Sunday, 17 June 2007

حماد وفتحي

حماد وفتحي أخين شقيقين....والدهم توفى وترك لهم تركة عبارة عن مصنع....وكان من وصايا الأب قبل ما يتوفاه الله ان العمال يختاروا واحد من الأخين يدير المصنع
اختار العمال حماد على اساس انه متدين وذمته كويسة وقريب من العمال ومتابع لمشاكلهم وبيحاول يحلها لهم.....انما فتحي طول عمره ذمته واسعة وبعيد عن العمال وعلاقاته حلوة جدا بالموردين والعملاء بتوع المصنع على حساب العمال
فتحي طبعا جن جنونه....السبوبة اللي بيقلبها من المصنع هتضيع عليه وهو عارف ان حماد راجل متدين وذمته نضيفة فبالتالي هيقطع عليه مية ونور
طب يعمل ايه فتحي بيه؟
نشفها ع المصنع تماما وحرض المتعاملين مع المصنع على عدم التعامل مع المصنع طول ما حماد هو اللي بيديره وتسبب في توقف الانتاج وعدم قبض العمال لرواتبهم كل دة علشان يحرج حماد ويثبت انه فاشل في ادارة المصنع
مش كدة وبس لا دة تعمد افتعال المشاكل مع حماد وبعت بلطجية يتدربوا على العنف علشان يستخدمه ضد حماد والعمال اللي بيحبوه
حماد فاض بيه واتخانق مع فتحي خناقة لرب السما دفاعا عن نفسه وعن المصنع وعن العمال كان فيها ضحايا من الجانبين
الغريب بقى ان جيرانهم وقرايبهم وكل اللي يعرفوهم بيقولوا ان الاتنين غلطانين وان دة صراع على السلطة والنفوذ في حين اي حد منصف هيعرف على طول مين اللي غلطان.....مين اللي مارضيش باختيار الناس للي يحكمهم؟
مين اللي تحالف مع الغير ضد اخوه شقيقه؟
مين اللي كان مصمم على انه يثبت ان اخوه فاشل؟
مين اللي كان مصمم على انه يجوع الناس كلها في سبيل تحقيق غرضه؟
مين الغلطان؟
فتحي ولا حماد؟
قصدي.............
فتح ولا حماس؟


ملحوظة:
انا راجل مصري مش فلسطيني....يعني مش فارقة معايا فتح ولا حماس على الاطلاق....وكمان انا رجل ليبرالي...لا انتمي لأي تيار سياسي معين سواء الاخوان المسلمين او غيرهم وان كنت لا انكر اني احترمهم كتيار منظم وله قاعدته الجماهيرية العريضة
فقط هي رؤية بني ادم محايد مالوش مصلحة مع دة ولا دة

45 comments:

  1. اولا احييك علي طريقتك في موضوع حماد وفتحي ده
    تشبيهاتك جامده
    طبعا مش محتاجه تعليقات ولا حاجه حماس صح فتح غلط
    ثانيا ولا ثالثا بقي المفروض..مدونتك ممتعه
    بانتظار المزيد
    ...................
    اما بقي عن موضوع التوريث في الفن وانا بشكر ليك تشريفك للمدونة الغلبانه بتاعتي..ربنا يخليك للغلابه
    انا شايف اننا المفروض ناخد الجنسيه المصرية الاول عشان نعرف نبقي مواطنين مصريين ولا انت شايف ايه
    شكرا واسف للرغي

    ReplyDelete
  2. انا فعلا توقعت ان القصه تكون مشابهه للقصه اللي انت كتبتها بس للأسف مش عارف مين فيهم حماد ومين فيهم فتحي
    انا للأسف معنديش خبره سياسيه حقيقيه عشان احكم بيها بس فعلا خساره الحقد يوصلنا لكده
    ونسيب العدو الحقيقي
    اسلوبك جميل
    تحياتي وشكرا على زيارتك
    وعموما الله يسلمك ياسيدي
    بس بيني وبينك انا كان قصدي حاجه تانيه خالص
    انا كنت اقصد المواقف اللي بننجرح فيها وبنهتم بأن كرامتنا سليمه برغم وجع الجرح
    تحياتي
    سلااااااااااااااام

    ReplyDelete
  3. المشكله إن الطاقه اللي بيستهلكوها حماس وفتح في مشاكلهم وخلافتهم أولي أن يوجههوا هذه الطاقه نحو إسرائيل
    فتح مجموعه من الخونه والعملاء
    باعوا ومصريين علي البيع
    أما حماس فأنا مثلك لا أنتمي للإخوان ولكني أحترمهم وأراهم بتفكيرهم وتنظيمهم الأكثر تأثيرا في الناس
    ما يحدث بينهم مهزله المستفيد الأول منها إسرائيل ... تشبيهاتك في الصميم

    بخصوص التاج رديت عليك في بوسته

    سلامااااااااااااات

    ReplyDelete
  4. والله يا سمير انت مدون جامدددد بجد

    وانا عمالة اقرا القصة ...كنت عمالة اقول ايه اللى سمير كاتبه ده..ومش فاهمة مالنا احنا ومال حماد وفتحى وفوزى.... بس اخر سطر وفهمت و باينلى انك بجد جامدددد

    والله انا كمان كان فى دماغى اكتب بوست عن فلسطين والاحداث الاخيرة اللى حصلت فيها ...اصل فعلا موضوع مش مستحمل كمان مشاكل داخلية ...القضية الفلسطينية مش محتاجة لمشاكل فوق مشاكلها...وفعلا الموضوع معاهم من سىء لاسوأ

    تحياتى ليك بجد.. يور هاينس:)

    ReplyDelete
  5. طريقتك جميلة جدااا

    مع ان الموضوع صعب

    والكلام عنة بيوجع

    بحييك علي الطرح

    ReplyDelete
  6. كما عودتنا علي المواضيع الجميلة الموضوع المرادي جميل اوي و التشبية اكثر من رائع يعني انت قولت في التشبية الي مايعرفش اي رجل سياسي يقولة بجد رائع تحياتي و اتمني لك التوفيق

    ReplyDelete
  7. و الله انا صعبان عليه العمال ..قصدي الفلسطنين
    تحياتي ليك و اسلوب رائع

    ReplyDelete
  8. تصفيق حاد مصحوب باهات اعجاب
    طرح رائع للموضوع ياسمير وكلام كبير اوي
    بامانة الناس دي ماتستهالش البكا عليهم...الله يكون في عونة الشعب الفلسطيني هو الخاسر الوحيد وهو اللي بين الرحى
    اغبيا ومتخلفين سواء فتح او حماس...عرايس في ايد الاسرائليين يحركوهم زي ماهما عايزين
    انا بره ناقم على حماس اللي كانت ممكن تتنازل عن الحكم الرسمي وتتمسك بالحكم الفعلي بين الناس والشعب الفلسطيني عشان توصل لمبتاغاها وفي نفس الوقت تحقن الدماء اللي انسالت بسبب تواطء وخيانة فتح
    تحياتي ليك ولطرحك
    محمد سمير

    ReplyDelete
  9. أحييك جدا على التشبيه ..
    ما كنتش محتاج في الآخر توضح انك بتتكلم عن حماس و فتح لأنها باينة

    الفكرة في الموضوع ان الجهد المبذول من الطرفين المفروض يوجه لمحاربة العدو الحقيقى و العتاب على حماس لأنها بتدور دلوقتى على السلطة و خدت ابناء فتح كلهم في جعبة واحدة مع ان مش كلهم خانوا ...يمكن فيه منهم خانوا و دول يستاهلوا اللى يجرالهم لكن المشكلة ان النزاع لما بيوصل للدم و للناس البسيطة في الشارع بيكون صعب حله و صب نسيطر عليه و هيجر وراه الكثير و الكثير من حمامات الدم الفلسطينى و ده في اللأخر بيصب في مصلحة العدو و بيخسرنا أبناء وطنا....


    المحزن بجد بقى ...هو تواطؤ الحكومات العربية ضد حماس لمجرد انهم مش عايزين حماس توصل للسلطة لأن ده بالطبع هيكون مؤشر قوي لأن الإخوان المسلمين ممكن ياخدوا الكراسي منهم في الوقت القريب ....يعني حولنا المشكلة لمصالح شخصية على حساب أبناء الشعب الفلسطينى اللى هما أصلا مش ناقصين ....

    بصراحة نكأت الجرح ....الله يسامحك

    تحياتي

    ReplyDelete
  10. العدد الثانى من مجلة نفسنا نزل
    روحوا الحقوا النسخ

    ReplyDelete
  11. اولا انا مابتفرقش معايا حماس من فتح لانهم هما الاتنين مش بيفكروا غير في مصلحهم حتي لو ناحيه منهم بتفكر شويه في الشعب الفلسطين بس قبل مايفكروا مين فيهم اللي يمسك السلطه يفكر في مصلحه الشعب وزي ماقال الانتظار مؤقت
    انا فعلا اللي صعبان عليا الشعب وربنا يكون في عونهم بقيت فلسطين شعبها معروس بين حماس وفتح وفي العراق الشعب مهروس بين شيوعي ولا سني و عندنا في مصر نحن نحتل انفوسنا ياعيني علينا ياعرب

    ReplyDelete
  12. بعيدا عن الموضوع

    انا بشكرك جدا على الاغاني اللي تعقد اللي بتشغلهالنا
    مش عارف انت بتجيبها منين بصراحة

    بس هي نعقيد فعلا

    تقبل تحيتي
    :)

    ReplyDelete
  13. el3araby:
    الله يخليك يا باشا الف شكر ليك على رأيك القيم في مدونتي المتواضعة
    مدونتك اكتر من روعة وموضوعاتك هايلة...بس حتى كمان الجنسية المصرية بالنسبة لنا كمصريين مش سهلة
    تحياتي واحتراماتي
    الشنكوتي الكبير:
    اولا الف شكر ليك يا برنس على تشريفك لمدونتي المتواضعة
    اكيد وبدون شك حماد بترمز لحماس اما فتحي بيرمز لفتح
    انا برضة ماركزتش قوي افتكرتك بتتكلم عن واقعة حقيقية بالنسبة لموضوع السور بس هقرا الموضوع تاني
    تحياتي واحتراماتي

    ReplyDelete
  14. RERI:
    الف شكر ليكي يا ريري
    بالنسبة لفتح عندنا زيهم كتيــــــــــر
    تحسي كدة ان الجزء دة من العالم مبتلى بالنوعية دي من الناس
    اما حماس فكانت ضحية لعنف رهيب وبالنالي اضطرت انها ترد بعنف مضاد
    بالنسبة للتاج.....الاجابة وصلت يا فندم....تحياتي

    ReplyDelete
  15. NERMEEN:
    الكلام دة كبير عليا قوي يا نرمين....وانا قاعد بقراااه قعدت اتنفخ اتنفخ اتنفخ لحد ما وعت من ع الكرسي
    الف شكر ليكي بجد
    كراكيب عادل:
    العود احمد يا صاحب الكراكيب الجميلة
    انت فينك يا عم من زمان
    الف شكر لك
    تحياتي واحتراماتي

    ReplyDelete
  16. عمروغريب:
    الف شكر يا عمرو
    دة من ذوقك والله
    تحياتي لك
    انتظار مؤقت:
    في اي دولة عربية....دائما لضحية هم العمال.....الشعب يعني
    تحياتي واحتراماتي

    ReplyDelete
  17. مدونة جميلة وموضوع فعلا محير مين الغلطان
    اقولك راى وبصراحة كلنا غلطانين كل الدول العربية كل الى سمح وتهاون وفرط وتعاون وتعامل وادى فرصة لاى حد يوقع بين الشقيقين كلنا متحملين الغلط

    ReplyDelete
  18. العيب مش علي حماد وفتحي بس .. العيب كمان علي ولاد العم اللي عندهم مصانع كبيره ممكن توردلهم بس مش عايزين وسايبنهم للموردين ياكلو في لحم العمال بحجه ان حماد ده فاسد و ليه افكار متطرفه

    مع ان حماد عمل اللي عليه وزياده عشان يثبت انه مش كده
    ده حتي عمل هدنه مع الراجل اللي واخد ارض من المصنع وضع يد و سابله فرصه يراجع نفسه بالذوق

    ReplyDelete
  19. موضوع رائع وجميل قوي
    بس في حاجه لازم تقول ان فتحي بياون مع اعداء المصنع واللي قتلو صاحب المصنع عشان يشيل حماد وينفرد فتحي بالمصنع ...

    وتحياتي علي الموضوع الرئع والمدونه المتميزه

    ReplyDelete
  20. بصراحه بعد كل اللي حصل و اللي لسه يحصل من تحت راس الموضوع ده..أقول بمنتهي الصراحه
    ملعون أبو فتحي علي أبو حماد في يوم واحد و يغوروا هما الاتنين في ستييييييييييين داهيه
    تحياتي لك

    ReplyDelete
  21. بصراحة كدة...الاتنين اغبى من بعض...لان حماس لما دخلت غزة عملت نفس الاخطاء اللي فتح كانت بتعملها

    في ناس عاقلة في الدنيا ترمي واحد من الدور ال18...دي همجية

    بصراحة انا مش عارف حماس بتشتغل لصالح مين...يبقى محمود عباس واولمرت هيعدوا مع بعض عشان يحاول يفك الحصار الاسرائيلي...تلاقي حماس بيضربوا صواريخ العيد بتاعتهم على تل ابيب ويبوظوا كل حاجة

    حماس اسم على مسمى...حماس بدون عقل

    ReplyDelete
  22. كان الأولى بيهم بدل ما يتخانقوا مع بعض يتفقوا ويتخانقوا مع عدوهم ولا دلوقتى هما عندهم قدرة أنهم يحاربوا بعض ومش عارفين يحاربوا عدوهم ويطلعوه من أرضهم
    وأكيد ده هايدى الفرصة للعدو أنه يدخل لهم من كل أتجاه ويسخن كل طرف على التانى
    وبكره نشوف
    تحياتى على طريقة عرض الموضوع

    ReplyDelete
  23. انتظار مؤقت:
    وكمان صعبان عليا العمال المصريين والله
    تحياتي واحتراماتي
    غمض عينيك:
    بس محدش ينكر يابو حميد ان فتح اخدت فرصتها وزيادة في الحكم وكانت النتيجة زيادة وتستيف لارصدتهم في بنوك اوروبا
    ومستكترين يا حرام على حماس انها تاخد فرصتها في الحكم
    تحياتي واحتراماتي

    ReplyDelete
  24. الحلم العربي:
    اعتقد انه كان لازم التوضيح لأن في ناس مابتكونش في كامل تركيزها وهي بتقرا المدونات وبالتالي ممكن يفتكروني كاتب قصة بلا هدف
    حماس اعتقد انها كان عندهاافكار تخدم بيها وطنهم وهي جوة السلطة لكن طبعا فتح ماينفعش تعيش برة السلطة لو طلعت برة السلطة ممكن تموت
    تحياتي واحتراماتي

    ReplyDelete
  25. نفسنا:
    طب احجزولي نسخة على ما اجي....المواصلات صعبة قوي
    تحياتي لكم
    merooo:
    بلاش تساوي الناس ببعضهم يا ميروو
    اكيد اهداف فتح غير اهداف حماس
    حماس كسبت في الانتخابات وكان حقها الشرعي والقانوني انها تحكم الا ان فتح واعوانهم وضعوا عراقيل رهيبة تجاه حماس علشان ماتنجحش في حكم بلدها
    ومن هنا كان الانفجار
    نرجع بقى ونقول الاتنين غلطانين؟
    تحياتي واحتراماتي

    ReplyDelete
  26. kasperb4:
    الف الفشكر ع الكلام الجميل دة
    بس برضة كان نفسي يكون مع الكلام الجميل الرائع دة...رأيك في الموضوع
    نورتني ويارب تكون منور المدونة دائما
    تحياتي واحتراماتي

    ReplyDelete
  27. ايه الحلاوة دى والله ممـــتاز وتحليل رائع بس برضو هنقول كان يصبر حماد والله معاه حتى الجيران طلعوا كالعادة انذال واكتر من النذالة بكتير
    ربنا يكرمهم ويفرج كربهم ويحقن دمائهم ياااااارب آمــــــــين
    تحـيـاتى لحضرتك

    ReplyDelete
  28. طريقتك للعرض لذيذه اوى
    انا مش متابعه الاخبار السياسيه خالص
    بس يظهر كده ان فتحى .. قصدى فتح هى اللى غلطانه

    ReplyDelete
  29. انا لحد دلوقتى بردوا مش

    فاهمة هم بيعملوا فى بعض كدا ليه

    !!!!!!!!!!!!!!!!!!!!!

    مهما بلغت الخلافات بينهم مش المفروض يقتلوا فى بعض بالشكل دا
    دا بدل ما يوجهوا قوتهم تجاه عدوهم قاعدين يستنزفوها فى بعض

    ReplyDelete
  30. والله يا احمد الموضوع ده مش محتاج اي تعليق
    لأن الواقع فعلا مرير جدا
    وأمر من انه يتوصف في تعليق
    الواحد لما بيفكر ف اللي الناس دي بتعملو مع بعضها
    ببقى هتجنن فعلا واسأل نفسي هو فين عقول الناس دي
    هما ازاي يسمحو لنفسهم انهم يعملو كده مع بعض ويسلمو نفسهم بإديهم للعدو الاول

    انا بصراحة مخنوق جدا من الوضع
    يمكن عشان كده محبيتش اني اعلق ف الاول
    مش لاقي كلام يوصف مدى الخنأة الي انا فيها

    وبالطبع طريقة عرضك للموضوع جميلة جدا

    تقبل تحيتي مرة اخرى وان شاء الله اكون زائر دائم لمدونتك
    بالعكس انا اصلا زائر دائم لمدونتك بس ده اول موضوع ارد فيه
    على فكرة هو ليه الاوديو مش بيتغل ف كل مرة ادخل فيها

    ReplyDelete
  31. جامد كيك التشبيه والقصة

    لا بجد توهتنى فى الاول يعنى

    ماانت تنفع روائى اهه
    سيبك انت من الانتيبايوتك اللى من غير فطار ده واشتغل فى الكتابة
    سبوبة جامدة عليا النعمة

    انا اظن ان الغلطان هو عم طه اللبان

    هو السبب فى كل الخلافات دى

    ايه رأيك نعدمه؟؟؟

    ReplyDelete
  32. مكتوبة حلو جدا

    اللي بيحصل دلوقتي بيقول إنه صراع من جانبين علي السلطة
    ومفيش حد صح وحد غلط

    تحياتي

    ReplyDelete
  33. نتمنى منكم زيارة مدونة خليك فى البيت والمشاركة فى الحملة

    ReplyDelete
  34. انت فين ياسمير مش باين ليه

    محمد سمير

    ReplyDelete
  35. اولا احيك على الطرح
    بس الموضع مش موضع حماده وفتحي
    الموضع اكبر من الاخين ومن العيله كلها
    شوف اي حد من غزه هيقولك الموضع مش خناقه بين فتح وحماس على كرسي
    الموضع داخل فيه تطهير للقطاع
    وداخل فيه ايران وسوريا
    ويعالم مين كمان
    احنا بصين من مطلق انها خناقه بين اخوات
    بس الموضع اكبر من كده
    والي يصعب عليك بجد الناس
    الي مش عارفين هما كانو صح لما قالو نعم لحماس
    ولا غلط

    وسواء فتح ولا حماس الاتنين معملوش اي حاجه للشعب

    ReplyDelete
  36. ايوية:
    نعمل ايه بقى اذا كانت الحكومات العربية هي اللي بتوقع بينهم لمصالح معينة
    فعلا انه زمن العجايب
    تحياتي واحتراماتي
    مشمش:
    معاك حق والله
    الفساد دمر الامة تماما
    تفتكر فيه امل؟
    تحياتي ليك....والعود احمد

    ReplyDelete
  37. ابن ناصر:
    الف شكر ليك....ومنورني في كل وقت
    بالنسبة لعم فتحي...فدة بقى الطمع عماه...ومش شايف غير مصلحته وبس ولتذهب البلاد والعباد الى الجحيم
    تحياتي
    micheal:
    والله يا راجل انت معاك حق
    يغوروا هم الاتنين
    احنا ناقصين؟
    تحياتي واحتراماتي

    ReplyDelete
  38. marvel:
    بس ماتنكرش ان الضغط بيولد الانفجار
    وان اللي عملته دة يعتبر رد فعل على استفزازات فتح المتكررة
    تحياتي لك

    ReplyDelete
  39. BOSBOS:
    ايه يا ست بس بس الالاطة دي
    هو اي حد المصري اليوم تتكلم عنه يعني يبقى اليط كدة
    ماشي يا ستي
    ربنا يوفقك
    الف شكر ليكي على كلامك

    ReplyDelete
  40. dalia:
    شكري ليكي يا داليا نورتي مدونتي المتواضعة
    انا كمان من رأيي ان فتح هي الغلطانة
    تحياتي ليكي
    اماني:
    مفيش اندل يا اماني من جيران حماد دول
    اسأليني انا
    الف شكر ليكي
    نورتيني

    ReplyDelete
  41. barbie girl:
    لما تكون مصلحة كل واحد فيهم قبل مصلحة الوطن
    بيحصل اللي حصل دة
    تحياتي واحتراماتي
    kasperb4:
    طبعا انا سعيد جدا بأول تعليق ليك معانا ويارب مايكونش الاخير
    انت طبعا منورني في كل وقت
    بالنسبة للأوديو ساعات بيعلق بس بيرجع يسشتغل تاني بعدها بفترة صغيرة
    تحياتي واحتراماتي

    ReplyDelete
  42. البتاع:
    ياخبر ابييييييييييييييض
    ازيك يا بنتي....حمدا لله ع السلامة
    اخبار المصيف ايه؟
    اظن لسه الدنيا ماولعتش هناك
    بس مش ملاحظة انك مطنشة التاج اللي مررته ليكي خالص
    ماشي يا ميم.........مردودة لك

    ReplyDelete
  43. the alien:
    الف الف شكر
    بس لازم يكون في حد صح وحد غلط
    وان كان الاتنين غلطوا....يبقى لازم نعرف مين اللي اشعل الموقف وتسبب في الاقتتال دة
    تحياتي واحتراماتي
    خليك في البيت:
    علم وجاري التنفيذ

    ReplyDelete
  44. غمض عينيك:
    انا هنا يا بو حميد
    تحت النظر والله
    بس ماكنتش بدخل كتير الكام يوم اللي فاتوا........الشغل بقى انت عارف
    الف شكر ياباشا ع السؤال....ربنا لا يحرمني منك
    تحيـــــــــــــــاتي

    ReplyDelete
  45. محض روح:
    بس محدش ينكر ان من ساعة حماس مانجحت في الانتخابات..والشغل الشاغل لفتح هو اغشالها بأي طريقة وطبعا بالاستعانة بمصر والاردن
    وبالتالي لم يكن امام حماس الا الاستعانة بايران كرد فعل
    بلاش نساوي بين الفعل ورد الفعل
    تحياتي واحتراماتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails