Tuesday, 1 May 2007

بيلعبوا بالنار

موضوع تحويل الانسان من ديانته لديانة تانية هو الحديث او الموضة اللي منتشرة في برامج الفضائيات اليومين دول...ماهو طبعا القضايا اللي بتتناقش في الفضائيات دي موضة زي موضة اللبس والشعر كدة بالضبط
حد ينسى موضة اطفال الشوارع وبعدها جت موضة اكياس الدم وبينهم كانت جت موضة القطارات وشوية وبتطلع موضة زي موضة حوادث الطرق.....الخ
المهم ان الموضات دي في بلدنا العزيزة بتيجي بسبب والحمد لله بتنتهي من غير اي سبب خالــــــــــــــــص.
نيجي بقى لموضة الأيام دي والخاص بحكم المحكمة بعدم الزام وزارة الداخلية بتغيير بيانات المسيحيين اللي اسلموا وعايزين يرجعوا مسيحيين تاني..........يعني هم كانوا مسيحيين وبعدين أسلموا فغيروا لهم بياناتهم الشخصية واعتبروهم مسلمين....الناس دي بقى قررت ترجع مسيحية تاني....عايزين بقى يغيروا لهم بياناتهم تاني ويعملوهم مسيحيين تاني
بداية
:
تعالوا نتجرد من انتمائاتنا الدينية (طبعا في الموضوع دة بس)ونبص للموضوع من فوق بنظرة طائر محلق ونبدأ الموضوع دة من الأول:
شخص مسيحي مثلا قرر انه يدخل في دين الإسلام (احنا طبعا هنفترض انه قرر لانه قرأ كتب عن الدين الاسلامي فأقتنع بيه...مش علشان قصة حب ولا اي اهداف اخرى) او شخص مسلم قرأ عن الدين المسيحي او حد اقنعه بيه فقرر انه يرتد عن الاسلام ويدين بالمسيحية (انا هنا برضة بتكلم عن ان الشخص دة اقتنع...مش علشان قصة حب ولا كلام من دة)....هل المسيحي اللي دخل الاسلام دة هيرفع الاسلام وهل المسلم اللي اعتنق المسيحية هيزود المسيحية وهينقص من قدر الاسلام؟!!!!!!!طبعا لا
انما المسألة كلها ادمغة...هو دماغه كدة...تفكيره كدة...انا هنا مابتكلمش عن حكم الاسلام من المرتد لاننا طبعا في مصر لانطبق احكام الشريعة الاسلامية كلها فبالتالي مش معقول هنيجي على دي نطبقها
يبقى احنا في البداية بنتكلم عن واحد قرر انه يغير دينه لأسباب هو شايفها وجيهة واسباب دينية ومالهاش علاقة بالامور الدنيوية خالص
انا بشوف ان من حق اي واحد انه يعمل كدة في اطار من الاحترام وعدم تجريح لاصحاب الديان الاخرى
انما بقى:
وهنا بنييجي لمربط القصيد
:
ابقى راجل مسلم وبحب فتاة مسيحية فأقرر اننا اتنصر علشان اتجوزها او ابقى بنت مسيحية مثلا وبحب جارنا المسلم فأقرر اننا ادخل الاسلام علشان نتجوز وتكتمل قصة الحب ونخش انا وهو التاريخ...ونغير بياناتنا ونغير اسامينا وندمر بالمرة اهالينا ونهرب ونعمل فتنة طائفية والدنيا تتقلب وكل دة علشان العصفورين بيحبوا بعض ونفسهم يعيشوا في تبات ونبات
وفجأة
يختلف الحبييبين لسبب او لأخر وينفصلوا فيتحول الدين اللي انا اتحولت ليه علشان حبيب القلب لدين مش مُقنع واني كنت مُخدر او مُغيب عن الوعي وعايز ارجع لديني لاصلي تاني؟!!!!!!
لا بقى معلش.....سوري...هنا بقى اقف عندك انت وهي...الديانات مش لعبة علشان اتنقل بينها...دي مش شركات بفاضل بينها وعايز اتوظف في واحدة منها فبشوف مين الأحسن؟لا دة ديـــــــــــــــــــن وعقيدة وماينفعش ابدا اني العب بالاوراق لشان اتجوز واحدة ولا علشان انا مسيحي ومش عارق اطلق مراتي يبقى اسلم احسن ولا علشان انا مسلم وجارتنا المسيحية عاجباني ولازم اتجوزها يبقى ارتد واتنصر علشان نتجوز.....هنا بقى دي انا بسميها جرااااااايم
مش كفاية ان الداخلية ماتغيرش البيانات دي لازم الاشخاص دي تتحاكم بتهمة العبث بالديانات السماوية
انا بأويد حكم المحكمة دة لأنه راعى ابعاد كتيرة قوي وانه لا يمكن العبث بالاديان السماوية على الاطلاق
من حقك انك تغير دينك لكن مش من حقك ابدا انك تتعامل مع دينك كما لو كنت بتغير عربيتك او الشقة اللي انت ساكن فيها مش عاجباك يبقى ننقل لشقة تانية ونسيبها بعد فترة وهكذا
الدين دين....بعيدا عن حسابات العاطفة والجواز والطلاق
احترموا دياناتكم....حتى لو مش متدينين بس يكفي انك تكون بتعبر بشكل جيد عن الديانة اللي انت بتنتمي ليها
انما اللعب بالدين هو اللعب بالنار....وطبعا كلنا عارفين مصير اللي بيلعب بالنار

24 comments:

  1. أحييك علي هذا البوست وهذه الموضوعيه في ابدا رأيك

    ReplyDelete
  2. النار هى اللى بتلعب بيهم

    ReplyDelete
  3. كلامك رائع يا احمد
    و طبعا عندك حق فى كل كلمه
    الناس الايام دى بقت خلاص واخدة كل حاجة تهريج و بلا مسؤليه حتى الدين
    ربنا يكفينا الشر
    تحياتى

    ReplyDelete
  4. أنا سعيد جداً بمدونتك دي
    اسلوبك في الكتابة لطيف
    أنا قريت أغلب الموضوعات
    ربنا يوفقك

    خالص تحياتي

    ReplyDelete
  5. وانا برضو اؤيد حكم المحكمة ولكن
    يبقى السؤال الى متى سوف نظل متهاونين فى حق ديننا الحنيف الى متى سوف نظل نخاف لومة لائم لا اعرف
    اللهم انصر دينك يااارب امــين

    ReplyDelete
  6. يا سيدي العزيز , اللي عايز يغير دينه ما يغير هو حر , زي ما انت قلت وزي م انا بؤمن من زمان , لا ده هيعز الدين ولا هينقص منه حاجه..
    يعني هما الحكومة لما تمنع واحد ارتد ورجع عن دينه من تغيير دينه في البطاقة , بتعاقبه يعني ؟ يعني انت بتعاقب المسيحي على انه اسلم وبتجبره انه يفضل مسلم؟
    طيب بلاش دي , انت يعني لو مثلاً أسلمت وهما مرضوش يغيرولك دينك في البطاقة أنت هتكبر دماغك وتقول خلاص بلاش اغير الدين؟
    اللي عايز يغير يغير .. المفروض بس يتحط ضوابط تمنع أنه تغيير الدين يستغل لا أكثر ولا أٌقل..

    تحياتي لك على التدوينة الجميلة ..ورأيك الذي وإن اختلفت معه فأنا يجب أن احترمه ..

    ReplyDelete
  7. اولا انا لا استطيع ان اتجرد من دينى ولو للحظه
    انا اسف
    بس الناس الى بتعمل كدى كتير
    ناس هدفها الفتنه
    انتشار الفتنه هو هدف من اهداف اعداء الاسلام
    لان الفتنه ستوفر عليهم الكثير والكثير
    وهناك توضيح اخر ان المنافقين اول ما ظهرو وبداو با اثاره الفتن كان فى عهد الرسول ولم يستطيعو
    وهكذا الحال
    الاسلام دينى كامل متكامل
    لن تستطيع اقامه فتنه
    ربنا يعزك يا اخى
    ربنا يعزك يا احمد

    ReplyDelete
  8. انت بصراحة قلت كل حاجة

    انا اتفق معاك مليون المية

    تحياتي

    ReplyDelete
  9. انا مش فاهمه وليه منطبقش دينا ونطبق الحد على المرتد
    ملعلش يا سمير بس انا مش قادره اتجرد من دينى وابص للموضوع بموضوعيه وحياديه زيك
    اعتقد ان المرتد على دين الاسلام لازم يقام عليه الحد مش يناقشو يغيرو بيناته ولا لا
    كده هيخلو الناس تفكر الف مره قبل ما تلعب بالاديان
    موضوعك قوى جدا
    تحياتى

    ReplyDelete
  10. masry:
    الف شكر ليك ياباش وياريت نشوفك كتير في المدونة
    تحياتي
    mohamed a. ghaffar:
    اوجزت فأنجزت
    فعلا خير الكلام ماقل ودل
    النار هي اللي بتلعب بيهم
    تحياتي

    ReplyDelete
  11. rania:
    بيلعبوا بالدين يارانيا علشان يتجوزوا او يطلقوا
    حاجة مسخرة بجد
    تحياتي ليكي
    ياسر حسين:
    نورت مدونتي المتواضعة والف شكر ياباشا على رأيك القيم في مدونتي المتواضعة ويارب نشوفك باستمرار
    تحياتي ليك

    ReplyDelete
  12. اماني:
    حرية الاعتقاد والتدين مكفولة للجميع او المفروض انها تكون كدة
    وبالتالي مفيش مانع ان اي حد يتحول للاسلام بس بشرط الجدية مش علشان مصلحة خاصة بيه تنتهي بنهاية المصلحة دي
    تحياتي ليكي
    محمد النقيب:
    احنا مش مختلفين انا رأيي عدم التلاعب بالدين ايا كان واعتقد انك موافقني على كدة
    تحياتي ليك

    ReplyDelete
  13. محمد العناني:
    طبعا التجرد من الدين دة تعبير مجازي الغرض منه هو النظر بحيادية بدون تعصب لرأي معين وليس المقصود منه المعنى الحرفي طبعـــا.
    الناس دي هدفها الاساسي هو تحقيق مصلحة شخصية ليهم
    بس كدة
    تحياتي القلبية وامنياتي بالتوفيق
    شادي فايد:
    شكرا ليك يا شادي
    تحياتي ليك ياريس

    ReplyDelete
  14. remooo:
    طب مش لما نطبق الاول ياريمو حد السرقة وحد لزنا وحد القتل على الاقل المجتمع ينضف من الجرايم اللي مالياه دي
    ارجع واقول ان التجرد من الدين دي كلمة مجازية بحتة مش المقصود منها معناها الحرفي على الاطلاق
    تحياتي ليكي يا ريمو

    ReplyDelete
  15. أنا الآن أصفق بكلتا يدي تحية لك ولوجهة نظرك، وموافق عليها كلية وإجمالا، لما تتمتع به من موضوعية وحيادية فى التناول
    أنا بعد اذنك هاطول، لأن فيه قضية مشابهة لاثنين من المسيحين دخلوا فى الإسلام ظاهريا علشان كاتبين على نفسهم شيكات، وراحوا لرجل مسلم وقالولو احنا هانبقى مسلمين بس محتاجين فلوس علشان مكتوب علينا شيكات، فقال لهم، أنا هدايكم الفلوس بس اوعو هاتكونو هاتسلمو علشان كده وبس، لو علشان الفلوس انا برده هاديكم الفلوس الى انتو عاوزينها بس لازم يكون على اقتناع، هما خافوا يقولو الحقيقة لحسن الراجل يرجع فى كلامه ويرفض، فأخدوا الفلوس وسددوا شيكاتهم ورجعوا تانى للمسيحية ، بس عاوزين يغيروا بيانات البطاقة
    ذنب الإسلام ايه، ذنب المسلمين ايه
    اخطر حاجة واعز حاجة عن المسلم هي العقيدة واخطر حاجة التلاعب بالعقيدة، علشان كده الإسلام شرع حد الردة، لأان فيه أساس لا إكراه فى الدين، اقرأ وناقش وجادل زي ما انت عاوز لكن طالما دخلت بين المسلمين لا تفسد على المسلمين عقيدتهم علشان مشكلة عندك انت، لما كده هنلاقى التلاعب فى العقية كثير ناس تدخل وتخرج، مافيش لا رابط ولا حاكم، ده الخروج على الحاكم يقابل بالاعدام وخيانة الوطن يقابل بالشنق، مابالنا بخيانة الدين وافساد عقائد الموحدين والمؤمنين
    آسف على الإطالة فى اول تعليق، لكن بجد عاوز أحييك بكل شدة حباصة المنذر

    ReplyDelete
  16. اخى الفاضل
    انا اول مره ادخل على مدونتك هذه
    واد ايه انا احترمتك اوى
    الله الله الله
    فعلا لا اسلامنا و لا مسحيتهم هينقصوا و لا هيزيدوا
    انا بجد بحترم اللى دماغه و تفكيره زيك كده
    انا متفق معاك فى كل كلمه الا فى المقدمه
    اخى اعلامنا زى اى اعلام بياخد المواضيع السخنه و المواضيع اللى بتجيب ناس مش معقول هيتكلموا عن موضوع انهى و فات و مات
    الناس نفسها مش هتشوفه
    لو الناس هتشوفه كان الاعلام جابه كده يكون الغلط من الشعب
    مش الاعلام
    شوف مثلا موضوع العباره اد ايه كان قالب الدنيا تعالى الان لو قناه بتتكلم فى الموضوع ده محدش بيتابع و الاعلام عاوز الناس على شان الاعلانات و انت فاهم
    و شكرا اوى لك اخى الفاضل

    ReplyDelete
  17. استاذ سمير
    مع اعجابي الشديد بالبوست وباسلوبك بس فية حاجة
    الكلام دا بيحصل من زماااااااااااان
    وبقت عادى مش لازم تستغرب
    واحد يخرج من الدين دا يروح يجرب دين تانى سواء للتجربة او لمصالح شخصية بقت عادى
    طالاما المجتمع بقا يعتبر ان الحاجات اللى بتحصل كتير بقت شيئ عادى يبقي كلة عادى في عادى

    ReplyDelete
  18. السلام عليكم ورحمة الله وبركاته

    الناس اللي زي دول مش هتقوف الا لما يصحوا فيوم يلاقوا نفسهم في جهنم وبئس المصير

    تحياتي

    ReplyDelete
  19. hapasa:
    شرفت مدونتي المتواضعة وياريت تكون صديق دائم للمدونة وليا انا كمان
    شكرا ليك
    تحياتي
    maro:
    بس يا مارو الموضوع هوجته بتخلص من غير مايوصلوا لاي حلول وبالتالي بيتكرر تاني بعد شهر او سنة او 10 سنين بظروفها
    تحياتي...ونورت المدونة
    ويارب ماتكونش اخر مرة

    ReplyDelete
  20. the big loser:
    بس الظاهرة دي زادت شوية او يمكن الاعلام هو اللي ركز عليها في الفترة الاخيرة
    بس حاجة غريبة جدا اللي يقوللك حرية اعتقاد.....تغير دينك مرتين وتقول حرية اعتقاد؟
    تحياتي ليك

    ReplyDelete
  21. موضوع كويس جدا
    شكرا لحضرتك على طرحه

    انا بردوا متفقة مع رأيك وهو ان الديانات مش لعبة عشان يقعدوا يلعبوا بيها

    واللى بيغير دينه عشان سبب دنيوى او مطمع شخصى اكيد هيرجع يتنازل عن دينه بزوال هذا المطمع او الهدف الشخصى

    ReplyDelete
  22. خمسة فضفضة:
    الف شكر ليكي على مشاركتك
    تحياتي ليكي
    barbie girl:
    احنا في زمن ممكن فيه التلاعب بأي حاجة
    ومن وجهة نظرهم هي هتيجي ع الدين يعني؟
    تحياتي ليكي

    ReplyDelete
  23. بجد موضوع هايل وكلامك فعلا واقعى وأنت قلت فعلا كل حاجة
    تحياتى على الموضوع الهايل ده

    ReplyDelete
  24. bos bos:
    الف شكر ليكي
    رأيك في مدونتي المتواضعة دي شرف ليا
    ياريت تشاركينا الرأي بأستمرار

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails