Saturday, 11 August 2007

واحنا مالنا

وفاء قسطنطين تعلن اسلامها وتؤكد انها كانت في ضلال وانها عرفت طريقها
ماريان وكريستين يهربوا من بيت اهلهم ويشهروا اسلامهم ويعلنوا انهم لن يعودوا للضلال مرة تانية
محمد حجازي يعلن تنصره وانه من زمان وهو مسيحي ومقتنع تماما بأنه اصبح رجل مسيحي ونفسه يثبت كدة رسميا علشان ابنه رامي او بنته سارة لما يتولدوا يكونوا مسيحيين
انباء غير مؤكدة عن ان سعاد حسني اعلنت مسيحيتها قبل ما تموت
كل اللي فات دة عناوين واخبار شغلت الرأي العام لفترات طويلة وفي اوقات متفرقة
الأخبار اللي فوق دي مالهاش عندي غير رد واحد بس:
واحـــــــــــــــــــــــــــنا مالــــــــــــــــــــــــــــــــــــــــــــــــنا
انا مالي انا ان وفاء قسطنطين اسلمت ولا محمد حجازي اتنصر.....هو انا اعرفهم اساسا؟
طب لما وفاء اسلمت هل دة معناه ان خلاص بقى المسيحيين هيبتدوا يشكوا في عقيدتهم ويعملوا زيها؟
لما حجازي يتنصر يبقى خلاص يا جماعة دة المسلمين ماعندهمش ثقى في دينهم وبالتالي دة نصر مبين للمسيحية؟
دة معقووووول؟
بقت الاخبار دي فقرات محببة لبرامج التوك شو والنميمة والصفحات الاولى للجرايد المستقلة؟
ايه اللي يفيدني انا شخصيا اني اعرف قصة سيدة كانت تعيسة مع زوجها وعلشان تتخلص من حياتها غيرت ديانتها؟
ايه اللي هستفيده ان بنتين وقعوا في حب ولدين من ديانة اخرى وعلشان يتوجوا حبهم دة غيروا ديانتهم؟
ايه اللي هيعود على القارىء او المشاهد لما واحد غاوي شهرة وظهور يقرر انه يعمل فرقعة اعلامية ويدعي كذبا او صدقا انه غير ديانته؟
طب انا احسب نفسي عاقل وغير متطرف والحاجات دي لا تهز شعرة فيا......شوفوا انتم بقى في كام متعصب مسلم او مسيحي ممكن يرتكب حماقات قد ايه بسبب اخبار زي كدة بتلهب مشاعره؟
الخلاصة ان غلط واكبر غلط اننا ندي احداث واخبار زي كدة اكبر من حجمها..لأن عواقبها ممكن تكون وخيمة على الجميع

30 comments:

  1. بص أنت فعلا عندك حق المفروض فعلا ما نديش للمواضيع دى أكبر من حجمها
    ولكن ده ما يمنعش أن الواحد بيزعل برضة لما يلاقى مسلم غير ديانته وأكيد برضة المسيحى بيزعل لما يلاقى حد من ديانتة بقى مسلم
    ايوة الواحد بيزعل بس مش لدرجة شغل بال الناس وكل القنوات التليفزيونية والجرايد بالمواضيع دى ونخليها تاخد أكبر من حجمها وبعدين نقول ده بقى فيه فتنه هو مين اللى بيجيب الفتنه ما هيا الأخبار دى لأن أكيد فيه ناس متعصبين فى الطرفين ومعلش بقى هو شعبنا كده أو بمعنى أصح أعلامنا كده عايز يشغل الناس بأى حاجة وهيا دى طريقتهم من زمان
    ولازم يشغلوا الناس بأى حاجة وبأى حكايات علشان يبطلوا يتكلموا فى أى حاجة تانية

    ReplyDelete
  2. يااخى الفاضل

    يمكن يكون كلامك صحيح واحنـــــــا مالنـــــــــا فى كل دة

    بس يبقى مالنا بجد

    لما وفاء قسطنطين تعلن اسلامها

    تقوم الشرطة تجيبها وتدخلها الكنيسة

    وبعدها تتنفى فى الدير ولا يعلم عنها حس ولا خبر

    ولما تسلم دكتورتان من مدينة الفيوم فيجروا الى الكنيسة ويعذبوا وتحلق رؤوسهم علهم يرتجعون وكل هذا بحماية الامن
    ولما محمد حجازى يقول انا اتنصرت يبقى المسلمين مالهمش حق يقولوا بم

    يبقى هو دة اللى مالنا

    ReplyDelete
  3. العزيز أحمد
    بجد ممكن يكون احنا مالنا لكن لما تلاقي الناس كلها ان معالجه اي مشكله صغيره بمشكله أكبر ولا تدري هل المعالجه دي صح والا غلط
    تلاقي الناس كلها لازم تنتبه وتنشغل عن كل حاجه حوليها حتي النافع لهم لانهم وببساطه ناجحين في اعماء البشر

    ReplyDelete
  4. انا اكتشفت ان اغلبنا مش مسلم أو مسيحى عشان ربنا.. لأ عشان هوه لقى نفسه كده من غير اقتناع.اللى بيحول يحول من غير خوف أو قلق انه يبقى مرتد.
    العيب مش على اللى بينشر بس العيب على اللى فاكر الدين ده لعبة بتتغير كل يوم.

    ReplyDelete
  5. بص يا أحمد لو فى حريه فى اختيار الديانات كان فعلا مش هتبقى فيه مشكله
    لكن لما كل واحد يغير ديانته تتبع ده مشكله ما
    يبقى على الاقل نعرف ايه اللى بيحصل
    مش لازم تستفيد يا أحمد
    على الاقل خليك على درايه بآخر الامور
    اللى ممكن تثير مشاكل ما بين بعض الفئات
    حتى لو المشاكل دى مش هتفرق معاك ولا هتقدم ولا تأخر
    بس معرفتها مش هيضر
    بالظبط زى ما بنعرف اللى بييحصل فى اى دوله عربيه بره
    لا هيفيدنى ولا هيقدم ولا يأخر لانه ممكن يكون بعيد كل البعد عنى
    بس ده ميمنعش ان العلم بمجريات الأمور أحسن كتير من ان الواحد يقعد مش عارف ايه بيحصل حواليه
    ده رأيى
    :)
    تحياتى

    ReplyDelete
  6. من حيث من يؤمن ومن يكفر احنا فعلاً مالنا

    بِسْمِ اللّهِ الرَّحْمنِ الرَّحِيمِ
    وَقُلِ الْحَقُّ مِن رَّبِّكُمْ فَمَن شَاء فَلْيُؤْمِن وَمَن شَاء فَلْيَكْفُرْ إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا وَإِن يَسْتَغِيثُوا يُغَاثُوا بِمَاء كَالْمُهْلِ يَشْوِي الْوُجُوهَ بِئْسَ الشَّرَابُ وَسَاءتْ مُرْتَفَقًا
    صدق الله العظيم

    الجزء 15 سورة الكهف ايه 29 صفحه 297 مصحف المدينة

    اما من حيث الموضوع فهو مالنا ، لازم نفهم الناس ان طريقه معالجتهم لهذه الأمور مؤسف حقاً

    ReplyDelete
  7. bos bos:
    اكيد طبعا كل واحد مننا دينه غالي عليه
    بس انا بتكلم عن اعطاء الاشياء اكبر من حجمها بكتير وتسليط الضوء على ناس مدعي للشهرة
    وجهة نظرك سليمة طبعا يا بس بس بس زمان كانت وسائل الالهاء دي بتكون مباريات الكرة او قضايا تافهة
    انما استخدام العقيدة في كدة....موضة جديدة
    تحياتي واحتراماتي

    ReplyDelete
  8. معاك فى واحنا مالنا
    من حيت تغير الدين لان دى عباده بينه وبين ربه

    بس لما تحصل تجاوزات من الشرطه او من اى جهه تانيه يبقه فى حاجه ولازم يبقه للرأى العام ماله
    سلااااااااااااام

    ReplyDelete
  9. طبعا احنا لينا لما ناس يجبروا على العودة للمسيحية قهرا بمعرفة أمن الدولة ولما ناس تطلع في الفضائيات تقول انا سبت الإسلام وعاجباني المسيحية ومحدش يقدر يتكلم، طبعا هو حر يعمل ما بداله لكن مايطلعش في الإعلام ويستفز الناس، صحيح الإعلام بيكبروا الموضوع قوي ويعملوه شغلتهم عشان ياكلوا عيش ومش مهم المسلمين والمسيحيين يتفلقوا المهم الموضوع السخن ومش مهم الناس مش لاقية المية تشرب المهم الإعلانات ومن مهم الناس بتموت المهم الفلوس، لكن احنا لينا برضه بس مش بالطريقة دي

    ReplyDelete
  10. بص احنا شعب بيحب الثرثاء والفرقعه الاعلاميه وبنحب نسمعها ونشوف واللي بيعملوا ده عارفين ان الشعب العربي بيهوي السماع للاشياء زي دي وعلشان كده بيعلنوها اهو بيشغلوا الناس بحكايات يقولها لبعض وهما بيطبخوا واهما اعقدين بيرغوا .....
    لكن لو جيت سالت اللي بيعرض الموضوع او الموقف هتلقيه مالوش اي علاقه وتلقيه تقريبا مش فاهم اهو كلام مكتوب قدامه وخلاص وينجح برنامجه مش اكتر واهو ادينا بنتفرج علي العالم اللي فاكرنا عرايس خشب بتحركها واحنا بقينا كده فعلا وانا عن نفسي لما بسمع الاخبار دي بتاثر وبعقد اثرثاء انا وامي واو انا واهلي والموضوع بيخلص لا بيقدم ولا بياخر بس بالنسبالي مش هتفرق معايا مين اسلم ومين استنصر ولا يفرق معايا لانه كده او كده كلنا لينا يوم وحساب وهتحساب منه
    وشكرا ليك

    ReplyDelete
  11. ياباشا اللي هيحصل لما الاخبار دي تنتشر ان الناس تولع في بعض والبلد كلها تتحرق في النار ويفضل فيها اصحاب المصالح يبيعوا ويشتروا في ناس فرطوا في نفسهم وبلدهم بدون عقل

    تحياتي ليك
    محمد سمير


    سمير..انت مابتجيش تزورني خالص من ساعة مارجعت ...هو في حاجة؟

    ReplyDelete
  12. هااااااااى

    عجبني بجد الموضوع ده و عجبني وجهة نظرك صحيح ان الاحداث الفردية دي مش لازم ابدا تبقا مؤشرات او حاجات تاخد حيز اكبر من حقها و خصوصا ان فعلا زي ما انت قولت ان الدوافع خلف تغيير الديانات ليس الايمان الفعلي بالديانة الجديدة او ان التغيير ده جاء بعد فحص و محص و قراية و مقارنة بين الديانه القديمة و الديانة الجديدة

    و بما اننا شبة متاكدين ان الناس دي لا قرات و لا قارنت و لا فهمت الفرق بين الديانتين اذا فتبديلهم للديانات ليس قائم على اسس علمية و لا منطقية و انما هي دوافع شخصية بحته

    يبقى ليه فعلا نشغل بالنا بيهم

    تحياتي لك
    كريم عزمي

    ReplyDelete
  13. اولا تستاهل عشان تحرم تفرج على لبرامج النص كم دي
    ثانيا مينفعش نقول احنا مالنا لما واحد مسلم يتنصر او يعلن اعتناقه للديانة المسيحية
    لاء يا احمد مع احترامي ليك ومتفتكرش اني متعصب ولا حاجة انا حقولك على وجهة نظري
    احنا عندنا ف الدين حاجة اسمها ( الردة ) ودي حكم من وقع فيها هو القتل
    ايوة يا احمد متستغربش حكمه القتل وده ديننا ودي سنة النبي صلى الله عليه وسلم
    اسمع للأحاديث

    روى البخاري (6922) عن ابْن عَبَّاسٍ قَالَ : قال رَسُولُ اللَّهِ صَلَّى اللَّهُ عَلَيْهِ وَسَلَّمَ : (مَنْ بَدَّلَ دِينَهُ فَاقْتُلُوهُ)ا

    وحديث كمان وخلي بالك الاتنين من اصح كتب الحديث وارجوك تراجعهم بنفسك عشان تعرف مدى خطورة الأمر

    وروى البخاري ( 6484 ) ومسلم ( 1676 ) عن عبد الله بن مسعود قال : قال رسول الله صلى الله عليه وسلم : ( لا يحل دم امرئ مسلم يشهد أن لا إله إلا الله ، وأني رسول الله إلا بإحدى ثلاث : النفس بالنفس ، والثيب الزاني ، والتارك لدينه المفارق للجماعة )ا

    وقال بعض العلماء ان المرتد قبل ان يقتل لابد ان يستتاب ثلاثة مرات ( يستتاب يعني يعرض عليه التوبة ) فإن ابى و صمم على الردة فحكمه شرعا هو القتل

    هنا لازم نقف ونسأل ده ليه مش يطبق عليه حكم الشرع اشمعنى يعني الختان هو اللي وجب علينا اتباع المفتي فيه وان لازم نقتنع انه حرام
    ولا المسألة بقت أهواء وخلاص

    وطبعا الكلام ده مش هيحصل عندنا ابدااا ابداااا لأن الدين خلاص اصبح بالنسبة لكثير منا ف الكتب فقط وللحصول به على شهادات من الازهر وشكرا على كده
    انما تطبيق .. معطلكش بقى احنا بلد متحضر ومش مستعدين نرجع لورا
    !!!

    تحيتي ليك يا احمد وانا متفق معاك ان الموضوع اعلاميا اخد اكبر من حجمه بس حبيت اوضح لك ان الامر عندما يتعلق بأمر من أمور الدين مينفعش نقول احنا مالنا

    ReplyDelete
  14. ايه الغيبة دى من زمان ماكتبتش حاجة لية

    ReplyDelete
  15. ولو انى زعلانة منك لأنك مسألتش عنى بس يلا ما علينا .. المسامح كريم
    انت بتتكلم كويس جدا لأن موقظى الفتنة هم ناقلى هذه الأخبار
    ألم يقل سبحانه وتعالى ( لكم دينكم ولى دين ) ومن يمتثل يا سادة ؟؟

    ReplyDelete
  16. أيه روحت فين تانى خير؟؟؟؟؟؟؟؟؟؟

    ReplyDelete
  17. اميرة ويلز:
    خلينا نتفق ان طريقة معالجة الحكومة المصرية لتغيير الديانات طريقة في منتهى الغرابة
    بحس انها طريقة مبنية على سياسة ياعم بلا وجع دماغ...احنا ناقصينكم انتوا كمان؟
    وطبعا هي سياسة في منتهى الغرابة
    تحياتي ليكي
    منوراني دايما

    ReplyDelete
  18. محمد مفيد:
    انا بشوف ان معالجة الصحف ووسائل الاعلام المختلفة للأحداث الطائفية معالجة بتقوم اساسا على الاثارة فقط
    اما وسائل الاعلام الحكومية فهي بتتبع مبدأ ودن من طين وودن من عجين
    تحياتي

    ReplyDelete
  19. queen eraser:
    انا باعتقد ان تغيير الدين في معظم الاحوال بيكون راجع لمشاكل عاطفية
    واللي يفكر يغير دينه علشان واحد او واحدة بيحبها بيكون اساسا معندوش اي اقتناع بالدين بتاعه وشايف انه مجرد عقبة بتحول دون الوصول للهدف بتاعه وبالتالي لابد من ازالة العقبة دي
    ومن هنا بييجي تغيير الدين
    تحياتي ليكي

    ReplyDelete
  20. reemoo:
    بس قضايا تغيير الديانات يا ريم اتحولت كدة لقضايا الاهلي والزمالك
    كل طرف بيغيظ التاني وبيحس انه انتصر عليه ولو حتى انتصار زائف
    انما لو الموضوع مجرد العلم بالشيء يبقى ياريت
    انما هي مسألة تعصب ليس الا
    تحياتي واحتراماتي

    ReplyDelete
  21. حتى العنوان يصرخ

    "واحنا مالنا"

    ReplyDelete
  22. ايه يا بنى الغيبه دى تاااااااااااااااانى
    لعل المانع خيييييييييييييير

    ReplyDelete
  23. نفسى أفهم انت بتختفى كده وتروح فين

    ReplyDelete
  24. هاترجع تقولنا النت ومش عارف ايه
    وكنت فى الساحل ومقطوع عنها النت والكلام ده مبقاش ينفع

    ربنا يرجعك بالسلام يا عم الحاج

    ReplyDelete
  25. انت فين ياسمير
    طمنا عليك

    ReplyDelete
  26. الله ينور عليك و علي كل اللي زيك..هو ده المطلوب..أننا نتقبل المسائل دي بشكل عادي و ده اللي أنا وضحته برضه في اخر بوست عندي
    :)
    تحياتي

    ReplyDelete
  27. روحت فين تانى ؟؟؟؟؟؟؟؟؟؟؟؟؟؟؟؟ظ

    ReplyDelete
  28. جزاكم الله خيرا
    لقد دخلت عالم جميل جدا
    ربنا يجعل كل دا فى ميزان
    حسناتك

    ReplyDelete
  29. الضجة الاعلامية لمثل هذه الامور قد يثير الفتنة بشكل أو بآخر
    غير كده الدين الاسلامي دين كامل وده بنص القرآن
    وسيد الخلق محمد صلى الله عليه وسلم خاتم الانبياء
    يعني من هنا لحد يوم القيامة اللي هيتبع الدين الحق حسابه عند الله
    واللي مش هيتبع الدين الحق
    حسابه برضه عند الله
    يعني م الآخر اللي بيحصل ده المفروض ميحصلش ولا يتم تسليط الاضواء الاعلامية عليه بالمرة
    في مغنية مشهورة عدت التسعين والناس كلها عارفاها
    اسلمت واتنصرت واتهودت ولا حد قال لها حاجة .. والاعلام والبرامج الفضائية بتستضيفها كواحدة من رواد الغناء ورواد الاناقة
    الناس دي مش هتفووق بقى
    آسف للإطالة

    خالص تحياتي

    ReplyDelete
  30. فعلا حاجه تحرق الدم والمشكله ان البهايم كتير زي مانت قلت قصدي المتطرفين وهم اللي خاربين البلد
    بالاضافه الي ان ده في صالح الحكومة لان المواضيع دي شاغله الراي العام عن المصايب الكبري اللي بتعملها الحكومة

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails