Thursday, 5 April 2007

تاج

التاج دة وصلني من ريم وكان عبارة عن السؤال دة:
تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها‘
السؤال دة الحقيقة صدمني.....مش لغرابته ولا حاجة ولكن لأنه خلاني اسأل نفسي نفس السؤال انا ايه هواياتي؟!!!!
تخيلوا لحد النهاردة بالليل او بالتحديد لحد 5 دقايق فاتوا مكنتش عارف انا ايه هواياتي....بس بعد ما قعدت مع نفسي كدة وفنطت افكاري زي ورق الكوتشينة اكتشفت ان انا بعمل حاجات كتير جدا بس ولا واحدة منها تقدري تقولي عليها انها هواية بالمعنى المفهوم
بمعنى ان مفيش حاجة معينة لما بكون زهقان لازم اعملها او لما بعملها بنسى الدنيا والناس والواقع.
اكتشفت فعلا ان انا معنديش حاجة كدة
زمان وانا لسه طالب كنت بحب المذاكرة وكانت بتيجي عليا ايام بحب قوي اقعد اذاكر واقسم المواد كدة واحط جداول للمذاكرة.....بس ماقدرش اقول انها كانت ساعتها هواية لأني كان في ايام برضة مابقاش طايق افتح كتاب او اقرأ كلمة وتخيلوا الكلام دة كان بيبقى في عز ما بيكون لازم اذاكر تلاقيني قفشت من المذاكرة
دلوقتي بقى بعمل حاجات كتيرة جدا بتاخد مني وقت بس مش عارف دي هوايات ولا ايه؟!!!!بس لو كانت هوايات تبقى هوايات غريبة جدا
اولا بحب قوي اقرأالجرايد الصبح الجرايد الصبح ليها طعم تاني خالص.....مابحبش افراها بالليل ولا العصر لازم تكون الصبح وطبعا مش اي جرايد.....المحترمة بس
كمان عندي هواية اني في اوقات الفراغ اخرج الف بالعربية بدون اي سبب الا الفرجة ع الناس والتجول في الشوارع بس برضة مش هواية لاني بزهق بسرعة
بحب برضة العب بلاي ستيشن بس برضة مش ممكن نقول عليها هواية لاني بزهق منها بسرعة وماليش تقل عليها قوي فين وفين لما نفسي تهفني عليها.
طبعا الكومبيوتر والنت اساسي في حياتي.....بس برضة مش بنسى الدنيا ولا حاجة وانا معاهم ممكن اتعامل مع حاجات تانية وانا ع النت ومابقعدش عليه كتير قوي بس مانكرش ان ما ينفعش يعدي يوم من غير انترنت
ساعات برضة بحب الفسح والسفر بس لما بسافر بحب ارجع....ولما برجع بزهق
ربنا يسامحك يا ريم......تلاقيكي بتقولي ايه البني ادم عديم الهوايه دة؟!!! بس هي دي الحقيقة والله مش عارف انا حاجة غريبة ولا عادي بتحصل يعني
عموما انا عارف ان انا كائن ملول (كثير الملل يعني) واعتقد ان كائن ملول زيي كدة وهوايات ماتركبش مع بعضها
بس اديني عايش وبعمل حاجات كتير بحبها

4 comments:

  1. ده الموضوع طلع بسيط خالص
    انت حسيستنى انى هلاقى حاله فريده من نوعها
    بص هو انت اكيد عندك هوايه
    بس انت مش بتاخد بالك
    يعنى مثلا موضوع قرياه الجرايد دى اكيد هوايه
    وخاصه انك بتحب تقراها الصبح
    وكمان اللف بالعربيه
    واكيد النت
    كل ده ممكن تكون هوايات
    ومش شرط ان الواحد وهو بيمارس هوايته ينفصل عن العالم
    بالعكس فى كتير ناس بتمارس هوايتها وهى بتتعامل عادى
    وبجد انت عندك هوايات حلوه
    مش زى ما انت متخيل
    وكمان عادى جدا ان الواحد يزهق شويه من هوايته
    انا اهو مبطله رسم بقالى حوالى السنه
    ومع ذلك هى هوايتى رقم 1
    مش شرط انها علشان هوايه تمارسها كتير
    ممكن تعملها فى اوقات معينه بس بتحب تعملها
    بجد انا مبسوطه اوى انك رديت على التاج
    تحياتى ليك :))

    ReplyDelete
  2. منت اجاباتك حلوه
    زعلان ليه
    وبعدين التاج علينا حق
    هههههههههههه
    تحياتى

    ReplyDelete
  3. عادى يعنى يا احمد
    ما هو على رايك
    هحاول ادور على دكتور شاطر
    هههههههه
    تحياتى

    ReplyDelete
  4. ريم:
    الف شكر ليكي طبعا على التاج
    بس انا كدة ابقى تحولت من عديم الهوايه الى متعدد الهوايات...انا كان قصدي ان يكون عندي هواية واحدة او اتنين بمووت فيهم ومااقدرش اعيش من غيرهم ودة كان نفسي يكون موجود عندي....بس عموما اهم حاجة ان الواحد يكون لاقي اللي بيشغل وقت فراغه فيه.
    محمد:
    اهلا بيك ويارب الاقي تعليقاتك على مدونتي باستمرار
    رانيا:
    مشيناها تيجان كتبت علينا...ومن كتبت عليه تيجانا مشاها

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails