Monday, 30 April 2007

طموح ولا طمع؟

why all of us want the maximum?
ليه كلنا كلنا عايزين اقصى استفادة؟
ليه كلنا عايزين الآخر؟
على فكرة دة مش نقد لحد بس دي حاجة انا لاحظتها فينا كلنا....بلاش كلنا ممكن نقول في معظمنا
ليه كل حاجة لازم نجيب اخرها او بالبلدي نحلبها...مابنتعاملش مع الدنيا والاشياء بمنطلق دة بيكفيني..او انا محتاج كدة بس او دة كدة كفاية عليا..او منطلق انا راضي ومبسوط كدة ومش محتاج اكتر.
ودي على فكرة مالهاش دعوة بالطموح يعني مش معنى ان انا مكتفي بحاجة معينة ومبسوط بيها ان انا بلا طموح..ابدا بالعكس انا ممكن طموحي ينعكس في الللي ملكي اني اكبره وانميه بدل مااسيبه وابص لحاجة مش في ايدي بس انا شايفها افضل من اللي معايا
تعالوا نروح للمجتمع ونتأمل
واحد عنده محل مطعم في حتة شعبية ومعروف جدا ومش ملاحق ع الشغل والزحمة اللي عليه....واحد زي دة لو تسأله انت نفسك في ايه؟
تلاقيه نفسه يفتح في المهندسين ولا الزمالك وبدل مابياكل عنده العمال والموظفين تلاقي نفسه يتعامل مع الوزراء والفنانين ورجال الاعمال
على الرغم ان دخله كويس جدا ومش نفسه في اي حاجة الا لما بتتحقق وامتلك البيت والعربية ودخل اولاده تعليم خاص وراقي
طيب ليه انت مش راضي عن وضعك؟ايه اللي هيحققه ليك البهوات والبشوات اكتر من اللي حققه ليك العمال والغلابة؟

**************************************************

مطرب مشهور الناس بيستنوا شرايطه تنزل...حفلاته بتحقق نجاحات خرافية...البنات بيغمى عليهم لما يشوفوه...اظن مفيش نجاح اكتر من كدة..ربنا مديك من وسع
فجأة طلبت معاه انه يمثل.....ليـــــــــــــــــــــــــــــــــــــــــــــــــــــــــــــــــه؟
ايه اللي هيضيفوا التمثيل ليك؟ليه مصمم تخش مجال مش بتاعك؟مجال مش انت السوبرستار فيه؟طموح؟مش ممكن...طيب ماتركز طموحك في الغناء اللي انت فيه نجم واستاذ
لانه

عايز الاستفادة القصوى...بيدور على الماكسيمم
******************************************************

ملحن معروف وبيلحن لاكبر مطربين في البلد وراجل باشا في مجاله اللي هو مجال التلحين....قرر انه يغني
طب ليــــــــــــــــــــــــــــــــــــــــــــــــــــــــــــــــــــــــــــــــه؟
ايه الفكرة انك تبقى مطرب على الرغم من انك ملحن كبير والمطربين هم اللي بيجولك لحد عندك والحانك ليها رونقها وجمالها وليك لمساتك
ليه تدخل سكة مش بتاعتك؟
هيقول برضة طموح....والله العظيم الطموح دة مظلوم في الحكاية دي ...دة مش طموح دة طمع وسبحان الله الكلمتين فعلا قريبين من بعض
ومذيعة عايزة تبقى ممثلة...وممثلة عايزة تغني....ومطربة عايزة ترقص....وراقصة نفسها تمثل....ومنولوجست عايز يغني....والدنيا بقت بزرميـــــــــــــــــــــــــــــط
طب واشمعنى احنا....احنا كمان عايزين نعمل زيهم
انا صيدلي هبقى محامي....والمحامي عايز يبقى تمرجي...والتمرجي نفسه يكون ضابط......الخ
هو المجتمع بايظ كدة ليه؟هو محدش عاجبه حاله ليه كدة؟
هو الناس عايزة ايه بالضبط

15 comments:

  1. بص اكيد فيه فرق بين الطموح والطمع
    يعنى انا شايفه الراجل بتاع المطعم رغبته مشروعه طالما عايز يتوسع فى مجاله وانه يعمل لنفسه فروع
    لكن فكره انه يتعامل مع طبقه معينه يبقي الراجل ده عنده احساس ما بالدونيه

    الطمع معناه انى اخد حاجات فوق طاقتى او تخص غيرى لمجرد انى عايزها
    طيب لو طاقتى تدى حاجات اكتر ليه اوقف نفسي عن نجاح
    لو كلنا اتبعنا المنطق ده يبقي هنقف عند نقط فى حياتنا مش هنتطور عنها
    مع الالتزام بالمجال اللى نقدر ننجح فيه
    تحياتى على الموضوع الجميل

    ReplyDelete
  2. بالنسبة للحالات اللى ذكرتها لا طمع ولا طموح

    فقط استفاده من اوضاع سائده لتحقيق اكبر مكاسب ممكنه لأنه سواء بدافع شخصى او بإيعاز من بطانته لأنه لم يعد اى شئ يحكم اى شئ

    ReplyDelete
  3. جميل اوى يا سمير
    و احب اضيفلك عليهم مصطفى كامل
    فى فيلم اشطة يابا
    قال حاجة كدة زى الدكتور عايز يبقى ظابط و المهندس عايز يبقى سباك
    ............
    طب ياخى ما تقول لنفسك يا مصطفى يا كامل

    ReplyDelete
  4. ازيك يا احمد
    انا مع محمد عبد الغفار
    و لا طمع و لا طموح
    كل الامثله الى انت جبتها و خصوصا المغنين دول
    عارفين و متاكدين ان المجال دة
    مفهوش يا اما ارحمينى يعنى هيجى وقت يقعدوا فى البيت و محدش هيعبرهم عايزين يستفيدوا على قد ما يقدروا
    نفس الموضوع بالنسبة للعيبة الكورة
    الناس كلها بقت نفسها تغرف فلوس و بس و يقولك دة طموح ,,,
    دة فعلا و لا طموح و لا بتاع دى استفادة من الوضع الحالى و بس
    تحياتى يا احمد

    ReplyDelete
  5. لو هنقول علي البدايه الانسانه عمتا بطبعه طماع يعني ومذكوره في كل الاديان
    نتكلم عن الراجل بتاع المطعم دا بقي طمع وعايز يبقي حاجه تانيه ممكن تسميه طموح علي طمع مع ان انا اعرف ناس كانت في مناطق شعيبه وراحوا المناطق الراقيه دي خسروا كل حاجه
    نيجي علي العم تامر المفروض انه يمثل لانه مغني يعني عنك عبد الحليم لسه خالد بلافلام بتاعته لحد دلوقتي يعني في اغاني ممكن مش نعرفها عنه ممكن نعرف افلامه ده يبقي طموح وتطور كمان في مجاله لان الفن مافيش فيه تشخيص
    نيجي عمرو مصطفي عمرو مصطفي ده بجد طماع وعلشان يثبت لناس معينه في حياته انه يقدر وانه صوته حلو عمل شريط بس طمع
    بس انا عن نفسي مقتنعه اقتناع تام ان الانسان مهما ربنا اداله مش بيشبع ابدا حتي يوم القيامه اللي هيدخل الجنه هنكون طماعين فا الموضوع ده شي واقعي فينا بس المهم اننا مش نبص للي في ايد غيرنا لانه كده يبقي حقد وغيره وحاجات تانيه اعوذ بالله منها
    واسف علي الاطاله وياريتك تكتبلي السايت بتاع السالمه ده

    ReplyDelete
  6. الطموح غير الطمع... أن يكون الإنسان لديه طموح ده شئ جميل ... ومستحب... أما الطمع موجود في النفس البشريه حتي لو إنسان ليس لديه أي طموح ممكن تلاقيه طماع جدا... الطمع موجود عند كل البشر بس بدرجات متفاوته... ما ذكرته في بوستك ... هي أمثله لطمع النفس البشريه التي تحاول الإستفاده والإستغلال من كل شئ وأي شئ

    سلامااااااااااااااااات

    ReplyDelete
  7. المشكلة اننا مش عارفين عايزين ايه بالظبط

    ReplyDelete
  8. اسف
    انا بختلف معاك في الرأى لو مش هو دا الطموح ودا اسمة طمع يبقي تقدر تقولى اية هو الطموح
    الطموح ممكن يكون مثلا انك تبقي عاوز تتألق في مجال عملك او في دراستك او توصل لشهرة عالية او بتحلم بوظيفة احسن او بتطمح بمستقبل باهر
    اعتقد انو هو دا الطموح
    والطمع ممكن يكون انك تبقي عاوز كل اللى فات دا في وقت واحد او ماترضاش بالى وصلتلة وتبقي عاوز تانى وانت اصلا مش محتاج

    انا بختلف معاك في حاجة واحدة هو انك صنفت اى حد بيغني يخش مجال التمثيل يبقي طماع ومش مكفية اللى وصلة
    انا معاك ان فية ناس كتير مالهاش في التمثيل ومثلت ومنهم اللى انت اتكلمت عنهم بس فية حاجة مش اى حد بيغني يدخل مجال التمثيل يبقي طماع ممكن تكون فعلا عنده الموهبة وبكدا يبقي طموح ومش طماع لانة لو عنده الموهبة هيتالق في التمثيل زى الغنا
    اللى انا اقصدة انك ماتعممش اى مغني لو مثل يبقي طماع بالعكس ساعات بتبقي طموح
    واكبر مثال عندك عبد الحليم كان المفروض انة مغنى ودخل مجال التمثيل وحقق نجاح باهر لانة كانت عنده الموهبة
    موضوع جميل
    ومدونة اجمل
    تحياتى
    وربنا يسهل وازروك دايما

    ReplyDelete
  9. :عالمي ازرق
    كلامك سليم تماما بس الاغلبية طماعة
    تلاقي ان ملحن بيغير من شهرة المطربين وقرر انه يبقى مطرب رغم ان صوته مش مساعده خالص
    وبعدين ماتخلي طموحك في مجالك او في تطوير اللي في ايدك
    عموما هي قضية كبيرة
    تحياتي ليكي
    محمد عبد الغفار:
    بالضبط وعلى رأي عادل امام منفصم الشخصية لما قال:
    احنا في زمن المسخ
    تحياتي ليك

    ReplyDelete
  10. احمد مختار عاشور:
    ياباشا دة بعض ماعندكم هييجي ايه البوست دة جنب مدونتك الرائعة اللهم لا حسد انا مابقرش
    مصطفى كامل دة بقى حالة ممكن ندرسها في الجامعات كنموذج للبني ادم الي بيعاني من الضياع
    تحياتي ليك
    rania:
    هل هلالك انتي فين من زمان
    بالنسبة للسادة المطربين ولعيبة الكورة والذي منه فدول الجمهور هو اللي بيصنع منهم الحاجات دي
    بيتنفخوا لدرجة انهم بيصدقوا نفسهم ان ليهم قدرات خارقة
    تحياتي ليكي

    ReplyDelete
  11. meroooo:
    بصي يا ستي
    تامر دة بقى لوحد قاله انه بيلعب كورة كويس ممكن تلاقيه بكرة منضم لنادي الاهلي او الزمالك
    الناس دي بقت مجانين شهرة عايزين يثبتوا انهم سبع صنايع بس البخت مش ضايع
    عمرو مصطفى دة بقى بيجيبلي نقطة كل مااسمعه
    صوته مافيهوش اي لمحات جمالية على الاطلاق والمصيبة انك تلاقي في نجوم اف ام مثلا بنات باعتة بتقوول انهم بيموتوا في عمرو مصطفى دة!!!!!طب ازاااااي؟
    سبحان الله .....ارزاق
    بالنسبة لموقع السالمية فهو:
    www.salmiya.net
    تحياتي ليكي
    reri:
    اللي يغيظ بقى ياريري ان في حواليهم ناس بتوهمهم انهم ماحصلوش وانهم فلتات
    وبالتالي بيتمادوا ويدخلوا مجالات تانية ربنا يسامحهم بقى ع اللي بيعملوه فيهم وفينا
    تحياتي ليكي وسلامااااات

    ReplyDelete
  12. شادي فايد:
    بموت فيك ياعم شادي انك بتجيب المختصر المفيد
    بتحسسني ان انت بتتكلم في الرسيااااااااان
    هو دة طبع الصيادلة
    تحياتي ليك
    the big loser:
    هي القضية مش عامة بس هم الاغلبية بيدخلوها من مجال الطمع والرغبة في تحقيق اكبر مكاسب
    الف شكر ليك على رأيك في المدونة ودة اكيد بعض مما عندكم
    تحياتي ليك

    ReplyDelete
  13. هنقول ناس معندهاش رضا اصلا ومفيش حد عاجبه حاله خالص وطبعا ده مش طموح هو فعلا طمع وكمان الطموح انه يكون احسن فى مجاله مش يزاحم الناس فى حاجة مش مجاله
    تحياتى لك ولموضاعات القيمة

    ReplyDelete
  14. قشطة جدا

    انا بدرس اقتصاد
    بس حشتغل فى الاقتصاد المنزلى

    واهو كله الاقتصاد

    على الاقل المنزلى ممكن مايتحرقش :-)

    ReplyDelete
  15. صيدلي هبقى محامي....والمحامي عايز يبقى تمرجي...والتمرجي نفسه يكون ضابط......الخ
    هو المجتمع بايظ كدة ليه؟هو محدش عاجبه حاله ليه كدة؟
    هو الناس عايزة ايه بالضبط

    والله فعلا ده مش طموح
    ده طمع وكل واحد بيبص اللي في ايد غيره
    كل واحد عاوز يبقي احسن من غيره
    محدش راضي باللي هوا فيه
    ومفيش مانع يدوس علي غيره في طريقه كمان
    وكل ده باسم الطموح :d
    تحياتي لي علي الموضوع وعلي اسلوبك :d

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails