Wednesday, 30 May 2007

ليه الاحراج دة بقى

شوفتوا الاعلان دة في التليفزيون قبل كدة؟


مش مهم تكون شفته او ماشوفتوش
المهم ان الاعلان دة بييجي عادي في التليفزيون
الاعلان دة مافيهوش منظر واحد مخل بالاداب العامة ومافيهووش لفظ واحد خارج
مفيهوش حتى بنت او اي انثى بتظهر فيه
بس لو انت قاعد بتتفرج على اعلان زي دة في التليفزيون وجنبك والدك او والدتك
مش هتحس بالخجل؟
ايه هيكون شعورك واختك البنت قاعدة بتتفرج معاك ع التليفزيون لا بيك ولا عليك واذ بالاعلان دة بيطل فجأة عليكم؟
بلاش كدة ولا كدة
تعمل ايه لو قاعدين بتتفرجوا ع التليفزيون وجاء ابن اختك الصغير اللي في ابتدائي وسألك
هو اعلان ايه دة يا خالو؟
رد بقى يا خالو
!!!!!!!!!!!!!

52 comments:

  1. ومين قال يا سمير ان خدش الحياء وقله الأدب لازم تكن بالمناظر والألفاظ وبس
    كتير جدا الايحاءات بتكون أكثر خدشا للحياء من الكلام
    فإطلاق العنان للخيال لاكتشاف ماهو مخفى أكثر تأثيرا من الظاهر
    وللأسف ان هواه الايحاءات السيئه كتروا جدا فى مجتمعنا
    تحياتى

    ReplyDelete
  2. بص يا خالو
    قوله اعلان بيبسى يا حبيبى
    تحياتى

    ReplyDelete
  3. لو حد سألني هاقول ده اعلان عن منشطات كيميائية يعني مش طبيعية ودي بياخدها الناس اللي عندهم أنواع معينة من الأمراض.

    لحد هنا أعتقد الطفل هيكتفي بالاجابة.

    المصيبة بقي في شعار الاعلان وهو
    العبرة بالصلابة

    هل فعلا العبرة بالصلابة في ممارسة الجنس؟ هي دي الفكرة اللي باعتبرها خطر علي عقول الناس اللي مش أطفال.

    ليست العبرة بالصلابة، الجنس مش عضو منتصب بيقتحم عضو آخر متمترس وراء حائط منيع. أعتقد فكرة الاعلان الخاصة بالصلابة أخطر بكتير علي عقول الكبار والبالغين من خطورة المدلول الجنسي علي الأطفال

    ReplyDelete
  4. هسأل خالتو بتقول ايه لعبده اما بيجى يسألها على اعلان نسائى ايه ده يا خالتو وابقى ارد

    ReplyDelete
  5. مش لازم الخروج عن الاطار يكون مباشر
    زي الاعلان ده مثلا
    ولكن يبقي لماذا نقبل علي هذه النوعيه منافن الردئ
    لان المشاهد يتلذذ بها
    وكثروا منهم هم يريدون ذلك

    ReplyDelete
  6. والله الحقيقه انا مشفتوش علي التلفزيون قبل كده
    وثانيا لو سألتني ممكن اهرب باسلوب لذيذ او اقولها ده اعلان عصير او اي حاجا
    تحياتي

    ReplyDelete
  7. في ايه بس يابو سمرة؟؟؟ ده اعلان نوع شاليموه جديد اسمة "الشاليموة الازرق" انت لازم تغهم كده كل حاجة بمعني مش كويس
    حرام عليكوا والله بتظلموا الناس
    بالنسبة لابن اختك- لو هو من اطفال اليومين دول ماتقلقش اوي...مش هيسألك لانه هيكون عارف

    تحياتي
    محمد سمير

    ReplyDelete
  8. الحمد الله مفيش حد يسالنى

    انا اللى هسألك اهو اعلان دة بقى جاوب

    وبسرعة

    وبدون تفكير

    ممكن يكون عصير
    ههههههه

    تحياتى

    ReplyDelete
  9. ههههههههه انا اول مره شوفت فيها الاعلان ده كنت فاكرها تبع ماكدونز او حاجه يعني للوجبه يعني كنت انا وماما وبس وبعدين لقينا في الاخر حاجه تانيه ضحكنا وماما اول كلمه قالتها ايه قله الادب دي وتاني مره كان بابا موجود وانا روحت قالبه علي طول بابا قالي ايه ده عاوز اشوف قوتله شوف ورحت سايبه المكان واتحرجت بس دا اعلان يعني مش عارفه اقولك ايه بس يعني هيعرضوا ازاي يعني كان الاول حاجه ممنوعه ودلوقتي بقي حاجه مسموحه بيها
    والاول كان الممنوع مرغوب وبقي دلوقتي مسموج لازام يعملوا دعايه لا حياء في العلم واللي مش عجبه يقلب المحطه

    ReplyDelete
  10. انت عارف المشكلة مش بس في العيال

    لكن تخيل واحد و مراته قاعدين و الراجل عنده حالة مرضية ما

    ليه يحرجوا الرجل و يبقى في نص هدومه

    بس تفتكر لو ما أعلنوش بالطريقة دي

    يعلنوا ازاي..أصل مافيش وسيلة تانية غير التلفزيون و لازم يعملوا اعلان يشد

    انا مش بدافع طبعا...انا بس باتساءل

    ReplyDelete
  11. والله الموضوع دا فيه رأين

    الرأى الاول ان الاعلان دا فيه ايحاءات معينة مخجلة نوعا ما او تخش الحياء مثلا

    الرأى الثانى ان اكيد فى ناس هتبرر و تقول ان دا اعلان عادى خالص عبارة عن دعاية لمنتج معين و مفيش اى مناظر مخجلة او اباحية و ان الاعلان دا موجه لفئة معينة من الناس و اللى مش منهم خلاص و لا كانه شاف حاجة

    مهو ياما الواحد بيشوف حاجات فى الشارع

    و بعدين محدش اعترض على الاعلانات الخاصة بالسيدات ليه طيب ممكن ولد صغير بردة

    يسأل مامته هوا دا اعلان ايه

    خلاص ميعملوش اعلان بقى و خلاص ما الحاجة موجودة فى الصيدلية و اللى عايز يشترى

    طيب انا شفت اعلان نفس المنتج دا فى الصيدلية

    ReplyDelete
  12. reemoo:
    ماهو المشكلة هنا يا ريمو ان الناس دي ماتعرفيش تمسكي عليهم غلطة
    هيقولوا لك اصل مفيش حاجة مخلة ولاحياء في العلم وكدة
    مع اني مش مع عرض اعلانات الادوية من النوع دة في التليفزيون خاااااالص
    تحياتي واحتراماتي

    ReplyDelete
  13. rania:
    ااااااااااااااااه
    دة انتي مش عارفة الجيل الجديد بتاع الايام دي بقى
    ساعتها هيردح لي ويقوللي
    بيبــــــــــــسي
    بيبسي ايه؟
    الاعلان مفيهوش سيرة بيبسي خال
    واحتمال بقى الموضوع يكبر ويصمم يعرف
    وتبقى مشكلة يا صديقتي العزيزة
    ربنا يستر علينا من الاجيال الجديدة دي
    تحياتي واحتراماتي

    ReplyDelete
  14. هاقوله اسأله أونكل أحمد سمير هو الى يعرف

    ههههههههههههه
    دبستك
    ولازم ترد!!!!!!!

    ReplyDelete
  15. مختار العزيزي:
    هتقول لطفل صغير في ابتدائي منشطاات وكمان كيميائية؟
    اعتقد ان دة هيزود فضوله اكتر علشان يسأل بدل الاعلن دة ايه هيسأل يعني ايه منشطات كيميائية؟
    اما بالنسبة للصلابة فطبعا المرض دة هو العجز الجنسي وبالتالي العلاج بيقوم على امداد الدم الى العضو الذكري وبالتالي زيادة قوة انتصابه
    هي الفكرة العلمية صحيحة مفيش عليها اي تعليق انما عرضها ع الملأ كدة اعتقد انه اوفر منهم شوية
    تحياتي ليك ونورت المدونة

    ReplyDelete
  16. mohamed a.ghaffar:
    ماهي الاعلانات النسائية دي برضة مصيبة تانية وان كانت بتبقى على المتغطي برضة
    مش زي الاعلان دة
    تحياتي واحتراماتي
    محمد مفيد:
    انا شخصيا لي اعتراض على عرض الادوية الجنسية على شاشات التليفزيون لان المفروض ان دي بتكون لحالات مرضية معينة مش للعامة
    انما عرضها بالشكل دة بغض النظر عن انها بتثير تساؤل الاطفال وبتخدش حياة النساء بتشجع الرجال على تعاطيها دون داع وبدون استشارة طبيب ودة الخطر بعينه
    تحياتي واحتراماتي

    ReplyDelete
  17. تامر حسين:
    المشكلة مش بالسهولة دي يا تامر...يعني ممكن انا اقوله دة اعلان عصير حد تاني يقوله دة اعلان حاجة تانية وبالتالي هيكون في فقد للمصداقية
    وبعدين العيال بتوع اليومين دول شياطين بجد مابيقتنعوش بسهولة ماينفعش تضحك عليه بكلمتين
    انا بيتهيأ لي ان الافضل هو منع النوع دة من الاعلانات تماما
    تحياتي ليك

    ReplyDelete
  18. غمض عينيك:
    الشاليموه الازرق
    فكرة برضه
    طب افرض بقى يابو سمير وانا معاه في سوبر ماركت قاللي
    انا عايز الشاليموه الازرق
    مش ماشي غير لما تجيب لي الشاليموه الازرق اللي بيعلنوا عنه
    تعمل انت بقى ايه يا معلم لو مكاني
    تحياتي واختراماتي

    ReplyDelete
  19. tamer nabil:
    حمدا لله ع السلامة يا تامر
    هو دة اعلان اساسا؟
    اعلان ايه؟
    انت بتتكلم عن ايه؟
    انا مش فاهم حاجة؟؟؟؟
    هههههه
    عملت فيها عبيــــــــط
    تحياتي واحتراماتي

    ReplyDelete
  20. meroooo:
    والله بجد انا مكسوف ليكي سلف
    اذا كنت انا الراجل ببقى هموت من الاحراج لما الاعلانات اللي زي دي بتيجي في التليفزيون ومعايا حد بيتفرج
    مابالك بقى البنات يعملوا ايه؟
    الافضل بقى ياريمو ان الاعلانات اللي زي كدة ماتتعرضش خالص الا في العيادات والصيدليات فقط لا غير
    انا مش ذنبي انه يقتحم حياتي وخصوصياتي باعلان زي كدة
    تحياتي واحتراماتي

    ReplyDelete
  21. بجد عندك حق ...أنا أصلاً مش طايقة الإعلان ده...لأن حصل موقف بجد كان قمة في الإحراج بسببه...
    بنتفرج علي التليفزيون مع العيلة ...و أنا مشوفتش بداية الإعلان..كنت مشغولة في حاجة تانية.لا شوفت شاليموه و لا بيبسي
    :D
    .وشوفت العبرة في الصلابة...أعدت أقولها و أكررها..زي العبارة في الشكارة كده...وطبعاًعارفين رد الفعل علي وجوه العيلة كان عامل إزاي...اللي هو سافلة سافلة يعني ...يعني مش مكفيني الإعلان لأ كمان
    بستهبل و بغني و بتريق
    و عرفت بعدها ده كان إعلان ايه :(...
    علي فكرة..لو تفتكرو فيلم "ضد الحكومة"
    كان فيه نفس اللي في الإعلان تقريباًُ..
    بس مدي تكرار الإعلان مش زي لقطة في فيلم..
    و معتقدش إن هيبقي في مشكلة من ناحية الأطفال..الجيل اللي جاي ربنا يحميه...ممكن يعلم الكبار ...
    يعرفوا أكتر مننا أصلاً ...

    ReplyDelete
  22. ههههههههههههه

    طب انت لما حد يجيلك يقولك هات العقار ده م الصيدلية بتاعتك
    بتقوله ايه
    ههههههههههههههههههههه
    يخرب بيت عقلك

    ReplyDelete
  23. sosa el-mafroosa:
    الاعلان دة على فكرة وغيره زيه كتير مش مناسبين للعرض في التليفزيون خالص
    على الرغم من اني مش من دعاة المنع او الحجر على المشاهدين الا اني بشوف ان دي حالة خاصة جدا وماينفعش ادويتها تبقى على الملأ كدة
    مايصحش بجد
    تحياتي ليكي
    نورتي المدونة

    ReplyDelete
  24. shab 3ady:
    ماهو المكان الطبيعي للمنتج دة او لاعلانه هو الصيدلية
    انما التليفزيون مكان غريب جدا وغير مناسب للاعلان عن المنتجات دي
    قمة الاحراج والتساؤلات
    هو ليه متصور ان اللي بيتفرج ع التليفزيون هيكون مريض بالمرض دة ومحتاج المنتج دة؟
    شيء غريب فعلا
    تحياتي واحتراماتي
    hapasa:
    مانا لو كنت عارف ارد ماكنتش كتبت البوست دة
    تحياتي واحتراماتي

    ReplyDelete
  25. هوه ده اللي مزعلك قوي؟؟

    افتح يا سيدي أي عدد من الأهرام المسائي تلاقي الإعلانات دي بالهبل،وفيه غيره كتير.. المشكلة ان الإعلانات دلوقتي مافيش عليها رقابة.. ها تدفع؟ إعلن عن اللي انت عايزه

    أنا خايف بعد تعليقي نص شباب البلد يشتروا المسائي بكره!!!

    ReplyDelete
  26. sabsoob:
    موقف محرج جدا بجد
    ولكنه ينطبق عليه ان شر البلية ما يضحك
    اكيد كنتي في ربع هدومك وبتقولي يا ارض انشقي وابلعيني
    معلش
    كل اعلان وانتي طيبة
    نورتي المدونة
    hapasa:
    ايوةانا ببيع الحاجات دي في الصيدلية لان دة مكانها الطبيعي
    يعني مثلا
    حد ممكن يعمل عملية جراحية في الشارع؟
    يا اخوانا انا مليش اعتراض عل المنتج انما الاعتراض على الاعلان عنه للعامة كدة
    تحياتي واحتراماتي

    ReplyDelete
  27. ههههههههههههههه..يا عم هي جت ع الاعلان ده..ما احنا بنحيا في تيار الاباحيه و السفور من سنين علي اساس أنه هو ده مقياس التقدم اللي أخدناه من الغرب
    تحياتي لك

    ReplyDelete
  28. أعمل نفسك مش سامعه
    loooooooooooooooooooool

    ReplyDelete
  29. هههههههههههه

    انت واخد الموضوع على صدرك ليه؟؟؟
    ثم هو العصير بس؟؟
    فين حلقات المسمار واللوحة
    واعلان الكبريت اللى مش بيولع؟؟؟

    لالالالا
    اوعى تاخده بشكل شخصى ;-)
    هههههههههههه

    بس الصراحة انا شايفة ان دى اذكى طريقة ممكن يتعمل بيها اعلان عن منتج زى ده

    بس خدت بالك من الاعلان المقابل له بتاع ال36 ساعة؟؟
    36 علبة بيبسى
    و 36 شاليمو ازرق على رأى محمد سمير
    هههههههههههههه

    يعنى الشركات بتلعب مع بعض

    اه صحيح
    البوست الجاى بقى عن اعلان ديوركس

    "for a hundred million reasons"

    تحياتى ياسمورة باشا

    ReplyDelete
  30. الافضل بقى ياريمو ان الاعلانات اللي زي كدة ماتتعرضش خالص الا في العيادات والصيدليات فقط لا غير
    سوري مافهمتش بقيت الرد ده ليا ولا لريمو؟ اصل انا ا سمي ميرو مش ريمو لو كان ليا سوري هفصلك عن الموضوع بس علشان افهم الرد

    ReplyDelete
  31. قمة الاستهبال و قلة الادب كالعادة
    انا شفته اكتر من مرة لوحدى و مرة كان معايا اخويا الصغير و سألنى ده كان عن ايه الاعلان ده ؟ قلت له ده نوع من الادوية و ما كنتش عارفة ارد عليه ازاى؟

    اشمعنى بعنى دى اللى بيعملواعليهااعلانات؟ ما بيعملوش عن ادوية السكر و الضغط و التخسيس ؟
    ياترى عشان الفياجرا مش محتاجة روشتة مثلا ؟و اى حد ممكن ياخدها
    و لا عشان الاباحية بقت طاغية على كل حاجة فى التلفزيون من افلام و اعلانات و اغانى و حفلات
    ربنا يرحمنا برحمته

    ReplyDelete
  32. اعلان شفاطات مستوردة
    ولا أيه؟
    :)
    خالص تحياتي

    ReplyDelete
  33. الفكره في ان الاعلان يكون مخل او لا مش مرتبطه خالص بوجود عري او الفاظ خارجه عن النطاق المتعارف عليه .. الفكره نفسها ممكن تكون مخله

    الموضوع دا بالظبط بيفكرني بموضوع البذاءات اللي تم اثارته من قبل ما بين المدونين


    دا بصفه عامه

    اما بالنسبه للموضوع دا بالتحديد فالاعلانات دي بتبقي غالبا علي القنوات الفضائيه اللي فكرتها عن الحريه بتتيح ليها انها تقدم اي فكره مهما كانت جرأتها وبغض النظر عن نوعها طالما هيكون فيه مقابل مادي

    ReplyDelete
  34. egyptian:
    المشكلة ان التليفزيون غير الصحف في الانتشار خاااالص
    مشكلة التليفزيون انه بيقتحم عليك بيتك وانت لابيك ولا عليك خالص
    خاصة لو انت متابع مسلسل ولا فيلم وتلاقي جواه الاعلان اللي زي كدة
    قمة الاستهبال بجد
    تحياتي ليك نورت المدونة
    micheal:
    مشكلة اعلان زي دة انه عامل نفسه اعلان طيب وبريء وعايز مصلحة الناس
    وهو اعلان مصيبة
    تحياتي لك نورتني

    ReplyDelete
  35. شباب روش طحن:
    يا سلااااااااااااام ع الحلول
    اعمل نفسي بقى مش سامع الاعلان؟ولا مش سامع الطفل الصغير؟
    لو مش سامع الاعلان بسيطة هانت يعني
    انما لو مش سامع الولد يبقى انا كدة لعبت في عداد عمري
    شكلك مش عارف العيال الجديدة دي عاملة ازاي
    تحياتي واحتراماتي

    ReplyDelete
  36. البتاع:
    دورت عليهم والله يا بنتي علشان احطهم في الموضوع بس للاسف مالقيتهمش ع النت
    مش كفليه مصيبة واحدة؟عايزاني احط 3 مصايب؟
    ماهو المصيبة فعلا ان الشركات بتلعب مع بعض بس على قفانا
    انا افهم ان بيبسي وكوكاكولا يلاعبوا بعض....ممكن فودافون وموبينيل ماقولناش لا
    انما في حاجات سبيشيال زي دي؟
    دة كدة مش بيلاعبوا بعض دول بيلعبوا في دماغ البشر
    وبعدين محدش يعني سمع كلمة خدش الحياء اللي بيقرفونا بيها كل شوية..
    اصل دة فعلا مش خدش حياء دة تقطيع حياء
    تحياتي ليكي

    ReplyDelete
  37. merooo:
    ياست ميروو هانم الرد لسيادتك
    معلش يا فندم غلطة كي بورد والغلط مردود يعني
    امسحيها فيا انا
    وعلشان الكيبووورد مايغلطش تاني اليك ما يلي
    ميرو ميرو ميرو ميرو ميرو ميرو ميرو مير.......
    تحياتي ليكي دائما

    ReplyDelete
  38. بالفعل سؤال محرج لو سألة حد صغير لحد كبير بس والله هذا بقي عادي ياعم طنش دا احنا في زمن النت والواد بيحب البت هههههههههههههههههه

    ReplyDelete
  39. للأسف الحكاية بقت مقززة جدا والأعلام بقى بيقدم حاجات سخيفة جدا ومعرفش هيا فين الرقابة اللى بيقولوا عليها كانوا زمان بيقولوا أنه فيه رقابه هيا فين ماتت ولا ما بقتش بتشوف ولا علشان الأعلان ما فيهوش بنات يبقى خلاص الأعلان ده كويس وحلو
    بجد أنا مالينى الخجل من الأعلانات اللى زى دى

    ReplyDelete
  40. فى الحقيقة مش عارفة فعلا ارد اقول ايه
    الواحد حتى محرج يقول كومنت...

    سيبك انت...انا جاية بس ادحرج التماسى و اعتذر عن الغياب الطويل عن مدونتك :)
    تحياتى ليك يا سمير

    ReplyDelete
  41. وإيه يعنى
    ما احنا بتوع المسلات
    وما حدش حس بخجل ولا حاجة

    ReplyDelete
  42. اكيد لو بشوفه مع اختى ولا امى هاحس بخجل بس الحاجات دى بتعدى فى سكوت كده من غير تعليق من حد

    و اكيد ههرب من اخويا الصغير لما يقولى اعلان ايه ده

    بس اللى بفكر فيه ان حاجة زى دى يتعمل لها اعلان ازاى طيب ؟؟!!!
    ولا ميتعملهاش اعلان احسن؟؟

    تحياتى

    ReplyDelete
  43. عمرو غريب:
    هو موقف محرج جدا يا عمور لو سأله اي حد لأي حد
    مش مجرد حد صغير لحد كبير
    وياؤيت تقف ع الحب بس
    تحياتي ليك يا صديقى العزيز
    bos bos:
    فعلا يا بس بس الاعلان دة في منتهى السخافة بجد
    اذا كان الرجالة بيتكسفوا لما بييجي مابالك بالبنات والسيدات يعملوا ايه؟
    وبعدين رقابة ايه يا بس بس؟!!!!!
    الايام دي مفيش رقابة الا على السياسة بس حتى الدين مفيش عليه رقابة
    تحياتي واحتراماتي

    ReplyDelete
  44. nermeen:
    فعلا يا نرمين بتكون اعلانات في منتهى السخافة بجد
    انا مش عارف ليه الادوية الحساسة اللي زي دي تعرض في التليفزيون عادي كدة بدون مراعاة مشاعر الناس اللي بتتفرج
    بجد دي مهزلة
    بس واضح ان العملية بقت سايبة بجد
    بس سيبك انتي المدونة فعلا نورت بوجودك
    ياريت ماتغيببيش علينا اكتر من كدة
    تحياتي واحتراماتي

    ReplyDelete
  45. ابو امل:
    لا ياعم
    تفرق كتيـــــر
    تحياتي ليك
    نورت مدونتي المتواضعة
    محمد ياسر:
    هو المفروض الحاجات دي مايتعملش عليها اعلانات خاااااااااالص
    مش مكانها التليفزيون
    الحاجات اللي زي كدة مكانها الصيدليات
    بس دة في الدول المحترمة بس
    تحياتي لك

    ReplyDelete
  46. فعلا كلامك صح دة اعلان فظيع جداا وانا بحس بالخجل لما بيتصادف وبيجى اعلان ذى دة وانا اعد مع حد فى البيت حاجة قمه قله الادب

    ReplyDelete
  47. ياباشا لما تكونوا في السوبرماركت ويشبط في الشاليموه الازرق...بسيطه..هاتلوة الشاليموه الازرق وخليه يجرب

    تحياتي
    محمد سمير

    ReplyDelete
  48. أنا فعلا إتسألت من بنت خالي الصغيره الإعلان ده بتاع إيه يارحاب
    لأ وبتسألني قدام خالي
    فقلتلها خلاص يا آلاء
    مش عارفه
    مفيش فايده
    مصره تعرف
    بتبقي محرجه جدا فعلا
    يمكن لأن الإعلانات دي جديده علينا
    أنا بستغرب جدا أصلا إن فايزر بتعمل إعلان عنها ... متهيألي مفيش حد مش عارفها

    ReplyDelete
  49. ضد الظلم:
    اصلا مكان الاعلانات دي هي الصيدليات يا جماعة
    المفروض ان دي حالات مرضية ولا يصح مناقشتها في التليفزيون كدة
    تحياتي واحتراماتي
    غمض عينيك:
    وليه الشاليموه الازرق
    انا بقول اجيب له حباية يجربها ع الماشي كدة
    هههههه
    تحياتي يا محمد

    ReplyDelete
  50. reri:
    اذا كنت انا ولد واللي بيسألني ولد واتكسفت ومعرفتش ارد عليه
    اومال وانتي بنت واللي بتسألك بنوتة
    هتعملي ايه؟
    اعلانات في منتهى الاستفزاز ومش مكانها خالص
    المنافسة بين فايزر وليللي في النوع دة من المنتجات هيجننهم
    تحياتي واحتراماتي

    ReplyDelete
  51. لو ابن اخويا ... مش اختى بقي لان مش عندى اخوات ... سألنى هاقوله ده اعلان شاليمو

    حاجه تكسف بجد

    ReplyDelete
  52. السلام عليكم ورحمة الله وبركاته


    وهل تعتقد ان لسه فيه اطفال بيسألوا اسأله تافه زي دي ...دول ياعمي عارفين اكتر مننا احنا ياكبار ...ههههه

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails