Monday, 11 June 2007

قفص مشمش


قاعد في عربيتي ومنتظر واحد صاحبي
جنب العربية فكهاني كبير وزحمة
لفت نظري حاجة مش ممكن تلفت نظر حد وهي طريقة شراء الناس للفاكهة
الناس ليه وهي بتنقي المشمش بتنقيها واحدة واحدة وتاخد اللي تعجبها وتسيب الثمرة اللي مش على مزاجها
طيب ماهو بنفس المنطق دة كان في حد امبارح من نفس القفص اخد الافضل وساب الأردأ....وجه اللي بعده اخد الافضل من الموجود وترك الباقي ......وهكذا دواليك
اللي عايز اقوله
ان مسألة الافضل دة مسألة نسبية والدليل ان القفص كله هيتباع بس بالترتيب ولكن في الاخر كله هيتباع
انا عارف انها فكرة فلسفية شوية بس ممكن نطبقها على حاجات كتيرة جدا في امور الحياة
بمعنى ان كل شيء بأوان وكل حاجة بميعاد وبترتيب قدري ربنا سبحانه وتعالى اللي مرتبه
القصة مش قصة مشمش....القصة فكرة خطرت لي على بالي وحاولت اني اوضحها

42 comments:

  1. صح
    كل حاجة في الدنيا نسبية...
    تحياتي

    ReplyDelete
  2. ايه الفلسفة دى كلها يا سمير :)
    احب كمان اضيف بجانب ان كل شىء نسبى فى الدنيا ....ان لولا اختلاف الاذواق لبارت السلع..
    ردا على استفسارك انى مش بكتب حاجة انا بمتحن اليومين دول ...وكانت فى ظروف كده فى وسط الامتحانات فرح اختى:) حبيت ماشغلش نفسى اوى فى البلوج بتاعى عشان اعرف اركز ...يلا بقى عقبالك

    تحياتى

    ReplyDelete
  3. كلامك منطقي جداً
    أنا أحييك عليه

    خالص تحياتي

    ReplyDelete
  4. فعلا القفص كله بيتباع في الاخر ليه النقاوه و التفعيص من الاول؟
    السبب جايز ان كل واحد بيبقي دافع دمه مش فلوسه و عاوز ياخد حقه بالصوره التي يراها تناسبه او تشفي غليله ممن سياخذ الفلوس
    و هي دي طريقتنا في البيع و الشرا
    يمكن لما الفلوس تكتر نتعدل
    ملاحظه طريفه جدا
    تحياتي

    ReplyDelete
  5. هي الناس كدة الانسان الي فية طبع عمرة ما بيغيرة حتي لو كان غلط بس والله احيك علي هذة الملاحظة وبالنسبة ان انت بتقول لي انت حذفت موضوع الاهلي اية يا عم هو محمد صديق دة هندي وانا مش واخد بالي بطل تعصب بقي ههههههههههههه

    ReplyDelete
  6. هو ده اللى الناس شاطرة فيه تنقى فى الفاكهة والخضار وغيرة
    بس ياريت يتعلموا ينقوا كلامهم ومايجرحوش حد
    يتعلموا ينقوا الناس الكويسة والأصدقاء الحقيقين
    يتعلموا ينقوا كل حاجة صح
    لكن هيا دى الناس مش شاطرة غير فى تنقية الخضار والفاكهة

    ReplyDelete
  7. ابوحميد

    كلامك منطقي جدا، و فلسفته فعلا تنطبق على كل حاجة في حياتنا تقريبا

    أحيي دماغك

    تحياتي
    زي

    حلوة الاغنية دي على فكرة

    ReplyDelete
  8. الكلام دا كبير عليا .. لكن شكله كده صح ..

    المهم أنا كنت داخل ليه؟ .. كنت داخل ليه ؟؟

    أيوا افتكرت

    You have been tagged

    ReplyDelete
  9. والله ياعم انت رائع الموضوع نور فى دماغى ذى افلام الكرتون
    فعلا كل حاجة نسبيه الى ميعجبكش يعجب غيرك
    امال البنات الوحشه بتتجوز ازاى

    تحياتى

    ReplyDelete
  10. كل حاجة في الدنيا نسبية..و مش ضروري اللي يعجبك يعجب غيرك من بداية المشمش و صولا الى الاحزاب السياسية..بس عشان حد يستوعب كدة..في المشمش

    بوست حلو جدا

    تحياتي

    ReplyDelete
  11. انت قلتها يا سمير
    الأفضل ده مسأله نسبيه
    يعنى اللى هيعجبنى مش شرط يعجبك
    واللى يعجبك مش بالضروره اشتريه
    علشان كده الناس بتنقى
    لان كل واحد وليه زوقه واختياره
    وكل انسان عنده أفضل واسوأ
    وفى النهايه اللى بيكسب صاحب قفص المشمش :))))
    تحياتى

    ReplyDelete
  12. المسئلة نسبيه اينعم
    والقفص فى الغالب هيتباع صح
    لكن هناك فرق من ان تشترى مختاراً وان تشترى وان تشترى غصباً

    ReplyDelete
  13. فعلا

    انا اتفق معك بشدة
    وفعلا

    فلسفتك دى عميقه كمان
    مش فى المشمش
    فى الحياة ذاتها
    تحياتى لفلسفتك الجامده
    ..................

    دعوة للقاء المدونين فى بورسعيد
    للتواصل بين المدونين ..لقاء صيفى جدا
    لمزيد من المعلومات ارجو زيارة مدونتى

    تحياتى

    ReplyDelete
  14. فكرة غريبة فعلا و منطقية لحد بعيد
    بس فى الاخر الوحش بيفضل فى قعر القفص و محدش بياخده برضه ولا ايه ؟

    ReplyDelete
  15. آسف على التحليق خارج السرب
    ولكن إيماننا بدفاعكم عنمبدال الحرية
    ندعوكم للتضامن مع عمر الشرقواى المعتقل فى قسم طلخا

    إثر قيامه بتغطية انتخابات مجلس الشورى
    وجزاكم الله خيرا

    ReplyDelete
  16. SABSOOB:
    فعلا....النسبية بتتحكم في كل حاجة في حياتنا
    مفيش حاجة مطلقة
    تحياتي ليكي

    ReplyDelete
  17. NERMEEN:
    فعلا يا نرمين مسألة النسبية دي بتكون لحكمة من الله سبحانه وتعالى
    بخصوص الامتحانات ربنا يوفقك ويكرمك
    كاس وداير على الجميع
    تحياتي واحتراماتي

    ReplyDelete
  18. ياسر حسين:
    الف شكر لك يا فنان
    دة شرف كبير لي
    تحياتي واحتراماتي

    ReplyDelete
  19. هو كل واحد بياخد اللى شايفه الافضل

    ذى ما انت قلت هى نسبيه
    يعنى اللى انا ممكن ماخدهوش ممكن يكون احسن حاجه بالنسبه لغيرى والعكس

    ReplyDelete
  20. ذو النون المصري:
    لا هو الموضوع استنصاح من الاول يا ذو النون
    كل واحد فاكر نفسه عم الناصح اللي بيعرف ينقي الفاكهة بتاعته
    بس للاسف الفكهاني انصح منهم كلهم
    تحياتي واحتراماتي

    ReplyDelete
  21. عمرو غريب:
    ياعم عمرو ماتاخودنيش في دوكة....كان في بوست بيتكلم عن تعصب جماهير الاسماعيلي ضد الاهلي ولاعبيه
    راح فيـــــــــــــن؟
    تحياتي واحتراماتي

    ReplyDelete
  22. BOS BOS:
    يا سلام عليكي يا بس بس
    تعليق في الجول والله
    ايه الكلام الكبير دة
    الناس يا بس بس بتحب تعمل نفسها ناصحة في موضوع الفاكهة دة
    انما في الحياة العادية اديكي شايفة
    تحياتي واحتراماتي

    ReplyDelete
  23. تحياتي....

    أحييك علي البوست.... و فعلا كل شيء في الدنيا نسبي.... و هذا من رحمة ربي.

    و اؤكد كلام الاخت نيرمين " لولا إختلاف الأذواق لبارت السلع " هذا مبدأ معروف في التسويق.

    بالمناسبة...في رأيي طالما انك بتدفع السعر المطلوب الذي حدده صاحب السلعة
    فمن حقك أن تحصل علي الأفضل....

    تحياتي و تقديري ...و بالتوفيق دائما.

    ReplyDelete
  24. XEE:
    اولا اهلا بيك في مدونتي المتواضعة
    وانا فعلا احمد....الظاهر ان شكلي بيقول اني احمد
    الف شكر ليك على كلامك الجميل
    اتفضل الاغنية
    تحياتي واحتراماتي

    ReplyDelete
  25. ma_3alina:
    الف شكر ليك يا باشا على التاج
    التاج في طريقه الى المدونة
    علم وجاري التنفيذ
    تحياتي لك

    ReplyDelete
  26. ضد الظلم:
    على طول انت ربطت الموضوع دة بالبنات
    يا سلاااااااااام
    عموما التشبيه في محله البنات شبه المشمش برضه
    تحياتي واحتراماتي

    ReplyDelete
  27. نقطة مية:
    احزاب سياسية؟
    ياسلااااااااام انا من زمان نفسي اتفرج على الاختراع الجميل دة اللي بسمع عنه في اوروبا والدول المتقدمة
    يسمع من بقك ربنا
    تحياتي واحتراماتي

    ReplyDelete
  28. reemoo:
    تحسي كدة يا ريمو انها مسألة فلسفية فعلا
    يعني كل واحد بينقي من الموجود على اعتبار ان دة احسن حاجة وبينسى تماما ان الافضل في واحد قبله نقاه وساب له الاردأ بالنسبة له اللي هيكون الافضل بالنسبة لغيره
    حاجة غريبة فعلا...
    المهم انتي عاملة ايه؟ يارب تكوني كويسة
    تحياتي واحتراماتي

    ReplyDelete
  29. http://sfahmy78.blogspot.com/2007/06/blog-post.html
    منتظر تعقيبك على البوست الجديد

    ReplyDelete
  30. ماهو علشان كل شيء نسبى الناس بتنقى
    مفهوم الافضل والاجمل دايما بيختلف تبعا لفكره اختلافنا
    ولولا اختلاف الاذواق لبارت السلع
    كلامك بقي وصلنى لفكره تانيه ان حتى النسبيه دى بعض الناس ممكن تتحكم فيها
    لاحظت الموضوع ده مؤخرا
    ان بعض الاشخاص ممكن التأثير على نظرتهم للافضل والاجمل بمجرد الايحاء المباشر او الغير مباشر و من غير ما يكون له علاقه بالتبعيه او قوه او ضعف الشخصيه

    ReplyDelete
  31. MOHAMED A.GAFFAR:
    تمام كلامك
    بس الفكرة مش الغصب او الرضا....الفكرة اللي حبيت اوصلها هي فكرة انه كله هيتباع بس بوقته وان الافضل بالنسبة لي قد لا يكون هو الافضل بالنسبة للاخرين
    تحياتي واحتراماتي

    ReplyDelete
  32. شيماء الجيزي:
    الف شكر ليكي
    التحيات متبادلة طبعا

    ReplyDelete
  33. جيداء:
    اختلف معاكي يا جيداء....في الاخر هيلاقي حد ياخده على اعتبار ان دة افضل المتاح
    تحياتي واحتراماتي

    ReplyDelete
  34. hapasa:
    كل الحرية لعمر الشرقاوي
    ان شاء الله ربنا يفك سجنه
    تحياتي واحتراماتي

    ReplyDelete
  35. الربان:
    الف شكر ليك
    وجودك هنا في مدونتي المتواضعة شرف كبير لي
    تحياتي واحتراماتي

    ReplyDelete
  36. SHERIF FAHMY:
    انتظر تعليقي في القريب العاجل ان شاء الله
    تحياتي

    ReplyDelete
  37. عالمي ازرق:
    الدنيا كلها مبنية على نظرية النسبية وان مفيش حقيقة مطلقة الا وجود الله عز وجل
    تحياتي واحتراماتي

    ReplyDelete
  38. شـــو دكتور شو بتقول
    المشكلة فى المشمش ولا فى اللى بشترى المشمش اصل القضية كبيرة اوووى
    تحياتى لحضرتك
    :D

    ReplyDelete
  39. نظرية يا اخ سمير
    اول مره ادخل علي مدونتك وبصراحع عجبتني وهسجلها عندي وهبقي اتابعها ان شاء الله
    اما عن موضوع المشمش
    فطبعا انا مقتنع بنظريتك بس ممكن ايه اللي يحصل
    لما ناس تيجي تاخد المشمش الكويس وييجي في الاخر المشمش البايظ محدش ياخده ويضطر الفكهاني انه يغير القفص
    ايه اللي يحصل بقي للمشمش البايظ الغلبان ده
    ما ياخدش حقه في الدنيا ويتاكل
    ده كلام
    سلام

    ReplyDelete
  40. لو وقفنا قدام بعض و بينا رقم سبعة انت هتشوفه سبعه لكن انا هشوفه تمانية و هنتخانق على اساس ان كل واحد فينا صح

    محدش يملك ناصية الصواب و كل الامور نسبية

    ReplyDelete
  41. انت بتتكلم صح
    طالما جبت سيرة دراع مرسى يبقى بتتكلم صح هههههههههههههه

    الفكرة وصلتلى ولو انطبقت ع اللى بالى هتبقى تحفة بجد

    لا بجد فكرة جامدة جدا

    تحياتى

    ReplyDelete
  42. ملاحظة ممتازة وفعلا بتنطبق على حاجت كتير في حياتنا
    ندور وندور على احسن حاجة وبننسى ان ممكن نفس الحاجة دي تكون اترفضت من حد قبلنا
    الحياة كلها نسبية

    تحياتي ياباشا

    محمد سمير

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails