Thursday, 13 December 2007

لعن الله من ايقظها

واعداها للقائها في صيدلية لقاء 100 جنيه
تشديد أمني بمدينة مصرية بعد توقيف مسيحيين مارسا الفاحشة مع مسلمة
فرضت الشرطة المصرية إجراءات أمن مشددة في مدينة اسنا الجنوبية الأربعاء 12-12-2007، بعد توتر طائفي في المدينة، تسبب به الاشتباه بعلاقة جنسية بين شابين مسيحيين وفتاة مسلمة. وقال شاهد عيان إن قوات الشرطة تحرس متاجر ومنازل المسيحيين، وتفرض ما يشبه حظر التجول في حي بالمدينة، شهد ليل الاثنين تجمهر مئات المسلمين خارج متجر اشتبهوا بوجود شابين مسيحيين بداخله ومعهما طالبة جامعية مسلمة يمارسان الجنس معها.

وأضاف أن مئات من أفراد قوات مكافحة الشغب انتشروا في الشوارع. وقالت مصادر أمنية ان المسلمين الذين تجمهروا أمام المتجر أمسكوا بالشابين وسلموهما للشرطة، بينما سلموا الفتاة الى أسرتها قبل وصول القوات. كما أشعلوا النار في المتجر، وحطموا زجاج صيدلية يعمل فيها الشابان المسيحيان. وقال مصدر ان عاملا مسيحيا في المتجر هرب خلال تجمهر المسلمين. وأضاف أنه تردد بين المسلمين الغاضبين أن الشابين واعدا الفتاة في الصيدلية، وأنهما اتفقا معها على اعطائها 100 جنيه (أي ما يوازي 18 دولار). وأشار مصدر قضائي إلى أن النيابة العامة في المدينة أمرت بحبس الشابين 4 أيام على ذمة التحقيق معهما، كما أمرت بضبط واحضار الطالبة وعامل المتجر الهارب.ويمثل المسيحيون ما يصل الى 10% من تعداد السكان في مصر. وقنا التي تبعد عن القاهرة حوالي 600 كيلومتر هي المحافظة المصرية الوحيدة التي بها محافظ مسيحي
فيه ايـــــــــــــــــــــــــــــــــــــــــــه؟
ايه اللي بيحصل يا جماعة؟
مومس بتمارس الدعارة بفلوس مع شباب
فارقة معاكوا قوي اذا كان الشباب دة شباب مسلم ولا مسيحي؟
التجمهر والفوضى والتخريب دة سببه الفعل نفسه (الفاحشة نفسها)....ولا سببه ان الفعل دة بين مسلمة ومسيحي؟
يعني لو كان العكس هو الصحيح...وكانت الفتاة هي اللي مسيحية والشابين كانا مسلمين الموقف كان هيبقى ازاي؟
كان هيحصل ثورة برضة؟
الحادثة دي مش حادثة اغتصاب....دي عاهرة بتمارس الجنس بفلوس مش فارق معاها مين اللي هيدفع الفلوس دي سواء كان مسلم او مسيحي او يهودي او حتى بوذي
الموضوع مالوش علاقة بالديانات على الاطلاق.....وكم من مرة بيكون العكس هو الصحيح بتكون المومس مش مسلمة وبيكون الشباب هم المسلمين
وبعدين عاهرة وزباينها هيكون فارق معاهم قوي موضوع الديانات دة؟
ليه الناس بتعالج المواضيع دي بطائفية على الرغم ان الموضوع دة ابعد مايكون عن كدة
لو افترضنا ان اطراف الواقعة دي جميعهم مسلمين....او ان افرادها كلهم مسيحيين...هل كان اسلوب المعالجة هيكون بالشكل دة؟
مستـــــــــــــــــــــــــــــــــــــــحيـــــــــــــــــــــــــــــــل
على الرغم ان الفعل واحد في كل الاحوال الا اننا مصممين على الطائفية
احنا ناس غريبة جدا.....شعب في منتهى الغرابة...الفعل مش فارق معاهم على الاطلاق...اللي فارق معاهم ان ازاي مسلمة تمارس الجنس مع اقباط على الرغم انه في جميع الاحوال هو زنا حتى لو كانت بتمارسه مع مسلمين
كان هيجرى ايه لو تم التحفظ ع الجميع في الصيدلية دي وتم ابلاغ الشرطة وقبضت ع الجميع وخلاص؟
انما لا طبعا.....ازاي؟ مايصحش......لازم نعرات طائفية وتخريب وتدمير
الفتنة نائمة لعن الله من ايقظها

29 comments:

  1. مش عارفة أقول ايه غير أن ده كله نتاج تخطيط كبير ومش سهل ولاحول ولاقوة الابالله العين علينا قوي عاوزين ينخروا في جسد الوطن باي وسيلة وباي طريقة ولاحول ولاوقة الابالله

    ReplyDelete
  2. بداية زيارتك لمدونتي نورتني
    ثانيا الصورة مش لعم فرج
    دا اخوه عم صابر
    مش عارف اسمه ايه
    بس اكيد صابر على فقدان قريبه
    صابر على نسيان الوطن لتار اخوه
    صابر على هرب قاتل اخوه للخارج
    لا هي صورة من اختياري لاحد اقارب الضحايا على الميناء مستني وصولهم
    و عرف ان العبارة غرقت
    اما بالنسبة لموضوعك فما نقدرش نلوم الاباء دول على حماية شرف بنتهم
    و اعتقد انه اكيد الشباب دول معروفين بكده في الحتة و اكيد هما اللي اغروها
    ممكن حد يقول انه ممكن تكون راحة برضاها
    ممكن .. بس الموضوع عادي جدا حتى لو الشباب مسلم كان رد الفعل حيكون واحد
    دي تقاليد
    و اغلى من الشرف ما فيش
    تحياتي

    ReplyDelete
  3. موضوع بيحصل كتيرر


    وبعيدا عن مسلمة ومسحية

    رد الفعل واحد

    لكن البعض ينظر الى الموضوع من ناحية طائفية

    وهى بعيدا عنها

    لااحب ادخال الدين فى كل مشكلة تقع

    اللى حصل شرف ادبح والرد معروف وطبيعى

    لكن الربط بين الموضوع والدين

    خلية بعيد

    لان لو حصل والشابين مسلمين

    كان نفس رد الفعل

    وربنا يصلح الحال

    تحياتى

    ReplyDelete
  4. انا كمان شايفه انه مخطط كبيييير
    ده ممكن يكون مكنش فى اى حاجه من الاساس ودى تمثيليه معموله عشان يبعدوا تفكير الناس عن المهم
    يعنى فرقعه تغطيه لمصيبه اكبر
    ربنا يستر وفعلا حسبنا الله ونعم الوكيل

    ReplyDelete
  5. فعلا حاجة غريبة
    الناس بتسيب الحاجة الأصلية وبتمسك فى حاجة تانية
    مش عارفة يعنى هما مش فارقة معاهم اللى حصل على قد ما فارق معاهم دول مسلمين ولا مسيحين
    فعلا بجد حاجة غريبة يعنى هما خلاص عادى معاهم اللى حصل والمشكلة بس بقت فى الدين
    يعنى مش مهم اللى حصل أزاى بجد مش فاهمة
    هما بيفكروا أزاى

    تحياتى لك

    ReplyDelete
  6. ياخبر اسود ومنيل ومتعاص بطينة

    احنا وصل بينا الحال بجد للدرجة دى؟
    حسبنا الله ونعم الوكيل

    مكذبش عليك يا اخى الموضوع ضايقنى بس فى حاجة تانية ضايقتنى

    ال100 جنيه بقت بتوازى 18 دولار بسسسسسسسسسسسسس

    !!!!!!!!!!!

    حسبى الله ونعم الوكيل بجد
    :'(

    ReplyDelete
  7. فعلا العنوان دل على الموضوع فتنة

    والفتنة ضياع الحق واختلاطه بالباطل بحيث تبقى مش عارف راسك من رجليك
    زي واحد شتم واحد شتيمة قذف مثلا بعدين رد التاني سب له الدين ونيجي نمسك في اللي سب الدين ونقول له ازاي تسب الدين يا كافر
    تحس أوضاع ملخبطة وناس مش مركزة

    طب ياريت كانت الحماسة دي قدام الصيدلية عشان ارتفاع سعر الدوا كان زمان حالنا اتغير

    ReplyDelete
  8. ارحمنا يا رب من القؤف و وجع القلب ده...هي البلد ناقصه
    طب ما نكسر الدنيا علي حاجه أهم من عاهره و شباب معدوم الاخلاق
    تحياتي

    ReplyDelete
  9. ملحوظه
    أقسم بالله العظيم اسمي مايكل مش ميشيل
    :)
    تحياتي

    ReplyDelete
  10. استغفر الله العظيم

    اللهم ارحمنا برحمتك ياكريم

    ReplyDelete
  11. هو فعلا عندك حق تضايق كده

    يعني هم بنص الخبر مسكو الاولاد وسلموهم للبوليس والبنت لا

    مع انها مشتركه معاهم يعني لا اتعرضولها ولا حاولوا يغتصبوها

    يعني عارفين انها رايحه بمزاجها ومتفقه معاهم

    التصرف من الاصل مش طبيعي

    والقضيه هنا مش اخلاقيه

    التشوش اللي الناس وصلاله يخليها تعمل اكتر من كده

    ReplyDelete
  12. truelove:
    انا شخصيا لا اؤمن بنظرية المؤامرة في كل حاجة
    الموضوع لا عين علينا ولا يحزنون
    القصة قصة جهل وتعصب وطائفية
    تحياتي

    ReplyDelete
  13. موجة:
    الله يخليك الف شكر
    مدونتك تستحق الاعجاب والتقدير
    الصورة ايا كان صاحبها فهي لمصري الزمن اكل عليه وشرب....تجاعيد وشه بتقول كل حاجة
    الموضوع لا حماية شرف ولا يحزنون..الموضوع اننا مابنغيرش على ديننا الا في كدة
    انما تقوللي نغير على ديننا في الاهانات اليومية العالمية..ابدا
    الموضوع مش تقاليد...الموضوع تعصب في المقام الاول
    تحياتي

    ReplyDelete
  14. tamer nabil:
    يعني انت عايز تقنعني يا تامر ان رد الفعل هيكون نفسه لو كان كل الاطراف في القصة دي مسلمين؟
    دة كان زمان مصر كلها مولعة
    ممكن كان يحصل توتر ولكنه لن يتعدى فضيحة وخناقة..انما التكسير والتخريب والتدمير راجع وبس لاختلاف الديانات
    معلش
    انا مختلف معاك تماما...عمر رد الفعل ماهيكون واحد
    انت مش عايش في البلد دي ولا ايه
    تحياتي يا صاحب الافكار الحرة

    ReplyDelete
  15. shyma:
    الموضوع مالوش علاقة بالمخططات والمؤمرات يا شياء
    القصة وما فيها هي قصة تعصب وتطرف اعمى
    ربنا يهدي الجميع
    لك الله يا مصر
    تحياتي واحتراماتي

    ReplyDelete
  16. كـل سنة وحضرتك طيب وبالف خير وعافية يارب آمـــــين واعاده الله علينا وعلى الامة الاسلامية بالخير واليمن والبركات

    ReplyDelete
  17. لا حول و لا قوة إلا بالله ، الحمد لله الذى عافانا ، ...
    طول ما احنا بنفكر كدا هتفضل أوضاع كتيرة جدا غلط ، المفروض إن ما قام على باطل فهو باطل ، يعنى الموضوع كله من أساسه غلط ، و الست فعلا مش فارق معاها ، .. فليه تستحق كل هذا ؟؟
    لا حول و لا قوة إلا بالله .

    ReplyDelete
  18. كـل سنة وأنت طيب وبالف خير وعافية يارب

    ReplyDelete
  19. انا مش فاهمه هو القلق دا كله عشان مسلمين ومسيحين
    يعنى لو كانو مسلمين ومسلمين مش هتبقى مشكله
    ولا احنا بنسيب المشكله الحققيقيه وهى عدم وجود الاخلاق وعدم وجود ضمير اساسا
    ونمسك فى الخيه المعروفه وهى المسلمين والمسيحين

    مش فاهمه امتى نبص من عنينا مش من قفانا

    تحياتى

    ReplyDelete
  20. bosbos:
    هم فارق معاهم اللي حصل برضة
    الشعب المصري بيجمع بين كل المتناقضات
    طول مانت بتعمل كل حاجة غلط بس قدام الناس انت التقي الورع يبقى انت زي الفل
    انما يوم ما تقع في ايديهم بغلطة..يبقى يا ويلك يا سواد ليلك
    انما طبعا لو كان الاطراف كلها مسلمة ماكنش حصل كل التخريب والتدمير دة
    كانوا هيكتفوا بالفضيحة بس
    تحياتي يا بس بس
    كل سنة وانتي طيبة

    ReplyDelete
  21. انسانة:
    طب دي غلبانة البنت دي والله
    وشكلها بترضى بقليلها
    تخيلي ان في التعليقات على الموضوع دة في موقع العربية نت...واحد خليجي علق ع الموضوع بس لمرة دي كان بيتكلم جد مش بيهزر ولا حاجة
    تخيلي علق قال ايه:
    قال....
    18 دولار بس......يابلاش
    تحياتي وكل سنة وانتي طيبة

    ReplyDelete
  22. عصفور المدينة:
    شعب عجيب وغريب جدا
    ممكن جدا ياخد بالخرزانة....يتنهب ويتسرق ويتلعن ابو اللي جابوه كل يوم
    ولا هو هنا
    انما لما منحرفة وساقطة مسلمة تتلم على شباب بايظ مسيحي
    يبقى التار ولا العار
    احنا ايه اللي جابنا البلد دي
    ربنا يسامحك يا جدي
    تحياتي

    ReplyDelete
  23. micheal:
    تصدق اني كنت شاكك ان انت ممكن تكون مايكل...بس قلت يا واد بطل افتكاسة..ومشيها ميشيل وخلاص
    بس معلش يا عم مايكل...جل من لا يسهو يا سيدي
    بالنسبة بقى لموضوعنا..
    انا متأكد تماما ان اللي كانوا بيضربوا وبيكسروا وبيحرقوا دول في منههم ناس لو الفرصة اتاحت لهم انهم يكونوا معاهم في الصيدلية في الميعاد دة ماكنوش كدبوا خبر
    المسألة والله ماهي تدين بقدر ماهي تنفيس عن غضب اجتماعي واقتصادي
    عارف اللي بيبقى مقهور من مديره في الشغل وييجي يطلع البلاء الازرق على مراته في البيت
    هو دة الشعب المصري
    كل سنة وانت طيب
    تحياتي

    ReplyDelete
  24. عاشقة الفردوس:
    اللي يعيش ياما بيشوف يا عاشقة الفردوس
    كل سنة وانتي طيبة

    ReplyDelete
  25. tona:
    الناس بتسمع جملة مسلم مع مسيحية او مسلمة مع مسيحي بيجي لهم ارتيكارية
    على الرغم ان في احيان كتير بيكون ورا الموضوع دة ملابسات تانية خالـــــــــص
    زي الموضوع دة كدة
    البنت عاهرة محترفة و الاولاد جايبينها بمزاجها والموضوع مالوش علاقة بالاديان على الاطلاق
    تحياتي

    ReplyDelete
  26. اماني:
    وانتي طيبة
    فين مشاركاتك وتعليقاتك يا اماني؟
    في انتظارك في مواضيع قادمة ان شاء الله
    تحياتي واحتراماتي

    ReplyDelete
  27. الاء:
    التطرف والعصبية بتعمل اكتر من كدة
    مفيش تحكيم للعقل ولا المنطق
    كلمة اسلام ومسيحية هي اللي بيتحركهم
    تحياتي ليكي

    ReplyDelete
  28. حبة حاجات:
    يوم ما يبقى في تعليم بحق وحقيقي وتنمية عقلية وثقافية بجد
    ويوم ما يبقى المواطن المتعلم المثقف هو الاستثمار الحقيقي للبلد دي
    ساعتها كل الكلام دة هيختفي تماما
    تحياتي

    ReplyDelete
  29. ابوسمرة

    انا عجبنى فيك انك منطقى ـ غير منحاز فى عرضك للموضوع ـ وردودك على التعليقات فيها رصانة اكبر من سنك لك تحياتى ـ

    ومن جهتى اقدر اقول ان المجتمع المصرى كان لايعرف الطائفية لكن بعد هجرة الكثير من المصريين الى دول الخليخ خاصة السعودية والمعايشة الطويلة هناك تعلموا الطائفية المنتشرة هناك ما بين الاغلبية الوهابية والاقلية الشيعية ـ حتى ان الشيعى يعتبر كافر فى نظرهم ـ وطبعا بعد عودة هؤلاء الى مصر وصادف ان المد الاخوانى بدء ينتشر فتلاقى المد الاخوانى بالمد الوهابى وحيث ان المسيحين هم المختلفين فى مصر بدء الهدم الطائفى ياخذ طريقة بيننا وبكل اسف لم تضرب الدولة بيد من حديد على هذا بتطبيق القانون الرادع واتجهت الى مجالس الصلح اللى لابتودى ولا بتجيب ونحن الان تحت رحمة هذة الافكار اللى كا يوم بتزيد وبتتسع الهوة ـ تحياتى

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails