Tuesday, 27 March 2007

كما تدين تُدان

(واجهت بعثة المنتخب الأوليمبي السعودي مواقف غريبة عقب وصولهم لمطار أدليد في أستراليا إستعدادا لمواجهة المنتخب الأسترالي يوم الأربعاء المقبل في تصفيات دورة الألعاب الأوليمبية، إذ تعرضت البعثة لحملة تفتيش واسعة كما قامت سلطات الأمن في المطار بإجبار اللاعبين على غسل أحذيتهم في المطار قبل الدخول بها إلى أستراليا.وذكرت صحيفة الرياض السعودية يوم الاثنين أن لاعبي المنتخب الأوليمبي تعرضوا إلى تأخير كبير في مطار ادليد وذلك لعملية التدقيق المفاجئة التي قامت بها السلطات هناك، وحملة التفتيش الواسعة على جميع حقائب اللاعبين، كما قام جهاز الأمن الخاص بتفتيش حقائب المسافرين على إجبار اللاعبين السعوديين على غسل أحذيتهم الرياضية الخاصة بالتدريبات وذلك بحجة اتساخها مما أثار حفيظة واستياء كافة أعضاء البعثة السعودية.وبعد ذلك، قام الاتحاد الأسترالي لكرة القدم بتسكين البعثة السعودية في فندق ثلاث نجوم يقع مباشرة بجوار مقبرة.يذكر أن المنتخب السعودي الأوليمبي يحتل حاليا صدارة المجموعة الرابعة برصيد ست نقاط جمعها من إنتصارين متتاليين، بينما يأتي منتخب أستراليا في المركز الثاني برصيد نقطتين من تعادلين)
الخبر دة لقيته هلى موقع في الجول الالكتروني من يومين.
مشاعر متناقضة انتابتني بعد قرايتي للخبر دة وكلها مشاعر غريبة جدا يعني حزن وفرح, رغبة في نشر الخبر في كل مكان ورغبة برضة اني أداري الخبر دة من باب إذا بليتم فاستتروا.
نبدأ الأول بمشاعر الفرح وهي بالأحرى مش مشاعر فرح قوي انما مشاعر شماتة , ايوة بقولها بكل صراحة هي مشاعر شماتة.
طبعا ممكن عدد كبير جدا من اللي بيقروا الموضوع دة دلوقتي يقولوا استغفر الله العظيم.....إلا الشماتة يابني...دول برضة مسلمين زينا وعرب كمان وعيب كدة...وممكن كمان اللي حصل لهم في استراليا دة يحصل لأي فريق مصري.......الخ
كل الكلام دة على عيني وراسي انما اللي سافر السعودية او شاء حظه العاثر انه ينزل اي مطار في السعودية هيعرف كويس قوي انا بقول اني شمتان فيهم ليه.
السادة السعوديون العرب المسلمون بيقسموا الناس لطبقتين مالهاش دعوة بالعروبة ولا بالإسلام في شيء.
بيصنفوا الناس لخليجيين مواطني مجلس التعاون الخليجي وغير خليجيين اي دول اخرى وطبعا كلمة دول أخرى دي بقى بيستوي فيها المصري ع الهندي ع التنزاني ع التونسي ع التشادي المسلم منهم على المسيحي على الكافر على الهندوسي.
يعني لو سيادتك مش مواطن خليجي وقررت تروح السعودية اعرف كويس قوي ان انت انسان من الدرجة التانية
لا وكمان انت مش من الدرجة التانية انت مواطن من الدرجة التالتة علشان الأوروبي والأمريكي وكمان الأسترالي أرقى منك بكتيــــــــــر.
طبعا التصنيف دة من بداية ما تنزل من الطائرة على اساس ان في منفذ جوازات للخليجيين ومنفذ جوازات تاني لبقية الجنسيات.
انا افهم ان يكون منفذ جوازات مخصص للسعوديين ومنفذ جوازات لأي جنسية تانية انما يصنفك على اساس انك خليجي او لا.....دي حاجة غريبة جدا.
ممكن بقى تقيس الكلام دة على كل التعاملات جوة البلد دي ومن ضمنها حرية التنقل بين دول مجلس التعاون الخليجي اللي موهومين بيه اللي مقصورة على أبناء البطة البيضة اللي هم طبعا دمهم راقي انما ابناء البطة السودة اللي هم بقية خلق الله فدول من وجهة نظرهم المريضة انهم دمهم ملوث مفيهوش بترول.
طبعا اللي حصل لهم في استراليا خلاني اهلل طربا وفرحا لأن الأستراليين فهموهم كدة ان زي مانتم بتصنفوا الناس احنا كمان عندنا تصنيفنا (اللي هو غلط طبعا بكل المقاييس) انما زي مانت تقدر تصنفني انا كمان ممكن اصنفك ان انت ارهابي.
عادي جدا
وعجبتني جدا حكاية اغسلوا احذيتكم دي......منتهى الذل والإهانة و كويس قوي انهم ما اتفتشوش ذاتيا.
معلش انا عارف ان كلامي دي هيُغضِب عدد كبير من اللي هيقروا الموضوع دة...انما صدقوني اللي شاف غير اللي سمع واللي راح البلد دي اللي المفروض انها عربية اسلامية هيعرف كويس قوي سر السعادة والشماتة اللي انا فيها دي.
طبعا انتابتني برضة مشاعر حزينة على حال المسلمين وعلى اللي بيحصل فيهم في مطارات ودول العالم...ومش هقول حال العرب كمان لأني مش مؤمن بفكرة القومية العربية دي أساسا بس مش دة موضوعنا دلوقتي.
انما اللي بيحصل للمسلمين الأيام دي على أيد الغرب إنما هو حصاد ما زرعناه او ما زرعه حكام المسلمين وأذا اردنا تغيير نظرة دول العالم لينا يبقى لازم من الأول نغير نفسنا
وغير كدة..................مفيش فايدة

4 comments:

  1. الله ما لا شماته يا اخى
    بس تصدق وجه نظرك ممكن تكون صح
    بس بردة يعنى متوصلش لدرجة الشماته
    كفاية الى بيحصل فينا يا احمد
    هتلاقى كتير بردة يشمت فيناااااااااا

    ReplyDelete
  2. دعوة عامة
    أدعوكم انا احمد سعيد صاحب مدونة عاوز اتجوز للمشاركة معنا فى المدونة الجديدة والتى يوف تنال اعجابكم
    وأدعوكم ايضا للمشاركة معنا فى المواضيع
    وجزاكم الله خيرا
    www.zawage.blogspot.com

    ReplyDelete
  3. ممتاز يا أبو سمير
    .........
    أنا مسلم و موحد بالله مع ذلك ياخى أكتر شعب بكرهه فى الدنيا هو السعودى
    سبحان الله
    .........
    انا برضه زيك مش مؤمن بالقومية العربية
    .........
    بس انا مش بشاركك الشماتة فيهم
    عارف ليه
    عشان هم مش بيتعلموا من الدروس ديه و بيظلوا على تخلفهم
    و معتقدش انهم هيغيروا من نفسهم
    هم بس هيقولوا ان الله يمتحنهم
    .....
    ربنا يمتحنهم على طول

    ReplyDelete
  4. ارجع تاني يا رانيا واقول لك ان اللي شاف غير اللي سمع.
    ومهما وصفت ليكي بشاعة الشغب دة مش هتصدقي.
    بالنسبة ل احمد سعيد....انت نشنت فعلا انا فعلا عازب....بس انت ايه اللي عرفك؟ اكيد مدونتك هايلة.
    اما احمد مختار.....اكيد هيسقطوا في كل الامتحانات...علشان هم اساسا ما بيعرفوش يفكوا الخط

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails