Thursday, 26 April 2007

صعب دة.....؟



كل واحد في الدنيا دي بيشوف في نفسه ملك
كل واحد بيحس ان لو كل الناس زيه كدة كانت الحياة بقت فعلا جميلة
انا واحد من الناس دول....واحد بيشوفوا انهم مثاليين بس للامانة انا بشوف في نفسي عيوب بس بحس انها عيوب محتملة....يعني عيوب يمكن التغاضي عنها...انما في المجمل بحس ان انا بني ادم كويس...مش مؤذي...مفيش عندي خصلة بشعة ممكن تنفر الناس مني
بحس ان انا مش كداب..ومعنى مش كداب يعني مش محترف كذب مش بستلذ بالكذب...اكيد بكذب احيانا بس برضة مش هواية عندي
بحس كمان ان انا مش بخيل...بصرف كويس على نفسي...لما بقعد مع حد ممكن اعزمهم
كمان انا مش فشار...مش غاوي اتكلم عن حاجات محصلتش او ابالغ قدام الناس في امكانياتي وقدراتي
مش لاقي مشكلة او خصلة بتؤذي الناس اللي بتعامل معاهم او تضرهم
ممكن اكون عصبي شوية بس برضة ارجع واقول انها عصبية مش مفرطة....عصبية مش عنيفة...ممكن تكون عصبية شديدة بس لحظية وبتخلص في 5 دقايق
مش عارف انا لما بقول كدة بكون انسان طبيعي...ولا دي حالة تضخم في الذات؟!!!! بس اللي انا عارفه كويس قوي علشان محدش يفهمني غلط اني مش ملاك بجناحين ماشي ع الارض اكيد ليا اخطائي بس ارجع واقول ان انا اقصد اني معنديش اخطاء بشعة
طيب ايه المشكلة؟!!!
المشكلة في الناس اللي انا بتعامل معاهم.....المشكلة اني بتعامل بشكل مثالي مع الناس بس للأسف المعاملة في اغلب الاحيان مابتكونش بالمثل
بمعنى:
بحب جدا الالتزام بالمواعيد واحب اروح الميعاد في ميعاده انما طبعا اغلب الناس مش كدة ودة بيضايقني فعلا لان بحس ان دة عدم تقدير على الرغم ان في احيان كتير مابيكونش عدم تقدير ولا حاجة انما هي طبيعة شخصيات.
مابحبش حد يخدعني ابدا واحب الناس يعاملوني زي مابعاملهم يعني اللي اخليه مستودع اسراري احب رضة انه يعاملني على هذا الاساس مش معقوا اني اكون بحكي لك اسراري الشخصية وانت بقى الشخص الحويط اللي مابتحبش تحكي اسرارك لحد
في اللحظة دي بحس ان انا حمار على طول
موتي وسمي اللي يستذكى عليا...اللي يستهين بذكائي ويعتقد انه اذكى مني....ممكن تكون اذكى مني ولكن قمة الغباء انك ماتحترمش قدراتي او قدرات اي حد قدامك
دة حتى لو اللي قدامك دة غبي او قدراته محدودة...قمة الذكاء انك ماتعتمدش على كدة وتحترمه
الخلاصة
اني بحب اعامل الناس اللي حواليا زي الكتاب مابيقول الصديق يحترم الصداقة والقريب يحترم القرابة وكل واحد يلتزم باخلاق وابجديات العلاقة
والله ساعتها الحياة هتكون اجمل واجمل
انما سؤال بصراحة وبدون مجاملة:
انا اللي صح لما بكون عايز الحياة تكون جميلة والناس شريفة في تعاملاتها؟ولا دي مثالية زيادة ومفيش الكلام دة؟
انا عايش في عالم خيالي؟ولا اللي بطلبه دة سهل وممكن يتحقق ان كل واحد يتعامل كويس وبمثالية مع اللي حواليه
هل صعب قوي ان احنا نلتزم بالمواعيد ومانكدبش على بعض ومانخفش من بعض ونتعامل مع بعض كما يجب ان يكون؟
صعب دة؟

19 comments:

  1. دكتور

    ده عادي وطبيعي جداً ، الحاجة الوحيدة بس اللي عندي تعليق فيها هي انك تعامل الناس وانت موارب الباب ، متديش لاي حد مهما كنت بتعزه كل حاجة الا لو مراتك او ولادك واهلك ... لان دول انت بتعامل فيهم ربنا ودول اللي مهما حصل انت كسبان بنيتك في معاملتهم بالخير والحسنى والبر


    لا تفتح الباب على اخره ولا تقفله خالص .. ده رأي شخصي مش نصيحة عشان مبحبش أنصح

    حلو التفكير بصوت عالي

    ReplyDelete
  2. انا مقتنعه ان كل انسان فى الدنيا بيبقى عارف هو كويس ولا ده وتعامله مع الناس يتصنف مثالى او سئ او اسوء
    والاعتراف بكده برده انا مش بعتبره غرور او تضخيم للذات
    وبرده كل انسان عارف عيبه ايه بالظبط وعارف اذا كان انسان يحتمل او لا
    انا عن نفسى زيك بحب الناس تعاملنى زى ما بعاملها
    بس من ناحيه الاحترام والزوق والالتزام
    اما حكايه انه يحكيلى او يستامنى او كده ان مقدرش افرضها على اى حد
    بس اكيد مش هحكى لحد الا لو كان فى ثقه متبادله
    باختصار طباعى مقدرش افرضها على الناس واخليهم يتعاملو زيى
    بس انا ممكن احط قواعد للتعامل بينى وبينهم
    واعتقد ان الحل ده بيريحنى نوعا ما
    سمير بجد كلامك حلو اوى
    تحياتى

    ReplyDelete
  3. الموضوع بالفعل رائع

    ReplyDelete
  4. السلام عليكم ورحمة الله وبركاته

    لا طبعا مش صعب ولا حاجه

    المشكله في الناس انهم نسيوا ما امرنا به رسولنا الكريم صلي الله عليه وسلم
    بان : نعامل الناس بما نحب أن يعاملونا به

    بمعني لو كل واحد حط نفسه مكان التاني اكيد طريقته في التعامل معاه ها تختلف 180 درجه

    جميله فكرة البوست

    تحياتي

    ReplyDelete
  5. بص انت لما تخيل ان الدنيا لسة فيه خير هتعيش مبسوط
    انما لو فكرت ان دنيا كلها شهر فتعب

    طب على اية

    تخيل ان الدنيا زى الفل وخلاص

    ReplyDelete
  6. ليس صعباً يا عزيزي

    دائماً ضع لنفسك هدفاً

    وضع له خططاً لتحقيقه

    وسوف تحققه ان شاء الله

    تحياتي

    ------------------
    صاحب مدونة البوابة

    ReplyDelete
  7. abdelrahman:
    المشكلة يا استاذ عبد الرحمن ان كل ماالواحد يقول انه هيعامل الناس بقدر ما يستحقونه
    يفشل في كدة على اساس ان الطبع بيغلب التطبع وبالتالي بتتعامل بالشكل اللي انت اتعودت عليه
    تحياتي ليك وياريت تنورنا باستمرار
    reemo:
    المشكلة ياريم مش مشكلة انك تحكي لحد اسرارك ولا لا؟المشكلة ان في ناس محترفة انها تعرف منك معلومات عنك بطرق ذكية جدا وقمة الحرفنة بقى انهم يكونوا كتومين تماما
    هم بيعتبروا دة قمة الذكاء على الرغم انه قمة الخبث واللؤم
    الف شكر ليكي
    نورتي المدونة

    ReplyDelete
  8. عمرو غريب:
    الف شكر ليك يا برنس
    نورت مدونتي المتواضعة
    مدونتك كمان اكتر من روعة وفيها موضوعات تهمني جدا
    هكون صديق لمدونتك الجميلة ان شاء الله
    تحياتي ليك
    خمسة فضفضة:
    الف الف شكر...فعلا والله لو كلنا نزعنا من قلوبنا الحقد والخوف من بعض هتكون الحياة اجمل واحلى بكتير
    بس واضح ان اللي انا بحلم بيه دة مش موجود الا في المدينة الفاضلة بتاعت افلاطون
    تحياتي ليكي

    ReplyDelete
  9. بني ادم مع وقف التنفيذ:
    فكرة برضة...بس هي مش مسألة خير او شر...مسألة ان كل واحد فاكر نفسه هو الصح وكل واحد عنده المبرر لمعاملة الناس بالطريقة اللي هو شايفها صح على الرغم من خطئها
    تحياتي
    صاحب البوابة:
    اكيد انت كلامك سليم
    بس كل واحد بيتأثر بالناس اللي حواليه محدش يعرف يعزل نفسه عن العالم المحيط
    تحياتي ليك

    ReplyDelete
  10. بس المفروض ان جزء كبير من رأينا بأنفسنا يتعمد على الاخرين - بضوابط طبعا - بيشوفونا ازاى
    لاننا بنشوف الصوره من الداخل بس

    بس حلم اننا نعيش كلنا فى المدينه المثاليه .. حلم قديم قدم تواجد الانسان على الارض
    وكمان لو بقينا مثاليين مش هتبقي دنيا انا بعتقد بوجود الحياه دى فى الجنه بس
    اما مثاليه الدنيا فهى هدف موجود علشان نسعى اليه
    لان الحياه لن تفقد متناقضاتها كالابيض والاسود والخير والشر
    وزى ما نفسنا نتعامل مع الناس وهى كلها كويسه لازم نتعلم نتعامل مع الناس وهى وحشه ومش بنفس مبادئها علشان منبقاش جزء من شيء احنا رافضينه وفرض نفسه علينا لانه الاقوى
    تقبل تحياتى

    ReplyDelete
  11. موضوع جميل...ولو انا فيا كذا عيب من اللى انت قلتهم هما :
    1-المواعيد...بجد مواعيدى بايظةةةةةة وده فعلا بيعرضنى لمشاكل ..على طول ماشية مستعجلة...بس صدقنى ده مش بيكون عدم احترام منى للقدامى...المكشلة ان على طول شايفة ان لسه بدرى وفى الاخر بلاقى ان الوقت مش بدرى ولا حاجة

    2-انى بخبى وكاتومة...مش عارفة ابطل الخصلة دى...لازم احتفظ بالحاجة بينى و بين نفسى فترة وبعدين اروح احكيها ...الحركة دى زعلت منى صحبتى جدا..خصوصا انى كنت بخبى عليها حاجات جوهرية واروح احكهلها بعديها بفترة.

    بس الحمد لله الحاجات العدلة اللى فيا انى مش بحب اكذب خالصصصص...بجد الحمد لله والله بكون حريصة انى ماكدبش وفعلا اكتر حاجة تحرق دمى لما اللى قدامى يكدب و يستغفلنى و ينصب عليا سواء عشان فلوس او مصلحة(وانا الحمد لله اتهريت نصب فى فلوس ومصالح لما خلاص جالى عقدة من الناس ومابقتش بدى امان حد)...بوست جميل
    تحياتى

    ReplyDelete
  12. اعتقد ان سنة الحياة ان يبقى فيها الكويس و الوحس

    :)

    ReplyDelete
  13. كلامك هو الصح.. بس أنظر حولك ستجد أن الصح أصبح هو النادر... لدرجه تخليك تعتقد إنه غلط... خليك علي مبدأك... لأنك الصح... وما تنشده هو الصح

    تحياتي ليك

    ReplyDelete
  14. أعتقد انه من الخطأ التسليم بعكس ما أتفق عليه مبادئ
    أنا أيضا أقدس مواعيدي ولكن في أول مرة فقط
    بوست جميل
    تحياتي

    ReplyDelete
  15. هو مش صعب ياسمير بس الصعب تعملي في تفكيرنا اقولك ليه
    لاننا كلنا زيك كده بنقول احنا بنعمل بس مش اوي بكدب بس مش اوي بعامل الناس كده وبعمل كده كلنا بنشوف اللي لينا ماحدش بيشوف اللي عليه
    يعني انا عجبتني اوي في تصرحاتك ان لما تحكي لصديقك كل اسرارك ويجي عليك انت بالذات ويعمل حويط الموضوع ده بيستفزني جدا بس ده اعتقده وحريه الشخصيه يمكن يكون هو بالنسبالك حاجه كبيره وانسان بيثق فيك وبتبادوال الموضوع ده بس مش شرط انه هو كمان يحكيلك مع ان ده المفروض بس مش شرط ده اللي بقنع بيه نفسي بس الحل فينا احنا قبل مانتهم حد نتهم نفسنا نفس الاتهام ياتري هقبله ولالأ؟ لو عملنا كده اكيد التغير هيكون
    والله عليك ياابو سمره
    ملحوظه: انا معجبه جداااا بالاغاني اللي بتجيبها بجد هتجنن ونفسي اعرف بتجبهم منين وياريتك تقولي وتكسب في ثواب

    ReplyDelete
  16. عالمي ازرق
    اي نعم رأي الناس فينا مهم جدا...بس برضة ياعزيزي كل واحد عارف نفسه كويس قوي وعارف الخصال الكويسة والسيئة في نفسه واكيد كل واحد عارف مميزاته وعيوبه
    تحياتي ليك
    nermeen:
    بس اللي قدامك يا نرمين غالبا بيعتبرها عدم احترام منك ليه...الحاجة دي بتضايق قوي على فكرة

    ReplyDelete
  17. شادي فايد:
    فعلا انت اثبت مقولة ان خير الكلام ماقل ودل
    تحياتي ليك ياريس
    reri:
    بس واضح ان الواحد اصبح اقلية ياريري
    الغلط هو السائد
    تحياتي ليكي

    ReplyDelete
  18. قاسم افندي:
    الواحد بقى بيتعب من كتر الالتزام بالمبادىء ياسي الافندي
    انت فين ياريس من زمان ماطلتش علينا
    ماتعوقش عليا بعد كدة
    تحياتي ليك
    meero:
    الف شكر ليكي يا ميرو
    اعجابك بالمدونة والاغاني شرف ليا فعلا
    بالنسبة للاغاني يا ستي باجيبها من موقع اسمه السالمية...ادخلي ودعبسي والعبي جوة الموقع هتلاقي اغاني جميلة
    تحياتي ليكي

    ReplyDelete
  19. طبعا صعب و جدا كمان
    انت بتتكلم فى ايه يا عم احمد
    اصل انا بردة زيك
    و بعشق المواعيد المظبوطة
    انما الطرف التانى يقولك ايه
    اروح متاخر شوية ايه يعنى
    ما تخليه مستنى
    قال يعنى شطارة و فكاكه
    و علشان كدة بقولك صعب
    عارف انا متفقة جدا مع عبد الرحمن
    انك تخلى الباب متوارب
    و عامل الناس على قد معاملتهم و لو عاملوك وحش عاملهم انت حلو بس بحدود
    تحياتى
    بوست حلو يا احمد

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails