Monday, 25 June 2007

مساواة


البوست اللي فات عن النظرة السلبية للفتاة المدخنة وكل التعليقات اللي عليه واللي اتهمت الموضوع انه ذكوري وفيه تحيز لبني جنسي
خدني لموضوع اكبر بيظهر في الفضائيات كل كام شهر على شكل هوجة ومهرجان كبير وهو موضوع
المساواة بين الرجل والمرأة
انا شخصيا اول ما بيتفتح الكلام في الموضوع دة في اي برنامج اكون بتفرج عليه...تلاقيني اقلب المحطة على طول
مش علشان لا سمح الله انا ضد المرأة ولا حاجة...ولا علشان انا ضد مبدأ المساواة
ابدا انا من اشد المؤيدين لحرية المرأة ومساواتها بالرجل في الحقوق والواجبات
انما مولد " ستي مساواة" بتاع كل سنة بطولة ايناس الدغيدي واقبال بركة وغيرهن على حسب التساهيل بيكون دمه تقيل قوي على قلبي لأنهن لا يمثلن المرأة المصرية الحقيقية من وجهة نظري طبعا بالأضافة الى ان كلامهن بيكون مكرر ومعاد ونظري اكتر من الازم
طب تعالوا نحسبها كويس ونفترض ان المرأة اخدت حقوقها كاملة متكاملة وبقت رئيسة ووزيرة وسفيرة وضابط واحتلت مجالس الشعب والشورى ومجلس الوزراء واشتغلت واتعينت وبقت كلمتها هي الاولى في كل شيء
وانا مش ضد كدة على فكرة...انا بشوف ان الانسان الكفء لازم ياخد حقه بصرف النظر هو رجل او امرأة
معدش في نفس دعاة تحرير المرأة اي شىء....اخدوا حقهم تالت ومتلت
طب ما تيجوا احنا بقى يا رجالة ناخد حقنا احنا كمااااااااااان
اولا..مفيش حاجة اسمها شغلانة للست وشغلانة للرجل..في مساواة في كل شيء..وزي ما العمال الرجال بيشتغلوا اي حاجة كمان العاملات السيدات هيشتغلن كل حاجة..ان شا الله يشتغلن في الفاعل
ومفيش حاجة اسمها وظيفة مناسبة للرجل ووظيفة مناسبة للست لأن دة بيتعارض مع مبدأ المساواة اللي انتم عايزينه
ثانيا...مفيش مواعيد شغل خاصة بالنساء ولو الشغل بيخلص الساعة 1 او 2 صباحا او حتى بعد كدة يبقى على الكل....مساواة بقى
ثالثا....مفيش في المواصلات العامة حاجة اسمها سيارات مخصصة للنساء على اساس بقى ان في مساواة ولو مصممين عليها يبقى في كمان سيارات للرجال
رابعا..ليه بقى الراجل ساعة الجواز هو اللي بيجيب شقة ويدفع مهر ويجهز الشقة..هو مش في مساواة..يبقى الشقة والتجهيز وخلافه بالنص
خامسا..من الاساس ليه الشاب هو اللي يتقدم اصلا للزواج...هو مش فيه مساواة..خلاص نعمل قرعة ونشوف مين اللي هيطلب يد التاني
سادسا..بلاش بقى نفقة ومصاريف والحاجات دي..ماهو بقى في مساواة بقى..الغي كل حقوق المرأة دي مالهاش لزمة
وهنقعد نقول سابعا ولحد مالانهاية...اصل الكلام في الموضوع دة لذيذ ومش بيخلص
ايتها النساء في مصر المحروسة
موضوع المساواة دة مش في مصلحتكن خالــــــــص....وانتن قريتوا بنفسكن لو حصلت مساواة كاملة هتبقى الدنيا عاملة ازاي
ايه رأيكن بقى
مساواة......ولا نمشيها زي ماهي كدة؟

39 comments:

  1. وبعدين بقى

    استعنا ع الشقا بالله

    ولو اني ماباحبش المناقشة في موضوعات المساواة والمجتمع الذكوري والمواويل دي لان مافيش فايدة صراحة من هذا الجدل العقيم.

    ولهذا بالمناسبة لم اشترك في المناقشة الحامية حول موضوع تدخين البنت واعتباره مقياس لكونها محترمة من عدمه.

    اولا فلنتفق على أننا بالفعل مجتمع ذكوري يعاني خللا رهيبا في بعض المفاهيم الخاصة بالحرية الشخصية سواء للرجل أو للمرأة.
    ويعاني خللا رهيبا في الحديث عن العيب واللى يصح ومايصحش فيما يخص المرأة وتمييزها عن الرجل واختصاصها بكمية لاتعد ولاتحصى من الممنوعات التي يجب ان تمنع أولا عن الرجل.

    ولكن لاننا مجتمع ذكوري مزدوج المعايير او فلنقل له مجموعة من المعايير يُفعلها وقتما يريد ويلغيها وقتما يريد ايضا.

    من هذه المعايير المغلوطة مسألة المساواة التي يحدث فيها خلط رهيب بين الأمور ونجد أنفسنا كنساء مسؤولات او متهمات ومطالبات بتبرير بعض التصرفات الشاذة لبعض النساء لأنهن تحررن من بعض الالتزامات وصار علينا ان نطردهم من جنة مجتمعنا ونتبرأ منهن لأنهن فهمن المساواة فهماً قاصراً أو مغلوطاً.

    فالحديث عن المساواة هو حديث عن المساواة في الحقوق والواجبات بين الرجل والمرأة بمعنى ان كل منا عليه مجموعة التزامات عليه ان يؤديها للطرف الآخر قبل أن يطلب حقوقه.

    فمن غير المقبول أن يطالبني المجتمع دائما بأداء واجبي كأمرأة تجاه الرجل ويذكرني بدوري الطبيعي في الحياة وبأني كذا وكذا ويجب ان أفعل كذا وكذا لأكون " شاطرة" بمعايير هذا المجتمع وفي نفس الوقت هذا المجتمع لايتفضل بتذكير الرجل بواجبه تجاهي ولايوجه له اي كلمة ولا لوم أو تقريع اذا قصر في أداء واجبه المنوط به تجاهي. وكلما فتحت فمي للمطالبة بحقوقي ذكرني المجتمع أن الست الشاطرة لاتطالب ويجب ان تصبر على التقصير ويجب ويجب
    وسلسلة طويلة من الواجبات دون حقوق

    ونفس المجتمع الذي يتذكر رجاله حقوقهم عند نساءه هو بعينه المجتمع الذي يصاب رجاله بالزهايمر عند الحديث عن واجباتهم تجاه المرأة.

    وكلما تطرقنا للحديث عن المساواة نجد من يُذكرنا أن الاسلام كفل للمرأة كذا وكيت من الحقوق وكرمها واعطاها منزلة لم تؤتها اي من نساء العالمين .

    المطالبة بالمساواة في الحقوق والواجبات لاتعني اننا نتمرد على ماكفله لنا الإسلام.

    بالعكس الاسلام كرم المرأة واعطاها كل الحقوق

    ولكن المجتمع هو من انتقص من حقوقها التي كفلها لها الاسلام

    كل مانطلبه ان تعاملونا كما أمركم الله لااكثر ولا اقل

    يعني تؤدوا ماعليكم من واجبات قبل ان تطالبوا بحقوقكم

    لكن ان يظل كل دوركم في الحياة المطالبة بحقوقكم ونسيان ماعليكم من واجبات فهذا هو الظلم المجتمعي بعينه.

    أمر آخر يزعجني جدا الحقيقة عند الحديث عن المساواة هو الخلط بينها وبين التحرر او التحلل أو سمها ماشئت.

    انا لاأطلب المساواة بالرجل في أن اعود للبيت في انصاف الليالي وأدخن مثله ويكون لي حياة خاصة قبل الزواج كما يفعل

    هذا هو التحلل الذي يتم الخلط فيه ويتم اشهاره في وجهي كسلاح كلما تحدثت عن حقوقي المهدرة.

    المرأة المتحللة او المتحررة لاتطلب من احد حق بل تتصرف مباشرة دون انتظار لراي المجتمع ولا يهمها في كثير او قليل هذا الراي.

    فأرجو عدم الخلط بين المساواة في الحقوق والواجبات والمساواة في اشياء أخرى.

    انا امرأة اعتز بكينونتي وبأني مختلفة بيولوجيا عن الرجل ولكني مساوية له في المكانة ولا اقل عنه في المنزلة عند الله ولايتميز عني في اي شيئ لمجرد انه رجل .
    ولا يجب ان يميزه المجتمع عني وينتقص من حقوقي لصالحه لمجرد انه من الناحية التشريحية ولد رجلا وليس له فضل في هذا الاختلاف ليترتب عليه له ميزة اعلى وليس لي ذنب في كوني انثى لاقل عنه مرتبة.

    المفاضلة بيني وبينه يجب ان تتم بناء على مايفعله كل منا وليس بناء على جنس كل منا.

    فكم من رجل محسوب زورا وبهتانا على كشوف الرجال واخلاقياته وسلوكه لاتمت للرجولة باي صلة.

    مايعتبره المجتمع عيبا على البنت هو عيبا ايضا لو فعله الرجل ويجب ان يجرمه هذا المجتمع.

    لكن ترك الامور سايبة والرجل يفعل كل شيئ بحجة انه رجل لايعيبه شيئ ايضا امر مغلوط.

    مايعيب المرأة يعيب الرجل لو كان المجتمع عادلاً

    أما ونحن في هذا المجتمع المريض فلافائدة من اي نقاش في هكذا أمور.

    ومعذرة على الإطالة

    ReplyDelete
  2. أولا همسك الموضوع حته حته
    من ناحية أيناس الدغيدى وغيرها وغيرها من النساء المنحلات من وجهة نظرى دول أصلا مش حاسين بحاجة ومعرفش هما عايزين مساواة فى أيه بالظبط ما هما عندهم كل حاجة وبعدين هما لو فضلوا طول اليوم برة البيت بيشتغلوا أى شغلانة مهما كانت مش هتفرق معاهم لان كل واحدة منهم عندها الشغالة والسفرجى وغيره وغيره وكمان دول أصلا عايزين مساواة علشان يكملوا باقى الأنحلال بتاعهم
    نسيبنا من دول ونتكلم عن الناس العادية الملتزمة اللى كل أسرة بتلاقى الست بتشتغل وبترجع مثلا الساعة 3 أو 4 هيا كده بقت متساوية للراجل فى الشغل بس الراجل هنا ظالم لأنها بترجع برضة وعليها كل حاجة فى البيت ومش عايزة واحد يقولى ما تقعد فى البيت مين قال لها تشتغل أعتقد ظروف الحياه دلوقتى لازم تخليها تشتغل ويكون مرتبها مع مرتب جوزها ولكن الراجل هنا بيكون ذكورى وبياخد حقه تالت ومتلت وعلشان كده بنلاقى ستات من دول بيطالبوا بالمساواة يعنى أشمعنى الست تشتغل زى الراجل وتصرف معاه على البيت وكمان يكون عليها كل حاجة تربية أولاد وتنضيف بيت وغيره وغيره من الأعباء المنزلية فهيا هنا عايزة حقها الضايع ودى وجهه نظر الست المطحونة اللى عايزة المساواة ودى اللى لازم يكون من حقها تلاقى ساعات عمل أقل وكمان عربيات مخصوصة للسيدات وأعتقد ده من حقها بعد ما الراجل خد حقه ومش عايز يساعدها لا وكمان كتير بيرميها فى الشارع وقت ما يحب ويتجوز عليها براحته يبقى فين المساواة دى
    المساواة دى أعتقد اللى حس بيها الناس أصلا اللى عايشة فى رفاهية وعندها كل حاجة عايشين فى قصور وعربيات ومش لاقين حاجة يعملوها فبيسلوا نفسهم
    لكن الجزء بقى المطحون اللى معظمنا منه دول بقى اللى محتاجين المساواة
    ومن ناحية مين اللى بيخطب الراجل ولا الست ومين اللى بيجهز تعتقد معايا أنه من العدل أن الواحدة تتقاسم مع الشاب فى كل ده وبعدين يتجوزوا وتصرف معاه على البيت لانها هاتكون بتشتغل علشان ظروف الحياه الصعبة ويرجعوا من الشغل الراجل ينام وهيا تفضل فى دوامة البيت والعيال وهو مريح دماغه وكام سنه كده يحس أنها مالهاش لازمة ويرميها ويتجوز عليها وبعد مايكون طبعا مشطب على كل فلوسها وبعد ماتكون هيا خلاص مش نافعة لأى واحد تانى ولا نافعة حتى لنفسها
    ياريت تقولى بقى مين محتاج المساواة ومين محتاج ياخد حقه
    معلش أنا طولت قوى وللأسف لسة ما خلصتش تعليق بس كفاية كده لأن تعليقى طويل قوى

    ReplyDelete
  3. وبعدين أنت مش شايف أننا لسة عايشين فى مجتمع ذكوى بكل ماتحمله الكلمة
    بمعنى أننا كتير بنحلل للراجل حاجات يعملها وبنحرمها على الست
    يبقى كده مين محتاج مساواة الراجل اللى واخد حقه وعايش حياته بالطول والعرض ولا مين بالظبط
    المسألة بالنسبة للستات مش مسألة مساواة دى مسألة عدل عايزين الرجالة يعدلوا شوية حرام بجد فيه رجالة عايزة الواحد يعدمها وفيه ستات كتير مظلومة صدقنى وأنتوا بس مش بتبصوا غير على الفئة المحدودة المنحلة اللى أصلا واخدين حقهم وبتعمموا أحوالهم علينا
    بلاش خلط الأمور وفرقوا بين الستات دول وبين الستات المطحونات
    معلش مقدرتش أمسك نفسى وصدقنى الموضوع ده عايز له ميت موضوع للتعليق وأكيد هرجع تانى

    ReplyDelete
  4. معلش كل ما أرجع أشوف موضوعك تانى الاقى نفسى عايزة أعلق
    وبعدين مساواة كاملة أنتوا فى كل الحالات كسبانين المساواة الكاملة يا سلام هاتعيشوا حياتكم ببلاش ومريحين دماغكم
    ولو الطبيعى اللى أحنا فيه برضة أنتوا اللى كسبانين وأكيد أناوضحت ده فى تعليقى اللى فات
    وده كان تعليقى على أخر سطر عندك

    ReplyDelete
  5. سلامو عليكو ده أولا
    أنا اول مرة اشوف مدونتك ده ثانيا
    ثالثا بقى اسمع كويس واستمخ..
    دلوقتى انا مش راجل و متحاولش تستغرب للكلام اللى حاقوله ده.أكاد أجزم انك عمدك حق ف كل كلمه قلتها أنا رأيى من رأيك تمام اللهم إلا الحته بتاعت المهر دى لأن لها أساس دينى و ده دليل قوامة الرجل و مش حنخوض ف جدل دينى و انا شايفه انت غلط ف دى.و الحته بتاعت مواعيد المرأة دى غصب عنها يعنى هوه الراجل ينفع ياخد ساعة رضاعة؟؟

    المساواه دى كلمه بايته من كتر ما قعدوا يلتوا و يعجنوا فيها حتى يا راجل كمان 10 سنين حتبتدى الرجاله تطالب بمساواتها بالمرأة.. انا طول عمرى أسمعهم بيتكلموا عن المساواه من منظور أهبل و عقيم لا يودى ولا يجيب أهو فض مجالس و خلاص..
    على طول بيتكلموا عن مساواة الرجل بالمرأة ف أعمال المنزل و غسل الصحون و تربية الأولاد أو ان المرأة يكون لها الحق انها تتجوز 4 رجاله زى الرجل كده.
    ده كلام عيال صغيرة..المساواه انك تعمل شغلك وانا اعمل شغلى يعنى انا أغسل صحون عشان انت مش حتعرف وانت تنزل تشتغل شغل جامد انا ماعرفش أعمله و كده نبقى بنكطمل بعض لكن فى حاجات ماينفعش فيها المساواة لأنها شرع ربنا و لو حصلت فيها مساواة يحصل إخلال بالسنن الكونيه زى ان الراجل يولد أو يرضع أو انه يبقى ف يوم عنده حنيه أو صبر انه يربى أولاده زى المرأة...

    شكرا و ان شاء الله حجيلك كتيير

    ReplyDelete
  6. هههههه
    الموضوع ده كبير كبير اوي الصراحة وعمر ماكان له نهاية

    انا مع المساواة بين المرأة الناضجة والرجل الناضج في المسؤوليات والواجبات وكل شيئ ولكن ضمان الحفاظ على المرأة وكرامتها

    يعني نساوي مابنهم بس مايشتغلوش فالفاعل...نساوي مابينهم بس مايرجعوش الساعة 1 ولا 2 الصبح وكده يعني والا يبقى انا بفرط فيهم

    تحياتي ليك ياسمير باشا
    محمد سمير

    ReplyDelete
  7. السلام عليكم
    احمد باشا
    احييك علي روحك الحلوه جدا وتقبلك النقد بصدر رحب
    واحييك مره اخري علي سطورك الرائعه
    انا وجهه نظري ان المراه والرجل لا يستطيع احدهما العيش دون الاخر فكلانا نكمل بعض
    في بعض الاشياء تتطلب وجود النساء معك والعكس

    بوست ممتاز جدا

    ReplyDelete
  8. بص انا لا معاك ولا ضدك
    عشان اصلا مبحبش اتكلم فى حوارات منتهيه ما هى المراه واخده حقوقها فى الشغل مفيش شركه بتمنع شغل المرأه غير لو حاجه حربيه ولا بتاع وفى الغالب مش بتمنع
    ومفيش جهه فى مصر بتمنع التعامل مع المرأه
    ومفيش مواصله بتمنع ركوب المرأه يعنى لو واحده ركبت موتوسيكل لوحدها صحيح الناس ممكن تضحك عليها بس مفيش قانون يمنع كده
    عشان كده انا مش ضدك
    ومش معاك عشان المرأه مش منصوفه فى الحقوق الشخصيه زى النفقه و الحضانه وحجات كتير فى الاحوال الشخصيه ... والمساواه فى وجهت نظرى ان كل واحد ياخد حقه اللى ربنا شرعه ليه يعنى الرجل والمرأه يتساوا فى الحقوق والواجبات
    بمعنى ... ان فى بلاد ارياف كتير بتمنع توريث الفتاه... صح ولا غلط ؟
    طيب هى مش انسانه ولازم يكون ليها حق زيها زى الرجل ؟
    طيب اديناها حقها ... هتاخد زى الرجل ؟
    طبعا لا الراجل بياخد الضعف بس فى نفس الوقت اتساوت معاه فى انها اخدت حقها
    هى دى المساواه اللى من وجهت نظرى اللى مقدرش اقول انى معاك فى ان المساواه مش فى مصلحه المرأه
    حاجه اخيره بقى
    ان فى بنات وستات كتير يستهلوا ضرب الجزم سايقين الهبل على العبط وحالتهم حاله ... منهم اللى ممكن جوزها يضربها ولا يهينها وهى تقدر توقفوا عند حده وع ذلك مستهبله وساكته ولما الموضوع يزيد تبتدى تطلب حقها
    طب كانت فين من الاول
    او ممكن تنصف الرجل على المراه فى حق وراثه او زواج او طلاق لمجرد انه رجل والعادات والتقاليد اللى فى بلدها بتقدس الرجل
    دى نوعيه من البنات مبطقش التعامل معاهم ولا الكلام مع اشكالهم ... لانهم بيساعدوا على الظلم وغضب الله
    بس خلاص شكرا

    ReplyDelete
  9. حاجه كمان معلش هموت لو مقلتهاش
    عشان اعرف انام بليل
    موضوع المواصلات
    طيب لو فيه راجل عجوز واقف فى المترو مش هتوقفله؟
    اكيد هتقف عشان هو حالته البدنيه لاتسمح بانه يقف كتير
    طيب مش هو راجل وانت راجل وفيه مساواه بين الرجل والرجل ؟
    طيب لو واحده ست كبيره او حامل مش هتوقفلها ؟
    ولا هتقول لا عشان هى مرأه وانت مؤمن بالمساواه ؟
    طيب لو واحده بنت شابه واللى رايح واللى جاى بيخبط فيها مش هتوقفلها ولا عشان المساواه ؟
    هتقولى عشان المساواه ساعتها احنا بقى هنساويكوا بينا ونعد نخبط فى اللى رايح والللى جاى عشان تبقى مساواه بعينها
    بس خلاص

    ReplyDelete
  10. ههههههههه
    مش عارف حاسس ان المواضيع الى ورا بعضها ده بخصوص حاجة
    فيه ححب جديد وفشل لا سمح الله
    طب فيه حب وعاوزه تفشل
    مش عهاوز بنات ولا مدونات حريمى تعلق عندك
    م الآخر عاوز تتخانق
    فهمنى بس
    :)
    بس تخيل متفق معاك كلمة كلمة وسطر سطر وحرف وحرف
    والمراة أصلا كائن متناقض
    عاوزة تتحب وعاوزة الراجل يتقل عليها
    عاوزة راجل شخصية قوية وعاوزة تمشى كلامها
    عاوزه يقولها بحبك ويبقى كويس حتى لو كان لسه مضروب علقة فى الشارع أو من المدير
    عاوزة تركب مواصلات زحمة وتلبس حاجات مش لطيفة من غير تحرشات
    عاوزة تشتغلكل الشغلانات بس تروح بدرى وتاخد اجازة حمل ووضع وساعة رضاعة
    مش عاوزة تشتم فى الشاعر مع انها بتسوق وحش قوى
    وأخيرا ربنا يترها معاك
    تحياتى ليك يا جميل

    ReplyDelete
  11. فكرة المساوة بين الراجل والمرأة فكرة حلوة انا موافق عليها بس لما مراتي تخلف اخد انا كمان اجازة اقعد جنبها ايه يعني اشمعني انا ويدونا اجازة رعاية طفل وكمان يدونا الحق نطبخ في الشغل و يعملوا عربية في المترو للرجالة بس ولا هي المساوة في انهم ياخدو المميزات بس

    ReplyDelete
  12. أسمحولى أرد شوية
    بالنسبة للكلام اللى بيتقال عن أجازة رعاية الطفل أزاى الراجل ياخد أجازة أعتقد أن الست اللى بتاخد أجازة ما بتقعدش فى البيت تلعب ده بيكون عليها عبء كبير جدا ما بين تربية الطفل اللى فى اول سنه تقريبا ما بيخليش الأم تنام الى التزاماتها فى البيت يعنى هيا مش واخدة أجازة علشان تتفسح ولكن حضرتك لما تلاقى واحد وجوزها بيشتغلوا علشان ظروف الحياه بتتطلب كده ليه بيكون عليها كل حاجة وكمان مش عاجبه وهو ما عليهوش حاجة أعتقد ده مش عدل العدل أنها تقعد فى البيت وتقوم بكل واجباتها على أكمل وجه مقابل أن الزوج يكون هو كمان بيعمل اللى عليه وساعتها لا هاتطلب مساواة ولاغيره
    لانها هتكون مستريحة جدا ومش حاسة بأى فرق لكن الرجالة دايما عايزين كل حاجة من غير ما يدوا حاجة

    ReplyDelete
  13. المرأة كائن متناقض
    فعلا مين اللى قال كده
    هيا فعلا متناقضة لأنها بتتنازل عن كل حقوقها بمزاجها بتشتغل جوه وبرة البيت وبرضة مش عاجب والأخ اللى متجوزها فاكرهاضعيفة يا عينى وبتعمل كده ضعف منها لا ده مش ضعف هيا بتبقى مش عايزة تهد البيت ومش علشان خاطر الراجل اللى مبهدلها لا ده علشان خاطر ولادها لانها ما بتعرفش حقيقة الراجل اللى معاها اللى لما تزيد المسؤلية ويبقى فيه ولاد والمصاريف تكتر والتزاماتها تكتر والراجل واقف يتفرج ومش عاجبه كمان
    تبقى هيا بقى اللى متناقضة ولا الراجل اللى أنانى
    للأسف أحنا بنعانى من النظرة الذكورية اللى لسة موجودة ومنتشرة جدا

    ReplyDelete
  14. الأستاذ اللى كتب الموضوع ده سابنا نخبط فى بعض وراح فين
    أنت فيييييييييييييييييييييييييين

    ReplyDelete
  15. استاذ hapasa .... مش عارفه تعليقك فكرنى بواحده صحبتى ... كانت لو سمعتها بتتكلم تعد تعملك من البحر طحينه وتلاقيها شخصيه ايه ياما هنا يا ما هناك وتحس ان امه دعيه عله اللى هيدوسلها على طرف ده
    ولما كنت بسألها عن فتى احلامها اول حاجه كانت بتقولها يدينى فوق دماغى
    سبحان الله مفهمتش ايه الاصل فى التناقض الرهيب ده غير بعد لما البنت دى اتخطبت واتحولت او اتهبلت تقريبا وبقت لعبه فى ايديه
    معاك جدا ان فيه بنات يستاهلوا الحرق
    بس ايه معنى انك متضايق ان البنت بتركب مواصلات وبتضايق من المعاكسات والتحرشات ؟
    طيب المفروض يتعمل ايه متركبش مواصلات ولا تتخرس ومتتكلمش عشان ميتقالش عليها متناقضه؟
    والله حتى عيب الواحد يفكر بس انه حقه يمشى فى الشارع بحريه ولما يتاخد الحق ده ويشتكى يتهاجم ميتنصفش
    عيب فى حق الراجل والبنت فى نفس الوقت
    يعنى هل البنات بتركب مواصلات عشان المساواه ولا بتركب مواصلات عشان تقضى مصالحها وتروح مشاويرها؟
    هل ده غلط فى حقها كفتاه؟
    ربنا غضبان عليها عشان هى اللى بتحط نفسها فى المواقف دى وراضى جدا على الولاد اللى بتتعدى حدودها بظلم عشان غلابه يا عينى يعملوا ايه يعنى؟
    سبحان الله
    وموضوع الشغل ده فى بلاد بره المرأه مرتبها اقل عشان بتاخد اجازات اكتر وبيتهيالى ان ده عين العقل
    شكرا ويارب يكون كلامى خفيف عشان انا عارفه انى رخمه جدا بزات فى المواضيع اللى فيها افترى سواء من طرف الراجل او البنت

    ReplyDelete
  16. السلام عليكم
    انا كمان بكره جدا كلمة مساواة الرجل بالمرأة لأنهم مش زي بعض في الحقيقة ...هما مش زي بعض غير في انهم هما الاثنين انسسسسسسسسسان
    المسألة ان كل واحد ياخد حقوقه و يؤدي واجباته...
    مثلا الرجل له حقوق زي ضعف حق المرأة في المواريث و و و ....الخ
    و عليه واجبات و هي انه يصرف على البيت و يشارك في تربية الولاد و و و الخ
    و المرأة أيضا عليها واجبات و لها حقوق ....

    أنا مع بيلا و بوسبوس فس كل اللى قالوه ....المرأة في بلدنا للأسف مش واخده حقوقها و بلاش الرجالة يفتكروا انى متحاملة عليهم لكن بجد ....بص للمرأة المصرية الحقيقة المرأة اللى بتشتغل علشان تجيب فلوس تساعد بيها جوزها و بتركب التوبيس و تتزنق جنب الرجالة و ييجي واحد رخم يضايقها و هي شايلة كيش الخضار في الاتوبيس و حتى لو واحد خلى عنده شوية نخوة من بتوع زمان و قام و قعدها بيكون حاسس انها واخدة حقه....
    و بعد كل ده تروح البيت في نفس الميعاد مع جوزها هو يدخل ينام و هي تقف في المطبخ تحضر الأكل و تأكل الولاد و بعدين تغسل الأطباق و تقعد تذاكر للولاد و باليل تجهز العشاء و تغسل الملابس و تجهز للأكل بتاع بكرة و تنظف البيت و تنام بعد كل ده ساعتين علشان تصحي تكمل و تدور في الساقية تاني ....
    بالذمة يبقى مين اللى يطالب بحقوقه ؟؟؟؟ و بعد ده كله تقولى يرجعوا الساعة واحدة و اتنين بالليل و يشتغلوا في الفاعل ؟؟؟؟

    يا ريت نبص لها بنظرة الانصاف بعيدا عن نوع كل واحد فينا
    تحياتي

    ReplyDelete
  17. الموضوع محتاج كلام كتييير للرد عليه
    بس انا للاسف مشغول كتيير قوي الايام دي .. انا بس معدي النهارده عشان اسأل وادحرج التماسي

    علي فكره انا مقطعتش الزياره الفتره اللي فاتت , انا بس مكنتش بعلق عشان ظروف المشروع مش اكتر

    ReplyDelete
  18. مش هقولك غير انك فتحت علي نفسك باب جهنم وانا بطالب بالمساوه
    وبعدين انت من نظرك ان المساوه اللي قولت عليها في موضوعك ده
    مش فاهمه بجد وعلشان مااطولش عليك انا مع كل كلمه قالتها
    بصراحه قالت اللي ممكن اي واحده تتقال وبتمني ان مايكونش ده تفكيرك عن معني المساوه"Bella"

    ReplyDelete
  19. ايوة كده رافع راسنا ربنا يكرمك
    وفعلا الى بيتكلمو عن المساواه امثال ايناس الدغيدى لا تمثل المراءه المصريه ابداااا
    ولو عيزين مساواة خلاص يجيبو الشقه ويدفعولنا المهر

    تحياتى

    ReplyDelete
  20. هههههههههههههههههه

    معلش اني بدأت التعليق بضحك لان التعليقات فعلا دمها خفيف اوي و تملي بقول دي سمة المصريين الاساسية ايا كانوا

    المهم بقي نتكلم جد شوية
    احنا اولا فيه مشكلة ازلية بنعاني منها ... مشكلة ان المجتمع يكون فيه سلبيات - زي اي مجتمع - و المشكلة ان صانعي القرار عايزين يفرضوا هوية ما علينا مش تبعنا خالص ... يقوموا يحاولا انهم يقدموا حلول للمشاكل الواقعية بس بمنظورهم هما ... منظور غير واقعي , تقوم الناس تقرف و تتريق علي المشاكل دي من اساساها - رغم انها واقعيه - و الحلول دي تعمل رد فعل عسي و نرجع لورا اكتر ما منتقدم خطوة في الحل
    دا اللي حاصل في نموذج ايناس و اقبال اللي بعتبرهم اكبر معاول في هدم قضية المرأة و تشويهها


    النقطة التانية , موضوع المساواه كمسطلح مش صح اوي
    اعتقد ان المصطلح الاصح منه هو " تكامل "
    ليه ؟
    لان الراجل مش زي الست ولا الست زي الراجل ... كل واحد له طبيعة و خلقة و حاجات كتيرة اوي مختلفة... يعني تملي تلاقي الرجالة ملهومش في التفاصيل ... مش يعرفوا الفارق بين اللون الفوشيا و البنفسجي ... او مثلا تلاقي فيه بنات كتيرة ملهومش في برمجة الكمبيوتر مثلا ... او مواصفات الهارد ... ( طبعا منكرش ان فيه رجالة اذواقهم رائعة و فيه بنات مهندسات كمبيوتر زي الفل ) بس انا بتكلم علي القاعدة العامة من كل نوع

    فيه مشكلة للستات ...اه فيه مشكلة ..هي في رأيي الجهل و عدم استعمال الدماغ و الظن ان وظيفةها الاساسية في الحياة انها تتعلم تطبخ و تتجز و خلاص ( طبعا دا مش فكرنا بس فكر طبقة عريضة جدا من المصريات الجاهلات اللي هما تحت خط الفقر و التعليم و هما اللاغلية دلوقتي اكتر من الطبقة الغنية و الوسطي معا ً ) و دول ا للي المفروض نوجه لهم اهتمامنا في الاساس

    و المشكلة اساسية ان الراجل بيفتكر ان الست طالما بطالب باشياء يبقي هي كدا عايزة تتحول راجل !
    لأ طبعا

    مش فاكرة فين ...لاقيت ان 75 % من بنات مصر عايزين يتجوزوا و يقعدوا ف يالبيت لانهم مش عايزين يتعبوا !!! يعني اللي احنا بنتكلم فيه دا مش الواقع الغالب ...

    بالنسبة لموضوع المجتمع الذكوري
    ما هو الست هي اللي بتربي ابنها انه متميز عن بنتها هو ميخدمش نفسة لكن هي تخدمة !!! هو يغلط و يشرب شجاير و عادي لكن هي لأ ؟؟؟ هو يسهر لوش الفجر و محدش يسئله كان فين و هي متخرجش من البيت اصلا ؟؟؟ انا فعلا عندي ناس كتيرة اعرفهم كدا ... يعني الست هي اللي بتخلق المجنتمع الذكوري دا بردوا ... مش كدا ولا ايه ؟؟؟

    عموما ... مقال كويس و عرفت لسة الشباب بيفكر ازاي

    ReplyDelete
  21. تحذير هام
    خلى بالك من نفسك يا زميل لأن شكلك كده هيتم اغتيالك على ايد حريمى
    هههههههههههههههه
    معلش بقى أنا مش هحط تعليق على الموضوع ده لأنه بقى للاستهلاك المحلى والفضائى
    مش طالبة وجع الدماغ ده كله
    الاسلام وضع قوانين وتشريعات لكل حاجة
    بس اللى يقرا ويتعلم ويفكر ويدور ويفهم
    بس طبعا بحييك على اختيارك لموضوعاتك
    تحياتى واحتراماتى صديقى العزيز

    ReplyDelete
  22. بالنسبة لحكاية أن الست هيا اللى بتريى وبتطلع المجتمع ذكورى أسمحولى أعلق على الموضوع هو فعلا فيه سيدات كتير بتعمل كده بس معلش بيتهيألى أن كل واحد لما بيكبر بيكون عنده عقل ويقدر يميز الصح من الغلط لكن للأسف الرجالة كلهم بيحبوا يعملوا تمييز وبيحبوا يخلوا المجتمع ذكورى واعتقد أننا كلنا عندنا وحوالينا أمثلة كتيرة بتقول كده

    ReplyDelete
  23. يا عم الراجل راجل و الست ست برضه و المساوة فى حقوق و واجبات لكنها مش زى ما انت فاهم كده
    يعنى فى اولا اه هى حرة تشتغل اللى عيزاه
    فى ثانيا مواعيد الشغل ماشى بس هى عندها دورها كست فى البيت ولازم تحافظ عليه
    فى رابعا لانه هو الراجل و ان كان ممكن تشاركه وتساعده فيها ايه يعنى
    خامسا لانه راجل برضه و لو ان الحكاية دى محيرانى برضه
    سادسا لا برضه ليها ما انت المسئول برضه

    يعنى هى فى النهاية الراجل راجل وله دوره والست ست ولها دورها و مش الحاجات دى اللى عايزين فيها مساواة اعتقد

    اما السجاير فمش فارقة ولد من بنت بيشرب سجاير

    ReplyDelete
  24. bella:
    وانا والله بتخنق من المناقشات بتاعة حقوق المرأة والكلام دة علشان كدة انا كاتب البوست دة كنوع من السخرية والتهكم على دعاة الموضوع دة
    فعلا انا متفق معاكي على ننا مجتمع ذكوري بيعاني من ازدواج المعايير فيما يخص ماهو حلال للرجل وحرام على المرأة
    بس انتي مش موافقاني ان احنا مجبرين على التعامل من خلال المعايير دي ولو تحدينا المعايير الاجتماعية دي هنبقى ناس فوضويين وخارجين على النظام العام؟
    اعتقد ان اي رجل سوي يعامل المرأة سواء كانت اخته او اوالدته او زوجته كما يجب ان يكون يعطيها حقوقها تماما
    اما من يعامل المرأة كمخلوق من الدرجة التانية فأعتقد انه بيكون شاذ فكريا
    مفيش اي اطالة ولا حاجة
    نورتي المدونة

    ReplyDelete
  25. bosbos:
    المشكلة يا بس بس ان امثال ايناس الدغيدي واقبال بركة وغيرهن هم اللي بيقدروا يوصلوا صوتهم لوسائل الاعلام المختلفة وبالتالي بيحسسوا الناس في مصر وبرة مصر ان هن دول سيدات مصر
    في رجال كتير بيساعدوا زوجاتهم في البيت بس بلاش نظلم الراجل لأن في حاجات مابيعرفش يعملها بكفائة الا السيدات فقط زي الطبخ وغيره وبالتالي هو بيعتمد عليها في الاعمال دي غصبا عنه
    وبعدين فين الرجالة اللي بيتجوزوا على زوجاتهم دول يا بس بس؟
    هي الناس لاقيه تاكل؟
    وبعدين على حد علمي وحسب ما اسمع يعني
    اللي بيتجوز مرة ما بيعملهاش تاني ابــــــــــــــــــــدا

    ReplyDelete
  26. bosbos:
    انا معاكي برضة ان احنا في مجتمع ذكوري
    بس اهو مجتمعنا وقدرنا.....هنعمل ايه بس؟
    زي اللي والده بخيل مثلا او سكري...هل هيقدر يبدله؟
    طبعا لا....انما هيتعامل معاه كما هو ويحاول اصلاحه قدر الامكان
    اما بالنسبة للستات المطحونات
    فدول لا بيبصوا على مساواة ولا يحزنون...الناس دي بتشقى علشان تحافظ على بيتها وجوزها وتربي عيالها وكدة رضا قوي كدة بالنسبة لهم
    كل اللي طالبينه ان ربنا يكملها بالستر
    تحياتي واحتراماتي

    ReplyDelete
  27. queen eraser:
    وعليكم السلام ورحمة الله
    زيارتك للمدونة شرف كبير...الف شكر ليكي
    طبعا جزئية المهر دي جزئية تهكمية ساخرة زي كل الموضوع لأن افتراض المساواة الكاملة بين الرجل والمرأة دي مستحيل
    كلامك مضبوووط وموزون تماما
    الف شكر ليكي
    تنوري في اي وقت
    تحياتي واحتراماتي

    ReplyDelete
  28. مش عارفة ليه يا احمد يا سمير يا خويا
    حاسة ان من الموضوعين الى انت كتبتهم فى الاخر دول
    انك هتغتال
    بصراحة حاسة انك سوف يقضى عليك
    انت حر
    براحة يا عم شوية
    المساواة مش كدة
    شوف حال الست من وجه نظر تانية شوفها من بلكونه تانية خالص
    هتلاقيها مظلومة فى حاجات كتير
    انا قلتلك رايى
    و على فكرة يا جماعة
    انا معرفوش و لا عمرى شوفته
    هههههههههه
    اى خدمة
    اصاله بقى

    ReplyDelete
  29. يعنى حضرتك معترف أهوة بردك عليا أن اللى بيطالبوا بالمساواة أمثال أيناس الدغيدى مش الناس العادية اللى زينا وهما اللى بيقدروا يوصلوا صوتهم طيب ما يوصلوا أنت فاكر باقى العالم مش عارفين أحوالنا عاملة ازاى وحتى لو خدوا الناس دى امثله لينا أحنا مالناش ذنب نتاخد بذنبهم صح ولا أيه
    يعن كان لازم توضح فى موضوعك أنك ما تقصدش كل الستات تقصد بس الأمثلة اللى ذكرتها صح ولا أيه


    وبعدين من ناحية أن الأزواج ما بيعرفوش يعملوا حاجات زى الطبخ والمطبخ وكده مش لازم يعنى لما الراجل يحب يساعد مراته يروح يطبخ مش قوى كده ممكن يعمل أى حاجة تانية يذاكر لأولاده أهو يشيل من عليها عبء كبير وكمان يحاول ما يبهدلش البيت ويرتبه على قد ما يقدر ومش قصدى انه بقى يجيب جردل بميه ومقشة وينزل كنس ومسح فى البيت لا قصدى يعمل حاجات بسيطة يقدر يعملها ويساعد بها مراته وفى نفس الوقت ما يحسش أن كرامته أتهزت فهمتنى


    أنا دلوقتى فى التعليق رقم كام لسة موصلتش مليون طيب كويس لسة بدرى لأنه لسة فيه كلام كتير

    ReplyDelete
  30. و لو
    المساواه ضروريه بلرضه يا احمد و مش لازم تتم بالشكل المبالغ اللي انت سخرت منه
    يعني مثلا..موضوع مين يتقدم للتاني في الجواز..فحقولك عادي جدا الراجل يتقدم بس تكون المشاركه بينهم في الحياه الزوجيه بالتسوي بمعني أننا منلاقيش الست قائمه بأعمال المنزل و تربيه الاولاد بالاضافه لعملها..لابد من مشاركه الرجل معها
    تحياتي لك

    ReplyDelete
  31. اولا انا اسف جدا على تأخيري ف التعليق على الموضوع بجد

    ثانيا انا حاسس انك فتحت على نفسك فتحة جامدة
    :D

    من خلال مروري على التعليقات السابقة واللي بصراحة مقريتهاش كلها
    دول ما صدقو يا عم يلاقو حد يفشو غلهم فيه

    شوف يا احمد انا مش بجاملك ولا حاجة بس كلامك ده واقعي جدا وهو ده الصح وانا شايف ان دول مجموعة ناس فاضية ومش لاقيين حاجة يعملوها
    وكمان انت بصراحة ذكرت اسمين من اسماء متبنين الحملة انا مش بكره ف حياتي ادهم
    اقبال وايناس

    انا اشوف العمى ولا اشوف الاتنين على رأي سمعة

    بحييك على الطرح ومعلش انا عارف ان تعليقي مش لب الموضوع اوي بس عشان انا بصراحة تعبان من المسألة دي جدا ولو اتكلمت مش هخلص
    تقبل تحيتي

    ReplyDelete
  32. ولتاني مرة بقولك شكرا على الاغنية اللي تعقد يا باشا
    جامدة اوي

    حلي للخواجة استكرادك
    سابك بتقرا ف اورادك
    وقشطك ونزل تشفيط
    """""""

    بعد اذنك يا احمد ياريت تبعتلي لينك للغنوة دي
    اكون شاكر ليك بجد
    :)

    ReplyDelete
  33. ازيك يااحمد

    اخبارك ايه؟؟

    بعد المناقشة الحامية دي اتفضل شوف اللينك ده

    http://afkaar-bella.blogspot.com/2007/06/blog-post_9925.html

    ReplyDelete
  34. أيه يا أحمد فينك من زمان رميت القنبلة وجريت أنا حاسة أن حد عمل فيك حاجة دخلت رديت وماكملتش ومانتاش باين أيه اللى حصل
    هههههههههههههههههههههههه
    ده أخرة اللى يعمل كده
    علشان تحرم
    أنا كتبت ثلاث مواضيع وأنت لسة عايش فى موضوعك ده ماليش دعوة هاترد على الثلاثة
    هههههههههههههه
    تحياتى لك وأرجع بقى من المنفى اللى أنت فيه ده

    ReplyDelete
  35. TO ALL FRIENDS:
    الف شكر على الكومنتات الغالية دي وبأخص بالشكر بس بس
    اللي بذلت مجهود كبير جدا والله في الرد
    انا بعتبر ان المناقشات القيمة دي ابلغ من اي رد ممكن اكتبه لكل كومنت على حدة
    وفي الاخر اقول:
    وصلني طلب من 80 عضو بقفل باب المناقشة
    موافقة
    ننتقل لجدول الاعمال

    ReplyDelete
  36. بقى كده
    طيب ياسيدى أنا موافقة نقفل باب المناقشة بشرط تعلق على المواضيع اللى عندى
    ههههههههههههههه
    وبعدين هما مين ال80 عضو اللى طلبوا منك تقفل باب المناقشة طبعا انا مش واحدة منهم
    وكمان أيه الدكتاتوريةدى بتقول نقفل باب المناقشة المفروض تستنى الباقى يقول موافقة أنت فى مجلس الشعب ولا ايه
    هههههههههههههههههههههههه
    بترد على نفسك
    تحياتى لك وبلاش تشكرنى لا شكر على واجب والموضوع فعلا كان يستحق أنى أعلق أكتر من مرة
    تحياتى لك

    ReplyDelete
  37. تدوينة رائعة

    وحتى نفيق من نظرتنا الذكورية لجميع النساء لن يتغير الكثير حتى هذا الوقت ...

    تحياتي

    ReplyDelete
  38. دول شوية نسوان فاضيه... وبعيد عنك من ابشع الحاجات في الدنيا الست الفاضيه بالذات لو افقها ضيق...
    والله لسه من كام يوم اختلفت مع واحده صديقتي ... هي سعيده اوي ان الستات بقت تشتغل قاضي ... ماشي الست تبقي قاضي علي عيني وراسي بس ايه بقي المعجزه ان الست تشتغل قاضي والا سباك والا ميكانيكي؟؟؟ يعني ايه هيتغير في المجتمع؟؟؟ وبقية الستات كسبت ايه لما ٣ ستات والا مليون ست اشتغلوا قاضي؟؟؟ خلاص بقي الناس لقت الاكل والشرب لما الست اشتغلت قاضي؟؟؟وخلاص بقي مشاكلنا كلها اتحلت رايحين يحزقوا اوي عشان يشغلوا الستات قاضي!! تلات تربع مشالنا ممكن تتحل لو الستات قعدت في بيوتها وبطلت تشتغل
    احسب انت كام ست في بلدك بتشتغل وشوف كام شاب ممكن يشتغل مكانهم... هي صحيح قعدة البيت منغير لا شغلة ولا مشغله تزهق والكتمه وحشه بس في الف حاجه ممكن تتعمل

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails