Thursday, 12 April 2007

ارحمونا من دعايتكم





مش كفاية ان الدنيا كلها ملوثة من حولنا
مش كفاية خالص كمية التراب اللي في الجو واللي خانقة الناس كلها
مش كفاية السحابة السودا اللي بقى ليها موسم كل سنة بتزدهر فيه عيادات اطباء الصدر
مش كفاية خالص الزحام الرهيب والعادم اللي بيطلع من عربيات معظمها غير صالح للاستخدام في القرن 21
مش كفاية المطبات والحفر اللي في الشوارع واللي بتحول اغلى عربية لخردة في خلال سنوات معدودة
مش كفاية ابدا التلوث السمعي والعربيات اللي تقريبا حاطة ميكروفونات في الكاسيت بتاعها
كل دة مش كفاية ابدا...........
السادة مرشحي انتخابات مجلس الشورى قرروا يزيدوا التلوث اللي احنا فيه بكمية رهيــــــــــــــــــــــبة من اليفط القماش والملصقات في كل حتة وكل مكان
الجديد بقى واللي باين في الصور ان بعضهم قرر يستغل اللوحات الارشادية اللي بتدل على القرى والمدن وكمان علامات المرور وصعب عليه انها تفضل كدة من غير استغلال
فقرر انه يحط دعايته الانتخابية عليها علشان تطمس تماما معالمها....مش مهم ان المنظر يكون مشوه ولا مهم ان اليافطة تفقد الهدف من وجودها على اساس انها تم طمس معالمها تماما
انما المهم عنده انه يعلق ورقتين او 3 عليها
عقله المريض صور له ان الناس بقى هتاخد بالها من الكام صورة اللي حاططهم وبالتالي هتشد انتباهم وينتخبوه.....ساااااااذج
والله انا متأكد ان احنا لو في دولة عندها 4/1 قدر احترام لحقوق مواطنيها كان يتم استبعاد المرشح اللي معلق دعايته بالشكل دة فورا
اذا كان وهو بره المجلس وبيعمل كدة.....اومال لو لا قدر الله نجح هيحصل ايه؟
على حد علمي ان في حاجة عندنا اسمها وزارة البيئة.....مش التلوث والمنظر القميء دة بيعتبر تحت نطاق تخصصها وشغلها ولا انا غلطان؟
السادة مرشحي الشورى:
حرام عليكم المشرحة مش ناقصة قتلى....كفاية قوي اليفط والملصقات اللي بتفضل في الشوارع بعد كل انتخابات...العملية مش ناقصة
الغريب بقى ان ولا محافظين ولا مجالس محلية ولا مجالس مدينة ولا اي حاجة واخدة بالها من الحكاية دي
كان الله في عونهم....مشاغلهم كتير قوي

17 comments:

  1. ههههههههههه
    كان الله فى عونهم عندهم مشاغل
    حاجه تكسف
    اى مكان فى العالم بتكون الدعايه فيه بشكل مناسب من غير متغير شكل المكان او تفسد شكلو لكن فى مصر حاجه تكسف
    انا ساكن على ميدان انظر من البلكونه مش شايف حاجه من اليفط
    وفلوس كتير اوى وبعد ما ينجح
    ابقا قابلى لو شوفت وشو تانى
    الله يخرب بيتك يا
    حسبنا الله ونعم الوكيل
    تحياتى

    ReplyDelete
  2. احنا لو قعدنا نعد المساوء مش حنخلص

    تعالو نتكلم عن مشكلة وحلها

    وكل واحد يبدأ بنفسة

    انا بحاول

    ايوة بحاول لعمل كده

    تحياتي

    ReplyDelete
  3. اه والله عندك حق فعلا منتهى السذاجة...والله انا مرة وانا رايحة الكلية كان فى طريقى يفط كبيييييييييرة اوى وكانت كلها تأييد ومبايعة و كده ساعتها...قعدت افكر طب مفيش حد كده يجى فى الخباثة كده ويقطع ويبوظ اليافطات دى ...هيحصل ايه يعنى... بس لما فكرت شوية لاقيت ان ممكن فعلا يحصل كتير ..قلت خلاص ومالها اليافطات خليها

    تحياتى ليك

    ReplyDelete
  4. اله ايه يا احمد
    الناس مشغوله يا اخى بامور الدوله
    مش فاضية للكلام الفارغ دة
    معقوله هتاخد بالها من كل حاجة حسبى الله و نعم الوكيل فيهم و فى اهمالهم
    انا بقى عندى فكرة جهنميه
    احنا نعمل زى العيال الصغيرة
    و كل ما نشوف يفطة نقطعهااو نكتب عليها
    يعنى زى ما تقول كدة حنين للذكريات الطفوله
    احتمال يحرموا
    بس اهى فكرة نطلع بيها غظينا
    بقولك ايه
    كنت عايز اتناقش معاك فى موضوع انى اهد البلكونه بتعتك علشان مش معقول كل ما هنضايق هنطلع بلكونتك
    انا متهيئلى ان الفيو من عندك مختلف
    تحياتى بوست رائع
    :))

    ReplyDelete
  5. تعمل ايه لو لقيت حد ملزق اليفط والشعارات على عربيتك
    انا بقى حصل معايا الموضوع دا ايام الله يحرقه الاستفتاء
    ركنها فى الشارع فى امان الله ...انزل الاقيها كلها ورق تأييد وموافقه وكلمه نعم منوره زجاج العربيه الورانى
    انا فضلت زى المجنونه اشتم وازعق فى الشارع...بس فعلا حاجه تغيظ
    شكرا يا باشا على البوست

    ReplyDelete
  6. ده العادى والمتوقع من شعب لا يعرف قيمة الاشياء ولا ادنى الاحترام لحق الاخر

    ممكن بتوع المدينة يشوفوا شغلهم كويس الا مع الناس اللى هيضر الناس الكبيرة اووووووى
    هنقول ايه
    ربـنا يرحمـنا من عنده

    ReplyDelete
  7. و انا زى الاستاذ جعفر
    بقولك لا مش كفاية

    ReplyDelete
  8. محمد العناني:
    المشكلة ياعزيزي ان في ناس من المرشحين دول عارفين كويس قوي انهم مش هينجحوا زمع ذلك تلاقيهم مغرقين الشوارع والحيطان باليفط والملصقات بتاعتهم
    تقريبا هم فاكرينها شهرة
    شادي فايد:
    اصل مشكلة زي دي بتتطلب ان الناس دي تتربى من الأول للأسف
    nermeen:
    سواء موجودة او اتقطعت هي مشوعة المنظر
    وبعدين المشكلة مش في اليفط...المشكلة الاساسية في الملصقات اللي بتتعلق في اماكن ماينفعش يتعلق فيها اي حاجة...زي لوحات المرور اللي في البوست
    تحياتي ليكي وياريت تشاركي باستمرار في المدونة
    rania:
    المشكلة يا رانيا اننا لو بوظناها او شخبطنا عليها هنبوظ الدنيا اكتر ماهي بايظة
    هنزيد الطين بلة
    بالنسبة للبلكونة بتاعتي..مش عارف هتستوعب مين ولا مين..بقت ايلة للسقوط

    ReplyDelete
  9. محمد عبد الغفار:
    واضح انهم حالفين يعيشونا في خرابة كبيرة
    iman:
    الناس دي ماتستبعديش منها اي حاجة...عندي احساس انه هييجي وقت يلصقوا الدعاية الانتخابية بتاعتهم دي على ضهر الناس وهي ماشية..والشاطر اللي يعترض
    تحياتي ليكي ونورتي المدونة
    اماني:
    مشاغلهم كتيـــــــــر يا ستي.....لازم برضة نعذر الناس
    هيلاقوها منين ولا منين!!!!!!!..
    نورتي المدونة وتحياتي ليكي
    عاشور:
    انت ماشي بمبدأ خير الكلام ما قل ودل
    تحياتي ليك

    ReplyDelete
  10. تصدق بقا انت شكلك دسيس ومعارض للحكومة وشكلك كمان مش عاجباك كمة الفكر الجديد

    يا عم واحنا مالنا احنا عندنا ابهات عاوزانا وعيال لو اتجوزنا وجبناهم هنربيها

    من ساعة ما بقا كل واحد يقول الكلام دا والبلد خربانة وانت جالى تتكلم في اليفط
    وفعلا كما قال الشاعر
    هيا دى مصر يا عبلة
    بوست جميل والله بس انا مش لاقي حاجة اقولها الواحد بقا على اخرة من كتر الفوضة اللى بقينا فيها
    بوست جميل
    وبلوج اجمل

    ReplyDelete
  11. أولا بسجل إعجابي بالمدونه وبالموسيقي الرائعه التي تجبر أي شخص علي البقاء في المدونه أطول فتره ممكنه... ثانيا لي تعليق علي البوست السابق الذي أعجبني وخلاني أسأل نحن حاليا نؤرخ بقبل وبعد الميلاد... هل سيأتي يوم بعد ألف سنه مثلا يؤرخ الناس بقبل ربعد الموبايل... البوست بتاعك أوحي لي بهذا السؤال..قد يكون مضحكا... ولكن ليه لأ؟؟؟
    بخصوص البوست ده فالعشوائيه أصبحت السمه الأساسيه في المحروسه... لا تتعجب فنحن في مصر
    طولت عليك.. معلش

    سلامااااااااات

    ReplyDelete
  12. انا كمان شايفه الناس دى ساذجه جدا
    ايه اللى بيعملوه ده
    هما متخيلين ان كده حد حينتخبهم
    ولا هى الدعايه بتبقى كده
    هما اصلا لو فى حد فيهم فاهم اصول الدعايه السليمه مكنش عمل كده
    مفيش حد اصلا بيبص لليفط دى
    هما كده بجد بيستخفو بعقولنا لو متخيلين ان شويه يفط هى اللى هتخلينا نحدد قرارنا
    بس لو يبصولنا بطريقه على اننا اكبر من كده
    بس هنقول ايه
    موضوع جميل كالعاده يا سمير
    تحياتى

    ReplyDelete
  13. يا احمد انا سمعت و الله خير اللهم اجعله خير ان القرار بتاع وقف المرشح اللى مش هايشيل دعايته ده كان هايتعمل من ييجى كام سنة
    و قالوا انه لو ماشلهاش هايشيلوها و يبعتوله فاتورةو غرامة
    انا بقى شايف انه يتعاقب بوقفه واسقاط عضويته لانه مش منظر بطراحة اللى بيحصل ده بالذات الملصقات هى مش ناقصه تشوه البلد بقت شكلها كرب ووحش قوى بعد ما كانت القاهرة اجمل مدينة فى العالم اعتقد ان حالها لا بقى يسر عدو ولا حبيب
    تحياتى

    ReplyDelete
  14. the big loser:
    الفوضى واضح كدة انها بقت سمة عصر ومنهج
    تحياتي ليك والف شكر على ذوقك
    reri:
    تحياتي ليكي والف شكر على رأيك في مدونتي المتواضعة
    واهلا بيكي في كل وقت
    reemo:
    ازيك يا ريم...فين تعليقاتك من زمان؟
    مستنية ايه من ناس ثقافتهم كدة؟هيشرعوا قوانين ازاي بس؟
    barbi girl:
    بحب انا الناس اللي ماشية في الحياة بمبدأ خير الكلام ما قل ودل
    تحياتي ليكي...نورتي مدونتي المتواضعة
    شخبطة ملوكي:
    وحشتنا تعليقاتك يا طارق من زمان..انت فين يا راجل؟

    ReplyDelete
  15. ممكن تلقي صاحب الصور مايعرفش
    بس بقي الحكايه ان العيال اللي بيلزقوا الصور ياعيني المعلم بتاعهم عليه طلبيه ولازام العيل ده مايرجعش باولا صوره للمرشح ده طب هو هيعمل ايه ينضرب ولا يعلقهم في اي حته
    وربنا معانا

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails