال واللبس والاناقة والحاجات دي
    كل دي بتعمل حاجز بين البنات وبعضها
    تحياتي

    ReplyDelete
  15. انسانة:
    اولا بالنسبة ل "تصدق بالله"...اقدر اقوللك لا اله الا الله
    بس اشمعنى المريخ.....هل المريخ عندهم صداقات؟!!!
    بس باين عليكي كدة ان انتي كائنة فلكيو يا ياسمين
    والله كويس....انا ساعات برضة بيبقى ليا اهتمامات زي كدة..بس مش دايما
    عموما..بالنسبة لموضوعنا
    وشهد شاهد من اهلها
    الغيرة فعلا في البنات بقت حاجة بشعة جدا وملاحظة
    زمان كانت البنت بتغير علشان خاطر الولد
    دلوقتي البنت بتغير من البنت علشان اي حاجة تانية
    تحياتي واحتراماتي

    ReplyDelete
  16. desert cat:
    كويس جدا
    ادي رأي تاني بيدعم موقفي ووجهة نظري
    تحياتي ليكي

    ReplyDelete
  17. جيداء:
    جميل جدا جدا
    وجهة نظري بتثبت صحتها يا جماعة
    البنات مش حلوين مع بعض...في بينهم حزازيات
    بالنسبة للرجل اللي بيعامل البنات لعقلها بس...فدول موجودين رغم انهم قليلين
    بس ارجع اقول لك يا جيداء ان البنت هي اللي بأيدها تحدد الشاب يعاملها ازاي
    تحياتي ليكي
    كل سنة وانتي طيبة

    ReplyDelete
  18. عصفور المدينة:
    شهادة ياسمين نصفتنا بصراحة
    البنات بقى صداقتهن بتهتز بشدة وتكاد تكون بتتصدع اول ما واحدة فيهن تتخطب
    ويا ويل خطيبها.....بيتقطع
    ربنا يهديهن
    تحياتي واحتراماتي

    ReplyDelete
  19. shymaa:
    ايه كمية النفسنة اللي في بنات حواء دي يا شيماء
    حاجة محصلتش
    تقابلوا بعض بالبوس..ويا حبيبتي وازيك وعاملة ايه؟!!!وتلاقي برضة ان اللي في القلب في القلب
    حاجة فعلا تستحق الدراسة والتأمل..على رأيك
    تحياتي واحتراماتي

    ReplyDelete
  20. الخيط الرفيع:
    طبعا التعميم في اي شيء في الحياة مش صح على الاطلاق
    بس احنا بنتكلم عن نسبة عالية
    انا معاكي ان البنات ممكن يكونوا كويسين مع بعض بس اعتقد ان دة بيكون ظاهريا بس
    لان اغلب البنات بيغيروا من بعض بشكل رهيب
    دي اتخطبت وانا لسة...دي خطيبها ظروفه كويسة وانا خطيبي ظروفه وحشة
    دي ابوها بيفسحها في المكان الفلاني وانا لا
    تحسي انهم بيبصوا لبعض في كل حاجة واهيف حاجة
    انما بالنسبة للشباب وانا هنا بأقصد الاغلب وليس الكل..بتلاقي التفاهات دي مش منتشرة ما بينهم
    تحياتي

    ReplyDelete
  21. الجدل دا هيفضل طول مافى ادم وحوا

    تحياتى

    ReplyDelete
  22. طيب
    صلى على النبى
    كلام فى سرك و متقلش لحد انى انا قلتلك الكلام دة
    انا فعلا مقتنعة ان صداقة الرجاله احسن و امتن جداااااااااا
    ن صداقة البنات
    و اوعى تفضحنى بقى

    ReplyDelete
  23. bosbos:
    طبعا يا بس بس مفيش حكم عام ع الاطلاق في اي حاجة
    انما لما بتيجي تتكلمي على ظاهرة مثلا او سلوك بتتكلمي على الاعم والاغلب
    بمعنى لما بنقول البنات بنقصد اغلبهن واكيد مش كلهن
    انما ما تنكريش-او لعلك ما صادفتيش-ان النفسنة الحريمي دي حاجة ربنا لا يوريكي
    بيبقوا قدام بعض اصحاب وحبايب انما بيفضل برضة اللي في القلب في القلب
    تحياتي

    ReplyDelete
  24. rehab mostafa:
    انا متفق معاكي طبعا ن التعميم لا يجوز وان الموضوع نسبي
    متفق معاكي تماما في اللي انتي قلتيه
    مش مختلفين
    تحياتي ليكي ونورتي المدونة

    ReplyDelete
  25. bosbos:
    لا طبعا ما طولتيش عليا ولا حاجة
    تنوري في وقت
    بالنسبة للموضوع زي ما كلنا اتفقنا ان الموضوع نسبي بس نسبة البنات في موضوع الغيرة والنفسنة والحساسيات اللي بينهن بيكون اكبر بكتير من الشباب
    دي تقريبا حاجة في البنت....بالفطرة والا الغيرة ماتبقاش صفة نسائية
    تحياتي ليكي

    ReplyDelete
  26. ايمان:
    هو دة الخلاصة
    اوجزتي....فأنجزتي
    لا فوض فوك
    تحياتي وكل سنة وانتي طيبة

    ReplyDelete
  27. rania:
    عليه الصلاة والسلام
    ازيك يا رانيا....عود احمد...المدونة نورت لحد ما اتحرقت من كتر النور لطلتك عليها
    بصي الكلام دة هيفضل سر ما بيننا...ومش هقوله لحد خااااالص
    وانا علشان تطمئني هشيله في حتة امينة محدش يشوفه..في المدونة عندي
    اي خدمة
    تحياتي ليكي....نورتي

    ReplyDelete
  28. بص انا معاك ان البنات بيكون بينهم نفسه شويه بس مش لدرجه اللي انت متصورها دي برضه الواد يعني سهونين شويه يعني ولو حط صاحبه في دماغه ممكن يدمره يعني وفي نماذج كتيره يمكن عشان انتم بتعملوا في بعضيكم من تحت لتحت واحنا كابنات مفضحوين شويه الله اعلم
    بس انا عن نفسي بفضل صاحبه الاولاد اكتر يعني بيحفظوا السر عن البنات يعني البنت بيكون ليها ميت بنت صاحبتها وبتقولها كل حاجه عنها وعن اصحابها عشان كده الاسرار بتتفتش وبتحس النفسنه دي لكن الولد بيكون انا تقريبا الوحيده اللي صاحبته ومش
    يستفيد حاجه لمايروح يحكي لحد يعني
    وتحياتي ياسمير ليكي وارجوك شيل يعني الفكره دي لان البنت لما بتحكي لااي حد من صاحبتها البنات بيكون في صافي نيه

    ReplyDelete
  29. صداقة الرجال تدوم ربما لآخر العمر أحيانًا
    أما صداقة النساء قد تنتهي بمجرد أن تتزوج البنت فتصبح زوجة وأم فتصب كل إهتماماتها داخل بيتها تجاه زوجها واطفالها
    ولكن هذا لا ينفي أنه هناك نفسنه بين الرجال وغيرة أيضًا وأنا شخصيًا قابلت مثل هذه النماذج الغيورة ولا ينسى أحد دور الفنان يحيى الفخراني في فيلم الغيرة القاتلة حيث لعب دور شخصية الصديق الغيور الذي كاد أن يتحول صديقه إلى قاتل بسبب الوقيعة التي حاكها الفخراني بين صديقه وزوجة صديقه

    خالص تحياتي

    ReplyDelete
  30. merooo:
    ازيك يا ميروو عاملة ايه
    عموما...طبعا الغيرة والنفسنة موجودين بين الاولاد زي ماهي موجودة بين البنات
    لكن احنا مازلنا متفقين الحمد لله ان النفسنة الحريمي دي غريزة انثوية
    تحياتي ليكي

    ReplyDelete
  31. بص ياعم احمد هى حظوظ واناعامة حظى حلو ف صداقاتى البنات والولاد واقدس صداقاتى جدا وبالنسبة لموضوعك جاااااااااااااااااااامد موت عشان حسسنى قوى بقيمة صحابى واسمحلى استخدم مدونتك واقول لداليا بحبك وحشتينى وربنا يبعد عننا العدوين وربنا يرزقك يا احمد يصديق اوصديقة مخلصين تحبهم وترتبط بيهم قوى ارجو انى مكونش مطولة عليك تحياتى الحارة

    ReplyDelete
  32. تحياتي

    في رأيي انه ليس هناك معيار ثابت يمكنا ان نطلق أحكام عامة علي قوة الصداقة.

    لكن مثلما هناك صداقات قوية بين الاولاد...هناك ايضا صدقات قوية بين البنات...

    و طبعا لكل قاعدة خوالف ( بلاش نقول شواذ حتي لا يزعل أحد علينا )...يعني
    هاتجد من غدر بصاحبه بطريقة او بأخري
    و من غدرت او حسدت صديقتها بطريقة او بأخري...و هذا اخي الكريم من صفات
    النفس البشرية الا من رحم ربي فطهر قلبه.

    تحياتي و تمنياتي بكل توفيق.

    ReplyDelete
  33. ياسر حسين:
    طبعا يا فنان التعميم في اي شيء لا يجوز على الاطلاق
    نفسنة البنات دة سلوك طبيعي فيهن
    تحياتي واحتراماتي

    ReplyDelete
  34. شيكابالا:
    ربنا يهني سعيد بسعيدة
    ومش هقول لك غير:
    اللي بيشيل قربة مخرومة بتخر على دماغه
    تحياتي واحتراماتي

    ReplyDelete
  35. الربان:
    مش مختلفين
    بس نسبة النفسنة في البنات اكبر بكتييييييييير
    تحياتي ونورتني

    ReplyDelete
  36. اشكرك جدا لزياارتك مدونتى
    وعايزة ااقولك حاجه مع انى بنت
    بس بصراحه كلامك صح جدااااا
    عارف كنت باغبط اخويا على صداقات
    لانها احلى وابسط كتير وبيحبوا بعض بجد
    اوحش حاجه فى البنات الغيره
    ومش هاقولك انى ممكن مش باغير لا احيانا باغير لكن الاوحش اللى بيظهر لغيره دى ويعبر عنها لانها بتكون مدمرة عندما تخرج من داخلك
    ففعلا السمه الغالبه فى البنات الغيره
    بس ياريت تكتفى بالغيره وبس لا التصرفات اللى بتترتب عن لغيره بتكون بشعه جدا
    بس نعمل ايه ده قدرنا ولازم نتحمل اصدقاءنا بكل عيوبهم

    ReplyDelete
  37. رغم ان الموضوع قديم الا اني اتمني انك تشوف ردي عليه

    و الله عارف
    الموضوع ظروف و نصيب اولا و اخيرا ...لان الواحد مش بيختار الصحبةاللي بيلاقيها

    يعني صادقة الولاد اه قوية و كتيرة ... لي لو اتوجدت صداقة بين البنات و البنات عرفت تختار بعض بتبقي صادقة اقوي و اروع ما يكون و بتبقي اقوي من صداقات الولاد بس انااعترف انها اقل انتشارا من صداقات البنات

    اقول لك علي شئ

    كان لينا زميل في الكلية بيغبطني علي صديقة ليا لدرجة انه قال ياريت الاقي صديق ليا في الولاد زي ما انتي و صديقتك لبعض :)

    عامة انا عن نفسي اعرف كمية بنات زي الفل رهيبة و بجد بدون مبالغة جدعان مع بعض بشكل لا يوضف ... هحكي لك علي شئ حصل ...انا والدتي توفت في وسط امتحانات عملي ار تيرم في بكالوريوس

    مش عايزة اقول لك كمبية البنات اللي جت عزيتني و خففوا عني كتير اد ايه
    و مش عايزة اقولك ان فيه بنت جت من مساكن شيراتون لحد شبرا و ملاقيتنين في بيتي و قعدت تسئل عليا لحد ما جت لي في بيت صديقة ليا كانت بتذاكر لي قبل الامتحان و الصديقة دي قعدت تذاكر لي لحد المغرب رغم انها لفت السبع دوخات علشان تيجي ...

    فيه مواقف كتيرة حلوة للبنات مع بعض ... بس هو الواحد يحب الناس و ينقي قلبة و يصفية و اكيد هتلاقي اللي انت بتعملة في الناس بيرجع لك

    خالص التحية مواضيعك فعلا متميزة

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails