Thursday, 1 November 2007

الفلاحين


السادة الفلاحين المصريين الغير محترمين:
ربنا يحرقكم

مش عارف بصراحة ادعي عليكم واقول ربنا ينتقم منكم على تلويثكم للجو والشروع في قتلنا بدخانكم ولا ادعي على اللي سايبكم تعملوا كدة فينا وهو ولا على باله ماهو مش خسران حاجةولا ادعي على اللي من الاول عمل لكم قيمة وسط البشر وانتم اساسا بسلوكياتكم دي وغيرها لا ترقوا لمستوى البني ادمين اساسا

انا طبعا عارف ان الدخان والتلوث دة لو كان واصل بالبشاعة دي لمصر الجديدة كانت الدنيا قامت ولم تقعد....وبالتأكيد الدخان والاختناق والتلوث دة مش واصل ل6 اكتوبر والا كان الفلاحين اعدموا
انما بما ان المتضرر الاول من الدخان اللي في الجو دة هم ناس عاديين جدا عايشين في الشرقية او الغربية او اي محافظة من محافظات الدلتا المنكوبة فبالتأكيد الموضوع ليس على درجة عالية من الاهمية

طبعا.......دة اخر حاجة ممكن كبار القوم دول يفكروا فيها هي صحة الناس.....دة على افتراض ان احنا ناس اساسا

اما بقى بالنسبة للفلاحين

مش ممكن يكون لسه في في الدنيا ناس كدة
جهل وتخلف ومرض....ومش بس مرضى لاااااااااااااااااااااااا دول شغلهم الشاغل تصدير المرض للغير
حد يخطف رجله لأي عيادة صدر في اي محافظة ريفية زي الشرقية او الدقهلية او الغربية واتفرج على المرضى اللي منتظرين في العيادة للكشف عليهم
هتلاقي حوالي 70% من المرضى المنتظرين دول....فلاحين
طيب الناس دي بيشتكوا من ايه؟
صعوبة شديدة في التنفس وامراض حساسية وبعضهم الموضوع بيتطور معاه اكتر من كدة
طب مين السبب في الكلام دة؟
الدخان والتلوث الفظيع اللي مالي الجو اليومين دول بسبب حرق قش الارز
طب مين اللي بيحرق؟
الفلاحين
طب مين اللي عيان وهيموت بسبب الدخان دة؟
الفلاحين
الله يحرق الفلاحين

23 comments:

  1. انا عرفت مدونتك من الفيس بوك
    تشرفنا يا فندم
    --
    انا كنت من سكان القاهرة قبل الهجرة الى الصومال
    و احب اقولك ان الدخان وصل لمصر الجديدة و مدينة نصر و المهندسين كمان
    و انا الفلاحين مظلومين لان لو سابوا قش الارز بتتجمع عليه حشرة بتاكل الزرع و تخرب المحصول و لو فكروا يبيعوه ده بيتكلف لان نقله اغلى من مكسب بيعه
    لو عايز تدعي على حد بجد ادعي على الحكومة اللي حسبي الله و نعم الوكيل فيها عمالة تصرف على حفلات و مهرجانات و علاج الرقاصات و سايبة موضوع هام زي ده من غير حل و قال اية مفيش مزانية ربنا يشويهم في نار جهنم زي ما حرقوا صدور اولادنا و اهلنا
    تحياتي

    ReplyDelete
  2. أيه ده يا أحمد فيه أيه
    طيب الفلاحين ذنبهم ايه فعلا هما مالهمش ذنب
    أنا فاكرة قبل ما تطلع حكاية الحرق دى الفلاحين ماكانوش عارفين يعملوا أيه بالقش ده وكان أيامها وزير البيئة أو وزيرة مش فاكرة هما اللى قالوا للفلاحين أحرقوا القش لأننا ما عندناش صرفة له
    طبعا الفلاحين سمعوا كلام بتوع البيئة وعملوا كده وحرقوا القش اللى لو فضل ممكن يسبب فى كوارث تانية
    وهما مالهمش ذنب لو عايز تدعى روح ادعى على الوزير ولا الوزيرة اللى أمرهم بكده وأدعى على الحكومة اللى مش عايزة تعمل حاجة وعايزاهم يتحملوا كل ده لوحدهم
    لأنهم لا قادرين يروحوا يبيعوه ولا قادرين يسيبوه هما زينا مظلومين
    وأكتر محافظات أعتقد فيها تلوث الشرقية والدقهلية والغريبة وأحنا اللى بنشرب كل ده وهنموت من الخنقة بس مش معنى كده أننا ندعى على المظلوم ونسيب الظالم

    وبعدين تعالى هنا أنا ما عجبتنيش جملة عندك خالص وهنقلها هنا

    ادعي على اللي من الاول عمل لكم قيمة وسط البشر وانتم اساسا بسلوكياتكم دي وغيرها لا ترقوا لمستوى البني ادمين اساسا

    فيه ايه أعتقد هما مالهمش ذنب وأعتقد كمان أننا من غير الفلاحين ماكناش هنلاقى ناكل وبعدين أيه عمل لكم قيمة وسط البشر يا خبر لية كده
    صدقنى كلنا مخنوقين من اللى بيحصل ده بس ما ينفعش نسيب الأصل ونمسك فى الصورة

    ReplyDelete
  3. مش ممكن يكون لسه في في الدنيا ناس كدة
    جهل وتخلف ومرض

    أسمحلى مش هما السبب فى كل ده سواء كان الجهل أو التخلف أو المرض
    الشعب كله بيعانى من التخلف والجهل والمرض يعنى الناس اللى عايشة فى المدن مش بيعانوا من التخلف والجهل والمرض
    ومعلش بقى لو الفلاحين بيعانوا أكتر من بتوع المدن دى مش غلطتهم لو روحت زيارة لأى بلد أرياف وشفت مستوى الخدمات من تعليم وصحة وكل حاجة هتعرف ليه هما بيعانوا من كده يعنى هما مش السبب لوحدهم

    ReplyDelete
  4. sampateek:
    غريبة انك تعرفي المدونة دي من خلال الفيس بوك على الرغم ان المدونة دي بقالها بتاع سنة
    بس عموما دة شرف كبير ليا مشاركتك في مدونتي المتواضعة
    والله انتي لو عايشة في محافظة دلتاوية وشوفتي المنظر ع الطرق الزراعية وحسيتي ا انتي بتتنفسي دخان
    مش هتدعي ع الفلاحين بس....انتي ممكن تدعي على جدك الاكبر اللي سكن في المكان دة وكان السبب في وجودكم وسط بؤرة التلوث دي
    تحياتي

    ReplyDelete
  5. bosbos:
    بصي يا بس بس
    ممكن جدا تكون لهجة البوست دة عنيفة شوية
    بس دة بسبب ان انا فعلا مخنوق...وعمال اجيب في بلغم وعيني تدمع وحالتي زي الزفت بصراحة
    ودة كله علشان ناس مش مدركة هي بتعمل ايه في نفسها قبل ماتعمل كدة في الناس اللي مالهمش ذنب اللي زينا كدة
    طبعا المسئوليه مشتركة مابين جهل الفلاح واهمال الحكومة اللي بتعتبر موضوع زي البيئة دي قضية هامشية جدا رغم ان مفيش عندها قضايا اساسية اصلا
    وعايز برضة اقوللك ان الفلاحين كان ممكن يحتجوا او يضربوا او يعملوا قلق علشان موضوع القش دة يتحل بدل ما يحرقوه
    عارفة لو كانوا رموه على الطرق السريعة بدل مايحرقوه...كان هيبقى حل كويس جدا وهيجبر الحكومة على التخلص منه
    انما هم لا يعنيهم انهم يمرضوا الناس لانهم بلا وعي اساسا
    اما بخصوص الفقرة
    "ادعي على اللي من الاول عمل لكم قيمة وسط البشر وانتم اساسا بسلوكياتكم دي وغيرها لا ترقوا لمستوى البني ادمين اساسا"
    فانا طبعا اقصد جمال عبد الناصر ورفاقه اصحاب انقلاب1952 وراييدايما واعلنته كتير انه اعطى للفلاحين امتيازات لا يستحقزها وهم غير مؤهلين لها اساسا
    تحياتي ليكي

    ReplyDelete
  6. بقيت عنصرى يا احمد
    مارينا غيرتك يا احمد
    لا كده مش هاينفع يا احمد
    ايه الى حصلك ؟
    عملوا فييك ايه فى مارينا
    مرة تقول فيه ناس تستهال تضرب وتتبهدل وتتهان وتتروق

    ومرة تانية
    تقول الفلاحين بيحرقوا قش الرز وبتاع وتدعى عليهم بالحرق .. وكام جملة طبقية كده

    انا مش يسارى .. ولا فلاح للأسف ولا صعيدى اناقاهرى صميم وفعلا الريحة والدخنة وصلت زي ما قالت سامباتيك مصر الجديدة .. وغيرها
    بس أعتقد ان الحكومة لازم تقوم بدور بقه مش تتفرج وتولع فيها

    يعنى هما الفلاحين غاوين يحرقوا قش الرز
    غاويين ريحة الدخان يعنى .. ادمونوا الدخنة .. بيلفوا قش الرز جوينات

    ما هما كمان
    بيجيلهم بلغم و عينينهم بتدمع وبيرجعوا دم
    ماحدش بيبعبرهم بجنس منديل أحمر

    الحكومة باه... لو خايفة عليك ولو خايفة على الفلاحين أصلا ولو خايفة على الهوا انه مايتلوث تساعد وتجد حل لقش الرز

    تخلى شركات الورق تاخده وهي الى تنقله ويدوا أي حاجة للفلاحين .. يعنى هما الفلاحين هايقولوا لا .. ولا تاخده شركات البلاستيك


    الله يحرق الحكومة يا عم

    تحياتى يا أبو حميد

    ReplyDelete
  7. ههههههههههههههههههه

    راجع نفسك في كل كلامك بهدوءءءءءءءءءء

    الناس دي متستاهلش منك كدة

    ReplyDelete
  8. مش عارفة بجد اقول لك ايه الموضوع ده أستفزنى جدا وردك فيه كلام أستفزنى أكتر محسسنى أن الفلاحين دول مش بنى أدمين زينا ومحسسننى أنهم كلاب ضالة المفروض نضربهم بالنار
    وبعدين أعتصام واضراب أيه حضرتك اللى بتتكلم عنه أذا كان الناس المتعلمين والمثقفين ما بيعملوش وبيخافوا على نفسهم يبقى عايز الفلاحين هما اللى يعملوا وبعدين أنت عارف أيه اللى ممكن يتعرضوا له عملوا كده هو أنت مش عايش فى البلد دى معانا

    وبتقول أنهم بلاوعى وغير مؤهلين معلش بقى هو مين اللى سايبهم كده
    ومين أصلا فى بلدنا عنده وعى بحاجة ولا مؤهل لحاجة
    ولا علشان دول بس اللى ظاهرين يبقى نمسك فيهم
    يعنى معلش احنا عايشين فى مدن هل كل اللى فى المدن كويسين بص يا أحمد أنا مقدرة كل الضرر اللى بنتعرض له
    بس ما ينفعش نتكلم عن ناس مننا وزينا وما يقلوش حاجة عننا كده

    بص هقول لك على حاجة انا هنا فى مدينتى فيه مصانع للطوب وبتعمل تلوث أكتر تقريبا أو زى تلوث حرق الرز ويمكن ده برضة قارفنا
    بس عمر ما حد أتكلم عنهم كده ومش معقول هنقول لهم أقفلوا المصانع

    وكمان الورش والنجارين دول كمان هم تانى وبيكونوا فى وسط البيوت وفى المدن مش فى الأرياف
    لية ماحدش اتكلم عليهم
    دول برضة بيبهدلونا من نشارة الخشب والحاجات اللى بيعملوها
    وغيره وغيره

    يعنى مش الفلاحين بس اللى بيضرونا

    فيه ناس كتير بتضرنا
    ومحدش بيتكلم ولا بيقول لهم حاجة

    فماينفعش نيجى على الفلاح الغلبان والفقير ونقول ونعمل عليه كده

    ReplyDelete
  9. هدي نفسك بس يا احمد
    احنا فعلا بنعاني كتير من المشكلة دي وانا حاسس بيك جداا
    بس فعلا مش الفلاحين لوحدهم السبب

    معلش هو بس اكيد خنقتك هي اللي مخلياك مخنوق منهم اوي كده
    لكن صدقني الحكومة ذنبها اكبر من الفلاحين بكتييييير وف اديهم احل بس تقول ايه بقى غير حسبي الله ونعم الوكيل

    ReplyDelete
  10. لا حرام عليك

    انا لسة شايفة روبورتاج من كام يوم مع الفلاحين اللى بيحرقوا قش الرز وطلعت المشكلة سببها وزارة الزراعة تقريبا

    فى مكنات كبيرة غالية بتقدر تحول القش لسماد مش متذكرة اوى بس الفكرة ان المكنات دى تقدر تخلص كمية القش دى وبالعكس نستفاد منها كمان

    مشكلة الفلاحين انهم اشتكوا واعترضوا وكل شوية يروحوا يطلبوا المكنات والوزارة مش بتجيب حاجة

    المذيع سألتهم طب مش بتخزونهم ليه قالوله لو اتخزنوا بيجيبوا فران وحشرات ضارة بالمحاصيل كلها واشتكوا من انهم مش قدامهم غير الحرق وان الحرق ده تاعبهم جدا وتاعب عيالهم ومش عارفين يعملوا ايه

    بالله عليك متدعيش عليهم وتشيل الدعاء ده هما ميستهولش كدة بجد

    تحياتى

    ReplyDelete
  11. ندعي على الجهل وليس الجهلاء
    وندعي على أصحاب العقول الذين وظفوا عقولهم في الهلس وليس في خدمة البشر
    الفلاح ليس في يده حيلة
    كما كان سكان حلوان من قبل ليس في ايديهم حيلة من استنشاق الاسمنت
    للتلوث حلول تكنولوجية عديدة ولو تم صرف النقود المصروفة على تكنولوجيا الموبايلات والرنات على تكنولوجيا حماية البيئة من ماكينات وفلاتر على مداخن المصانع لما حدث ما حدث من التلوث البيئي في مصر وبدأ ظهور ظاهرة الاحتباس الحراري التي رفعت درجة حرارة الجو في مصر صيفاً عن معدله المعتاد
    وكفاية كده عشان الواحد اتكلم كتير

    خالص تحياتي

    ReplyDelete
  12. هما اللي خاربين البلد فعلا و أنا بتهم الفلاحيين بأنهم وراء البرنامج النووي الغير سلمي لايران
    :)
    يا عم ده بقي نظام عاوز الحرق بجاز وسخ
    تحياتي

    ReplyDelete
  13. monzer:
    ازيك يا منذر عامل ايه؟
    والله ياسيدي مش عنصرية ولا حاجة
    انما فعلا انا مخنوق....حاسس ان احنا عمرنا ماهنتقدم طول مافي ناس بهذا المستوى من الجهل
    معقول......؟؟
    حد يعمل كدة في الهوا اللي بيتنفسه؟
    عارف طبعا ان الحكومة بنت لذين....وانها مسئولة ومتضامنة وشريك اساسي في المهزلة دي
    انما احنا رميين طوبة الحكومة دي من زمان وعارفين انها سبب كل بلاوي البلاد دي
    مش ناقصين كمان امراض فوق الامراض اللي بيعاني منها الشعب دة
    انا عمري في حياتي ماشفت حد بيسبب امراض لنفسه
    بلاوي بجد
    وبعدين يا سيدي...مهما كانت الدخان واصلة ليكم...مش هتكون بنفس القوة اللي عليها في الدلتا المنكوبة
    وانا متأكد ان انت لو كنت مكاني كنت هتصب جم غضبك على اي حد بيحرق القش وبيسبب الكارثة اللي احنا فيها دي
    تحياتي ليك يا منذر

    ReplyDelete
  14. كراكيب عادل:
    مانت لو بتعاني من نفس المأساة
    ماكنتش طالبتني بالهدوء خاااااااااالص
    تحياتي

    ReplyDelete
  15. bos bos:
    خلينا يا بس بس نتفق ان الفلاحين المصريين لسه منتشر بينهم الجهل والعادات البالية بشكل كبير جدا
    وخلينا نتفق برضة ان الجهل اللي فيه الريف المصري سبب رئيسي للاوضاع المزرية اللي مصر فيها
    يكفي ان تعرفي ان احنا واحنا في القرن ال21 لسة في فلاحين بيتعاملوا مع الامراض بوصفة جدتي بتاعت سنة 1919
    مش هتناقش معاكي مين اللي سايب هم في الجهل والمرض والتخلف دة علشان دة مش موضوعنا على الرغم ان المفروض انقلاب 1952 قام بسبب الناس دي
    يبقى الناس دول برضة سبب المشكلة مش ضحايا زي مانتي متصورة على اساس ان ربنا مابيغيرش ناس معندهومش استعداد انهم يتغيروا اصلا
    ولو قريتي الموضوع بتاعي كويس هتلاقي ان انا اتكلمت برضة على الحكومة باعتبارها سبب رئيسي في المشكلة دي
    الطرفين...الفلاحين بجهلهم...والحكومة باهمالها واستهانتها بصحة رعاياها هم السبب
    شكرا لاهتمامك ويسعدني استمرار الحوار
    تحياتي واحتراماتي

    ReplyDelete
  16. الام وامال:
    دايما لي رأي في الموضوع دة بيقول ان مصر علشان تنهض وتقوم وتكبر في يوم من الايام لازم قنبلة نووية تجيب عليها واطيها وتتبني من جديد على نضافة
    يابخت اليابان
    تحياتي واحتراماتي

    ReplyDelete
  17. انسانة:
    زي ماقلت
    المسئولية ضمنية
    الفلاحين بجهلهم وعدم اعترافهم ان الي بيعملوه دة مصيبة
    والحكومة باستهتارها وعدم مراعاتها لصحة ناس مالهمش لزمة اساسا لانهم لا بيجيبوها للحكم ولا يملكوا حق اقالتها
    تحياتي واحتراماتي

    ReplyDelete
  18. الفلاح هيعمل اية ياصاحبى

    الحكومة

    المفروض انها توفر ليهم طريق للتخلص من القش دة

    دة فية دول بتستفاد بية

    وعيب ازى لما دولة زى مصر مش عارفة تستفاد بية

    تحياتى

    ReplyDelete
  19. أسمحلى هما برضة مظلومين وكلامى ده من الواقع مش كلام بقوله كده بس
    والجهل اللى هما فيه هما ضحيته مش لأنهم مش عايزين يتطوروا ويتعلموا لأ لأن أصلا مافيش حاجة واصله لهم من أى خدمات زى التعليم والصحة وكل حاجة
    عايزة أقول لك مثال مرة كنت فى بلدى وكان يوم دراسة الاقى الأطفال من بدرى مروحين بسأل واحدة قريبتى فيه أيه هما ماشين بدرى لية وكانت الساعة 10 قالتلى ما هما كل يوم بيروحوهم كده يعنى التعليم صفر وده بسبب مين بسبب أن مفيش رقابة عليهم المدرسين والمدارس ماشين بمزاجهم وأكيد هما واخدين حريتهم لان مفيش حد بيتابعهم ولا فيه اى رقابة من الوزراة ولا الحكومة وده من ناحية التعليم
    من ناحية باقى الخدمات
    الصحة برضة زى الزفت ماعندهمش حاجة صدقنى ومش ذنبهم
    الحكومة هيا اللى سايباهم كده
    تخيل انا اصلا لما بروح هناك بحس أنى فى عالم تانى صحراء بجد
    مفيش أى حاجة تخليهم يتقدموا أو يتطوروا
    ولولا وجود التليفزيون كان زمانهم لسة عايشين فى عالم تانى أكتر من ده
    ودة مثال بسيط

    تحياتى لك ويسعدنى أنا كمان أستمرار الحوار

    ReplyDelete
  20. انا قريت الردود اللي عندك وكلهم قالوا انهم مالهمش ذنب في مسئولين علي حد علمي انهم هما اللي ملازمين بالفضالات الفلاحين هما يعني هيكون حابين التعب والمرض ليهم قبل غيرهم يعني
    اللوم علي المسئولين علي الاشياء دي
    وبعدين لولا الفلاحين اللي بتدعي عليهم دوال مش هتلاقي اكل تاكله وليهم لازمه مهما كانت تصرفاتهم بلاش تبص ديما للسلبيات وماتبصلش للايجبيات بتاعتهم او غيرهم

    ReplyDelete
  21. ياسر حسين:
    الواحد من خنقته مش قادر يستحمل منظر النار اللي في الغيطان واللي مبهدلانة البهدلة دي
    انا بشوف ان المسئولية مشتركة بين الفلاح وجكومته
    تحياتي

    ReplyDelete
  22. micheal:
    ماشي ياعم ميشيل
    اراهن ان انت من سكان القاهرة او الاسكندرية
    اصل انت لو كنت عايش في المحرقة المسماة الدلتا ماكنتش قلت كدة
    بس برضة دمك زي العسل
    تحياتي

    ReplyDelete
  23. tamer nabil:
    ارجع واقول
    الفلاح دة لو كان رمى القش دة ع الطرق او حتى قدام المحافظة ولا الحزب الوطني
    كان اكرم له واشرف له وكان كسب تعاطف العالم كله
    انما تقول ايه بقى في الجهل
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails