Friday, 23 November 2007

رأيه


الدعوة للحملة دي وصلتني عبر الميل من احد المجموعات البريدية الدينية
الموضوع دة للي مش متابع له جذور من حوالي 10 ايام
ساويرس (رجل اعمال مصري ومن اغنى اغنياء العالم وصاحب عدة مشروعات ضخمة اشهرها بالنسبة للمصريين شبكة موبينيل) عقد مؤتمر صحفي واتكلم في موضوعات كتير من ضمنها تعبيره عن اندهاشه من انتشار الحجاب في مصر بشكل ملحوظ وانه منزعج بشكل شخصي على الرغم من احترامه للحجاب على حد تعبيره
وقال ان شوارع القاهرة دلوقتي بتحسسه انه في طهران من كتر المحجبات وانه اصبح بيحس بالغربة في مصر
اللي فات دة كان رأي ادلى بيه نجيب ساويرس
رأي
بأكرر
رأي
مش قرار
نجيب ساويرس مواطن مصري بيغبر عن رأي خاص بيه هو عن رفضه لتنامي ظاهرة الحجاب وزيادة المحجبات في الشارع المصري....هل رأي ساويرس دة هيمنع الحجاب في مصر؟
ساويرس لما اعلن انه ضد الحجاب..بنات مصر قرروا يخلعوا الحجاب استجابة للدعوة الساويريسية المباركة؟
انا على حد قناعاتي الشخصية ان اللي عايزة تتحجب بتتحجب...واللي بتحب تلبس ملابس عارية بتلبس....ماعتقدش ان رأي نجيب ساويرس هيغير من الأمر في شيء.......!!!!!!
في اختراع في العالم اسمه الليبرالية وحرية الرأي....الراجل بيعبر عن رأيه في رفضه لشيء معين عليه اساسا اختلاف بين المسلمين نفسهم.....
ممكن جدا ان يتم الرد عليه من خلال رأي برضه بدون غلط ولا تجريح ولا اهانة ولا نعته بالكافر والفاسق
هيحصل ايه لو تم الرد عليه من خلال مؤتمر صحفي برضة زي اللي عمله وتم الرد عليه بالمنطق والحجة والبرهان والرأي بالرأي؟
المواقف العنيفة اللي بياخدها التيار الاسلامي ضد خصومه في الرأي او اللي بيعتقد انهم خصومه...مواقف بتضعف منه بشكل كبير قدام المجتمع الخارجي وكمان قدام المسلمين المعتدلين
زمان علمونا ان الصوت العالي بيضعف من موقفك ولو كنت صاحب حق....ودة اللي بيعمله اصحاب الحملات دي
ارجوكم
احترموا حق الاخرين في ابداء اراءهم طالما بتتم بدون تجريح في ثوابتنا الدينية.....اتعلموا ثقافة الاختلاف بدون تحريض وحملات اثبتت دائما فشلها

21 comments:

  1. أكيد لازم نسمع وجهه نظر أى حد ونرد عليها برضة بدون الحاجات اللى ما بقتش بتفيد
    لان الصوت العالى زى ما بتقول والحملات دى ما أعتقدش أنها هتفيد
    طيب نشوف كده حاجة لو مثلا عملنا حملة وقلنا للناس الراجل ده كافر ولازم نقاطع شكرة موبينيل هل فعلا فيه حد هيقاطع ولا حد هيعمل حاجة
    أعتقد لا
    وهكذا بالنسبة لباقى كل حاجة هو مشارك فيها
    يبقى الأحسن أيه نعمل حاجات مالهاش لازمة وبتكون تضييع للوقت وخلاص ولا نعمل حاجة مفيدة
    فيه طريقة للنقاش وعرض الرأى المفروض الناس تتحلى بيها

    وبعدين من ناحية مسألة الحجاب لا كلام ساويرس ولا كلام الأخ فاروق حسنى من قبله أثر فى حد
    اللى مقتنع بحاجة بيعملها واللى عايزة تتحجب بتتحجب بغض النظر عن رأى أى حد من الأساس
    وأنا يمكن لاحظت أن كلام فاروق حسنى ده جاب أثر رائع وحسيت أن نسبة المحجبات زادت يعنى هما أصلا كلامهم لا بيأثر على حد ولا بيغير وجهه نظر حد

    والله الناس اللى بتدعو للحملات دى لو مش عارفين يوصلوا رأيهم مباشرة ممكن بدل الحملات دى يوضحوا وجهه نظرهم برضة ورأيهم بكل هدوء لأن اللى بيحصل ده مش هيفيد ولا هينفع

    وبعدين اللى يحس بالغربة فى بلده يتفضل يسيبها محدش ماسك فى حد


    تحياتى لك

    ReplyDelete
  2. تحياتي لك

    انا معك ان العقلانيه لازم تاخد دورها فعلا في مجتماعنا
    وانلغة الحوار لازم تتغلب على لغة النرفزة

    لكن
    أعتقد ان الدعوة لمقاطعة ساويرس وموبينيل لم تأت لكنه قبطي
    بل لأنه قرر أن ينشا قنوات اباحيه جديده إضافة الى قناته او تي في

    لكن أيضا لست مع استخداد الكافر والفاسق والحاجات دي

    اشكرك على البوست القيم

    ReplyDelete
  3. مساء الورد على أجمد المدونين
    :)

    ReplyDelete
  4. خالتك فرنسا هانم زيرو عشره
    يعنى لايمنى ساويرس ولا غيره
    اما عقد مؤتمر للرد عليه
    ده
    فى رايى المتواضع جدا
    تكبير لحجمه

    ReplyDelete
  5. ما يقول زي ما يقول هو يطلع مين يعني عشان يفتي والناس تتبع فتواه
    هو رجل أعمال كون ثروته من جيوبنا
    لكن هذا لا يعني أن تكون آراءه مؤثره على عقيدتنا
    الحاجة التانية هو بيحس وهو ماشي في مصر أنه في طهران
    وانا لما باشوف قنوات الاغاني العربية بأحس إننا في لوس فيجاس
    كل واحد حر في رأيه وكل بني آدم عنده عقل بيميز بيه الرأي الصواب من الخطأ

    تحياتي

    ReplyDelete
  6. السلام عليكم
    فى اول زياره لى فى مدونتك احب ان اعبر عن اعجابى بمواضيعك المميزه

    بالنسبه بقى لنجيب افندى
    هو حر هو حد قاله البس حجاب

    يعنى يعمل مؤتمر عشان يقولنا كده بيدل على غيظه
    ورائيه لا يهمنا فى شئ
    ومافيش بنت محترمه هاتشيل حجابها عشانه

    وحكايه اننا نعمل مؤتمر عشان نرد عليه
    ليه يعنى......... هو كان طلع قرار يمنع الحجاب فى مصر
    ده مجرد شخص بيقول رائيه
    ماحنا كلنا بنقول ان المسيحين ملوا البلد
    كانو طلعو قرار بنفيهم يعنى؟

    طيب انت عرفت انهم عايزين فعلا يطلعو قرار يمنع النقاب للممرضات
    !!!!!!!!!
    قال ايه بيزهق العيانين

    اهو ده اللى فعلا قرار ينرفز
    ولا حد اعترض ولا سمعنا نفس

    دى بلد تعبانه
    يلا بقى طولت عليك فى اول تعليق ليا
    زمانك قولت عليا رغايه
    :)

    ReplyDelete
  7. BOSBOS:
    ولا حد من دول هيقاطع موبينيل
    طب هتستغربي جدا لما تعرفي ان مصطفى بكري اللي متبني الحملة القومية ضد ساويرس...نمرة موبايله بتبدأ ب 012
    شر البلية ما يضحك
    بتوع الحملات اللي زي دي بيعملوا هيصة وزيطة على مفيش
    ماتسيبوه يقول اللي يقوله وانتم كمان قولوا اللي تقولوه
    تحياتي

    ReplyDelete
  8. دكتور حر:
    بالنسبة للقنوات اللي انت بتقول عليها اباحية دي يا دكتور...هي مش للدرجة دي
    كل ما هنالك ان قناة او تي في قررت تعرض مادتها الاجنبية ان كت
    UNCUT
    مش مقطوعة...انما لا هي بتعرض برامج ولا مواد جنسية
    والمفروض انها بتنوه قبل كل برنامج يحتوي على اي مادة غير لائقة ان البرنامج دة مخصص لككبار
    وبالتالي لازم اللي خايف علىاولاده الصغيرين يغير المحطة
    هو دة حل المشكلة
    تحياتي

    ReplyDelete
  9. شادي فايد:
    ياااااااااااااااااااااه
    انت فين ياعم شادي من زمان؟
    عود احمد
    تحياتي ليك

    ReplyDelete
  10. فرنسا هانم:
    منورة يا خالتي فرنسا
    المدونة اتشرفت بالزيرو عشرة يا فندم
    طب نرد عليه احسن ولا نعمل الحملة القومية للقضاء على ساويرس الكافر الفاسق؟
    تحياتي ليكي ومنورة دايما

    ReplyDelete
  11. ياسر حسين:
    تمام يا استاذ ياسر
    احنا متفقين مع بعض انه يقول زي ما يقول..هو مش مؤثر
    انما السؤال هنا
    نعمل حملات تكفره وتحل دمه...ولا نقول احنا كمان ونرد عليه؟
    تحياتي واحتراماتي

    ReplyDelete
  12. بندقة:
    مع اول زيارة ليكي لمدونتي المتواضعة
    اسمحي لي اقول لك
    نورتي المدونة
    طب نرد عليه ونعمل مؤتمر ونتكلم بهدوء وحكمة ولا نتكلم بعصبية ونعمل حملات قومية بتتهمه بالكفر ونطالب بمقاطعة شركاته واحنا عارفين ان محدش هينفذ المقاطعة دي؟
    لازم نغير من استراتيجياتنا واساليبنا بقى
    انتي مش رغاية ولا حاجة
    انتي نورتي المدونة
    تحياتي واحتراماتي

    ReplyDelete
  13. ما هو مفرقش كتير عن موقف حسين فهمي و الوزير
    و مسمعتش حد قال عليهم كفره
    و اصلا لا يحق في اي حال من الأحوال ان حد يكفر حد حتي لو عمل ايه
    دي بتاعة ربنا مش بتاعتنا احنا

    ReplyDelete
  14. اساسا رأيه ده طبيعى جدا لانه ببساطة انسان غير مسلم .. فمن البديهى انه يكون مالوش فى الإسلام ولا مظاهره أياً كانت

    يعنى مثلا حضرتك مسلم معتقدش ابدا انك تكون بتحب القداس .. ولا اى حد مسيحى حيكون بيحب صلاة الجمعة مثلا

    انا بس كل اللى مأخذى عليه هو مساحة الحرية المفرطة فى القناة الخاصة بيه .. فعلا كتيييييييير جدا مش بيعمل
    CUT
    للأفلام الأجنبى ولما سألوه قال اللى مش عاجبه يغير القناة

    خلاص براحته واحنا كمان براحتنا نشوف ايه ومنشوف ايه

    لكن حملات ضده وكلام من ده معناه اننا بنديله اكبر من حجمه .. هو مجرد مستثمر مصرى مسيحى ثري .. لا اكثر ولا اقل

    تحياتى

    ReplyDelete
  15. السلام عليكم سلام على احلى شباب بحييك على الموضوع الجميل وكل الموضيع الجميله المهمه اللى بتهم كل الناس دى اول مره اشوف المدونة بس عجبتنى جدا**************رحمه**************

    ReplyDelete
  16. koukawy:
    كلام جميل احييك عليه تماما
    بس ياريت اخوانا بتوع الكافر والزنديق والملحد يعرفوا كدة
    تحياتي واحتراماتي

    ReplyDelete
  17. انسانة:
    بصي يا ياسمين
    كون انه مش مسلم مش مبرر لهذا الرأي على اساس ان مش كل المسلمين مؤيدين للحجاب
    في مسلمين واشد حربا على الحجاب من غير المسلمين
    على فكرة
    انا لا بحب قداس المسيحيين ولا باكرهه
    هحبه ليه؟ واكرهه ليه برضة؟
    مفيش سبب لكدة ولا كدة
    مش معنى اني مش مسيحي يبقى اكره كل ماهو مسيحي...انما بتكون مشاعري ناحية شعائر الدين المسيحي متعادلة
    بالنسبة لساويرس
    هو ثري مصري بيعبر عن رأي بصرف النظر عن ديانته...يعني ماينفعش نعمل حملات قومية ضده لمجرد انه قبطي
    انا ضد الحملات تماما..انا مع الرأي قصاد الرأي
    تحياتي ليكي

    ReplyDelete
  18. رحمة:
    شكرا جزيلا
    ياريت نشوف تعليقاتك باستمرار
    تحياااتي

    ReplyDelete
  19. أرجوأن لا نعطي لكلام ساويرس أكبر من حجمه
    فهو ليس مفكرا لكي ننادي بحرية الرأي له
    وليس عدوا لكي نرجمه وننادي بقتله

    ReplyDelete
  20. سلام عليكم

    أؤيد رأيك يا فندم أنه يعبر عن رأيه و الذى لا يخص أحد من المسلمين و إنما -يمشى- على من هم على ملته و فقط

    و بالطبع هو بيتكلم من موقع استعلاء لأنه غنى .. فلماذا لا يتحدث عن قضية لا تخصه كالحجاب الذى هو من ثوابت المسلمين ؟

    الخطأ ليس منه و لكن ممن هم مسلمين و يخوضون فى أمر مفصول فيه من قبل شريعة الإسلام

    و أختلف معك فى جملة(عليه اساسا اختلاف بين المسلمين نفسهم) لأن الحجاب ليس فيه اختلاف بين المسلمين إطلاقا و لم يحدث

    و لكن بعض الجهلاء أمثال وزير ثقافتنا الموقر يعبر أيضا عن رأيه الذى فى الأصل ليس له أن يتكلم فيه و هو من ثوابت الدين و لا اختلاف بين المسلمين عليه

    و كلمة اختلاف بين المسلمين على شئ لا تعنى أن يختلف أى شخص مع أى شخص

    لكن أن يختلف عالم فى الأمر مع من هو فى مرتبته العلمية
    حينها ممكن أن نطلق عليه أنه اختلاف

    أما أن يتكلم شخص فيما لا يعلمه و يخالف بذلك إجماع أهل الفهم و العلم فلا يتعتبر ذلك اختلافا حتى لو كان وزير الثقافة نفسه

    بل و يضرب بكلامه عرض الحائط
    و أتحدث عن وزير الثقافة تحديدا رغم أن الموضوع لم يتطرق إليه بسبب أنه مسلم و خاض فيما لا يعنيه

    هناك نقطة أخيرة أحب أن أوضحها فى جملتك
    (المواقف العنيفة اللي بياخدها التيار الاسلامي ضد خصومه في الرأي)

    اعترض على اطلاقك لفظة التيار الاسلامى و إلصاقك به ما تفضلت بالتعليق عليه

    فإنى أراك مثقفا و ذو علم و لا ينفع إطلاق كلمة التيار الاسلامى على كل من يحملون فكرة إسلامية

    لأنه للأسف أصبح المعتدلون من التيارات الاسلامية فى قفص الاتهام بالتسرع فى الخطوات و العشوائية فى التصرفات
    و الواقع أنهم بعيدون عن ذلك كل البعد

    أشكرك على رأيك المحترم و لك منى كل التقدير


    د.حماس

    ReplyDelete
  21. هو يقول اللي عايز يقوله بس كمان مش من حقه انه يستفز مشاعر الناس ولا اثارة المشاعر واثارة حفيظتهم وهو بيتكمل عن الحجاب في مصر وبعدين نرجع نقول الراجل مقلش غير رايه صحيح رايه لن يغير شئ ولكن مينفعش احنا كمان نقف ونسقف له ونقول له برافوا وانا مع راي خالتي فرنسا عمل مؤتمر للرد عليه هو اقل من اننا نرد عليه بمؤتمر
    والعاقبة عندكم في المسرات

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails