Monday, 6 August 2007

انترنت بلا حدود

وانا قاعد كدة وبأنهج من الشهر اللي فات واحداثه الكتير اللي خلتني ابتعد عن التدوين

ولسه بقول يا هـــــــــــــــــــــــــــــادي وبشوف هكتب ايه وهتصفح مدونات الناس ازاي وكل دة

تقوم بس بس مدونة الروح تقوم مدياني ومباصية ليا كدة تاج على غفلة من حيث لا ادري جه في النافوخ عدل

بس نظرا لأن التاج دة مهم ونظرا كمان لأن اللي مررت التاج دة ليا اخت عزيزة يبقى لازم يتجاوب عليه ورجلي فوق رقبتي
التاج عن
حملة انترنت بلا حدود
نخش ع الموضوع:
ما هو مدى أستخدامك للأنترنت ؟؟
مستخدم اعتيادى - ايميل - شات - العاب -
مستخدم احترافى - خدمات الوب 2 - تحميل - العاب - برامج - بودكاستس - ميديا 2
متخصص ( مصمم مواقع - مصمم جرافيك - مطور برامج - مطور مواقع - اعلامى - مبرمج - مستخدم لينكس )0
هو طبقا للتصنيفات اللي في السؤال انا ماقدرش اقول اني مستخدم اعتيادي بتصفح بس ولا مستخدم غاية في الاحترافية انما انا مستخدم محترف بيتصفح وفي نفس الوقت بيحمل وبيتعامل مع خدمات الانترنت كمان وكمان بيلعب العاب اونلاين احيانا برضة
كيف ترى هذى الحملة وما مدى تأثيرها على المستخدمين والمختصين ؟
هل تساهم بتقدمنا الحضارى والتكنلوجى ام ترجعنا للخلف؟
هل تفرض حصارا معلوماتيا على المتخصصين والطلبة والشعب ؟
هل ستؤثر سلبا على مركزنا الحضارى ( الأول:) ) فى صناعة البرمجيات وتكنلوجيا المعلومات
انا بشوف ان حملة تحديد استخدام الانترنت دي هترجعنا لورا كتير
هي في ظاهرها الرحمة وباطنها العذاب
بمعنى انها بتظهر على اساس تخفيض للاسعار علشان كل الناس تدخل الانترنت للبيوت انما انا بشوف انها هتحد بشكل كبير من انشطة المتخصصين
ما رأيك بقرار وزير الاتصالات الجديد ؟
انا بشوف ان القرار دة قرار له ابعاد سياسية ومش لوجه الله والوطن على الاطلاق
ما هى اسباب الوزير المعلنة والغير معلنة فى رأيك ؟؟؟؟
طبعا اسباب الوزير المعلنة هي تخفيض اسعار الانترنت بغرض الوصول لاكبر شريحة من الشعب تستخدم الانترنت وفي نفس الوقت القضاء على الوصلات الغير شرعية من الكافيهات
انما الاسباب الغير معلنة طبعا هي القضاء على نشطاء المدونين على الانترنت على اساس ان بعد ما تنتهي الوصلات من السيبرات والكافيهات هيبقى الاشتراك لكل الاشخاص من خلال المصرية للاتصالات عن طريق الشركات الوسيطة وبالتالي يكون من حق المصرية للاتصالات باوامر امنية طبعا فصل الخدمة عن اي بني ادم في مصر بيكتب حاجة مش على المزاج
بمعنى اخر تقنين الخدمة وبالتالي سهولة السيطرة عليها
هل تهدف الحكومة من هكذا قرار بتطبيق المبدأ العربى الشهير الا وهو فرض الوصاية على هذا الشعب القاصر ( من وجهة نظر الحكومة ؟)0
طبعا ويمكن الاجابة لى السؤال السابق توضح الاجابة على السؤال دة
كيف ستتراجع الحكومة عن قرارها ؟
بالضغوط الشعبية والتفاعل الحيوى للمتضريين من الشباب والشعب؟
بالضغوط الخارجية من منظمات الحريات العالمية ؟؟؟
بالمساهمة بتطبيق العالم قرية صغيرة ونشر توابع هذا القرار للعالم اجمع بلغات عدة ؟؟؟
بالمقاطعة الشعبية لوزارة الاتصالات وشركات الانترنت ؟ ومقاطعة التلفونات الأرضية ؟؟؟
الحكومة مش هتتراجع في قرارها على الاطلاق
لان الثقافة دي مش موجودة في مصر
وبعدين مفيش ضغط شعبي لأن مفيش شعب من الاساس
اذا كان الشعب المصري مغيب تماما عن مناقشة قضاياه الاساسية والاحتجاجات على حاجات اساسية وحرمات بتنتهك يبقى منتظرين انه يهب هبة رجل واحد ويقاوم تحديد استخدام الانترنت؟!!!!
مستحيل طبعا
وبعدين قطاعات كتيرة قوي من الشعب المصري مازالوا بيعتقدوا ان الانترنت دة رفاهية عالية جدا وترف لا يملكه الا الشباب المرفه
كيف تصف هذا الحدث ؟؟
سرقة واستغلال
سبوبة
حكم القوى على الضعيف
اذلال الشعب
عقوبة جماعية للمستخدمين نيابة عن المدونين السياسيين ؟
غير ذلك ؟؟؟
تطور طبيعي لاحداث كتير قوي حصلت وبتحصل من استغلال سياسي وتضييق وخنق للحريات وسيطرة من الدولة على كل شيء في مصر
وتطبيقا للمبدا او المثل القائل
الباب اللي يجيلك منه الريح.....سده واستريح
بس ممكن نقول ان هو فعلا عقوبة جماعية للمستخدمين نيابة عن المدونين السياسيين
هل يستحق وزير الاتصالات الائتمان على أمن مصر المعلوماتى وصناعة التكنلوجيا بمصر؟؟؟بعد ان أثبت سوء نيته و مشروعة الذى يهدف الى تدمير البنية التحتية لصناعة المعلومات فى مصر؟؟
وهو وزير الاتصالات بس اللي لا يستحق؟
ماذا تتوقع من تفاعل هذى الحملة عالميا وعربيا ومحليا ؟؟؟؟
لا اتوقع اي شيء على الاطلاق
اللي عايزاه الحكومة هو اللي هيحصل
يعني الضغوط هتكون اقوى من الضغوط للافراج عن الدكتور ايمن نور؟
سلموا امركم لله....وتكيفوا على الوضع الجديد
هل أثبتت وزارة الاتصالات والمعلومات فى مصر جهلها العملى والمعلوماتى و سوء تقديرها للظروف المحلية والدوليه ... واستغلالها للوضع المحلى ؟؟؟
طبعا ومش وزارة الاتصالات بس
دي كل مصر بتستغل كل مصر
والغريب ان الناس اصبحت بتستغل ظروف بعض والعملية بقت استغلال في استغلال
هل ترى ان نجاح الحملة يتمثل فى
اقالة الوزير الجاهل بمعايير صناعة التكنلوجيا ومواكبة التطور
التراجع عن القرار فقط
وضع نظامين تحت بند اختيارى
تراجع......مش هيحصل
انما ممكن تعديل الشروط بحيث انه يكون بشكل اختياري
ومعلوماتي بتقول ان دة هيكون اقرب للتنفيذ
ماذا ترى فى المناورة الاخيرة للحكومة تحت ضغط المرحلة الأولى من الحملة ؟؟؟؟
مناورة واضحة وكذب صريح؟؟
مناورة للحجر على العقول والافكار و تقسيم الشعب اللى طبقات تحت بند الاختيارية ؟؟
فاكرينا داقين عصافير وبنصدق الكذب بتاعهم ؟؟؟؟
حكومتنا بقى وواخدين عليها
يعني هي عادتها ولا هتشتريها؟
وبعدين هي مش فاكرانا داقين عصافير....دة هي اللي دقا لنا العصافير دي
**********************************
التاج خلص
الف شكر ليكي يا بسبس
بمرر التاج دة لكل من يدخل مدونتي ومايكونش جاوب عليه قبل كدة
بس ياريت في الكومنت يكتب انه جاوب ع التاج في المدونة بتاعته

8 comments:

  1. شكرا على أستجابتك السريعة وده كان العشم برضة وأنا قلت أحجزأول تعليق عما الف وارجع تانى
    سلام

    ReplyDelete
  2. اهلااااااااااااااااااااا
    ازيك يا استاذ احمد باشا
    الف حمد لله على سلامتك ياراجل وحشتنا والله وكنت قلقان عليك بجد

    كان نفسي اقولك اجازة سعيدة بس بعد اللي حصل معاك ده من اللاب توب بقولك تعيش وماتاخدش غيرها
    هههههههههههه

    على فكرة انا لسة مقرأتش التاج انا حبيت بس اسلم عليك
    ولي عودة بإذن الله
    سلااااااام مؤقت

    ReplyDelete
  3. حمدالله علي السلامة والله كان ليك وحشة كبيرة اوي

    ReplyDelete
  4. أولا فيه احساسين عندى
    فرحان انك رجعت وطمنتنا عليك
    وزعلان انى ماعرفتش على طول منك
    ده انا روحت لمحمد سمير وسالته عليك قالى ده وصل والحمد لله
    دخلت عندك لقيت الخبر صحيح
    باه اولا تروح الساحل هنيئا يا عمونا
    لكن هو ايه مافيش ولا نت كاف هناك
    ايه يعنى الناس ده ماوحشتكش
    مدونتك ماوحشتكش
    لا زعلان ومهما تقول زعلان :))

    ده كده سريعا
    لغاية ما آجى اتخانق معاك خناقة كبييييييييييييييييرة قووووووى

    لان كلنا قلقنا فعلا
    وطبعا سيادتك ولا نعرف عنك أي شيئ ولا نعرف نطمن عليك
    ماشى ماشى


    بس فى الآخر اتبسط يعنى ولا ايه :))))

    وجهز نفسك للعراك

    ReplyDelete
  5. بس حبيت اقول حمد الله علي السلامه

    ReplyDelete
  6. موافقه علي كل حرف هنا
    وبالتالي اعتبرني اخدت التاج و كتبت الردود بتاعتك


    الغيبه الطويله كانت طويله * اظن العتاب واضح * متحرمناش من وجودك التدويني


    تحياتي

    ReplyDelete
  7. باشا....شكلك كده معترض على السياية الانترنتية الجديدة

    انت مش مبسوط معانا في مصر ولا ايه؟

    محمد سمير

    ReplyDelete
  8. لو ماتعرفش النت القديم المفتوح لسه موجودهما كل اللي عملوه انهم زودوا نت رخيص مدفوع مقدما ,يعني عملوا نت كارت جنب النت الخط القديم

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails