Monday, 31 December 2007

النهاردة 31 ديسمبر


في يوم 31 ديسمبر 2006 الساعة 7 مساءا كتبت تدوينتي الأولى
وكانت عن وداع 2006 واستقبال سنة 2007 وتساءلت هل 2007 هتكون زي 2006 وهيكون احمد زي الحاج احمد؟
وانا بقرأ التدوينة دي النهاردة يوم 31 ديسمبر 2007 وبحتفل بمرور عام كامل على مولد مدونتي الأغلبية الصامتة...استرجعت احداث سنة كاملة من التدوين...سنة من الافكار...سنة من الاحداث...سنة من الافراح وسنة من الاحزان
سنة مرت بحماسها وبيأسها بأحباطاتها وبتفاؤلها
سنة خلصت وعدت....غيرت فيا حاجات كتير وماغيرتش في مصر اي حاجة على الاطلاق
فضائيات وصحف بتحتفل بالافضل في جميع المجالات
وبدون اي نظرة تشاؤمية مني على الاطلاق بأقول وبالفم المليان
لم ينجح احد في 2007
يوم 31 ديسمبر 2007 بيمر على مصر ومفيش اي اختلاف بينه وبين 31 ديسمبر 2006 على الاطلاق
نفس الشعب النائم ونفس الاستغلال والفساد والبطالة....نفس الاعلام الحكومي الموجه ونفس الاعلام المستقل والمعارض المتحمس...نفس الحاكم ونفس الحاشية ونفس مجلس الشعب وهو هو مجلس الشورى...لسة برضة الحزب الوطني موجود...لسة ايمن نور في السجن..لسة مرتضى بيفتح الملفات...لسة الاخوان في السجون...لسة المحاكم العسكرية شغالة....لسة نظيف رئيس وزراء ولسة الاسعار بتزيد....لسة الناس مش لاقية لبن اطفال مدعم ولسة الادوية بتغلى....لسة احمد عز بيحتكر الحديد....لسة معظم المحافظين لواءات شرطة وجيش....لسة اسعار الشقق نااار...لسة في شباب مصري بيطفش لايطاليا...لسة الشباب بيتجوزوا عرفي...لسة نواب الشعب بيصفقوا...لسة الانتخابات بتتزور....لسة الشوارع زحمة...لسة الواسطة...لسة المسلمين ما بيصوموش في يوم واحد..لسة العيد في مصر غير اللي في السعودية غير العيد في ليبيا...
لسة علب الصفيح موجودة في مصر...ولسة ناطحات السحاب بيبنوها اهل دبي....لسة العرب بيذلونا ببترولهم..ولسة المصريين بيعايروهم بجهلهم....لسة تامر امين في البيت بيتك..ولسة منى الشاذلي بتتألق في العاشرة مساءا....لسة المصري اليوم هي امل مصر في صحافة محترمة...لسة صحافة الحكومة بتشيد بأمريكا لما امريكا تشيد بالحكومة...ولسة نفس الصحافة بتلعن امريكا لما بتنتقد الحكومة.....لسة سواقين الميكروباص بيحتلوا الطرق...لسة كل كام شهر عمارة بتقع...لسة الافلام السينمائية بتهجم علينا في الصيف...لسة الجامعات الخاصة بتتعمل كل يوم...لسة الثانوية العامة هي بعبع كل بيت...لسة الاهلي بياخد الدوري...لسة الزمالك حاله لا يسر عدو ولا حبيب...لسة محدش عرف سعاد حسني اتقتلت ولا انتحرت...لسة المفتي بيفتي...ولسة شيخ الازهر بيجامل الحاكم...لسة صباح بتغني....لسة اللبنانيين بيتخنقوا مع بعض...لسة الجولان محتلة...لسة حوادث الطرق مستمرة بنجاح ساحق....لسة البوم عمرو دياب بيكسر الدنيا...لسة البنات دايبين في تامر حسني....لسة عادل امام بيمثل...ولسة رمضان هو شهر المسلسلات.....لسة ميلودي بتتحدى الملل...ولسة زووم ع المكشوف....ولسة روتانا فاتحة لنا عينينا وبتورينا اللي عمرنا ما شفناه.....لسة افراح اولاد المسئولين ورجال الاعمال بتتكلف الملايين..ولسة الغلابة مش لاقيين الملاليم...
لسة مصر زي ماهي
مصر لم تتغير في 2007
مصر 31 ديسمبر 2006 هي برضة مصر 31 ديسمبر 2007 بس يارب تكون غير مصر 31 ديسمبر 2008 ...
.بس تكون مختلفة للأفضل لأن مفيش اسوأ من كدة
على كل حال:
سنة سعيدة
مصر في 31 ديسمبر 2007


الى من يهمها الامر:
تواريخ مش هتتنسي مهما طال بي العمر:
يوم 27 يونيو2007
يوم 22 اغسطس 2007
يوم 15 اكتوبر 2007
وجودك في حياتي هو اهم احداث 2007
ربنا يخليكي ليا

37 comments:

  1. كل سنة وانت طيب
    ويارب السنة الجديدة تكون افضل وتحقق فيها احلامك اللى ماقدرتش تحققها في 2007

    عن نفسي بطلت ارصد احداث لان كل سنة زي اللى قبلها

    شوف البوست اللى كتبته امبارح

    http://afkaar-bella.blogspot.com/2007/12/blog-post_30.html

    تحياتي

    ReplyDelete
  2. كل سنه وانت طيب وان شاء الله 2008 تبقى أحسن من 2006 و2005و2004و2003 .....ا وان شاء الله يحصل فيها حاجات أحسن ويجي 31 ديسمبر 2008 بذكريات أحلى من 31 ديسمبر 2007 :)

    ReplyDelete
  3. مبروك عليك سنة تدوين جديدة وكما لخصت فالوضع كما هو لكن كل نقطة من اللي انت قلتهم ازدادت سوءا على الأقل بمرور سنة إضافية عليها

    ReplyDelete
  4. ولسه يا ما .. ياما ياما ياما
    في عمرنا
    ولسه الكلام منتهاش
    عايز الحق ولا ابن عمه؟
    قيس الاختلاف على المستوى الشخصي أفضل لأنك لو قست الاختلاف على المستوى العام من الصعب أن تلمسه بسهولة

    خالص تحياتي

    ReplyDelete
  5. السلام عليكم ورحمة الله وبركاته

    كل سنة وانت طيب يا دكتور احمد ويارب السنه الجايه تبقي احسن من اللي فاتت

    ويارب الوضع ما يودلدش سوء علي سوء

    وربنا يفرجها علينا من عنده

    ميروك سنة التدوين الاولي وعقبال مايبقوا مائة سنة


    تحياتي

    ReplyDelete
  6. كل سنه وانت طيب وسنه جديدة سعيدة ان شاء الله

    وبنتمنى كلنا تكون السنه الجديدة مختلفة عن اللى قبلها واللى قبلها
    أصل ما ينفعش ما نحلمش ونتمنى صح ولا أيه



    من حقنا أن نعيش لأحلامنا وفى أحلامنا ونسعى لتحقيقها
    لا يجب أن نعيش أحلام غيرنا فينا
    من حقى أن أعيش حلمى وأحاول بقدر أستطاعتى تحقيقة
    ولكن هل يتركنا الآخرين لنعيش أحلامنا وترك أحلامهم فينا

    ReplyDelete
  7. كل عام وانت بخير ولعل العام الجديد يكون فاتحه خير على المسلمين والمصريين

    ويتحولون من اغلبيه صامته الى اغلبيه متحركه ثائرة على الظلم

    تحياتى

    ReplyDelete
  8. عدت سنة واحنا للأسف زي ماحنا .. أغلبية صامتة

    كل سنة وانت والمدونة بألف خير يارب

    مدونتك فعلا جميلة اوى وبحب ادخل اقرا فيها جدا

    سلاماتى واحتراماتى يا استاذى

    ReplyDelete
  9. كل سنة وانت طيب

    ويارب يكون دايما في سعادة وهنا

    على الغم من كل اللي بيحصل

    لسه في شوية تفاؤل

    شكرا على كل حال

    ReplyDelete
  10. كل سنة وانت طيب ربنا يجعلها سنة سعيدة علينا وعلى كل المسلمين على اى حال رحلت 2007 بحلوها وبمرها بس قبل ما اتمشى عاوزه اقولها حاجة مهمة جدا كنتى احلى سنة ف عمرى بجد اتولدت فيكى من جديد واللى حصل فيها غيرلى حياتى تماما ربنا يجعل كل سنينا خضرا ان شاء اللة اصلك نسيت حاجة مهمة ف بوستك الجامد دة انك تقول كل سنة النجم يبقى ف ازدهار وكاس افريقيا يصيبة الدمار لمن يهمة الامر النجم دة النجم الساحلى طبعاmerry christmas

    ReplyDelete
  11. كل سنة وانت طيب وان شاء الله 2008 تبقى سنة سعيدة عليك يارب

    وكل سنة ومدونتك طيبة ويارب تكتب فيها كمان مليون سنة

    طبعا على المستوى العام الدنيا متغيرتش كتير

    بس برغم كل ده انا لسه عندى امل ان الوضع يتحسن ويحصل تغيير
    بس التغيير ده مش هيحصل الا لما الغالبية الصامتة ديه تبقى غالبية عارفة تتكلم وتغير اللى حواليها

    اتمنالك سنة سعيدة ان شاء الله
    كل سنة وانت طيب

    ReplyDelete
  12. كل سنة وانت طيب

    واتمنى السنة الجديدة تكون احداثها احسن ليك من السنة اللى فاتت

    وطالما 2008 رقم زوجى ..يبقا انا متفائلة بيها جدااااااااااااا

    :D


    Happy New Year :)

    ReplyDelete
  13. ولسه ولسه ولسه
    هو احنا لسه شوفنا حاجه


    ومع ذلك كل سنه وانت طيب ويارب31/12/2008 تكتب ان فى حاجات اتغيرت وان
    احنا مش لسه زى ماحنا
    سلامى

    ReplyDelete
  14. ____0000000000______0000000000_____
    __000________000__000________000___
    _000___________0000___________000__
    000_____________00_____________000_
    000________Happy New Year______000_
    000_____________FOR____________000_
    _000____________ALL___________000__
    __000________________________000___
    ___000___Ahmed Al-Sabbagh___000____
    _____000_______2008_______000______
    _______000______________000________
    _________000__________000__________
    ____________000____000_____________
    ______________00__00_______________
    ________________00_________________
    ________________ 0 ________________

    ReplyDelete
  15. كل سنة و انت طيب..عام سعيد عليك ان شاء الله..المهم احنا نفضل زي ما احنا..و يارب بس السنة الجديدة تبقى زي القديمة مش اسوأ

    ReplyDelete
  16. هي هي

    هاتتغير ليه


    لازم تتهد


    وييجى شعب جديد نوفى كده

    يطبع مع البلد الجديدة
    مافيييييييييييييييييييييش فايدة

    كل سنة وانت طيب .. ونقول ايه
    نجامل بعض .. ماشى نجامل بعض
    واكيد بكرة احلى
    ومش عارف ايه

    بس برده مافيش فايدة :(

    ReplyDelete
  17. و عشان كده...في كل سنه جديدخ بقول يا رب متتطلعش أسوأ من اللي قبلها
    تحياتي

    ReplyDelete
  18. bella:
    وانتي طيبة وبالف خير وصحة وسعادة ان شاء الله
    مين يعرف؟ مش ممكن تكون 2008 سنة الاحداث السعيدة باذن الله
    نفسي تكون سنة فاصلة في تاريخ البلد دي
    ولو ان مش منتظر دة من 2008 او حتى 2080
    تحياتي

    ReplyDelete
  19. rehab mostafa:
    الف شكر ليكي يا رحاب
    كل سنة وانتي بخير وصحة وسعادة واحسن حال ان شاء الله
    يارب...يسمع منك ربنا
    تحياتي

    ReplyDelete
  20. عصفور المدينة:
    كل سنة وانت بخير وسعادة وصحة ان شاء الله يا باش مهندس
    كل نقطة ازدادت سوءا....؟
    يا خبر ابيض
    دة على كدة 31 ديسمبر 2008 ممكن مايبقاش في حاجة اسمها مصر من اساسه
    تحياتي واحتراماتي

    ReplyDelete
  21. ياسر حسين:
    كل سنة وانت طيب يا فنان
    وان شاء الله ربنا يدينا الصحة وطول العمر ونقعد كدة يوم 31 ديسمبر 2008 ونقول
    ياااه السنة دي كانت جميلة جدا..مصر فعلا اتغيرت
    بس حاسس ان الكلام دة..في المشمش
    تحياتي واحتراماتي

    ReplyDelete
  22. خمسة فضفضة:
    اهلا يا دكتورة
    كل سنة وانتي طيبة وبخير وفي صحة وسعادة ان شاء الله
    الله يبارك فيكي..المدونة دي مستمرة بمشاركتكم القيمة في موضوعاتها ويارب تفضل دايما كدة ان شاء الله
    انا اعتقد ان الدنيا لو باظت اكتر من كدة هتكون مشكلة
    تحياتي واحتراماتي

    ReplyDelete
  23. bosbos:
    ايه الكلام الكبير دة يا بس بس
    كل سنة وانتي طيبة وبخير ان شاء الله
    من حق الكل انه يحلم ويتمنى
    الحلم هو الحلم..احلمي انتي بس ومالكيش دعوة بالاخرين
    تحياتي واحتراماتي

    ReplyDelete
  24. SASA:
    كل عام والجميع بخير وصحة وسعادة ان شاء الله
    تحياتي واحتراماتي

    ReplyDelete
  25. انسانة:
    الف شكر على الكلام الجامد دة ياسمين
    انتي برضة شخصية محترمة جدا...ومدونتك اكتر من روعة
    تحياتي واحتراماتي
    كل سنة وانتى طيبة

    ReplyDelete
  26. صاحب المضيفة:
    رغم كل شيء الا انه بيبقى التفاؤل هو اساس الحياة
    من غير تفاؤل مفيش حياة من الاساس
    تحياتي واحتراماتي

    ReplyDelete
  27. شيكابالا:
    اي نعم هي كانت سنة النجم وكمان نقدر نسميها سنة العرجون
    بس برضة هي كانت سنة الاهلي بدليل الدوري والكاس والسوبر وكمان نهائي كاس افريقيا
    بس هي اكيد مش سنة الزمالك...معلش حاولوا تعوضوا في سنة 2008....قصدي 2018 وعليكي خير
    وحتى دي كمان محل شك
    تحياتي ليكي وكل سنة وانتى طيبة

    ReplyDelete
  28. كل سنة و انت طيب يا احمد
    سنة 2007 دى كانت كئيبة بشكل اعوذ بالله
    الحمد لله انها خلصت


    هو صحيح حتى فى 31 ديسمبر 2100 ممكن مصر تتغير؟؟؟

    ReplyDelete
  29. لحظة تأمل:
    ان شاء الله في 31 ديسمبر 2008 نقول انها كانت سنة فارقة في تاريخ مصر بس تكون سنة فارقة للاحسن ان شاء الله
    تحياتي واحتراماتي

    ReplyDelete
  30. oceaneyes:
    على فكرة انا كمان بتفائل بالارقام الزوجية
    ولو انها مش قاعدة على اساس ان لصوص البلد خلوا السنوات الزوجية والفردية كله شبه بعضوا
    تحياتي واحتراماتي

    ReplyDelete
  31. shymaa:
    هو احنا لحد دلوقتي ماشوفناش حاجة؟
    يا خبر ابيض
    دة 2008 دي شكلها هتبقى حكاية....
    ربنا يستر
    تحياتي واحتراماتي

    ReplyDelete
  32. ahmed al sabagh:
    كل سنة وانت طيب يابو حميد
    تحياتي واحتراماتي

    ReplyDelete
  33. نقطة مية:
    يارب مانفضلش زي ماحنا....لا نكون احسن واحسن ان شاء الله
    تحياتي واحتراماتي

    ReplyDelete
  34. monzer:
    هي....قنبلة نووية
    تخلص
    انسف....انسف...تخلص من بلادك القديمة
    تحياتي واحترامي

    ReplyDelete
  35. micheal:
    اعتقد مفيش اسوأ من كدة
    رغم ان الظروف مرشحة للأسوأ
    تحياتي واحتراماتي

    ReplyDelete
  36. جيداء:
    بالنسبة لي يا جيداء الحمد لله كانت سنة مش بطالة خالص
    يارب 2008 تكون كويسة ان شاء الله
    تحياتي

    ReplyDelete
  37. ياباشا دايما كده متفائل وغرقنا بالتفاؤل ده
    ايه ياعم
    اي حاجة حلوة طيب
    ع العموم
    كل سنة وانت طيب وكل سنة والمدونة طيبة
    بس انت فين
    واحشني
    محمد سمير

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails