Friday, 15 June 2007

تاج جامد جدا


التاج دة من ما علينا
التاج دة احلى حاجة فيه انه جديد لانج
اول مرة بصراحة بشوفه في المدونات
وعلشان الرغي بقى وكدة......نخش في الموضوع على طول
انت مين؟
واحد مصري صامت زي أغلبية المصريين.....نفسه يبطل صمت بقى ويكون له رأي في اللي بيحصل في بلده زي كل مخاليق ربنا
مين اكتر 6 اشخاص بتحبهم؟
هم الحقيقة 6 فعلا ودول الدايرة الضيقة المحيطة بي
والدي ووالدتي واخواتي الاتنين وازواجهم
انت سعيد؟
والله السوأل دة ماينفعش يتسأل بشكل مطلق كدة....لأني بالتأكيد مش سعيد على طول وكمان والحمد لله مش حزين دائما
بس اقدر اقول ان في الغالب اني راضي و الحمد لله
لو اجتمعت انا وحسني مبارك في غرفة واحدة؟
هقول له ان اللي باقي في فترة حكمه مش قد اللي فات...واقول له انه ممكن يتكتب في التاريخ بأحرف من نور لو في الكام سنة اللي فاضلين دول محى اخطاء 26 سنة فاتوا في الحكم
بالتخلص من شلة المنتفعين والقضاء عليهم وتأسيس دستور جديد سوي للبلاد واطلاق حرية تشكيل الاحزاب واصدار الصحف
هقول له كمان
ان الديمقراطية هي الطريق لأصلاح كل مشاكل بلدنا
هقول له كمان انه لو خايف ان الاخوان لو حكموا يرجعوا بمصر للوراء ممكن جدا بدستور جديد الكل يلتزم بيه يضمن تداول سلمي للسلطة ويضمن ضوابط تحفظ مصر من اي تيار سياسي سواء الاخوان او غيرهم
لو معاك مليون ونص جنيه......تعمل بيهم ايه؟
هعمل صيدلية كبيرة واشتري عربية احدث موديل
بتحب مصر؟
جـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــدا
وهو دة اللي هيقضي عليا وعلى اعصابي لما بشوف اللي بيتعمل فيها وفي ولادها
بتحب البنات؟
لو ما بحبش البنات ابقى مش طبيعي
اكيد بحبهم...بس حب عن حب يفرق
تقدر تقول اعجاب
بأعجب بكل بنت جميلة.....بس اول ما بتمشي من قدامي او بتختفي عن نظري بنساها تماما واول ما بتعدي بنت اجمل تعجبني برضة واول ما تمشي برضة انساها تماما
انما على المستوى العقلي تقدر تقول ان البحث عن بنت دماغها حلوة مسألة اصعب من البحث عن مسلم في الفاتيكان
انت مسلم؟
أه.....الحمد لله
ليه؟
في مجتمعاتنا محدش بيختار دينه...كل واحد بيتولد يلاقي نفسه على دين اهله سواء كان مسلم او مسيحي
انما لما بيكبر بيقدر يفكر ويقيم اذا كان مقتنع بدينه ولا لأ
وانا الحمد لله مقتنع اني مسلم تماما
مين اكتر شخصية ما تقدرش تستغنى عنها في حياتك؟وليه؟
والدتي
فعلا هي الشخصية الاولى والمفضلة بالنسبة لي
هي العقل اللي بفكر معاه وهي لقلب اللي بفضفض له لما تكون حاجة مضيقاني
انما ممكن بشكل عام اقول ان اي حد بيساعدني ان حياتي تكون افضل هو شخصية مهمة جدا بالنسبة لي
ايه اكتر موقف محرج اتعرضت ليه في حياتك؟واتصرفت ازاي؟
المواقف المحرجة اللي الواحد بيتعرض ليها كتير جدا....طبعا الحياة لا تخلو من الماقف المحرجة
بس افتكر كويس وانا في اولى اعدادي كنت بتكلم مع واحد صاحبي وعمال اشتم في مدرس الرياضة واذا بي ورايا وسمع كل اللي قلته
طبعا موقف اكتر من محرج.....قعد باصص لي بتاع 5 دقايق كدة وانا بأتمنى الارض تنشق وتبلعني
بس التزمت الصمت التام....وهو كمان عمل نفس الحكاية
ايه الأمنية اللي بتدعي ربنا دايما انه يحققها لك؟
انه يديم عليا نعمة الصحة ويرزقني من فضله واني اوجه الرزق دة للخير ولمنفعة الناس
تمرر التاج دة لمين؟
امرر التاج دة للسادة الأتية مدوناتهم....وعليهم الالتزام التام بالاجابة عليه
والا...........................هم عارفين اللي هيحصل لهم
البتاع
الروح (BOSBOS)
بنت الجنوب
جيداء
رانيا
ريمو
رحاب-هات ودنك
عايشة وخلاص
ميرو
غمض عنيك
NERMEEN
KIMEXLILO
ومش دول بس
ياريت اي حد شرفني بزيارته لمدونتي وعجبه التاج دة.....يعتبرني مررته ليه
تحياتي للكل



38 comments:

  1. طيب ليه التدبيسة دى على العموم طيب لما هفوق هجاوب عليه مع أنه صعب شوية
    وأجاباتك عجبتنى قوى على فكرة
    بس ربنا يسهل وأعرف أجاوب
    تحياتى

    ReplyDelete
  2. لا تاج حلو برضه كويس

    اما نشوف بقية الناس هتجاوبه بايه

    تحياتى

    ReplyDelete
  3. كل تاج وانت طيب يا سمير
    معلش يمكن مجاوبش عليه
    لانى يمكن مكملش
    بفكر اوقف لغايه كده
    بس لو كملت
    أول حاجه هعملها هى التاج

    تحياتى

    ReplyDelete
  4. بجد اجابتك حلو اوى وفكرة التاج اللى فى المدونات ده بجد فكرة حلوة اوى لانها بتخلينا الى حد ما نقرب من تفكير اصدقائنا المدونين

    ReplyDelete
  5. طب انا الصراحة مشبرنهج جدا لإن ده أول مرة في حياتي يتمرر لى تاج و انا الصراحة كنت اسمع عنه بس
    :D
    عايز اعرف اجاوب عليه هنا و للا عندي انا بس

    اعذرني محدث نعمة
    :D

    ReplyDelete
  6. الباشا البا الباشا
    الواحد بعد مايخرج من محنة عمر يلاقى تاج لوز زي كده
    تاج مقبول ان شاء الله وكل تاج وانت بخير
    المشكلة انى حاسس انك بتنصب لانى كل ما بدخل مدونة والاقى فيها تاج
    بيبقى الاهداء لأول شخص أحمد سمير
    يعنى انت مداين كده بحوالى 42 تاج
    شفت باه
    بس فكرةالبحث عن مسلم فى الفاتيكان

    تحياتى ليك ومشكرين ع التاج اللوز
    وابقى عدى بنحضر لحاجة مهمة قوى ياريت لو تعجبك بعد محنة عمر الأخيرة
    وطبعا بره الدعوة عامة

    ReplyDelete
  7. BOSBOS:
    ايه يا ست بس بس هانم؟
    انتي هتعيشي في الدور ولا ايه؟
    يالا بقى استهدي بالله كدة وقومي اغسلي وشك وجاوبي ع التاج دة فورررررررررررررا
    تحياتي ليكي ومنتظر اجاباتك

    ReplyDelete
  8. محمد ياسر:
    طيب ما الناس عايزة تشوف انت كمان هتجاوب بأيه؟
    تحياتي لك

    ReplyDelete
  9. reemooo:
    نعن نعم نعم يا ست ريموو؟
    انتي بتهزري مش كدة؟
    شيلي الافكار دي من دماغك واكتبي يا ريم
    انا مش عارف يا جماعة هو التدوين دة لعب كورة ولا فن ممكن الواحد يعتزله؟
    دي كتابة افكار
    يا ريت تراجعي حساباتك يا ريموو وماتحرميناش من تدويناتك الجميلة
    تحياتي ليكي

    ReplyDelete
  10. MALAK:
    شكرا لكي يا ملك
    نورتي المدونة المتواضعة بتاعتي دي
    وانا بهدي لكي التاج دة
    ياريت نشوف اجاباتك في اسرع فرصة
    تحياتي

    ReplyDelete
  11. KIMEXLILO:
    يا سيدي لا اشبهرناج على واجب
    انت عارف طبعا ان التاج كاس وداير ع الجميع
    سيادتك بتجاوب عليه عندك في المدونة في بوست لوحده زي اللي عندي كدة
    وكل تاج وانت طيب يا راجل يا طيب

    ReplyDelete
  12. HAPASA:
    بص ماتحاولش تفلفص
    هتجاوب ع التاج يعني هتجاوب ع التاج
    مالهاش حل تاني
    وانا متابع مدونتك ان شاء الله واكيد هتابع الفكرة الجديدة بتاعتكم
    تحياتي

    ReplyDelete
  13. إجابات جميلة بجد

    أجمل إجابة عجبتنى بتاعت لو قابلت حسنى مبارك ....إجابة عقلانية بعيدة عن التعصب ...أحييك عليها

    ربنا يحققلك كل امنياتك و منهم المليون و نص كمان يا عم..هههههههه
    تحياتي

    ReplyDelete
  14. جميل التاج والأجمل إجاباتك

    تحياتي

    ReplyDelete
  15. اجباتك جميلة وبالذات بتاعت بتحب البنات دي محسسني ياجدع انهم كلهم ليهم انياب ومشيين بيخربشوا بها حضرتكم حرام عليكم مش كفاية انكم غلابة ومش قادرين تتجوزوا ليه تقولوا عليهم كده سيبوهم في حالهم

    ReplyDelete
  16. لا والله انا اول مرة اقراء تاج بالجمال دة علي العموم ربنا يحقق احلامك تحياتي و اتمني لك التوفيق

    ReplyDelete
  17. ليه كده فين الناس اللى عايزة تشوف دى ؟
    انا كنت ناوى اهرب
    بس خلاص ماشى هقعد اشوف كده

    تحياتى

    ReplyDelete
  18. اجاباتك صريحة و حلوة بس
    ليه العين الزايغة دى يا سميررررررررر


    عامة
    حلوة التدبيسة دى و هستمتع بالرد على التاج لان الاسئلة شائكة
    ما نجيلكوش فى تاج

    ReplyDelete
  19. السلام عليكم

    اشكر كل من تساءل عن غيابي

    ووقف بجانبي في محنتي

    تحياتي لكل شريف حر

    ReplyDelete
  20. تعالى ليا بقى هنا
    هو أنت بتطلع أشاعات ولا ايه
    المهم أنا مش فاهمة حاجة المصرى اليوم ايه هو فيه ايه معلش بقى أعذرنى فى الحالة اللى أنا فيها
    أنا مانمتش أمبارح خالص لحد النهاردة الضهر مستنية أخويا يكلمنى ويطمنى وبعدين نمت ولسة صاحية لاقيت كلامك فعلا أنا مش فاهمة حاجة
    مش جايز تكون تقصد حد تانى بس جيت هنا غلط
    على العموم لو كلامك صح ياريت تقولى الكلام اصلا كان عن ايه وفى عدد النهاردة ولا امتى وفى اى صفحة لانى فتحت عدد النهاردة على النت ومالاقتش حاجة حتى فى الحوادث
    غريبة فعلا
    تحياتى واكيد انت غلطان فى العنوان أو يمكن أنا عملت جريمة

    ReplyDelete
  21. مش عارفه تملي برد الاخيره بس الاخيره خيره بردوا واخرها مسك مش بيقوله كده ولا ايه ههههههههههه
    علي العموم انا بترتب اهو اجاباتي وهنزله ماتقلقش يعني بس لو في تاج تاني ماتبصهوليش الا بعد كده شهر واسبوع كده او اي حاجه يعني لاني هسافر هرجي مصر اجازه ومش هدخل علي البلوج تقريبا نهائيا هتتحرم مني بقي ماتزعلش نفسك يعني هههههههههه

    ReplyDelete
  22. الحلم العربي:
    الله يخليكي
    المليون ونص دي حاجة سهلة لو قارناها اني اقابل الرئيس مبارك في حجرة واحدة لوحدنا
    تحياتي واحتراماتي

    ReplyDelete
  23. darsh:
    الف شكر يا درش
    نورتني والله
    تحياتي واحتراماتي

    ReplyDelete
  24. قلوب حائرة:
    البنات؟
    هو في زي البنات؟
    دول الطف الكائنات
    ماهو المصيبة ان الشباب مش قادر يتجوز...وهن مزودينها ع الاخر
    تحياتي واحتراماتي

    ReplyDelete
  25. عمرو غريب:
    الله يخليك يا عمور
    يارب ربنا يحقق لك كل احلامك انت كمان....ماعدا ان الزمالك يفوز بأي بطولة
    تحياتي واحتراماتي

    ReplyDelete
  26. محمد ياسر:
    عايزين نشوف اجابات التاج دة عندك
    تحياتي واحتراماتي

    ReplyDelete
  27. جيداء:
    ابدا والله مش عين زايغة ولا حاجة
    كل ماهنالك ان البنات مش سايبينا في حالناوكل يوم البدع بتكتر عن اليوم اللي قبله
    وكمان مستكترين علينا مجرد اننا نبص
    ايه الظلم دة؟
    قلبتي عليا المواجع
    عموما
    انا مستني اجاباتك ع التاج سريعا
    تحياتي واحتراماتي

    ReplyDelete
  28. صاحب البوابة:
    العود احمد....ويارب تكون شدة وزالت
    تحياتي لك

    ReplyDelete
  29. BOSBOS:
    انا رديت عندك في المدونة
    ركزي شوية
    تحياتي ليكي

    ReplyDelete
  30. MEROOO:
    طبعا يا فندم
    وكمان بيقولوا اخرها افيدها
    يعني وانتي برة مصر نشوف سيادتك ع البلوج كتير
    ولما تيجي مصر مانشفش جنابك الا لما ترجعي
    عجبت لك يا زمن
    نورتي مصر مقدما يا ميرووو

    ReplyDelete
  31. ازيك يا دكتور
    لالالالالالالالا انا بعت لحضرتك التاج فى الاول على فكرة
    وقولى ايه التبذير ده عايز تجيب عربية بمليون جنيه
    اممممممممممممممم
    انا اقولك افتح بيها الصيدلية ولكن بيع فيها الدوا ببلاش
    :D
    تحياتى لحضرتك

    ReplyDelete
  32. انا بعت لك ميل ياريت ترد عليا
    تحياتى

    ReplyDelete
  33. تاج جميل وإجاباتك عليه مميزة

    ReplyDelete
  34. اماني:
    والله ماخدتش بالي من التاج اللي بعتيه
    معلش العتب ع النظر بقى
    عموما هاتي انتي المليون ونص ونتفاهم بعد كدة هعمل بيهم ايه
    تحياتي واحتراماتي

    ReplyDelete
  35. شباب روش طحن:
    الف شكر ليك
    دة من ذوقك بس
    تحياتي واحتراماتي

    ReplyDelete
  36. عجبني التاج جدا يا أحمد هو فعلا جديد ومختلف... وإن شاء الله تشوفه عندي قريب
    بس إيه حكاية تشكيكك في عقلية البنات دي
    ليه كده؟؟
    :(((

    سلامااااااااااات

    ReplyDelete
  37. ياباشا دي اول مرره حد يمررلي الاختراع الجامد ده..دا انا نزلت جبت تورته وهعمل حفلة..دا انا انول الشرف يابك
    :)
    تحياتي ليك
    محمد سمير

    ReplyDelete
  38. انما على المستوى العقلي تقدر تقول ان البحث عن بنت دماغها حلوة مسألة اصعب من البحث عن مسلم في الفاتيكان
    ...............................
    ده ايه الشر ده وايه الصراحه المستفزه دي :(
    حبيت اردلك الزياره واشرب معاك شاي بس بعد ماقريت الكلام ده مشيت وانا واخده علي خاطري
    مدونتك منوعه وجميله ومرسيه علي زيارتك
    سلامي ليك:)

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails