Friday, 22 June 2007

نظرة سلبية


عارف كويس قوي ان الموضوع دة هيزعل بنات وسيدات للأسف عددهم اصبح كبير

وعارف كمان ان في عدد من الرجال هيزعلوا برضة بأعتبار ان زوجاتهم او والداتهم بيعملوا كدة
عارف برضة ان عدد من الشباب والبنات ممكن يقولوا عليا اني متخلف ومش مودرن وربما همجي
عارف كل دة بس مضطر اني اقول اللي في نفسي
انا لا احترم على الاطلاق المرأة المدخنة
ايا كانت بقى المرأة دي ايه
سواء بقى كانت بنت او ست كبيرة....بتسقط من نظري فوراااااا
سامع حد بيقول لي اشمعنى كدة....ايه علاقة التدخين بالأخلاق والاحترام؟
مفيش علاقة مباشرة بين التدخين وفساد اخلاق البنت....انما بدون سبب حقيقي اول ما عيني بتلمح فتاة او سيدة بتدخن بأحس على طول بمشاعر سلبية تجاهها
ممكن جدا وبتحصل ان تكون الفتاة او السيدة المدخنة لابسة ملابس في غاية الاحترام ومحجبة كمان انما منظرها وهي ماسكة السيجارة وبتدخنها منظر في منتهى السوء بالنسبة لي على الأقل.
بس على فكرة
مش انا لوحدي اللي بحمل المشاعر السلبية دي تجاه الفتيات والسيدات المدخنات انما عدد كبير جدا ربما يكون اغلبية الشباب لا يحترموا البنت او السيدة المدخنة
على الرغم ان
منظر المرأة المدخنة انتشر بشدة في القاهرة وخاصة في المولات والكافيهات بس مش عارف دة من ايه؟
ايه اسباب تزايد اعداد السيدات المدخنات؟
هل للوسط الفني المعروف انتشار السلوكيات دي فيه علاقة بتزايد اعداد المدخنات؟
ولا دي من مظاهر المساواة بين الرجل والمرأة؟
بس يبقى نصيحة مهمة اقولها لأي فتاة او سيدة بتدخن
نظرتنا كشباب و رجال تجاهكم فعلا لو عرفتوها مش هتكونوا مبسوطين على الأطلاق
معلش انا أسف لو اي مدخنة استفزها الموضوع دة
...بس يبقى كويس برضة لو شرحت لنا وجهة نظرها.....يمكن اكون انا اللي تفكيري متخلف اكتر من اللازم

70 comments:

  1. أنت مش غلطان فى كل اللى قلته وأنا عن نفسى كبنت مع رفضى التام للسجائر سواء للشباب أو البنات بس فعلا الحكاية بتبقى مقززة جدا بالنسبة لأى بنت وأنا عن نفسى مابحترمش أى واحدة كده ممكن أقبلها على شاب وأنا هنا مش بتكلم عن الحرام والحلال ولا وجهة نظر الدين لكن بتكلم عن نظرتنا العادية أنا فعلا بكره البنت أو الست اللى بتكون كده

    ReplyDelete
  2. سمير باشا المقال ده ذكوري جدا :)...التدخين عادة سيئة جدا سواء للولاد او البنات..انا معاك ان البنت المدخنة شكلها بيكون مستفز لناس كتير وبيعتبروها مش محترمة..لكن ده عشان تدخين البنات عاده غريبة علينا
    احنا خدنا على ان الولاد تدخن لكن البنات ما شوفنهاش قبل كده عشان كده بنستغربها ومابنقبلهاش
    ده رائي...التدخين عاده سيئة ولكنها مالهاش دعوة باخلاق صاحبها سواء ولد او بنت
    الصراحة انا باتعامل مع بنات مدخنة كتير في شغلي..لكن في حدود علاقتنا كزمايل في الشغل مابشوفش اي مشكله طالما دي حريتها الشخصية ومش هتأثر عليا في حاجة...هي راضيه واهلها وخطيبها او زوجها او اهلها ماعندهمش مشكلة..خلاص براحتها

    ع المستوي الشخصي..انا محبش ان بنت تخصني انها تدخن..انا مش هكون مرتاح لانها تخصني وامرها يهمني لكن بقية الناس مل بشغلش بالي اوي

    تحياتي ليك ياباشا
    محمد سمير

    ReplyDelete
  3. انا مبحبش المنظر ده بس مش موافقة ان يكون ده مقياس احترام او عدم احترام ، انا ارفضه و لكن لا يؤثر على حكمى على الشخص

    ReplyDelete
  4. البنت اللي بتدخن شكلها بيكون مستفز اكتر عشان احنا اتربينا واهلنا اللي معضمهم في سن الخمسينات وانت طالع علي ان البنت مينعش تعمل حاجات كتير مع دخول مساحه ليست بيهنه علي مجتمع البنات طبيعي هيكون فيه سلبيات كتير ناتجه عن فهم خاطئ للحريه وعلي العلم في بنات كتير بتدخن لمجرد العند يعني تبقي عارف ان شكلها مضايقك وهي ماسكه السيجاره بس بضايقك
    بس حقيقي كنت احب ان البوست يكون رساله للبنات والاولاد
    لسا في مواضيع كتيره الولد بيبصلهي علي انها مش عيب لو عمله والبنت عيب رغم لا دين ولا اي حاجه غري عادتنا قالت كدا والعادات دي احنا اللي بنعملها مش قران نلتزم بيه
    الصح في القول التدخين دا بشع جدا علي صحه البنت والولد

    ReplyDelete
  5. ياسيدي ولا يهمك انت عمال تعتذر تعتذر
    انت بس خالط الامور ببعض شوية
    انت ممكن تكون مبتحترمش البنت مش عشان بتدخن لان التخين للبنت ميفرقش كتير عش شرب فنجان قهوة
    بس انت ممكن تكون مبتحترمهاش عشان هي عملت حاجة المجتمع اللي حواليها مابيتقبلهاش وبالتالي فعدم الاحترام ناتج عن الشذوذ والغرابة في الفعل مش البذائة في نوع هذا الفعل
    نصيحتي ليك مع أني اتنططت شوية في مدونتك وشايفك شخص مفكر مش محتاج نصايح من حد
    لما تلاقي بنت بتدخن بعد كده تخيل ان ده مجرد فنجان قهوة مش سيجارة والموضوع كده هيعدي
    تحياتي لك ولمدونتك الجميلة

    ReplyDelete
  6. موضوع واقعي جدا

    وانا كمان بضم صوتي لصوتك يا احمد
    فعلا المنظر مقزز لغاية سواء للبنت او للولد
    وده مهم جدا ان الاتنين على حد سواء مش فارقة اذا كان اللي بيدخن ولد ولا بنت
    التدخين عادة قذرة وخلاص
    على فكرة انا معظم مشاكلي مع اخوية الكبير بسبب انه بيدخن وانا مش بقبل ريحة السجاير خالص
    فاليوم اللي بيزورنا فيه وييجي يدخن تبدأ بقى المعارك الكلامية بيني وبينه
    وتنتهي بزعلة
    :)
    بس برجع اصالحه يعني مهو انا الصغير بقى
    :D

    أحييك على الطرح المتميز

    وعلى فكرة زيارتك لمدونتي الغلبانة فرقت معايا كتيييييييييييييير جدا
    اتمنى انها تتكر
    تحيتي لك

    ReplyDelete
  7. أن ُيختصر الحكم على البنت في التدخين وأن يتم تقييمها من أنها محترمة أو غير محترمة من ناحية تدخينها أو عدم تدخينها إسمحلي نظرة سطحية

    التقييم الظاهري أيا كان وإلقاء الغتهامات جزافا فيه ظلم كبير وخلل كبير

    من الممكن ان يكون إنطباعك ذلك ناتج عن عدم تقبلك للفتاة التي تدخن في مكان عام على اساس انه غير مقبول إجتماعيا في تلك الحالة مفترض ان يكون رايك هذا يشمل التدخين بشكل عام سواء للرجال او النساء ولكن إقتصاره على الفتيات فقط فيه ظرة ذكورية واتأثير المجتمعي اللي إننا تعودنا على أن الرجل يدخن لكن الست لأ وبالتالي أصبحنا أناس نتعامل مع الامور بمنطق العادات والتقاليد وليس من منطلق إدارة العقل وتقييم الأمور بشكل صحيح

    وهل عندما تدخن المراة سيجارة في منزلها ولا تدخنها امام الناس تصبح أيضا إمرأة غير محترمة

    ReplyDelete
  8. انا بصراحة اتفق معاك فيما تقولة وبالنسبة لي فأنا والله بحتقر الرجل او السيدة الذين يدخنون لانهم اغبياء بل في منتهي الغباء لان علبة السجاير مكتوب عليها كلمة ضار الصحة و تسبب الوفاة ومع ذلك نجدهم بيشريوها يعني منتهي الغباء والواحد بيتغاظ اكتر لما بيسمع اي واحدة بتدخن او لابسة ملابس مش ولا بد تقول انها حرية شخصية طيب ونبي ازاي دة حرية شخصية مع ان التدخين و الملابس العارية كلهم حرام المفروض طالما الحاجة حرام يبقي مافيش حرية شخصية ومش حرية شخصية تحياتي ليك واتمني لك التوفيق

    ReplyDelete
  9. BOS BOS:
    بالضبط يا بس بس
    بس اللي بيزعل فعلا هو انتشار الظاهرة دي بشكل مش طبيعي
    تحسي انها موضة ويا ريتها موضة حلوة
    تحياتي لكي

    ReplyDelete
  10. احمد باشا
    بجد موضوع قيم جدا رغم الللمحه الذكوريه واعتقد ان التدخين غير نافع للجميع ليس للسيدات فط ولكن للرجال ايضا ولكن المجتمع العربي اعتاد علي تدخين الرجل ولن يعتاد علي تدخين المرأه وكلاهما خطا

    ReplyDelete
  11. غمض عينيك:
    انا مابقولش يا محمد ان التدخين عادة مش سيئة هي فعلا عادة سيئة للولاد والبنات ولأي حد
    انما العرف والمجتمع والتقاليد قالوا ان مش كل حاجة ممكن يعملها الولد تعملها البنت
    انا ش متحيز والله خاصة ان تدخين السجاير مش ميزة خالص
    انما ماعتقدش ان بنت نفسيتها سوية واخلاقها فوق مستوى الشبهات وتلاقيها بتدخن
    ماشفتهاش قبل كدة
    وبعدين اللي بتدخن دي فعلا بتحط نفسها في مواضع شبهات
    طب هسألك سؤال
    ا>ا كان التدخين مالوش علاقة بأخلاق البنت
    ليه ماتقبلش ان اي حد يخصك يدخن؟
    تحياتي ليك

    ReplyDelete
  12. PAKINAM NASSER:
    انتي فينك من زمان؟
    حمدا لله على السلامة وعود احمد
    بس انتي كبنت مش هتقدري تتخيلي مدى نظرتنا كشباب لبنت بتدخن
    على فكرة
    حتى لو هي محترمة جدا واخلاقها فوق مستوى الشبهات الا ان بالسيجارة اللي ماسكاها في ايدها دي بتحط نفسها في مواقف ومواضع مش محترمة خالص
    تحياتي لكي

    ReplyDelete
  13. رفض تام للسجاير بانوعها وللنساء والرجال

    دي عادة سيئة ومدمرة صحيا وماديا

    وحرام كمان

    ReplyDelete
  14. MESTEKA:
    الغرض من البوست مش ان الصبيان حلال لهم التدخين وحرام على البنات
    لا طبعا...التدخين سيء في كل الاحوال ولكن انا بتكلم بشكل خاص على البنات المدخنات لأن الموضوع بيبقى شكله وحش فعلا
    الف شكر على المشاركة القيمة
    تحياتي واحتراماتي
    احمد سلامة:
    فعلا بحس ان تدخين البنت دة شذوذ فكري
    والله الموضوع مش ذكوري ولا حاجة بس يمكن ان احنا اتعلمنا ان تدخين البنات دة شيء مش سوي خالص
    تحياتي لك......نورتني

    ReplyDelete
  15. KASPERB4:
    مع كامل اترامي رأيك يا كاسبر الا ان في فرق كبير قوي بين الولد المدخن والبنت المدخنة
    معاك ان التدخين في حد ذاته سلوك مش صحي الا ان تدخين البنت تحول من عادة غير صحيه لشذوذ اجتماعي
    اشكرك على كلامك الرائع دة
    اخجلتم تواضعنا
    تحياتي ليك

    ReplyDelete
  16. AHMED SHOKIER:
    طبعا مش بس التدخين هو الي يخلينا نحكم على بنت ما انها محترمة ولا لا..
    بس التدخين بيدينا انطباع سلبي للغاية عن الفتاة دي وبيخليها مطمع وعرضة للتحرش لأن منظر السيجارة في ايد اي بنت منظر مش اخلاقي على الاطلاق
    طبعا يتوي في ذللك التدخين فيالبيت زي التدخين في الاماكن العامة
    معلش دة رأيي وزي ما انت قلت دي فعلا عادات وتقاليد واعتقد انه مطلوب مننا احترام العادات والتقاليد دي
    تحياتي واحتراماتي

    ReplyDelete
  17. عمرو غريب:
    ازيك يا عمرو
    طبعا التدخين بشكل عام سواء للرجل او الست ضار وسيء
    بس فعلا هناك فرق بين رجل بيدخن وسيدة بتدخن
    بالنسبة للرجل احنا بنعتبرها حرية شخصية اما بالنسبة للمرأة فأحنا بنعتبر دة سوء سلوك
    تقريبا هي العادات والتقاليد
    تحياتي ليك

    ReplyDelete
  18. متععمش بس وتقول"الشباب ونظره الشباب" وجهتك نظرك انت حر فيها
    مع انها فعلا شرقيه سطحيه خفيفه الى معتدله السبب الاساسى فيها الدراما

    ReplyDelete
  19. عندك حق في كل الكلام ده
    الموضوع ده انتشر في الجامعات ايضا

    ReplyDelete
  20. رغم ان التدخين مش بيكون بمثابة حكم قاطع على الشخص
    الا انى مؤيدة لفكرة عدم تدخين البنت بصراحة بيكون شكلها مستفز
    منور بمواضيعك والله يا أبو الدكاترة

    ReplyDelete
  21. السلام عليكم و رحمة الله و بركاتة

    و الله الموضوع دا مثير للجدل بشدة و بتتضح فيه تأثير العادات و التقاليد بشدة حتي لو بعض الناس رفضها او تجاهلها

    بس زي ما فيه فئة من الاولاد بتبص علي البنت اللي بتدخن انها بنت غير محترمة

    انا ببص علي الشاب اللي بيدخن علي انه ولد غير محترم و سوري ف ياللفظ ناقص رجولة لانه حتة زمارة متحكمة فيه و مش قادر يبطلها ... و فيه بنات غيري كتير كدا علي فكرة

    و اللي بيتكلم عن النظرةوالذكورية , فاللي عملها البنات من اساسة :) انها بتغفر للولاد حاجات لكن العكس لا يحدث نظرا لاشياء و عادات و تكوينات كتيرة جدا اتربينا عليها و صعب تتغير بين يوم و ليلة

    بس عامة يعني اللي اعتقده
    البنات لو لجئت اللتدخين ممكن تكون بتلجأ له لما نفسياتها تتعب اوي ( في المستوايات المنخفضة اوي او المرتفعة اوي و نادرا في الوسط )

    و انا اسمع اساسا واحدة دخنت من جوزها
    لان زوجها كان بيعزم عليها من باب انهم اصحاب يعني :)

    البنت اتربت اساسا علي انه في فارق بين الولد و البنت و انه فيه تفرقة في المعاملة ... مهما قولنا انه صح ولا غلط و لكن دا واقع الكثير من البيوت المصرية ...
    و النظرة دي كويس انه شاب قالها كي يثبت بها موقف ...

    خالص تحياتي

    ReplyDelete
  22. بص يا سمير

    مانكرش ان انا كمان بيكون عندى نفس الانطباع ده ....بس انا برده شايفه انه انطباع غلط جدا جدا جدا

    لان السجاير دى وحشة على الراجل والست
    مش فاهمة ليه بقى الست بالذات بيبقى منظرها وحش والراجل شكله قمر وهو بيشربها
    فرقت ايه يعنى الراجل عن الست ....اتنين بيحرقوا فى صحتهم ...لكن ما قولش بقى دى اخلاقها وحشة

    على فكرة انا بكلم نفسى قبل ما اكلمك ...بجد نفسى اعرف انا كمان ليه باخد الانطباع ده عن الست المدخنة...بعد اذنك سيبنى اتخانق مع نفسى شوية:)
    بوست جميل
    تحياتى

    ReplyDelete
  23. طب هل بتحترم الرجل المدخن؟
    ولا هو كمان بتربط ما بين تدخينه والأخلاق والإحترام؟
    هل الرجل المدخن هو كمان بيسقط من نظرك؟

    أنا مش شايف إن التدخين ليه علاقة بأي حاجة
    التدخين عادة ضارة وأتمني كلنا نبطلها
    ولو نظرة الولد للبنت بتتحدد عن طريق إذا كانت بتدخن ولا ﻷ
    يبقي البنت مش محتاجاه ينظرلها أساسا

    تحياتي

    ReplyDelete
  24. التدخين فى حد ذاته وحش من الاتنين
    ومش بيحترموا الناس اللى بيكونوا قاعدين جبنهم
    وطبعا الاعلام له دور كبير فى الكلام ده
    اخر احصائية للصحة العالمية مصر كل ساعة بيزيد فيها مدخن جديد
    يعنى ده كارثة والشرق الاوسط من اكبر الدول المستهلكة للكبريت والتبغ
    وعلى فكرة قبل ما تلوم البنت لوم البيت لان البيت اللى بيكون فيه اب مدخن بالتالى بيطلع الواد مدخن والبنت عندها استعداد للتدخين لانهم بيكونوا متعودين علها سلبية فى اول فرصة هتكون مدخنة
    انا بقى بأضايق من المدخنين الاتنين البنت والولد والاتنين بيكون شكلهم وحش مش بيكونوا بنى ادمين لا بيكونوا مدخنة متحركة
    تحياتى لحضرتك

    ReplyDelete
  25. محمد مفيد:
    يا محمد بك...الف شكر لك على تشريفك لمدونتي المتواضعة بالزيارة
    طبعا الموضوع مش على اضرار التدخين لانها معروفة طبعا
    انما عن ظاهرة تدخين المرأة
    فعلا اعتقد انها لمحة ذكورية ولكنها راجعة للعادات والتقاليد اللي بتمنع كدة تماما
    تحياتي ليك نورتني
    كراكيب عادل:
    احنا مش مختلفين عن رفضنا للجاير والتدخين
    انما انا بتكلم عن تدخين المرأة بشكل خاص لأنها بتدخينها دة اعتقد انها بتحط نفسها في موضع شبهات هي ممكن ماتكونش في الموضع دة
    تحياتي ليك

    ReplyDelete
  26. elkamhawi:
    لو تبنينا موضوع الحرية الشخصية دي يبقى نقفل جميع المدونات على شبكة الانترنت ومحدش هيتكلم بعد كدة في اي موضوع على اساس ان دي حرية شخصية
    وبعدين يعني ممكن الناس تمشي في الشارع عرايا لمجرد انها حرية شخصية؟
    شكرا لك

    ReplyDelete
  27. saso:
    واضح انك واخدة فكرة غلط عن الشباب
    الشباب على فكرة لا يحترم النوع دة من البنات على الاطلاق
    واذا كانوا قدامهم بيعبروا لهم عن الاعجاب والتقدير فأنا عايزك تكوني متأكدة ان في قعداتهم لوحدهم بيكون لهم رأي مختلف تماما في النوع دة من البنات
    على فكرة ممكن فعلا تكون نظرتي سطحية ومالهاش منطق بس تأكدي والله انها نظرة واقعية
    تحياتي واحتراماتي

    ReplyDelete
  28. ابراهيم عز الدين:
    يا ريته في الجامعات بس
    دة كمان ي الكافيهات والمولات
    فعلا
    واضح ان الوسط الفني أثر على سلوك الناس
    تحياتي ليك....نورتني

    ReplyDelete
  29. VOICE OF LOVE:
    DALIA......MY COLLEGE
    الف شكر ليكي
    المنورة طبعا منورة بيكي وبكل اللي بيحب يشاركني الأراء سواء اتفق معايا او اختلف
    تحياتي ليكي وربنا يوفقك

    ReplyDelete
  30. شمس الدين:
    خلينا مانبالغش كتير او ننساق للحديث عن ذكر وانثى
    طبعا مع كامل احترامي لرأيك الا ان بالتأكيد النظرة للرجل المدخن غير النظرة للفتاة المدخنة على الاطلاق
    طبعا مش بدافع عن المدخنين ولا حاجة بس انا بأقر واقع
    وبعدين تعالي اقربها لك شوية
    لو واحد اتقدم لخطبة فتاة ولقاها بتدخن ....بنسبة 95%هيرفض يتمم الخطوبة
    انما لو شاب اتقدم لفتاة وكان بيدخن....بنسبة 5%بس هيترفض علشان هو مدخن
    يارب يكون المثال واضح
    بس انا اعتقد ان سواء البنت المدخنة كانت مستوى اجتماعي منخفض او عالي جدا
    اعتقد في الحالتين هو نوع من سوء التربية
    تحياتي واحتراماتي
    نورتي المدونة

    ReplyDelete
  31. NERMEEN:
    ازيك يا نرمين اخبارك ايه؟
    انا فعلا قلت ان ظرتي لبنت او السيدة المدخنة ليس ليها ما يبررها
    بس هو دة الواقع
    في حالة من الرفض للسلوك دة من البنت بيقابله مشاعر عادية وغير ملفتة للنظر خالص لو السلوك دة من شاب؟
    عايزين حد من اساتذة علم الاجتماع يفسر لنا الموضوع دة سببه ايه؟
    تحياتي يا نرمين

    ReplyDelete
  32. THE ALIEN:
    صراحة احترام الرجل مالهاش علاقة كون انه بيدخن او لا...
    دي حقيقة
    تدخين الشاب لا يلفت النظر انما لو فتاه او سيدة هي اللي بتدخن بتلاقي نظرات دهشة واستنكار وفضول من كل اللي في المكان
    طبعا التدخين عادة ضارة للجميع بشكل عام
    دي قاعدة متفقين ليها جميعا بس طبيا
    انما بقى اجتماعيا
    التدخين سلوك مرفوض تماما من قبل البنات
    تحياتي واحتراماتي

    ReplyDelete
  33. اماني:
    يا اماني انا مش بدافع عن التدخين بلنسبة للشباب
    التدخين ضار على كل الناس
    انما انا بتكلم على تدخين الفتيات من حيث انه سلوك اجتماعي
    معظم الناس بتقر ان السلوك دة سلوك مرفوض وغير سوي
    تحياتي ليكي
    نورتي المدونة

    ReplyDelete
  34. انا لا احترم المرأة المدخنة
    و ده ميعنيش انى بحترم الراجل اللى بيدخن

    ReplyDelete
  35. والله نا كمان من نفس الراي
    انا مش بحترم اي واحده بتدخن
    ولابحب اشوف واحده ماسكه سيجاره في ايدها وعمال تتمزج بيها وضع مش مريح اصلا وصوره مش مظبوطه
    ولااعرفلها سبب
    بس في واحده سالتها قالتلي من كتر همومي بطلع غيظي في حاجه سبب مش اقنعني
    وبعدين انا شوفت واحده تانيه
    بس هيا مش عندها هموم بردو كتير اوي للدرجه دي بس عذرتها لانها اصلا مش مصريه واصلها اجنبي فقولت عندهم كده عادي لكن كسبب في مصر بالذات
    ممكن لانهم مقتنعين ان ده بيديهم شكل اجتماعي خصوصا في الطبقه الهاي كلاس اوي
    في قعدتهم الشيشه دايما موجوده
    يبقي اشمعني السيجاره بقي
    ومعتقدش انها نوع من انواع المساواه لانها تبقي قله عقل يعني لو ده السبب

    ReplyDelete
  36. انا معاك تماما في الكلام ده .. ومعتقدش انك مضطر تبرر او تعتذر بقدر ما المرأه المدخنه مضطره لاعطاء اسباب بدلا من الاستياء من كلامك



    بس في الغالب دي بقت موضه .. البنت بتدخن تفاحه عشان تبان روشه
    والست بتدخن سجاير عشان تبان قويه و مفيش فرق بينها وبين الراجل

    ReplyDelete
  37. تحياتي

    طبعا التدخين عليه مأخذ كثيرة..بالنسبة للجنسين... لكن مع احترامي و تقديري لشخصك و رأيك ، اسمح لي ان اقول:

    1ـ ان الحكم علي الشخصية او الاحترام أو عدم الاحترام من التدخين...هو حكم غير دقيق...و القياس هنا في غير محله.

    2ـ أهل علم المنطق يقولون : إن صدقت المقدمات صحت النتائج... و من هنا أقول ان المقدمات تختلف من فتاه الي أخري كما هي مختلفة من شاب الي أخر.

    المهم هي طريقة التدخين..و مكان التدخين
    و وقت التدخين.

    مثلا: هناك طرق استفزازية للتدخين يستخدمها الاولاد و البنات للفت الانظار اليهم .

    مكان التدخين...لا يصح ابدا ان نري المدخنين يجوبون الشوارع و يعرضوا غيرهم
    لخطر التدخين السلبي كما في المواصلات العامة و الاماكن العامة المغلقة كالسينمات...و شوارع وسط البلد المزدحمة بالبشر....و هذا ينطبق علي الاولاد و البنات.
    وأفضل شيء لمن يرغب في التدخين ان يكون في اماكن مخصصة لذلك كالمقاهي.

    وقت التدخين...ان تري الشباب في وقت متأخر يتسكعون و يدخنون... منظر غير مستحب.

    أخيرا....التدخين له مضاره التي يعرفها الجميع...و قد يكون تعود عن طريق والدين مدخنين.

    في بعض البلاد العربية البنات تدخن الشيشة عادي امام الاهل...في المنازل و المقاهي...
    وهذا ممقوت..

    التدخين ابتلاء...و إذا بليتم فاستتروا


    اؤكد ان التدخين ظاهرة سلبية و ممقوته
    لكنها لا تصلح كوسيلة للحكم علي فتاه او شاب.

    تحياتي و أشكرك علي سعة صدرك.

    ReplyDelete
  38. السلام عليكم
    التدخين مضر للجميع
    بس احنا عندنا قوالب نمطية في المجتمع اثرت على اذهاننا وطبيعة رد افعالنا باتجاهها فإما نقبلها رغم عدم قناعتنا بها او رفضها رغم منطقيتها
    الولد يدخن = البنت تدخن
    ليس للفن علاقة مباشرة لكنه مؤثر نوعا ما
    انا ضد التدخين جملة وتفصيلا لكن استهجنه للفتاة وبنفس الوقت لا يؤثر على تقييمي الشخصي لها. الاخلاق ليست مربوطة بفلتر سيجارة رغم الصورة النمطية بالاعلانات والافلام لتلك الفتاة المستهترة واحمر الشفاه ممسكتا بسيجارة

    ReplyDelete
  39. السلام عليكم
    على فكرة ،البحث عن بنت دماغها حلوة مسألة اصعب من البحث عن مسلم في الفاتيكان مش صحيحة ابدا انت الي مش بتشوف كويس : )

    ReplyDelete
  40. انا دخلت الموضوع ده مره وقريت وقريت الردود كمان واعقدت افكر ارد عليك اقولك ايه؟
    اللي وصلته ان كل واحد حر في رائيه انت حر ماتحبش البنت المدخنه او المراءه المدخنه بصفه عامه
    بس هقولك علي حاجه دلوقتي ماعتش حد بيبص للبني ادم انت ماسك ايه في ايديك بتشرب سجاير او غيرها دلوقتي بيشوف العقل اللي قدامك كبير وناضج واضح وصريح ولالأ انا عائلتي كلها بدون استثناء ستات او رجاله بيشربوا سجاير بس تعال تعامل معاهم هتلقيهم احسن الناس يعني اللي ممكن تتعامل معاهم بصراحه انا شايفه موضوع بحب او بكره دي مسأله نسبيه بالنسباله لحياتنا لان كل واحد هو حر في حياته مش معقوله علشان بنت زميلتي بتشرب سجاير اعمل عليهااكس يعني مش ممكن ايه اللي هينقصها انها ماسكه حاجه بتولع وبتطلع دخان طب ماانتم يارجاله فيكم حاجات احنا كمان مابنحبهاش يعني مساله الحب والكره في الاشياء اللي ممكن تكون متعاده او من العادات بتبقي مسأله نسبيه دا بالنسبالي
    وبصراحه الموضوع استفزني واذا كان علي مين يقنعك انا اقنعك بس ايديا وجعتني من كتر الكتابه ربنا يوافقك ياسمير

    ReplyDelete
  41. انا باحترم رأيك طبعا
    ومش هاخبي عليك انا كمان مش باكون مبسوط لما باشوف بنت بتدخن
    بس لو هانتكلم صح
    البنت كيان مستقل ذيه ذي الولد بالظبط وليها حريتها اللي المفروض محدش يحددهالها في حاجات معينة
    براحتها بأه تشرب سجاير متشربش دي حاجة تخصها لوحدها

    امبارح شفت فيلم تيمور وشفيقة .. ياريت تتفرج عليه هايوريك أد ايه الراجل المصري بيتحكم في حرية البنت

    تحياتي على صراحتك في البوست ..

    ReplyDelete
  42. علي فكره انا زيك لا احترم المرأه المدخنه برضه
    تحياتي

    ReplyDelete
  43. SHARM:
    زي ما قلت قبل كدة يا شارم
    انا هنا مش بتكلم ان السجاير حلوة للرجال وحشة للبنات
    انا بتكلم اجتماعيا على نظرة امجتمع لحاملة السيجارة
    بس
    تحياتي ليك

    ReplyDelete
  44. may:
    تحياتي ليكي
    رأيك فعلا هو اللي انا قصدت من خلاله اعمل الموضوع دة
    نظرتنا تجاه البنت او الست اللي ماسكة سيجارة في ايدها نظرة سلبية تماما
    ممكن جدا تكون البنت دي على درجة عالية من الاخلاق والتربية ودة وارد جدا طبعا..بس ليه احنا بصينا لها في الاول نظرة زي كدة؟
    ومين اللي هبعرف انها شخصية محترمة...اكيد اللي عارفينها معرفة شخصية بس
    انما كل اللي كانوا قاعدين في المكان اللي كانت بتدخن فيه ومايعرفوهاش
    هتفضل نظرتهم لها في منتهى السلبية
    تحياتي واحتراماني

    ReplyDelete
  45. meshmesh:
    ازيك يا مشمش عامل ايه؟
    انت فينك ياعم منزمان مش متابع ليه؟
    عموا رأيك متطابق مع رأيي تماما
    بس اعتقد ان التدخين لو علشان المساواة
    تبقى مشكلة كبيرة عندهم
    تحياتي واحتراماتي

    ReplyDelete
  46. الربان:
    الف شكر ليك على تفضلك بزيارة مدونتي المتواضعة
    بالنسبة لأن الاحترام لا يكون بلسيجارة...موافقك تماما ولكني هنا بتكلم عن انطباع اولي بيؤخذ على الفتاة المدخنة قد يكون خاطىء تماما ولكنها بتحط نفسها في دايرة من الشك وعدم الاحترام
    انا مختلف معاك في ان الفتاة المدخنة منظرها بيكون سلبي جدا سواء في البيت او الكافيه او الشارع او لوحدها في اوضتها
    فعلا منظر البنت المدخنة منظر مشمئز جدا
    تحياتي واحتراماتي

    ReplyDelete
  47. NANI:
    معلش انا بختلف معاكي
    الولد بيدخن مش زي البنت تدخن خالص
    صحيا...كلامك سليم تماما
    انما اجتماعيا..لا والف لا..منظر الولد اللي بيدخن لا تلفت نظر اي حد انما منظر البنت المدخنة بيكون ملفت بشكل كبير جدا وللأسف الشديد هو ملفت سلبا وليس ايجابا
    ممكن فعلا يكون السبب هي العدات الاجتماعية او الاعلام اللي اعطى الانطباع دة للناس
    بس الحقيقة ان الانطباع دة اصبح واقع وموجود ولازم نتعامل معاه على هذا الاساس
    بالنسبة للبنت اللي دماغها حلوة والفاتيكان
    هو وجود مسلم في الفاتيكان مسألة مش مستحيلة بس صعبة
    وهي دي الفكرة
    البحث عن بنت دماغها كويسة وعرفت تهرب من هيافات الايام دي مسألة برضة صعبة بس اكيد مش مستحيلة
    تحياتي ليكي نورتي المدونة

    ReplyDelete
  48. MEROOO:
    جايز يا ميروو انتي بتتكلمي من منطلق انك عايشة برة
    ودة عادي جدا جدا هناك ولا يلفت نظر اي حد زي انتي ما قلتي
    وانتي نفسك قلتي في كلامك...اتعاااااااااامل معاهم
    انا موافقك تماما ممكن جدا تاخدي انطباع عن انسان لأنك ماتعاملتيش معاه ويكون الانطباع دة غلط انما لما بتتعاملي معاه بيتغير الانطباع دة
    بس هل كل الناس هتتاح لها الفرصة انها تتعامل معاه؟ اكيد لا
    انا في الموضوع بتاعي مش بقول ان الفتاة المدخنة محترمة ولا لا
    انما انا بتكلم عن انطباع عام بيظهر لما حد بيشوف فتاة ماسكة سيجارة..مجرد انطباع يحتمل الصواب ويحتمل الخطأ
    الف شكر ليكي يا ميروو
    انتظري الموضوع اللي جاي
    له علاقة نوعا ما بالموضوع دة
    تحياتي واحتراماتي

    ReplyDelete
  49. ياسمير انا مش خواجيه انا مصريه ابا عن جد عن ام عن جده وبعدين اما مابقاليش زمن وبنتقد حاجات كتيره في المجتمع الغربي وهنا فيه سلبيات وايجبيات زي اي بلد فا بس عايزك تعرف ان المسأله مش مسأله بره او جوه مساله اني بحترم الشخص اللي قدام طالما عقله وتفكيره ناضج مش هتفرق معايا بقي اي حاجه تانيه وبعدين عندك حق مش هتتاح ليا الفرصه مع كل شخص لمجرد اعتقاد جوايا انه شخصيه وحشه او سلبيه في المجتمع لمجرد انه ماسك سجاره في ايديه بس برضه مش لازام احكم علي الناس من الظاهر حتي ربنا ماقالش كده ياسمير انت كده دخلت نفسك في دايره انك تبص للظاهر وبس وماتباقش تقول عليا تاني خواجيه انا بقالي بس 2 ونص مش زمن عيب عليك دا انا مصريه وشربت من نيلها هههههههه ربنا يوافقك وبعدين انا خلاص انا مسافره يوم الاربعاء الجاي يعني لو هتلحقني وتنزل موضوعك ده الحق ارد قبل مااسافر يبقي اوكي معاك بس لو بعد مااوعدكش غير لما ارجع هبقي ارد عليك اكيد
    وربنا معاك

    ReplyDelete
  50. انا احترم الفتاة التى تدخن و كذلك التى لا تفعل
    نظرتك سطحية يا صديقى الجميل للموضوع
    عشان انت اكيد مرتبط بذهنك ان المدخنة هتكون منحلة
    و ده غلط

    ReplyDelete
  51. انا بس احب اسجل اندهاشى لو تسمحلى من شطرة فى كومنت عمرو غريب
    "انا بصراحة اتفق معاك فيما تقولة وبالنسبة لي فأنا والله بحتقر الرجل او السيدة الذين يدخنون لانهم اغبياء بل في منتهي الغباء"
    بحتقر و اغبياء؟؟؟؟
    حلو اوى

    ReplyDelete
  52. التدخين عاده سيئه مضره بالصحه للرجال و النساء علي حد سواء
    تحياتي لك

    ReplyDelete
  53. بالنسبه للمنظر فهو لا يسيء للمدخن أو المدخنه ولكن يضر من حولهم

    ReplyDelete
  54. عزيز احمد

    انا متفق معاك بشدة

    السيجارة أصلا فى الايد وحشة
    ونفسها وحش
    وبتعمل شكل فى الايدين وحش
    وريحتها بتفضل فى الهدوم

    وهارجع واقول الست كائن رقيق عذب يبعث على الإحترام ما لم يدل مظهره على غير ذلك
    متى حدث ذلك تكون مشكلةكبيرة بالنسبة للمراة


    مثلا انت شفت واحدة ست مدخنة فى الشارع جهارا نهار وراكبها فى عربيتها، هايتبص عليه وهتتعاكس من بتوع الملاكى والاجرة والسرفيس والى ماشيين فى الشارع، هي محترمة ومافيش خلاف بس الاكيد برده ومافيش خلاف عليه انها أجرأ من الست الى مابتشربش خالص،

    وبرده الراجل المدخن معروف انه بيكون أصيع من الراجل الغير مدخن
    يعنى شرب من هو صغير وسرق فلوس من أبوه وسرق سجاير منه وكان بيشترى فرط، معروف انه كان بيعمل حاجت غلط

    ازا كان الولد عمل ده وهو ولد امال البنت عملت ايه علشان تشرب

    من غير خطاب ذكورى ولا انثوى ولا متطرف ولا متعصب
    الاتنين غلط ويتعدوا على حرية الغير مدخن

    أخيرا بعد هذه الإطالة
    فخوا انى غير مدخن

    ReplyDelete
  55. بص يا سمير ... انا معاك ان منظر البنت او الست المدخنه مش حلو .. بس برضه منظر الراجل المدخن مش حلو

    انت ليه اتكلمت بصفه خاصه " المرأه المدخنه"؟؟ و ماقولتش مثلا المدخن بصفه عامه او التدخين

    المرأه مش ملاك و اكيد جواها مشاعر تمرد يمكن اكتر من الراجل و الدليل على كده انها بتتمرد على الدور اللى اتعملها حتى لو كان فى شكل سجاره او شيشه بعكس الرجل اللى متاح له التدخين و كمان منظر المدخن فى المجتمع عادى جدا ده لو كانت السيجاره مش محشيه كمان

    بص يا سمير التدخين بصفه عامه عاده سيئه جدا سواء كان راجل او امرأه

    ReplyDelete
  56. في النهاية

    ستظل النظرة فعلاً

    سلبية

    تحياتي

    ReplyDelete
  57. عايز الحق...هي حاجة سيئة للولد و البنت..في الحالتين بتبقى فيه نقطة سلبية جوايا اتجاهم....و بلاش يا سيدي نظرة المجتمع الذكوري دي...الغلط واحد و ذنبه واحد..ليه تفرق بين نفس و نفس بقى...و في الآخر العادة دي نوع من الادمان...

    ReplyDelete
  58. بصراحه وانا واللهى بيسقط من نظرى جدا الولد اللى بيدخن خصوصا لما تلاقيه ماسك السيجاره وواقف فى الشارع وكان اللى خلقه مخلقش غيره
    لان بمنتهى الصراحه الولاد والبنات اللى بيشربوا سجاير لا السجاير طعمها حلو ولا التنشنه واخده حدها مع الشعب ومفيش غير السجاير اللى هتهدى الجو ولا اى حاجه
    ليس الا منظره
    الولد عشان يبقى راجل والبنت عشان تبقى حره مستقله

    ReplyDelete
  59. السلام عليكم
    سألت سؤال فى المدونه عندى ويهمنى جدا اعرف رأى المدونين و ازاى هيجوبوه
    عسى ان تعم الافاده
    .
    .
    .
    الدعوه عامه

    ReplyDelete
  60. http://el-ahly-club.blogspot.com/
    هذا لينك مدونة الاهلي نادي القرن يعني قلت ادهولك بصفتك اهلاوي متعصب

    ReplyDelete
  61. merooo:
    حد يطول يا ميروو يكون خواجة؟
    طبعا مصر غالية علينا جدا...بس برضة الواحد ساعات يحن كدة لشوية مدنية ورقي وحضارة
    ربنا يوفقك وترجعي بألف سلامة
    تحياتي ليكي

    ReplyDelete
  62. احمد مختار عاشور:
    ازيك يا عاشور باشا
    الحقيقة هو مش نظرة او حكم على فرد ما
    انما هو مجرد انطباع ليس الا
    وبعدين دة على فكرة بيكون انطباع عام عند ناس كتير جدا منظر البنت والسيجارة في ايدها بيجننهم وبيخليهم يتصوروا فيها تصورات كتير قوي
    مجرد انطباع عام
    اما بالنسبة لتعليق عمرو غريب فهي حرية شخصية
    هي كدة وجهة نظره
    تحياتي واحتراماتي

    ReplyDelete
  63. micheal:
    ارجع واقول
    انا مش بناقش التدخين من اضراره او سلبياته
    انا بتكلم عن نظرة المجتمع للفتاة المدخنة اجتماعيا واخلاقيا
    ممكن جدا يكون الانطباع خاطىء بس للأسف الانطباع دة موجود
    تحياتي واحتراماتي

    ReplyDelete
  64. hapasa:
    فعلا يا منذر انت اثرت نقطة مهمة وهي ان المرأة المدخنة في الشارع بتتعاكس لمجرد انها ماسكة سيجارة حتى لو كانت محجبة ولبسها محترم
    اذن السيجارة في نظر البعض اللي ممكن يكونوا قلة وممكن يكونوا كثرة انما في نظرهم السيجارة معيار للانحلال
    عفوا_بس دي الحقيقة
    تحياتي ليك يا منذر

    ReplyDelete
  65. dalia:
    انا متفق معاكي تماما...انا مش بتكلم عن التدخين حلال للرجل حرام على المرأة
    انا بتكلم من ناحية اجتماعية بحتة مش ناحية صحية
    بمعنى اني بقول ان مجتمعنا لا يقبل بأي حال من الاحوال منظر امرأة بتدخن سيجارة على الرغم انه لا يتعامل بالشكل دة مع الرجل
    تحياتي يا داليا

    ReplyDelete
  66. صاحب البوابة:
    فعلا....واضح انه موروث ثقافي واجتماعي من الصعب جدا تغييره
    تحياتي واحتراماتي

    ReplyDelete
  67. نقطة مية:
    والله مش نظرة ذكورية خالص
    انا مش بدافع عن الرجل المدخن....اطلاقا
    انما انا بتكلم عن نظرة المجتمع للفتاة او المرأة المدخنة
    بتكون فعلا نظرة سلبية جدا
    غير نظرته للرجل
    عارف جدا طبعا ان التدخين ضار وحرام ع الجميع انما انا بناقش ظاهرة موجودة فعلا
    طب هسألك:
    هل في مجتمعك المحيط بيكي بيتساوى الرجل المدخن مع المرأة المدخنة؟
    تحياتي واحتراماتي

    ReplyDelete
  68. حراس الحقيقة:
    وتبقى برضة النظرة تجاه الولد المدخن اقل سلبية بكتيـــــــــر تجاه الفتاة او السيدة المدخنة
    نعمل ايه بقى
    مجتمعنا مخه كدة
    تحياتي واحتراماتي

    ReplyDelete
  69. عمرو غريب:
    الأهلـــــــــــــــــــي
    حديــــــــــــــــــــد
    تحياتي ليك والف شكر

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails