Thursday, 7 June 2007

تمييز ايه اللي انت جاي تقول عليه؟



"الحكومة تمارس التمييز ضد الأقباط في الوظائف والتمثيل السياسي.......والشرطة تتجاهل الحوادث ضد المسيحيين"

دي كلمات قالها مايكل منير رئيس منظمة اقباط الولايات المتحدة الأمريكية امام لجنة الحريات بالكونجرس

انا اعتقد انه قال الكلام دة على اساس ان المسلمين المصريين ناس عايشين بقى في بلادهم وواخدين حقهم تالت ومتلت وكمان كلهم واخدين وظايف عشرة على عشرة ومفيش ولا مسلم في مصر بيعاني من بطالة خالص

مفيش مسلم فيكي يا مصر مابيشتغلش كل المسلمين المصريين في مصر لهم وظايفهم اللي بتأكلهم الشهد

وعلى حسب كلام الأستاذ مكرم منير فأن المسيحيين المصريين يا عيني محدش فيهم بيشتغل خالص...كلهم يا حرام بيعانوا من البطالة ان حد يحن عليهم ويشغلهم....ابـــــــــــــــــــدا

تقريبا الاستاذ مايكل منير ماسمعش قبل كدة او محدش قال له عن الشركات اللي 90%من موظفيها من الأقباط وعلى سبيل المثال لا الحصر شركتي امون واكابي للأدوية وشركة موبينيل لخدمات المحمول وشركة غبور للسيارات

بكل أمانة ودي بقى وجهة نظري الشخصية انا مابحبش ابدا الشركات اللي بتنتقي موظفيها على اساس ديني سواء شركات مابتشغلش الا مسلمين او شركات كل موظفيها او 90% منهم على الأقل مسيحيين

ساعتها مش هيبقى بيزينس دة هيبقى تمييز ديني سواء ضد المسلمين من قِبل الشركات المسيحية او تمييز ديني ضد الأقباط من قِبل الشركات الاسلامية المتشددة

اما بقى ان التمييز السياسي ضد الأقباط فدي بقى النكتة الكبرى

دة برضة على اساس ان مفيش مسلم ما بيشاركش في الحياة السياسية وان التدرج الطبيعي في المناصب السياسية ماشي زي الساعة والناس عندها طموح سياسي وبيتحقق

ايه يا استاذ مايكل؟ انت مش من البلد دي ولا ايه؟

هو في حد اصلا سواء مسلم او مسيحي بيشارك في الحياة السياسية في مصر؟

يا استاذ مايكل ما كلنا عارفين الحياة السياسية في مصر ماشية ازاي.....مش ماشية على اساس ديني خالص....ماشية على اساس حاجات مالهاش دعوة بالدين خالص

اما بقى ان الشرطة بتتجاهل الاعتداء على المسيحيين.....فدي بقى نكتة فعلا.

المسيحيين المصريين يا حرام جثثهم في الشوارع والشرطة بتيجي تسأل الناس مين اللي عمل كدة...لو طلع مسلم يقولوا له برافو عليك وياخدوا بعضهم ويمشوا

ايه الكلام دة يا استاذ مايكل؟انت بتتكلم عن مصر؟دة في اي حتة في مصر الكلام دة؟

الأستاذ مايكل قال كلام كتير قوي قدام الكونجرس واطرف ماقاله ان الأخوان المسلمين توغلوا في كل مكان داخل اجهزة الدولة من القضاء للشرطة للصحافة وانه يخاف على الاقباط من نفوذ الاخوان المسلمين في مصر

استاذ مايكل:

هم الأخوان المسلمين مش في السجون برضة ولا ايه؟

هو انت بتتكلم عن مصر؟ اصلي الأمر التبس عليا....بجد والله اتلخبطت

استاذ مايكل:

المصريون كلهم بيعانوا من التمييز في مصر

46 comments:

  1. بصراحة احب ان اقول ان في حقيقة لازم الجميع يعرفها ان لافرق بين مسلم ومسيحي في مصر الا في مسألة الدين اي لكم دينكم ولية دين وهذة حقيقة يجب ان يعرفها كل شخص ثاني حاجة في حقيقة تانية وهي ان بحكم ان مصر دولة اسلامية و الغالبية العظمي من سكنها يدينون بدين الاسلام اذن من الطبيعي ان يحصل المسلمين علي امتيازات عن الاقباط في كل شي سواء في التعليم او الوظائف وهذا شي طبيعي بحكم الاغلبية ومن الممكن ان هذا يبقي شي لا طبيعي اذا كنا في امريكا

    ReplyDelete
  2. موضوعك فى الجون بجد يا احمد
    فعلا مايكل ده كانه بيتكلم عن مصر تانية غير بتاعتنا..محسسنا اننا بسم الله ماشاء الله المسلمين هنا فى مصر عايشين ملوك والمسحيين هما اللى متبهدلين.

    هو اظاهر مايعرفش ان ممكن خناقة عادية بين مسلم ومسيحى ممكن تتحول لامن الدولة وطبعا اللى هيروح فى الرجلين المسلم
    ولا مايعرفش ان المسحيين مسيطرين على نسبة كبيرة من شركات المقاولات والصيدليات والمستشفيات (مش هقول بقى موبينيل و اسمنت بشاى ولا هجيب سيرة حاجة)

    ولا اظاهر ما اخدتش باله من ظاهرة ان مفيش شحات مسيحى بنشوفه
    بص هقولك على حاجة انا على فكرة مش بقول الكلام ده تحريضا ضد الاقباط...أنا ليا صحاب مسحيين وعلاقتنا زى الفل مع بعض...انا بس بكره انهم يحسسونا انهم غلابة بقى و مضطهدين ...كلامى ده مش معناه ان حياتهم وردية وانهم مش بيعانوا من اى مشاكل...لا اكيد طبعا بيعانوا من مشاكل كتير زى مثلا انهم يبنوا كنايس جديدة فى الوقت اللى بيلاقوا فيهم ان فى ملاهى ليلة بتتفتح بمنتهى السهولة

    بس ارجع واقول وهو فى ايه فى مصر عدل عشان نقول ان مشاكل الاقباط اضطهاد..اضطهاد دى كلمة كبيرة اوى...احنا اللى شوية شوية هنطلب اننا نتساوى بيهم

    تحياتى ليك يا فندم

    ReplyDelete
  3. أنا أتكلم وأشتم براحتي
    بس محدش قاعد برة يتكلم
    دا راجل قاعد برة ومش دريان بحاجة
    بس دا مش معناه إن كلامه كله غلط
    الفكرة إنه فيه تمييز
    المسيحيين بيميزو بعض
    والمسلمين بيميزو بعض
    ودا بسبب إننا دايما بندخل الدين في تعاملاتنا مع الناس
    أنا مش عارف هتفرق مع الواحد إيه إذا كان اللي بيتعامل معاه مسيحي ولا مسلم ولا أي زفت

    نفسي مندخلش الدين ف حتت مش بتاعته
    تحياتي

    ReplyDelete
  4. متسيب الراجل يهرتل ماهو فعلا مش عايش في مصر
    وبعدين مش هو بس ولا دي اول مرة
    الراجل بيعمل شغل ونفسه يدوله عضمة في امريكا سواء في حكومة الولاية او الكونجرس
    يعني نوع من انواع الاستغلال واهي سلعة رايجة وهتلاقي اللي يشتريها منه هناك خصوصا اليومين دول
    بلا قرف

    ReplyDelete
  5. أقباط الخارج اللي زي مايكل منير وعدلي أبادير واللي زيهم .. كلامهم مش موجه للمصريين .. كلامهم موجه للإدارة الأمريكية والشعب الأمريكي بالذات اللي مش حيدور على صحة كلامهم وحيصدق أي حاجة حيقولوها مهما كانت ..

    يعني هو مش قاصد يسرد واقع .. لا .. هو قصده يكسب تأييد أمريكي وبالتالي فممكن يقول أي حاجة .. زي ما قال عدلي أبادير إن مصر دارفور تانية ..

    المشكلة بقى إنك تسمع من الداخل ناس بتأيد كلامه وبتساوم الحكومة بيه .. انا سمعت من أقباط الداخل ناس بتقول إنهم بناتهم مش بتقدر تمشي في الشارع وإلا بيتخطفوا .. دا غير كلام كتير من النوعية دي محتفظ بيه وكل اللي يتفرج عليه يضرب كف بكف

    الناس دي لو في بلد فيها نظام المفروض يتوجه ليهم تهمة خيانة الوطن

    ReplyDelete
  6. يعم سيب مايكل يسترزق

    ReplyDelete
  7. يبقى أنت أكيد أكيد فى مصر
    هو الأخ ده ماله بس يمكن عنده مشكلة ولا حاجة ومش عارف يحلها ومش لاقى حاجة يقولها أحنا ناقصين خنقة ده واحد عايش برة يعنى ميعرفش أيه اللى بيحصل هنا أرحمونا بقى شوية واحدة تبعت لنا علشان الكلاب وشوية أتنين دكاترة فى السعودية واحد مسلم والثانى مسيحى ويتخانقوا ويقول لك فتنه طائفية ودلوقتى الأخ دة
    أرحموناااااااااااا بقى وبلاش نتلكم أكتر من كده

    ReplyDelete
  8. دة راجل خاين فى نظرى عامل ذى كلاب العراق الى فضلو ينبحو من بره العراق لحد ما جه اسيادهم فى القصر الابيض ودخلهم الى البلد مايكل منير بيعمل لمصلحه نفسه فقط وعلى ما اظن انه لايمثل الا فئه حاقده على مصر ولا فرق بين مسلم ومسيحى فى البلد يعنى لما الفول ولا العدس بيغلى على الكل الاسعار بترتفع على الكل القطار بيولع فى الكل العباره بتغرق بالكل فكل المصريين يعانو من التمييز
    تحياتى صديقى العزيز

    ReplyDelete
  9. خلينا نتكلم بصراحة أولا وما ندفنش راسنا في الرمل .. بغض النظر عن مدى اتفاقي او اختلافي ما مبدأ مايكل منير .. او طريقته في التعبير عن اراءه .. لكن لو جينا لتحيليل الجملة اللي قالها في الكونجرس بس هنلاقي انها إلى حد بعيد جدا مظبوطة
    ..
    لما بيقول تمييز في الوظائف ده معناه الوظائف العليا وفكرة الكوتة أو النسبة دي موجودة فعلا
    كون ان بطاقة الواحد يبقى فيها بند يوضح دينه ده بيفتح باب مباشر لاحتمالية التمييز اللي دايما بيبقى من جانب الاغلبية لانها أغلبية .. وفيه ناس لم بتطضهد الاخرين بتبقى فاهمة ان دي خدمة لربنا


    اما تجاهل الشرطة فالتحقيقات وكلام الناس في قرية بمها بالعياط كلهم قالوا ان فيه ناس راحت بلغت الشرطة قبل الواقعة ب3شهور ان فيه حساسيات واحتمال تقوم خناقات او حاجة شبه كده بين مسلمين ومسيحيين في البلد
    والشرطة عملت ودن من طين وودن من عجين


    موافقاك تماما ان المصريين كلهم واقع عليهم ظلم .. من الفساد وسوء الحكم والضغوط الامنية المبالغ فيها والفقر والمرض وغيرها .. لكن في النهاية ان كان المسلمين واقع عليهم قيراط ظلم فالمسيحيين واقع عليهم قيراطين بحكم انه أقل عددا فبيقع عليهم ضغط النظام اللي واقع على كل المصريين وضغط بعض المسلمين اللي فاهمين غلط


    اكيد مايكل منير مش اهبل ولا ساذج عشان يكون فاهم ان الوضع بالنسبة للمسلمين عسل وزي الفل وبالنسبة للمسيحيين جحيم لا يطاق.. طبعا لأ .. المسألة نسب .. ودي باينة قوي .. لازم نفسر الكلام بحسب ما هو قاله مش بحسب تفسيرنا احنا للكلام.

    -وعندك حق بالنسبة للشركات اللي بتعين موظفيها على اساس ديني .. لانها بتكون خسرانة.. أصل المسألة مسألة ان الشغل كفاءات .. ماهو الواحد مش هيروح يصلي ويصوم في الشغل ,, هو رايح يشتغل ..

    --المصريين بشكل عام معندهمش تمثيل سياسي من اصله .. يعني رجل الشارع العادي لا يهمه اصلا ما يحدث على الساحة السياسية .. لكن كل الفكرة في مبدأ الكوتة المهبب
    انما المصرييين اغلبهم غير مهتم بالحياة السياسية اصلا

    وفعلا السياسة في مصر ماشية على حاجات تانية مالهاش دعوة بالدين
    وبصراحة كمان حاجات ماترضيش ربنا اصلا

    اما بالنسبة للاخوان .. اللي قاله مايكل منير مش طريف ولا حاجة .. اللي يعرف او قرأ تاريخ الاخوان وتطورهم هيعرف كويس هما قد ايه متوغلين وقد ايه حجم وجودهم في الشارع المصري ..
    وان كنت لا اتفق مع مايكل منير في انه يخشى على الاقباط من الاخوان ..
    انا شخصيا اخشى على مصر كلها بالمسلمين والمسيحيين بتوعها من الاخوان
    واخشى على اقتصاد مصر من الاخوان

    الاخوان الذين يرون ان اسلامهم هو فقط الاسلام الصحيح .. والذين يهادنون ما استطاعوا .. سيكون بطشهم بالمسلمين المختلفين معهم اكثر قوة من مساسهم بالاقباط ..

    انا لا اخشى على الاقباط من الاخوان
    اانا اخشى على مصر كلها منهم

    اما مقارنتك بين تعامل الدولة مع الاقباط وتعامله امع الاخوان
    او ما يقوله البعض من الاخوان انهم زي الاقباط مضطهدين في مصر باعتبارهم اقلية
    فهناك امر يجب ان نوضحه ..
    اولا: الاقباط ليسوا حزبا سياسيا ولا جماعة الاقباط جزء من المواطنين فقط يدينون بمعتقدات مختلفة ..
    ثانيا: الاقباط لا يسعون لاقامة دولة قبطية او الوصول للحكم وليس لهم اجندة سياسية بعكس الاخوان (وهي حقوقهم كجماعة او حزب ديني وطموح مشروع لمجموعة من الناس تريد الوصول للحكم)

    لذلك فتعامل الدولة مع الاقباط مختلف .. فالاخوان لهم اجندة سياسية .. وطبيعي انك لو اردت ان تأخذ مكاني (وانا الحكومة مثلا) سأقاومك واعتقلك واؤذيك لانك ترى انك احق مني بحكم مصر واني كحكومة كيان فاسد. يعني مسألة صراع على سلطة ..

    انما الاخوان لا يمثلوا كل المسلمين مثلا

    و من ثم فلا وجه ابدا للمقارنة

    وللعلم فان مايكل منير ومن مثله من المسيحيين المصريين الذين هاجروا ويعيشون في اوروبا يتحدثون باسم انفسهم .. اي ليس لهم صلة مباشرة او رسمية بالكنسية المصرية بل انهم اصلا على خلاف معها


    وتحياتي

    ReplyDelete
  10. يا جدعان منير مايكل اصلا مش عايش في مصر وشكله كمان نسي ان في مصر تمييز ضد المصريين سواء كانوا مسلمين او مسيحين الكل واقع عليه الظلم

    تحياتي

    ReplyDelete
  11. مش عارفه عم مايكل ده فعلا جاي منين فعلا
    دا المسحين اخدين حقهم وزياده وكفايا المعوناه اللي بيخدوها من اوربا ودول الخارج علي اساس انهم مظلومين في الدول العربيه وهو بيقول الكلام ده علي اساسا انه يزود المعونه بتاعتهم ولا دا اتفاق ضد الاخوان المسلمين ولا ايه مش عارفه بجد قال كلامه علي اساس ايه
    وسيبك من السياسه واللي بيقوله عم مايكل كل واحد فين كان ليه جار مسيحي او ليه صاحب ليه مسيحي عمرنا ماشوفنا التفرق ده او انهم مظلومين او اننا بنعملهم معامله واحشه بالعكس انا كان ليا جرانا تالت تربعهم كانوا مسحين كونا بناكل في طبف واحد وكنا بنعيد في اعياد بعض ولا عمرنا خوفنا من بعض وغير زميلنا اذا كان في مدرسه او كليه كلنا كنا مع بعض سوا مافي تفرقه عمره استاذ قال علشان انت ولا انت مسيحي هيكون في معاملات خاصه
    بجد عم مايكل ده باين عليه عايش في غيبوبه
    وال تميز ال يعني

    ReplyDelete
  12. عمرو غريب:
    فعلا يا عمرو لا فرق في مصر بين مسلم ومسيحي
    كلنا في الهم سوا
    وبعدين يا عمور امتيازات ايه للمسلمين في الوظايف؟ هو فيه وظايف من اساسه؟
    تحياتي ليك

    ReplyDelete
  13. nermeen:
    مايكل منير متبني قضية في ظاهرها عادلة وفي باطنها مليانة مغالطات وكلام مش حقيقي على الاطلاق
    اصلا اي خناقة بين مسلم ومسيحي مش بيتفاهموا اساسا بياخدوا عاطل في باطل
    انما الاخ مايكل بيقول انهم لما بيعرفوا ان الموضوع فيه مسلم بياخدوه بالحضن وبيحيوه على الجهاد
    مش عارف جاب الكلام دة منين؟
    وفعلا انتي جبتي من الاخر
    احنا اللي هنطالب نتساوى بيهم
    ملحوظة
    انتي ليه بقالك كتير مش بتكتبي حاجة في مدونتك؟
    تحياتي واحتراماتي

    ReplyDelete
  14. the alien:
    المسيحيون بيميزوا بعض....والمسلمون بيميزوا بعض
    والحكومة بتميز رجال الاعمال على الاتنين
    لنا الله يا مصريين
    تحياتي واحتراماتي
    قاسم افندي:
    منور المدونة بعد غيبة طويلة
    انا نفسي الراجل دة يتكلم عن التمييز ضد كل المصريين...هو ليه محسسني ان المسلمين عاملين محارق نازية للمسيحيين في مصر؟
    هو مش واخد باله ان احنا كلنا في المحرقة ولا ايه؟
    تحياتي واحتراماتي

    ReplyDelete
  15. http://hapasa.blogspot.com/2007_02_04_archive.html

    أحمد باشا ده تدوينى قديمة قوى قوى قوى
    ابقى بص عليها بس
    انا مش عالق علشان حضرتك قلت المفيد وزيادة
    بس أنا بادعوك لزيارة موقع الجمعية القبطية الأمريكية بتاعة مايكل منير وموريس صادق وعدلى ابادير والشلة اللوز ده
    هتلاقى العجب ممن تتتعمل مدونة مخصوص علشان ترد مع إن أي مسيحى مش مسلم هايدر على أقول ايه بلاش هاقدر يرد على ده

    هاتبقى منين ولا منين

    ReplyDelete
  16. يمكن يقصد تمييز بتاع الكورن فليكس

    ماتظلموش الراجل

    ReplyDelete
  17. تسلم ايدك يااحمد
    هو فعلا مايكل منير ده بيسترزق من الكلام اللي هو بيقوله وهو عارف كويس ان مفيش فرق بين معاملة المسلمين والمسيحين في مصر
    دا واحد عايش في الهامبرجر عايز يبقى زعيم وكبير النجع وخلاص وعلى حساب المسيحين نفسهم كمان المهم مصالحه هو واللي حواليه
    وحياة سياسية ايه اللي بيتكلم عليها..دي حاجة في التلفزيون بس
    دا الاخوان قربوا يخلصوا من كتر مابيتقبض عليهم

    يلا منه لله
    تحياتي لموضوعك الجامد

    محمد سمير

    ReplyDelete
  18. مايكل منير ده إنسان مستفز
    هو شايف إن المسلمين واخدين حقهم
    والمسحيين مطحونين
    مع إن كل المصريين مطحونين
    بالعكس بقي
    وإنت ذكرت أمثله
    أغني رجال أعمال في مصر نجيب ساويرس وإخواته مسحيين
    ألا يدل هذا علي أن كلامه أكاذيب

    الإخوان المسلمين تحاربهم الحكومه بضراوه ومصره علي إعتقالهم وتسميتهم بالجماعه المحظوره
    هل يعتبر هذا إضطهاد للمسلمين في مصر
    يروحوا بقي يشتكوا لأمريكا

    الراجل ده فاضي ورايق ييجي يشوف فرن العيش ويقف في الطابور علشان يعرف إن كرامة المصري متبعتره
    ييجي يركب في المواصلات ولا يدخل قسم بوليس وياخد قفا علشان يعرف إن المصري أصبح في نظر النظام كائن غير حي
    لا تقولي مسلم ولا مسيحي بقي

    البوست ده بيناقش موضوع مهم وحساس اوي
    بحييك عليه بجد
    سلامااااااااااااات

    ReplyDelete
  19. بص انا معنديش مانع نبدل
    هما ياخدو الرئاسة
    طبعا مش حنغير مبارك
    مبارك قاعد
    هو بس حيغير دينه
    ودى بسيطة طبعا
    ابسط كتير من رئيس جديد
    وياخدو الاغلبية
    وياخدو كللللللللل اللى خدتو القرعة
    وهما طبعا بقو ام الشعور
    واحنا حناخد بس مساندة امريكا
    حلوة اللعبة دى؟؟؟

    ReplyDelete
  20. مايكل منير ممكن يكون بيبالغ
    بس انا معاه فى كل ما يقول
    هو فيه تمييز حكومى ضد الشعب كله
    و الشعب كله بيطلع تمييزه على الاقباط
    و طبعا الشركات الخاصة برة موضوعنا لان هما أحرار انشالله حتى يكونوا كل اللى مشغلينهم يهود
    المشكلة فى القطاع العام
    و مش معنى انها قضية تافهة يبقى ننشغل بالاهم
    ايه المانع اننا نتناول كذا قضية طالما هناك متخصصين
    و لا تنسى اخر فتنة طائفية من قرابة شهر فى العياط يا عزيزى

    ReplyDelete
  21. ma_3alina:
    طب ومين المسئول عن ان كلام عدلي ابادير ومايكل منير يتصدق في الغرب؟
    معندناش سفارات تفهم الناس ان الكلام دة مش صح؟
    ليه بنديهم المصداقية والفرصة بسكوتنا؟
    طبعا مفيش شك ان في ناس من الداخل بتحب تركب الموجة
    المفروض يتوجهلهم تهمة الخيانة لو كنا في بلد طبيعية
    تحياتي

    ReplyDelete
  22. MOHAMED A.GHAFFAR:
    معتقدش ان مايكل منير هدفه انه يسترزق
    الرجل على ما اعتقد مؤمن بقضية ولكن عرضه للقضية دي هي اللي خطأ
    بمعنى انه بيستخدم المبالغة وكسب تعاطف امريكا بحكايات مغلوطة وغير حقيقية على الاطلاق
    تحياتي لك
    BOSBOS:
    علشان حالة الكبت اللي الناس عايشاها يا بس بس بيطلع الحاجات اللي زي دي
    بمعنى ان احنا لو في مناخ سياسي محترم وكل واحد بيعرف يعبر عن نفسه وياخد حقه مكنش ظهرت الظواهر الغريبة دي
    تحياتي ليكي

    ReplyDelete
  23. ضد الظلم:
    هو الرجل فاكر نفسه هيوصل للي هو عايزه بالطريقة دي
    وبيني وبينك هي بتنجح احيانا يعني
    بس العيب كل العيب بجد انه يصور للعالم حاجة مش حقيقية
    بمعنى انه لو قال ان المصريين كلهم بيعانوا او ان الواسطة والمحسوبية متوغلة في مصر بشكل كبير كان يبقى على حق
    انما انه يوهم الغرب ان المسلمين عايشين في الجنة وان المسيحيين في مصر بيعاملوا معاملة العبيد فدة مش صحيح خالص
    تحياتي لك منورني دائما

    ReplyDelete
  24. BLUESTONE:
    موضوع الديانة اللي في البطاقة مش مقصود بيها التمييز الديني على الاطلاق
    ولكنها موجودة في البطاقة لأسباب تتعلق بقضايا الاحوال الشخصية
    بمعنى موضوعات النسب والزواج والطلاق والميراث والحاجات دي كلها
    فدة هو السبب من وجود الخانة دي
    اما بالنسبة لموضوع الشرطة وتجاهلها لحوادث الاقباط
    احب اوضح لسيادتك واؤكد لكي ان اي خناقة بين مسلم ومسيحي وراحوا القسم هتلاقيهم هم الاتنين بيتعاملوا اسوأ معاملة وهم الاتنين مشرفين في التخشيبة
    الشرطة المصرية والحق يقال لا تفرق في معاملتها بين مسلم ومسيحي خالص
    الاتنين بيتسحلوا
    انتي ليه متصورة ان المسلمين بيكرهوا الاقباط
    دة مش حقيقي على الاطلاق...انتي مش شفتي مسلمين بيتعالجوا عند اطباء اقباط والعكس
    بمعنى اني لو بكره بني ادم عمري ما هسلمه صحتي يعبث بيها
    مفيش شك في ناس متطرفة مسلمة وكمان ناس متطرفة مسيحية وبرضة في متطرفين يهود
    وكمان في متطرفين ملحدين لا يؤمنوا بأي دين
    وبعدين ليه المسلمين ما بيشتكوش ومش بيتكلموا على سوء معاملة الاقباط ليهم في بعض قرى الصعيد ذات الاغلبية المسيحية
    لأن دة مش موجود اصلا
    المسلمون لا يعانوا من الاضطهاد على الرغم من انهم اقلية في بعض القرى
    بالنسبة للشركات الي بتشغل موظفيها على اساس ديني فعلا مسألة انا بشوف انها مستفزة جدا
    بس للأسف هي ظاهرة منتشرة وبقوة
    اما بقى الحياة السياسية في مصر فزي مانتي قلتي فساد وبوظان عام وفي كل مكان...يبقى مش معقول هنتكلم على الكوتة في نظام سياسي بايظ من اساسه
    انا كنت اؤيد الاقباط بشدة لو قالوا انهم لا يشرفهم انهم يتمثلوا سياسيا في نظام زي كدة انما هم مصممين على حصة اكبر مش عارف ليه؟
    وبعدين اخوان ايه اللي متوغلين دول؟
    انتي اكيد تقصدي انهم متوغلين في السجون كسجناء طبعا
    تعرفي ان لو فيه واحد له قريب من الدرجة الرابعة اخواني لا يقبل في اي كلية عسكرية ولا في القضاء ولا النيابة؟
    هييجي منين التوغل دة؟
    على فكرة انا مش اخواني بس بحب دايما اقول اللي ليا والي عليا
    الاخوان توغلهم نابع من قربهم من الشعب والطبقات الفقيرة بيقدروا يعالجوهم ويساعدوهم ويجوزوهم
    يعني نفوذهم نابع من حب الناس ليهم؟
    تقدري تقولي لي دة بيمثل اي انواع من الخطر ع الاقباط وعلى مصر كلها؟
    انتي ليه مصدقة ان لو الاخوان المسلمين وصلوا لحكم مصر هيدبحوا الاقباط ويرجعونا لعصور حجرية؟
    اشمعنى دي اللي صدقتوها؟
    انا راجل ليبرالي بشوف ان وصول اي حد ان شاء الله العفريت الازرق للحكم هو حق مشروع طالما جاء عبر صناديق الانتخاب
    انا مختلف معاكي لما قلتي ان من حقي كحكومة لو انت عايز تاخد مكاني اني اعتقلك واسجنك؟
    يا سلااااااااااام
    مانلغي الانتخابات احسن
    مفيش حاجة اسمها كدة....في حاجة اسمها ان احنا كلنا بنحب مصر وكلنا بنتنافس لخدمة الشعب دة-او المفروض كدة يعني-وبالتالي مفيش حاجة اسمها اهاجمك واعتقلك واعذبك علشان انت لك طموح مشروع للسلطة
    تحياتي واحتراماتي ليكي
    ارجو ان تكوني صديقة دائمة للمدونة

    ReplyDelete
  25. والله مش عارفه اقول ايه يادكتور
    انا باضايق اوووى من الناس اللى قاعدة بره وبتتكلم وخلاص
    وهو مين فى مصر واخد حقه بل بالعكس المساجد بتغلق ولا تفتح الأ فى مواعيد الصــلاة بامر من الامن والكنائس مفتوحة طوال اربعة وعشرين ساعة
    خطب الجمعة لازم تمر على الامن ام خطب الكنائس لا رقيب عليه
    الاخوان المسلمين اتملأت بيهم السجون والمعتقليين من السلفيين واصحاب الذقون دون محاكمات باقلهم عشرات السنين
    ايه تانى
    طب ما لبنان اغلبية مسيحية ورئيسها ميسحى واحنا مصر اغلبها مسلمين والرئيس مسلم
    يعنى الاغلبية مش اكتر
    ربنا يوفق الجميع
    ويصلح حال مصر يارب آمــــــــــين

    ReplyDelete
  26. ALSHARED:
    فعلا
    انت معاك حق
    محدش في مصر واقع عليه تمييز
    الكل في مصر محدش ليه اي ميزة
    تحياتي واحتراماتي
    MEROOO:
    في حاجتين بتبوظ اعصاب النظام المصري
    اسرائيل والاخوان المسلمين
    بيحسسونا ان الاتنين دول هم دايما الفاعل انما مصر يا عيني هي المفعول به على طول
    ماتستبعديش انه يكون اتفاق ضد الاخوان برضة
    فعلا والله معاكي حق
    انا عن نفسي في المجتمع بتاعي مفيش فرق ابدا بين المسلم والمسيحي
    الاتنين بيعانوا نفس المعاناة اليومية والاتنين بيفرحوا لنفس الحاجات
    مفيش حاجة عندنا من الاضطهاد والتمييز
    تحياتي واحتراماتي يا ميروو

    ReplyDelete
  27. أ.سمير


    ادعوك للمشاركة في استفتاء اكثر 10 مدونات تاثيرا في قرائها

    عل مدونتك تكون واحدة منهم

    اليك الرابط

    http://www.6ef.blogspot.com/

    ReplyDelete
  28. hapasa:
    الف شكر ليك يا منذر
    بالنسبةلمواقع اقباط المهجر انا بشوفها لذيذة جدا بتبقى مليانة حكاوي مسلية جدا عن ناس بيتعذبوا وبنات بتتخطف
    بتديني جو شيكاجو
    بحس ان انا لازم اعمر الطبنجة قبل ما انزل
    تحياتي ليك وان شاء الله هطالع التدوينة دي
    تحياتي واحتراماتي

    ReplyDelete
  29. kimexlilo:
    لو يقصد تمييز الكورن فليكس يبقى الراجل عداه العيب بصراحة
    طبعا في تمييز في الكورن فليكس
    الشعب كان بيستلم 3 كيلو كورن فليكس في الشهر دلوقتي يا دوب بيدوهم علبة من السوبر ماركت
    مش عارف الشعب الغلبان دة هيعمل ايه؟
    تحياتي واحتراماتي
    غمض عينيك:
    لا يا بو حميد
    قربوا يخلصوا ايه؟
    دة على حسب كلام عم مايكل انهم متوغلين ولهم نفوذهم الرهيب في كل حتة في مصر
    اعتقد انه بيتكلم عن السعودية بدل مصر مثلا ولا حاجة
    اللي هيجنني فعلا
    نفوذ ايه بس ومتوغلين فين؟
    انت شفت حد متوغل؟
    تحياتي واحتراماتي

    ReplyDelete
  30. reri:
    انا من وجهة نظري ان الراجل عايز يكسب تعاطف الادارة الامريكية بأي طريقة حتى لو كانت ملفقة
    ودة غلط طبعا
    الراجل دى اقصى مشاكله مثلا انه مش عارف يودي الفلوس فين؟
    فاضي بقى فقرر يبقى مجاهد كبير
    تحياتي ليكي يا ريري والف شكر على كلامك

    ReplyDelete
  31. البتاع:
    يا بنتي انتي غاوية تخبطي في الحلل؟
    البيج بوس بتجيبي سيرته ليه دلوقتي؟
    الرجل مسلم ومتدين وبيحتفل بمولد النبي روليلة القدر وبيبعت مندوبين لاستطلاع هلال رمضان والاحتفال بنصف شعبان
    يبقى بتهاجميه ليه بس؟
    ميم
    انتي اللي هتجيبي اجل المدونين المصريين
    تحياتي واحتراماتي

    ReplyDelete
  32. احمد مختار عاشور:
    ماحنا ماختلفناش يابو حميد ان في تمييز ضد الشعب كله
    لكن هل انت شايف ان احوالنا كمسلمين زي الفل وان الاخوة الاقباط بيتسحلوا في الشوارع؟
    هل الاخوان المسلمين نفوذهم وصل كل مكان؟
    الا اذا كان وصل ليمان طرة
    اما الفتن الطائفية كل حين واخر دي راجعة لجهل وقلة وعي المشاركين فيها
    ماسمعناش عن فتنة طائفية في الزمالك مثلا او في مصر الجديدة
    وبالتالي لابد من توعية الناس صح اذا كنا مش عايزين دة يتكرر تاني
    تحياتي واحتراماتي

    ReplyDelete
  33. اماني:
    مايكل منير بيحاول يكسب تعاطف الادارة الامريكية بس من خلال معلومات مغلوطة
    تحياتي واحتراماتي ليكي

    ReplyDelete
  34. كلامك مضبوط مليون في الميه و انا كمسيحي عمري ما حسيت بوجود مشكله تمييز أو اضطهاد و حتي لو حصل و تعرض البعض لمشاكل فهي تدخل في النطاق الفردي و لا يمكن تعميمها لان ببساطه الحكومه و الحزب الوطني بيضطهدوا المصريين كلهم و قرفينا في عيشتنا كلنا و فعلا في شركات 90% منها مسيحيين زي ما أنت قلت و انا رافض هذا الموضوع تماما لانه ترسيخ للطائفيه و كذلك الحال للشركات اللي بترفض تعيين مسيحيين
    علي فكره انا عاوز أقول للكابتن مايكل منير أن 50 % من الثروه في مصر في ايدي مسيحيين
    :)
    تحياتي لك

    ReplyDelete
  35. لما تحب حد وتهتم بيه وتخلص له وهو ميبادلكش الاهتمام دا غير لما يكون فاضي ومش وراه حاجه .. تفتكر هتكون سعيد .. تفتكر هتقدر تحترمه اساسا

    ReplyDelete
  36. ده إيه الموضوع الجامد ده؟ وكمان التعليقات قوية برضه

    تحياتي ليك ولجميع المعلقين

    أنا عجبتني جدا الفكرة الأساسية اللي بيدور حواليها البوست وهي إن الإضهاد السياسي واقع على الجميع بلا إستثناء

    ومحاولة إقناعنا بإن الإضهاد ده واقع على فئة بعينها بيكون زي الصيد في المياه العكرة .. وعموما المياه هناك حوالين الكونجرس الأمريكي عكره قوي

    ReplyDelete
  37. بصراحة حاجة تزعل أن في ناس سايبة المشكلة الأساسية ومركزه في نفسها بس يا جماعة ده إحنا كلنا في الهوا سوا في الحقيقة لا أعمل ماذا أشعر أحيانا أن هناك من يريد العبث بالوحدة المصرية للمصريين فلا أعتقد أن هذا الشخص يعبر عن رأي أقباط مصر بأي صورة من الصور

    ReplyDelete
  38. micheal:
    جميل جدا اننا نحس اننا مصريين في المقام الاول
    فعلا انا مسلم وانت مسيحي بس دة في المسجد والكنيسة
    انما مصر وطن يسعنا كلنا
    الف شكر على تفكيرك الراقي
    تحياتي واحتراماتي

    ReplyDelete
  39. TUNA:
    طب وليه بتفترضي سوء النية
    ليه مايكنش دي شخصيته؟
    هو كدة ربنا خلقه كدة
    في ناس مابتعرفش تعبر عن حبها
    ليه مايكنش بيحب طول الوقت بس معندوش المقدرة انه يظهر دة
    تحياتي ليكي

    ReplyDelete
  40. يامراكبي:
    وجودك في مدونتي شرف كبير ليا فعلا
    تحياتي ليك وارجو انك تنورني باستمرار

    ReplyDelete
  41. شباب روش طحن:
    انا اعتقادي الشخصي ان الراجل دة مؤمن بقضيته جدا ولكنه اختار الطريق الغلط للتعبير عنها وكسب تعاطف الغرب
    تحياتي واحتراماتي

    ReplyDelete
  42. صديقي العزيز ..و الله و لا تحرق دمك احسن حاجه انك تتجاهل الاشكال دي و اكنها مش موجوده لان انا مستخسر حته ان الناس تعرف اسامي الاشكال دي عن طريقنا ...تحياتي ليك و انا بجد بكون سعيد دايما و انا بزور مدونتك ..اتمنى لك التوفيق دايما
    تحياتي

    ReplyDelete
  43. معلش انا تاني عايز اقول حاجه ..دي نكته تنفع الموضوع بتاعك
    مواطن بتكلم مع مسؤول كبير
    المواطن :ممكن سؤال
    المسؤول الكبير:اتفضل
    المواطن :هوه ممكن واحد مسيحي يبقى وكيل وزاره
    المسؤول الكبير :ايه السؤال ده انت مش عايش في البلد طبعا ينفع و في كتير
    المواطن :انا اسف بس سؤوال تاني ممكن
    المسؤول الكبير :اتفضل
    المواطن:هوه ممكن واحد مسيحي يبقى وزير
    المسؤول الكبير :طبعا يا بني و عندنا كتير اوي مبنفرقش بين حد
    المواطن :معلش استحملني طب ممكن يكون رئيس وزراء
    المسؤول الكبير :طبعااا لو اثبت كفاءه و كان مناسب ليه لاء احنا معندناش تمييز
    المواطن :طب واحد مسيحي يكون رئيس جمهوريه
    المسؤول الكبير: و لا مسلم ياروح امك

    ReplyDelete
  44. أكيد كل المصريين مطحونين بس أكيد أن فيه تمييز برضه ضد المسيحيين و ده نتيجة الفكر المغلوط لما المسلم يحس أن كل المشاكل نتيجة وجود المسيحيين الكفار و أن الدولة لازم تدفعهم الجزية وكلام كتير لاستثارة عواطف المسلمين و بعدين أنت بتقول يعنى الاخوان من حقهم يستنجدوا باالخارج ...طيب ما كل قادة الجماعات كانوا عاملين لجؤ لبلاد أوروبا ...أنا شخصيا نفسى أعتمد بنسبة 100 % فى حل مشكلات المسيحيين على المسلمين بس خسارة الاخوان دائما واقفين ضد أى قوانين بتسلوى بين المصريين و منتظرين وقت ياخدوا فيه الحكم علشان ينفذوا مخططهم ...مش مصدق ؟ زور المدونة دى مثلا http://alsarem-alhasem.blogspot.com/
    فكر عنيف جدا ...المسيحيين عاوزين يشاركوا فى الحكم مش ياخدوا الحكم زى الاخوان علشان كده السجون مليئة بلاخوان أكتر ...وطبعا التدين المظهرى و الفكر الاخوانى متغلغل فى المصالح الحكومية فيه موظف مسيحى يقدر يقرأ الانجيل فى مكتب حكومى مثلا ؟ و التعصب ده بيظهر مثلا فى حالة بناء كنيسة و محاولة عرقلتها بطلب مستندات غير ضرورية ولما ربنا يسهل بعد 10 سنين و ياخدوا التصريح تيجى مباحث أمن الدولة تمنع بناء الكنيسة لأسباب غير معلومة و اللى باقوله ده حصل عدة مرات و بعدين أنت زعلان مايكل منير طيب ما هو أكيد بيتكلم على الجزء المريض من مصر مش معنى أن أنا عندى أصحاب مسلمين يبقى أتغاضى عن حرق بيوت ناس غلابة فى بمها بيوفروا قوتهم بالعافية دى حالة منفصلة لازم الغلط يتعالج مش نخبيه ..و ده اللى الحكومة بتحاول تعمله علشان خايفة على مصالحها ....ياريت كل المصريين يبقوا عايشين فى مصر الجديدة علشان ما يبقاش فيه تمييز و يا ريت كل المسلمين يبقوا زى أصحابى المسلمين ما يعتبروش بناء كنيسة عمل يهدد الاسلام و الأمن القومى و الكلام الكبير ده

    ReplyDelete
  45. عجبني اوي رد الاستاذ عبد الغفار
    سيب مايكل يسترزق
    وبرده عجبني جدا رد ما علينا
    وبصراحه تعليقي هيبقي انك تقرا التعليقين بتوعهم بس
    شكرا
    احييك عالموضوع ده بجد

    ReplyDelete
  46. شوف يا احمد
    انا مقلتش ولا متصورة ان المسلمين بيكرهوا الاقباط انا مقلتش كده
    وموافقاك تماما ان فيه متطرفين في كل الاتجاهات والاديان وحتى الملحدين لديهم متطرفين في الحادهم برضه ..
    لكن خلينا نكون واقعيين المتطرفين الاسلاميين في مصر تطرفهم عنيف وموجه غالبا ضد الاقباط
    بمعنى اني اعرف ان فيه متطرفين مسيحيين لكن عمرك شفت متطرف مسيحي ضرب مسلم؟؟ بخنجر ولا شوية مسيحيين متطرفين حرقوا جامع ؟؟
    المشكلة مش تطرف وبس
    المشكلة العنف المصاحب للتطرف
    هو ده المشكلة الأساسية .. وهو ده اللي كنت بتكلم عليه

    الاتنين مطحونين .. بس فيه واحد مطحون من فوق بس والتاني مطحون من فوق ومن اخواته كمان


    لما اتكلمت على الأمن ماتلكلمتش عن المعاملة في اقسام الشرطة كنت بتكلم عن رد فعل الشرطة تجاه أحداث او هجمات .. في العياط مثلا كان فيه شكوى قبل الهجمات ب3 شهور والأمن متحركش
    في اسكندرية الأمن اتحرك بعد انتهاء الهجوم على الكنيسة اصلا
    معنى كده ان الامن بيتحرك لوقف رد الفعل مش منع الفعل

    وزي ما انت قلت لما بيكون فيه مسلمين اقلية مش بيعانوا من اضطهاد
    حتى مع وجود التطرف المسيحي اللي انت قلت عليه

    الاخوان متوغلين بين الناس .. بالخدمات والشغل , وعلى فكرة هما عندهم فكر تنظيمي عالي جدا .. انا مش بتكلم عن السياسة ولا القيادات بتكلم عن التوغل الداخلي
    انا متأكده مليون في المية ان الاخوان مش هيحكموا البلد في يوم من الايام لاسباب كتير مش مجالها دلوقتي لكن في النهاية مانقدرش ننكر ان النظام كتير بيتغل فزاعة الاخوان لتهويش الاقباط ولتهويش الغرب كمان
    بنظام (هو ده البديل ان كان عاجبكوا ومفيش غيري)

    المشكلة في الاخوان مش انهم بيكرهوا الاقباط بالذات .. المشكلة انهم ماعندهمش ادني قبول للآخر .. عندي قناعة انهم على افتراض شبه مستحيل وصلوا للحكم الاقباط مش هيكونوا على اجندتهم .. على الاقل في البداية ..
    لكن هتلاقي كل التيارات الاسلامية المختلفة معاهم وهتلاقي المعتدلين والليبراليين .. وكل المختلف معاهم
    وخد في ايدك الفن والسينما والاقتصاد كمان

    بس برضه الفكرة الاساسية في ان النظام احيانا ما يستغل خوف الاقباط والغرب من الاخوان اسوأ استغلال

    انتخابات ؟؟ هو احنا عندنا انتخابات اصلا يا راجل ؟؟
    ولما كنت بتكلم عن فرضية الحكومة في صراعها مع الاخوان .. كنت اقصد حكومة مش ديموقراطية طبعا لازم تعتقل وتقهر اي مخالف ليها .. ده طبيعي والاخوان اكيد فاهمين كده كويس ..
    ما هم مش مرشحين نفسهم في باريس مثلا


    تحياتي مرة تانية
    ومتابعة دائمة

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails