Sunday, 1 April 2007

سينما نظيفة.......ولا........؟


(السينما النظيفة)

من المصطلحات القليلة اللي بلاقيها بتواجه اراء متناقضة جدا.
بلاقي ناس كتيرة قوي بتدافع عن مصطلح (السينما النظيفة) وفي نفس الوقت ناس بيلاقوا ان المصطلح دة بلا معنى وان المصطلح دة ضد معنى السينما وان مفيش حاجة اسمها (سينما نظيفة) و(سينما قذرة).
تعالوا نناقش الموضوع دة بهدوء وبدون تشنج او تحيز اي فرد لرأيه
نتكلم الاول عن الرافضين لمصطلح (السينما النظيفة) دي:
الناس دول بيقولوا ان مفيش حاجة اسمها سينما نظيفة وسينما متسخة السينما هي السينما......السينما مرآة المجتمع ومعنى كلمة سينما نظيفة هي ان المجتمع هيظهر في السينما دي بشكل نظيف ومثالي ودة طبعا مش موجود في الواقع.
وكمان مصطلح (السينما النظيفة) اذا كان المقصود بيه هي سينما خالية من المشاهد الساخنة والقبلات والاغراءات فدة برضة بيكون كلام فارغ..لأن الكلام دة حتى لو كنا بنرفض نشوفه فهو موجود في المجتمع شئنا ام ابينا واذا قلنا ان السينما هي تعرية لواقعنا ولمجتمعنا بكل ما فيه يبقى لازم السينما ما بتبين الاشياء الايجابية يبقى لازم كمان تورينا الجانب الاخر.
وبعدين هو المجتمع او حياتنا بشكل عام بتخلو من اي شيء غير نظيف....يعني لو افترضنا ان المقصود بعدم النظافة في السينما هي مشاهد الجنس مثلا.......هل مجتمعنا مجتمع من الملائكة؟!!مفيهوش جنس؟مفيهوش اغتصاب؟!مفيهوش معاكسات وتحرشات وشتايم؟!مفيهوش دعارة وتجار مخدرات؟!!!!
بما ان مجتمعنا فيه الكلام دة كله.يبقى من حقنا كمشاهدي ومتابعي للسينما ان دة يظهر لنا في الاعمال السينمائية المختلفة
وبعدين موضوع السينما النظيفة دي فيها نوع من الحجر على حرية الفكر والابداع وكمان فيها نوع من الحجر على فكر وثقافة المشاهدين اللي السينما النظيفة بتفترض انهم اطفال يجب الحفاظ عليهم من خدش حياءهم.
وكمان موضوع السينما النظيفة دي هتخلي في نوع من المحلية في ابداعاتنا السينمائية والفكرية على اساس ان كدة افلامنا هيكون فيها قصور وبالتالي هتفقد عنصر التنافسية اذا دخلت في مجال تنافس في اي مهرجان عالمي . على اساس ان العالم كله لا يعرف هذا النوع من السينما.
دة كان رأي الناس اللي ضد (السينما النظيفة) وهو رأي وجيه زي مانتم قريتم ولهم برضة مبررتهم واسانيدهم.
طيب ما تيجوا نشوف الناس النظيفة بتاعة السينما النظيفة رأيهم ايه:
الناس دول بقى بيشوفوا ان السينما النظيفة هي احسن حاجة اتعملت في الكام سنة اللي فاتت,شوفتوا ازاي العائلات رجعت تتفرج ع السينما؟!!شوفتوا ازاي الاب ممكن ياخد مراته وبناته ويدخلوا يتفرجوا على سينما عارفين كويس قوي انها مش هتخدش حياءهم؟!!!
لو بتهاجموا السينما النظيفة ارجعوا بالذاكرة الى السبعينات والثمانينات وحتى منتصف التسعينات من القرن الماضي وافتكروا افلام نادية الجندي ونبيلة عبيد ومن قبلهم ناهد شريف اللي كانت بتكون افلام تحتوي على مشاهد جنسية صريحة ومكتوب على المشاهد دي قصة لفيلم.
افتكروا كويس قوي كان مستوى الافلام عامل ازاي؟ افتكروا هل الناس كانت بتقبل انها تروح السينما خاصة الاسر؟!!!!
وبعدين ليه المشاهد الجنسية والخارجة تكون محشورة في الفيلم على الرغم من ان ماحدث داخل غرفة النوم يكون مفهوما من سياق الدراما بدون الدخول في تفصيلات خارجة ومالهاش اي سبب الا الإثارة وزيادة مبيعات الفيلم.
راجعوا كدة افلام زمان لما كنت بتفهم من الحوار او من خلال احداث الفيلم ان حصل حاجة بين البطل والبطلة ومن غير اي مشهد يثير المشاهدين او يخدش حياء المتفرجين.
شوفتوا لما السينما بدأت تتجه الى الكوميديا وبعدها هوجة الافلام الجادة الخالية من الإثارة....الذوق السينمائي العام بدأ يرقى بشكل كبير مع حدوث بعض الاستثناءات طبعا من خلال بعض الافلام التافهة؟!!!!
وبعدين مهرجانات ايه اللي انتوا بتتكلموا عنها؟!!يعني بمشاهد خليعة هنوصل للعالمية؟!!! إذا كان دة ريقنا للعالمية...فأهلا بالمحلية إذا كان طريقها هو المحافظة على الأخلاق العامة ومراعاة حياء الناس.
انتهى دفاع اصحاب (السينما النظيفة) وقبلهم الرافضين لها....ولم ينتهي الجدل الدائر حول الموضوع دة وعلى فكرة لا الرافضين للسينما النظيفة ناس منحلة عايزة تشوف مناظر في الأفلام ولا كمان المدافعين عن السينما النظيفة ناس تزمتة بذقون
انما هي مسألة مبدأ....مبدأ بيدافع عن حرية اي فرد انه يشوف الحقايق كاملة وانه يشوف الفيلم بكل تفاصيل الواقع, ومبدأ مضاد بيشوف ان السينما النظيفة رجعت العائلات للسينما ورجعت ثقة رب الأسرة انه يخللي اولاده وبناته يروحوا السينما ويتفرجوا على افلام بلا خجل ولا خوف.
انتم ايه رأيكم؟!!!! سينما نظيفة ولا سينما غير مصنفة التصنيفات دي(على اساس ان السينما سينما)

منتظر رأيكم

5 comments:

  1. طبعاً مع النظيفه وليذهب دعاه الأنحلال للجحيم

    ReplyDelete
  2. بس انا كنت مستنى أعرف رأيك انت
    اللى خمنت
    انه مؤيد للسينما النظيفة من تعليقك على اخر بوست عندى
    ......
    شقت فيلم بحب السما؟
    عجبك؟
    مشهد الجنس بين محمود حميدة و ليلى علوى تفتكر كان ضرورى ولا؟

    ReplyDelete
  3. مع السينما النظيفة و الاسباب اللي الناس اللي مؤيدة للكلام ده في رأيي مبرراتها مفيدة

    في وجهة نظري السينما مش مجرد محاكاة للواقع و خلاص

    هي رسالة انت بترسلها للواقع ده علشان يا تنتقده يا علشان تصلحه يا علشان تفسده

    و الاصلاح مش لازم يكون سياسي او ديني

    الاصلاح معناه الابتسامه و الضحكة الصح في الموقف الصح

    الحزن في الموعد المضبوط

    ازاي قيمك تتوظف صح

    اللي شاف مسرحية الشفرة اللي عملها عبد العزيز مخيون و أحمد مرسي و اللي كانت في مسرح فيصل ندا يقدر يعرف ان الفن و السينما و المسرح ممكن يوصلوا رسالة الاصلاح بالكوميديا و الدراما و الكلام من غير ما يجرحوا قيمنا و لا نفوسنا

    انا مع مصطلح السينما النظيفة قلبا و قالبا

    ReplyDelete
  4. محمد عبد الغفار:
    طبعا دة رأيك ونحترمه...بس في ناس كتير رأيها مش كدة وبرضة نحترمه
    احمد مختار عاشور:
    والله يا احمد الموضوع دة محيرني انا كمان...في فعلا افلام بتكون مطلوب بعض المشاهد اللي قد تبدو غير مألوفة للعامة علشان الفكرة توصل
    وفي افلام تانية بالبلدي كدة بتستعبط علشان تحشر كام رقصة على كام مشهد اغراء وكله تحت راية السينما النظيفة
    انا رأيي ان اي فيلم فيه مشاهد جريئة شوية تندرج تحت مسمى للكبار فقط زي بحب السيما اللي انت ذكرته كمثال
    kimexlilo:
    برضة مانقدرش نطلق حكم مطلق مع السينما النظيفة ككل او مع غير النظيفة على اطلاقها
    انما برضة زي انا ماقولت الواقع محتاج احيانا يتشخص بشكل صح ودة محتاج بعض المشاهد الجريئة بس مش عمال على بطال زي افلام ناهد شريف وغيرها

    ReplyDelete
  5. أقولك على حاجة لذيذة جدا عشان اريحك بالجدل اللى بيدور فى دماغك
    انا لو مخرج
    و السيناريو يتطلب انى اجيب رقاصة فى الفيلم
    هدور على واحدة بتشتغل اصلا رقاصة
    مش هجيب محجبة و اقلعها يعنى
    اقولك على حاجة كمان
    انا اختى محجبة
    و هكون رافض جداااااااا و بشدة انها تكون ممثلة
    طبعا هيقولى أحدهم اللى مترضهوش لنفسك مترضهوش لغيرك
    هرد و اقول
    لا ديه مش قاعدة
    مهنة الخدامة فى البيوت مهمة جدا
    و شريفة جدا
    بس برضه مرضاش لأختى انها تكون خدامة
    .....
    شكرا لصديقى العزيز و اتمنى ان تكون وجهة نظرى وصلتلك

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails