Tuesday, 23 October 2007

تعذيب وتعذيب

عارف ان البوست دة هيجر عليا متاعب لا حصر لها وانتقادات كتيرة ابسطها اني عديم الانسانية واني لا استحق الحياة اساسا لأني بني ادم غير ادمي
الموضوع دة عن التعذيب في اقسام الشرطة وعن سلوك ضباط الشرطة في مصر نحو مواطنيهم
انا عن نفسي بفرق بين نوعين من التعذيب او استعمال القوة
اول نوع هو استعمال القسوة مع النشطاء السياسيين او المعارضين للنظام ودة طبعا مرفوض تماما على اساس ان الشرطة هنا مابقتش شرطة انما بقت خرزانة في ايد الحاكم....بالأضافة طبعا ان الناس دي غالبا مابتكون مثقفة ومحترمة ومهمومة بقضايا وطنها وكل همها ان حال البلد دي ينصلح
وبالتالي استخدام القسوة والتعذيب مع الناس دي لمجرد ان رأيهم مش عاجب الحاكم......دي جريمة لا تغتفر وتستوجب محاكمة مرتكبيها.
انما النوع التاني بقى من استخدام القسوة والتعذيب فخاص باستخدام القسوة مع الحرامية والسوابق والمسجلين خطر....ودة بقى بصراحة لا يثير في اي استياء او امتعاض على الاطلاق.
وعلشان تلتمس العذر لشخص ما لازم تحط نفسك في موقفه
تخيل ان شقتك او عربيتك اللي حيلتك اتسرقت......وقبضوا على مشتبه فيه.
تفتكر انت هتكون مهتم ان عربيتك اللي حيلتك ترجع ليك ولا هتكون مهتم اكتر بالمعاملة الادمية اللي بيلقاها الحرامي في قسم الشرطة
انا متأكد تماما ان انت هتقول ان شاالله تقطعوه حتت واقطعه انا كمان معاكم بس عربيتي ترجع لي.
وهو دة اللي بيحصل...لما عيل يسرق كابلات الكهربا بتاعة الناس ولا مسجل خطر سرقات ولا حرامي شقق ولا واحد بلطجي يتضرب في القسم لما يبان له صاحب...فيها ايه دي؟
ماهو اصلا في الاساس حشرة تستحق السحق والقتل مش الضرب بس
اومال المطلوب ان الضابط في القسم ياخده يقول له عملت كدة ليه يا حبيبي؟
معنتش تعمل كدة تاني علشان احبك
لو رجعت للسرقة والبلطجة تاني هحرمك من المصروف؟
انتم لو شفتم واحد بس من الحرامية والبلطجية دي ممكن جدا تقول للضابط عنك انت انا اللي هقتله مش هضربه بس
يا اخوانا:
بأقر واعترف تماما ان الشرطة في مصر معاملتها للناس في منتهى السوء وان عدد كبير جدا من ضباط الشرطة في حاجة لتربية من اول وجديد
بس مع البلطجية والحرامية والسوابق هي دي اسلوب المعاملة المثلى وماينفعش يتعاملوا غير كدة

18 comments:

  1. أحمد باشا السمير

    اللوز الكبير
    فى حاجة أكتر من كده، حد بيدلعك زيى
    علشان ماتقلوش حارمك من حاجة

    أتخانق باه براحتى :))
    ****
    يعنى انت فرقت بين استعمال القوة بين الناشط السياسى والجنائى، او معتاد الإجرام
    هو علشان حضرتك بقالك كتير مش بتدخل عندى ها :( فاتك كام تقرير كده عن التعذيب منهم واحد مواطن تقدر تقول عليه رجل اعمال هو عنده شركة استيراد وتصدير اضرب واسترق جوة شركته
    ده لا مسجل ولا معتاد الإجرام
    اقرا التدوينة ده
    http://hapasa.blogspot.com/2007/10/blog-post.html

    وفى مؤتمر مصريين ضد التعذيب ونقلا عن نوارة
    ان الدكتورة عايدة سيف الدولة قالت ان احنا الى خلينا الشرطة المصرية تعمل كده
    لما سكتنا عن تعذيبها للمعتقلين الإسلاميين فى من أول الخمسينيات والستينييات مرورا بالتسعينيات
    فظابط الشرطة الورور الأخضر ده اتعلم من الرتب الالعى منه أساليب التحقيق الغير آدمية أصلا مع أي حد

    فحضرتك من اول ما تدخل القسم، تفضل وسيب كرامتك على بابه
    صدقنى فىاللممة بياخدوا كله مش بيفرقوا ابقى قابلنى لما يقابلك صاحب

    واتفكر امجد بتاع أوتوبيس الغردق الى اتهان واتبهدل ده لا كان حرامى ولا بتاع ده خريج جامعة امريكية يا بشر، وأبو وحماه رجال اعمال بيبنوا قرى سياحية
    حتى ناس مش قليلة
    الموضوع قريب من كل واحد فينا يا أبو حميد

    انا طولت قوى معلش بأه بقالى كتير ماجتش هنا
    آخر حاجة علشان تبقى علقة واحدة

    رجل الشرطة لمابيضرب ولما شوفنا التصاوير، ماحسناش انه بيضرب من غله أو زعله او خوفه على المواطنين وكده، ده بيضرب وهو بيهرج وهو بيتصور وهو بيتسامر مع صحابه
    والى عليه تنفيذ القانون، والقانون مافهوش ضرب، ولم يعين قيم على البشر
    وكفاية عليك كده:))

    ReplyDelete
  2. طيب مين اللي يحدد ده ناشط سياسي (كويس وبن ناس) وده ابن كلب حشرة عايزة السحق؟
    افترضت إن سيارتك مسروفة أو شقتك مكسورة.. تعال تجرب صورة تانية.. أنا اللي سيارتي مسروقة واتهمتك أنت بسرقتها.. هل هذا يبرر التعذيب عشان ترجع السيارة؟؟
    وما يحدث كثيرا، إن ضابط عنده قضية، وعايز يقفلها، فيمسك أي واحد، ويخليه يعترف، ويروح المحكمة.. والضابط اترقى، والمواطن راح في داهية
    عشان انت (وآخرين) قبلت التعذيب في قضايا جنائية
    وكام قضية اتقفلت كده؟؟
    تحياتي

    ReplyDelete
  3. ازيك يا احمد
    بقالي كتير مدخلتش هنا
    ياااااااه
    :d
    المهم
    انا كنت ناوي اعلق
    بس بصراحه تعليق منذر وفارس
    قالوا كل اللي كنت عايز اقوله
    تحياتي

    ReplyDelete
  4. MONZER:
    الف شكر ليك يا معلم
    اللوز الكبير دة شرف كبير قوي ليا
    يا منذر احنا مش مختلفين على ان جهاز الشرطة وسلوكياته محتاجة لمراجعة ومراجعة جامدة قوي كمان
    وانا لا اقر تعذيب اي مواطن الا المسجلين والحرامية واصحاب السوابق اللي انت مهما تتخيل لا يمكن ان تتخيل مدى التناحة اللي بيتعاملوا بيها واللي تخللي رمز الهدوء والحلم يتحول لعصبي متهور
    احنا متفقين تماما مفيش نقطة خلاف ان التعذيب شيء بشع لجميع المواطنين المحترمين سواء كانوا نشطاء سبياسيين او رجال اعمال او غيرهم
    انما في فئة معينة يستحيل التعامل معها بدون هذا الاسلوب
    تحياتي واحتراماتي

    ReplyDelete
  5. فارس وحيد:
    لا طبعا
    مش مجرد اتهام حد لأي حد بالسرقة د ة يكون مبرر لتعذيبه وضربه واهانته
    على الاطلاق
    انا لما اقصد التعذيب اقصد بيه محترفي السرقة والاجرام والسوابق
    ودول اكيد كتير جدا ولشرطة عارفاهم كويس وبتستعين ببعضهم في بعض المهام
    ولكن مش مجرد التعذيب لمجرد الاتهام
    وانا بأكرر رأيي ان التعذيب مرفوض تماما انما فعلا في بعض الفئات ماينفعش معاها غيره
    دة لو نفع معاها اصلا
    تحياتي واحتراماتي

    ReplyDelete
  6. بص والله الواحد كل ما يجي يعيب في الشرطة في سؤ المعاملة مع الناس و انهم بيعملوهم كأنهم حيوانات يرجع و يقول بردو الناس دولت فيهم الكويسين عندما يسمع ان ضابط شرطة مات في سبيل الدفاع عن مواطن واخرها موت النقيب الذي دافع عن فتاة كانت قد تعرضت للاغتصاب علي ما اذكر

    ReplyDelete
  7. ضباط الشرطة بشر فيهم الحلو وفيهم الوحش

    لكن التعذيب ان ضدة نهائى

    دة اهدار لكرامة الانسان

    وبعدين فى الشرطة المفروض تتدرس كيفية الوصول الى حل القضية مع تتبع سير التحقيق والادلة بعيد عن التعذيب

    اللى هو استسهال من بعض الظباط للوصول الى الحقيقية ونادر ما يوصل

    ويطر يلفق القضية الى اى حد غلبان

    تحياتى

    ReplyDelete
  8. بص يا عم احمد
    انا متفق معاك في ضرب الحرامية و النشالين و المسجلين
    بس تعرف كان فية ضرب زمان
    يقلك اية الشرطة بتضرب و ما تبينش اثر
    لكن الايام دي الشرطة بتشوة و بتعمل عاهة مستديمة و بتقتل ساعات
    ترضى لو حرامي حتى لو مسجل خطر يتقتل من الشرطة و لا القانون ياخد مجراه
    اصل احنا مش في غابة

    ReplyDelete
  9. el3araby:
    منور طبعا يا باشا
    تشرفني في اي وقت
    اوجزت فأنجزت
    تحياتي واحتراماتي

    ReplyDelete
  10. عمرو غريب:
    بكل امانة يا عموور...الكويس منهم قليل جدا جدا
    انا مش عارف ليه كدة؟
    يالالا.......عموما ادعي للاهلي بقى
    تحياتي واحتراماتي

    ReplyDelete
  11. tamer nabil:
    منورني يا تامر والله
    طبعا المفروض يعرفوا الجناة في كل الجرائم بدون تعذيب
    بس دة لو توافرت كل البيئة السليمة والصحية لكدة
    مش عشوائية وجهل
    تحياتي واحتراماتي

    ReplyDelete
  12. shams:
    يعني انت رأيك انهم ممكن يضربوا بس ضرب غير مبرح
    ممكن برضة.....وجهة نظر
    تحياتي واحتراماتي

    ReplyDelete
  13. ماشى بس بردو مش للدرجة المرعبة اللى بنشوفها دى

    :(

    على فكرة دى مش أول مرة آجى هنا .. جيت هنا كتييييير قبل ما اتخرج

    :)

    تحياتى

    ReplyDelete
  14. أنا بقى سرقوا جزء من سيارتي ولما بعتوا من القسم حد يعاين في منتهى الاستهتار مع العلم إن كان معانا محامي صديق تابع الموضوع وعملنا محضر ولا اتقبض ع الحرامي ولا حاجتي رجعت
    جرب كد وخش القسم عشان فيش هتقدمه في شغل أو عشان تشوف موقفك من التجنيد وأنت هتشوف العجب
    أي حد يخش يشعر كما لو كان متهم حتى ولو كان داخل يعمل بلاغ
    مطلوب من رجال الشرطة أن يفرقوا بحاستهم البوليسية بين الجاني والمجني عليه
    ودي حاسة مع الاسف مش موجودة عند كتير منهم
    خالص تحياتي

    ReplyDelete
  15. فكرتني بواحده صحبتي قالتلي العراق مكنش ينفع معاهم واحد غير صدام حسين
    احيانا بقول اه فعلا عالم حراميه ومبرشه وحالته وحشه ويستحقوا اللي بيحصلهم وبعدين ارفض مبدأ استخدام التعذيب والعغنف ولو ان هما مش بيبقوا حاسين
    بس تعالي نقول ان يمكن يكون في برئ وسط الغالم دي ويمكن جه ظلم وبالغلط
    مش عارفه موضوع محير
    بس كويس انك طرحته

    ReplyDelete
  16. اختلف معاك تماما في الموضوع ده

    لا يجوز تعذيب اي انسان او اهانته مهما كانت جريمته اللي تمت ادانته فيها...فما بالك بالجريمة اللي تم اتهامه بها

    ان الضابط يمسك عشرة او عشرين وينزل فيهم ضرب هو واللي معاه لحد ما حد فيهم يعترف بالجريمة اللي بيحققوا فيها ده قمة التخلف والهمجية وليس له اي علاقة بالعدالة

    عقاب المجرم شيء...وتعذيب المشتبه فيهم شيء اخر

    وتحياتي لك

    ReplyDelete
  17. تفتكر كلامك هيجيب نتيجه

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails