Wednesday, 9 May 2007

وشوش

وشوش بنشوفها كل يوم تقريبا.....بس الحقيقة هي مش مجرد وشوش هي كمان عقول بنتعامل معاها باستمرار وبتؤثر في الرأي العام بنسب متفاوتة
منهم وشوش بتستغل المساحة المتاحة ليها على الشاشة علشان تبث سمومها والتوجيهات اللي جاية ليها على الشاشة...ومنهم طبعا اللي ضميره لسة حي بس الظروف مش مساعداه....ومنهم اللي ضميره حي والظروف مساعداه انه يتكلم بس هو حاطط لنفسه خطوط حمرا مايتخطيهاش علشان مش عايز مشاكل
الناس دي مش كلها وجوه تليفزيونية...ممكن تلاقيهم كمان كُتاب او اذاعيين
هحاول في البوست دة اتكلم عن بعض الشخصيات دي اللي بتطل علينا يوميا او اسبوعيا وبتأثر في عدد كبير من الناس اكبر مما تتخيلوا
انا بعتبر الناس دي هي اللي بتوجه الرأي العام المصري

**********************
منى الشاذلي
قبول...لباقة...ثقافة واسعة ومدهشة.....شياكة واناقة بمنتهى الاحترام والذوق
يعيبها بشدة نقطة الخط الاحمر اللي طاه للمناقشات بتاعتها...ماسمعناش لمنى الشاذلي اي نقد للحاكم ولا لأي فرد انما الملاحظ من اسلوبها في البرنامج بتاعها انها بتنتقد اوضاع عامة سيئة في المجتمع دون اشارة للمسئول ايا كان عن هذه الاوضاع خاصة لو كان هذا الشخص المسئول وزير وانت طالع
انما ممكن يكون دة بسبب سياسة قناة دريم...المملوكة لرجل الاعمال احمد بهجت وانها واضعة حرية ولكن ببعض الحدود..ولو ان الكلام دة برضة مردود عليه ان دريم بيعرض عليها برضة برنامج لحقيقة لوائل الابراشي وهو يمتلك هامش حرية اعلى بكتير من المتواجد في العاشرة مساءا وربما دة بسبب ان العاشرة مساءا برنامج اكثر جماهيرية من الحقيقة
بيؤخذ برضة على منى الشاذلي انها بتتلخبط كتير وبشكل لافت للنظر...مرة في الاسماء ومرة في الاحداث وساعات كتير تحس انها بتفاجىء بالحلقة او مضمونها او موضوع معين على الرغم من ان البرامج دي المفروض انها بتكون مرتبة بشكل كويس جدا
بس طبعا دة رأي لا يبخس المذيعة المتألقة الناجحة حقها وانما رغبة في التطوير

معتز الدمرداش & مي الشربيني
بيقدموا مع بعض برنامج 90 دقيقة على شاشة المحور
رأيي الشخصي ان الثنائي دة مختلف.... او بمعنى اخر غير متفاهم.... مفيش هارموني بين الاتنين
معتز بيتميز بخفة دم بتتحول احيانا لأستظراف اما مي في واخدة الموضوع بشكل جد جدا مبالغ فيه مما يفقد البرنامج الكثير من الانسجام في تقديمه
برنامج 90 دقيقة برنامج بيحاول يكون ليه مكان بارز وسط المنافسة الرهيبة بين الفضائيات...فجر اكتر من قضية من اهمها بنات الليل وهالة سرحان..ولو انه لسة مااكتسبش ثقة المشاهدين لحد دلوقتي وتحس انه لسة ماكونش الجمهور بتاعه

عمرو اديب
على الرغم من انه من عائلة ثرية سواء قديما او حاليا الا اه دايما بينحاز للفقراء والغلابة والمهضوم حقهم في البلد دة
اسلوبه الظريف والتلقائي وخفة دمه بتنجيه كتير من المشاكل
اللي ممكن تتسبب فيها صراحته وثقل هجومه على ناس كبيرة في البلد
يعتبر اعلى برنامج من النوعية دي من الرامج من حيث هامش الحرية والنقد المتاح ولكن دة بيرجع لأنه بيبث عبر قناة مشفرة وهي فضائية الاوربيت (وان كانت الوصلة ماخلتش حاجة مشفرة خالص)..ودة اللي زود من شعبية البرنامج بشكل رهيب.
بيعيب على عمرو اديب عداءه المعلن واللي مابينكروش للأخوان المسلمين ودة بيخليه مش على درجة عالية من الحياد وهو بيناقش القضاية المتعلقة بالأخوان
بيعيب عليه كمان اعتماده في بعض الحلقات على احمد موسى الصحفي بالاهرام واللي بيعتبر مندوب الاهرام في وزارة الداخلية
بيعيب كمان على البرنامج الناجح دة كمية الاعلانات المبالغ فيها جدا ولكن هي دي ضريبة النجاح

أحمد شوبير
لما يبقى حد مقتنع مليون في المية انه اذكى بكتير من كل الناس على الرغم ان دي مش حقيقة على الاطلاق
الشخص المستذكي او اللي بيستغبى الناس....هو دة الكابتن شوبير اللي بيقدم برنامج يومي رياضي على قناة دريم1 بالاضافة الى برنامج كروي اسبوعي على دريم2 ودة اللي خلى ناس كتير تسميها قناة شوبير
الكابتن شوبير بيستغل ظهوره اليومي على الشاشة حتى في الاجازات في تصفية الحسابات سواء الشخصية من ناس بيهاجموه وينتقدوه او السياسية من ناس بيعارضوا الحزب الوطني اللي بينتمي اليه المذيع الفاضل
ويحسسك وهو بيتكلم انه يعني منتهى الحيادية والانصاف وانه لا يستخدم اي اداة في متناوله لتسوية الحسابات مع خصومه معتمدا طبعا في كدة على ان الناس يا اما غبية جدا يا اما هو اذكى من اللزوم
الكابتن شوبير يحب قوي في برنامجه يستعرض علاقاته بالمحافظين والسادة الوزراء ومفيش مانع ابدا من عمل شوية دعاية انتخابية لزوم مجلس الشعب اللي هو عضو فيه

تامر أمين & منى الشرقاوي
الثنائي دة بيقدم برنامج البيت بيتك اللي الحكومة نفسها الناس تخليه البرنامج الاول والاخير في المشاهدة بأي طريقة..ومعاهم حق بصراحة مش هيلاقوا احسن من الثنائي الهايل دة اللي يناسب الدعاية الحكومية جدا
الغريب فعلا-سبحان الله-ان كل ما الحكومة تحاول تجيب ناس يحسنوا صورتها بيحصل العكس تماما
تامر امين ممكن ان نختصر الكلام عنه بكلمتين بس
الواسطة والمحسوبية
ممكن كمان ان احنا نوصف اداءه بكلمة واحدة بس
الاستظراف
اما منى الشرقاوي...فلا تعليق..هي جاية علشان تكمل الصورة انه لازم البرنامج يقدمه مذيع ومذيعة وبما ان المذيع هيكون تامر امين يبقى المذيعة اللي تناسب الظروف دي اكيد مش هتكون افضل من منى الشرقاوي
مش هقول ايه اللي بيعيب البرنامج لأن مفيش ميزة للبرنامج من اساسه

المصري اليوم
اكيد الناس اللي غاوية قراية جرايد عارفة كويس قوي ايه هي المصري اليوم وعارفين كمان كويس جدا قيمة االصحيفة دي وقدرتها على احداث حركة في حالة الركود اللي بتمر بيها الحياة السياسية في مصر

فجرت قضايا كتير جدا على جميع المستويات....اتهموها مرة انها عميلة لأمن الدولة وناس تانيين قالوا لا دي صحيفة الاخوان المسلمين...ناس تانية قالت دي صحيفة الاقباط في مصر
انما دة كله راجع لأن الناس لسة مش متعودة على الصحافة الحرة المستقلة...لازم الصحيفة من وجهة نظرهم تكون متحدثة بأسم حد معين
مايعرفوش ان في حاجة اسمها الليبرالية اللي بتمثلها صحيفة المصري اليوم
**********************************************************
مش دول بس اللي بيشكلوا الرأي العام بس اقدر اقول انهم نماذج مهمة في حياتنا مختلفين فكريا وتوجهيا وسياسيا وناس في الشرق وناس في الغرب
محدش يقدر ينكر دور الناس دول في حياة الشعب المصري في القرن الواحد والعشرين سواء سلبا او ايجابا

48 comments:

  1. جمبل جميل جميل لأقصى درجة الفكرة ثم التحليل على الترتيب

    منى الشاذلي دي حكايه وأحلى حاجه فيها غير الشكل طبعاً أنها عندها ضمير وحب للفقراء وكره للظلم على الرغم من أنها من سكان الزمالك وخريجة الجامعة الأمريكية إلا أن الشعور الوطني عندها قوي وجارف وإنسناة بمعنى الكلمة

    عليها مآخذ لكنها تعتبر تفاهات بالنسبة للمضمون

    بالنسبة ل 90 دقيقة أو القاهرة اليوم فأنا لا أراهم لكونهم مشفرين ولكني أحياناً أشاهد مقتطفات عمرو أديب وعامة فهو شخصية ظريفة جداً لكن أسوأ حاجة فيه هي أخوه :) ذات مرة قامت منى الشاذلي بإستضافة عماد وأقل وصف لتأثير كلامه على النفس أنه يثير القيء والغثيان وارتفاع ضغط الدم وإفراز الدموع بشدة مع إحمرار العينين ده تلخيص للأعراض الجانبية من كلام عماد أخوه :)

    بالنسبة للغيط غيطك فده خسارة فيه التعليق :)

    أما المصري اليوم فتعتبر من المكيفات في خطورتها :) فأنا مدمن المصري اليوم مع وجود بعض التحفظات إلا أنها في المجمل أحسن جريدة في مصر كما يخال لي :)

    أشد على يدك يا أحمد وأكثر الله من أمثالك وأفكارك :)

    أنا الأنونيموس بتاع بوست المرتضى :)

    كفايه :)

    ReplyDelete
  2. سمورة بجد بجد بوست رااائع وينم على انك مشاهد واعى ومراقب ولابدلهم فى الدرة يعنى :-)
    منى الشاذلى رأيك فيها نسخة من رأيى اللى ماشية اقوله فى كل حته
    دى عاوزة تستضيف واحد زى فاروق جويدة واحمد زويل كل يوم
    حتعمل الحوار المثالى
    لكن سمير رجب والفاسدين عموما؟؟
    مينفعوهاش
    حتدى حوار ناقص كتيييييير
    .......
    90 دقيقة
    كل اللى اقدر اقوله عنه انى بتبضن منه
    فمبشفوش اصلا
    مش ناقص غير معتز ومى على اخر الليل يعنى
    !!!!!!!!!
    ..........
    القاهرة اليوم
    برنانج بجد حلو اوى
    بس فعلا احمد موسى هو خازوق البرنامج
    بحب جدا عزت ابو عوف وخيرى رمضان لما بيبقو معاه
    ولو انه بيجى كتير على عزت اكمنه طيب
    او مش متابع
    بس فى المجمل برنامج من غيره مش عارفة كنت حعمل ايه
    !!!!!!!!
    ...........
    اما البيض بيضك او البيت بيتك
    فده برنامج غنى عن التعريف
    برنامج وزارة الداخلية الرسمى مع مخبر مصر الاول تامر بصيونى
    واللى مضايقنى ان منى مرآة يوسف معاطى
    انا بحب الراجل ده جدا
    رغم ملحوظاتى عليه
    بحس ان خليفة يوسف عوف حبيب قلبى
    وكنت بشترى اهرام الجمعة ايام ملحق ايامنا الحلوة مخصوص عشانه
    بس يالا
    ده يضرب وده يلاقى
    هههههههههه
    ...............
    المصرى اليوم
    جريدة قوية
    خصوصا انت مش متخيل اد ايه جريدة يومية ده كابوس
    انا كنت بدرب فى واحدة من الجرايد دى وعارفة
    وخصوصا انها فعلا انضف جريدة فى مصر
    مع الدستور طبعا
    ............
    معلش صدعتك بجد اسفة
    بس فعلا بوست حلو
    وحفز عندى رغبة الرد والتعليق

    تحياتى الحارة حقيقى

    ReplyDelete
  3. :)
    :)

    بالنسبة لموضوع البيت بيتك
    انا بعتبر ان البرنامج ده فيه ميزة
    وحيدة
    محمود سعد

    هو بطل يقدمه ولا ايه اصلي دلوقتي في المنفي ومش متابع
    :)

    ReplyDelete
  4. الاسلام عليكم ورحمة الله وبركاته

    تحليل اكثر من ممتاز لمجموعة البرامج اللي بتحوذ علي اكبر كم من المشاهده
    ماهي دي الموضه اليومين دول
    اي قناه عاوزه تجذب مشاهدين وتسوق اعلانات تعمل برامج من النوعيه دي

    اما بقي الاعلانات اللي مزعلاك من قناة اوربت دي ما كانتش موجوده بالكثره دي قبل الوصله كانوا يادوب اعلان ولا اتنين
    بس بعد ما ناس كتير بقي بيشوفوها سرقه اضطرت انها تزود الاعلانات ..امال يعني هاتصرف علي البرنامج منين

    بالظبط زي ال ايه ار تي
    زمان قبل الوصله كانوا هما يادوب اعلانين ولا تلاته بالكتير عن عربيات احدث موديل وبارفانات ماركه عالميه ومنتجعات سياحيه
    اما دلوقتي فابقت الاعلانات من بتاع القناة الاولي سمنه وصابون ومسحوق غسيل .....الخ


    تحياتي

    ReplyDelete
  5. منى الشاذلى ده فتاة احلامى ونفسى أجوز واحدة شبها حته قمر بصراحة ورقيقة جدا وبتكسف كده ووشها بيحمر وبيخضر وياسلام لما ببتزنق ولا لما بتتغاظ من حد وبماتبقاش عارفة ترد عليها تبص فى الورق بتاعها وتبقى نفسها تلعلع بس ماتفهمش بيحصل ايه
    مايعيبهاش هي ووائل إلا العربية الفصحى الركيكة الى بيكلموا بيها الفصحى بتاعتهم سيئة للغاية
    .........
    أما معتز فبحس انه زي شغل الشلت وبيفتح الملاية وده قالت وفلانة عادت شغل شلت ومصطبة وفرش ملاية وام فاروق عملت جمعية علشان تروح جمصة واجبت مروحة بالقسط
    وطبعا زيملته جد جدا جدا جدا
    .......
    طبعا مافيش كلام بعد كلام على شوبير ولا على عم بسيو البيض بيضك
    انت صيدلة ولا معهد تلفيزيون وأرايل
    لا هاقولك تلاقيك عامل وصلت دش الشهر ب 25 جنيه
    تحيتى ليك وتنمياتى بالتوفيق
    وبوست موضوعى ومحترم

    ReplyDelete
  6. هم دول فعلا أهم مؤثرات علي الشعب المصري حاليا ... البيت بيتك فيه ميزه وهو محمود سعد ... إنت نسيته ؟؟؟
    مني رائعه
    معتز ومي مفتقدين للقبول
    عمرو متمكن وجاااااااامد
    شوبير مش باتابعه ... بس ماما بتقول دايما الراجل ده فاضي ... بتكرهه جدا بتقول هو مش وراه حاجه يعملها غير القعده في القناه دي
    المصري اليوم جريده محترمه بكل المقاييس

    عرضك هايل
    سلاماااااااااااات

    ReplyDelete
  7. بوست جميل اوى يا احمد..
    افكارك منظمة وعرضت الموضوع بشكل كويس
    متفقة معاك فى كل اللى انت قلته ...

    بتفق معاك ان منى الشاذلى مذيعة لامعة ولكن ينقصها انها يكون ليها موقف فى الحوار ..يعنى ماتحسسناش انها حكم دولى بينظم القاعدة وبس....
    بالنسبة لعمرو اديب طبعا دمه زى السكر خصوصا لما بيكون متغاظ من الاهلى (انا اهلوية صميمة على فكرة)..

    معتز ومى مفقتدين لحاجة مهمة بيحتاجها اى حد بيتشغل فى التليفزيون الكارزما...يعنى انت ممكن لو فتحت التليفزيون ولاقتهم ماتحاولش من القناة بس فى نفس الوقت مش هتفتدهم لو البرنامج وقف...بس عموما الواحد بردو ماينكرش ان معتز قلل شوية الاستظراف ومى ابتدت تكون اكثر مرونة وتخلصت من الاداء الجامد اللى كانت متعودة عليه وهى لسه مذيعة اخبار فى قناة العربية

    تامر ومنى الشرقاوى صوت الرسمى للحزب الوطنى...ضيف على ده ان تامر ساعات بيكون اسلوبه بيكون مستفز...منى الشرقاوى (المبتسمة دائما)بحس انها مش عارفة لسه تدخل فى المود بتاع برامج التوك ..حاسة انها لسه بنفس الطريقة العادية اللى بتقدم بيها مذيعات البرامج العادية اللى كانت بتقدمها قبل كده...وخصوصا كلمة حضارتكو دى مش بحبها لما بتقولها.

    تحياتى

    ReplyDelete
  8. تحليل رائع وعميق

    احييك يا اخي الكريم على هذه الفكرة

    ReplyDelete
  9. تحياتي

    احييك علي المدونة... و البوست جميل..و مختلف تماما.

    أنا هابدأ من جريدة المصري اليوم...هو أفضل جريدة في مصر الي الان،هذا في رأيي المتواضع، و أنا حريص علي متابعتها ،و تتميز بالنقد الموضوعي، مع الاحترام للنفس و للاخرين.

    بالنسبةللعاشرة مساءً ، في رأيي ان برنامج ناجح ، و رغم اي سلبية بسيطة قد تظهر الا ان الموضوعات و سلاسة التقديم.. و القبول النفسي الذي تحظي به مقدمة البرنامج لدي المشاهدين .

    و أعتذر عن عدم ابداء الرأي في باقي البرامج لاني لم اري اي منها.

    تحياتي و دائما موفق إن شاء الله.

    ReplyDelete
  10. بجد بوست ممتاز فيه إستعراض بسيط للعديد من الأشخاص الذي نيأثروا في حياتنا بشكل أو بأخر بس أنا بعتبر أفضلهم مني الشاذلي و شوبير والمصر ياليوم الحقيقة جريدة جديدة أثبتت وجودها بسرعة والحقيقة أنها مستقلة بمعني الكلمة أي ليس إنتماء محدد وهذا هو تحديدا ما نحتاجه في الفترة القادمة ...إنشاء الله الجرنان بتاعي حايبقي زيها

    ReplyDelete
  11. تصفيق حاااااااااد
    مع انى مختلف معاك فى كام نقطه بس بوست شغااااااااااااااال اوى
    فعلا دووول وكام حاجه تانيه هما اللى بيوجهوا الراى العام
    وعن منى الشاذلى انا متفق معاك
    وقد ايه البرنامج ده ناجح وجميل اوى

    اما بخصوص 90 دقيقه هما فعلا معتز كوميدى شويه ومى جدا شويه بس انا شايف ان الموضوع شغال وبيظهروا بالشكل امطلوب ادام الشاشه وانا شايف انه كون الجمهور بتاعه بس مش زى البرامج التانيه

    عمرو اديب مش متابعه مش مشترك فى الاوربيت
    اما البيت بيتك تخاطيف تخاطيف ههههههه بس صح هو بيستظرف كتيييير اوى هههههههه

    المصرى اليوم
    يااااااااااااااااااه انت ماتعرفش الجريده دى بتمثلى فى حياتى اليوميه فعلا اول مره ارتبط بجريده كده انا تقريبا قرأت تلت تربع الجرايد التانيه سواء متخصصه بقه ولا لأ
    بس المصرى اليوم دى
    اللى اا اقدر اقوله عليه انه فعلا جريده محترم عرفت تجذب القارئ
    وتحترم عقليته
    جريده جااامده ياباشااااااااااا
    يلا
    سلامووووووووووووووووووز

    ReplyDelete
  12. من الحق انا نسيت
    الكابتن شوبير
    بس شوبير ده كل ما اشوفه
    ترن فى ودانى
    الراجل ده هايجننى
    ساعات يا اخى يكوون حياااادى جدا وساعات يبااان انه اهلاوى ومتعصب كمان
    مش عارف وعن تصفيه الحسابات ساعات بتحصل
    يلا
    سلامووووووووووووووووووز

    ReplyDelete
  13. anonymous:
    ياباشا الف شكر ليك...اخجلتم تواضعنا فعلا يعني
    منى الشاذلي شخصية طبعا ورائعة
    90 دقيقة مش مشفر دة بييجي على المحور الساع 9ونص بالليل
    عماد اديب عليه مآخذ من حيث ارتباطه بالحزب الوطني بس اعتقد انه ارحم بكتيــــر من ناس كتير قوي
    البيت بيتك دة حاجة كدة على جنب ممكن نكتب فيها مدونات مش بس بوستات
    الف شكر ليك على متابعتك لمدونتي ويسعدني تواجدك باستمرار
    تحياتي واحتراماتي

    ReplyDelete
  14. البتاع:
    لا مايهمكيش انا صاحي لهم قوي ومتابعهم وناقرهم كمان
    منى الشاذلي بتتكسف من الفساد وهي دي المصيبة
    ميزو ومي اديهم بس حقنتين هارموني وهيبقوا تمام التمام
    احمد موسى بقى دة بيجيبلي كرشة نفس ولازم اروح بعد الحلقات اللي بيظهر فيها للمستشفى اعمل غسيل دماغ من اللي سمعته منه
    تامر باسيو بقى دة حاجة رهيـــــــبة يااخوانا
    ايه دة معمول من ايه دة؟اكيد دة من طبقة تانية غير البشر العاديين اللي احنا نعرفهم
    انا بقى راجل مصراوي ودستوراوي لأبعد حد وممكن نتكلم عنهم من هنا للصبح
    صدعتيني ايه بس...دة انا متشكر ليكي جدا ع المتابعة
    نورتي المدونة
    تحياتي واحتراماتي

    ReplyDelete
  15. شادي فايد:
    محمود سع بيقدمه يومين بس في الاسبوع بس برضة بتكون معاه منى الشرقاوي ماهو مش معقول هيسيبوه لوحده كدة في البرنامج يقول اللي هو عايزه
    وبعدين محمود سعد على القناة التانية غير محمود سعد ع ال
    mbc
    خالص
    تحياتي واحتراماتي وترجع من المنفى بالسلامة
    خمسة فضفضة:
    ملحوظة رائعة فعلا
    الغريب بقى ان بتوع الايه ار تي بيقولوا ان في 6 مليون مصري بيسرقوهم على الرغم ان مكاسبهم من الاعلانات بيتهيا لي انها فاقت مكاسبهم من الاشتراكات بكتير
    تحياتي ليكي

    ReplyDelete
  16. hapasa:
    ربنا يحقق لك احلامك يا سيدي وتلاقي 10 منى الشاذلي مش بس واحدة
    اما ميزو فدة فيه والله خفة دم ساعات بتطلع منه حاجات حلوة فعلا ووسااعات بتبوظ العملية منه بصراحة بس مي هي اللي واخدة الموضوع دة جد جدا بتحسسني انها بتقدم نشرة اخبار
    اما بقى عن المتابعة فدة لأني في الاساس كائن تليفزيوني بيعز التليفزيون مووت وكمان لصيدلة ليها علاقة بالتليفزيون طبعا...اومال هنقعد نتفرج على ايه في الصيدليات؟
    تحياتي واحتراماتي
    reri:
    محمود سعد ليه يومين بس في البيت بيتك وبيتهيأ لي انه مابيبقاش براحته فيهم زي برنامجه على
    mbc
    شوبير لو تابعتيه اوعدك انك هتغيري المحطة اول ما يبتدي يسن السكاكين على منافسينه في الانتخابات ومنافسين حزبه
    المصري اليوم انا بشوف انها جريدة مصر الاولى
    شكرا ليكي
    تحياتي واحتراماتي

    ReplyDelete
  17. nermeen:
    الف الف شكر ليكي يا نرمين على رأيك في البوست وعلى متابعتك للمدونة
    انا بقى مش اهلاوي صميم انا الأهلي بيجري في دمي اساسا
    عمرو اديب اسوأ حاجة ممكن تتفرجي فيها عليه وهو بيتريق ع الاهلي ببقى همووت واوصله علشان اتخانق معاه
    انا كان اول مرة اشوف منى الشرقاوي دي في البيت بيتك وماعرفش كانت بتقدم ايه قبل كدة
    نورتيني
    تحياتي واحتراماتي

    ReplyDelete
  18. صاحب البوابة:
    منورنا يا باشا والف شكر على مرورك لمدونتي المتواضعة
    تحياتي واحتراماتي
    الربان:
    شكرا جزيلا على رأيك القيم في مدونتي
    المصري اليوم صحيفة خارج المنافسة وان كانت الدستور بدأت تاخد جزء كبير منها
    الا ان كله في مصلحة القارىء
    الف شكر وياريت تتابع المدونة باستمرار
    تحياتي واحتراماتي

    ReplyDelete
  19. شباب روش طحن:
    بس طبعا انا ليا عضوية واشتراك مجاني في الجرنال بتاعك ان شاء الله
    تحياتي واحتراماتي

    ReplyDelete
  20. حسام مراد:
    متابعتك للمدونة بتاعتي شرف كبير ليا
    والحمد لله انها شغااااااله
    دة معناها كبير قوي
    تحياتي ليك يا برنس
    واحتراماتي

    ReplyDelete
  21. بصراحه ياسمير انا دخلت الموضوع ده وقريته تقريبا 3 مرات ومارديتش في ولامره بس قولت بقي الرابعه ارد بصرحه في اللي فاتو مالقيتش كلام اكتبه بس هقولك انا مابكرهش اكتر من برنامج شوبير بجد انسان عديم الزوق واللباقه في الكلام اما بقي عن الباقين فا وراهم اولاد عاوزين يربهم
    وربنا يعينا

    ReplyDelete
  22. ايه يا عم
    يا ريت اما تكتب بوس جديد
    تدينى رنج
    هو انا اخر من يعلم و لا ايه؟
    موضوعك زى العادة
    بس بالنسبة ل90 دقيقة
    بصراحة معنتش ببلعه
    و مش لاكتر من اسلوب المذيع فى الحوارات و الى ساعات بيتسم بالعصبية المفرطة و الى فى الاخر بتظهر عدم احترام للضيوف
    بعكس منى خالص
    تحياتى
    لك

    ReplyDelete
  23. بصراحة انا شايف انة يعني حاجة كويسة في الزمن دة ان يوجد برامج زي دية بتكشف حقائق غائبة عن الشعب

    ReplyDelete
  24. الموضوع جميل جدا

    تحليل لذيذ

    مواضيعك على فكرة متميزة في مواضيعها و طريقة طرحها

    احييك

    ReplyDelete
  25. موضوع كامل متكامل ومجهود تشكر عليه
    احييك على موضوعاتك المتميزة
    بس اعتقد انك نسيت تضيف جريدة المصريون الالكترونية
    حيث تتمتع بمصداقية عاليه ونسبة متابعة كبيرة جدا جدا

    خالص تحياتى
    ودمت بالف خير

    ReplyDelete
  26. كلام جميل انا مش بتفرج الا على منى الشاذلى و90 دقيقة ... منى الشاذلى جميلة ومثقفة وغلطاتها لا تحسب ولا بركز فيها اصلا لأن مصداقيتها تمحو أى اخطاء .. اما 90 دقيقة بحس باللى قلته احيانا كثيرا ولكن اوقات كتير برضه بتبقى الحلقات مفيدة وجميلة وانا شخصيا بيعجبنى معتز

    ReplyDelete
  27. الســــــلام عليكم
    رائع يا دكتور تحليل لذيذ
    انا الاول كنت باسمعهم بس حاليا لا جانتى سدت نفس معرفش ليه هههههه
    ولا يمكن علشان باحسهم انهم تنفيس او حاجة كده زى المصاصة اللى ممكن تسكت بها طفل هنقولهم ايه ربنا يرحمنا منهم لان بصراحة لا اثق فى الاعلام المصرى بكل انواعه
    بس المصرى اليوم طبعا لازم اجيبه هو والدستور حتى لو مش فاضية ممكن أقرأ العناوين بس هههه
    تحيــاتى لك

    ReplyDelete
  28. أولا أنا سعيدة جدا انى اتعرفت على زميل عزيز
    ثانيا ازدادت سعادتى بتشريفك لمدونتى
    ثالثا ستكتمل سعادتى بمتابعة مدونتك الجميلة
    تصفحت مدونتك الرائعة وأعجنى أسلوبك وتحليلاتك وأفكارك فى التدوين
    خالص تحياتى وعميق السعادة بمعرفتك
    وعلى فكرة أنا أهلاوية موووووووووووووت

    ReplyDelete
  29. نسيت أقول حاجة كمان
    أنا بموت فى أغنية ماشربتش من نيلها
    وكنت بجهز بوست عنها بس بعد الأجازة التدوينية ان شاء الله

    ReplyDelete
  30. عليك نوووووووووووووووور
    عجبني جداً انتقادك لمنى الشاذلي
    بس عجبني أكتر انك كنت حيادي وبتقول المميزات والعيوب في كل برنامج

    ربنا يهدينا جميعاً يا رب
    جزاك الله خيراً

    :)
    نوني

    ReplyDelete
  31. تحليل رائع يا أحمد
    من اجمل ما قرأت لك
    تحياتي

    ReplyDelete
  32. هااااااااى

    سعدت بقراءة هذا الموضوع
    و سوف اقراء باقي موضوعاتك
    و سعدت بزيارة مدونتك

    اما بخصوص البوست ده
    فأنا لا اشاهد او لا اعرف الا منى الشاذلي و معك حق في كل نقاط الضعف و على الرغم من هذا فانا احبها و احب برنامجها

    و ايضا امر مرور الكرام على برنامج البيت بيتك فانا لا احبة و لا احب مقديمة و اشعر انه كله اصطناع و كذب و تضليل

    سعدت بمعرفتك

    كريم

    ReplyDelete
  33. كان هيبقى احلى لو خليت المصرى اليوم فى بوست لوحده
    عشان الموضوع كله عن البرامج باستثناء الجريدة
    المهم
    البوست رائع لأقصى درجة
    و اسلوبك عالى فى العرض يا ابو سمير
    ..............
    القاهرة اليوم هو الافضل دون منازع
    و هذا رأيى
    تحياتى يا نجم

    ReplyDelete
  34. meroooo:
    يعني ينفع كدة تيجي المدونة 3 مرات ولا ترمي سلام ولا كلام ولا تعليق ع البوست الغلبان دة؟
    شوبير زي ماقلت مشكلته انه فاهم نفسه اذكى من مشاهديه وان اللي بيتفرجوا عليه جماعة من المعاتيه
    ودي طبعا قمة الغباء
    تحياتي واحتراماتي

    ReplyDelete
  35. rania:
    لا معلش بقى يا رانيا انتي اللي انشغلتي بالجيتار بتاعك ومعنتيش بتدخلي المدونة خالص
    وانا كدة هكسر لك الجيتار بتاعك دة بقى
    منى الشاذلي دي طبعا مشكلتها في اخلاقها العالية
    عاملة لها مأساة مع بعض الضيوف اللبط
    تحياتي واحتراماتي

    ReplyDelete
  36. عمرو غريب:
    ياعم انت ياراسي يا بتاع خير اللام ماقل ودل
    نورتني يا عمور
    تحياتي واحتراماتي
    kimexlilo:
    انت فين من زمان يا عم
    العود احمد لمتابعة مدونتي المتواضعة ويارب دايما
    الف شكر ليك
    تحياتي واحتراماتي

    ReplyDelete
  37. مدونه رائعه وكيف لي لم ادخلها من قبل

    مني الشاذلي
    اعتقد انها من المذيعات اللائل التي تجبر المشاهد علي احترامها والافكار الرائعه المطروحه بهدوء ودون ركوب الموجه

    معتز ومني
    اعتققد انه برنامج فاشل

    عمرو اديب
    غير متابع كثيرا لن الناه مشفره

    البيت بيتك
    لا تعليق
    :(

    احمد شوبير
    متحيز وبشكل اعمي وتحارب كل اعداءه عن طريق برامجه

    المصري اليوم
    الجريده المصريه الوحيده المحترمه

    ReplyDelete
  38. كلام لوجيك:
    الف شكر ليك يا باشا على رأيك في المدونة
    المصريون جريدة جميلة انا بتابعها يوميا ولكن مسألة انها جريدة الكترونية يمكن بتمنع انتشارها بشكل كبير وبتخليها مقصورة على متابعي الانترنت بس
    تحياتي واحتراماتي
    bocycat:
    نورتي المدونة وياريت تكرري الزيارة بأستمرار ان شاء الله
    تحياتي واحتراماتي

    ReplyDelete
  39. اماني:
    سدة النفس دي شيء طبيعي...انا ساعات كتير بقفل من حاجات معينة وابقى مش طايقها
    بس ماتقلقيش الحالة دي بتروح لوحدها
    بس على فكرة معظم ابرامج اللي انا اتكلمت عنها دي الحمد لله مش تحت سيطرة الاعلام المصري ماعدا البيت بيتك طبعا
    تحياتي واحتراماتي
    voice of love:
    الشرف ليا طبعا
    على فكرة انا ببقى في قمة سعادتي لما بتعرف على صيدلي او صيدلانية
    بحس ساعتها ان احنا عزوة
    الاهلي حديد ومبروك الدوري
    هزعل قوي على فكرة لو ماتابعتيش المدونة باستمرار ان شاء الله
    بالنسبة للاغنية
    بتموتني بجد...اغنية اكتر من روعة
    تحياتي واحتراماتي

    ReplyDelete
  40. noony:
    شكرا ليكي على الكومنت
    بما ان الانسان مالوش مصلحة معينة من ترجيح وجهة نظر عن التانية يبقى لازم الحيادية
    تحياتي واحتراماتي
    قاسم افندي:
    انت فين يا عم من زمان
    انا قلت انك نسيتنا
    ياريت ماتغيبش علينا بعد كدة
    تحياتي واحتراماتي

    ReplyDelete
  41. kareem:
    انا اسعد على فكرة
    مدونتك اكتر من روعة وبتثبت فيها انك فنان فعلا بالبوست بتاع ماشربتش من نيلها
    اتمنى تكون صديق للمدونة باستمرار
    تحياتي واحتراماتي
    احمد مختار عاشور:
    نجم المدونات بلا منازع
    انت مطنشنا ليه يا عم...عايزك تتابعني اول باول كدة
    بحب ارائك وبستفيد منها كتير
    انا كنت بتكلم عنالمؤثرات في الرأي العام ايا كان نوعها ولسه غيرهم كتير بس هو الوقت بقى
    تحياتي واحتراماتي

    ReplyDelete
  42. شادي فايد:
    التاج هيكون البوست اللي جاي ان شاء الله
    هقعد امخمخ فيه بمزاج
    والف شكر ليك يا باشا

    ReplyDelete
  43. محمد مفيد:
    زيارتك شرف ليا فعلا
    الف شكر ليك ويارب تكون صديق للمدونة باستمرار
    تحياتي واحتراماتي

    ReplyDelete
  44. تحليل اكتر من رااااااااااااااائع

    بالنسبة لمني الشاذلي
    مش عارفة باحس ان مساحة الحرية مش بس في خط احمر لا ده بيزيد كمان
    يعني مع بداية ظهور البرنامج اعتقد كانت مساحة الحرية اكبر نوعا ما
    في نقطة تانية تعيب البرنامج ده وهي مراسليه ...نفسي ياخدوا كورس لغة عربية يعني يهتموا بصحة النطق ومخارج الحروف اثناء قراءة ال

    معتز ومي
    بجد باتخنق لما باتفرج عالبرنامج ده
    ولو اتفرجت يبقي باتفرج عالضيف اللي جايبينه
    عدم وجود هارموني بينهم ده شئ واضح جدا
    ده حتي في ختام الحلقة تقدروا تقولوا انهم يوميا بيتلخبطواو هما بيقولوا نتقابل بكرة هيه تقول الكلمة دي وهو يقول سلاموا عليكم وبعدين يبصلها ينتظر هيه تختم
    حاجة كده لخبطة باحس انهم مش متفقين

    نيجي بقي لبرنامج البيت مش بيتك
    بجد خسارة نضيع وقت ونكتب كلمتين علي البرنامج ده وبصراحة باعتب عليك انك حطيت البرنامج ده وسط المجموعة... ده مفيش مقارنة اصلا ..كده ظلمت باقي البرامج بالمقارنة دي

    اما القاهرة اليوم
    اعتقد انه افضلهم
    وجود احمد موسي بالنسبة لي بيقلل من مصاقية اي حوار مشترك معاه

    شوبير بقي
    والله كنت باحبه جداايام الاهلي
    ان الانسان يعمل حاجة وبدل ما تزود عشاقه ومحبيه تلاقيها بتقلل من رصيده عند الناس فده متهيالي قمة الغباء الاعلامي
    نفسي حد يوصله ان شعبيته اللي كونها خلال مشواره مع الاهلي حيضيعها باللي بيعمله

    نيجي المصري اليوم
    اتفق مع كلامك طبعا وكلنا بنعتبر المصري اليوم قفزة اضافت كتير للصحافة المصرية

    استنيت انك تتكلم عن الدستور
    واللي اعتقد انها اخدت مساحة كبيرة وسط المطلين علينا يوميا واسبوعيا

    بوست جميل وتحليل رائع
    تحياتي

    ReplyDelete
  45. حدوتة مصرية26 October 2007 at 18:30

    هاى حقيقى المدونة فكرةسهلة للتعبر عت الراى وكمان تفريغ الكبت بس عامة اراك مش مضرة لحد وبداية جيدة ربنا يوفقك استمر استمرياسيمير

    ReplyDelete
  46. 情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

    a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

    情趣用品,情趣用品,情趣,情趣

    情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品
    情趣用品,情趣用品,情趣用品,情趣用品.情趣,情趣,情趣,情趣
    視訊聊天室

    情色,AV女優,UT聊天室,聊天室,A片,視訊聊天室


    UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
    聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人

    ReplyDelete
  47. رؤية واضحة وواقعية نحو حل القضية النوبية في مصر :

    1- العودة إلى أرض الأجداد تحت مظلة الحكومة المصرية وبناء على قرار جمهوري صريح لمن يرغبون في العودة وحصرهم .

    2- الافراد الذين لا يرغبون في العودة الإهتمام بهم والإهتمام بالمطالب الاخرى في المنطقة .

    3- عملية العودة يشرف عليها جميع الجهات المعنية والعلماء المصريين وتكون هناك خطة ورؤية مستقبلية.

    4- بعد العودة يمكن للحكومة النظر في إستقطاب مستثمرين لتنمية المنطقة تحت مظلة الحكومة المصرية والجهات المعنية.
    5- موضوع عدم إندثار اللغة النوبية هذه مسئولية النوبيين أنفسهم لأننا إذا لم نحافظ نحن على لغتنا لا أحد يستطيع المحافظة عليها إذا الآخرون لا يعرفون لغتنا وفاقد الشىء لا يعطيه ؛ وهناك من ينادون بتدريس اللغة النوبية هذه ليست مسئولية الدولة فالنوبيين الذين إستطاعوا المحافظة على ثقافتهم ولغاتهم طوال آلاف السنيين هم المسئولين عن المحافظة المستقبلية ليست الحكومة فاللغة الأولى للنوبين لغة القرآن "العربية" وهذا هو الواقع
    ولغة أول نبي في الوجود وأبو البشر " آدم " " عليه الصلاة والسلام"
    على الرغم من إختلاف الأديان السماوية " اليهودية – المسيحية – والإسلامية " إلا أنهم مجمعون بأن أبو البشر هو "آدم " " عليه أفضل الصلاة والسلام الإنجليزي والعربي والألماني وغيرها إجتمعوا أن أبو البشر هو سيدنا "آدم" إجتمعوا في النطق تماما وإذا عرفنا أصل كلمة آدم فهي عربية وهذا يدل على أن اللغة الأولى للنبي الأول اللغة العربية ولخاتم الأنبياء والمرسلين" سيدنا محمد عليه الصلاة والسلام " اللغة الأولى " العربية " فعلى كل مسلم أن يفتخر بأن لغته الأولى " العربية".

    6- الحمد لله النوبييون غير متعصبيين دينيا نحترم الديانات الأخرى المعترفة بها في مصر والديانة المعترفة بها في مصر هي المسيحية بعد الإسلام .
    فنحن نؤمن كمسلمين بالمسيح عليه الصلاة والسلام وإن كان هناك خلاف عقدي فنحن نطبق مبدأ أساسي في القرآن " لكم دينكم ولي دين " الوطن للجميع ونحن جميعا حاليا مصريون وعلى الحكومة تعميق هذه المبادىء على جميع المواطنين " العدالة الإجتماعية".
    7- إهتمام الحكومة بجميع المواطنين من أسوان حتى سيناء الحرة وعمل مشاريع في كل مناطق الجمهورية ومشاريع " الإسكان" الأولوية لأبناء المحافظة فمثلا محافظات سيناء الإسكان وأي مشاريع تخص السكن الأولى لأبناء المحافظة وجميع المشاريع التنموية في أي محافظة الأولوية لأبناء المحافظة أولا وأخيرا.


    8- رجاء للجميع نوبيين وصعايدة وفلاحين وبدو وغيرهم في مصر الدول المتقدمة ليست لهم ماضى!!؟ ولكن يفتخرون بحاضرهم ومستقبلهم والأولى نحن جميعا لنا ماضى!!!؟ نفتخر به ولكن ليس لنا حاضر!!؟؟ نفتخر به ولا مستقبل!!!؟؟ نفتخر به " يا شباب الهمة العالية حتى نفتخر بالمستقبل كما نفتخر بالماضى فليس الفتى من قال أبى ولكن الفتى من يقول ها انا "

    وكما قال الشاعر المصري محمد مصطفى حمام في " قصيدته الرضا "

    عـلَّـمـتـنـي الحياةُ أن أتلقّى*** كـلَّ ألـوانـهـا رضـاً وقبولا
    * * *
    قال صحبي: نراك تشكو جروحاً***أيـن لـحن الرضا رخيماً جميلا
    قـلـت أما جروح نفسي فقد عوَّ***دْتُـهـا بَـلـسَـمَ الرضا لتزولا
    غيرَ أنَّ السكوتَ عن جرح قومي***لـيـس إلا الـتقاعسَ المرذولا
    لـسـتُ أرضـى لأمـة أنبتتني***خُـلُـقـاً شـائـهاً وقَدْراً ضئيلا
    لـسـتُ أرضى تحاسداً أو شقاقاً***لـسـتُ أرضى تخاذلاً أو خمولا
    أنـا أبـغي لها الكرامة والمجـ***ـدَ وسـيـفـاً على العدا مسلولا
    عـلـمـتني الحياة أني إن عشـ***ـتُ لـنفسي أعِشْ حقيراً هزيلا
    عـلـمـتـنـي الحياةُ أنيَ مهما ***أتـعـلَّـمْ فـلا أزالُ جَهولا


    وأتمنى نحن جميعا ليس كدولة فقط بل كأمة
    نفتخر بحاضرنا ومستقبلنا كما نفتخر بماضينا .


    جمعة مصطفى خليل محمد
    من أبناء النوبة - أسوان

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails