Sunday, 6 May 2007

تاج


التاج دة وصلني من محمد العناني (مدونة جهاد المصري)......والحقيقة التاج دة لف على كل المدونات تقريبا كل ماادخل مدونة الاقي التاج دة واقول يعني محدش ناوي يعبرني ويباصي التاج دة ليا
ماشي يا بني أدمين
عموما محمد العناني الله يكرمه عبرني اخيرا وراح مديني حتة كدة دبل كيك ع الطاير واخيرا اداني الميكروفون علشان اتكلم
الف شكر ليك يابو حميد
نخش بقى ع التاج الجملي دة:
هل كنت طالب شاطر في المدرسة؟
بكل تواضع وبدون غرور اقدر اقولك ..أه انا كنت شاطر
من صغري وانا شاطر واللي حواليا بيقولوا كدة بس بصراحة ماكنتش الفت يعني مكنتش الواد الوهمي اللي بياخد ترتيب ع
المدرسة او المحافظة والحاجات الهلامية دي
انما تقدر تقول اني دايما كنت باطلع الاول او التاني ع الفصل وكنت دايما في فصول المتفوقين مع اني ماكنتش موووس مذاكرة ولا حاجة
كنت بحب انام بدري جدا والاقي العيال صحابي بيقعدوا يذاكروا بالليل لحد الفجر وانا ماليش فب الكلام دة خالص
بس الشوية اللي بقعد فيها ع الكتاب كنت بأنجز الحمد لله علشان كدة كانوا بيفتكروني خبيث وبتلايم عليهم وانا ابعد مااكون عن كدة والله
ايه اكتر مادة حبيتها واكتر مادة كرهتها في المدرسة والجامعة؟
في المدرسة:
كنت بحب الكيميا جدا الحقيقة...وانا سامع ناس دلوقتي بتقول يــــــــــــــع ايه القرف دة
بس هي دي الحقيقة كنت غاوي كيميا ودة اللي خلاني ادخل صيدلة علشان بحب الكيميا
وقبل طبعا ا ادخل علمي ايام اعدادي بقى وكدة كنت بحب التاريخ...مادة مسلية (طبعا من التسلية....مش من السُل)بس ماتمتحنش فيها تذاكرها علشان تتسلى بس
اما اللي كنت باكرهه فهي الأحياء....وكنت مسميها الأموات
ودة لأني مابعرفش ارسم...ضعيف جدا في الرسم وخطي وحش وطبعا الاحياء بتعتمد كليا وجزئيا على الرسم فكان بيروح مني درجات كتير اونطة
في الجامعة
كنت بحب قوي مواد كتير اللي هي ليها علاقة بالواقع..مرتبطة بالحياة العملية زي الفارماكولوجي ومادة السموم وكمان مادة اسمها الكيمياء الطبية والصيدلية
(معلش اساميهم مجعلصة شوية بس هم اسمهم كدة)
وكنت بكره مادة العقاقير دي كُره العمى...لأنها كلها اسامي نباتات طبية معقدة جدا وكلها شغل عطارة مش صيدلة بتتكلم عن الحلبة والكركديه والينسون واساميهم ايه ومكوناتهم الطبية ايه وكلام معقد جدا
وعشان اعقدكم معايا هديكوا مثال لطيف جدا
عارفين لعرقسوس....العرقسوس العادي دة
اسمه العلمي
glycerhizae glabra
بس خلاص
عرفتوا بقى كنت باكرهها ليه
كنت عايز تطلع ايه وانت صغير؟
وانا صغير خالص بتاع ابتدائي كدة كان طموحي بسيط خاااااااااااالص....كنت عايز اطلع
رئيس جمهورية
اه والله وكنت بشوف ان دي حاجة عادية جدا وطموح مشروع يعني...ليه لا؟
انا حر عايز اطلع كدة...حد شريكي؟
بس دة طبعا كان زمااااااااان قوي لحد يفتكر اني طمعان في حاجة لاسمح الله ولا حاجة
بعد كدة لما كبرت بشوية كنت عايز اطلع ضابط علشان بحب البدل الميري بتاعتهم
لما كبرت بقى ودخلت اعدادي وثانوي كنت عايز اطلع صيدلي
وقد كان والحمد لله
اما بقى همرر التاج الجميل دة لمين؟
نظرا لأني شفت التاج دة في معظم المدونات تقريبا فأنا مش عارف امرره لمين بس عندي فكرة وهي ان اي حد يدخل المدونة دي ويقرا التاج دة ومايكونش حد مرره ليه قبل كدة ياريت يعتبرني انا مررت ليه التاج دة
واديني كسبت في ثواب
مش عارف هتودوا جمايلي دي كلها فين

25 comments:

  1. التاج ده ناقص حاجات كتير انت خميت فى الميزان، شغل عطارة بشغل عطارة بأه، تخيل لو الدكتور بتاعك اتهف فى عقله، وأقرالك ان انت بتقول على مدته شغل عطارة، هايستناك والله قدام بيتكم
    والله الريس لو عرف انك عاوز تاخد مكانه انت عارف ده معناه ايه؟
    كلام كبير انت مش قده
    أرق تحياتى ليك يا سمسم ، على فكرة عطارة

    ReplyDelete
  2. رئيس جمهورية مرة واحدة..انت فعلا انسان قنوع جدا هههه...احسن حاجة انك فى الاخر طلعت اللى انت كان نفسك فيه(صيدلى طبعا مش حاجة تانية) دى لوحدهاانتصار فى حياة البنى آدم

    تحياتى

    ReplyDelete
  3. مش عارفين فعلا نودى جمايلك فين ، انا هعتبرك ممررت التاج لى و ان شاء الله أرد عليه قريبا ، انا كمان كنت بحب الكيمياء جداا و استمتعت بها فى ثانوى و كنت بكره البيولوجى و ده اللل منعنى انى افكر فى صيدلة مع انى كنت حابها قوى بس ده كان معناه انى ادخل علمى علوم .. الحمد لله انك طلعت اللى ات عايزه ، ربنا يوفقك

    ReplyDelete
  4. ايه النبوغ ده؟
    كميا وفراقيع
    !!!!!!!!
    حد يحب الكميا؟؟
    طب ومااتعالجتش ليه من الموضوع ده وانت صغير؟؟

    انا بقى كنت بحب كلللللللل المواد
    بس مش مذاكرة
    بجد والله ولحد دلوقتى فيا الداء ده
    احب اعرف كل حاجة عن اى حاجة
    حتى تركيبة وقود الصواريخ النووية :-)
    بس كتسلية
    او يمكن كدراسة بس اكيد مش دراسة فى مدارسنا احنا هنا

    بس المشترك بينا التاريخ
    ان كنت بقرا كتب التاريخ بتاعه ثانوى وانا فى اعدادى :-)
    ههههههههههه
    عموما ياعم النابغة
    تاج عسول وطفولة مشرفة

    تحياتى

    ReplyDelete
  5. كل تاج وانت بخير

    انت طلعت صيدلي زميل

    امممممممم

    بس انا بقى صيدلي فاشل
    :)

    ReplyDelete
  6. حلم بسيط خاااااااااالص
    رئيس جمهوريه
    هههههههههههه
    المشكله انه بسيط ايه القناعه والتواضع فى قبول المناصب الصغيره دى
    على فكره انا بحب الكيميا برده جداااااااااا

    يلا سلامووووووووووز

    ReplyDelete
  7. ايه دة يا احمد
    انا اتصدمت فيك صدمة عمرى
    بتحب الكميا و كمان كنت بتحب المذاكرة
    يا لعار
    اغرب عن وجهى ايهاالظالب المتفوق
    و اةةةةةةةةةة
    ايه رايك يوسف بك وهبى :))
    مكنتش اعرف انك من اياهم يا احمد
    يلا خير
    ربنا يوفقك
    تحياتى

    ReplyDelete
  8. بصراحه
    مش كده يا دكتور
    انت بتنافس على الكرسى
    انا سمعت كده انو لو سافر هيشيل الكرسى فى الدولاب ويقفل عليه
    وبعدين ده بيعض الى يبص للكرسى
    ولا اكمن انك دكتور يعنى
    وبرضو بتكره الاحياء مفيش حده بيحبها
    انتا لما تبقا رائيس لازم تلغيها
    ههههههههههههه
    تحياتى

    ReplyDelete
  9. أنا لو كنت اعرف كنت باصتلك التاج ده بدرى بس ليك عليا اى تاج هيجيلى هباصيهولك على طول :))
    بقى فى حد مبيحبش الأحياء ويحب التاريخ
    طيب اقول ايه بس
    ده التاريخ ماده للناس اللى غاويه تعب
    دى اختيارى فى الثانويه العامه ويفضل عدم اختيارها
    وعايز تطلع رئيس جمهوريه
    انا بقول برده ميولك متجهه نحو الترشيح من فتره :)))
    انت بس اترشح وكلنا وراك :))
    كل تاج وانت طيب
    تحياتى

    ReplyDelete
  10. كل تاج وانت طيب ياصاحبى

    عايز اقولك القناعة كنز لايفنى

    ربنا يوفقك ويكرمك

    تحياتى

    ReplyDelete
  11. ولا انا ياسمير مش عارفه هنوديهم فين
    بس انا كنت زيك بموت في التاريخ في الاعدادي ولما دخلت ثانوي برضه كنت بحب التاريخ موووووووووووووت وبحب امتحن فيه جدا انا كنت بطلع من الاوائل فيه مرات علي الفصل ومرات علي المدرسه اكتر من كده مافيش اساسا انا ماكنتش بذاكر حاجه غيره اصلا يعني وبعدين انت ردودك هاديه وفيها فلسفه برضه شكلك كنت بتحب الفلسفه برضه ياسمير

    ReplyDelete
  12. hapasa:
    فعلا انا كنت بشوفه في مدونات تانية طويل جدا وفي اسئلة متنوعة من نوعية اجمل كتاب قريته وحاجات كدة
    عموما الراجل يشكر انه افتكرني...بس واضح ان ابو حميد فلتر التاج
    تحياتي ليك وبالتوفيق
    nermeen:
    الحمد لله يانرمين...احلى حاجة في الحياة ان الواحد يكون زي ماهو كان عايز يكون
    ولو اننا بنصطدم احيانا بواقع مر بس الحمد لله
    تحياتي ليكي وياريت تداومي باستمرار ع المتابعة

    ReplyDelete
  13. pakinam nasser:
    شكرا ليكي يا بيكنام..تعليقك على اي بوست في اي مدونة دة برضة تاج بس المرة دي على راس المدونة
    انا مستني ردك ع التاج دة ولو انك ياريت كنتي دخلتي صيدلة كانت المهنة كسبت صيدلانية اكيد كانت هتكون عظيمة
    تحياتي ليكي
    البتاع:
    الكيميا.....هو في زي الكيميا
    دة كفاية ان محمود عبد العزيز غنى لها الكيمي كيمي كا
    بس ربنا مايوريكي العقاقير دي بقى...مصيبة
    المدونة نورت يا هانم والله
    تحياتي ليكي

    ReplyDelete
  14. شادي فايد:
    انت بقى ياعم شادي اللي زميل انا الاقدم لو سمحت
    انا دفعة 2001 سناني قربت تقع في المهنة دي
    بس بجد كل صيدلي هو اللي يقدر يصنع من نفسه صيدلي ناجح او فاشل
    هي مهنة ممارسة في المقام الاول والا ماكنش اخوانا بتوع الدبلومات الفنية ماليين علينا الصيدليات ومماشيين لينا شغلنا
    تحياتي ليك
    حسام مراد:
    ايامها والله ياعم حسام كنت شايفه حلم عادي جدا
    بس تقول ايه بقى شقاوة شعب ياريس
    الكيميا دي بقى مزاج عالي جدا..معادلات بقى وكدة
    تحياتي ليك

    ReplyDelete
  15. rania:
    اخيرا رانيا تكرمت وتعطفت وسابت الجيتار من ايدها ودخلت مدونة العبد لله الفقير
    اشاعات والله يارانيا حكاية المذاكرة دي...الغريب والعجيب اني مكنتش استحمل اقعد ساعتين على بعض والله بس هو دة بقى توفيق ربنا
    تحياتي ليكي وابقى شقري ع المدونة من وقت للتاني

    ReplyDelete
  16. محمد العناني:
    حبيب قلبي الف شكر ع التاج دة ياباشا على الرغم من انك اختصرته بس والله تشكر
    بس علشان ماتودناش في داهية يا معلم انا اخري اني اطمع في كرسي الصيدلية
    بس
    انما كراسي من اللي بالي بالك...انســـــــــــى
    تحياتي ليك وربنا يوفقك

    ReplyDelete
  17. reemo:
    عود احمد يا ريمو انتي فين من زمااان
    مانا بقوللك التاريخ اصله مسلي...من التسلية مش من السل انما ساعة الامتحان لما يبقى بكرة...انســــــــي
    وبعدين بفكر اسمع كلامك وارشح نفسي وساعتها هلاقيكوا حاجة من اتنين يا اما في السجن يا اما في مستشفى المجانين وانا في الحالتين هحصلكم
    ونقعد كلنا مع ايمن نور ومرتضى وتبقى لمة
    تحياتي ليكي

    ReplyDelete
  18. tamer nabil:
    الله يخليك يا عم تامر
    وربنا يوفقك على طول
    نورت المدونة ويارب دايما منورة بيك

    ReplyDelete
  19. meroooo:
    بالنسبة لي يا ميرو انا اخر علاقة ليا بالتاريخ كانت اولى ثانوي علشان انا كنت علمي
    وبالنسبة للفلسفة عمري في حياتي مادرستها على الرغم اني اسمع انها جميلة
    الف شكر ليكي دة شرف كبير ليا لما شخصية محترمة زيك تقول كدة على شخصي المتواضع
    تحياتي ليكي

    ReplyDelete
  20. هههههههههههه... فكرتني ليه بالعقاقير ... بس كويس إنك لسه فاكر العرقسوس ... ده أنا نسيت كله ... وكنت عايز تبقي رئيس جمهوريه مره واحده ... طبعا جهه جيمي وضيع كل أحلامك ...ههههههههههههه
    إجاباتك لذيذه وكل تاج وإنت
    طيب

    سلاماااااااااتن

    ReplyDelete
  21. السلام عليكم
    ياخبر هو عدوى التاج وصلك يا خبر ابيض هههه
    بسم الله مشاء الله الناس كلهم شاطريين
    وايه رئيس جمهورية دى لو لسه عندك الحلم ده ممكن نعملك رئيس جمهورية المدونين ههههههههههه
    اصل احنا مش بنحب نحرم حد من حاجة
    تحياتى لحضرتك

    ReplyDelete
  22. reri:
    زميلتي العزيزة
    فين ايام العقاقير والحاجات اللي مش ظريفة دي
    تحياتي ليكي ويارب بالتوفيق دايما وابدا
    اماني:
    التاج وصلني اخيرا بعد مالف على مدونات مصر والدول العربية
    بس انا الحمد لله اتعينت رئيس جمهورية فعلا...بس رئيس جمهورية نفسي
    تحياتي واحتراماتي

    ReplyDelete
  23. بصراحة التاج دة جامد

    ReplyDelete
  24. انا كنت شاطرة فى المدرسة زيك بالضبط من غير مذاكرة كتيرة و كانوا بيفتكرونى بكذب عليهم لما اقول ما ذاكرتش

    حبيت الكيمياء برضه فى ثانوى و كرهتها فى كلية العلوم - داهية تسد نفسها- بسبب طريقة الدكاترة العقيمة

    احمد ربنا انك عرفت تدخل صيدلة ربنا يوفقك، رئاسة ايه بس

    --------------------------
    انا برضه غلبانة و محدش عبرنى بتاجات قبل كدة

    ReplyDelete
  25. عمرو غريب
    الله يخليك يا عمرو
    الف شكر ليك
    تحياتي واحتراماتي
    جيداء:
    كلية العلوم دي فظيعة
    ودكاترتها افظع
    ربنا يعينك بجد
    انما ع التاج
    انتظري تاج مني في القريب العاجل ان شاء الله
    تحياتي واحتراماتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails