Tuesday, 11 September 2007

قطعني حتت

و كأن الزمن ما بيمشيش
وكأن المشهد دة من كتر جماله وحلاوته واعجابنا الشديد بأحداثه بنعيده ونكرره بكل تفاصيله من غير ما نمل ولا نزهق ولا حتى نغير فيه شوية
من يوم ما وعيت على الدونيا الفانية دي وانا بتابع نفس السيناريو
مصري في بلد عربي بيتبهدل وبيتهزق وبيتمسح بكرامته الارض....
.تقوم الصحف المصرية واخدة خبر بالموضوع دة....تقوم كدة على استحياء متكلمة على خفيف في الموضوع....يقوم كل كاتب يزايد ع التاني ونبرة الصوت تعلى وتعلى...وبعد اسبوع ولا اتنين يتحول الحدث دة لمقال افتتاحي لبعض الصحف
الموضوع يسخــــــــــــــــــــــــــــــــن.....تقوم صحف البلد الي بهدلت المصري دة ولعنت جدود اللي جابوه ترد هي كمان ويتحول الموضوع لتراشق بالالفاظ والكلمات بين صحف مصرية وعربية
يقوم يطلع مسئول من البلد دي يطمئن الشعبين الشقيقين على متانة العلاقات وقوتها وانها فوق الصغائر والدسائس وان كل الحوادث اللي حصلت واللي هتحصل واللي بتحصل دي مجرد حوادث فردية وان الدنيا لسة بخير وانه بيوعد الشعب المصري العظيم بزيادة الاستثمارات الوطنية في مصر وبالتالي فرص عمل جديدة والكلام دة
وفجأة وبدون سابق انذار تتوقف المشاحنات والمشاغبات ما بين الصحف وبعضهل وسكتم بكتم ويتحول الموضوع الى حديث للذكريات في انتظار حوادث جديدة......واي خدمة وابقى تعالى كل يوم
اللذيذ بقى والطريف جدا ان الواحد من كتر الحوادث اللي هي المفروض فردية بيننا وبين السادة العرب الواحد بقى عارف تماما اسلوب كل دولة من الدول دي في رد الفعل بتاعها على اي تجاوز مصري في حقهم (دة طبعا على اساس ان غضبنا من سحل وضرب وبهدلة مصري في بلادهم دة بيسموه تجاوز مننا)......بفلوسهم طبعا
بالنسبة لليبيا....على طوووووووووول قفل حدود وممنوع دخول المصريين وتصريحات عن ضرورة توفيق المصريين لأوضاعهم هناك....وفي غضون ساعات يتم ارسال وفد مصري رفيع المستوى علشان يتحايل ويبوس دماغ قائد الثورة ويقوله احنا اسفين معدناش هنعمل كدة تاني.....دة انت الحبيب وضرب الحبيب زي اكل الزبيب
اما الكويت فدول ناس محترمة الحقيقة بيكتفوا بالردح في الجرايد هم يقولوا لنا انتم جاعنين وشحاتين واحنا اللي بنصرف عليكم...واحنا نترحم على صدام حسين ونقول الله يرحمك يا بطل كنت مربيهم ومعلمهم الادب
بس دة طبعا قبل ما يطلع مسئول كويتي يوعدنا بزيادة الاستثمارات ويفكرنا بالاخوة اللي بين الشعبين والحكومتين والزعيمين
اما بقى بالنسبة للسعودية....فدول ناس دماغهم عالية موت...بيكتفوا بالصمت تماما مع وعد بمزيد من التنكيل والتعذيب للمصريين على اراضيهم
وزي ماشايفين كدة...كل دولة بتتعامل معانا بأسلوبها على الرغم من ان اسلوبنا في المواضيع دي واحد مع كل الدول دي وهو خضوع وذل ورعب من انها تشحن لنا المصريين اللي عندها وترجعهم وبالتالي مزيد من وجع الدماغ للحكومة اللي هي مكبرة دماغها اساسا ع الاخر وبالتالي لازم نسايس الدول دي ونتعامل معاها بمبدأ قطعني حتت وارميني للقطط
عموما:
نداء لكل اخ عربي:
اضرب كمان وكمان...عذب اكتر واكتر...اسحل دة المصري بيحب يتسحل قوي...حد ياراجل يلاقي بلد عاملة اوكازيون على مواطنيها ومايستفيدش بالعرض دة
اضرب وعذب المصري...وتعال بلده واتفسح واستمتع وبلطج عليه كمان لو حبيت
طبعا
دة البيت بيتك

40 comments:

  1. معلش بقى اعذرينى انا هاقرأ الموضوع بعدين
    بس انا جيت اقول
    كــل رمضان وحضرتك بخير وربنا يبغلك رمضـان
    ويجعلك نافع للامة ياااااااااارب آمــــــــــين
    ويبغلك رمضــان ياااااااااارب آمــــــــــين

    ReplyDelete
  2. This comment has been removed by the author.

    ReplyDelete
  3. الاول
    حمدلله ع السلامه طولت الغيبه يا اخى

    الثانى
    كل سنه وانت طيب رومضان كريم

    الثالث
    البوست ده فى الجول فعلا بقه موضوع بيتكرر زى الافلام العربى المملله الرخمه من الاخوه العرب قال اخوه دووول بلاش
    انا يا اخى لما اشوف اللى بيحصل لاقاربى فى السعوديه من اللى بيتعملهم من الكفيل يأخره ماينزلش اجازه يسيب عنده فلوس بتاع 6 شهور يضحك وينصب عليه وياخد الفلوس كلهاااا ولو ماسكتش يبلغ عنه بانه كذا وكذا وكذا مع انه مقيم شرعى
    ولا الاشقاء الليبين دول بقه قول براحتك
    والكويتين دول فاكرين فعلا انهم هما اللى بيأكلونا انا هنا بقه مش عايز اقول
    لفظ وحش بجد
    ومش هاقول دول قله هناك فى البلاد العربيه لا دووول شريحه عريضه من المجتمعات العربيه بتستمتع بكده وده ان دل يدل على نقص وحقد منهم
    بص يا عم بلاش تتكلم فى الموضوع ده عشان مش عايز اغلط فى حد سواء فيهم
    او فى الاخوه بتوعنا المصريين الحلوين المقطقطين بتوع الصحافه الجامدين

    وانت بجد احزنتنى جداااا باخر كام سطر بالنداء الموجهه للعرب

    يا كل سنه وانت طيب
    رمضان كريم
    وماتغبش تانى كده ماشى انا بحذرك حمدلله ع السلامه
    شغال

    ReplyDelete
  4. موضوعك جميل وفى الصميم كالعادة
    بس أنا مش فاهمة امتى هنحترم آدمية بعض ويبقى فيه اعتبار للعروبة المفقودة
    تحياتى

    ReplyDelete
  5. وبعد غياب

    بالنسبه للموضوع انا اول مره اعرف الايام دي بالمعامله اللي بيتعاملها المصريين بره دي
    بس هاقولك حاجه المصري جوا بلده بيتبهدل وبيتهان يبقي عاوز اللي بره يحترموه ازاي
    وغير كده انت قولت انه بلده مرخصاه
    يبقي يعملوا اللي عاوزين يعملوه فيه
    المصريين السبب مش اللي بيضربوهم ويبهدلوهم
    كل سنه وانت طيب
    رمضان كريم

    ReplyDelete
  6. This comment has been removed by the author.

    ReplyDelete
  7. كل سنه وانت طيب يا أحمد
    رمضان كريم
    يعوده عليك ربنا بالخير
    ان شاء الله
    آميـــــــن

    ReplyDelete
  8. كل سنه و انت طيب يا عم
    رمضان كريم
    و صدقنى كنت بتابع مواضيعك على طول
    المهم
    طبعا موضوعك يوجع
    لاننا ببساطة متهانين فى كل حته نروحها
    فى اى بلد
    محدش بيحب المصريين بيغيروا مننا
    على اييييييييييهظ؟ مش عارفة
    تحس انهم بيزلوا و بس
    بس الحق مش عليهم الحق على حكومتنا الموقرة الى زلانا اصلا و مرخصنانا حتى فى بلدنا
    حسبنا الله
    و لا بلاش
    احنا على اعتاب رمضان
    كل سنه و انت طيب
    مش هتقولى بقى النظارة الى فى الصور دى جايبها منين؟
    :))

    ReplyDelete
  9. احمد باشا
    نحن في مصر فلا تتعجب

    كل عام وانت بخير والاسره الكريمه بالف صحه وسعاده
    والي الله اقرب واطوع
    ورمضان كريم

    ReplyDelete
  10. موضوعك جميل بجد

    رمضان كريم وكل سنة وانت طيب



    تحياتى

    ReplyDelete
  11. عليك نور يامعلم اديك جبت المفيد
    بفلوسهم
    واحنا اللي بنرجع ونبوس الايادي
    يا ابو سمرة احنا ملناش ضهر في الغربة

    انت كنت مختفي فين
    حمد الله ع السلامة
    كل سنة وانت طيب

    ReplyDelete
  12. اماني:
    وانتي بكل خير وسعادة وسلام وامان
    كل سنة وانتي طيبة

    ReplyDelete
  13. حسام مراد:
    ابدا والله الصيف بقى وبلاويه واللي بيجرا فيه شغلني شوية..وعموما الله يسلمك
    وكل عام وانت بصحة وسعادة
    انا بقى عن نفسي مش مقتنع بموضوع العرب دة اساسا
    احنا مسلمين وافارقة انما مصطلح عرب وقومية عربية والكلام دة انا من وجهي نظري انها نظرية ثبتت فشلها تماما
    ولازم بقى نتعامل مع الناس دول بما يستحقونه من ناحيتنا بدلا من الذل والخنوع اللي احنا فيه دة
    ممكن يرحلوا الناس اللي عندهم....يا ريت ماهي خربانة خربانة هيخسروا فلوس واحنا هنكسب كرامتنا
    تحياتي ليك

    ReplyDelete
  14. voice of love:
    عروبة؟!!!!!يعني ايه؟
    ايه الكلمة دي
    على فكرة الكلمة دي معناها مش حلو...ماتقوليهاش تاني

    ReplyDelete
  15. فعلاا مواقف بتحصل تضايق جدااا

    صحيح كلنا عرب لكن البعض قد نسى فضل المصرين عليهم ولما الجعان عشتة تستريح يفترى ودة حال الدول العربية

    ربنا يهدى

    تحياتى

    ReplyDelete
  16. may:
    المصريين بيتعاملوا برة كدة من زمان جدا يا مي..وتقريبا من ايام الثورة البترولية اللي هبطت من السما على الاخوة العرب من العاطي الوهاب
    ومن ساعتها بيحاولوا ينسوا المساعدات المصرية لهم ايام الفقر
    بشبهها دايما باللي بيغتني فجأة بعد حرمان رهيب وبدل ما يشكر اللي وقفوا جنبه ايام القحط والمعاناة تلاقيه عايز يدمرهم ويذلهم علشان بيفكروه بفقره
    نورتيني

    ReplyDelete
  17. reemoo:
    وانتي طيبة يا ريمو وكل رمضان وانتي بصحة وسعادة واحسن من رمضان اللي قبله بأذن الرحمن عز وجل
    نورتيني وتحياتي ليكي

    ReplyDelete
  18. rania:
    عارفة يا رانيا انا قللت من كتابتي في المدونة والدخول ع النت اصلا ليه؟
    علشان حاسس ان في مخطط لتعقبي والاستيلاء على اعز ما املك في الحياة دي...نضارتي
    وبلغني ان انتي زعيمة التنظيم دة
    تحياتي ليكي

    ReplyDelete
  19. محمد مفيد:
    انا اعتقد يابو حميد ان مصر بريئة من اللي بيحصل بأسمها دة
    مش مصر دي يا باشا
    مصر فوق كل التفاهات دي
    كل سنة وانت طيب والسنة الجاية افضل وافضل لمصر ولينا كلنل بأذن الله
    تحياتي واحتراماتي

    ReplyDelete
  20. malak:
    الف الف شكر
    شرفتي ونورتي
    تحياتي واحتراماتي

    ReplyDelete
  21. غمض عنيك:
    ابو سمير...كل سنة وانت طيب يا ريس
    معلش والله انا مقصر معاك يا معلم..بس ترقب متابعاتي لمدونتك الجميلة
    تحياتي واحتراماتي

    ReplyDelete
  22. tamer nabil:
    المواقف دي معدتش تضايق من كتر ما تعودنا عليها
    وقريبا جدا هتتحول لفقرات كوميدية
    تحياتي واحتراماتي

    ReplyDelete
  23. الأمراض ده
    مش موجودة فى مصر بس فى موجودة فى كل العرب
    معلش يا أبو حميد
    انا مأجلالحساب مع العرب دلوقتى
    اجله شوية كده
    بالرغم من انا متغاظ، بس دول مش العرب الى احنا خوالهم، دول عرب البترودولار، دول عرب أمريكان
    معلش بكرة تروق وتحلى


    المهم كل سنة وانت طيب ورماضن سعيد عليك

    ابقى عبرنى بميل كده، ، علشان خاطر رمضان يا سيدى، مش علشان خاطرى :))
    ربنا يبراكلك يا دوكتور

    ReplyDelete
  24. فينك يا عم ؟ ايه .. مارينا اخدتك مننا ولا ايه ؟


    رمضان كريم و حمدالله علي السلامه

    ReplyDelete
  25. اولا كل سنة وانت طيب

    ورمضان كريم

    ---------------

    الموضوع ده فعلا بيضايقني جدااااااااااااا
    احنا ليه بنعمل في بعض كده
    او بمعني أصح ليه بيعملوا فينا كده
    ده احنا المفروض اخوات

    عايزين يضربوا مايطلعوا الجولان او فلسطين او مزارع شبعا
    ويوروا اليهود ان لسه في عرب رجاله

    بس هقول ايه
    عادي ان لما يبقي الانسان رخيص في بلده, يرخص أكتر في أي مكان تاني بره

    ReplyDelete
  26. مش عارفه اقولك ايه
    يمكن اقل حاجه هي اللي انت بتقولها يمكن انت قادر تخرج اللي جواك في بعض كلام امال هما بقي يعملوا ايه بجد المعمله ساعات بتكون اسوء من الغربه ذات نفسها وبعدين منين هتيجي الكرامه يااحمد بما ان اصلا ادراتنا ماعندهاش كرامه
    وكل سنه وانت طيب

    ReplyDelete
  27. salamo 3aliko

    3aref lieh da bye7sl
    3shan mafeesh karama llmasry fe balado
    wa beltaly don't think en 7aykoon leih karama fe ay 7eta tanya

    happy ramadan
    kol sana wa 7adretk tayeb

    sorry about writing with this strange language
    el keyboard etgnn fe 3aklo wa mesh 3awez ye2leb arabic

    ReplyDelete
  28. كل عام وانت بخير

    رمضان كريم

    ReplyDelete
  29. احمد يا سمير
    انت اختفيت تانى
    ؟؟؟؟؟
    هتروح منى فين
    النظارة هتتاخد يعنى هتتاخد
    :))
    و مين عارف احتومال يطلع خبر قريب فى المصرى اليوم
    يقولك
    اختفاء صيدلى فى ظروف غامضة
    :))))

    ReplyDelete
  30. هاه روحت فين تانى
    خير
    ؟؟؟؟؟؟؟؟؟؟؟؟؟

    ReplyDelete
  31. أيه يا أستاذ فيه أيه طيب طمننا بس

    ReplyDelete
  32. باشا ايه الاخبار
    فينك يا بنى
    من زماااااااااااااان

    عندى ليك تاج
    مستنيك فى المدونه
    اوك ياباشا
    تاج رمضانى كده سلى صيامك

    تحياتى
    سلامااااااااااااات

    ReplyDelete
  33. مدونة جميلة
    سعيد جدا لزيارتها
    وسأزورها دوما

    ReplyDelete
  34. قمة عالمية البرتغالي الكاتب : cristovao دي اغيار.

    وهو ، أيضا ، وترجمت الى اللغة البرتغاليه ثروه الامم من آدم سميث.

    وقد منح العديد من الجوائز.

    لا تنسوا اسم هذا الكاتب العظيم ، يمكنك الاستماع اليه قريبا.

    اشكركم على انفاق الوقت في الثقافة العالمية.

    شكرا للزيارة

    ReplyDelete
  35. ازيك يا احمد عامل ايه

    كل سنة وانت طيب رمضان جه وقرب يخلص والعيد كمان جاي اهو

    :)

    ReplyDelete
  36. أيه يا أحمد الغيبة طولت قوى
    طمنا بس

    ReplyDelete
  37. السلام عليكم
    أخي العزيز
    كل عام وانت بخير
    وعيد سعيد عليك وعلي الاسره جميعا
    وربنا يجعلك من المقبولين في رمضان ومن الذين أعتقوا في هذا الشهر العظيم
    وان يديم عليك نعمه الصحه وراحه البال

    لم أجد لك مكان الا هنا للتهنئه يا حبيبي

    ReplyDelete
  38. كـل عيـد وانتم بخير واعاده الله عليكم وعلى الامـة الاسـلامية بالخير واليمن والبركات
    يااااااااااااااااارب آمــــــــــــين

    ReplyDelete
  39. والله انت كلامك صح
    يعني هما شايفين حكومتنا ذااات نفسها..مهزقانا..مايهزقوناش هما ليه قولي كده؟
    انا بحس ان حكومتنا دي كانهم لاقونا علي باب جامع يااخي...مفرطين فينا بشكل يقرف..لا بس دا حتي اللي بيلاقوه علي باب جامع بيصعب عليهم شويه
    يمكن علي راي لبلبه ف وش اجرام..لقيونا علي باب معبد يهودي
    لا برضه..دول لو كانو لاقونا علي باب معبد يهودي كانو حطونا فوق دماغهم وخافو علينا وفسحونا ف طابا وشارم
    لكن انا حاسسه انهم عايزين يسربونا زي مااي حد بيسرب اي قطة
    مرة يفتحولنا البلاعات تشفطنا..ومرة يركبونا عبارات تغرق ..ومرة يسيبونا نتهزق ف بلد عربي (شقيق) ولا علي دماغهم..انا بقول احنا لو عندنا دم نمشي م البلد دي ونغير الجنسيه اصلنا واضح كده متقلين عليهم والناس بيحاولو يكونو زوق (ومش عايزين يجرحو شعورنا) بس هما اصلا مش طايقينا وبعدين يمكن يبقالنا كرامه شويه ف الدول اللي بره..دول ف الخليج بيحترمو الممرض الباكستاني عن الدكتور المصري يااخي ..
    خليني اسكت احسن اصل انا مبقوقه
    كل سنه وانت طيب

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails