Wednesday, 4 April 2007

أيه الإحباط اللي ماشي في البلد دة؟


احباااااااااااااااااااااااااااااااااااااااااط

حاسس ان في حالة احباط ماشية في البلد
مش ببالغ والله بس بجد جرب كدة تبص في وشوش الناس في الشارع في شغلك في المواصلات حتى في محلات الأكل.....بحس ان الناس بتاكل وهي مش مبسوطة
الناس محبطة يا جماعة
الشباب يا اما عازب فتلاقيه محبط علشان مش متجوز ونفسه يتجوز ومش عارف طبعا في الزمان دة يتجوز, يا اما الشاب من دول متجوز اساسا وبرضة محبط علشان ماكنش عارف ان الجواز باشكل دة وتلاقي لسان حاله بيقول كنتي فين يا لأ لما قلت أه؟!!!!
ولو جاب اولاد تلاقيه محبط من المسئوليات اللي زادت في نفس الوقت اللي الفلوس ما بتزيدش خالص, ولو ماجابش اولاد بتلاقيه محبط برضه علشان نفسه يجيب ولي العهد بقى.
اما عن البنات المحبطة فحدث ولا حرج.....البنت يا اما عندها احباط علشان تمت 23 ولسة ماتجوزتش وماما وصاحباتها عمالين يدعوا لها لحد ماجالها توتر وفي نفس الوقت صاحبتها الأنتيم جالها عدلها وهي لسة.
يا اما عندها احباط بس علشان اتخطبت واتجوزت بدري بدري وحست انها اتخطفت قوام قوام وما لحقتش تعيش شبابها ومراهقتها واتلخمت وهي لسة في بداية العشرين في عيل واتنين.
الرجالة الكبار فوق الاربعين عندهم احباط من متطلبات الحياة اللي مابترحمش وخوف من المستقبل على عيالهم اللي بدأوا يكبروا وزادت متطلباتهم بشكل مخيف ومحبطين ازاي هيواجهوا الأعباء دي؟
الأمهات والسيدات كمان محبطين على عمرهم اللي ضاع في تربية العيال لحد ما كبروا ومعدش حد مهتم بيهم وكل واحد مشغول في دنيته ومحدش فاضي يشوف حد
الناس كلها محبطة....تحس ان الدنيا ريحتها احباط....طب اقولكم حاجة:
انا بقيت بحس ان القطط والكلاب الضالة في الشارع عندها احباط من الحياة.....تحس ان القطط معدتش بتفرق معاها...زمان القطة من دول كانت تجري لو شافتك مقرب منها...دلوقتي تلاقي القطة متنحة وواقفة كدة بتبص لك بعينيها الخضر دول ولا انت فارق معاها اساسا.....اهو دة برضة نوع من الاحباط.
انا كمان محبط والله..ويائس والدليل على كدة الهلوسة اللي انا عمال اهلوسها دي
عموما هختم الكلام العجيب دة بمقولة خالدة للفنان العظيم البعيد تماما عن الاحباط (ريكوو) وهو بيقول:
أنا جايلي يا ناس احباط.....كدة كدة من تحت الباط

7 comments:

  1. من حيث الرصد عندك حق من حيث الحل فمن يتق الله يجعل له مخرجا ويرزقه من حيث لا يحتسب

    مفيش احباط فى الأسلام حيث يقول صلىالله عليه وسلم
    عجبت لأمر المؤمن كله خير ، انا اصابه سراء شكر فكان خير له ، وان اصابته ضراء صبر فكان خير له
    او كما قال صلى الله عليه وسلم

    ReplyDelete
  2. عندك حق يا احمد يا خويا
    بس حلو موضوع القطط و الكلاب دة
    فكرتنى بموقف الناس بجد افتكرتنى مجنونه
    كنت ماشية مرة فى بلد كدة و لقيت قطه و حوليها فراخ بتلعب من غير خشى و لا حياء و القطة و لا الهوا
    استغربت قوى و شخطت فيها زى العبيطة و قلتها خلاص معتش فى ادب
    مش هتجرى وراهم خلاص
    ؟؟؟؟؟؟؟؟؟؟؟؟
    بصراحة انا جالى احباط و القطة بصتلى باحباط بردة
    هيه
    دنيااااااااااا

    ReplyDelete
  3. تصدق ان قطتى عندها اكتئاب بجد؟
    والله عندها اكتئاب
    ومؤخرا خرجت ولم تعد واحساسى انها ماتت من الاحباط

    اذا كانت الحيوانت حصلها كدا
    فمابالك بينا وباللى بيحصلنا
    بس بصراحه انا ضد ان الحل يبقى اننا نحبط وبس
    لازم يكون فى حلول تانيه عمليه موش هنفضل مخروصين طول العمر

    يمكن لو قربنا من ربنا اكتر وحاولنا نطبق دينا ربنا يكرمنا

    )ان الله لا يغير ما بقوم حتى يغيروا ما بانفسهم(

    ReplyDelete
  4. انا مش هعلق على الموضوع دلوقتى
    انا بس هقولك ان عندى ليك تاج فى اخر بوست عندى
    ابقى شوفه
    اونا هرجع تانى اعلق على الموضوع :)

    ReplyDelete
  5. ان معاك فعلا انا فى حاله احباط منتشره جدا
    وانا لاحظتها حواليلا فى كل اللى اعرفهم
    لدرجه انى انا كمان من فتره كان عندى حاله احباط وحشه اوى
    انا مش عارفه ايه السبب بالظبط
    بس يمكن السبب فى الاحوال بتسوء من سئ الى اسواء
    وان مفيش اى بارقه امل ان بكره احسن
    موضوعك بجد قلب عليا المواجع يا سمير
    ادعى بس م شادخل فى حاله احباط بسبب موضوعك
    تحياتى:)

    ReplyDelete
  6. الاحباط مش بس عندكم
    كمان عندنا الاحساس دة

    ReplyDelete
  7. كنت محبط فى مصر وقلت يمكن لو هاجرت حالتى تتحسن. وسافرت لبلاد بيقولوا عليها ديمقراطية. وما فيش سنة الا ورجعت لى حالة الإحباط

    الله ، طب دول ما عندهمش حزب وطنى - ليه بقى بيعملوا اللى هما عايزينه وكأن الشعب قطيع غنم؟

    طيب الناس دى بتقول اللى هى عايزاه لكن ايه فايدة كلامهم؟

    والناس دى معظمها عايشة معقول والشغل موجود والعلاج شبه مجانى وكمان التعليم ، طب ليه هما محبطين؟ يمكن عشان سعر الخمرة زاد حبتين؟

    إذن صحيح ان فيه علاقة قوية بين الإحباط والإنبساط؟

    يعنى لو الحكومة هنا رخصت سعر الخمرة ها ينتهى الإحباط ؟

    طيب الحكومة فى مصر ازاى حاتبسط الأغلبية اللى ما بيشربوش الخمرة؟
    وهنا جالى فى المنام جمال مبارك وقاللى
    اللى مش قادرين يشربوا خمرة حا نشربهم ينسوون

    المشكلة انى لما صحيت من النوم وبصيت على أخبار مصر مالقيتش قرار جمهورى بتخفيض سعر الينسوون

    وعدت الى احباطى الحبيب

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails