Thursday, 17 May 2007

فعلا....وحشية وهمجية كلابية


دة مقطع من رسالة بعتتها الممثلة الفرنسية المعتزلة بريجيت باردو للرئيس مبارك بتشكو ليه سوء معاملة الكلاب في مصر
ودة مقطع كمان...خد عندك
يا جماعة....مدام بريجيت بتتكلم على الكلاب...الكلااااااااااااب
يا بخت الكلاب
تخيلوا المدام زعلانة جدا ومنهارة وباعتة للرئيس رسالة غاضبة جدا علشان الاساليب الوحشية (خدوا بالكم من الوحشية دي)اللي الكلاب في مصر بتتعامل بيها
ماتعرفش سيادتها ان الكلاب في مصر بتتعامل احسن بكتيــــــــــــــــــــــــــر من فئات كتيرة جدا من الشعب المصري
على الاقل ماسمعناش ان في كلب مش لاقي يتعشى..بس في بني ادمين لا بتتغدى ولا بتتعشى في المحروسة
ماسمعناش برضة قبل كدة ان في كلبة بتعاني من العنوسة ولا كلب نفسه يتجوز ومش عارف...انما شوفوا بقى نسبة العنوسة في مصر وصلت قد ايه...ولا كام شاب مش عارف يتجوز اساسا
كمان مش عارفة او محدش قال لها ان مفيش 1500 كلب ماتوا غرقا انما دي حصلت للبني ادمين لما 1500 بني ادم ماتوا غرقا في عبارة السلام
مش واخدة بالها برضة مدام باردو ان مفيش كلاب بتدخل مواد مسرطنة لمجتمع الكلاب اللي بتنتمي اليه انما في مصر ممكن تلاقي بني ادمين بيسرطنوا اهلهم علشان العمولات والسفريات والذي منه
طيب حد قال للنجمة الشهيرة ان في كلب ممكن يغتصب كلبة...بتحصل كتير قوي مع البني ادمين في مصر
طيب حد قال للنجمة العظيمة ان في كلبات تم هتك عرضهن علشان كانوا ماشيات في مظاهرات كلابية.....حصلت مع البني ادمين في مصر وكتيـــــــــــــــر جدا كمان
يا مدام باردو....في مصر هنا ناس اولى بكتير انك تبعتي علشانهم جوابات....واذا كان ع الكلاب ياستي احب اطمنك واخدين حقهم هنا تالت ومتلت....دة مفيش في مصر هنا اكتر من الخرابات والمناطق العشوائية
طبعا لازم الريس مايعبرهاش لأن احوال الكلاب هنا احســــــــن وافضل بكتير من احوال البني ادمين
عجبتني قوي حكاية تواطؤ السلطات في موت الكلاب.....موتتني من الضحك والله
بالمناسبة
محدش يعرف عنوان مدونة مدام بريجيت باردو علشان نبعت لها ونطمنها على الكلاب في مصر....الست قلبها واكلها عليهم جدا
فعلا
شر البلية ما يضحك

29 comments:

  1. على رأيك ياأحمد حال الكلاب في بلدنا احسن من حال بني ادمين كتير...بس معلش اعذرها اصلها ماتعرفش وعمرها ماهتعرف

    ReplyDelete
  2. بس يا عم أحمد..الحوته كلها تتلخص أن الهانم كانت ممثله مشهوره و جميله جدا و كانت شغاله سينما و أفلام و صور عريانه و أفلام بورنو...الخ..لغايه لما كبرت و الزمن عمل عمايله و لم تعد برجيت باردو تلك المرأه اللعوب التي يشتيههيها كل الرجال قبالتالي انحصرت الاضواء و الشهره عنها ففكرت ازاي ترجعها فتلاقيها مره كده تتطلع نتصريح عنصري ضد العرب و مره تصريح عنصري ضد المسلمين بسبب ذبح الخرفان يوم الاضحي و مره تقعد تقول نفسها تعمل حمله لحمايه الحيوان في كل مكان..الخ و طبعا ده كله يخلي الميديا بره تجري عليها تاني
    نصيحه اخويه
    اديها الطرشه
    تحياتي لك

    ReplyDelete
  3. الســــــــلام عليكم
    وبما انى عندى فوبيا الكلاب ياااااااااااارب كل الكلاب تموت دى فاكرة الكلاب اللى عندنا زى الكلاب بتاعهم اللى عايشين على العز
    نفسى بقى سؤال بجد هم فين من جرائم امريكا فى حق العراقيين هم فين من جرائم الصهانية فى حق الفلسطنين هم فين من كل الجرائم اللى بتحدث الان فى العالم
    طب ما فى مصر ناس مش لاقية تاكل هم الكلاب اللى بيعمروا الكون ولا ايه ولا هم عايزين الكلاب تعيش واحنا نموت علشان البلد تكون بتاعهم
    ممممممممم
    تحياتى

    ReplyDelete
  4. الست دى مالها مش واخدة بالها غير من الكلاب يعنى هيا شافت كل حاجة حلوة وجميلة والناس عايشة متهنية قالت
    أشوف حاجة أتكلم فيها
    لا ده كتير قوى

    ReplyDelete
  5. هو إحنا نطول نبقى فى سمو ورقى الكلاب
    أنا بشوف ناس بتعمل حاجات للكلاب
    مش ممكن يكون الناس دى عاقله بجد
    الفلوس اللى بتتصرف على الكلب الواحد عند بعض الناس تعيش مائه عيله فى مصر لمده شهر قدام
    وكله كوم ومسابقه ملك جمال الكلاب
    يعنى هو البنى ادم احسن من الكلب اشمعنى البنى بيتعمله مسابقه ملك جمال
    الكلاب كمان ليها مسابقه ملك جمال
    انا ضغطى بدأ يعلى:((
    -------
    صحيح هى برجيت مالها كبرت ووحشت اوى كده ليه
    سبحان مغير الاحوال:))
    -------
    انا ضفتلك واحده افحت
    الموضوع يستحق :))
    تحياتى

    ReplyDelete
  6. هو طبعا عندك حق لما تقول ان البني ادمين بيتعاملوا هنا اقل من الكلاب

    بس عايزه اقول لك ان الرحمه اللي المفروض تبقي في قلوبنا ونتعامل بيها مع اي كائن حي مش من المفروض انها تتاثر بالقهر اللي احنا عايشين فيه والا يبقوا فعلا حولونا لوحوش



    ودا طبعا بغض النظر عن شخصيه السيده اللي بتتهمنا بالعنف وجنسيتها لاننا مش محتاجين نتكلم عن العنف اللي موجود في فرنسا والكراهيه والعنصريه اللي بتمارس ضد العرب




    تحياتي ليك وشرفتني بالزياره

    ReplyDelete
  7. mohamed samir:
    دي عارفة ياعم كل حاجة...دي اروبة
    بس الفكرة انها بتعتبر الكلاب انقى من المصريين
    وهي كالمستجير من الرمضاء بالنار
    تحياتي ليك
    micheal:
    اصلهاا ضحكتني جامد قوي ياعم
    يعني خلاص شايفة المصريين كل حاجة تمام وياعيني بيعاملوا الكلاب بهمجية
    ولا الحتة بتاعت عنف وتواطؤ السلطات تجاه الكلاب
    جامدة مووووووت
    تحياتي ليك

    ReplyDelete
  8. اماني:
    الكلاب اولا طبعا
    انتي هتقارني الكلاب برقتها وبساطتها ووفائها يا عيني
    بالعرب الهمج البربر
    دة طبعا من وجهة نظرها
    الكلاب بالنسبة لها اهم طبعا
    تحياتي واحتراماتي

    ReplyDelete
  9. bos bos:
    الفاضي يعمل قاضي يا بس بس
    تحياتي ليكي

    ReplyDelete
  10. reemoo:
    الكلاب...هو في زي الكلاب وجمال الكلاب ودلع الكلاب
    احنا بس مابنقدرش النعمة اللي احنا فيها
    عندنا كلاب بمعدل 3 كلاب لكل مواطن اي نعم هي كلاب ماتتشفش بس برضة اهي ثروة ومع ذلك بنقتلها
    الف شكر على الفحت اللي بتفحتيه يا ريم
    تحياتي ليكي

    ReplyDelete
  11. ههههههههههه
    الكلاب؟
    مالها الكلاب؟
    هى بس متعرفش ان الكلاب عندنا ليها مكانتها فى المجتمع
    ياريت ياسمسم تبلغ الجهات المختصة تبلغها ان البتاع من مزنقها فى مصر بتقولك
    الكلاب عندنا اجدع ناس
    منهم نوعين
    نوع بيحكم البلد ودى فصيلة نادرة شبة البنى آدمين فى كل حاجة تقريبا
    ومعدلة وراثيا بحيث انها تحكم وتتكاثر حكام كمان
    وموطنها الاصلى المنوفية

    وفصيلة تانية
    شبة الكلاب المعروفة
    ودى استخداماتها مهمة فى اظهار الحق وتعذيب المعتقلين اللى مش راضيين بحكم اخواتهم فى الفصيلة الاولانية
    ودى مهمتها قطع الاعضاء التناسلية والتعذيب المدروس ومدربة على اعلى مستوى
    ودى موطنها الاصلى امن الدولة

    شفتو بقى ان الكلاب عندنا سادة القوم ازاى؟
    وان المذة دى تخليها فى التمثيل بتاعها ومتتكلمش عاللى ملهاش فيه

    تحياتى عالبوست العسول كالعادة ده ياسمسم

    وكلام فى سرك
    بلاش كل مدونات الفيفورتيس عندى تدعبس فيها وتروح تتعرف عليهم
    انت مراقبنى ليه؟
    انت مباحث ياله؟؟؟

    ReplyDelete
  12. فى مصر ممكن تحك كلب وجمبه مواطن مصرى و تسأل ياترى مين فيهم الكلب


    لامؤاخذه

    ReplyDelete
  13. الكلاب؟؟؟؟؟؟؟!!!!!!!!
    على الاقل الكلاب في أقسام الشرطة بالذات تعامل معاملة أحسن من معاملة البنى آدمين....ده البنى آدمين في أقسام الشرطة بيحسدوا الكلاب
    ربنا يرحمنا ....مش ناقصة غير برجيت بردو كمان ...خلاص ما احنا بقينا ملطشة
    يا ريت الهانم تقولنا ازاي نتعامل مع تلك الوحوش البرية اللى بتجري و را البنى آدمين و تعضهم خصوصا الصغار منهم
    يا عم هو احنا ناقصين حرقة دم؟؟!!!0
    تحياتى

    ReplyDelete
  14. السلام عليكم
    هذه أول زيارة لمدونتك من الممكن أن يكون جذبنى الأسم وهو الأغلبية الصامتة, ولكننى أقول الصمت لايعنى ألا نتحرك لنيل حريتنا من الممكن أن يكون الصمت لفترة حتى يأتى ميعاد الكلام والنشاط والتفاعل
    بغض النظر عن حقوق الكلاب , نحن لنا حقوق سننتزعها منهم ولكن وفق خطة
    راجع سلسلة مقالات رؤيتى على البلوج الخاص بى
    ويسعدنى الإدلاء بإقتراحك حتى نصل لحل المناسب الذى يحيلنا للنقطة التالية من الصمت إلى الحركة والفعل والتأثير
    http://3abkarino.blogspot.com

    ReplyDelete
  15. السلام عليكم ورحمة الله وبركاته

    يا د/ احمد كل واحد بيدافع عن اللي شبهه

    والكلاب علي اشكالها تقع ...هههه

    تحياتي

    ReplyDelete
  16. TONA:
    انا مش معترض ابدا ان احنا نعامل الكلاب بادمية...انما الاعتراض ان تبقى مشكلتنا زي ماهي شايفاها هي الكلاب وتجاهلت معاناة ملايين البشر الللي عايشين في البلد دي اقل من الكلاب ومحدش بعت لهم لا حتى ورقة جورنال مش مجلرد جواب
    تحياتي ليكي ونورتي المدونة

    ReplyDelete
  17. البتاع:
    اولا: ايه الكلام التهمة اللي انتي كاتباه دة
    دة امن دول وش
    معرفهاش يابيه....وبعدين منوفية ايه دي؟ تطلع فين المنوفية دي؟
    عادي عادي....بعمل اهبل
    ثانيا:
    هو انتي اللي واخدة توكيل المدونات دي ولا ايه؟
    مش تقوليلي انها مدونات سرية ممنوع الاقتراب او التصوير...
    بس عموما في المجمل
    مدونتك احلى منهم كلهم خاصة الراجل بتاع عنترة دة.....تحفة...عنترة دة بيفكرني بواحد اعرفه
    هعمل اهبل تاني.....ههههههه
    تحياتي ليكي

    ReplyDelete
  18. ISLAM YUSUF:
    ساعات يا عم اسلام بيكون الكلب متغذي ومالي هدومه اكتر من البني ادم بكتيـــــــر
    يبقى انت اكيد في مصر
    نورتني ويارب دايما
    تحياتي
    الحلم العربي:
    اصل مدام بريجيت عايشة في عالم خيالي
    فاكرانامن كتر العز والنعمة اللي احنا فيها بنفتري ع الكلاب
    دة احنا بناكل اكلهم
    تحياتي واحتراماتي

    ReplyDelete
  19. الراجل بتاع عنترة؟؟؟؟؟؟؟؟؟
    وبتقولها كده عينى عينك؟؟؟
    طب ممكن اشتم؟؟؟

    ده نزار يا.......احمد

    ReplyDelete
  20. يا خسارة ممكن تتقال على التعليقات بإستثناء اثنين أو ثلاثة مع التحفظ :((((((((((((((((((((((((

    والسبب ان المهم في الخبر ده مش أن مين اللي بينتقد ومش مهم أنها كانت ممثلة إغراء المهم في الموضوع ده حاجات تانيه

    أولاً: أن الكل نسي مبدأ أساسي وهو ضرورة الرفق بالحيوان والمرأة اللي دخلت النار عشان عذبت قطة والرجل اللي نزل جاب ميه من البير وشالها في خفه عشان يسقي كلب

    ثانياً: الكل نسي أن الكلب مش حيقدر يعبر عن نفسه لكن البني آدم يقدر ومش بس كده ده التعليقات وصلت أن إحنا بنفش غلنا من اللي بيحصل فينا وبنطلعه في الكلاب يعني مش قادرين على الحمار فبنتشطر على البردعه

    ثالثاً: ودي نقطه مهمة الخطاب والتقريع وأن إزاي بره يتم التعامل لما حد يوجه خطاب لمسئول أنه بيرد عليه اما عندنا فلا حياة لمن تنادي

    رابعاً: مسألة انها مهتمه بالحيوان وماله كل واحد فينا له إهتماماته وأولوياته ومش كل الناس لازم يبقى سلم اهتماماتها واحد وإلا يبقى إحنا كربونه من بعض

    خامساً: مسألة إنتقادها لذبح الخرفان في عيد الأضحى فدي مسأله أخرى ولا يجب الخلط بين الإثنين وخصوصاً لو فكرنا من وجهة نظرها حنلاقي المكيال واحد مش مكيالين وبعدين نعذرها فهي ما تعرفش الكثير عن ديننا

    سادساً: مش صح أن إحنا نحقر من انفسنا ونقارن نفسنا بالكلاب

    سابعاً: مش كل واحد ينتقدنا نعايره عشان نريح دماغنا نسيب الطريقة دي للاقلية الحاكمة أما إحنا فنسعد أن في حد قدر يحرجهم

    ثامناً: هو حد شاف الكلاب المقتوله؟ دي همجيه فعلاً زيها بالضبط زي ما بتشوفوا بتوع البلديه وهم بيدبحوا الشجر "مش بيقلموه"!!!!!

    تاسعاً: أرجو أني ما كنتش مستفز

    عاشراً: شفت يا أحمد حكم مرتضى زي ما قلت لك سنة معقول "اللهم لا شماته" !!!

    كفايه

    ReplyDelete
  21. عبقرينو:
    تشريفك لمدونتي شرف كبير ليا
    الف شكر ليك على رأيك
    انتظر مني مشاركة في موضوعاتك القيمة على مدونتك الرائعة
    ياريت تكون صديق دائم للمدونة
    خمسة فضفضة:
    مانقدرش ننكر يادكتورة ان اهتماماتها رحيمة وهدفها نبيل بصرف النظر عن موقفها من المسلمين
    انا بتريق على انها بتهتم بحاجة مش موجودة اصلا في البني ادمين اللي بيعيش في البلد دي
    بمعنى انها بتتكلم على حرية الكلاب في بلد مواطنيها بيجاهدوا للحصول على حقوقهم
    تحياتي واحتراماتي

    ReplyDelete
  22. البتاع:
    يارااااااااااااااااااجل؟
    بقى دة نزار؟
    معلش والله اصل انا علاقتي بالشعر زي علاقتك باللغة الصينية بالضبط
    وبعدين انا حسيت ان انا لو كنت قدامك دلوقتي ممكن تقتليني وتكوني في منتهى السعادة
    معلش ياستي العتب ع الثقافة
    تحياتي

    ReplyDelete
  23. anonymous:
    انا لما تبت الموضوع دة ماكنش في دماغي خالص ان بريجيت باردو دي ممثلة اغراء ولا مواقفها العدائية تجاه العرب والمسلمين
    الهدف من الموضوع هو طرافة الموضوع او طرافة القضية والمناشدة اللي بعتاها لرئيس الجمهورية بتناشده حماية الكلاب في الوقت اللي المواطنين هم اللي عايزين الحماية مش الكلاب
    يعني نحل مشاكلنا الاول وبعدها ممكن نتكلم عن حقوق الكلاب وحقوق النمل كمان لو عايزين
    انما لقيت في الردود حملة ع الست ماكنتش في الحسبان خالص
    وطبعا هو مش تحقير للنفس وانما هي مقارنة بين حالنا كبني ادمين ربنا كرمنا وبين حيوانات ضالة ممكن تكون عايشة عيشة بتقارب ان لم تكن افضل من عيشة مواطنين كتير في البلد دي
    انت مش مستفز ع الاطلاق...رأيك محترم جدا ولو ماكناش هنقبل الرأي والرأي الاخر يبقى نمنع التعليقات وكل واحد يقول الكلمتين اللي هو عاوزهم في مدونته وخلاص
    انما لازم المشاركة وتبادل الاراء
    بالنسبة لمرتضى
    قضاء اخف من قضاء
    بس نفسي اعرف انت ليه شايل منه قوي كدة....اكيد الراجل ليه برضة مواقفه الايجابية مش كلها سلبية
    ربنا يفج سجنهم جميعا
    تحياتي واحتراماتي

    ReplyDelete
  24. الكلاب فى مصر حالها افضل بكتير ...
    فى كوريا بيحبوا ياكلوا الكلاب .. و بعدين ...ممكن الناس فى مصر تتنكر فى هيئة كلاب اذا كان ده حيخليلهم تمن

    ReplyDelete
  25. أولا شكرا على تدبيسة التاج يا زميل
    ثانيا الست الهانم خايفة على الكلاب يمكن علشان من نفس فصيلتها
    فاكر سمير غانم فى المتزوجون : ليه يارب مخلقتنيش صرصار
    تحياتى

    ReplyDelete
  26. eldoctor:
    نورت المدونة والله يادكتور
    ياخوفي ان دة يحصل ولو ان بشايره بدأت تظهر
    تحياتي واحتراماتي

    ReplyDelete
  27. voice of love:
    انتى عارفة طبعا يادكتورة ان التاج دة كاس وداير ع الجميع
    وبعدين اسمها صوريصااار مش صرصار
    جاوبي انتي ع التاج اللي عليكي علشان التاج اجباري
    تحياتي ليكي

    ReplyDelete
  28. فكرتني بموقف كده

    كان خالي بيحكي ان ليه واحد صاحبه و ربنا موسع عليه في الرزق و كان ابنه معاه عربية بي ام او مرسيدس تقريبا و خبطها

    فابوه قاله ايه

    قال له انا هركبك جولف زي ولاد الشحاتين يا ... الكلب

    شفت ان الكلاب عندنا حظووووووووظ

    ReplyDelete
  29. 一夜情聊天室,一夜情,情色聊天室,情色,美女交友,交友,AIO交友愛情館,AIO,成人交友,愛情公寓,做愛影片,做愛,性愛,微風成人區,微風成人,嘟嘟成人網,成人影片,成人,成人貼圖,18成人,成人圖片區,成人圖片,成人影城,成人小說,成人文章,成人網站,成人論壇,情色貼圖,色情貼圖,色情A片,A片,色情小說,情色小說,情色文學,寄情築園小遊戲, 情色A片,色情影片,AV女優,AV,A漫,免費A片,A片下載

    情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

    A片,AIO,AV,日本AV,色情A片,AV女優,A漫,AIO交友愛情館,線上A片,免費A片,A片下載,情色A片,微風成人,嘟嘟成人網,成人,成人影片,成人光碟,成人影城,成人交友,愛情公寓,色情聊天室,情色貼圖,色情,色情影片,做愛,情色,哈啦聊天室,聊天室,UT聊天室,豆豆聊天室,尋夢園聊天室,080視訊聊天室,080聊天室,080苗栗人聊天室,自拍,性愛

    情趣用品,情趣用品,情趣,情趣,A片,A片,情色,A片,A片,情色,情趣用品,情趣用品,A片,A片,情色,情色

    情色視訊,美女視訊,辣妹視訊,視訊聊天室,視訊交友網,免費視訊聊天,視訊交友90739,視訊,免費視訊,情人視訊網,視訊辣妹,影音視訊聊天室,視訊交友,視訊聊天,免費視訊聊天室,成人視訊,UT聊天室,聊天室,豆豆聊天室,色情聊天室,尋夢園聊天室,聊天室尋夢園,080聊天室,080苗栗人聊天室,上班族聊天室,小高聊天室

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails