Saturday, 31 March 2007

حاجة تنقط.....تفرس


قلت النهاردة انا هكتب وانا ماشي في الشارع
هتقولوا ازاي.......اقوللكم
وانا قاعد كدة مع نفسي اكتشفت ان انا سريع الاستفزاز قوي....واني لو فضلت اُستفز بنفس المعدل دة انا ممكن يجيلي جلطة في خلال سنتين من دلوقتي.
قعدت برضة كدة و قلت طيب انا ايه اللي بيستفزني في الشارع؟!!!!وهل الحاجات اللي بتنقطني دي تستحق كدة؟ ولا انا اللي محبكها شويتين؟!!!!
قلت افضفض وافك عن نفسي لعل وعسى حد يرد عليا ويقول لي انت غلطااااان....دي حاجات بسيطة او حد تاني ييجي يقول: والله يابني انت معاك حق دي حاجة تنقط
لما تبقى ماشي في الشارع ومعاك والدتك او اختك او مراتك او خطيبتك او حتى مش معاك حد بس في بنات ماشية في الشارع جنبك وتلاقي اتنين شباب او اكتر بيشتموا بعض بالأم وياريت كدة بس دة بألفاظ اقسى انواع القذارة.
ياترى بيكون شعورك ايه؟ على فكرة الشتيمة دي بتختلف تماما لما بتسمعها في مكان مفيهوش بنات او سيدات....بس وجودهم في مكان بيتسمع فيه شتايم بالمستوى دة بتكون محرجة جدا.
لما تنزل تركب عربيتك وانت متأخر كدة او وراك ميعاد مهم جدا وتفاجأ بحد لطيف خفيف كدة قافل بعربيته على عربية سيادتك لا وكمان سيادته شادد فرامل اليد بتاعة عربيته وولا في دماغ جنابه ان في بني أدم من حقه يروح شغله او يقضي مشاويره.
قمة النرفزة بقى بتكون لما يجيلك وعلى وشه ابتسامة صفرا كدة وولا يعبرك وكأن مفيش حاجة حصلت اساسا.
لما تروح اي مول تجاري او مصلحة حكومية او اي مكان في اي شارع في مصر وتركن عربيتك وتفاجأ كدة من حيث لا تدري بشخص عجيب كدة واقف جنب عربيتك وبيقوللك وعلى وشه ابتسامة جميلة: 2 جنيه يا بيه
هو مااكتفاش انه بيطلب فلوس انت شخصيا مش عارف مقابل ايه!!!!!!لا وكمان حدد قيمة الفلوس دي ب 2 جنيه.........منتهى الثقة
لما تلاقي الشارع واقف لأن فيه ميكروباص واقف بينزل ركاب او بيحمل ركاب في نص الشارع بالضبط ووراه ييجي 10 عربيات كلها قالبة الدنيا وتلاقيه منتهى الثقة والثبات وكأنه ماشي بمبدأ "القافلة تسير والكلاب تعوي"......وممكن كمان تتنقط اكتر لما تلاقي امين شرطة او عسكري واقف على بعد امتار منه ولكنه مش شايف او الأصح انه عامل مش شايف.
لما تلاقي كل محل حاطط طوبتين كبار كدة حلوين قدام المحل بتاعه علشان محدش يقف بعربيته قدام المحل....لأن دة من وجهة نظر صاحب المحل تقريبا هيسد ابواب الرزق.....وعلى الرغم من ان في حاجة في مصر اسمها (شرطة المرافق) الا ان واضح انهم مش واخدين بالهم من الموضوع دة على اساس انهم مابيبصوش للهيافات دي
لما تلاقي شلة شباب ماشية مجموعة وعمالين يجعروا في الشارع ويغنوا باصوات اقرب الى الصراخ....انا مش عارف دي طاقات مكبوتة ولا ايه؟
لما تلاقي بنات ماشين في الشارع لابسة من غير هدوم ومنتهى المياعة والخلاعة بس لو حد جة يتكلم معاها يا معلم بتلاقيها تقمصت شخصية خضرة الشريفة وبتحسس الولد اللي جه يكلمها انه بيكلم قديسة على الرغم ان لبسها مايدلش على كدة ابدا.....مش ليك حق تتنقط
وبالمناسبة الموقف دة بيفكرني ببعض ممثلاتنا الجميلات اللي لما حد بيسألهم على ادوار الاغراء اللي بيقدموها....بتلاقي الاجابة الأكلشيه المحفوظة عن ظهر قلب واللي اعتقد ان الصحفي هو اللي بيكتبها لهم بالنيابة عنهم:
"انا برحب بادوار الاغراء الموظفة في السيناريو واللي لها ضرورة درامية بمعنى اني مش معقول هظهر ع البحر الا بالمايوه"
على الرغم ان مش كل اللي بيقعدوا ع البحر بيكونوا لابسين مايوهات بس هم ردهم بيكون كدة......بالذمة مش حاجة تنقط
لما تلاقي الشرطة سايبة البانجو بيتباع في اماكن هم عارفينها كويس ومع ذلك مابيظبطوهاش وتلاقي حملة امنية في ارقى شوارع المدن و1/2 الشباب اللي في الشارع دة ملمومة في البوكس.......حاجة تنقط
لما تلاقي بعض الطرق في مصر اللي المفروض انها سفر وبتربط بين محافظتين وتلاقي اقصى سرعة للسيارات الملاكي 60 كم في الساعة (اجزاء من طريق القاهرة الاسكندرية الزراعي) معقول في القرن ال 21 والتطور الرهيب في السيارات والطرق في العالم كله واحنا لسة بنمشي على 60......مش حاجة تفرس
لما تلاقي الجرايد مرطرطة عند بياع الجرايد مش لاقية حد يشتريها في نفس الوقت اللي تلاقي محلات الفول والطعمية عامرة بالناس ومش ملاحقة ع الطلبات
يبقى في حاجة غلط في الشعب دة
ولسة كتير قوي والله......دة شارعنا المصري ملياااااااااااااااااااااااااااااااااااان مفارقات ومضحكات ومبكيات بس الظاهر ان انا كبس عليا النوم
بس ان شاء الله لينا اجزاء تانية وياريت اللي عنده عوامل ومسببات جلطات زي اللي مكتوبة فوق دي يقولها واهو نحط همنا على هم بعض ويمكن تكونوا شايفين حاجات تفرس وتنقط انا مش واخد بالي منها......فنشجع بعض
رحمتك يارب


8 comments:

  1. فعلا فى حاجت الواحد بيشوفها وبتفرق وتنقط
    وخاصه موقف لعربيه والممثلات اللى مش بتتباس غير فى سياق الدراما:)
    ومن المواقف اللى تنقط كمان لما بتكون راكب تاكسى ومستعجل جدا وتلاقى سواق التاكسى بيلف بيك وبيخلص مشاويره هو الاول ويقولك بكل استفزاز وعلى وشه ابتسامه صفرا تحس نه عايز تضربه بسببها ويقولك انا اسف احسن بكون بعطلك ولا حاجه
    مدونتك عجبتنى جدا
    اكيد ليا زياره تانيه عندك

    ReplyDelete
  2. ليه ده انت عندك بلاوي

    عندك العربية اللي صاحبها يركنها على ناصية دوران علشان يسد الحارة الوحيدة اللي المفروض تكون ماشية لو في اشارة على اساس انه بيدخل شارع بالجنب مش بيقطعه

    و الناس اللي بتعتبر اشارة المرور اهانة للكرامة و كسر للهيبة و مايرضاش يشغلها و ماشي في الشارع كإنه شارع ابوه

    و اللي يشوف اشارتك و مايرضاش يسمحلك انك تعدي للمكان اللي انت عايزه لمجرد رغبة سادية لا يحاول هو اخفاءها

    و اللي بيمشي بعربيته و يجي جنب واحد ماشي في امان الله و يروح مفرمل جنبه علشان يخضه

    ده غير الشاب اللي تشوفه ماشي في الشارع ماتعرفش ده ولد و للا بنت

    و الناس اللي ماشية ترمي زبالتها و تتف (اسف في اللفظ) في الشارع كانك مش معدي

    و يسلام لو قرفه ده جه على جزمتك او هدومك

    و الاعلانات اللي اقل ما توصف بها انها جنسية صريحة متعلقة في الشوارع كانها بتقولك انا عايزة اخدش حياءك

    ReplyDelete
  3. على الحال ده يبنىالجلطه تجيلك قبل سنتين بكتير اوى

    ReplyDelete
  4. يا احمد مش عارف خوفت عليك بجد
    المظاهر السلبية مليانة الشوارع و البيوت و الحارات و المدارس و .....
    ربنا يحمى قلبك الرقيق من اللى يضايقه لان بجد لو ركزنا قوى الواحد ممكن يموت فيها
    بعد الشر عليك يعنى
    بس بجد حبك للوطن و رصدك لسلبياته محتاج انه يتعرف و يتعالج بس ده مش هايبدا صح الا لما الناس تحس انها مش فى حرب و ان الاساسيات هو قادر عليها عشان نقدر نفوقه ونقف على اقدامنا صح
    تحياتى لهذا البوست الجميل

    على فكرة انا اسمى طارق المملوك مش المملوكى
    :)

    ReplyDelete
  5. اولا الاغنية الى انت حاططها بجد تحفة
    ثانيا
    ليه يا ابنى الى بتعمله فى نفسك دة
    اعصابك
    صحتك يا بابا
    متبقاش مصر لو مش فيها الى انت بتقوله دة
    دة لسه كمان يا ما فى الجراب يا حاوى
    براحة على نفسك يا احمد
    مصر عايزاك و الجروب كمان عايزك
    اله
    اومال مين الى هيجيبلنا الاخبار
    اقولك نصيحة
    اطلع البلكونه
    ههههههههههههههههه
    فى الجون صح؟؟؟؟؟؟؟؟؟

    ReplyDelete
  6. طبعا شاكرين مهللين لكل اللي شاركوني الرأي في البوست دة لحد دلوقتي:
    ريمو:
    موضوع التاكسيات والميكروباصات والحاجات اللطيفة دي ممكن الواحد يفتح لهم مدونة مخصوص ليهم لأن حكاويهم تتكتب في مجلدات
    والف شكر على رأيك في المدونة ومستني منك تعليقات على مكوناتها كلها بقى
    كيمكسليلو:
    والنبي ماتقلبش عليا المواجع....انا اللي كتبته دة نقطة في بحر من سلبيات بلدنا...المشرحة مش ناقصة قتلى.
    محمد عبد الغفار:
    بالمعدل دة ممكن فعلا السنتين يبقى تفاؤل مني.....بس املنا في ربنا كبير
    طارق المملوك:
    ساعات بيتهيأ لي يا عم طارق ان الحل في الشعب دة انه ينضرب بقنبلة نووية فنموت كلنا وييجي شعب جديد على نضافة
    رانيا:
    الف شكر هي الاغنية فعلا جميلة وهي على فكرة تتر مسلسل مسألة مبدأ ودة كان بيتعرض في رمضان من حوالي 3 سنين
    لا بس حتة ملعوبة منك حكاية اطلع البلكونة دي بتدل انك صاحية ومركزة....حلوة.

    ReplyDelete
  7. ازاي انا مشفتش البلوج ده قبل كده
    ؟؟؟
    مش عارفه منت مستخبي فين

    بس موضوع اني مرحتش شغلي كذا مره من تحت راس واحد بهيم حيوان راكن صف تاني و ندهت امت لا اله الا الله عشان يشيليلو العربيه و مفيش فايده رغم اني ساكنه جنب اسم و سامحني يا رب من كتر ما انا متنرفزه رحت مجرحاله العربيه كلها بالمفتاح اللي كان في ايدي لحد ما علابيته بقت عامله زي خريطه اسيا
    ولو كنت شفت وشو كنت شلفطو منو لله

    روح يا شيخ ربنا يسعدك من فضلك يا ريت تعملها بالبونت العريض عشان اللي ما يشتري يتفرج و يعرف الناس الي معندهاش زوق بتعمل فينا ايه

    تحياتشي

    ReplyDelete
  8. والله انا خايفه عليك احسن يحصلك حاجه
    براحه علي نفسك شويه ياسمير دا انا حاسه وانت كنت بتكتب البوست ده هاين عليك تقوم تولع في البلد وتولدهم من اول وجديد براحه
    ربنا يعينا

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails