Saturday, 8 December 2007

انفصام

حاجة غريبة جدا احنا بنعملها واحنا مش عارفين...او من غير ما نحس ان احنا بنعملها
بندين ونشجب ونندد بسلوكيات احنا بنشوفها سلوكيات مرفوضة ومنحرفة وفي نفس الوقت اول ما بتيجي لنا الفرصة دي بنعملها فورا وبمنتهى البرود
انا بتكلم عن حاجة زي الواسطة
كلنا بيلعن الواسطة وممكن نعمل مجلدات شجب وادانة وتنديد بالواسطة والمحسوبية وان محدش في البلد دي بياخد وضعه وحقه الا بالواسطة ومع ذلك تعال كدة راقب نفسك وشوف تصرفاتك
رخصة عربيتك ورخصة سواقتك طلعتهم ازاي يا معلم؟
رحت المرور وامتحنت واخدت دورك ولا دورت على اونكل فلان اللي في المرور او الواد ميدو صاحبك اللي عمه ضابط وممكن يوصي عليك علشان تطلعها
بلاش دي
وانت في الكلية...عمرك ما دورت على واسطة قبل ما تدخل امتحان العملي او الشفوي...دة انت في عرض درجة تنجح بيها يا راجل
طب وانت رايح مجلس المدينة علشان ترخيص مباني ولا علشان تركب المية والنور لشقتك او رايح تدفع فاتورة التليفون...عمرك ما سألت ماما عن واحدة صاحبتها في السنترال مثلا ولا سألت بابا قبل كدة عن عمو فلان اللي في مديرية الاسكان؟
بلاش دي كمان
لنفترض مثلا انك قررت ماتعتمدش ع الواسطة وانك تتعامل كمواطن عادي بريء ورحت تخلص حاجتك بنفسك..وانت بقى واقف وسط المطحنة دي لقيت طنط سوسن صاحبة ماما بتنادي عليك وبتقول لك انت جاي تعمل ايه هنا؟هات ورقك اما اخلصه ليك؟
هتعمل ايه بقى يا معلم؟!!!!هتسيبها تخلص لك ورقك ولا هتعمل فيها عم الفارس المغوار مكافح الواسطة؟
احنا ليه عندنا ازدواج في الشخصية...ليه بنلعن الحاجة ونعملها؟
كلنا بنكره الواسطة والمحسوبية وانا اول واحد بكرهها وبشمئز منها..ولما اسمع حكاية من حكايات الكوسة دمي بيغلي...بس لما بحتاج لها بألجأ اليها
مين مننا دمه مش بيغلي لما بيسمع عن ان فلان استاذ الجامعة عين ابنه معيد ولا علان المستشار عين ابنه اللي قعد 8 سنين في كلية الحقوق وكيل نيابة؟
بس برضة مين فينا لا يتمنى لو ان ابوه أمن له مستقبله وضبطه تضبيطة العمر؟
مين فينا مش بيتجنن لما يلاقي نفسه متعطل ومش عارف ينجز مصلحة ويلاقي واحد تاني الورق بتاعه بيخلص من غير ما يتعب نفسه ويقف حتى دقيقة واحدة؟
بس لو انت تمتلك الامكانيات ان ورقك يخلص بنفس الطريقة ماكنتش هتتردد
اعترف وانا في كامل قواي العقلية (اللي ممكن تكون غير قوية اصلا) اني كائن يكره الواسطة والمحسوبية والكوسة ومع ذلك يبحث عنها بملقاط لتخليص مصالحه المتعطلة وبأكون في قمة سعادتي لما الاقي فراش او ساعي في اي مصلحة ممكن يعفيني من المرمطة والعطلة في اي مصلحة حكومية تسوقني اقداري اليها

17 comments:

  1. ممش عارف ايه حكاية اول تعليق معايا النهاردة
    دي ثالث مرة اكون اول تعليق في مدونة
    الواسطة بقت داء و صعب يتغير .. دا انا الواسطة في حياتي باسيبها لاخر اختيار
    و اكافح و اناضل
    انا رفضت واسطة واحد قريبنا في الرخصة
    سقطوني مرة في الاشارات على الكمبيوتر و قعدت ثلاث شهور للمتحان تاني بحسب القواعد اتعلمت الدرس بعد الثلاث شهور كلمت خالي ده بس و الله علشان خاطر كليتي اللي في القاهرة و انا من المنصورة و الدراسة زنقتني فجبت الرخصة في يومها و وقعت اخر قرطاس و الله العظيم
    الظابط بقى يقولي قدام الناس : تعالى بعد ثلاث شهور
    و ندهلي واحد في الخفاء قالي
    انتا نجحت و سلملي على خالك
    هههههههههههه
    تحياتي

    ReplyDelete
  2. الموضوع ده فعلاً لاحظته كتير
    بس بمنتهى الامانه أنا بكرهه الواسطه كره فظييييع وكان ممكن أشتغل بيها بس رفضت مع انها جاتلي لحد عندي ورفضتها برضه وفي الاخر اتفرضت عليه بس الحمد لله الموضوع مادخلتش فيه ريحة الواسطه وأنا فخوره بكده الحمد لله
    أنا هقول حاجتين بس أولاً: موضوع الواسطه في حاجات مصيريه زي شغل مثلاً بتخلي الانسان اللي كان واسطتك ده يحس انه ليه فضل عليك طول حياتك وحتحش انك مديون ليه بكل اللي هتوصل له في حياتك ومستقبلك وماحدش يحب الاحساس ده أعتقد يعني
    ثانياً: أنا اتناقشت مع كذا حد في موضوع الواسطه ده ومنهم حد قالي احنا دلوقتي بنحتاج الواسطه علشان نعرف ناخد حقوقنا مش نتعدى على حقوق الأخرين وفي الحاله دي لما بس نحب ناخد حقنا ومانتعداش حق حد تبقى الواسطه مقبوله
    وفي النهايه المفروض المبادئ لا تتجزأ
    يعني انت ممكن تكون بتستخدم الواسطه لأن أبسط حقوقك انك ماتتبهدلش وده مش تحايل على مبدأ كرهك للواسطه ولا حاجه
    ده رأيي الشخصي:)
    آسفه للإطاله :$ سلام :)ا

    ReplyDelete
  3. على فكرة انا فاتح البلوج بتاعي بواسطة

    ReplyDelete
  4. مش بس فى الواسطه أحنا عندنا ازدواج فى كل حاجه
    كل حاجه بنشوفها غلط بنعملها لما بتجلنا الفرصه
    أنا عمرى ما أستخدمت الوسطه
    مش عشان أنا صاحبة مبادىء لا سمح الله
    بس عشان أنا عمرى ما جيت أخلص مصلحه فى الكليه وكنت أعرف حد يخلصهالى
    يعنى من الاخر معنديش وسطه فى أى حته بس لو كان عندى مكدبش عليك كنت هستخدمها طبعا

    ReplyDelete
  5. موضوع ملفت ويستحق المتابعة
    في انتظار المزيد من الموضوعات القوية
    خالص تحياتي

    ReplyDelete
  6. لما تاخد بالوسطه حاجه مش حقك يبقي دي حاجه مش كويسه

    زي بن الدكتور اللي قعد في حقوق 8 سنين وفي الأخر اتعين وكيل نيابه

    لكن لو هتاخد حقك اللي مش هتقدر تاخده من غيرها يبقي ده مش عيب لأنك ماتعدتش علي حق حد

    انت بس حفظت حق نفسك

    علي فكره انا طلعت رخصتي لوحدي رغم ان الوسطه كانت موجوده

    بس انا فضلت اني اتعلم وامتحن
    (:

    ReplyDelete
  7. موجة:
    شرف لي ان انت تكون اول تعليق
    ويارب الاقي تعليقاتك عندي باستمرار
    انا شخصيا وبعد عدة تجارب مرة من غير واسطة..قررت اني اخليها اول اختيار
    مبروك الرخصة...وسلم لي على خالك
    تحياتي واحتراماتي

    ReplyDelete
  8. rehab mostafa:
    احييكي يا رحاب على قوتك والله
    مين اللي تيجي له الواسطة لحد عنده ويرفضها
    هو حد لاقي شغل بواسطة..لما يرفض يشتغل بيها؟
    فعلا الوسايط بتحمل البني ادم جمايل مالهاش لزمة
    ونورتي المدونة ويارب الاقي تعليقاتك عندي باستمرار واتمنى انك تكوني صديقة دائمة للمدونة
    تحياتي واحتراماتي

    ReplyDelete
  9. غمض عينيك:
    هي الواسطة وصلت لجوجل كمان؟
    منورني دايما

    ReplyDelete
  10. 3la asm masr:
    ربنا يفتح في وشك كل الابواب المغلقة ان شاء الله
    وماتحتاجيش لاي واسطة
    بس على فكرة:
    بيبقى شعور حلو جدا لما الواحد يخلص مصالحه بنفسه وبدون الاستعانة بصديق
    تحياتي واحتراماتي

    ReplyDelete
  11. طيب ليه كده جيت أنت بقى على الجرح
    تعرف أنا بكره الواسطة بطريقة مش طبيعية ولما بروح مكان أخلص أى حاجة بحاول أستخبى من الناس اللى أعرفهم بس للأسف بيشوفونى وسواء خلصت حاجتى عن طريقهم أو لا لازم يحملونى جميلة ويقولولى علشان خاطر فلان مع أن بيهم من غيرهم كانت هتخلص وكتير بتخلص من غيرهم

    وكمان أنا بفكر أسيب شغلى لأنه كان بواسطة ودى حاجة تعبانى قوى
    ------------------------
    على فكرة عندك ميل مهم ياريت ترد عليه بسرعة
    --------------------------
    تحياتى لك

    ReplyDelete
  12. ياسر حسين:
    الف الف شكر يا فنان
    مرحب بيك في اي وقت
    نورت المدونة

    ReplyDelete
  13. esraa:
    زي ما قلت يا اسراء
    الواسطة دي شيء بشع بس للاسف هي شر لابد منه
    علشان الواحد يعرف ياخد حقه في البلد دي يبقى لازم للاسف يلجأ ليها
    تحياتي ليكي

    ReplyDelete
  14. انت متعرفش ان الكوسه بقت منتشره جدا افى اسواقنا

    ومستنين الجديد

    تحيياتى

    ReplyDelete
  15. bosbos:
    فعلا يا بس بس الواسطة شر لابد منه بس للاسف فعلا لابد منها لاناا لو ما استعملناش الواسطة لا هناخد حق ولا باطل في البلد دي
    الف شكر
    نورتي

    ReplyDelete
  16. حبة حاجات ايمان:
    انتي بقى اللي معلوماتك قديمة
    احنا بنصدر الكوسة كمان
    وظهرت في الاسواق انواع جديدة من القرع تحياتي واحتراماتي

    ReplyDelete
  17. السلام عليكم

    بما إنى بادرس فى أكبر كلية تعمل بنظام الواسطة ، طبعا لازم أعلق ، الكلية اللى حضرتك عارفها يا دكتور ، " الصيدلة " .. و يارب ما تكونش صيدلة المنصورة لوحدها هى اللى كده ، أصل تجيلى جلطة ، و افكر إنى مش فى مصر ... ، الموضوع هو خلل قيمى فى مجتمعاتنا ، أو فى مجتمعنا كمصريين ، مسألة مبادئ و هل احنا بنحترم مبادئنا و نقدر نتحمل تبعاتها بجدية ، و اللا ضمايرنا عندها أقصى درجات المرونة .. " كاوتش " زى ما بيقولوا ، .. و استعدادى الشخصى لتقبل الواسطة ، و المجاملات و الحاجات التانية اللى بنسميها بمسميات راقية ، عشان نعديها من جمرك الضمير بدون أى رسوم ..
    لحد الآن لا أعرف فعلا هل انطبق عليا وصف حضرتك يا دكتور و اللا لأ ، و لأكتر من مرة بتجيلى الواسطة لحد عندى ، و بيقنعونى إنها خدمة مقابل خدمة ، و إن مفيش تجاوز ، و مع ذلك بارفض ، و يمكن أحيان كتيرة بارفض حفظا لماء وجهى ، ...
    أخيرا
    كفاية كدا ، لأن الكلام هنا يطول ، و يارب يبقى عندنا قيم بجد ، و نقدر نحافظ عليها ، بجد برده ..

    تحياتى لحضرتك يا دكتور أحمد

    السلام عليكم

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails