Wednesday, 16 May 2007

تاج جديد سعيد

تاج جديد من زميلي الصيدلي الشاب شادي فايد نظارتي السوداء
راجل فيه الخير بجد
اول ما التاج وصل ليه باصى على طول
على الرغم ان التاج طويل وعايز مخمخة جامدة جدا...الا انه ممتع بصراحة
ولذلك نخش في الموضوع على طول
&&&&&&&&&&&&&&&&&&&&&&&
احب شخص لقلبك في الدنيا؟
والدتي طبعا
ربنا يديها الصحة ويخليها لي

---------------------------------
انسان مستعد تضحي بحياتك-ركز في كلمة حياتك-علشانه؟
بص هو الكلام مفيش اسهل منه يعني ممكن اقول لك والدتي ووالدي وكدة
بس هل ساعة التنفيذ ممكن يحصل كدة؟
مش عارف والله
ماجربتش ويارب ماجربش ابدا
دي على فكرة مش انانية دي واقعية وصراحة شديدة جدا
---------------------------------
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
محدش خالص
اصل انا مش غاوي قتل بصراحة
ولو بكره حد قوي كدة...هتجنبه تماما مش هتعامل معاه بدل ما اقتله واروح فيه في مصيبة
-------------------------------------
ما هو:اسم أجمل كتاب كتبه بشر قرأته ومحتفظ به حتى الان؟
انا مش غاوي كتب قوي..غاوي جرايد و مجلات
وبعتبر الجريدة ممكن تكون اقوى و اقيم من كتب كتير بما فيها من مقالات ورأي وموضوعات مختلفة
بس ممكن نقول
خريف الغضب لمحمد حسنين هيكل
اي مجموعة قصصية لنجيب محفوظ

---------------------------------------
اهم جهاز منزلى انت متعلق بيه او بتستخدمه كتير؟
الكومبيوتر والموبايل
-------------------------------------
مكان تحس بالراحة عندما تدخله؟
اوضة نومي
-----------------------------------
شىء تحس بالراحة النفسية عندما تنظر اليه؟
الصيدلية بتاعتي لما تكون فيها زباين بيشتروا
-----------------------------------
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
اي مكان كنت بروحه وانا صغير ومابقتش اروحه دلوقتي
المدارس اللي كنت فيها في ابتدائي واعدادي وثانوي
الكلية والجامعة بشكل عام
جدة اللي قعدت فيها سنة على الرغم ان كان فيها ايام كتير مش لطيفة بس ساعات كتير بحن للأيام الحلوة اللي كانت فيها
--------------------------------------
اجمل مدينة زرتها داخل مصر؟
اسكندرية والساحل الشمالي
--------------------------------------
اجمل مكان طبيعي رأيته في مصر؟
مارينا
---------------------------------------
شخصية كرتونية بتحبها؟
بابار
مش عارف عارفينه ولا لأ
بس هي شخصية فيل كان دمه خفيف جدا...كانت بتتعرض في التليفزيون وانا صغير وكنت بحبه قوي
----------------------------------------
نوع هاتفك المحمول؟
NOKIA N91
-----------------------------------------
سرعة بروسيسور جهازك؟
ايه بقى الاسئلة المحرجة دي
انا ماليش في الكلام دة خاااالص
معرفش الحاجات دي في الكومبيوتر
انا كل اللي بعمله اني بشتغل ع الكومبيوتر بس...انما لو لاقدر الله حصل فيه حاجة..هحط ايدي على خدي واقعد جنبه
------------------------------------------
حجم ذاكرة-هارد-جهازك؟
اذا كان كدة معلش
دي انا عارفها كويس
80 GIGABYTE

------------------------------------------
المساحة التي تشغلها المواد الاسلامية على جهازك؟
بكل امانة وعلشان احنا اتفقنا مانكدبش
قليلة
ودة لاني مابحبش اتفرج على حاجة على شاشة الكومبيوتر
يادوبك حاطط قرأن وقصص الانبياء بصوت دكتور طارق سويدان

---------------------------------------------
نفس المساحة السالف ذكرها فى قلبك
-الاجابة لنفسك عشان الرياء يا اخواننا -؟
مقدرش اقوللك
ممكن تجيب لي اسلاموميتر علشان اقيس كويس
بس اكيد اكتر بكتيييييير جدا من مساحتها ع الهارد ديسك

--------------------------------------------
أهم هدف انت واضعه لحياتك الآن؟
اني انجح في شغلي جدا
احس اني فعلا كان لازم ارجع من السعودية علشان انجح هنا
مش عايز اندم اني عملت كدة

-------------------------------------------
مواصفات فتاة الأحلام بالنسبة لك؟
بنت نـــــــــــــــــــــــاس
من عيلة محترمة...مش محترمة يعني غنية....لا انما تحس انها بنت اصول
بحب انا العائلات اللي بتناسب بعضها يكونوا على درجة عالية من التقارب في كل حاجة
وطبعا تكون شكلها كويس و شيك ومتدينة وبتعرف تتعامل مع الناس ولو اتحطت في موقف تعرف تسد فيه كويس
مش مهم تكون محجبة بقدر ما لازم يكون لبسها محترم

-------------------------------------------
صف ما يأتى:
شعورك لما بتسمع كلمة مصر
مين اللي بيقولها وبيقولها في اي مناسبة
يعني لو عربي او اجنبي مثلا بيشتمها تلاقيني بغلي...لو مصري هو اللي بيشتم تلاقيني متضايق بس مش بغلي على اساس انه اكيد بيشتمها حبا فيها
بتختلف بحسب لو عربي او اجنبي بيمدحها تلاقيني برقص من السعادة والفخر...لو مصري هو اللي بيمدحها فدة بيبقى شىء عادي بحب ساعتها اعرف الشخص دة قصده مصر بتاعتنا ولا مصر اللي يعرفها

***************
شعورك لما بتسمع كلام عن اليهود
بقول برافو عليهم....بيحبوا بلدهم بطريقتهم
ياريتنا نعرف نعمل لمصر زي مابيعملوا لاسرائيل
*********************
شعورك لما بتشوف ضابط شرطة
بيبقى نفسي اسأله
انت منفوخ كدة ليه؟

*********************
شعورك لما بتشوف الكناس العجوز في الطريق؟
بعرف ليه شوارعنا مش نضيفة
--------------------------------------------
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
بسأل نفسي ياترى الشاب دة بيبص لي ازاي؟
هل بيعتبرني من الكفار ولا شايفني ممكن اكون مسلم زيه

--------------------------------------------
احساس يراودك فى اشارة مرور مغلقة بسبب مسئول كبير؟
بقول لنفسي
طيب لو في واحد بيموت في عربية اسعاف مش عارفة تعدي علشان سعادته او فخامته
ذنب اللي بيموت دة....في رقبة مين؟

-------------------------------------------------
-----------------------
نمرر بقى التاج الظريف دة لميــــــــــــن؟
انا عارف ان ممكن يكون ناس منهم اتبعت لهم التاج دة قبل كدة
لو دة ماحصلش ...اديني كسبت فيهم ثواب
وكله بثوابه

16 comments:

  1. ثواب ايه بس يا عم احمد
    ايه يا عم الاسئله المحرجة دى
    انت قلت لازم يعنى اقول الصراحة كلها ؟
    مينفعش اغير فى الحقيقة الواقعة
    او اشطب اى اسئله
    :)))

    ReplyDelete
  2. rania:
    الاسئلة اجباري يا رانيا
    ولو ماجاوبتيهاش هتاخدي صفــــــــــر اجدع من صفر المونديال
    تحياتي لكي وجاوبي بسرعة
    مستني ردك ع التاج

    ReplyDelete
  3. بجد انا دخلت عندي لقيتك بتقولي عندي تاج ليكي قولت هو انت جالك تاج امته ماانا كنت عندك امبارح هنا علي البلوج بس دخلت حاجات بجد واسئله من النوع اللي بحبها وهحاول اجاوب بصراحه بس في حاجه نوع موبيلك زي نوع موبيلي قولي انت جيبه بقالك قد ايه انا بقالي شهر دلوقتي؟

    ReplyDelete
  4. ربنا يفرحك زى ما فرحتنى

    انتظر اجاباتى على التاج قريبا جدا

    ReplyDelete
  5. بس كده يا سمير من عنيا انت تؤمر
    انت 3 واحد يباصى نفس التاج
    انا كنت ناويه ابصيهولك
    بس شادى سبقنى
    يلا متعوضه
    تحياتى

    ReplyDelete
  6. merooo:
    الموبايل يا ستي جايبه من يناير اللي فات ب 3200
    مش عارف سعره بقى كام دلوقتي
    تقوليلي انتي بقى
    تحياتي ليكي
    جيداء:
    اسعاد سيادتك مهمتنا يا جيداء هانم
    تحياتي ليكي

    ReplyDelete
  7. reemoo:
    مانا بقوللك ال انا لمحت التاج دة في حتت كتير...بس كويس ان انتي لسة ماجاوبتيهوش
    جاوبيه بقى
    تحياتي واحتراماتي

    ReplyDelete
  8. هو ده تاج طويل يا أحمد ... طيب إبقي شوف اللي عندي ... عجبنب بتاعة الكناس وإنك لما بتشوفه بتعرف ليه بلدنا مش نضيفه
    ياللا كل تاج وإنت طيب

    سلامااااااااااااات

    ReplyDelete
  9. تاج جديد وسعيد يااحمد
    بس انا لما بلاقي الكناس العجوز في الشارع بقول الله يكون في عونك ياشعب مصر
    تحياتي ليك وللمدونة الرائعة يااحمد

    ReplyDelete
  10. على فكرة انا مش حقول حاجة
    انا بمضى حضور وماشية

    ااااااااه غلاسة وبلطجة

    وان كان عاجبك ;-)

    ReplyDelete
  11. الاخوة الكرام لأن دورنا هو إظهار الحقيقة وتوعية الناس بها , ولأن ما علمته عن ذلك المجاهد يمثل قيمة عظمى المفترض أن نفتخر بها ونكرمها , لا أن نعتقلها ونسجنها , فإني أطلب منكم رجاءاً أن تساعدونا في بدء حملة الافراج عن شيخ المجاهدين السيد / أبو الفتوح شوشة , وتتمثل الحملة في نشر هذا البوست الجاهز يوم الجمعة الموافق 19/5/2007 , ونشر صور شيخ المجاهدين في جميع المدونات المشاركة – الصور موجودة في مدونتي- , مع توسيع نطاق الحملة لتشمل كافة المدونات التي نستطيع الوصول اليها .. وجزاكم الله خيراً ...

    البوست بعنوان

    أن تكون أبو الفـتوح شوشة

    حملة الإفراج عن شيخ المجـاهدين :

    في ظل تلك الهجمة الشرسة التي يتعرض لها كل وطني حر شريف , تتعدى تلك الهجمة هذه المرة خطوطها الحمراء , وتتمادى في غيها المنهجي , لتصطدم برمز من رموز العزة والكرامة في مصرنا الحبيبة , إنه شيخ المجاهدين الذي يربو عمره عن الثمانين , الأستاذ أبو الفتوح شوشة , ورغم ان الكثيرون من قد لا يعرفونه , ربما لأنه ليس بلاعب كرة قدم قديم أو مطرب شهير قد إعتزل ... بل إنه من القلائل الذين ما زالوا أحياء ممن سبق لهم الخروج مجاهدين وقت تقسيم فلسطين عام 48 م , ورغم أن الكل قد تناساه , في غمرة إعتقال نائبي مجلس الشعب من الإخوان المسلمين , وقد تم إعتقاله معهم وقتها بكل القسوة رغم شيخوخته وكبر سنه , إلا أنهم لم يرحموه , ولم تمنعهم كهولته , بل لفقوا له التهمة الشهيرة وهي محاولة قلب نظام الحكم !!! وكأن كهولته وكِبر سنه تسمح له بمجرد التفكير في قلب منضدة و ليس قلب نظام الحكم !!! لكننا اليوم نعلنها إننا لم ننساه , وكيف ننساه ؟؟ وقد حمل لواء الرجولة والعزة آنفاً وخرج ببدنه وماله قاصداً فلسطين ليجاهد عام 1948م اليهود الصهاينة وهو يبغي النصر أو الشهادة , , إنه اليوم له كل الحق علينا في ان ندعمه تماماً , حتى ولو لم يطلب , وحتى ولو لم يعلم , فإننا من منطلق من نمثله من صحافة شعبية , تمارس دورها في تنوير شعوب المنطقة , نعلن اليوم ما الذي يعنيه أن تكون شخصاً كشخص أبو الفتوح شوشة في مصرنا الحبيبة ...

    أن تكون أبو الفتوح شوشة فهذا معناه أن تكرم وتصير رمزاً لكرامة الرجال لو كنت في بلد غير مصر ... أما لأنك في مصر ... فهذا معناه أن تصير نزيل أحد السجون وحبيس أحد المعتقلات ...

    أن تكون أبو الفتوح شوشة فهذا معناه أن تخرج للجهاد في فلسطين وعمرك لم يتجاوز التاسعة عشر ...فتبلي البلاء الحسن ... ثم تعود لتنال جزائك على جهادك وبدلا من تكريمك يزج بك في السجون 15 عاماً مع الشغل والنفاذ ..

    أن تكون أبو الفتوح شوشة فهذا معناه أن تعود من فلسطين راضياً عن نفسك ... راضياً عن جهادك ... راضياً عما فعلته لرفع لواء الذود عن فلسطين ... فلا يرضى عنك النظام ... لتذوق الويل والتعذيب في السجون المصرية ...

    أن تكون أبو الفتوح شوشة فهذا معناه أن تخرج من السجن بعد 15 عاماً كاملةً لتمارس رسالتك في البناء والاصلاح من جديد ... بدون أن تتغير قناعاتك أو تتزعزع ثقتك في نفسك ...

    أن تكون أبو الفتوح شوشة فهذا معناه أن تترشح في انتخابات مجلس الشعب لعام 1987م ... فيهب جميع أبناء دائرتك لإنتخابك ... بما فيهم أقباط دائرتك بالكامل .... فتنجح نجاحاً باهراً ... ثم يتم حل المجلس لأجل إسكاتك ...

    أن تكون أبو الفتوح شوشة فهذا معناه أن تتحصن بحب الله و تحظى بحب الناس لك ...... لكنك في الوقت نفسه تجد أن النظام يُكن الكره لك ... ويعتقلك المرة تلو الأخرى ...

    أن تكون أبو الفتوح شوشة فهذا معناه ألا يرحموا شبيتك وأنت قد قاربت الثمانين ... فيزجوا بك في المعتقلات غير آبهين ... ويحولوك لمحاكمة هزلية غير مستنكرين ...

    أن تكون أبو الفتوح شوشة فهذا معناه أن تُحارب في رزقك وسكنك وراحتك وانت شيخ كبير ... ويضيقوا عليك كل شئ حتى يسجنوك ... في الوقت الذي تتمنى أن تنعم فيه براحتك ...

    أن تكون أبو الفتوح شوشة فهذا معناه جهاد في صغرك ... تعذيب في شبابك ... بهدلة في كهولتك ...

    أن تكون أبو الفتوح شوشة فهذا معناه ... اننا معك حتى النهاية ... نهاية ظلمهم أو نهايتهم ...

    الروابط :
    مدونة انسى تذيع نبأ اعتقال شيخ المجاهدين
    http://ensaa.blogspot.com/2007/04/blog-post_9947.html

    مجلّة "فلسطين المسلمة" تذيع فقرات من جهاد شيخ المجاهدين
    http://www.fm-m.com/2003/aug2003/story24.htm

    تقرير صحيفة المصريون عن اعتقال قدامى رجال الاخوان المسلمين
    http://www.almesryoon.com/ShowDetails.asp?NewID=34088&Page=1

    ملف pdf عن جهاد شيخ المجاهدين المصريين في فلسطين
    http://www.fm-m.com/2003/aug2003/pdf/51.pdf

    جاري تدعيم الحملة بتقرير جريدة الدستور عن شيخ المجاهدين بتاريخ 13/5/2007
    جاري تدعيم الحملة بتقرير جريدة الوفد عن شيخ المجاهدين بتاريخ14/5/2007

    ReplyDelete
  12. reri:
    شفت اللي عندك
    كان الله في عونك والله
    فوقتي من الغيبوبة امتى؟
    تحياتي واحتراماتي

    ReplyDelete
  13. محمد سمير:
    بغض النظر عن الشفقة لحاله اللي هي اكيد موجودة طبعا
    انا بشفق علينا من ان شوارعنا عمرها ماهتنضف بالشكل دة
    وبأدعي على اللي شغلوا الراجل دة في السن دة في الشغلانة دي
    تحياتي واحتراماتي

    ReplyDelete
  14. البتاع:
    دة نظام غلاسة بقى
    طيــــــــــــــــــــب
    عموما تنوري في اي وقت واي مكان وزمان...بس ابقي سيبي اي تعليق من ريحتك كدة
    تحياتي ليكي

    ReplyDelete
  15. انا عموما حطة تعليق مفصل مع شرح وافى فى البوست اللى فات

    من راجع البوست ص 123
    :-)

    ReplyDelete
  16. هههههههههههه
    :)

    تسلملي
    كل تاج وانت طيب
    ------

    حلوة قوي
    اسلاموميتر
    دي

    هو بيتباع فين
    ؟؟

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails