Sunday, 15 April 2007

مصر والكاميرون........علي سلامة


طبعا كلنا عارفين ان جريدة الدستور(للناس اللي غاويين قراية بقى وكدة)بقت بتطلع يوميا...والأربعاء بقى العدد الأسبوعي
مش دة موضوعنا
موضوعي عن شاعر بيكتب في الصفحة الرابعة من الدستور اليومي اسمه (علي سلامة).....الراجل دة ياجماعة بيكتب شعر تحفة
التحفنة اللي في الشعر دة مش لأنه كلام مجعلص ولا حاجة من حاجات العشق والحب والحاجات دي....الراجل دة بيكتب شعر سياسي امتع ما يكون وبأسلوب السهل الممتنع
كلمات من بتاعتنا من اللي انا وانت بنقولها كل يوم...الراجل دة بقى بيطلع من الكلام دة شعر انا شخصية احترت اسميه ايه؟
هل هو شعر مبهج.....أه.......ممكن يكون شعر تراجيدي.....فعلا.....هو شعر سياسي....اكيد....شعر عامي....منتهى العامية
انا عن نفسي مش مهتم بالشعر خالص...وماليش فيه على الاطلاق...انما (علي سلامة)دة لازم اقراله الشعر بتاعه كل يوم في الدستور.
النهاردة كتب حاجة اسمها....مصر والكاميرون
طبعا اسمها غريب جدا قلت لازم اجيبها لكم علشان اللي مابيقراش الدستور يعرف الراجل المبدع دة واسلوبه الغريب:
بقول لهم
مين اللي بيعيط بحرقة دة؟
قالوا لي
مواطن اتصور وهو بينضرب
قلت لهم
ومين الأمور اللي بيضحك دة؟
قالوا لي
دة واحد عمل شوية كوارث وهرب
قلت لهم
والدنيا عتمة هناك كدة ليه؟
قالوا لي
دي حتة جديدة بتتخرب
قلت لهم
ومين الحاوي اللي بيتكلم دة؟
قالوا لي دة الوضع بيتقلب
وايه الهيصة اللي في الساحل الشمالي دي؟
قالوا لي
دي البقرة بتتحلب
قلت لهم وانتوا قلقلين كدة ليه؟
قالوا لي اصل بنلاعب الكاميرون
وخايفين نتغلب
ايه رأيكم......شعر بيقول كلام كتير قوي بكلمات بسيطة قوي

شاعر عظيم فعلا

25 comments:

  1. اول زياره واول تعليق واول تعليق كمان هنا
    تحفه بجد
    بس مش عارف ليه انا عمرى ما خبط فيه مع انى بقراء العدد الاسبوعى كتير بس مش بأنتظام ملحوظه مابقراش اليومى


    قلت لهم وانتوا قلقلين كدة ليه؟
    قالوا لي اصل بنلاعب الكاميرون
    وخايفين نتغلب
    ههههههههههههههههههههههههههههههه
    دى جامده عمرى ماتوقعت ان فى حد ممكن يعمل شعر فى الكوره
    تحياتى ليك وعلى المواضيع اللى نت بتختارها
    حسام مراد
    شغال
    سلام

    ReplyDelete
  2. :))

    انا كنت بطلت اجيب الدستور

    بس شكلي حرجع اجيبها تاني

    اصلي من عاشقي الشعر

    شكراً جزيلا

    :)

    ReplyDelete
  3. هذا الذجل معبر على الحاله الهستيريه التى تعانى منها بلدنا وتخبط فى جميع المجالات ربنا يرحمنا

    ReplyDelete
  4. تعرف الكلام دخل دماغي اشكرك علي اختيارك الجميل دة

    ReplyDelete
  5. انا قرأت اول كلمتين مكملتش

    مين قال ان الدستور بتاعه اللى غاويين قراة

    ReplyDelete
  6. كلام معبر جدا
    ولو انى زهقت من الدستور
    بس اشكرك على زوقك فى الاختيار
    تحياتى ليك

    ReplyDelete
  7. جميل اوووى
    مالهم بقى اللى بيقروا الدستور على الرغم الواحد مش فاضى ممكن الدستور يجى من اول ما ينزل ويفضل اقرأ فيه لغاية العدد التانى على الرغم مش كل الصفحات بأقراها بس اهو الواحد بيحب يعرف الدنيا كلها
    :D

    ReplyDelete
  8. Hello, A. Samir!
    Thanks for you work and have a good weekend

    ReplyDelete
  9. بصراحة يا حبي الدستور دي جريدة تجيب الضغط والسكر والملح كمان..
    ومش عارف لية لسة مصمم أقراها يمكن علشان خلاص الأمراض دي جتلي فعلا ومعدش يفرق

    تحياتي

    ReplyDelete
  10. واضح يا احمد انك مدمن دستور و الواضح اكتر انك ما بتفوتش سطر و لا موضوع فيه ..تصدق حابتدي اقرا الدستور مع اني سعات بتالم من بعض الاخبار المنشورة فيه من كتر ما بحس بالظلم الموجود في بلدنا من ولدها
    بس فعلا الشعر ده مسخره و في معاني جامده كتير ..ز
    تحياتي و في انتظار الجديد

    ReplyDelete
  11. كل واحد بيعبر عن اللى جواة او عن اللى عايز يقولة بالطريقة اللى تناسبة

    بوست مميز

    تحياتى

    ReplyDelete
  12. اكيد كل واحد بيعبر عن نفسو
    بوست حلو
    تحياتى
    وليك تاج عندى

    ReplyDelete
  13. مع انى بممسك العدد الاسبوعى بتاع الدستور ده بنفضه لكن ما شوفتش الشاعر ده قبل كده...ما علينا فعلا شعر بسيط و جميل
    تحياتى

    ReplyDelete
  14. حسام مراد:
    شاعر جامد بجد وشعره هو السهل الممتنع فعلا
    نورت المدونة يا حسام وياريت تكررها كتير
    شادي فايد:
    لو انت من عشاق الشعر يبقى اكيد هتحب الراجل دة جدا
    دة انا عن نفسي ماليش في الشعر خالص وبحب اقراله
    تحياتي ليك
    عمر الشرقاوي:
    الراجل فعلا جاب حالة الشعب بأبسط الكلمات
    الدنيا مقلوبة والبلد عمالة تتنهب والناس خايفة تتغلب من الكاميرون
    فكرة تحفة
    تحياتي ليك يا عمر باشا ونورت مدونتي المتواضعة

    ReplyDelete
  15. كراكيب عادل:
    انت اساسا راجل فنان واكيد الفنان يحب كل انواع الفنون
    تحياتي ليك يا عادل بيه ونورت المدونة
    MOHAMED A.GHAFFAR:
    على الرغم من اني مش عارف اسباب كرهك لجرنال الدستور بس اكيد عندك اسبابك اللي لازم نحترمها
    تحياتي ليك
    IMAN:
    مش عارف ايه موضوع الزهق من الدستور اللي شغال اليومين دول؟
    هنتكلم قريبا ان شاء الله في الموضوع دة....تحياتي ليكي يا ايمان

    ReplyDelete
  16. اماني:
    با سلام عليكي يا اماني....اخيرا حد فتح نفسي وطلع بيقرا الدستور زيي كدة
    الدستور جرنال محترم وانا مش فاهم ايه اسباب الحملة اللي عليها دي؟
    نورتينا يا اماني...شكرا ليكي
    سكتم...بكتم:
    هو ماحدش ينكر ان الدستور فعلا بتجيب الضغط والقهر واليأس والأحباط
    الا ان ساعات الواحد بيحب يعذب نفسه وبالتالي لازم يقراها
    نورت مدونتي المتواضعة
    تحياتي ليك
    LOVE&FEELINGS:
    الف شكر ليكي طبعا على مشاركتك في المدونة
    طبعا الدستور اتحولت عندي لحالة شبه الادمان فعلا
    بس بيشاركها فيها المصري اليوم كمان
    والغريب اني بلاقي الاتنين دول عليهم نقد اليومين دول غير مبرر
    تحياتي ليكي

    ReplyDelete
  17. TAMER NABIL:
    نورت المدونة يا تامر بيه...الف شكر ليك يا ريس
    محمد العناني:
    اكيد هشوف التاج ان شاء الله
    الف شكر ليك يا باشا
    NERMEEN:
    الشعر دة بيكون في العدد اليومي يا نرمين كل يوم الصفحة الرابعة
    وفي العدد الاسبوعي الصفحة الاخيرة...تحياتي ليكي

    ReplyDelete
  18. WE GO TO CONTINUE TO EXCEED THE BARRIER OF THE LANGUAGE, SO THAT BUSH AND OTHER TERRORISTS NOT TO CONTINUE LIE

    لقد أن تنتهي مع باري لغات منها بوش وغيره من الارهابيين لا تزال تكمن

    ReplyDelete
  19. علي فكره انت حد عقري علشان اخدت بالك من الشعر ده

    ReplyDelete
  20. هههههههههههههههههههه
    جامد موووووووووووووت... أنا بقرأ الدستور.. بس ما أخدتش بالي من الشعر ده... بعد كده متبعاه وبإهتمام

    سلااااااااام

    ReplyDelete
  21. بجد حلو اوى يا سمير
    انا مكنتش اعرفه بصراحه
    بس كلامه عجبنى اوى
    بجد انت تستحق الشكر انك جيبت حاجه حلوه كده ونشرتها عندك
    اختيار موفق بجد
    تحياتى ليك

    ReplyDelete
  22. فعلا كلمات بسيطة لكنها معبرة، اشكرك لنقلها لنا

    ReplyDelete
  23. مطرقع علي سلامة دة...بيضحكني جدا

    ReplyDelete
  24. يمكن انت مش بتتبص علي مواضيعك القديمه
    بس حاسه اني ندامه اني مش شوفتهم من زمان بس انا لسه جديده للاسف بس هرد حتي لو مش هتشوف ردي
    بجد الله عليك وعلي ذوقك وطبعا لا غبار عليه يعني كلامه خفيف وبسيط بس يارب مش يقطعوا لسانه قصدي قلمه كالعاده

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails