Monday, 29 October 2007

تاااج جااامد جدااا


تاج جميل ممتع جايلي من اكتر من صديق وصديقة عزيزة
مش اسمها عزيزة.....انما صديقة عزيزة
جايللي من حسام (الشغاااال) ومن رانيا (المشاعر) ومن بس بس (الروح) ونخش بقى ع التاج علشان هو طويل....ويمكن اطول مني شوية
لو قالولك اختارعصر من عصور مصر عشان تعيش فيه تختار اى عصر وفى عهد اى حاكم واشمعنى؟
الحقيقة كل عصور مصر المحروسة على مدار التاريخ لها مالها وعليها ماعليها ومانقدرش نقول ان في عصر كان احسن من اللي قبله
تلاقي عصر ازدهرت فيه حاجة واتدمرت فيه حاجات تانية كتير وهكذا
ولذلك فان العصر اللي اتمنى اعيش فيه ويكون كل واحد بياخد فيه حقه ومفيش واسطة ولا محسوبية والبني ادم فيه محترم وكرامته مصانة في بلده وبيمارس حقوقه كاملة
ومفيش فيه جهل ولا فقر ولابطالة.....اعتقد ان العصر دة لسه ماجاش اصلا ومش منتظر ان احنا نشوفه قريبا
اول اولوية فى حياتك عيلتك ولا شغلك ولا اصحابك؟
رغم ان التلات حاجات دول ماينفعش يتم وضعهم في مقارنة مع بعضهم لأن كل واحد له اولوية مختلفة تماما عن الاتنين التانيين
الا ان الشغل هو الاول......ليه بقى؟
علشان من غير الشغل واللي بيقدمه ليا شغلي مش هكون محترم قدام نفسي ولا قدام عيلتي ولا كمان قدام صحابي.
ايه اكتر حاجة بتحبها فى رمضان ؟
احترام المواعيد وتقديسها
الافطار بميعاد والسحور بميعاد وماينفعش حد يتأخر ولا ياكل لوحده
وبالتالي احترام المواعيد دي بتنعكس على الترابط والتلاحم بين الاشخاص
اللى بيبوظ الحكام ..نفسهم ولا الشعب ولا الحاشية المقربة؟؟
الحاكم لو ماكنش عنده استعداد انه يبقى فاسد وبايظ ولا الجن الازرق هيعرف يبوظه
انما لأنه من قرارة نفسه عنده استعداد كبير لتزيين الفساد والانحراف سهل جدا انه يبوظ وبيتم تبرير دة من خلال ان الحاشية فاسدة او ان الشعب مستكين ومستسلم للفساد وغلبان
انما انا بشو ف ان رأس الفساد هو الحاكم الحاكم الحاكم اذا اصلح صلح المجتمع كله واذا فسد....البلاد تدمر تماما
مين اكتر اعلامى مصرى بتحترمه؟؟
حمدي قنديل-مجدي مهنى
اما باقى المحترمين زي منى الشاذلي وعمرو اديب ومعتز الدمرداش فدول احب اتفرج عليهم واحترمهم جدا انما يبقوا برضة انهم بيشتغلوا بشعار انا عندي عيال عايز اربيهم
لو ممكن تشتغل شغلانة تانية غير اللى انت بتشتغلهااو كنت بتشتغلها كنت تتمنى تبقى ايه؟؟
صحفي
بس مش صحفي من بتوع قائد سفينة الوطن ولا ربان المركب المصري ولا الحاجات دي
انما صحفي بقلم حر شريف.....قلم ليبرالي يحترم جميع الاراء ويقدرها ويكون شعاره فعلا اللي بيطبقه في حياتهالاختلاف في الرأي لا يفسد للود قضية
ايه تانى بلد تتمنى تعيش فيها بعد مصر؟؟
ماينفعش اعيش في اي مكان تاني غير مصر
حاولت وماقدرتش
مصر بالمصريين اللي بجد اللي بيحبوها وبيخافوا عليها.....والله هتكون جنة
احنا مقوماتنا كبيرة قوي يا جماعة بس لو عايزين
اوصف ليا ترتيبات اجمل فرح ممكن تحضره؟
اجمل فرح ممكن احضره هو فرح كل اللي حاضرين فيه بيحبوا العريس والعروسة من قلبهم
مش مجرد انهم جايين الفرح علشان مظاهر اجتماعية ولا تأدية واجب والسلام
ساعتها هيكون اجمل فرح فعلا بصرف النظر الفرح دة مكانه فين.
بتراعى كلام الناس والقيل والقال؟ لو اه او لو لا قولى ليه؟
براعيه في الاصول بس يعني لو بعمل حاجة انا اخجل منها لازم اراعي كلام الناس لأنهم في الحالة دي اكيد بيكون معاهم حق
انما لو انا واثق من نفسي وليا اسبابي يبقى كلام الناس مايسواش عندي اي حاجة
صحيت من النوم مالقيتش الموبايل ولا الكمبيوتر ولا الكاميرا الديجيتالولقيتنا رجعنا لعصر الحمام الزاجل والحصنة حتبقى سعيد؟
طبعا في البداية هيجي لي صدمة حضارية شديدة وممكن تلاقيني قاعد كتير مذهول...بس هتكيف على الوضع الجديد وهبتدي اتعامل مع الواقع حتى لو كان مؤلم
بس الفكرة هنا...على مااتكيف مع الواقع ممكن اخذ وقت قد ايه؟
السعادة هى؟؟
الرضا ثم الرضا
ايا كان الواقع طالما انا راضي بيه تبقى هي دي السعادة
عندك امل ؟ اسبابك ؟
طبعا عندي امل...وامل كبير كمان
واسبابه هو ان دوام الحال من المحال وان الايام دول
بمعنى ان مفيش حاجة بتفضل على حالها على الاطلاق
لما تحب تهرب من كل شىء بتروح فين؟؟
بحاول اخرج نفسي من الموود اللي مخليني عايز اهرب
بمعنى اني لو متضايق من الشغل وعايز اهرب منه يبقى لازم اخد اجازة
لو متضايق من البيت يبقى لازم اسافر
على حسب اللي مخليني عايز اهرب...باهرب
امتى مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟
لما ابص في اعلانات الجرايد لوظيفة معينة كانت من كام سنة بينطبق عليا شروطها من حيث السن ودلوقتي ماينفعش علشان انا اتخطيت السن بتاع الوظيفة دي
لما بتعمل عمل خيرى بيكون ايه هو دافعك الاول؟؟
رضا الله....هو الدافع الاول وييجي بعديه رضا النفس...اني احس ان ربنا اعطاني نعمة ولازم اشكر ربنا عليها بأني افيد بيها ناس معندهمش النعمة دي
بتشرب سجاير؟لو الاجابة اه ايه شعورك لو شفت ست بتشرب سجاير وليه؟
لا مش بشرب سجاير خالص ولا شيشة
اما بقى الست المدخنة...فهي نظرة ومن غير زعل على الاطلاق..
نظرة احتقار
وعلى طول بيكون سلوكها واخلاقها محل شك
بتعرف ايدك اليمين من الشمال ازاى؟
سبحان الله....معرفة رباني كدة من غير سبب
ايه اكتر اله موسيقية بتحبها؟
الناي
الة حزينة بحب قوي اسمعها بالليل....كلها حزن وشجن
فى رأيك ليه الذوق والنخوة اتعدموا؟
انا في رأيي انهم انعدموش ولا حاجة
الشهم موجود وقليل الاصل موجود برضة....كله موجود وانت وحظك هتصادف في حياتك اي منهم
ايه الحاجة اللى لو حصلتلك تبقى سعيد قوى؟
ان كل احلامي تتحقق
واحس ان انا عملت اللي عليا في الحياة وانتظر بقى تصاريف القدر بعد كدة
تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟
انا شخصيا بحب اخذ حقي ناشف
احب الفلوس اللي في البنك وانا بقى هتصرف
البحر ولا النيل؟
البحر طبعااا
فيه حركة وحياة
عاقل ولا مجنون؟
الاتنين مع بعض
ساعات ابقى في منتهى العقل وساعات بتطلب معايا لحظات جنون
بس ارجع واقوللك
مفيش مجنون بيقول على نفسه انا مجنون
لو قال كدة
اعرف على طول انه في منتهى العقل
تقرا كتاب ولا تتفرج على فيلم؟
على حسب الموود ساعتها
ممكن جدا موودي مود قراية وبالتالي اقرا الكتاب ولو شدني ممكن اخلصه في قعدة
وممكن الاقي نفسي مش طايق اقرا سطر وبالتالي المشاهدة هنا هي الحل
بتمرر التاج لمين
لأي حد قرا التاج دة عندي وشاف ردودي على الاسئلة وعرف يستنبط جزء من شخصيتي
بس للأمانة
احلى تاج جاللي في المدونة دي
بهديه ليك ياللي بتقرا السطر دة

14 comments:

  1. والله انت راجل زي العسل يابو حميد
    :)

    مش عارف ليه معظم الناس اجمعت على البحر مش النيل
    حاجة غريبة وتحس فيها كده بنكران جميل النيل
    ياجماعة ده احنا نقدر نعيش من غير بحر
    بس مش ممكن نعيش من غير نيل

    :D

    يعني ذوقيا كده لازم نقول النيل
    هههههههههه

    ReplyDelete
  2. This comment has been removed by the author.

    ReplyDelete
  3. يا سلام على الأجابات الجامدة
    بس أيه حكاية أن الكل لو أختار شغلانة تانية هيختار يكون صحفى المدونين كلهم عايزين يبقوا صحفيين أنا كده وجهه نظرى صح أن التدوين جزء من الصحافة والمدون بيكون صحفى بالفطرة ودى وجهة نظرى وأعتقد أن كتير بيتفقوا معايا فيها
    الحمد لله أنا رجعت تانى بعد فترة أنقطاع النت الرخم
    ههههه

    ReplyDelete
  4. نفسك تكون صحفى ؟؟
    هههههه
    انا بقى ياسيدى للاسف صحفى

    ===========
    ماعلينا
    ممكن اطلب منك كود ملف الصوت اللى انت حاطه عندك فى السيد بار
    ياريت
    الكود نفسه مش رابط الموسيقى

    ياريت

    ReplyDelete
  5. هو ممكن افهم يعني ايه تاج بليز انا قريت الاسئله لكن مش قادره احدد ليه اسمها تاج بليززز

    ReplyDelete
  6. الام وامال:
    الف شكر
    اهتمامك وزيارتك للمدونة شرف كبير لي
    البحر برضة بحر.....سيبك انت
    انما النيل دة مش بتاعنا دة بتاع اصحاب الشقق اللي عليه اللي الشقة ب 2 و 3 مليون
    وكمان النيل بتاع المراكب العايمة اللي عليه
    انما البحر واسع.....بيساع من الحباليب الف

    ReplyDelete
  7. bosbos:
    عود احمد
    قلقتينا عليكي والله يا بس بس هانم
    سلامااااات
    ياريت تكون اخر انقطاع للوصلة
    اما بقى الصحفي....
    فالصحفي الشريف في زماننا دة بقى عملة نادرة....ممكن نقول عليه من المستحيلات زي الغولة والعنقاء كدة
    انما بقى لو صحفي والسلام فدول على قفا مين يشيل
    تحياتي واحتراماتي

    ReplyDelete
  8. هيثم الغيتاوي:
    سعيد جدا بتشريفك لمدونتي المتواضعة
    ياريت تنورني باستمرار
    بس انت مش قلتلي:
    بتكتب فيي اي جورنال؟
    بالنسبة للكود
    حااااااااضر
    هتلاقيه هنا النهاردة ان شاء الله
    تحياتي

    ReplyDelete
  9. الاخ احمد

    جميل اوى ان اول زيارة ليا هنا تاج

    اهه الواحد يستريح شوية

    مدونة متميزة

    ReplyDelete
  10. hi ahmed
    3awza a2ollak enta sha7's zareef geddan wna 2areet kol mawade3ak feyoom wa7ed i admire u u will be agood writer weaktar 7aga3agabetny sara7tak
    nefsy nekon so7ab yareet terod 3alya mosh zay el marra elly fatet
    bye

    ReplyDelete
  11. eno:
    اولا الف شكر على تشريفك لمدونتي المتواضعة
    ثانيا التاج دة عبارة عن استطلاع رأي او استقصاء فيه مجموعة من الاسئلة اللي غالبا بيكون دمها خفيف وكل شخص بيبعتها لمجموعة من الاشخاص علشان يجاوبوا عليها والشخص اللي جاوب بيبعتها لمجموعة جديدة من اصدقاءه وهكذا
    يارب يكون المعنى وصل
    تحياتي

    ReplyDelete
  12. سارة:
    شرف كبير لي زيارتك للمدونة
    شكرا جزيلا
    ويارب تكون مدونتي مكان دائم لتهدئة اعصابك
    الف شكر
    تحياتي واحتراماتي

    ReplyDelete
  13. حدوتة مصرية:
    ايه الكلام الكبير دة
    انا قعدت بعد الكلام دة انتفخ اتنفخ من الغرور لحد مافرقعت
    شكرا ليكي طبعا يا حدوتة على الكلام الكبير دة اللي انا بجد مااستحقش ربعه
    بالنسبة للمرة اللي فاتت معلش انا انقطعت عن التدوين لفترة لظروف الشغل فممكن جدا اكون قصرت في الرد خلال الفترة دي
    معلش
    بالنسبة لاننا نكون اصدقاء
    دة شرف كبير ليا بجد
    عموما مدونتي مفتوحة لتعليقاتك القيمة وكمان الميل بتاعي في البروفيل بتاعي ممكن تراسايني من خلاله وتبعتي لي الميل بتاعك
    كمان لو انتي ليكي صفحة على الفيس بوك...ممكن تضيفيني من ضمن الاصدقاء سواء عن طريق اضافة الميل او عن طريق البحث عن
    ahmed samir almesalamy
    تحياتي واحتراماتي

    ReplyDelete
  14. هيثم الغيتاوي:
    دة الرابط اللي انت طلبته
    http://h1.ripway.com/almesalamy/El_Mewaten-Masry.mp3
    يارب اكون افدتك
    اسف ع التاخير
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails