Sunday, 3 June 2007

P.G.D

في حاجة اسمها ال
P.G.D
البي جي دي بقى دي تقنية جديدة في الطب بتستخدم في عدد من مراكز الاخصاب ومعامل التحاليل الطبية الكبرى
التقنية دي بقى مفيدة جدا وهدفها في منتى النبل وهو الكشف عن الكروموزومات للجنين في بطن امه والكشف المبكر عنها لمعرفة اذا كان الجنين بيعاني من تشوهات او عيوب خلقية.
يعني الهدف من استخدام التقنية دي هو فحص الامراض الوراثية لتجنبها خاصة في العائلات التي تحمل امراض وراثية
لحد هنا دة كلام جميل وكلام معقول ومحدش يقدر يقول حاجة عنها
انما بقى نظرا لأننا في مصر ونظرا لأن الفساد بقى القاعدة والشرف والنظافة والنزاهة بقى هو الاستثناء......شوفوا بقى بعض اطباء النساء وبعض مراكز التحاليل والاخصاب الكبرى استخدمت التقنية دي ازاي؟!!!!!!!!
طبعا لأن التقنية دي بقى بتكشف عن كروموزومات الجنين فبالتالي بتستطيع في وقت مبكر جدا من الحمل معرفة نوع الجنين اذا كان ذكر او انثى.
وهنا بقى المصيبة
بعض الناس-اللي للأسف بيتصنفوا على انهم ناس- لما بيعرفوا ان الجنين انثى بيصروا على ضرورة اجراء اجهاض للجنين
تخيلوا لسه في ناس في القرن الواحد والعشرين بيفكروا بالطريقة دي
طب الناس دول مصيبتهم اخف من المصيبة التانية اللي جاية
نوع تاني بقى من الناس لما بيعرفوا ان الجنين انثى
بيطلبوا من الاطباء انه يخليه لهم ذكر
اه والله زي ما بقول لكم كدة
ود بأنهم يستبعدوا الكروموسوم x ويبقوا على الكروموسوم y وبالتالي بيتحول الجنين لذكر
يا سلاااااااااااااام
يعني بيروحوا كدة لدكتور النساء ويقولوا له:
عايزين بقى ولد....دي مسئوليتك يا دكتور......وعرقك هتاخده.....وحلاوتك محفوظة طبعا
سبحان الله
تقنية بتستخدم علشان يعرفوا الاراض الوراثية ومدى صحة الجنين يقوموا بتفكير شيطاني بحت يحولوا التقنية الهادفة النبيلة دي لمنتهى الشر وتبديل لخلق الله علشان البيه او الهانم عندهم بنات وعايزين ولد او سيادتهم جربوا الصبيان وعايزين بقى بنت امورة
فعلا
الفسااااااد استفحل وبقى في كل مكان حتى في الاجهزة الطبية
على فكرة:
مصر مشهورة قوي بالنوع دة من العمليات وطبقا للمصري اليوم في عددها الصادر يوم الجمعة 1 يونيو 2007 فأن اتحاد المصريين في اوروبا استنكر قيام عدد من مراكز التحاليل الطبية والاخصاب في مصر باستخدام التقنية دي بالشكل دة وبيعتبروا دة عودة الى الجاهلية ووأد للبنات
وقال ان مصر انتشرت فيها العملية دي سواء للمصريين او للعرب
يعني مصر اصبحت بالنسبة للاخوة العرب مكان لممارسة كل ماهو ضد الاخلاق والقانون سواء الانساني او الجنائي
انما العيب مش عليهم
العيب على اللي بيساعدهم في كدة من اصحاب المراكز الطبية اللي المال اعمى عينهم عن الدين والاخلاق

37 comments:

  1. والله العظيم يا-اخي
    المصريين دول ماسابوش حاجة الا لما حوروها وغيروها ولفلفوها وخلوها تخدم اللي هما عايزينيه حتى لو كان غلط وفي الاغلب بيكون غلط
    لسه في ناس بتقول ولد وبنت؟ لا حول ولا قوة الا بالله
    تحياتي ليك ياباشا

    محمد سمير

    ReplyDelete
  2. خلينا احنا كده عاملين ندخل وننبش ف اللى مالناش فيه لحد ما هتتقلب على دماغنا...يعنى ربنا سبحانه وتعالى هو اللى عالم بكونه و خلقه و وعالم بقدرته التوزيعة الصحيحة اللى تحفظ التوازن والتناسب بين الجنسين

    وعلى اساسها بيترتب حاجات كتير...زى مثلا الجواز و كده ....نيجى احنا بقى نألف و نهبل عشان البيه نفسه فى بنوتة يسميها على اسم امه و الهانم نفسها فى ولد عان يطلع ظابط....يلا بقى هى جت على دى

    موضوع جامد ومهم يا سمير
    تحياتى

    ReplyDelete
  3. العيب فى قله الضمير يا سمير
    فى الناس اللى بقت بتبص بس لكل شئ على انه مكسب وخساره
    مبقاش فى ضمير ولا خوف ولا خشا ولا رهبه من الخالق
    الناس احساها بالذنب مات خلاص
    وللاسف ان ده فى تزايد على طول

    تحياتى

    ReplyDelete
  4. الموضوع دة سمعته من زمان
    و اول ما سمعته جالى ذهول زيك كدة بالظبط
    و قلت سبحان الله كل ما بنتقدم فى العلم شوية بننسى ربنا
    الفساد بقى قاعدة و الفلوس بقت اساس... اساس ماشيين عليه و و بقينا بندوس على كل ماهو ذات قيمة
    لحد دلوقت بيفكروا كدة سيبنا ايه للجهله محدش بقى عارف
    ربك قادر
    تحياتى

    ReplyDelete
  5. والله انا اول مرة اسمع عن البي جي دي بس والله مبسوط اوي ان عرفت حاجة زي دة انا عاوز اقول لك حاجة ان اي اختراع جديد من الممكن للناس ان يستخدمو بطريقة ايجابية او بطريقة سلبية بس للاسف الاستخدام السلبي لة بيكون اكبر من الاستخدام الايجابي لة وللاسف ايضا ان الاستخدام السلبي دة بيكون اكثر في مصر لان مصر للاسف بقت من الدول المتخلفة في العالم علي العموم اتمني منك ان تعرض كل ماهو جديد في هذة المدونة الرائعة دة تحياتي ليك واتمني لك التوفيق

    ReplyDelete
  6. بس معقولة هذا الاختراع من الممكن ان يحول الجنين من ولد الي بنت

    ReplyDelete
  7. الضمير الضمير الضمير
    لما غاب الضمير كل حاجة ضاعت
    يارب أرحمنا
    تحياتى

    ReplyDelete
  8. معقول؟؟؟
    بجد موضوع يعصب اللى مبيتعصبش
    بس مش غريب ولا حاجه
    تتوقع ايه من ناس عبادتهم لله خوف من الناس ... فى معظم مصر الناس كويسه عشان كلام الناس فطبيعى لما يبقى فيه فرصه انهم يرفعوا راسهم وسط الناس بانهم يخلفوا ولد حتى لو ده فى اعتراض على حمكه الله وارادته مش هيترددوا فى كده
    ورايى ان العيب على البنيأدمين العاديه قبل مايكون على الدكاتره ولا الحكومه لانهم هم اللى عايزين كده ودى فرصه استغلها اللى فى اديهم الامر

    ReplyDelete
  9. والله يا احمد
    العيب فينا احنا
    احنا اللي بنسئ استخدام اي شئ نافع

    ReplyDelete
  10. موضوع جميل

    P.G.D او Pre-implantation genetic diagnosis
    دة اختبار بيتعمل لاطفال الانابيب قبل ما تتنقل لرحم الأم عشان نستثني الاجنة المشوهة او الاجنة المعيبة

    نبدأ من اول حكاية اطفال الانابيب

    اطفال الانابيب هو حل لبعض حالات العقم التي يعاني منها الازواج

    الزوجين بيروحوا لمركز اطفال الانابيب والدكاترة بياخدوا بعض البويضات من الأم وبياخدوا الحيوانات المنوية من الرجل وبيتم التلقيح خارج الرحم في المعمل....يعني الاطفال بيتكونوا في المعمل عشان كدة بيتسموا اطفال انابيب

    يعني مثلا اخدنا 6بويضات...بتبقى كل بويضة موجودة في انبوبة وبيتم تلقيحها بالحيوانات المنوية لتكوين جنين

    الجنين اول ما بيتكون بيبقى عبارة عن خلية واحدة وبتبدأ الخلية تتقسم فيبقوا 2 ثم 4 ثم 8 وهكذا

    لما الجنين يبقى عبارة عن 8 خلايا بييجي الدكتور ياخد خلية او اتنين منهم ويحلل التركيب الجيني بتاع الخلية...ولو اكتشف فيها اي عيوب خلقية او امراض وراثية بيتم استبعاد هذا الجنين من عملية الزرع داخل رحم الام

    يعني مثلا لو اخدنا 6 بويضات من الام...خمسة منهم تم تلقيحهم بنجاح وكونوا اجنة...واكتشفنا ان واحد من الخمسة به عيب خلقي او مرض وراثي بيتم استبعاده...والاربعة الباقيين بيزرعوا داخل الرحم...ممكن الاربعة كلهم يتشبثوا في الرحم وتبقى الام حامل في اربع توائم...وممكن ولا واحد يمسك في الرحم والعملية كلها تفشل

    الكلام دة كله الغرض منه توضيح ان اللي بيحصل هو اختيار و استبعاد للاجنة قبل زرعها في رحم الام...وليس علاج الاجنة وتغيير جيناتها وهي داخل رحم الام

    يعني مينفعش نغير الX كروموسوم بتاع البنت بالY بتاع الذكر

    اللي ممكن يكون بيحصل في الموضوع دة ان الزوجين يقولوا للدكتور انهم عايزين الطفل يكون ولد...وفي الحالة دي اما ان يستبعد الدكتور الاجنة الاناث التي تحمل كروموسوم XX...او يستبعد من البداية الحيوانات المنوية التي تحمل الX كرومسوم من عملية التلقيح عن طريق اجهزة الطرد المركزي

    الخلاصة ان اللي بيحصل هو عملية استبعاد وليس تغيير...

    دينيا..مش حرام لان اللي بيحصل مش اجهاض...فقلب الجنين لم ينبض بعد...الجنين نفسه لم تتكون اعضاءه

    اجتماعيا...مفتكرش ان الموضوع له تأثير قوي لان عملية اطفال الانابيب مكلفة ومحصورة في طبقة معينة من المجتمع...واللي بيعرف موضوع الPGD عادة بيبقوا ناس مثقفة و واعية ودول نادرا ما بيبقوا موجودين في مصر...و زي ما في ناس بتحب الولاد في ناس تانية بتحب البنات

    اكيد لازم يتم وضع قوانين وضوابط للموضوع قبل ما ينتشر ويبقى ظاهرة...ولو اني اعتقد انه لو انتشر مش هيبقى له اضرار عنيفة

    اعذرني لو طولت عليك

    ReplyDelete
  11. انا سمعت الموضوع ده في اليوم السابع لمحمود سعد
    استغربت اوي لانه بيحكي اللي بتقوله ده بكل برود بصراحه وكنت هاين عليا اقوم اضربه ياسبحان الله هما فاكرين ان يعني ربنا مش قادر
    يخليه بعد مايقلبوا هما في تدخله يخليه زي ماهو وكمان سمعت ان الموضوع ده ممكن يسبب في تشوه للجنين اعوذ بالله عليهم
    واستغفر الله العظيم
    بجد استغفر الله العظيم
    مش عندي حاجه تانيه اقولها

    ReplyDelete
  12. فعلا دى نصيبه من النصايب يعنى احنا بنستخدم العلم بطريقتنا عشان بلادنا بقى اسمها فساد استان
    الفساد فى كل حته هتلاقى الفساد حتى فى بنطلونك
    لازم اشراف على المراكز دى وعلى العيادات الخاصه كمان الدكتور بقى مش صاحب خدمه انسانيه ده بقى صاحب مصلحه الهدف الاساسى منها الربح وسلملى على وزير الصحه

    ملحوظه : انا حاسس انك شايل منى او حاجة
    نختلف فى الراى لكن كلنا بنحب مصر
    تحياتى

    ReplyDelete
  13. شفت بقى فهلوة المصريين..والله حاجة تكسف ان في ناس بتفكر كدة..رجعنا لعصر وأد البنات...اللهم ارفع مقتك و غضبك عنا

    احنا منستاهلش نستخدم اي تكنولوجي جديدة احنا المفروض نرجع لايام ماما كريمة و ام عتريس الداية...!

    ReplyDelete
  14. بص انا أسف اني مش برد علي الموضوع بس انا عجباني اغنيه شوارع مصر الي انت حاطتتها دي اوي جدا ياريت لو تبعتلي لنك انزلها منه او تحط اللن علي البلوج بتاعتك
    خالص تحياتي

    ReplyDelete
  15. والله مش عارف اقولك ايه
    لو غلط يبقى حسبي الله ونعم الوكيل فيهم
    بس انا قريت تعليق Marvel
    واظاهر انها دكتورة وفاهمة
    لكن حتة الحرام والحلال
    انا صعب ابت فيها
    لكن اخلاقيا انا شخصيا لا يمكن اعملها ابدا
    وحسب تربيتي فانا برضى بالولد والبنت
    ومعنديش موانع من حد فيهم
    تحياتي

    ReplyDelete
  16. غمض عينيك:
    كل ما المجتمع المصري كبر واتسع كل مازادت السلبيات وبرضة زادت الايجابيات
    احنا في مجتمع كبير وكل واحد له دماغه وله اسلوب تفكيره وتربيته اللي اكيد بيختلف بيها عن الاخرين
    تحياتي ليك
    nermeen:
    هي لسه هتقلب على دماغنا؟
    اللي احنا فيه دة من ظلم وفساد مش من شوية يا عزيزتي
    دة من اعمالنا
    شكرا ليكي الف شكر وعود احمد للمشاركة في مدونتي المتواضعة
    تحياتي واحتراماتي

    ReplyDelete
  17. medo magdy:
    احب انا المختصر المفيد
    انت ماشي بمبدأ خير الكلام ما قل ودل
    تحياتي ليك
    reemoo:
    الناس الحياة والدنيا اكلت دماغها خلاص يا ريمو
    معدوش منتظرين تصاريف ربنا ويشوفوا هيرزقهم بايه
    دة احلى حاجة في موضوع الانجاب دة هو انك تشوفي ربنا هيرزقك بأيه سواء ولد ولا بنت
    ليه بنتدخل في كدة كمان
    تحياتي ليكي
    منوراني دائما وابدا ان شاء الله

    ReplyDelete
  18. rania:
    قبل اي حاجة بهنيكي يافندم على الاسبيشياليست بتاعك
    ثانيا:
    لسه يا ما هنشوف يا فندم
    زماان اخترعوا الديناميت للاغراض السلمية شوفي البشر استخدموه ازاي
    وحاليا اخترعوا الموبيل اللي بكاميرا بس لو الراجل كان عارف الشباب العربي هيستخدمه ازاي مكنش اخترعه من الاساس
    البشر هم اللي بيستخدموا اختراعات في حاجات لم تخترع من اجلها اساسا
    تحياتي واحتراماتي

    ReplyDelete
  19. عمرو غريب:
    والله ياعمور انا كمان كنت اول مرة اسمع عن الحكاية دي لما قريت الموضوع دة في المصري اليوم
    كل حاجة لها وجهين في الاستخدام بتاعها حتى الدش والموبايل والتليفزيون
    طبعا الف شكر لك على رأيك في مدونتي المتواضعة
    اديني بجتهد وبحاول
    تحياتي واحتراماتي

    ReplyDelete
  20. bos bos:
    ماتسبقيش الاحداث
    لسه في حاجات كتير قوي هتضيع
    تحياتي واحتراماتي
    truth guard:
    انا برضة ماصدقتش
    بس مش الاختراع انما ماصدقتش ان لسه في حد في سنة 2007 لسة بيدور ع الولد والبنت
    تحياتي ليكي
    لسة ياما هنشوف

    ReplyDelete
  21. محمد مفيد:
    انا متفق تماما معاك
    العيب في الانسان اللي بيبوظ اي استخدام نافع لاي حاجة ويحولها لاستعمال في منتهى السوء
    تحياتي لك
    marvel:
    اهم شيء في مناقشة اي موضوع في اي مجال من مجالات الحياة هو اخذ رأي اهل الخبرة
    كومنت مفيد جدا وقيم
    الف الف شكر لك

    ReplyDelete
  22. الطب بقي مهنة إهبش وإجري
    صحيح لسه في شرفاء
    بس مش بيظهروا زي التانيين
    وعقول الناس الجاهله اللي لسه عايزه ولد ومش عايزه بنت
    ثقافة مجتمع متخلفه
    ساعد عليها أطباء بلا ضمير أهم حاجه عندهم البيزنس

    سلاماااااااااات
    أه علي فكره أنا علقت علي موضوع الإعلان .. أصلي إتعرضت للموقف المحرج ده
    إبقي شوفه

    سلامااااااات مره تانيه

    ReplyDelete
  23. merooo:
    محمود سعد بحس كتير فعلا انه بارد
    الرجل من كتر المواضيع اللي بيناقشها جاله برود
    الموضوع فعلا ينرفز يا ميرو....في ناس مش لاقيه ومش عارفة تخلف حتة عيل وناس تاتنية معترضة ان ربنا رزقهم ببنت وعايزين يبدلوها بولد
    عموما يا ميرو
    من راقب الناس مات هما
    تحياتي

    ReplyDelete
  24. ضد الفساد:
    ههههههه
    هو الحقيقة الفساد على الرغم انه في كل حتة وكل مكان الا انه لسه ماوصلش جوة بنطلوني
    انا مانع الفساد في المنطقة دي
    اما بقى ردا على ملحوظتك فهي ملحوظة مش في محلها على الاطلاق
    كل واحد من حقه يقول رأيه بكل حرية والهدف من المدونة دي تبادل الاراء والخبرات وزي انت ماقلت كلنا بنحب البلد دي ودة هدفنا جميعا
    بالعكس يا ضد الظلم انت شخصية لها مني كل تقدير واحترام والف شكر ليك على تشريفك لمدونتي المتواضعة ويارب دايما
    تحياتي واحتراماتي

    ReplyDelete
  25. نقطة ميه:
    الوأد زمان كان بيتم في الصحراء انما وأد البنات ماركة 2007 بيتم من المنبع
    اللي يعيش ياما يشوف
    وياما في الجراب ياحاوي
    تحياتي واحتراماتي
    تامر حسين:
    ياباشا انت طلباتك اوامر
    اللينك هو:
    http://www.4shared.com/file/8074246/abce8e58/shaware3_masr.html?s=1
    تحياتي لك

    ReplyDelete
  26. ahmed al husany:
    بداية
    marvel
    شاب وليست شابة لذا لزم التنويه
    طبعا اي شاب سوي لا يمكن يستعمل التقنية دي في الشذوذ الفكري والاخلاقي دة
    تحياتي واحتراماتي
    نورت المدونة

    ReplyDelete
  27. reri:
    لو هنتكلم عن الاطباء محدش اكتر مننا ممكن يتكلم عن الناس دول نحن اصدقاءهم اللدودون الصيادلة
    دول حباااااااااايبنا موووووووووت موت موت
    ربنا يهديهم ويهدينا جميعا
    تحياتي ليكي يا رحاب

    ReplyDelete
  28. أيه يا عم فينك مابشوفكش عندى خالص
    خييييييييييييييييييييير ؟؟؟؟؟

    ReplyDelete
  29. bos bos
    ازيك يا بس بس
    معلش والله سامحيني
    الدنيا تلاهي
    والظاهر اعراض الزهايمر ابتدت تشتغل معايا
    تحياتي واحتراماتي

    ReplyDelete
  30. يعني هي أول و لا أخر مرة..خد عندك باقي البلاوي اللي الأطباء و المراكز الطبية بتغمي عينيها عنها(كده و كده طبعاً)..دي بتبقي مفتحة و بتعك كمان...
    بس دايماً في الأفلام حتي ..أي حد يحاول يقرب للحاجات الطبيعية و اللي خلقها ربنا..كان بتتقلب عليه في الأخر...(الأفلام الأجنبي طبعاً..حيث يطلق عليهالقب فيلم..عكس مصر)..
    و أعتقد إن في فرحة خاصة لتوقع المولود و شكلة..
    ربنا يتوب علينا...قولو أمين...

    ReplyDelete
  31. تخيل لو انت جبتلى عربية 28 أقولك ليك اجبتهاس اكسنت
    ولله المثل الأعلى
    والعبرة مش ولد ولا بنت بالصلاح
    تحياتى ليك يا سمسم

    ReplyDelete
  32. السلام عليكم ورحمة الله وبركاته

    كم من المهازل ترتكب تحت ستار العلم

    وناس كتير ضمايرها ماتت ومعدش عندها هم الا جمع الفلوس
    حسبنا الله ونعم الوكيل

    ReplyDelete
  33. اصل انت مش آخدلى بالك
    اصل البنات عااااااااار ياولة
    اى والله
    عااااااار لا يمحوه الا الشيكولاتة السايحة
    امال ايه؟؟؟
    الراجل راجل برضك
    ولزمن وحتمن حد يشيل اسم العيلة
    ان شاء الله الداموسة بتاعت ابو سويلم
    يالهو بالى؟؟
    بنت؟؟
    يادى العيبة يادى الجرسة
    وعلى المثل
    " قالولى ولد....اتشد ضهرى واتسند"
    " قالولى بنية...قلت ياحيطة اتهدى عليا"

    نورتت مصر يافندم

    ReplyDelete
  34. Hi there, just became aware of your blog through Google, and found that it is truly informative.
    I am going to watch out for brussels. I'll appreciate if you continue this in future. Many people will be benefited from your writing. Cheers!

    Here is my site video reviews

    ReplyDelete
  35. Thanks in support of sharing such a nice thought, paragraph is nice, thats
    why i have read it entirely

    my web blog: top 10 products

    ReplyDelete
  36. What's up to every one, the contents existing at this web site are genuinely amazing for people knowledge, well, keep up the good work fellows.

    Here is my web page - only the best review

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails