Monday, 9 April 2007

ايام ما قبل الموبايل


يوم مشحون من الشغل...مكالمات تليفونية لا تنقطع...كل 5 دقايق الموبايل يرن واسئلة واستفسارات وجو متوتر والدنيا كلها اجازة الا شركتنا المصونة اللي قررت اننا نشتغل النهاردة
طلبت النهاردة معاهم شغل.....وياريته كان يوم عادي فعلا كان مش طبيعي...شد عصبي وتوترات والموبايل اصبح صوته سخيف ورنته فعلا بقت صداع....شوية ع العصر كدة الدنيا هديت وقعدت بقى استرخي بعد معركة حربية طاحنة وقعدت الهث واكني لسة مخلص ماتش كورة,بضرب بعيني كدة لمحت الموبايل بتاعي...وهنا سرحت واسترجعت ذكرياتي مع الموبايل:
بدايتي مع الموبايل كانت في منتصف 1999وبالتحديد وانا في سنة تانية كلية صيدلة ايام ما كانت فودافون اسمها (كليك) فاكرين الايام دي؟!!! اهو ساعتها خط الموبايل كان ب 1200 جنيه...تخيلوا يا جدعان كان ب 1200 ودلوقتي واحنا في 2007 خط الموبايل ببلاش....ببلاااااااااااااااااااااش.....مش يبقى ليا حق اتقهر
دة دلوقتي ناقص الواحد يشتري شوكولاته كادبوري يلاقي عليها خط موبايل....والناس اللي اشترت الخط ايام ماكان ب 1200 ولا ليهم اي ميزة ولا جايزة ولا تعويض ولا اي حاجة خالص حيث ان القانون بطبيعة الحال لا يحمي المغفلين او نقول في الحالة دي لا يحمي المستعجلين
فاكرين بقى قبل الايام بتاعت الموبايل دي ايام 98 و97 والسنين الظريفة اللي كانت في منتصف التسعينات دي..فاكرين الناس كانت بتتصل ببعضها ازاي؟!!!!
لما تحب تخرج مع حد من صحابك تتصل بيه ساعة العصاري كدة على تليفون البيت وتتفقوا هتروحوا فين النهاردة...لما تحب تكلم حبيبتك او البنت بتاعتك تستنوا لما البيت كله ينام وتقعدوا تكلموا بعض في التليفون بالليل وتحكوا لبعض ع اللي حصل طول اليوم...مانت مكلمتهاش طول اليوم بقى
لما حد يتصل بيك وانت عايز تزحلقه...تخلي اخوك او اختك يرد عليه ويقول له اصله مش موجود..التاني يرد عليه ويقول له لما يرجع خليه يكلمني.
ويا سلام لو انت غاوي غلاسة ومعاكسات في التليفون وطبعا ايامها ماكانش فيه (اظهار رقم الطالب) وكانت معاكسات التليفونات على ودنه
لما مديرك كان يعوزك يكلمك على تليفون البيت وانت ومزاجك بقى لو عايز ترد عليه ولا مش عايز
لما كانت الحياة لذيذة ولما تقرر ماتردش ع التليفون انت حر ماهو تليفون بيت بقى ومحدش هيقولك ماردتش ليه
فاكرين ايام ما قبل الموبايل لما كانت مفيش في الحياه حاجة اسمها (ميسد كول)ولا سمعنا عمرنا على حاجة اسمها(اس ام اس )ولا حد قال قبل كدة قال لك سمعني (الرينج تون)بتاعك... ولا كنا ايامها بنكع 100 او 200 جنيه ويمكن اكتر كل شهر ع الكروت
وتخيلوا كمان...ماكانش في ايامها محلات الاكسسوارات المنتشرة اليومين دول بفظاعة مش طبيعية...دة انا بشوف بين كل محل ومحل في محل
بجد فاكرين الايام دي؟!!!تخيلوا ان انا مش فاكرها...اه والله من كتر ما الموبايل دخل حياتنا وبقى جزء لا يتجزأ منها الواحد نسي ايام ما قبل الموبايل وبقى الزمن بيتأرخ بماقبل الموبايل وما بعد الموبايل
وانا سرحان مع نفسي كدة تخيلت يوم زي النهاردة كدة من غير موبايل....يا خبر ابيض دة كان هيبقى يوم جميل فعلا
بس بجد ورغم ان ساعات كتير بيبقى الواحد عايز يمسك الموبايل دة ويرميه او اضعف الايمان يقفله يوم ولا يومين...تلاقيه هي ساعة زمن واحدة وايده تاكله كدة على زرار الفتح وعايز تعرف مين اللي كلمك والموبايل مقفول...وقال ايه عايز تقفله يومين
دة انت تبقى بطل لو قدرت تستحمل ساعتين
عزيزي الموبايل:
بنحبك ومانقدرش نسغتنى عنك رغم انك في احيان كتير قوي بتكون غلس فعلا....بس واضح كدة ان احنا بنحب غلاستك

23 comments:

  1. انا كمان بحاول افتكر كنت بعمل ايه قبل الموبايل مش بقدر افتكر
    وازاى كنت برتب مواعيدى ودروسى ولو احتجت حد ضرورى
    بجد مش عارفه ازاى الواحد كان بيرتب اموره
    انا عمرى ما فكرت انى اقفل موبايلى لو لحظه انا اصلا مش بقدر استغنى عنه ثوانى
    حاجه اساسيه فى حياتى فعلا
    البوست تحفه بجد يا سمير
    تحياتى ليك

    ReplyDelete
  2. ياااه ده انت رجعتنا فلاش باك جامد اوى.. بس اللى احنا فيه ده والله اعلم الفلاسفه بيسموه الحب / الكاره... مدونتك هايله وشكرا للاضافه
    تحياتى

    ReplyDelete
  3. بجد انتى كلامك صح بنحبك ومش عايزين نستغنى عنك بس انت ساعات كتير اوى بتبا غلس اوى
    يلا مش مهم
    المهم انو بوست حلو
    تحياتى

    ReplyDelete
  4. يا قلبك الجامد
    اشتريت الخط و هو ب 1200 جنيه
    ط انا اشتريته و هو ارخص من كدة
    الموبيل فعلا حاجة اساسيه
    و عندك حق بيكون فى منتهى الرخامه
    و ساعات كتير فعلا بقفله لانى بمل بس برجع افتحة تانى بسرعة قوى
    البوست واقعى و حلو قوى
    بالنسبة للتصويت انا اخترت النقطة التالته
    لانها فعلا متفرقش
    الامر كله سواء بس علشان اليوم دة بيبقى اجازة بتبقى فرصة معقوله انى اندمج مع العيله يوم فى السنه
    تحياتى
    :))

    ReplyDelete
  5. ريمو:
    الف شكر ليكي....واضح فعلا ان الوبايل دة بقى قدر لا مفر منه
    دعاء عبده:
    لا شكر على واجب..مدونتك اكتر من روعة ومكانها الطبيعي لازم يكون في ال
    FAVOURITES
    محمد عناني:
    شكرا لمرورك على مدونتي المتواضعة...كمان مدونتك اكتر من جميلة
    ياريت نكون اصدقاء
    رانيا:
    مانا لو كنت عارف انه في يوم من الايام هيبقى ببلاش مكنتش اشتريته ب 1200 جنيه
    بس تقولي ايه بقى...رزق الهبل ع المجانين

    ReplyDelete
  6. والله يا احمد انا خلاص جبت اخرى من الموبيل
    تخيل ان ايام ما كان معناش موبيل كنا مرتاحيين
    دلوقتى كل 5 دقايق ناس ورنات ومستجات
    وناهيك عن حركات امى وابويا وتليفون كل 5 ثوانى قال يعنى بيطمنوا عليا انا فين وحرجع امتى
    ودلوقتى كمان صباح الغلاسه بالمستج بتاعت
    please call me>>thank you
    طول النهار ناس تنعتها وانت مضطر جزمه قديمه تشوف هما عايزيين ايه وتتصل بيهم
    الموبيل دا صداع حياتنا...بس للاسف منقدرش نستغنى عنه
    هنيئا لسويرس وفودافون
    تقبل تحياتى يا ابو سمره وشكرا على زيارتك مدونتى
    اوعى تقطع الزيارات يا شيخ

    ReplyDelete
  7. أحمد باشا
    أزيك
    معلش والله للأسف مكنش عندي وقت اليومين اللي فاتوا واديك شايف اهو بنفسك نفسي ارمي الموبيل وكل حاجه ورا ضهري واريح شويتين
    بس ايه ده بقي صحيح؟؟ توارد خواطر؟
    وايه ده كله ماشاء الله عليك أغيب اسبوع عنك الاقي مكتبة؟
    :))
    هاقرأ كل اللي فاتني ده ازاي بقي؟ مفيش مخلصات؟
    علي فكرة انا بجد بجد باكره هذا الاختراع السخيف واتمني عودة الايام بدونه وعلي فكرة انا باقفله في الاجازات تماما أو باغير الرقم وعلي فكرة برضه انا اشتريته زيك من ابو 1200
    لا وبالحجز كمان
    :(

    ReplyDelete
  8. بجد البوست حلو اوى وواقعى جدا بس انا اعتقد ان الموبايل بقى شىء اساسى جدا فى حياتنا ومنقدرش نستغنى عنه

    تحياتى

    ReplyDelete
  9. عندك حق ، انا كمان كنت بفكر فى نفس الموضوع ، اعتقد ان الناس اصلا نسيت الايام اللى مكنش فيها موبايل و اعتقد ان اللى حصل مع الموبايل ده هيحصل بالضبط مع ال laptops

    ReplyDelete
  10. ايمان:
    الف شكر ليكي لتلبية دعوتي وزيارة مدونتي المتواضعة
    وطبعا لما تسيبي جمهورية ايمان وتيجي لكفر احمد سمير دة شرف كبير قوي لينا يافندم
    تحياتي ليكي
    قاسم افندي:
    والنبي ياعم ماتفكرنيش بموضوع ال 1200 دة علشان انا كل مافتكره وافتكر انه بقى ببلاش اتقهر
    عموما زي ماقلت لك ماتحرمنيش من متابعتك لمدونتي المتواضعة اللي بتتشرف بيك في اي وقت
    بس برضة الموبايل ياريس بيفك ازمات كتير وليه اهميته رغم غلاسته
    malak:
    الف شكر على متابعتك لمدونتي وفعلا مدونتك كمان اكتر من روعة...ياريت تتابعها باستمرار

    ReplyDelete
  11. pakinam:
    فين تعليقاتك من زمان؟
    فعلا الموبايل نسانا الايام اللي قبله تماما...بس فعلا تخيلي ان الواحد لما بيفتكر ايامه قبل الموبايل بيلاقيها كانت ايام فعلا لذيذة ودمها خفيف ومافيهاش كلكعة
    بس اعتقد ان الاب توب هيبقى صعب الانتشار لانه برضة مش في متناول الجميع حاليا وفي نفس الوقت مش اي حد عنده مهارات التعامل مع الكومبيتر والانترنت

    ReplyDelete
  12. ايام البنانا و ال 688

    ReplyDelete
  13. يااا انت خلتني افتكر اول يوم اشتريت فيه موبيل كان إيريكسون كان كبير كده و حاجة صعب بس كان الواحد حاسيس انه إيه .. يا سيــدي ...بس فعلا لا يمكن الاستغناء عن الموبيل يا احمد للاسف دا ساعات الناس بتشتري خطيين علشان لو نسي واحد يقولك اهو الناس حاتكلمني على التاني
    انا ممكن ارجع من مشوار لو نسيت موبيلي في البيت ...صحيح هو الواحد كان عايش ازاي قبل الموبيل ده .. فعلا بنحبك و مانقدرش نستغنى عنك رغم غلاستك

    بوست تحفه ..خلاني اضحك و انا بفتكر قبل و بعد و اثناء شراء الموبيل و الخط و النمر و الافلام دي كلها

    تحياتي يا احمد و شكرا على تعليقك

    ReplyDelete
  14. انا مش فاكرة بجد الايام قبل الموبايل
    بس انا برضة جبت الخط وقت ماكان ب 1200 جنيه
    وكانت غلطة بجد مش قادرة انساها
    لانه طبعا كان مبلغ كبير جدا
    لكن الموبايل بقى شئ اساسى فى حياتى دلوقتى ورغم انى اكتر الاوقات عملاه سايلنت بس بينفع اكيد فى حاجات كتير
    بس ما اظنش ان حد دلوقتى يقدر يستغنى عنه
    بوست جميل يا سمير
    ميرسى ليك

    ReplyDelete
  15. شوف يابن الناس الموبايل بنسبة ليا يعني النصايب والكوارث.عمر مجاتلي منة مكالمة تفرح القلب.ياأما تدبيسة في الشغل.ياأما واحد بيقولي أنة مش حيقدر يعمل حاجة طلبطها منه.يا أما واحد بيسلم عليا ويبدأكلامة ياندل يابارد مبتتصلش لية.ففي كل الحالات الموبييل شر شر شر لابد منه.مدونتك لطيفة .تحياتي

    ReplyDelete
  16. المشكلة فعلا انا بطلنا نقدر نستغني عن الموبايل
    مع انه احيانا يكون ازعاج
    على كل الموضوع حلو

    ReplyDelete
  17. كانت ايام كانت الناس كلها بتبص عليك معاك حاجة غريبة
    بس فعلا منقدرش نستغنى عنه حتى لو بيزعجنا يبقى مشكلة بالنسبالى و عندنا فى البيت لو فكرت لدقيقة انى اقفله يبقى الدنيا خربت
    :D

    ReplyDelete
  18. kimexlilo:
    انت ياريس بتفتكر موديلات من ايام الهكسوس
    love & feelings:
    للاسف انا احد هؤلاء الناس بتوع الخطين بس والله مش منظرة ولا حاجة بس لظروف الشغل
    وطبعا لا شكر على واجب انت مدونتك جميلة
    re7ab:
    لا ميرسي على واجب والف شكر لتلبية دعوتي وتشريفك لمدونتي بالزيارة وارجو تكرار الزيارة باستمرار
    سكتم...بكتم:
    ياباشا دة شرف كبير ليا تشريفك لمدونتي
    بس انت ماجبتش معاك الوزير دلدول ومهموز ليه؟
    yasmina:
    زيارتك لمدونتي فعلا شيء جميل جدا...فعلا معلوماتنا عن عرب الداخل قليلة جدا ودي فرصة اني اتعرف عليهم عن قرب
    ياريت ماتحرمناش من تعليقاتك ومشاركتك معانا في موضوعات المدونة
    اماني:
    فكرتيني ايام ما كان الموبايل املة
    بس فعلا دلوقتي المحمول اصبح في يد الجميع

    ReplyDelete
  19. عندك حق الموبيل رغم كل شىء اصبح جزىء من حياتنا ومنقدرشى نبعد عنة

    بوست مميز

    تحياتى

    ReplyDelete
  20. هو احنا مش بنحبه و لا حاجة بس منقدرش نستغنى عنه دي حقيقة

    ReplyDelete
  21. السلام عليكم ورحمة الله وبركاته

    جميل اوي البوست ده
    تصدق كنت ناويه اكتب حاجه زي كده

    بالنسبة لي الموبايل لا يمثل اي شئ في حياتي ، وعادي جدا بقدر استغني عنه بالايام والشهور حتي لما تجيني ميسد ولا اس ام اس بكسل اشوف مين ..ههههه اه والله دي حقيقه

    اليومين دول باستخدمه كمنبه علشان زنان ومش بيبطل الا لما تقوم فعلا وتطفيه

    شكرا علي البوست الروعه ....تحياتي

    ReplyDelete
  22. هههههههههههه انا الحمد الله دلوقتي تليفوني مابيرنش غير ماما او بابا او المدير بتاعي او اذا كان في حد من زميلي عايزين يسالوا عن حد تاني يتصلوا بيا لكن زمان اول مااشتريت الموب يانهار ماما كانت بتقولي دا سنترال شبرا ولا السكه الحديد
    ماكنش بيبطل رن بجد يعني اذا رن او اتصال او رسايل
    لكن قبل الموبيل دا كان مزاج عندي تليفون بعد الساعه 12 ده والله ماكنش ولاد كانت جارتي بنت كنا بنكلم بعض وتخيل كأننا بنحب في بعض دا كان ايام المعيله يارب تعود بس انا بحب اوي اتكلم في تليفون البيت اكتر من الموب بجد لحد دلوقتي متعتي تليفون البيت ده
    بوست عجبني وخالني افتكر ايام قبل ماتكلمني اديني رنه وانا هعقد جنب الفون وارد انا ههههههههه ايام

    ReplyDelete
  23. Succès ... S'il vous plaît noter les nouveaux sujets toujours

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails