Thursday, 22 March 2007

نراهن على مين بس؟

مش عارف ايه المخرج من اللي احنا فيه دلوقتي؟ لقد وصلنا لمرحلة رهيبة من اليأس وفقدان الأمل.وصلنا لمرحلة اننا نبصم بالعشرة ان مفيش فايدة
مفييييييييييييييييش فايدة
لو راهننا ع الناس اديكم شايفين الناس في مصر عاملة ازاي؟ موضوع التعديلات الدستورية دي مش في دماغها خالص يا اما علشان هم جهلة ما يعرفوش حاجة عن الموضوع دة اساسا
يا اما علشان هم متعلمين بس للاسف مش فاهمين اصلا يعني ايه تعديلات دستورية من الاساس وكل علاقتهن بالدستور تنحصر في انها جريدة بتطلع كل يوم اربعاء ويا ريت في ناس كتير عارفين المعلومة دي كمان
يا اما الحياة طحناهم وبيشوفوا التعديلات الدستورية دي رفاهية لا يستحقوا مناقشتها فالسياسة من وجهة نظر عدد كبير جدا من ابناء هذا الشعب هي رفاهية ووسيلة للتسلية بيقوم بها الناس المرتاحة في حياتهم مش احنا المطحونين (دة طبعا على حد قولهم)على الرغم من ان لب الحياة واساس توفير لقمة العيش اللي بيجروا وراها دي هي التعديلات الدستورية بس تكلم مين وتفهم مين
وهكذا تحول الشعب المصري لناس مش فاهمة حاجة اساسا ودة الحكومة بتراهن عليهم وعلى حشدهم يوم الاستفتاء ودول للاسف هم الاغلبية في القرى والنجوع والكفور
وناس فاهمة طشاش بس مالهاش دعوة بالسياسة ولا هتروح ولا هتيجي يوم الاثنين 26 مارس وشعارهم في الحياة يا عم سيبني في حالي هو انا ناقصك؟!!!!
وناس فاهمة وعارفة كويس قوي بس بيمثلوا ابرة في كوم قش وتقدر تقول عليهم بتاع الف او الفين او نقول حتى 100 الف بس دول يعملوا ايه وسط 70 مليون مواطن
طيب نراهن على مجلس شعب بيمثل الشرفاء فيه ربعه تقريبا والباقي عايش على مص دم الغلابة ومص دم الوطن ,الناس انتخبتهم مستقلين وراحوا راقعين الناس حتة قفا بعد مانجحوا وراحوا مرميين في احضان الوطني
طبعا دول ما ينفعش نراهن عليهم
طب نراهن على شرطة تخلت عن وظيفتها اللي بنقراها في الكتب وبنشوفها في افلام زمان وقبل كدة شافت ان شعار الشرطة في خدمة الشعب شعار غير لائق وقررت تغييره لان السادة البشوات مش ممكن يمونوا في خدمة رعاع
نراهن طيب على مين؟
على القضاء؟ بس دول خلاص خرجوا برة اللعبة من زمان وهيبقى اشرافهم ع الانتخابات ذكرى جميلة من ذكريات التاريخ الجميل.
نراهن على مين بس علشان التغيير؟
نراهن على امريكا؟ حتى دي شالت ايديها هي كمان وقررت ان الاستقرار بالنسبة لها اهم بكتير من نشر ديمقراطية في شعب من الكسالى مش عايزين يساعدوا نفسهم
مين طيب اللي هيخلصنا من اللي احنا فيه دة؟
مفيش غير اننا نراهن على تصاريف القدر لعله يكون رحيم بنا
يارب
احنا فعلا نستحق الرحمة
فأرحمنا يا ارحم الراحمين

2 comments:

  1. As salaam alaikum.

    I just surfed in ~ I am a Canadian Muslim writer. Please come by insha'Allah if you have some time to read.

    Ma salaama,

    nuh ibn

    ReplyDelete
  2. إن الله لا يغير ما بقوم حتى يغيروا ما بأنفسهم، زي ما بتقولوا مافيش فايدة، والحاجة الوحيدة اللي نقدر نعملها هو كما قال النبي صلى الله عليه وسلم"إذا رأيت شحا مطاعا وهوا متبعا وإعجاب كل ذي رأي برأيه، فعليك بخاصة نفسك" كل واحد مننا يخاف ربنا ويتقه في نفسه وفي أمه وأبيه وزوجته وأخته، كل واحد في حدوده، بلاش نغش بعض بلاش نغتاب بعض بلاش نكره بعض، أكيد لو الغالبية من الشعب عملو كده الوضع حايتغير تماما، إنما دلوقتي احنا بنقول الحكومة حرامية، صحيح بس اغلب الشعب المصري دلوقتي حرامية، مش قصدي حرامية نشاليين مثلا، لا حرامية بتغش في الميزان، وبتغش في المواد، بتحط بودرة سيراميك في اللبن، وغيره وغيره، المشكلة إن السواد الأعظم مش بيخاف الله، والعبرة بأغلب الناس، يعني لو اغلب الناس كويسة الأمر حايختلف.
    سلام
    وليد

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails