Monday, 14 May 2007

خلطبيطة

من كتر الناس المحترمة اللي بتورد ع السجن يوميا
الواحد حاسس ان السجن بعد كدة مش هيبقى عقوبة خالص
حد يطول يبقى اصدقاءه وجيرانه في العنبر ناس زي ايمن نور كدة وخيرت الشاطر والناس الافاضل دي
دة الواحد ساعتها هينبسط انبساااااط
ويحس بقى انه مهم وقاعد مع ناس محترمة فعلا
صحيح يا جدعان
ماكدبش اللي قال
السجن للجدعان
*******************************************************
"ياللهول
معقول الكلام دة؟
مسيحيين عايزين يبنوا كنيسة علشان يصلوا فيها؟
ازاي الكلام دة؟انا اكيد بحلم
لا لا لا مش معقول
غلطانين طبعا والغلط راكبهم من كبيرهم لصغيرهم
بقى عايزين يبنوا كنيسة؟
"عيب فعلا
تخيلوا دة تفكير ناس مسلمين في القرن 21 وكأن الكنيسة اللي هيبنيها الناس دي في بلدهم هي اللي هتكون السبب في انهيار الدين والاخلاق في القرية دي
واقطع دراعي ان ماكان عدد كبير جدا من اللي اتقبض عليهم في احداث الفتنة في العياط مابيصليش اساسا
انما ياللعار
مش عارف مين السبب؟....مش عارف بجد
***********************************************************************
المصري اليوم نشرت ان سواق ميكروباص قطعوا له صوابعه وضربوه على دماغه وطلقوا مراته منه علشان مارضيش يجيب لضابط كمين المرور كارت اعادة شحن للموبايل بتاع سيادته
بصراحة السواق يستاهل كل اللي يجراله...جنس نمرود صحيح
بقى تستغل طيبة حضرة الضابط اللي مارضيش يتقل عليك ويقوللك اشتري لي موبايل وتواضع وقال كفاية كارت شحن بس
وكمان ماترضاش تجيب له...اما انك سواق قليل الادب صحيح
فعلا
شعب مابيجيش الا بالعين الحمرا
***********************************************************

شوية نصاحة معتبرة ضاربة اليومين دول في المصريين...عجيبة غريبة
زمان كانت التجارة شطارة..بس دة كان زمااااان ايام المصري القديم
انما دلوقتي بقى ايام المصري الجديد تلاقي التجارة غلاسة...التجارة سرقة...التجارة فهلوة
تلاقي عربية اخرها 60 الف جنيه مثلا وهو مصمم يبيعها لك ب 80 الف...اما بقى لو كان هيشتريها منك فدي ماتجيبش اكتر من 30 الف
معدش في وسط...معدش فيه حاجة اسمها انا اكسب وغيري يستفيد والعملية تمشي..انما بقى في انا استفيد واكسب وعمليتي اللي تمشي
انا بس
وقيس بقى على البيع والعمليات التجارية من سيارات لعقارات لصيدليات....لكل حاجة
الا بالمناسبة
هي دي لها علاقة بالمناخ السياسي في البلد؟ ولا الدناءة اللي احنا فيها دي حاجة فوق البيعة
in addition
يعني؟
*************************************************************

نفسي اعرف حاجة شاغلة بالي من زمان
مش انا بس....شاغلة كل الشباب والرجال تقريبا
المتدينين منهم و الغير
الملتزمين والمنحلين
سألنا بعض كتيـــــــر
محدش جاوب حد
البنــــــــــــــــــــــــــــات عايزة ايه؟
دة مش اسم فيلم دة بجد والله
كل يوم اللبس بيقصر عن اليوم اللي قبله.....كل يوم الاخلاق بتضيع والتنازلات حبة حبة بتزيد
كل يوم بنشوف في الشارع والتليفزيون حاجات مكنش من كام سنة ينفع نشوفها عيانا بيانا كدة
وكل دة وللأمانة
ماتزال البنات رغم كل المظاهر والتصرفات
بترفع شعار
الاخلااااااااااااااق
يبقى
اكيد احنا اللي فاهمنهم غلط
حقكن علينا
**********************************************************************

فكرتني حكاية التدوين دة بالملحنين في افلام زمان
كان الملحن ييجي عليه ايام كدة ماسك العود ومزاجه متعكر وعمال يدندن ومفيش حاجة عايزة تطلع من الدندنة دي
وتلاقيه رمى العود بتاعه وقال مفيش حاجة عايزة تطلع
مفيش ابداع
انا انتهيت
المدونون نفس الفكرة
في ناس تلاقي عندها اسهال تدويني...بيكتبوا بمعدل 3 بوستات في اليوم
وفي ناس تخش مدوناتهم تلاقي اخر بوست ليهم من مارس اللي فات
دي برضة حاجة راجعة للألهام والكلام دة؟
انا على حد معلوماتي ان المدونات دي افكار بتتنقل من الدماغ الى الكومبيوتر من خلال الكيبووورد
وعدم وجود تدوينات يبقى في خلل من ثلاثة:
يا اما مفيش حاجة في الدماغ....محدش بيفكر خالص....ودي مشكلة لأن الانسان بطبيعته كائن مفكر
يا اما مفيش كومبيوتر....ودة من ايه دة؟
يا اما مفيش كي بوووورد..ودي مش غالية بتتباع في كل حتة
ياريت المدونات تزيد والافكار تزيد والمعلومات تزيد
كل ماعدد المدونين بيزيد كل ما تحس ان في امل وان لسة الاغاني ممكنة
****************************************************************
كلام فارغ انا عارف
بس اهووو
كلام

37 comments:

  1. فعلا خلطبيطة
    :)

    بس بالنسبة للتدوين
    في ناس بتعتبره
    تفريج
    وفضفضة
    وفرصة لمعرفة ناس جديدة
    :)

    ReplyDelete
  2. ذو النون المصري
    بجد مجموعة افكار ممتازه كان كل واحده فيها تستاهل ان توضع في بوست مستقل لوحدها
    تحياتي

    انا قرات بوست مقدمي البرامج و هو ايضا ممتاز

    ReplyDelete
  3. واضح انك متضايق
    وفى لخبطه وزحمه جوه دماغك

    السجن بقى للناس المحترمه
    والهتافين مش هما المتدينين
    واستغلال النفوذ مش جديد بس بقى استعباد للبشر
    اما التجاره بقت نصب
    والبنات بقت مثالهم هيفا وهبى
    أما التدوين ففى ناس عندها حاله ملل تدوينى
    وناس بطلت تدوين بس من غير وداع
    وناس بتاخد فتره راحه
    وناس بتدون كل ما تحس انها عايزه تفضفض
    اختلفت الأسباب والتدوين واحد

    اتمنى تكون بخير
    تحياتى

    ReplyDelete
  4. تجميعة ممتازة ونظرة ملخصة

    اسمحلي اضعها عندي

    Post of the day

    ReplyDelete
  5. عارف لو كنت قلت و السلام كان حيبقى ليا كلام تانى

    حاعلق بس مش ناو لانى فى الورك و عايزه امخمخ

    صباحك فل :)

    ReplyDelete
  6. داخل اسوار اليمان او خارجه لا فرق كبير كلاً يتعذب وفقاً لأليات وضعه

    ***************

    ولا عمرك هتعرف الحقيقه ولا تجزم ان الغلط عند المسلمين ولا المسيحين

    ***************

    حسنا الله ونعم الوكيل

    ***************

    unfair market

    ***************

    اما تجاوب على سؤال الشباب عاوز ايه هتعرف اجابه السؤال ده

    ***************

    يمكن مفيش وقت ، وكل اما عدد المدونين بيزيد بقلق بشأن الكيف

    ***************

    ReplyDelete
  7. بالفعل خلطبيطة وياما في السجن مظاليم هذة العبارة تنطبق علي معظم السجناء الي في مصر

    ReplyDelete
  8. شفت بقى أنا بتابع مدونتك ازاى
    لدرجة انى بكتب لك تعليق وأنا عيانة
    رغم انى لا أزعم انى مقتنعة بأفكار ايمن نور أو خيرت الشاطر أو طلعت السادات أو مرتضى منصور وغيرهم
    الا انى أشعر انه كل بنى آدم له الحق فى محاكمة عادلة مش تلفيقة عادلة
    عموما زى ما انت قلت السجن للجدعان وفى هذه الحالة مش عايزة أكون جدعة خاااااالص .. هههههههه
    أما عن التدوين تقدر تقول دلوقتى انه بقى النفس اللى بتنفسه
    وأحلى حاجة انه جمعنى بأصدقاء كتير
    وزادت سعادتى بالتعرف على مجموعة من الزملاء الصيادلة المدونين
    وعلى فكرة بقى مش كل البنات زى ما انت بتوصف كده
    فيه منهم كتير محترمات جدا وبيراعوا ربنا وعارفين ان الحياء شعبة من الايمان
    البوست بتاعك طويل وعايز كومنت طويل وأنا تعبانة ومش قادرة
    مستنية بوكيه ورد منك أو حتى كيلو قشر برتقال
    ولا أقولك ابعت لى علبتين مضاد حيوى على سبيل الهدية
    هههههههههه
    تحياتى صديقى العزيز
    يلا كفاية رغى بقى

    ReplyDelete
  9. الســــلام عليكم
    هى دى خلطبيطة بعقل هههه
    شكل حضرتك الحالة المزاجية اصلا متلخبطة على الاخر
    فعلا السجن للجدعان

    والله طالما ضاع الحق والخوف من الناس فى كل شئ فلازم حق الاتنين هيضيع

    وقال ايه يقولوا الشرطة والمواطن فى خدمة الوطن يبقى سلملى على الوطن والمواطن


    نجى بقى عند المشكلة اللى تخصنا وطبعا عديت فيه الخط الاحمر ههههههههه
    هاقول لحضرتك
    طفلة فى سن 3شهور فى الحضانة + ام فى العمل من الساعة 8 صباحآ حتى 3 عصرآ+ اب يعمل اكثر 18 ساعة + قطع ارحام + اعلام فاسد+ بيئات مختلفة + نوادى اربعة وعشرين ساعة + عربيات = انحلال اخلاقى
    طبعا الموضوع كبير عايز بوستات كتيرة اوووووى

    المدونات جميل اوووى وعموما العالم الافتراضى كله الواحد بيحس انه جزء منه خصوصا لما يضيق بك عالم الواقع
    اما حكاية التدويين وكده ساعات بتكون حالة نفسية وعندك لخبطة ولازم تكتب حاجة كويسة لا الناس مش ذنبها يتحملوا المسئولية مع الواحد ههههههه
    تـحــــياتى لك ولموضوعاتك الممتازة كالعادة

    ReplyDelete
  10. فعلاا اصبحنا فى زمن العجايب واللخبطة

    بس لسة فية خير وناس طيبة لان لو انتهى الخير تنتهى الحياة

    تحياتى

    ReplyDelete
  11. لسه يا ما هيحصل يا احمد يا خويا
    ومن العجايب
    و........ قرب قرب قرب شوف الى بيحصل

    ReplyDelete
  12. شادي فايد:
    ياريت ياعم شادي كل الناس تعتبره كدة
    ساعتها مش هنلاحق من كتر المدونات اللي بنتابعها
    انما في ناس بتعمل مدونة وتكتب فيها وبعدين تنسى ان عندها مدونة
    تحياتي واحتراماتبي
    ذو النون المصري:
    تشريفك لمدونتي حاجة كبيرة قوي بالنسبة لي
    ياريت تكون صديق للمدونة
    تحياتي واحتراماتي

    ReplyDelete
  13. remooo:
    والله انا تمام الحمد لله ياريموو...مفيش مشكلة
    بس هي زحمة افكار كدة في دماغي وحاولت انقلها في المدونة بس للصدفة ان الافكار دي كلها سلبية
    بس انا تمام الحمد لله
    شكرا ليكي على اهتمامك مش غريبة عليكي وعلى ذوقك طبعا
    تحياتي واحتراماتي

    ReplyDelete
  14. ahmed shokeir:
    ياباشا دة شرف ليا
    الف شكر ليك
    وان شاء الله تكون صديق دائم للمدونة
    تحياتي واحتراماتي
    esmeralda:
    لا طبعا عمري ما كنت هقول والسلام
    انا عارف يافندم انها علامة تجارية وانك واخدة التوكيل
    ياريت بقى بعد ماترجعي من الوورك..تتحفينا بتعليق جميل على الموضوع
    تحياتي واحتراماتبي

    ReplyDelete
  15. mohamed a.ghaffar:
    كعادتك دائما رؤية نقدية وفكر عال بأقل عدد من الكلمات
    تحياتي واحتراماتي
    عمرو غريب:
    طبعا المقصود السجناء السياسيين ومعتقلي الرأي في البلد
    انما اكيد السجن لسة مليان بلاوي سودة منهم مظاليم برضة
    تحياتي واحتراماتي

    ReplyDelete
  16. voice of love
    طبعا زميلتي العزيزة لازم تتابع مدونتي باستمرار...اومال فين حق الزمالة والاخوة الصيدلانية اللي بتجمعنا؟
    وبعدين في صيدلانية تعيا وتتعب...انا هقدم فيكي شكوى في النقابة انك بتسيئي لمهنة الصيدلة في مصر
    باب النجار مخلع صحيح
    عموما هجيب لك شريط فلوموكس واسبرينتين واجي ازورك
    تحياتي واحتراماتي

    ReplyDelete
  17. اماني:
    فعلا يا اماني كل فقرة في البوست دة محتاجة بوست لوحدها
    بس فعلا الافكار متلخبطة وللاسف كلها افكار في منتهى السلبية
    تحياتي واحتراماتي
    tamer nabil:
    طبعا في خير يا تامر بيه...بس نسبته قد ايه؟
    بيقل جدا
    النسبة بدأت تختفي فعلا تحت الزيادة الرهيبة في السلبيات اللي بنعاني منها
    رأي مميز ومحترم كالعادة
    تحياتي واحتراماتي

    ReplyDelete
  18. rania:
    هو لسة في حاجة تاني هتحصل
    ماتبسطهاااااش اكتر من كدة
    رانيا:
    ارمي الجيتار وصوتي

    ReplyDelete
  19. حلو التفريغ العقلى ده
    فضفضة حلوة و مواضيعها كتير
    وده يريحك كتير

    تحياتى

    ReplyDelete
  20. افكار

    بس مزعجة صباحا

    :)

    ReplyDelete
  21. عزيزي
    حقيقي كتاباتك جميلة
    بالنسبة لموضوع السجن
    ماتتمناهوش أحسن تلاقي نفسك بعد الشر جواه

    بالنسبة لموضوع الكنيسة
    ده له أصل ديني وتاريخي وقانوني
    بس عندك حق في نقطة إن مش بناء الكنيسة هو اللي ممكن يكون خطر ع الاسلام وجالب للعار

    موضوع الضابط
    في كل مهنة يوجد الصالح والطالح
    وهذا من واقع صداقتي لصديق دراسة منذ إبتدائي وهو حاليا ضابط شرطة برتبة رائد .. هذا الشخص على قدر عالي من الأخلاق والالتزام
    وسواقين الميكروباص معروف أخلاقهم كويس

    موضوع التجارة والنصب .. مع الأسف أنتشر في مصر من أكتر من خمس سنين
    الكل بيقهر الكل
    تلاقي البقال بيبع لك الجبنة بقرش ويبيعها لزبون تاني بقرشين
    أصبحت مع الأسف سمة عامة

    البنات عايزه أيه؟
    البنات عايزه تتجوز
    وعايزه تحس بجمالها وبأنوثتها

    التدوين ع الفاضي والمليان مش حاجة حلوة
    أنا عن نفسي بأفكر كتير قبل ما أكتب أي موضوع جديد
    لأني بأبحث عن الإفادة اللي ممكن تعود على القراء

    خالص تحياتي

    ReplyDelete
  22. بوست جميل..:)
    تحياتي

    ReplyDelete
  23. انت بتلقح على ايه
    طب انا مابقتش ادون علشان مافيش كيبورد، اعمل انت معايا الصح وهاتلى كيبورد مش صح ولا ايه
    ...........
    أنا بشكك أصلا فى حكاية بناء كنيسة مش ده الى ممكن تحرك مشاعر ناس لسه ارجة من الصلى وتخليهم يعملوا كده، صدقنى الى اتقال مش كنيسة بتتبنى أكي حد حقن حاجة
    ........
    نجيى للمهم يسعدنى ويشرفنى انى أقولك البنات عاوزة من الآخر وماحدش يزعل
    انها تتعبنا ونتشل ونتقهر ونتغم ونحزن ويجلنا سعار وكبت وبعديها ان شاء الله انفجار فى وسط البلد فى حمام عمومى فى محل كشرى فى مدرج كلية، وياعينى كمان لو صيدلية ماشى بظبطك اهو ياعم
    أنا بج خايف انهم يكونوا فاكرين ان اللبس الى هما بيلبسوا ده مابيأثرش فينا، ممكن؟
    انت خليت الواحد يجعجع ويرغى ويطلع الفضايح، منه له منه له

    ReplyDelete
  24. كلما قرأت لك

    إزددت إقتناعاً

    اننا نمتلك وقوداً دافعاً لأمتنا

    لكننا لا نحسن استغلاله

    تحياتي لهذا البوست الرائع

    ReplyDelete
  25. محمد ياسر:
    الف شكر ليك على تشريفك للمدونة
    ويارب تكون عجبتك
    كراكيب عادل:
    بيني وبينك هي افكار مزعجة على طول بس حظك بقى انك شفتها الصبح
    لو كنت قريتها بالليل...كانت ازعجتك برضة
    تحياتي واحتراماتي

    ReplyDelete
  26. محمد سمير:
    متشكرين يابو حميد
    احنا اخوات ولا ايه؟.....ابناء سمير
    مدونتك اكتر من روعة وافكارها جميلة
    تحياتي واحتراماتي

    ReplyDelete
  27. ياسر حسين:
    ياباشا الف شكر ليك على تشريفك مدونتي المتواضعة دي
    انا طبعا مش بتمناه ولكنها سخرية من اللي جوة السجن واللي براه
    بالنسبة للكنايس فحرية العبادة لازم تكون مكفوله للجميع طالما لا يتعدى هو كمان على حريتي
    الضباط يعني مش ملايكة...ويمكن بالنسبة لهم الطالح اكتر بكتييييييييير من الصالح ولكن دى لا يمنع ان في منهم ولاد ناس جدا وفي منتهى الاخلاق
    اما بتوع الميكروباص...انا عارف طبعا ان الواحد ممكن يوصل لمرحلة انه عايز يضربهم بالنار
    بس مااتمنيتش اقطع لهم صوابعهم
    النصب والغش التجاري دة...مالوش حل ولا ايه؟
    البنات عايزة تتجوز؟
    طب ماتتجوز من غير ماتعقد بقية الشباب اللي عايز هو كمان يتجوز واللي اصلا متجوز
    تحياتي واحتراماتي

    ReplyDelete
  28. أيه ده كله كل المواضيع دى فى بوست واحد طيب كويس قوى
    على العموم مدونتك جميلة وموضوعك جميل جدا
    وشكرا على أضافة لينك مدونتى عندك ده شرف ليا

    ReplyDelete
  29. حلوة اوي الخلطبيطة دي
    عاملة زي طبق السلطة كده ...كل واحدة فيهم عايزة تدوينة لوحدها
    بالنسبة لموضوع الفتنة الطائفية:دايما الحاجات دي بتظهر في المجتمعات اللى فقدت القدرة على التعايش مع نفسها أولا و مع الآخرين ثانيا...هذه ثقافة المهزوم الذي يبحث دائما عن شماعة يحمل عليها أخطائه..و على رأيك لو بحثت في معظم اللى اتقبض عليهم ممكن تلاقيهم ما بيصلوش...
    بالنسبة لموضوع البنات عايزة ايه:اقولك عايزة ايه ..عايزة المتدين علشان يتقي ربنا فيها و في نفس الوقت عايزة الولد الكووول الروش اللى صحباتها يتهبلوا عليه لما يشوفوه
    عايزة اللى اخلاقة كويسة و يغير عليها و يحافظ عليها و في نفس الوقت عايزاه عصري مش رجعى ميقعدش يقولها بتكلمى مين و لا بسة ايه...
    بس خلينا نسأل سؤال كمان :هو الولاد عايزين ايه؟؟
    الولاد اللى بيلبسوا البناطيل الواقعة منهم...اللى أهم حاجة و هو بينقى العروسة انها تكون حلوة...يبصلها يتهوس...هما دول كمان عاوزين ايه؟؟
    الشباب و البنات دلوقتى في حالة غريبة من التذبذب الصبح بيصلى في الجامع و بالليل في الديسكو بيرقص ...الموضوع مش موضوع البنات فقط ده المجتمع كله.
    بالنسبة لإبداع المدونين ...انت نسيت تذكر حاجة كمان ممكن تخلى المدونين مش بيكتبوا ..........ضيق الوقت
    ما تنساش ان المدونين بيكتبوا في وقت فراغهم ...و في ناس بجد معندهاش وقت فراغ
    ........أحييك على التدوينة الجميلة و على المدونة كلها

    ReplyDelete
  30. hapasa:
    ياعم هي جت ع الكيبوورد...اجيب لك اتنين تلاتة بس تدون بعد الامتحانات بقى على خير
    البنات من الاخر...عايزين يجيبونا الارض
    ربنا ينتقم منهم الاخوة البنات دول
    تحياتي واحتراماتي
    صاحب البوابة:
    كلماتك وسام على صدري يا باشا
    الف شكر ليك
    تحياتي واحتراماتي

    ReplyDelete
  31. bos bos:
    الف شكر ليكي يا بس بس
    انا طبعا مابضيفش الا المدونات المميزة اللي تستاهل ان الناس تعرفها
    وطبعا مدونتك واحدة منهم
    تحياتي واحتراماتي

    ReplyDelete
  32. It places fhoto of Madeleine in your bloggue


    Missing Madeleine!
    Madeleine, MeCann was abduted from Praia da Luz, Portugal on 03/03/07.

    If you have any information about her whereabouts, please contact Crimestoppers on 0800555111 Please Help

    ReplyDelete
  33. الحلم العربي
    نورت المدونة وان شاء الله ماتكونش الزيارة الاخيرة
    ومستني تعليقاتك باستمرار ان شاء الله
    تحياتي واحتراماتي

    ReplyDelete
  34. طيب متشكرة جدا على كلامك وأنا بقى رجعت تانى ونزلت بوست جديد بس اوعى تقول ياريتك ما رجعتى

    ReplyDelete
  35. انا كنت زيك كده من فترة بس خلاص خدت قرار اني مش هشوف الغلط ما دام مش هقدر اصحله انا هتصرف في الي اقدر عليه بس لاني مش عايز اموت مخنوق

    ReplyDelete
  36. bos bos:
    العود احمد وحمدا لله ع السلامة
    كبير المتشردين:
    مهما تحاول هتلاقي عينك بتقع ع الحاجات الغلط علشان انت عايز تصلحها ومايبقاش في غلط خالص
    تحياتي ليك
    نورت المدونة

    ReplyDelete
  37. انا جيت اهه
    والنبى جيت
    سجل عندك فى الدفتر
    انه بتاريخ ساعته ويومه البتاع جت
    لولولولولىىىىىى

    اتكلم؟؟
    هات المايك يابنى
    ... اححمممممممم
    البوست فظييييييييييع
    بجد
    ايه ياولا؟
    انت دماغك ايه ذرية؟
    بجد استوكيفت منه استكيفات؟
    حلو جدا

    بس فيما يخص البنات عاوزة ايه
    لانى بنت ممكن احاول اجاوب
    بصراحة مطلقة
    البنت بتحب تشوف انوثتها فى عين الراجل
    اى راجل
    بيسعدها
    وبما ان كلهم قلعو فى التليفزيون
    فهى لو مقلعتش زيهم محدش حياخد باله منها
    وطبعا دى ضربة قاصمة لانوثتها
    طبعا ده مش كلهم
    فيه بنات مبتحبش التقيد بمعايير معينة
    يعنى البس براحتى وتبقى حمار -مش انت- لو حكمت عليا من منظور اللبس وحاول بس تتعدى حدودك وانا امرمطك - برضه مش انت-...ده نوع تانى
    وفيه نوع تالت
    اللى هو بص عليا بص
    دول عاوزين كل اللى بتوع الفيديو كليب عاوزينه
    ودول فئه معندهاش ثقة فى نفسها
    وجاهلة فى الغالب
    وبتوع عربيات كمان
    هههههههههههه
    الفئة الرابعة والاخيرة
    بتتفرج على دول كلهم ودول 3 انواع
    نوع بيتحسر ويقول جتنا نيلة.. ونوع معقد

    ونوع بيحس انه احسن من دول كلهم لانه - حسب وجهه نظرهم- مش رخاص زيهم
    دى كل تصنيفات البنات فى مجتمعنا
    واى خدعة يامعلم

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails